Bɔlɔ-ŋa Nyii-ŋai A Nuu-tɔɔi Ka Maki Da Temete Dimɛni-kɔɔŋ-maai Pɔɔkɔɔŋ

1-2. Mɛni-kpanaŋ-ŋa kɛɛ leŋ ɓe a pɔri kɛ Maki da Temete kperai tii tamaa kɛi diɓaraŋ Korai-ɓela mɛni mai?

BƆLƆ-ŊA, ka ŋwɛlii ka tii tamaa kɛ Ziova mɛni ma, ka kpɔŋ maa tɛɛ korai-toli-kpɔŋ su? Ku laai la bere ɓe gaa la kakili-ŋa. Nyaŋ kulii nɛ̃ɛi a gɛɛ ku bɔlɔ-ŋa nyii-ŋai a nuu-tɔɔi tamaa ɣele kaa tii kɛi diɓaraŋ Korai-ɓela mɛni ma! (Ŋu. 110:3) Kɛɛ, mɛni taŋa a pɔri kɛi naa nyii a gɛ a gbanaŋɔɔ a gɛɛ I tii tamaa kɛ Ziova mi. Ya yaoi imaa tɛi iɣala-woo-ɓo tii su kpɛni fei ife berei kɔlɔŋ ikɛ-ɣeniɛi a pai kɛi lai kpaa ife ɓɛi kɔlɔŋ Ziova a pai ŋwɛlii I li naai? Ya ta wɔlɔ iyee kula tii ta mu gbɔŋ-gie-mai su kpɛni fei e kɛ ikili-ŋa a gɛɛ ife pai pɔrii gɛi? A kɛ bere ɓe gaa la, gɛ ni ife a nuui maa-ŋuŋ a gɛɛ I ikili-ŋa sia a bere sii ŋi.

² Maki da Temete dia maŋ di tɛɛ mɛni-kpanaŋ-ŋai ŋi su. Kɛɛ dife nɛɛ ni naa a gɛɛ nyiti e di kpera tii tamaa kɛi diɓaraŋ Korai-ɓela diɛ. Tãi ta Maki e kɛ nii nee pɔi bɔrɔŋ nyii kɛ a kwaa ma lɛlɛɛ tãi zia-nuui Pɔɔ da Banaba di mare kɛ la a gɛɛ e too dipɔ dimisɔ̃ŋnalee siai maa-ŋuŋ ma. (Dikɛ-mɛni-ŋai 12:​12, 13, 25) Kɛɛ Maki e faa ma a gɛɛ e kula gwaa lɛlɛɛ ti ma a gɛɛ nɔ e tii tamaa kɛ Ziova mi. Gwaai maa-ŋuŋ e li naai ɓe kɛ a Ɛŋtiɔ. Gɛ ni naa polu ma, e too Pɔɔ da Banaba pɔ a gɛɛ dikɛ li kwaa koyaa takpɛni-ŋa ma. (Dikɛ-mɛni-ŋai 13:​1-5) Bere sii tɔnɔi ti su, tãi ta Temete e kɛ nii gaa-ɓela yeei a tãi Pɔɔ e mare kɛ la a gɛɛ e too bɔ ŋala-woo-ɓo tii su. Temete e kɛ a nuu-tɔɔ. Mɛni ma, tãi ta e kɛ gili-ŋa a gɛɛ ve pɔrii dii ŋi kɛi. (Ya pɔri ŋɔnɔ 1 Kɔleŋtiɛŋ 16:​10, 11 da 1 Temete 4:12 kaai.) Kɛɛ, e nyee see Pɔɔ ŋɔtoli-ɓo-wooi mu, nyaŋ e luwa tamaa ŋaa-nɛ̃ɛ kula.—Dikɛ-mɛni-ŋai 16:​3-5.

3. (a) Ku gɔlɔŋ leŋ a gɛɛ Pɔɔ lii e kɛ a nɛ̃ɛ Maki da Temete mɛni ma? (2 Temete 4:​6, 9, 11) (Ya pɔri ŋɔnɔ votoo-ŋai kaai.) (b) Mare-kɛɛ-ŋa kɛɛ leŋ ɓe kwa pai zukulai zɛŋ-lɛɛi ŋi su?

