Mu Uchimwene wa Mlungu “Mtendele Uchiŵa Wejinji”

Pachangakaŵapa Uchimwene wa Mlungu watuŵele tuli mkuwujembecheya, wawuli boma ja Mlungu, uchitendekasya kuti ŵandu wosope aŵe pamtendele soni ŵakamulana. Pa Salimo 72:7 pakusasala kuti, ‘Mtendele uchiŵa wejinji.’ Ana Uchimwene wa Mlungu wuchitanda kulamulila chakachi pachilambo chapasi? Ana uchimwenewu uchitenda yeleyi mwamtuli? Soni ana ulamusi wa Uchimwenewu mpaka wakamuchisye chamtuli wawojo?

ANA UCHIMWENE WA MLUNGU UCHIYIKA CHAKACHI?

Baibulo jasasile mkanipaŵe yindu yejinji yakutesya woga yayichilosya kuti Uchimwene wa Mlungu usigele panandi kwika. Yindu “yakulosya” kuti uchimwene uŵandichileyi yili mpela ngondo, sala, yilwele, yisichinya soni kutupa kwa ungapikanila malamusi.—Mateyu 24:3, 7, 12; Luka 21:11; Chiwunukuko 6:2-8.

Chakulochesya chine m’Baibulo chasasile kuti, “Masiku gambesi tijichiyika ndaŵi ja yakusawusya. Ŵandu tachiŵa ŵakulinonyela achimsyene, ŵakunonyela mbiya,  . . . ŵangapikanila achinangolo ŵawo, ŵangatogolela, soni ŵakusakasya yindu ya Mlungu. Tachiŵa ŵangali chanasa, ŵangapikana pepani ni kwalambusya yindu achimjawo. Tachiŵa ŵandewo, soni ŵakogoya, ni ŵanganonyela yambone, . . . ŵakulikwesya soni ŵakunonyela yakusangalasya m’malo mwakumnonyela Mlungu.” (2 Timoteo 3:1-4) Ŵandu ŵane aŵele ali mkukola ndamo mpela syelesi. Nambo masiku agano ndamosi sikusimanikwa palipose.

Yakulochesya yeleyi yatandite kukwanilichikwa mu chaka cha 1914. Ŵakulemba mbili, achakulungwa ŵandale soni ŵakulemba ngani ŵaŵichile ndemanga mwachachenjele chilambochi panyuma pa chakachi. Mwachisyasyo, jwakulemba mbili jwine jwa ku Denmark lina lyakwe Peter Munch jwalembile kuti, “Ngondo ja mu 1914 jatendekasisye kuti paŵe kuchenga kwekulungwa mu mbili ja ŵandu. Mkanichiyiche chakachi ŵandu ŵayiwonaga kuti yindu pa chilambo chiyipitilisye kwenda chenene,  . . . nambo mwangajembecheya yindu yachenjile ni kuŵa ndaŵi jakusawusya, jakutesya woga, ja uŵengani soni jakusoŵa chiteteyo.”

Chakusangalasya chili chakuti, panyuma pa yakusawusya yosopeyi pachiŵa mtendele. Yakusawusyayi yikulosya kuti Uchimwene wawuchilamulila pachilambo chosope chapasi uŵandichile. Yesu jwajonjechesye kusala chindu chine chakusangalasya chakulosya kuti mbesi jiŵandichile. Jwalakwe jwatite, “Ngani syambonesi syakwamba ya Uchimwene wa Mlungu tisichilalichidwa pa chilambo chosope chapasi, kuti ŵandu ŵa mitundu josope asipikane, kaneko mbesi ni tijichiyika.”—Mateyu 24:14.

Ngani syambonesi ni syasikusaŵaga mfundo jekulungwa mu utenga wakusalalichila ŵa Mboni sya Yehofa. Kabuku kakusakamulichisya mnope masengo kali Sanja ja Mlonda Jakusala ya Uchimwene wa Yehofa. Kabukuka kakusasala yindu yakusangalasya yawuchitenda Uchimwene wa Mlungu kwa ŵandu soni chilambochi.

ANA UCHIMWENE WA MLUNGU UCHILAMULILAGA CHAMTULI?

Kwanga kwa chiwusyochi kukusapwatikapo yindu mcheche yakusosekwayi:

1. Uchimwenewu ngasiwulongoleledwaga ni ŵandale ŵa pachilambopa.

2. Achimlongola ŵandaleŵa chachilingalinga kulosya machili gawo pakusaka kulimbana ni ulamusi wa Uchimwene wa Mlungu, kwakuchiŵa kuloŵela.—Salimo 2:2-9.

3. Uchimwene wa Mlungu uchijonanga ma Uchimwene ga ndale gagakusaka kuti gapitilisye kwalamulila ŵandu. (Daniele 2:44; Chiwunukuko 19:17-21) Ngondo jakumalisya japachilambo chosopeji jikusakolanjidwa kuti Alamagedo.—Chiwunukuko 16:14, 16.

4. Wosope ŵakutenda yindu mwakamulana ni Uchimwene wa Mlungu chachikulupuka pa Alamagedo ni kwinjila m’chilambo chasambano. Jemanjaji chachiŵa ŵandu ŵele Baibulo jikusakolanga kuti “likuga lya ŵandu ŵangaŵalanjika” ŵachachiŵa mamiliyoni gejinji.—Chiwunukuko 7:9, 10, 13, 14.

ANA ULAMUSI WA UCHIMWENEWU MPAKA WAKAMUCHISYE CHAMTULI WAWOJO?

Chindu chandanda chatukusosekwa kutenda kuti tuŵajilwe mu Uchimwene wa Mlungu chili kulijiganya. Yisyene, Yesu jwasasile pajwapopelaga kwa Mlungu kuti, “Ni umi wangamala ukugopolela kuti ŵandu ŵamanyilile ŵalakwe ŵali Mlungu jikape ŵakuwona, nipo soni ammanyilile Yesu Klistu juŵamtumile wawojo.”—Yohane 17:3.

Naga ŵandu akwika pakummanyilila Yehofa Mlungu mpela Mundu, yichakamuchisya m’matala gejinji. Kwende tulole matala gaŵilipe. Lyandanda, chachikusya chikulupi chawo mwa jwalakwe. Chikulupi chele chikwete umboni wakudalilichika, chichatendekasya kulupilila kuti Uchimwene wa Mlungu uli usyesyene soni ulamusi wakwe usigele panandi. (Ahebeli 11:1) Litala lyaŵili, chachikusya chinonyelo chawo kwa Mlungu soni achimjawo. Kumnonyela Mlungu kuchatendekasya kuŵa ŵakusachilila kumpikanila ni mtima wosope. Kwanonyela achimjawo kuchatendekasya kamulichisya masengo maloŵe ga Yesu gakuti, “Mwatendeleje ŵandu ŵane mpela mumkusachila kuti ŵane amtendeleje jemanja.”—Luka 6:31.

Mpela mtati jwachinonyelo, Mkupanganya jwetu akusasaka kuti yindu yitujendeleje chenene. Baibulo jikusakolanga ya “umi usyesyene,” wele jwalakwe akusasakaga tuli tukwete. (1 Timoteo 6:19) Masiku agano nganitukola “umi usyesyene.” Ŵandu ŵajinji, umi wawo uli wakusawusya soni akusapata yakusosechela ya paumi mwakulajilila. Kuti akole chiwulili cha “umi usyesyene,” aganichisye yindu yine yakusangalasya ya wuchitenda Uchimwene wa Mlungu kwa ŵandu ŵachachiŵa mu ulamusi wakwe.