იჸუაფუნო ბირთვულ ომ? მუს იჩიებ ბიბლია?

მსოფლიო ბირთვულ ომიშ საშიშროებაშ წოხოლე გერე, მუშენდა მსოფლიო პოლიტიკურ ძალეფს ბირთვულ იარაღეფ უღუნა დო ირიათო უძინანა თინეფიშ რაოდენობას. მუ გასაკვირ რე, ხალხ თიშე ნერვიანენდას, ნამდა მუთ უმოს რე ბირთვულ იარაღ, თით უმოს რე ბირთვულ ომიშ დოჭყაფაშ საშიშროება. ხალხის თიშა ხოლო ოშქურ, ნამდა ართ ჭიჭე ატომურ ბომბიშ გიმორნაფას ხოლო შილებე ბირთვულ ომქ ქუმაჸუნას, მუთ განადგურენს დედამიწას. ჩქი ფცხოვრენთ დროს, მუჟამსით „ბირთვულ ომიშ წუმოჭყაფაშ მუდმივ საფრთხეშ წოხოლე გივორეთ“, – იჩიებ ართ-ართ სამეცნიერო წყარო (Bulletin of the Atomic Scientists).

მართალო არსებენსო თიშ შანს, ნამდა ბირთვულ ომქ ქიდიჭყას? ქიდიჭყ-და, გინოსქიდუნო ჩქინ პლანეტა? მუჭო მივერუათ ბირთვულ ომიშ შიშის? მუს იჩიებ ბიბლია?

თე სტატიას გუვარჩიენთ:

წინასწარმეტყველენსო ბიბლია ბირთვულ ომს?

ბიბლიას კონკრეტულო ბირთვულ ომ ვა რე მოშინაფილ. მარა ბიბლიაქ იწინასწარმეტყველ ადამიანეფიშ დამოკიდებულებეფ დო მოვლენეფ, მუდგაშ შედეგ რე ბირთვულ ომიშ საფრთხე.

დეფიფქრათ, მუჭო მეურე თუდო მოჩამილ ბიბლიურ მუხლეფ ამდღარ მსოფლიო მოვლენეფს:

ბიბლიურ მუხლეფ: მოწაფეეფქ იესოს კითხეს: „მუ იჸუაფ თიშ ნიშან, ნამდა მოულირ რექჷ დო თე ქიანაშ ბოლოქ ქუდოდირთჷ?“ იესოქ უპასუხ: „ერ ერს გეგნენტერებ დო სამეფო სამეფოს“ (მათე 24:3, 7).

მსოფლიო მოვლენეფ: ქიანეფ, თინეფ შქას თინეფ ხოლო, მიდგას ბირთვულ იარაღ უღჷ ვარდა შეულებ თიშ წარმოება, უმოსო დო უმოსო წიმიჭყანა შეიარაღებულ კონფლიქტეფს.

„ბოლო წანეფს მსოფლიოს აძინუ ძალადობას. კონფლიქტეფ უმოსო დო უმოსო იძინანს“ (The Armed Conflict Location & Event Data Project).

ბიბლიურ მუხლ: „უკანასკნელ დროს სამხრეთიშ მეფე დო ჩრდილოეთიშ მეფე ართიანიშ წინააღმდეგ გეგშულა“ (დანიელი 11:40).

მსოფლიო მოვლენეფ: მუჭოთ ბიბლიაქ იწინასწარმეტყველ, გავლენიან ერეფ დო თინეფიშ მოკავშირეეფ ართიანს ონირზუნა, ნამუს უმოს ძალაუფლება აღვენუ. მართალ რე, ამდღა არძაშ უდიდაშ ბირთვულ ძალაშ მენდულ ქიანეფ პირდაპირ ვეგიანთხუნა დუდის ართიანს, მარა ირიათო ამანგარენა დო აუჯგუშენა მუნეფიშ ბირთვულ იარაღეფს.

„ჩქი ვორეთ თიშ მოწმე, მუჭო მიძინ ბოლო ვით წანაშ დინახალე კონფლიქტეფქ ქიანეფ შქას, თეშა თიცალ კონფლიქტეფ ხოლო მიშურს, სოდეთ დაპირისპირებულ მხარეეფს დიდ ძალეფ მიკურენა“ (The Uppsala Conflict Data Program).

ბიბლიურ მუხლეფ: „ბოლო დღალეფს მანგარ გლახა დო ძნელ გინაღალარ დრო დოდირთუ. ადამიანეფ იჸუაფუნა . . . აჯამეფ, ტყურაშ ეკმაწამებელეფ, დუდშეკება ვეშულებუნან ფერეფ, უდუნდებელეფ“ (2 ტიმოთე 3:1–3).

მსოფლიო მოვლენეფ: ხალხიშ უმენტაშცალო, მსოფლიო ლიდერეფ ხოლო ხშირას ვათანხმუნა ართიანს. თინეფ თეცალ უთანხმოებეფიშ მოგვარებას მშვიდობიან შარაშ მანგიორო, ართიანიშ რცქინებათ დო ძალაშ გიმორნაფათ ოცადუნა, მუდგათ ბირთვულ ომიშ საფრთხე უმოსო იძინანს.

„ართიანწკუმა თანამშრომლობაშ შარაქ ვეგორ-და, კონფლიქტეფ უმოსო მიძინანს, მუდგას გუმანადგურებელ შედეგეფ მაჸუნუ“ (S. Saran and J. Harman, World Economic Forum).

დუშვენსო ღორონთ ბირთვულ ომს?

