Ŵakulamula

3 Yehofa ŵajikundile mitundu jine kuti jisigalilepe m’chilambocho ni chakulinga chakuti jalinjeje Ayisalayeli wosope ŵele ŵaliji mkanaputeje nawo ngondo m’chilambo cha Kanani. 2 Yeleyi yaliji myoyo kuti mibado* jakwika msogolo ja ŵanache ŵa Ayisalayeli ŵele ŵaliji mkanajiwoneje ngondo alijiganye kuputa ngondojo. 3 Ŵandu ŵaŵasigelewo ni aŵa: Mamwenye msano ga Afilisiti, Akanani wosope, Asidoni nambosoni Ahifi ŵakutama ku matumbi ga Lebanoni kutandila ku litumbi lya Baala-helimoni mpaka kuja kwika ku Lebo-hamati.* 4 Ŵandu ŵeleŵa Mlungu ŵalesile kuti ŵalinjeje Ayisalayeli kuti alole naga Ayisalayeliwo chapikanileje malamusi ga Yehofa gaŵapochele achinangolo ŵawo kupitila mwa Mose. 5 Myoyo Ayisalayeliwo ŵatamaga yimpepe ni Akanani, Ahiti, Aamoli, Apelesi, Ahifi nambosoni Ayebusi. 6 Ayisalayeli ŵajigalaga ŵanache ŵachakongwe ŵa m’mitundu jeleji nikuŵa achiŵamkwawo. Jemanjajisoni ŵapelekaga ŵanache ŵawo ŵachakongwe kwa ŵanache ŵachalume ŵa m’mitundu jeleji, mwamti ŵatandite kujitumichila Milungu ja jemanjajo.

7 Pelepo Ayisalayeliwo ŵatesile yakusakala pameso pa Yehofa. Jemanjajo ŵamliŵalile Yehofa Mlungu jwawo, nikutanda kuyitumichila yiwanichisyo ya Baala soni kutanda kuyitindiŵalila yipilala* yaŵayitindiŵalilaga ŵandu ŵa mitundu jinejo. 8 Pelepo Yehofa ŵatumbilile mnope Ayisalayeli. Myoyo jwalakwe ŵapeleche* jemanjajo kuti aŵe mmyala mwa mwenye jwa ku Mesopotamiya* lina lyakwe Kusani-lisatayimu. Ayisalayeli ŵaŵele mmyala mwa Kusani-lisatayimu kwa yaka 8 ni kumtumichilaga. 9 Ayisalayeli paŵamŵendile Yehofa kuti ŵakamuchisye, Yehofajo ŵapele jemanjajo mundu jwakuti ŵakulupusye. Mundu jwakwe ŵaliji Otiniyele mwanache jwa Kenasi juŵaliji mpwakwe Kalebe. 10 Yehofa ŵampele jwalakwejo msimu weswela kaneko ŵaŵele jwakwelusya jwa Ayisalayeli. Lisiku line jwalakwe paŵapite kungondo Yehofa ŵampeleche mmyala mwakwe Kusani-lisatayimu, mwenye jwa ku Mesopotamiya,* mwamti jwalakwe ŵamgomeche Kusani-lisatayimu. 11 Pambesi pa yeleyi, m’chilambomo mwaliji mwangalisoni ngondo kwa yaka 40. Kaneko Otiniyele mwanache jwa Kenasi ŵawile.

12 Ayisalayeli ŵatandilesoni kutenda yakusakala pameso pa Yehofa. Myoyo Yehofa ŵakundile kuti Egiloni mwenye jwa ku Mowabu ŵagomeche Ayisalayeliwo, ligongo jemanjajo ŵatendaga yakusakala pameso pa Yehofa. 13 Konjechesya pelepa, jwalakwe ŵaŵilasile Aamoni nambosoni Aamaleki kuti akamkamuchisye jwalakwejo kulimbana ni Ayisalayeliwo. Jemanjaji ŵamenyene ngondo ni Ayisalayeli ni kusumula msinda wa yitela ya kanjesa. 14 Ayisalayeli ŵaŵele mmyala mwa mwenye Egiloni jwa ku Mowabu ni ŵamtumichile kwa yaka 18. 15 Kaneko Ayisalayeli ŵamŵendile Yehofa kuti ŵakamuchisye. Myoyo Yehofa ŵapele mundu jwakuti ŵakulupusye. Mundu jwakwe ŵaliji Ehudi mwanache jwa Gela jwa mu mbumba* ja Benjamini. Mundu jweleju ŵakamulichisyaga masengo mkono wamchiji. Pali papite ndaŵi Ayisalayeli ŵamtumile jwalakwejo kuti akapeleche yindu mpela msongo kwa mwenye Egiloni jwa ku Mowabu. 16 Sambano Ehudi ŵapanganyisye upanga* wakutema kosekose, ulewu wakwe chiŵandika mkono umo.* Jwalakwe ŵawuswechile upangawo m’chiwunu mwakwe mbali ja kumlyo mkati mwa chakuwala chakwe. 17 Kaneko ŵayiche nayo yinduyo kwa mwenye Egiloni jwa ku Mowabu. Mwenye Egiloni ŵaliji mundu jwakwimbala mnope.