³ Maki da Temete di mɛni lɛlɛɛ takpɛni-ŋa maa-kɔri a pa berei ma da pɔri tii lɛlɛɛ takpɛni-ŋa kɛi la korai-toli-kpɔŋ su a dinuu-tɔɔ tãi. Pɔɔ lii kpɔɔi e kɛ a nɛ̃ɛ nuu-tɔɔ feerɛi ŋi mɛni ma. Nyaŋ tãi e gɔlɔŋ la a gɛɛ aa kɛ pai saai, e kɛ kpiŋ ŋwɛlii a gɛɛ dikɛ gɔlɛ. (2 Temete 4:​6, 9, 11 lono.) Tua-pere lɛlɛɛ-ŋa kɛɛ leŋ ɓe kɛ Maki da Temete yeei nyii gɛ Pɔɔ kɛ di wɛli a bere sii ŋi? Bɔlɔ-ŋa nyii-ŋai a nuu-tɔɔi da pɔri ditua-pere lɛlɛɛ-ŋai pɔɔkɔɔni leŋ? Nyaŋ Pɔɔ ŋɔlia-woo lɛlɛɛ-ŋai a pɔri kpɔŋ maa tɛɛi leŋ bɔlɔ-ŋa pɔ nyii-ŋai a nuu-tɔɔi?

KƐ YƐƐ MAKI A TII TAMAA KƐƐ ZIOVA DA IƁARAŊ KORAI-ƁELA DIƐ

4-5. Maki e nɛ leŋ a gɛɛ e kɛ ŋwɛlii e tii tamaa kɛ nua diɛ?

⁴ Kɔlɔ kɛtɛ tɔnɔ e mo a gɛɛ tii kɛɛ nua diɛ sukulai ɓa, I kɛɛ kɔi a gɛɛ I kpɔŋ maa tɛɛ nua pɔ “a tãi kelee a kɛ kpiŋ nyiŋi kɛi kpanaŋɔɔi imɛni ma.” Maki kaa a mɛni-kɔɔŋ-maa lɛlɛɛ a pa nyiŋi ma. Tãi kpiŋ Pɔɔ fe faa ni la ma a gɛɛ e li la ŋɔmisɔ̃ŋnalee siai veerɛi mai, tãi ta nyiŋi e Maki lii too polu a ŋanaa. (Dikɛ-mɛni-ŋai 15:​37, 38) Kɛɛ ve nɛɛ ni naa a gɛɛ nyiŋi e gbera tii kɛi maraŋ korai-ɓela diɛ.

⁵ Maki e faa ma a gɛɛ da maleŋ Banaba di li kwaa takpɛni-ŋa ma diɣala-woo-ɓo tii su. Koraŋ puu kao tɔnɔ (11) tɛɛ polu ma Pɔɔ kɛɛ kpini pɛrɛ mu Luŋ a tãi maa-ŋuŋ, Maki e kɛ nuai sama nyii-ŋai kɛ kpɔŋ maa tɛɛi bɔi. (Fa. 23, 24) Dɔ̃yai ɓa, Pɔɔ lii kpɔɔi e kɛ a nɛ̃ɛ gbɔŋ maai mɛni ma nyii Maki e dɛɛ bɔi. E kpiŋ mo a gɛɛ Maki e kɛ a ‘ŋaa-nɛnɛ-nuu.’—Ko. 4:​10, 11.

