Numeli

18 Kaneko Yehofa ŵamsalile Aloni kuti, “Mmwejo, ŵanache ŵenu ŵachalume soni yisukulu yenu chimchijanga magambo naga mundu jwine jwalijose akulemwa mwakusakasya malo geswela. Nambosoni mmwejo soni ŵanache ŵenu ŵachalume chimchijanga magambo naga mkukasa malamusi gakwayana ni masengo ga ŵakutaga mbopesi. 2 Mwaŵilanjesoni achalongo achimjenu ŵa mu mbumba* ja Lefi, jajili mbumba ja baba ŵenu, kuti ayicheje kukumkamuchisya soni kukumtumichila mmwejo ni ŵanache ŵenu ŵachalume ku chitenti cha Umboni. 3 Jemanjajo akamuleje masengo gachimwapeje soni masengo gosope gakwayana ni kutumichila ku chitenti. Nambope jemanjajo akaŵandichilaga yiwiya* yakumalo geswela soni akaŵandichilaga malo gakupelechela mbopesi, pakogopela kuti mpaka awe kapenasoni jemanja mpaka m’we. 4 Alefiwo ayicheje ni kutenda masengo gawo gosope gakwayana ni kutumichila ku chitenti chakusimanilana. Nambo mundu jwalijose jwachilendo jwanganaŵa jwa m’liŵasa lyenu akamŵandichilaga jemanja. 5 Jemanja ni ŵamkusosekwa kukamula masengo gakutumichila kumalo geswela soni pamalo gakupelechela mbopesi ni chakulinga chakuti ukali wangu ukagwilasoni Ayisalayeli. 6 Une najigele achalongo achimjenu ŵali Alefi kutyochela pasikati pa Ayisalayeli ni kwapeleka kwa jemanja mpela mtuka. Jemanjaji ali ŵa Yehofa mwamti chatendeje utumiki wawo ku chitenti chakusimanilana. 7 Mmwejo soni ŵanache ŵenu ŵachalume ni ŵamkwete udindo wakukamula masengo mpela ŵakutaga mbopesi pamalo gakupelechela mbopesi soni kusyeto kwa likatani.* Jemanja utumiki wenu ni welewo. Une namŵisile jemanja kuŵa ŵakutaga mbopesi mpela mtuka wenu. Myoyo mundu jwine jwalijose jwachilendo jwanganaŵa jwa m’liŵasa lyenu jwaŵandichile chitenti cha Mlungu awulajidweje.”

8 Yehofa ŵapitilisye kuŵecheta ni Aloni kuti, “Une ngumŵika mmwejo kuti mloleleje yakupeleka yosope yachapelecheje ŵandu kwa une. Nampele mmwejo soni ŵanache ŵenu ŵachalume mbali jine pa yindu yosope yeswela yachapelecheje Ayisalayeli. Gelega ni malipilo genu gachimpocheleje ndaŵi syosope. 9 Mbali sine sya mbopesi syakutyochela pa mbopesi syakocha pamoto sili syenu. Mbopesi jilijose jichapelecheje ŵandu kwa une, chinga mbopesi jambeju kapena mbopesi jaulemwa kapenasoni mbopesi jamagambo, mbali syakutyochela pa mbopesi syelesi sili syeswela syamkusosekwa mjigaleje mmwejo soni ŵanache ŵenu. 10 Yakulya yeleyo mlileje pamalo geswela. Jwamlume jwalijose pasikati penu alyeje yeleyo. Yakulya yeleyi myiwoneje kuŵa yeswela. 11 Yindu yine yachiyiŵeje yenu ni ayi: mbali sine sya mbopesi syapeleche Ayisalayeli mpela mituka nambosoni mbopesi syawo syosope syakuyuya. Yindu yeleyi nayipeleche kwa mmwejo, ŵanache ŵenu ŵachalume soni kwa ŵanache ŵenu ŵachakongwe mpela malipilo genu gachimpocheleje ndaŵi syosope. Mundu jwalijose jwa m’liŵasa lyenu jwali jwamswela mpaka alye yindu yeleyi.

12 “Yindu yandanda yakusapeleka Ayisalayeli kwa une, yayili mawuta gandanda gambone mnope, finyo jwandanda jwambone mnope soni mbeju syandanda kukomala, une Yehofa nayipeleche yindu yeleyi kwa mmwejo. 13 Yindu yiliyose yandanda kucha kapena kukomala ya m’chilambocho yachakayicheje nayo Ayisalayeli kwa Yehofa, yindu yeleyo yikaŵeje yenu. Mundu jwalijose jwa m’liŵasa lyenu jwali jwamswela mpaka akalyeje yindu yeleyi.

14 “Chindu chilichose mu Isalayeli chachakachitendeje kuŵa chapadela kwa Mlungu, chindu chelecho chikaŵeje chenu.