18 Ehudi ali amalisisye kupeleka yindu yila ŵawutandite ulendo wakuwujila pampepe ni ŵandu ŵaŵanyakwile yinduyo. 19 Nambo paŵayiche pamalo pagaliji maganga gesepe* mwakuŵandikana ni Giligala, Ehudi ŵawujilile kwa mwenye ŵala ni kwasalila kuti, “Mwenye ŵangu, ngwete utenga wakuti nasalile pambali.” Myoyo mwenyewo ŵasalile ŵamasengo ŵawo wosope kuti, “Akopokangane.” Pelepo ŵamasengowo ŵakopweche ni kwaleka mwenyewo. 20 Myoyo Ehudi ŵayiche kwa mwenyewo mu chipinda chawo chamwinani chakusisimila chenene. Pandaŵiji mwenyewo ŵaliji jikajikape. Kaneko Ehudi ŵasalile mwenyewo kuti, “Ngwete utenga wawo wakutyochela kwa Mlungu.” Ndaŵi jijojo mwenyewo ŵajimwiche pampando wawo wauchimbichimbi. 21 Kaneko Ehudi ni mkono wakwe wamchiji ŵaswekwile upanga waŵawuswechile m’chiwunu mwakwe mbali ja kumlyo ula ni ŵamtitimiche Egiloni palutumbo. 22 Upangawo wajinjile wosope wene ni chikumbu chakwe. Mawuta gagumbilile upangawo ligongo lyakuti Ehudi nganawuchuŵa palutumbopo, mwamti chimbusi chakopweche. 23 Panyuma pakwe, Ehudi ŵawugele matanga ga chipinda chamwinanicho ni kugakiya, kaneko ŵakopochele pewindo. 24 Ehudi paŵatyosile ŵamasengo ŵa mwenye ŵala ŵawujile ni ŵagasimene matanga ga chipinda chamwinani chila gali gekiye. Myoyo jemanjajo ŵatite, “Kombolekatu kuti mwenyewo akulikamuchisya mu chipinda chawo chamkati chakusisimila chenene.” 25 Ŵamasengowo ŵalindililepe mpaka ŵayikene pakwasa mtima. Nambo paŵayiweni kuti ngakuwugulape milango ja chipinda chamwinanicho ŵajigele makiyi ni kuwugula. Paŵagambile kuwugula ŵasimene ambuje ŵawowo ali kwala pasi ali awile.

26 Ŵamasengo ŵala paŵakambilanaga yakuti ambuje ŵawo akuchelewa, Ehudi ŵatisile ni kuja kupita pamaganga gesepe pala mpaka kuja kwika chenenepe ku Seila 27 mu dela jamatumbi ja Efulayimu. Paŵayiche kweleko, jwalakwe ŵalisisye lipenga lya msengo pakwaŵilanga Ayisalayeli. Pelepo Ayisalayeli ŵatandite kutuluka kutyochela mu dela jamatumbijo soni jwalakwe ŵaliji mkwalongolela. 28 Kaneko jwalakwe ŵasalile Ayisalayeliwo kuti, “Kwende munguyeje, ligongo Yehofa ŵapeleche adani ŵenu Amowabu mmyala mwenu.” Myoyo ŵanduwo ŵamkuyisye jwalakwejo mwamti ŵasumwile malo gakombochela pa lusulo lwa Yolodani ni chakulinga chakuti Amowabu asoŵe kwakutilila. Jemanjajo nganakunda kuti jwalijose ajomboche pelepo. 29 Pandaŵiji Ayisalayeli ŵawuleje Amowabu chiŵandika 10,000, mwamti nganakunda mundu atamose jumo kuti atile. Ŵandu wosopeŵa ŵaliji achalume ŵamachili soni ŵakulimba mtima. 30 Myoyo palisikuli Ayisalayeli ŵagomeche Amowabu, mwamti m’chilambomo mwaliji mwangalisoni ngondo kwa yaka 80.

31 Panyuma pa jwalakwe, jwakwelusya jwakuyichisya ŵaliji Samugali mwanache jwa Anati. Jwalakwe ŵawuleje achalume ŵa Chifilisiti ŵakwana 600 ni ndodo jesongoche jakamulichisya masengo pakulongolela ng’ombe. Jwalakwejusoni ŵakulupwisye Ayisalayeli.