Detulonomo
2 “Kaneko twanyakwiche ni kuwutanda ulendo wakuwujila ku chipululu tuli tujigele msewu wakwinjilila ku Nyasa Jechejewu, mwakamulana ni maloŵe gaŵasalile une Yehofa. Pandaŵi jelejo twajesile kwa masiku gejinji tuli mkusyungulila Litumbi lya Seili. 2 Pambesi pakwe, Yehofa ŵasalile une kuti, 3 ‘Jemanja mjesile ulendo welewu kusyungulila litumbili sambano mjinjilile chakumpoto. 4 Ŵanduwo mwalamule ayi: “Jemanja chimpite chiŵandika achalongo achimjenu ŵali yisukulu ya Esawu ŵakusatama ku Seili. Achalongo achimjenuwo chakamjogopeje jemanja. Myoyo mkatendeje yindu mwakusamala mnope. 5 Mkaja kumenyana ngondo ni* jemanjajo, pakuŵa ngasinampa malo galigose gakutama jemanjajo, atamose malo gamwana gakwanila kuponda lusajo lwenu. Ngasinampa malo gelego ligongo malo gosope ga Litumbi lya Seili nampele Esawu kuti gaŵe chipanje chakwe. 6 Naga mkuja kulya yakulya ya m’chilambo chawocho kapena kumwa mesi gawo, mkalipileje mbiya. 7 Mkatendeje yeleyi ligongo lyakuti une Yehofa Mlungu jwenu nampele upile jemanja pa yiliyose yamŵele mli kutenda. Une ngumanyilila chenene kuti jemanja mjesile m’chipululu chekulungwa mpela chelechi. Pa yaka 40 yosope yene yamŵele mli kwenda m’chipululuchi, une Yehofa Mlungu jwenu mbele ni jemanja mwamti nganimsoŵaga chindu chine chilichose.”’ 8 Myoyo twawutandite ulendo wetu ni kupita chiŵandika achalongo achimjetu ŵali yisukulu ya Esawu ŵakutama ku Seili. Twajesile mwakuwuŵambala msewu wa ku Alaba, Elati soni Esiyoni-geba.
“Kaneko twakotile ni kujigala msewu wakwawula ku chipululu cha Mowabu. 9 Kaneko Yehofa ŵasalile une kuti, ‘Mkatanda Amowabu kapena kumenyana nawo ngondo, pakuŵa une ngasinampa chilambo cha jemanjajo kuti chiŵe chipanje chenu ligongo msinda wa Ali* nawupeleche kwa yisukulu ya Loti kuti uŵe chipanje chawo. 10 Pandanda Aemimu ŵatamaga kweleko. Jemanjaji ŵaliji ŵandu ŵamachili soni ŵajinji, nambosoni ŵaliji ŵachalewulewu mpela Aanaki. 11 Alefaimu ŵawonekagasoni mpela Aanaki. Amowabu ŵakolangaga jemanjaji kuti ali Aemimu. 12 Pandanda, Aholi ŵatamaga ku Seili, nambo yisukulu ya Esawu yawuleje wosopewo ni kujigala malo gawogo ni kutanda kutamamo. Jemanjaji ŵatesile yeleyi mwakulandana ni yachatende Ayisalayeli pakusumula chilambo chele Yehofa akusaka nditu kwapa jemanjaji kuti chiŵe chipanje chawo. 13 Sambano mjawule, ni mjomboche Chitiŵi* cha Seledi.’ Myoyo twajombweche Chitiŵi cha Seledicho. 14 Yatujigalile yaka 38 tuli mkwenda kutyochela ku Kadesi-balineya mpaka komboka Chitiŵi cha Seledi. Twajesile yaka yosopeyi mpaka m’bado* wosope wa achalume ŵakuputa ngondo wamasile pasikati petu, mpela yaŵatite Yehofa pakulumbila kwa jemanjajo. 15 Mkono wa Yehofa walimbanaga ni jemanjajo kwatyosya pasikati petu, mwamti wosope ŵamasile.