6. Mɛni lɛlɛɛ kɛɛ leŋ ɓe Maki e zɔlɔ ɓo a laoi-laa kɛɛ a Korai-ɓela tɔɔi kpanaŋɔɔ-ŋa? (Fonoi kaa.)

⁶ Maki e mɛni lɛlɛɛ tamaa sɔlɔ ɓo a laoi-laa kɛɛ a Korai-ɓela tɔɔi kpanaŋɔɔ-ŋa. Gɛɛ aa tãi kpulu loŋ kɛ Pɔɔ kɔlɛ Luŋ, e li Babelɔŋ a gɛɛ da zia-nuui Pitɛ di tii kɛ gie ma. Dilaoi-laai su e kpanaŋ kpɔ a bere sii nyii Pitɛ e Maki toli a “noŋ.” (1 Pi. 5:13) Tãi ta di kɛɛ tii kɛi gie ma, Pitɛ e mɛni lɛlɛɛ tamaa ɓo naoi Maki ma e pilaŋ Zisɛ ŋɔkɛ-ɣeniɛi da ŋɔɣala-woo-ɓo tii ma. Nyaŋ Maki e mɛni-ŋai ŋi pɔ̃yɛ Ŋɔtuŋ Lɛlɛɛ kɔlɔi su.a

7. Seung-Woo nyii a nuu-tɔɔi e Maki ŋɔmɛni-kɔɔŋ-maai pɔɔkɔɔŋ leŋ? (Ya pɔri ŋɔnɔ votooi kaai.)

⁷ Maki e kanaŋ tii tamaa kɛi Ziova fɛliɛ su, gɛ laoi-laa kɛ a korai-ɓela tɔɔi kpanaŋɔɔ-ŋa. Ya pɔri Maki ŋɔmɛni-kɔɔŋ-maai pɔɔkɔɔni leŋ? Tãi ta, ya ŋwɛlii I tii tamaa kɛ Ziova fɛliɛ su yɛɛ I kɛɛ a korai-toli-kpɔŋ laa-tuɛ-nuu kpaa dikpɔŋ maa-nuu; kɛɛ ife pɔrii nyiti kɛi lonii ma. A kɛ bere ɓe gaa la, ilii fe too polu. Kanaŋ pere sii takpɛni-ŋa kɔrii nyii ya pɔri tii kɛi la Ziova da iɓaraŋ korai-ɓela mɛni ma. Kwaa korai-toli-kpɔŋ laa-tuɛ-nuu tɔnɔ nyii da kɛ ma Seung-Woo ŋɔmɛni-kɔɔŋ-maai kaa. Gɛɛ a nuu-tɔɔi, a kaa gbiŋ kɔɔŋ bɔlɔ-ŋa dia nyii-ŋai kɛ a nuu-tɔɔi. Korai-toli-kpɔŋ laa-tuɛ-ɓelai di tii taŋa tɛɛ bɔlɔ-ŋai ŋi pɔ korai-toli-kpɔŋ su, kɛɛ ve pɔri ni dii-ŋai ŋi ta sɔlɔ ɓoi. Nyiŋi e Seung-Woo lii too polu. Nyaŋ tãi taŋa tɛɛ polu ma, e lono korai-toli-kpɔŋ laa-tuɛ-ɓelai pɔ e pilaŋ mɛnii ŋi ma. Korai-toli-kpɔŋ laa-tuɛ-ɓelai dɔnɔ e mo ma a gɛɛ e kɔ nɔ e tii takpɛni-ŋa kɛ maraŋ korai-ɓela mɛni ma a kɛ kpiŋ nua da wala ŋɔtii lɛlɛɛi kaa. Seung-Woo e sia a nia-wooi ŋi. Nyaŋ e pɛlɛ kpɔŋ maa tɛɛi nuu-pɔlɔ-ŋai pɔ korai-toli-kpɔŋ su da nua takpɛni-ŋa nyii-ŋai difa kaa pɔri lii goyaŋ-ŋai su dikpɔɔ yee mai. Seung-Woo kɛɛ gili-ŋa siai e pilaŋ mɛnii ŋi ma e mo nyɛɛi: “Ŋaa naa tii kɛɛ nua diɛ sukulai kɔlɔŋ a nɛlɛɛ. Ŋaa nii-nɛ̃ɛi kaa kpɔŋ maa tɛɛ nua pɔ a pa lai.”