15 “Mwanache jwalijose jwandanda kupagwa, chinga jwa mundu kapena jwa chilango juchampelecheje jemanjajo kwa Yehofa, mwanache jwelejo juŵeje jwenu. Nambope mlolechesyeje kuti mkupochela mbiya syakumwombolela mwanache jwalijose jwandanda kupagwa jwa mundu nambosoni mwanache jwandanda kupagwa jwa chilango chilichose changaswejela. 16 Mpocheleje mbiya syakumwombolela mwanache jwalijosejo jwakutandila mwesi umo kwawulaga msogolo. Mtengo wakwe uŵeje mbiya syasilifa syakwana masekeli* msano mwakamulana ni usito wa liganga lyakupimila lya sekeli lya ku malo geswela,* lyele usito wakwe uli magela* 20. 17 Yilango ayi peyi ngayikusosekwa kuyiwombola: mwanache jwa ng’ombe jwamkambako jwandanda kupagwa, mwanache jwa ngondolo jwamkambako jwandanda kupagwa kapenasoni mwanache jwa mbusi jwandanda kupagwa. Yilango yeleyi ngayikusosekwa kuyiwombola ligongo yili yeswela kwa une. Myasi ja yilango yeleyi mjimisileje pamalo gakupelechela mbopesi, soni mawuta gakwe mgajocheje pamoto kuti gakoposyeje lyosi mpela mbopesi jakocha pamoto jakola kaliwungo kambone kakumsangalasya* Yehofa. 18 Nambo nyama jakwe jiŵeje jenu. Nyama jeleji jiŵeje jenu mpela mwayikusaŵela ni chidali cha nyama ja mbopesi jakuyuya nambosoni lukongolo lwakumlyo lwakunyuma. 19 Yakupeleka yosope yeswela yachapelecheje Ayisalayeli kwa une, une Yehofa nayipeleche kwa mmwejo, ŵanache ŵenu ŵachalume soni kwa ŵanache ŵenu ŵachakongwe mpela malipilo genu gachimpocheleje ndaŵi syosope. Chelechi chili chilanga champaka kalakala* chakutenda Yehofa ni mmwejo nambosoni yisukulu yenu.”

20 Yehofa ŵapitilisye kuŵecheta ni Aloni kuti, “M’chilambo cha Isalayeli, jemanja ngasimpochela malo gakuti chimwalechele ŵanache ŵenu pachimchiwa. Une ni jwachinjimlolelaga soni kumpa yakusosechela yenu pasikati pa Ayisalayeli.

21 “Sambano mlole! Une napele ŵanache ŵa Lefi chalikumi chilichose chakutyochela m’chilambo cha Isalayeli kuti chiŵe chipanje chawo. Napele yindu yeleyi ligongo lya utumiki wakutenda ku chitenti chakusimanilana. 22 Pakasimanikwa Myisalayeli jwalijose jwakuŵandichila chitenti chakusimanilana pakogopela kuti mpaka alemwe ni kuwa. 23 Alefipe ni ŵakusosekwa kutumichilaga ku chitenti chakusimanilana soni jemanjaji chachijanga magambo pa yakulemwa yawo. Jemanjaji ngakusosekwa kola malo mpela chipanje chawo pasikati pa Ayisalayeli. Lyeleli lili lilamusi lyakuti mkuyeje kumibado* jenu josope mpaka kalakala. 24 Une Yehofa napele Alefiwo kuti chiŵe chipanje chawo chalikumi chilichose chachakapelecheje Ayisalayeli kwa une. Ni ligongo lyakwe mbechete kuti jemanjajo ngakusosekwa kuja kukola malo mpela chipanje chawo kutyochela pasikati pa Ayisalayeli.”

25 Kaneko Yehofa ŵamsalile Mose kuti, 26 “Mwasalile Alefi kuti, ‘Jemanja chimkapocheleje chalikumi kutyochela kwa Ayisalayeli kuti chiŵe chipanje chenu. Pa chalikumi chachimkapocheleje kutyochela kwa Ayisalayelicho, nombe jemanja mkajigaleje chalikumi ni kupeleka kwa Yehofa. 27 Chalikumi chachimkapelechejecho Mlungu chachichiwonaga mpela mbeju syenu syakutyochela pamalo genu gakuputila mbeju, kapenasoni mpela finyo jwajutyochele pamalo genu gakuminyila mipeleya, kapena mpela mawuta gagatyochele pamalo genu gakuminyila mawuta. 28 Mwa litala lyeleli jemanjasoni yichiŵa kuti mkupeleka yakupeleka yenu kwa Yehofa kutyochela pa yalikumi yosope yachimkapocheleje kutyochela kwa Ayisalayeli. Yalikumi yachimkapelecheje kwa Yehofayo yikaŵeje ya jwakutaga mbopesi Aloni. 29 Pa yindu yiliyose yachimkapochelejeyo, mkasaguleje mituka jambone mnope jampochele mpela chindu cheswela ni kumpa Yehofa.’

30 “Mwasalilesoni jemanjajo kuti, ‘Pampeleche yindu yambone mnope kutyochela pa yindu yampocheleyo, yakusigalayo yichiŵa ya jemanja Alefi. Yichiŵa mbeju syenu syakutyochela pamalo genu gakuputila mbeju kapenasoni mpela finyo jwakutyochela pamalo genu gakuminyila mipeleya, kapena mpela mawuta gakutyochela pamalo genu gakuminyila mawuta. 31 Jemanja pampepe ni maŵasa genu mkalyeje yeleyi ligongo yili mpela malipilo genu pa utumiki wenu wachimkatendeje pa chitenti chakusimanilana. Mkalileje yindu yeleyi ku malo gane galigose. 32 Naga mkapelecheje yindu yambone mnope kutyochela pa yindu yampochele kwa Ayisalayeliwo, ngasimsimanikwa kuŵa ŵakulemwa. Nambosoni mkaja kukamulichisyaga masengo mwakulemwecheka yindu yeswela yachakapelecheje Ayisalayeli pakogopela kuti mpaka m’we.’”