Lefitiko

16 Yehofa ŵaŵechete ni Mose panyuma pa chiwa cha ŵanache ŵaŵili ŵa Aloni ŵaŵawile ligongo lya kwika pameso pa Yehofa mwangali uchimbichimbi. 2 Yehofa ŵamsalile Mose kuti, “Mwasalile Aloni akuluŵenu kuti akajinjilaga kumalo geswela mnope pandaŵi jilijose jasachile, kwakuli kusyeto kwa likatani, pasogolo pa chiwuniko cha Libokosi lya Chilanga. Akatendaga yeleyi pakogopela kuti mpaka awe, ligongo lyakuti unejo chinjiwonechelaga penani pa chiwunikopo mwiwunde.

3 “Aloni mkanaŵe kwinjila kumalo geswela mnope alongoleje kaje kupeleka mwanache jwang’ombe jwamkambako jwa mbopesi jaulemwa soni ngondolo jamkambako ja mbopesi jakutinisya. 4 Jwalakwe awaleje mkanjo wapadela wanguwo nambosoni kabudula* jwanguwo kuti jusiŵeje chilu chakwe. Kaneko alitaŵeje lamba jwanguwo nambosoni awaleje nduŵila janguwo mumtwe mwakwe. Yakuwala yeleyi yili yeswela pameso pa Mlungu. Nambo mkanawale yakuwalayi alongoleje kaje koga.

5 “Aloni ajigaleje kwa Ayisalayeli tutonde tuŵili kuti tuŵe mbopesi jaulemwa nambosoni ngondolo jimo jamkambako kuti jiŵe ja mbopesi jakutinisya.

6 “Aloni apelecheje ng’ombe jakwe jamkambako ja mbopesi jaulemwa kuti asimasye yakulemwa yakwe nambosoni ya ŵandu ŵamwiŵasa mwakwe.

7 “Kaneko jwalakwe ajigaleje tumbusi tuŵili tula ni kutujimika pameso pa Yehofa kumlango wa chitenti chakusimanilana. 8 Aloni atendeje kalotalota* pa tumbusi tuŵilito kuti asagule kambusi kamo kuti kaŵe ka Yehofa soni kambusi kaneko kuti kaŵe kakutwichila ulemwa wa ŵanduwo.* 9 Aloni ajigaleje kambusi ka Yehofa kasagwile mwakutenda kalotalota kala ni kukapeleka kuŵa mbopesi jaulemwa. 10 Nambo kambusi kasagwile mwakutenda kalotalota kuti kaŵe kakutwichila ulemwa wa ŵanduwo, ayiche nako kaumi ni kukajimika pameso pa Yehofa. Kambusi keleko akakamulichisyeje masengo pakusimasya ulemwa wa ŵanduwo mwakukatumisya kuchipululu kali katwichile ulemwa wa ŵanduwo.

11 “Aloni ayicheje najo ng’ombe jamkambako ja mbopesi jakwe jaulemwa pamalo gakupelechela mbopesi kuti asimasye yakulemwa yakwe soni ya ŵandu ŵamwiŵasa mwakwe. Panyuma pakwe, asikiteje ng’ombe jamkambako ja mbopesi jakwe jaulemwajo.

12 “Kaneko jwalakwe ajigaleje chakupalila moto ni kugumbasya makala gamoto kutyochela pamalo gakupelechela mbopesi gagali pameso pa Yehofa. Ajigalejesoni yakununjila yetililiche kugumbala magasa gaŵili ni ayicheje nayo yosope yeneyi kusyeto kwa likatani lya kumalo geswela mnope. 13 Nambosoni jwalakwe aŵicheje ubaniwo pamoto pameso pa Yehofa. Kaneko lyosi lyakutuka kutyochela pa ubaniwo lichiwunichila chiwuniko cha Libokosi lya Umboni ni chakulinga chakuti jwalakwe akawa.

14 “Kaneko jwalakwe ajigaleje myasi jine ja ng’ombe jamkambako jila ni kujimisila ni chala chakwe pasogolo pa chiwuniko pala chakungopokolyuŵa kwakwe. Jwalakwe amisileje myasijo ni chala chakwe kwa maulendo 7 pasogolo pa chiwunikopo.

15 “Panyuma pakwe, jwalakwe asikiteje mbusi ja mbopesi jaulemwa ja ŵanduwo. Kaneko jwalakwe ajigaleje myasi ja mbusijo ni kwinjila najo kusyeto kwa likatani ni kutenda mpela muŵatendele ni myasi ja ng’ombe jamkambako jila. Jwalakwejo amisileje myasijo pasogolo pa chiwuniko pala.

16 “Jwalakwe akusosekwa kuswejesya malo geswela mnope* ligongo lya ndamo syangaswejela sya Ayisalayeli soni ligongo lya yakulemwa yawo. Atendejesoni yeleyi pakuswejesya chitenti chakusimanilana chachili pasikati pawo ligongo lya ndamo syawo syangaswejela.

17 “Pakasimanikwaga mundu jwalijose jwakwinjila mu chitenti chakusimanilana kutandila pandaŵi jajinjile Aloni kuti akaswejesye malo geswela mnope mpaka ali akopweche jwalakwe. Jwalakwejo asimasyeje ulemwa wakwe, wa ŵandu ŵamwiŵasa mwakwe nambosoni wa mpingo wosope wa Ayisalayeli.