TEMETE PƆƆKƆƆŊ A WƐLI-KƐ-MAA LƐƐ NUA DIA

8. Le mɛni ɓe Pɔɔ e li la a Temete ŋɔmisɔ̃ŋnalee siai mai? (Felepiɛŋ 2:​19-22)

⁸ Pɔɔ e kɛ ŋwɛlii a bɔlɔ lii-kpeleɛ-ŋa a gɛɛ da dia-ni di li polu ɓɛi-ŋai nua di tɔɔ naa mai. Nuui maa-ŋuŋ e ziɣei ɓe kɛ a Salɛ nyii kɛ a korai-nuu tɔɔi kpanaŋɔɔi. (Dikɛ-mɛni-ŋai 15:​22, 40) Naa polu ma Pɔɔ e ŋɔnɔ Temete siɣe a gɛɛ da nyaa di li. Le ɓe gɛ Pɔɔ kɛ ŋwɛli a gɛɛ da Temete di lii? Kpɛni fei bɔlɔ-ŋai di mɛni lɛlɛɛ tamaa ɓo e pilaŋ Temete ma. (Dikɛ-mɛni-ŋai 16:​1, 2) E kɛ a gbaaŋɔɔ nua mɛni ma a tɔ̃ya pere.—Felepiɛŋ 2:​19-22 lono.

9. Temete e nɛ leŋ a gɛɛ e kɛ a gbaaŋɔɔ maraŋ korai-ɓela mɛni ma?

⁹ E siɣe tãi ma Temete e ŋɔɣala-woo-ɓo tii kɔɔ pilaŋ la a Pɔɔ, e nɛ a gɛɛ e kɛ a gbaaŋɔɔ nua takpɛni-ŋa mɛni ma. Mɛni ma, Pɔɔ kɛɛ aa nɛɛ Bɛroiai, e kɛ a naa la a gɛɛ Temete e kɛ pai korai-ɓela ninai mɛi kaai a nɛlɛɛ. (Dikɛ-mɛni-ŋai 17:​13, 14) Tãi ti ma, Temete e mɛni lɛlɛɛ tamaa maa-kɔri Salɛ yeei, nyii kɛ Bɛroia nya maŋ. Naa polu ma, Pɔɔ e Temete tɛɛ gbɔɔ yee ma Tɛsɛlonika taa-leei su a gɛɛ e korai-ɓelai fɔrɔ naa. (1 Tɛ. 3:2) Goraŋ puu kao lɔɔlui (15) Temete e gɛ gwaai ŋi mai yee mu, ŋɔwɛli-kɛ-maai maraŋ korai-ɓela mɛni mai su e kpanaŋ. Tãi taŋa, nyiŋi a kaa kpiŋ gɛ e wɔlɔ a di kaa mɔ̃lɛi. (Lo. 12:15; 2 Te. 1:4) Bɔlɔ-ŋa nyii-ŋai a nuu-tɔɔi da pɔri Temete pɔɔkɔɔni leŋ?

10. Le ɓe kpɔŋ Woo Jae ma a gɛɛ e kɛ a gbaaŋɔɔ nua takpɛni-ŋa mɛni ma e tɛɛ bɔlɔi ma?

¹⁰ Bɔlɔ tɔnɔ nyii da kɛ ma Woo Jae e mɛni maa-kɔri e pilaŋ berei ma a pɔri kɛi la a gbaaŋɔɔ nua takpɛni-ŋa mɛni ma e tɛɛ bɔlɔi ma. Gɛɛ a nuu-tɔɔi, e kɛ a gbanaŋɔɔ a gɛɛ e yɛpɛ pu a nuu-pɔlɔ-ŋa korai-toli-kpɔŋ su. Mɛni ma a kaa naa-ti nɔ dia Galoŋ-laa Pɛrɛi la e tɛɛ dia. Korai-toli-kpɔŋ laa-tuɛ-nuu ta e nia-woo ɓo a gɛɛ e yɛpɛ kɔɔŋ pilaŋ a lonoɔ maraŋ korai-ɓela pɔ e pilaŋ mɛnii ma ŋwɛli kaa ma e pilaŋ diai. Korai-toli-kpɔŋ laa-tuɛ-nuui e ŋɔnɔ mo ma a gɛɛ e gili-ŋa sia e pilaŋ mɛnii ma ŋwɛli kaa nuui mai. Woo Jae e tii kɛ a nia-wooi ŋi. Lonii ma, Woo Jae kaa a korai-toli-kpɔŋ laa-tuɛ nuu. E mo nyɛɛi: “Ve naa kpanaŋ ni a gɛɛ ŋa naa lono nuu kelee ta pɔ. Nii nɛ̃ɛi a gɛɛ ŋa naa mɛnii kɔlɔŋ nua takpɛni-ŋa da tɛɛ zui. Nyaŋ nyiŋi aa kpɔŋ ma a gɛɛ ŋa pɔri kpɔŋ maa tɛɛi maraŋ korai-ɓela pɔ.”

