Detulonomo
21 “Naga mumsimene mundu ali awulajidwe kwitinji m’chilambo chakumpa Yehofa Mlungu jwenu kuti mkachijigale kuŵa chipanje chenu, nambo ngamkummanyilila mundu jwamwuleje jwalakwejo, 2 achakulungwakulungwa soni ŵakwelusya ŵenu alinjeje lutando kutyochela pawuli mtembo wa mundujo mpaka kuja kwika ku misinda jakusyungulila malogo. 3 Pelepo achakulungwakulungwa ŵa mumsinda wawuli pakuŵandikana ni pamalo papali mtembowo ajigaleje mwanache jwa ng’ombe jwamkolo jwanganakamulejepo masengo kapena jwanganijunyakulejepo likongwa. 4 Kaneko achakulungwakulungwa ŵa mumsindawo ajigaleje mwanache jwa ng’ombejo ni kwawula najo ku chitiŵi* chachikwete mesi gakwenda. Chitiŵicho chiŵeje chakuti nganalimejepo kapena kupanda mbeju jilijose. Payiche ku chitiŵiko amposokoleje lukosi mwanache jwa ng’ombejo.
5 “Kaneko ŵakutaga mbopesi ŵa Chilefi ayicheje ku chitiŵiko, ligongo Yehofa Mlungu jwenu ŵasagwile jemanjajo kuti amtumichileje jwalakwejo ni kupelekaga upile m’lina lya Yehofa. Jemanjajo ni ŵachachisosekwa kupeleka chigamulo pangani jilijose jatindene ŵandu mpaka kwika pakutenda yachiwawa. 6 Kaneko achakulungwakulungwa wosope ŵa mumsinda wawuli pakuŵandikana ni pamalo pawuli mtembowo anaŵeje mmyala mwawo. Jemanjajo anaŵileje penani pa mwanache jwa ng’ombe jwamposokwele lukosi jula, 7 soni asaleje kuti, ‘Makono getu nganigawulaga mundu jweleju,* soni nganitumwona mundu jweleju paŵaliji mkumwulajidwa. 8 Wawo Yehofa, ŵandu ŵawo Ayisalayeli ŵaŵawombwele akajimba magambo ligongo lya chiwa cha mundu jweleju, soni akakunda kuti magambo ga myasi ja mundu jwangalemwaju gapitilisye kuŵa pa ŵandu ŵawo Ayisalayeli.’ Patesile yeleyi magambo ga myasigo ngasigaŵa pa jemanjajo. 9 Pamtesile yindu m’mlitala lyeleli yichiŵa kuti mtesile yakuŵajilwa pameso pa Yehofa, mwamti chimchityosya magambo ga myasi ja mundu jwangalemwa pasikati penu.
10 “Naga mpite kukumenyana ngondo ni adani ŵenu, ni Yehofa Mlungu jwenu amkamuchisye kwagomeka jemanjajo mwamti mkwajigala ŵane kuti akaŵe achikapolo ŵenu, 11 soni pa ŵandu ŵamwakamwilewo mkumwona jwamkongwe jwakusalala soni mumnonyele, mwamti mkusaka kumjigala kuti aŵe ŵamkwenu, 12 mpaka mumjawusye ku nyumba jenu. Jwalakwejo asenjeje wumbo syakwe soni alenguleje yikalaŵesa yakwe. 13 Nambosoni jwalakwejo awuleje yakuwala yakwe yaŵawete pamwajigalaga kuti aŵe mpela kapolo. Panyuma pakwe atameje m’nyumba jenu. Ŵakongwewo alileje malilo ga baba ŵawo soni mama ŵawo kwa mwesi wamtundu. Panyuma pakwe, mpaka mgone nawo. Pelepo mmwejo chimchiŵa ŵalume ŵa jwamkongwejo soni jwamkongwejo chachiŵa ŵamkwenu. 14 Nambo naga ŵakongwewo ngamkwanonyelasoni mpaka mwakunde kuti ajawuleje kulikose kwakusaka.* Ngamkusosekwa kwasumisya kapena kwatendela yindu mwangasa, ligongo mmwejo mwatesisye sooni ŵakongwewo.
15 “Mpaka yikatendekwe kuti jwamlume jwalombele achakongwe ŵaŵili akumnonyela mnope jwamkongwe jumo kupunda jwinejo. Kaneko achakongwe wosopewo akwaŵelechela ŵalumewo ŵanache ŵachilume, nambo mwanache jwandanda ni kuŵa jwa ŵakongwe ŵangakwanonyelawo. 16 Sambano paliyiche lisiku lyakuti jwamlumejo apeleche chipanje chakwe kwa ŵanache ŵakwe ŵachalume, ngakukundidwa kuja kumjigala mwanache jwa jwamkongwe jwakusamnonyela mnopejo kuŵa mpela jwandanda kupagwa mmalo mwa mwanache jwa jwamkongwe jwangakusamnonyelajo. 17 Mwanache jwa jwamkongwe jwangamkusamnonyelajo amjigaleje jwelejo kuti ni jwali jwandanda kupagwa, mwamti ampeje mbali siŵili kutyochela pa yiliyose yakwete, pakuŵa jwalakwe ni jwali pakutandila pa machili gakwe gakuŵeleka. Yindu yosope yakusasosekwa kupochela mwanache jwandanda kupagwa ajigaleje jwelejo.
18 “Naga mundu akwete mwanache jwamakani soni jwakwimuchila mwamti ngakwapikanila babagwe kapena mamagwe, soni achinangolo ŵakwewo alinjilelinjile kumjamuka jwalakwejo nambo ngakwapikanila, 19 babagwe ni mamagwewo amkamuleje mwanachejo ni kwawula najo kwa achakulungwakulungwa ku geti ja msinda wakusatamaga. 20 Payiche kweleko ŵasalileje achakulungwakulungwa ŵa msinda wakwewo kuti, ‘Mwanache jwetuju ali jwamakani soni jwakwimuchila, mwamti ngakusatupikanila. Jwalakweju alisoni jwakutunduka soni akusakolelwa.’ 21 Pelepo ŵandu wosope ŵamumsinda wakwewo amwulajeje mwakumponya maganga. Mkusosekwa kutyosya chachili chakusakala pasikati penu, mwamti Ayisalayeli wosope pachachipikana yeleyi chachitenda woga.
22 Naga mundu alemwisye mwamti akusosekwa kuwulajidwa, ni mundujo awulajidwe, soni chilu chakwe achikoleche pachitela, 23 chilu chakwecho ngachikusosekwa kutama chilo chosope pachitelacho. Mmalomwakwe, mkusosekwa kulolechesya kuti mumsichile mundujo palisiku lilyolyo, ligongo mundu jwalijose jwakolechedwe pachitela ali jwamlweseche* pameso pa Mlungu. Myoyo jemanja ngamkusosekwa kuchisakasya chilambo chakumpa jemanja Yehofa Mlungu jwenu kuti chiŵe chipanje chenu.