18 “Panyuma pakwe, Aloni akopocheje mu chitenti chakusimanilana ni kwawula kumalo gakupelechela mbopesi gagali pameso pa Yehofa kuti akaswejesye malogo. Jwalakwejo ajigaleje myasi jine ja ng’ombe jamkambako jila soni myasi jine ja mbusi jila ni kujipaka pa misengo jajili mumbali mwa malo gakupelechela mbopesigo. 19 Jwalakwe amisilejesoni ni chala chakwe jine mwa myasijo pamalo gakupelechela mbopesigo kwa maulendo 7. Atendeje yeleyi ni chakulinga chakuti agaswejesye malogo ligongo lya yindu yiliyose yakwasakasya Ayisalayeli.

20 “Pamalisisye kuswejesya malo geswela mnope, chitenti chakusimanilana nambosoni malo gakupelechela mbopesi, jwalakwe ajigaleje mbusi jaumi jila ni kwika najo pakuŵandika. 21 Aloni asajicheje makono gakwe pamtwe wa mbusijo ni kusala soni kwitichisya yakulemwa yosope ya Ayisalayeli nambosoni yakulepela yawo yosope. Mbusijo ajitwicheje yakulemwa soni yakulepela ya ŵanduwo ni kujipeleka kwa mundu jwamsagwile* kuti ajijawusye ku chipululu. 22 Mbusijo ajijawusyeje ku chipululu jili jijigele yakulemwa yosope ya Ayisalayeli.

23 “Kaneko Aloni ajinjileje mu chitenti chakusimanilana ni kuwula yakuwala yaŵawete pakwinjila kumalo geswela mnope. Yakuwalayo pawusile ayilecheje mmomo. 24 Pali m’malo geswelago jwalakwe ajojeje ni kuwala yakuwala yakwe ya ndaŵi syosope. Kaneko akopocheje kusa ni kupeleka mbopesi jakwe jakutinisya soni mbopesi jakutinisya ja Ayisalayeli. Atende yeleyi kuti asimasye ulemwa wakwe soni ulemwa wa ŵanduwo. 25 Kaneko jwalakwe ajigaleje mawuta ga nyama sya mbopesi jaulemwa ni kugajocha pamalo gakupelechela mbopesi kuti gakoposyeje lyosi.

26 “Mundu juŵajigele mbusi jakutwichila ulemwa* jula pawusile, achapeje yakuwala yakwe soni ajojeje. Panyuma pakwe, jwalakwe mpaka ajawule kumatenti.

27 “Nyama ja ng’ombe ja mbopesi jaulemwa soni nyama ja mbusi ja mbopesi jaulemwa, jele myasi jakwe ŵajinjile najo kumalo geswela mnope kuti asimasye ulemwa, nyama jelejo ajijigaleje ni kwawula najo kusa kwa malo gakunjile matenti gawo. Ajigaleje nyamajo pampepe ni lipende lyakwe soni ndoŵe syakwe ni kuja kuyijocha yosopeyi pamoto. 28 Mundu jwajochile nyamajo achapeje yakuwala yakwe soni ajojeje. Panyuma pakwe, jwalakwe mpaka awujile kumatenti.

29 “M’mwesi wa 7 uliwose, palisiku lya 10 lya mwesiwo, mlilagasyeje.* Mkakamulaga masengo galigose palisiku lyeleli, chinga jemanja kapena ŵandu ŵamitundu jine ŵakutama pasikati penu. Lyeleli lili lilamusi lyakuti mkuyeje mpaka kalakala. 30 Palisiku lyeleli jwakutaga mbopesi chachisimasya yakulemwa ya jemanja ni chakulinga chakuti mŵe ŵaswela. Pambesi pakwe, jemanja chimchiŵa ŵaswela ku ulemwa wenu pameso pa Yehofa. 31 Lyeleli liŵeje lisiku lyenu lya sabata, lyalili lisiku lyakupumula, soni mlilagasyeje palisiku lyeleli. Lyeleli lili lilamusi lyakuti mlikuyeje mpaka kalakala.

32 “Jwakutaga mbopesi jwele jwamsagwile ni kumŵika kuti atumichileje mpela jwamkulungwa jwa ŵakutaga mbopesi mmalo mwa babagwe atendeje mwambo wakusimasya ulemwa. Jwalakwejo awaleje yakuwala yanguwo yayili yakuwala yeswela pameso pa Mlungu. 33 Jwalakwejo aswejesyeje malo geswela mnope, chitenti chakusimanilana nambosoni malo gakupelechela mbopesi. Pambesi pakwe, asimasyeje ulemwa wa ŵakutaga mbopesi nambosoni ulemwa wa mpingo wosope wa Ayisalayeli. 34 Lyeleli lili lilamusi lyakuti mlikuyeje mpaka kalakala pakutenda mwambo wakusimasya ulemwa wa Ayisalayeli kuti mwaswejesye ku yakulemwa yawo yosope. Yeleyi myitendeje pachaka kamo.”

Myoyo Aloni ŵatesile yosope yele Yehofa ŵamlamwile Mose.