11. Le ɓe a pɔri kpɔnii bɔlɔ-ŋa dia nyii-ŋai a nuu-tɔɔi a gɛɛ dikɛ a di kpaaŋɔɔ dimaraŋ korai-ɓela mɛni ma? (Ya pɔri ŋɔnɔ votooi kaai.)

¹¹ Bɔlɔ-ŋa nyii-ŋai a nuu-tɔɔi, da pɔri mɛni maa-kɔrii a pa berei ma da pɔri nɛi la a gɛɛ di kpaaŋɔɔi nua takpɛni-ŋa mɛni mai. Ya li goyaŋ-ŋai su, tãi siɣe a gɛɛ I lono nuu sii kelee pɔ. Di mare kɛ e pilaŋ berei ma dikɔlɔi kaa lai, gɛ ni iwoli-tɔɔ dia. Nyiŋi a pai kpɔnii ya a gɛɛ I berei kɔlɔŋ ya pɔri kpɔnii la diai. Tãi ta ya pai gaai a gɛɛ da ŋwɛlii a kpɔŋ maa a pa berei ma da pɔri tii kɛi la a JW Library^®. Kpaa ya pai gaai a gɛɛ nuu ta fe diyeei a gɛɛ da dia-ni di li ŋala-woo-ɓo tii su. Ya pɔri kpɔnii nua kɛɛ-ŋai ŋi dia a gɛɛ di pɔri tii kɛi a ditoli-ɓo kɔli-ŋai kpaa I li a dia ŋala-woo-ɓo tii su? Ya kpɔŋ maa tɛɛ ibɔlɔ da sisɛ-ŋai pɔ a bere sii ŋi, ya pai kɛi a mɛni-kɔɔŋ-maa lɛlɛɛ korai-toli-kpɔŋ su.

PƆƆ ŊƆLIA-WOOI A PƆRI KPƆNII YA

12. Mɛni lɛlɛɛ kɛɛ leŋ ɓe bɔlɔ-ŋa nyii-ŋai a nuu-tɔɔi da pɔri zɔlɔ ɓoi nia-wooi su Pɔɔ e dɛɛ Temete pɔi?

¹² Pɔɔ e lia-woo lɛlɛɛ takpɛni-ŋa tɛɛ Temete pɔ nyii kpɔŋ ma ŋɔkɛ-ɣeniɛi da ŋɔɣala-woo-ɓo tii su. (1 Te. 1:18; 2 Te. 4:5) A kɛ ikaa a bɔlɔ nyii a nuu-tɔɔi, Pɔɔ ŋɔlia-wooi a pɔri kpɔnii ya. A pere sii kɛɛ leŋ? Pɔɔ ŋɔworɛ-woo kɔlɔ feerɛi e bɔ̃yɛ Temete pɔi lono nɔ yɛɛ nya ɓe di bɔ̃yɛ imɛni ma. Gɛ ni berei kaa ya pɔri tii kɛi la a nia-woo-ŋai ti ikɛ-ɣeniɛi su. Kwaa gɔɔŋ-maa taŋa kaa.