16 “Achalume wosope ŵakuputa ngondo paŵagambile kumala kuwa pasikati petu, 17 Yehofa ŵaŵechetesoni ni une kuti, 18 ‘Lelo chimpite mudela ja Mowabu, chachili chilambo cha Ali. 19 Pachimkayiche chiŵandika kwakutama Aamoni, mkaja kwalagasya kapena kwatanda jemanjajo, pakuŵa une ngasinampa malo galigose gakutama Aamoni kuti gaŵe chipanje chenu ligongo nagapeleche malogo kwa yisukulu ya Loti kuti gaŵe chipanje chawo. 20 Pandanda malo gelegasoni gamanyikaga kuti galiji ga Alefaimu. Alefaimu pandanda ŵatamaga kweleko. Aamoni ŵakolangaga jemanjajo kuti Asamusumi. 21 Jemanjaji ŵaliji ŵandu ŵamachili soni ŵajinji nambosoni ŵaliji ŵachalewulewu mpela Aanaki. Nambo Yehofa ŵakamuchisye Aamoni kuti ŵagomeche jemanjajo, mwamti Aamoniwo ŵatopwesye jemanjajo ni kujigala malo gawogo ni kutanda kutamamo. 22 Yeleyi ni yaŵatesile Mlungu kwa yisukulu ya Esawu pakwakamuchisya kwagomeka Aholi pameso pawo. Ŵatesile yeleyi ni chakulinga chakuti ŵasumule jemanjajo chilambocho ni kwapa Aamoniwo kuti chiŵe chilambo chawo chakutama mpaka lelo. 23 Nambo pakwamba ya Aafimu, jemanjaji ŵatamaga m’misi mpaka kuja kwika ku Gasa mpaka pandaŵi jele Akafitoli ŵayiche kutyochela ku Kafitoli ni kwapyajila wosope ŵene ni kujigala malo gawo ni kutanda kutamamo.
24 “‘Sambano mnyakuche mjomboche Chitiŵi* cha Alinoni. Mlole, une nampele Sihoni mwenye jwa Aamoli jwakutama ku Hesiboni. Myoyo mtande kusumula chilambo chakwecho mwakumenyana ngondo ni jwalakwejo. 25 Kutandila lelo chinatendekasye ŵandu wosope ŵapachilambo chapasi ŵachapikaneje ya jemanja kuti amjogopeje. Ŵandu ŵelewo chachilagasika nganisyo soni kutetemela* ligongo lya jemanja.’
26 “Kaneko patwaliji ku chipululu cha Kedemoti, natumisye ŵamitenga kwa mwenye Sihoni juŵatamaga ku Hesiboni. Ŵanduwo ŵapite ni utenga wa mtendele wakuti, 27 ‘Atukunde kuti tupite nawo m’chilambo chawochi. Chitugambeje kwenda mumsewupe, ngatukotela kumkono wamlyo kapena wamchiji. 28 Yakulya yachitulyeje soni mesi gachitumweje chatusumisyeje. Atukunde kuti tugambe kupita nawo m’chilambo chawochi 29 mpaka tukajomboche Yolodani ni kwinjila m’chilambo chakusaka kutupa Yehofa Mlungu jwetu. Yeleyi ni yayatesilesoni yisukulu ya Esawu yayikutama ku Seili soni Amowabu ŵakutama ku Ali pakutukamuchisya.’ 30 Nambo mwenye Sihoni juŵatamaga ku Hesiboni nganatukunda kupita m’chilambo chakwe ligongo lyakuti Yehofa Mlungu jwenu ŵakundile kuti jwalakwejo akapikana ya ŵane soni kuti ajumusye mtima wakwe. Yeleyi yatendekwe ni chakulinga chakuti jwalakwejo ampeleche mmyala mwenu mpela mwayiŵelele lelojino.
31 “Kaneko Yehofa ŵasalile une kuti, ‘Mlole, une ndandite kala kumpeleka mmyala mwa jemanja mwenye Sihoni pampepe ni chilambo chakwe. Myoyo, mtande kusumula chilambo chakwecho kuti chiŵe chenu.’ 32 Mwenye Sihoni paŵayiche pampepe ni ŵandu ŵakwe wosope kuti amenyane ngondo ni m’weji ku Yahasi, 33 Yehofa Mlungu jwetu ŵampeleche jwalakwejo kwa m’weji, mwamti twamgomeche jwalakwejo, ŵanache ŵakwe pampepe ni ŵandu ŵakwe wosope. 34 Pandaŵi jelejo twasumwile misinda jakwe josope ni kujijonanga josope jene pampepe ni achalume, achakongwe soni ŵanache ŵaŵatamaga m’misinda jeleji, mwamti pangali jutwamlesile jwaumi. 35 Twagambile kujigala yilango pampepe ni yindu yine yatwayipatile m’misinda jatwasumwileji. 36 Pangali msinda uliwose watwalepele kuwugomeka, kutandila ni msinda wa Aloeli wawuli mumbali mwa Chitiŵi* cha Alinoni kupwatikasoni msinda wawuli mu chitiŵicho mpaka kuja kwika ku Giliyadi. Yehofa Mlungu jwetu ŵajipeleche mmyala mwetu misinda josope jeneji. 37 Nambope nganituchiŵandichila chilambo cha Aamoni, chachili dela josope ja mumbali mwa Chitiŵi* cha Yaboki soni misinda ja mudela jamatumbi. Nganitugaŵandichilasoni malo gane galigose gaŵatulekasisye Yehofa Mlungu jwetu.