Lefitiko

2 “‘Sambano naga mundu akusaka kupeleka mbopesi jambeju* kwa Yehofa, mbopesi jakwe jiŵeje utandi wetililiche. Jwalakwe atajeje mawuta mu utandiwo soni aŵicheje ubani penani pakwe. 2 Kaneko ajigaleje utandiwo ni kwika nawo kwa ŵanache ŵa Aloni, ŵali ŵakutaga mbopesi. Jwakutaga mbopesi asapuleje utandi wetililichewo wewanganye ni mawuta kugumbala ligasa limo soni ubani wosope wula. Kaneko ajigaleje yindu yosopeyi ni kuyijocha pamoto pamalo gakupelechela mbopesi ni chakulinga chakuti yikoposyeje lyosi kuti yijimile mbopesi josopejo. Jeleji jili mbopesi jakocha pamoto ja kaliwungo kambone kakumsangalasya* Yehofa. 3 Utandi wosope wakusigala pa mbopesi jambejujo uŵeje wa Aloni ni ŵanache ŵakwe, ligongo uli chindu cheswela mnope chakutyochela pa mbopesi syakwawula kwa Yehofa syakocha pamoto.

4 “‘Naga akupeleka mikate* jakocha mu ufuni mpela mbopesi jambeju, utandi wakwewo uŵeje wetililiche. Apelecheje mikate jangali yakusasaŵisya jesyungulile jepowole katikati jewanganye ni mawuta, kapena mikate jepwapwatiche jangali yakusasaŵisya jepache mawuta.

5 “‘Naga akupeleka mikate jakutelechela m’chiwaya mpela mbopesi jambeju, utandi wakwewo uŵeje wetililiche wangali yakusasaŵisya soni wewanganye ni mawuta. 6 Mikatejo ajigaŵanyegaŵanyeje soni ajitajeje mawuta. Jeleji jili mbopesi jambeju.

7 “‘Naga akupeleka mikate jakocha m’chiwaya mpela mbopesi jambeju, mikatejo jiŵeje jepanganye ni utandi wetililiche wewanganye ni mawuta. 8 Ayicheje najo kwa Yehofa mbopesi jambeju jepanganyidwe ni yeleyi. Kaneko ajipelecheje kwa jwakutaga mbopesi. Jwalakwe chachijigala mbopesijo ni kwawula najo kumalo gakupelechela mbopesi. 9 Jwakutaga mbopesi ajigaleje jine mwa mikate jegaŵanyegaŵanyejo ni kujijocha pamoto pamalo gakupelechela mbopesi ni chakulinga chakuti jikoposyeje lyosi. Mikate jajochile pamotojo jijimileje mbopesi jambeju josope jenejo. Jeleji jili mbopesi jakocha pamoto ja kaliwungo kambone kakumsangalasya* Yehofa. 10 Mikate josope jakusigala pa mbopesi jambejujo jiŵeje ja Aloni ni ŵanache ŵakwe, ligongo jili yindu yeswela mnope yakutyochela pa mbopesi syakwawula kwa Yehofa syakocha pamoto.

11 “‘Mbopesi jambeju jamkusaka kupeleka kwa Yehofa jiŵeje jangali yakusasaŵisya, pakuŵa ngamkusosekwa kujigala mtanda* wetaje yakusasaŵisya kapena yindu yakulyolyopela* ni kuwuŵika pamoto kuti ukoposyeje lyosi ni chakulinga chakuti uŵe mbopesi jakocha pamoto jakwawula kwa Yehofa.

12 “‘Nambope yindu yeleyi mpaka myipeleche kwa Yehofa mpela mbopesi syambeju syandanda kukomala, nambo ngamkusosekwa kwika nayo yindu yeleyi kumalo gakupelechela mbopesi kuti ayijoche pamoto ni chakulinga chakuti yikoposyeje kaliwungo kambone kakusangalasya.*

13 “‘Mbopesi jilijose jambeju jamkupeleka mjitajeje njete. Mu mbopesi jenu jambeju mkalepelaga kutaga njete jakumkumbusya chilanga chaŵatesile Mlungu jwenu kwa jemanja. Mbopesi syenu syosope syambeju msitajeje njete.

14 “‘Naga mkupeleka kwa Yehofa mbeju syandanda kukomala kuti siŵe mbopesi jambeju, mpelecheleje mbeju syasigambile komala kwene* syekalanje pamoto soni syesyaje nambo syangatililika. Jeleji jili mbopesi jambeju syenu syandanda kukomala. 15 Mtajeje mawuta pa mbopesi jeleji soni mŵicheje ubani penani pakwepo. Jeleji jili mbopesi jambeju. 16 Jwakutaga mbopesi asapuleje mbeju jetaje mawuta jesyajejo pampepe ni ubani wosope wula ni kuyijocha pamoto ni chakulinga chakuti yikoposyeje lyosi. Yindu yajochileyo yijimile mbopesi josope jenejo. Jeleji jili mbopesi jakocha pamoto jakwawula kwa Yehofa.’”