13. Le ɓe pai kpɔnii ya a gɛɛ ikɛ a itɔɔi kpanaŋɔɔ Ziova polu?

¹³ “Ikpiŋ mɛi-kaa ɣala-mɛni su.” (1 Te. 4:7) A gɛɛ I ikpiŋ mɛi-kaa ɣala-mɛni su sukulai ɓa le? Zukulai ɓa nuu kɛɛ a dɔɔi kpanaŋɔɔ Ziova polu, gɛ ŋwɛli e nĩa-mɛni kɛ. Ee dife kumaa sɔlɔ ɓo ni a dua-pere lɛlɛɛ ŋi, maa nɛ̃ɛi ku maa-kɔri. Kwa pɔri nyiŋi kaai mɛnii su Pɔɔ e moi. Pɔɔ wooi “ikpiŋ mɛi-kaa” pilaŋɔɔi berei ma gbagba fulɔi kirɛ-siɣe-ɓela da kaa digbagba fulɔi kɛ-pere maa-kɔri la a nɛlɛɛ a gɛɛ dikɛ a di kpɛtɛɛ mɛni mai. Maa nɛ̃ɛi kɛ gbagba fulɔi kirɛ-siɣe-ɓelai ŋi di diŋɛi kula mɛni takpɛni-ŋa dia, di diŋɛi kɛ nɔ dimɛni-kpɛtɛɛi ma. Kua maŋ maa nɛ̃ɛi ku kukpiŋ mɛi-kaa a gɛɛ ku pɔri tua-pere lɛlɛɛ takpɛni-ŋa maa-kɔrii nyii pai kpɔnii kua a gɛɛ ku lɛɣɛ a Ziova.

14. Le ɓe maa nɛ̃ɛi e kɛ a kumɛni-kpɛtɛɛ kwa kɛ Ŋala-kɔlɔi lonoi? Gɔɔŋ-maa lɛ.

¹⁴ Nɛlɛɛi a gɛɛ ku Ŋala-kɔlɔi lono a ɣele kelee. Nyaŋ gaa ŋɔnɔ a mɛni lɛlɛɛ a gɛɛ ku mɛni-ŋuŋ kɔlɔŋ kwa Ŋala-kɔlɔi lonoi mɛni mai. Nya ɓa a gɛɛ ku lɛɣɛ a Ziova. Gɔɔŋ-maa ɓa, ya mɛni-pelei lono nyii bilaŋɔɔi Zisɛ da nyaŋkpai ma nyii kɛ a dɔɔi, le ɓe a nɛ ya e pilaŋ Ziova ma? (Maki 10:​17-22) Nyaŋkpai e kɛ a naa la a gɛɛ Zisɛ e kɛ a Masayai, kɛlɛ laa-la fe kɛ ni nyeei a gɛɛ e kɛ a bolu-nuu ta. Berei maŋ laa-la fe kɛ ni la nyeei, kɛlɛ Zisɛ “e ŋɛi pilaŋ ma a wɛli-kɛ-maa pere.” Berei Zisɛ e lono la naloŋ ŋi pɔi, fe ilii soŋ ni? Zu ponoɔɔi a gɛɛ Zisɛ e kɛ ŋwɛlii naloŋ ŋi e mɛni-kpɛtɛɛ lɛlɛɛ kɛ. Berei Zisɛ e tua la a naloŋ ŋi, e kɛ Ziova ŋɔwɛli-kɛ-maai lɛi mɛni ma. (Zɔŋ 14:9) Ya kɛ ikili-ŋa siai e pilaŋ mɛni-pelei ŋi ma da mɛnii ya tɛɛi zui, ikpiŋ mare kɛ, ‘Le ɓe maa nɛ̃ɛi ŋa gɛ a gɛɛ ŋa lɛɣɛ a Ziova, ŋa tii tamaa kɛ nua diɛ?’

15. Le mɛni ɓe nɛlɛɛi la a gɛɛ bɔlɔ nyii a nuu-tɔɔi e kɛ a mɛni-kɔɔŋ-maa lɛlɛɛ nua mɛni ma? Gɔɔŋ-maa lɛ. (1 Temete 4:​12, 13)

¹⁵ ‘Kɛ a mɛni-kɔɔŋ-maa naa-la-ɓelai mɛni ma.’ (1 Temete 4:​12, 13 lono.) Pɔɔ fe Temete fɔrɔ ni nɔ a gɛɛ e kɛ a kɔlɔ lono-nuu da sɛŋ-lɛ-nuu lɛlɛɛ. Kɛlɛ e ŋɔnɔ vɔrɔ a gɛɛ e tua-pere lɛlɛɛ takpɛni-ŋa maa-kɔri yɛɛ wɛli-kɛ-maa, laa-la, da maa-waa-laa. Le mɛni ma? Kpɛni fei mɛnii nuu a gɛi maa mɛni kpanaŋɔɔ e tɛɛ mɛnii ma a moi. Ikili-ŋa sia nɔ a kɛ lono kaa iyeei nyii bilaŋɔɔi berei ma kwa pɔri ŋala-woo-ɓo tii kɛi la a damaai. Ya pai pɔrii nonoi ŋi tɛɛi a ilii kelee a kɛ ya ŋala-woo-ɓo tii kɛ a damaa. Nyaŋ imɛni-kɔɔŋ-maai a pai iwoo polu laai a nɛlɛɛ.—1 Te. 3:​13, NWT.

16. (a) Pere sii lɔɔlu kɛɛ leŋ ɓe Korai-ɓela nyii-ŋai a nuu-tɔɔi da pɔri kɛi la a mɛni-kɔɔŋ-maa lɛlɛɛ? (b) Bɔlɔ nyii a nuu-tɔɔi a pɔri kɛi leŋ a mɛni-kɔɔŋ-maa lɛlɛɛ ‘nono-woo su’?

¹⁶ 1 Temete 4:12 su, Pɔɔ e pere sii lɔɔlu lɛ nyii bɔlɔ-ŋa nyii-ŋai a nuu-tɔɔi da pɔri kɛi la a mɛni-kɔɔŋ-maa lɛlɛɛi. A pai kɛi a nɛlɛɛ a gɛɛ I tãi tamaa siɣe I mɛni maa-kɔri e pilaŋ bere sii-ŋai ŋi dia tɛitɛi. Gɔɔŋ-maa ɓa, a kɛ ya ŋwɛlii ikɛ a mɛni-kɔɔŋ-maa lɛlɛɛ “ilono-woo su,” ikili-ŋa sia e pilaŋ mɛnii ma ya pɔri moi a gɛɛ I nua fɔrɔi. A kɛ ikaa nii ikaa-ɓela yeei, ife laa ni la a pai kɛi a nɛlɛɛ a gɛɛ I di sɛɣɛi fe a tãi tamaa mɛnii da gɛi yɛi mɛni ma? Goyaŋ a kpɛɛ, ya pɔri lonoi nuu ta pɔ e pilaŋ mɛnii ma ŋwɛli kaa ya e pilaŋ ŋɔlonoi ma e dɛɛi? Ya pɔri ŋɔnɔ kɔi a gɛɛ I mare-kɛɛ-ŋai ta sukula ikpɔɔ woo su goyaŋ-ŋai su. Ya kɔ a gɛɛ ikɛ a mɛni-kɔɔŋ-maa lɛlɛɛ ilono-woo su, nua da pai gaai a gɛɛ ikaa imaa tɛi iɣala-mɛnii su a nɛlɛɛ.—1 Te. 4:15.

17. Le ɓe pai kpɔŋ maa tɛɛi bɔlɔ ta pɔ nyii a nuu-tɔɔi a gɛɛ e ŋɔmɛni-kpɛtɛɛi ŋaa-see kɛ dɔ̃yai su? (2 Temete 2:22)

¹⁷ ‘Ikɛi koyaa tua-pere nyɔŋ maa sɛŋ wɛliɛ ma nyii gaa nuu-tɔɔ-ŋa yeei, I tɔ̃ya-laa kɔri.’ (2 Temete 2:22 lono.) Pɔɔ e Temete lia-woo-ɓo a gɛɛ e gɛi koyaa mɛni-ŋa dia nyii a pɔri ŋɛi kulai ŋɔmɛni-kpɛtɛɛ-ŋai dia kpaa kpiŋ e ŋɔlaoi-laai su kara a Ziova. Ya pɔri ŋɔnɔ gaai a gɛɛ berei maŋ mɛni taŋa kɛɛ fe nyɔŋ ti lai, kɛlɛ a tãi maa nɛ̃ɛi I ziɣe Ziova mɛni mai tamaa ɣele siɣe. Gɔɔŋ-maa ɓa, ikili-ŋa sia e pilaŋ tãi ma ya ziɣe nĩa-kɛ mɛni ma, ikɛɛ vãai-ŋa, da pele takpɛni-ŋa kɛɛ. I laai la ya pɔri tii kɛi a tãi ti ta a gɛɛ I tii tamaa kɛ Ziova mi da nua takpɛni-ŋa. Tãi ta ya pɔri kpɔŋ maa tɛɛi Galoŋ-laa Pɛrɛi maa kpɛtɛ tii ta mɛni ma, kpaa I too diai pɔ da kɛ ɣala-woo-ɓoi a ŋala-woo-ɓo wii. Mɛni-ŋai ŋi kɛɛ a pai kpɔnii ya a gɛɛ I laoi-laa kɛ a nua nyii-ŋai pai I fɔrɔi a gɛɛ I mɛni-kpɛtɛɛ-ŋa kɛ dɔ̃yai su, I diŋaa-see kɛ.

TII KƐƐ NUA DIƐ A PA A LUWA TAMAA

18. Luwa-ŋa kɛɛ leŋ ɓe Maki da Temete di ŋaa-nɛ̃ɛ kulai?

¹⁸ Maki da Temete di maa faleŋ-ŋa kɛ a gɛɛ nɔ di pɔri tii tamaa kɛi nua diɛ, nyaŋ nyiŋi e pa a lii-nɛ̃ɛ tamaa dikɛ-ɣeniɛi su. (Dikɛ-mɛni-ŋai 20:35) Maki e li kwaa koyaa takpɛni-ŋa ma a gɛɛ nɔ e kpɔŋ maa tɛɛ maraŋ korai-ɓela pɔ. E ŋɔnɔ mɛni lɛlɛɛ-ŋa pɔ̃yɛ e pilaŋ Zisɛ ŋɔkɛ-ɣeniɛi da ŋɔɣala-woo-ɓo tii ma. Temete nya maŋ e kpɔŋ Pɔɔ ma a gɛɛ di korai-toli-kpɔŋ nina-ŋa kɔɔ pilaŋ, di diɓaraŋ korai-ɓela fɔrɔ. Zu ponoɔi a gɛɛ Ziova e mɛni-ŋai kelee kaa nyii Maki da Temete di gɛ mii, nyaŋ nii e kɛ a nɛ̃ɛ dimɛni ma.

19. Le mɛni ɓe maa nɛ̃ɛi bɔlɔ-ŋa nyii-ŋai a nuu-tɔɔi di sia la a nia-wooi Pɔɔ e dɛɛ Temete pɔi, nyaŋ mɛni lɛlɛɛ kɛɛ leŋ ɓe da pai zɔlɔ ɓoi zui?

¹⁹ Kwa Pɔɔ ŋɔwɛli-kɛ-maai kaa Temete mɛni ma a zu ponoɔɔ gɔlɔ-ŋai su e bɔ̃yɛ bɔi. Gɔlɔ-ŋai ŋi a ŋɔnɔ nɛ a gɛɛ bɔlɔ-ŋa nyii-ŋai a nuu-tɔɔi wɛli kpɔɔi kaa Ziova ma. A ŋwɛlii kakɛ-ɣeniɛi ŋuŋ e kɛ ma vɛliɛ su. Mɛni ma kɔ a gbanaŋɔɔ a gɛɛ I sia a Pɔɔ ŋɔlia-woo-ŋai, I tii kɛ nua diɛ a damaa. Nyiŋi kɛɛ a pai kpɔnii ya a gɛɛ ikɛ-ɣeniɛi ŋuŋ e kɛ ma lonii ma, ‘I ŋɔnɔ vulu-laa kpɔɔi soŋ a gbanaŋɔɔ’ nyii gaa tinaa-tuɛ-pere mɛni mai.—1 Te. 6:​18, 19.