ბიბლია თეს ვეჩიებ. ბიბლიას ჩიება მეურს, ნამდა ჩქინ დროს „ოშქურანჯ მოვლენეფ“ იჸუაფუდ (ლუკა 21:11). თეცალ მოვლენეფიშ ართ-ართ მაგალით რე მაჟია მსოფლიო ომიშ დროს ატომურ ბომბეფიშ გიმორნაფა. ბიბლიას ენწყუმილ რე, მუშენ უშვენს ღორონთ ომეფს. მეტიშ გაგებელო ქუჯინით ვიდეოს „მუშენ უშვენს ღორონთ ტანჯვას?“

გენადგურებუნო დედამიწა?

ვარ. ადამიანეფქ ბირთვულ იარაღ კინ გეგმირინუანინ ხოლო, ღორონთ ვა დუშვენს სიტუაციაქ თი დონეშა ქიმერთას, ნამდა მთელ დედამიწაქ მისპას. ბიბლია ხვალე თის ვეჩიებ, ნამდა დედამიწა გინოსქიდუ, თის ხოლო მირაგადუნა, ნამდა თინა სადღამუშოთ იჸუაფ ადამიანეფიშ ოკვირდე.

„დედამიწა სადღამუშოთ სქიდუ“ (ეკლესიასტე 1:4).

„ღორონთის, დედამიწაშ გუმაჭყაფალს . .. ., ტყურათ ვა გურჩქინუ დედამიწა, დახორინალო გარჩქინ“ (ესაია 45:18).

ნამთინეს თიცალ წარმოდგენა უღჷ, ნამდა მომავალს ბირთვულ ომიშ შედეგო მოჯალაგერ დო მოწამალერ დედამიწას ხვალე მუსხირენ ადამიან იჸუაფ დოსქილადირ, მით მუდგათ იჸინ დუდიშ გინოსქილადას ოცადუდას იჸი. მარა ბიბლიაშე იძირე, ნამდა ომეფით დაზიანებულ დედამიწას დუდშეიან სახე დართუ.

„გოფალუნს უდაბნო დო გოხიკინაფილ დიხა, ხიოლ აღვენუ მითინ ვახორანსინ ფერ ადგილს დო ზაფრანაცალო გოპეულანს“ (ესაია 35:1).

სამოთხეთ გინორთელ დედამიწას ადამიანეფ ხიოლით მუშენა ართო. — ღორონთის ოკო, ნამდა ბედნერო იფცხოვრათ სქვამ დედამიწას.

ჩქინ გუმაჭყაფალქ დედამიწა თვითაღდგენაშ სარკო უნარით გაჭყჷ. მუშო ოკო რაგად, ღორონთ მუშ ძალას ხოლო გეგმირინუანს, ნამდა დედამიწას დუდშეიან სახე დურთინუას. თინა სადღამუშოთ იჸუაფ ადამიანეფიშ დიდებულ დახორინალ (ფსალმუნები 37:11, 29; გამოცხადება 21:5).

მუჭო შეილებუნა მერუათ ბირთვულ ომიშ შიშის?

ნამთინე იტანჯებ ბირთვულ ომიშ დო თიშ შედეგეფიშ შიშით. თეცალ ადამიანეფს ბიბლიურ დუნაპირებუეფ დო რჩევეფ მეხვარებ მერუან თე შიშის. მუჭო?

ბიბლია ეჭარუნს, მუნერ დიდებულ მომავალ ელუნა დედამიწას დო თიშ მახორუეფს. ბიბლიას მოჩამილ თე იმენდიშ გურშენ გაგება ღუზაცალ იჸუაფ თქვანო, მუთ მიგეხვარებუნა შიშიშ ტალღეფქ ვამნოილუან (ებრაელები 6:19). შიშშა მორიება თიმწკუმა ხოლო შემალებენა, მუჟამსით ყურადღებას ამდღარ დღაშა გეგნიბღანთ დო ვართ ხოლო თიშა, მუდგაქ შილებე მომავალს მოხვადას. იესოქ თქუ: „არძა დღას დასაბაღო უღჷ მუშ გაჭირება“ (მათე 6:34).

მნიშვნელოვან რე, ქიმკვოჯინათ ჩქინ მენტალურ დო ემოციურ ჯანმრთელობას. თეშო ჯგირ იჸუაფ, გუვაკონტროლათ, მუსხის იპკითხენთ, უჯინეთ ვარდა ურჩქილეთ თიცალ მუდგარენეფს, მუთ შიშის მირჩქინანა, მაგალთო, შილებე თენა რდასჷ მსჯელობა, ვარაუდეფ დო ახალ-ახალ ინფორმაცია ბირთვულ იარაღიშ წარმოებაშ გურშენ. თენა თის ვა ნიშნენს, ნამდა შურო ვა მოინტერესუდან, მუ ხვადუ. უბრალოთ, ნამ შემლებუნან თის ვორთუთ, ნამდა ირიათო თიშე ვეპწუხათ, მუდგაშა ვამმახვარებენა დო მუდგაქ შილებე შურო ვა მოხვადას.

„წუხება კოჩის გურს უმონკენს, გემუან სიტყვა გურს ხიოლით ეუფშანს“ (იგავები 12:25).

ყურადღება თქვან ცხოვრებას ხვადუნ თი ჯგირ მუდგარენეფშა გეგნიღით დო თეშნერო ქუმასვანჯეთ თქვან გონება გლახა ამბეეფშე.

„იმენდიშ მუმაჩამალ ღორონთიქ ეგოფშან ირნერ ხიოლით დო მშვიდობათ, მუშენდა თის ონდუთ“ (რომაელეფ 15:13).

კოლაჟ: კოჩ იმენდით იჯინე წიმი. 1) თიშ უკახალე ჩხუპეფ რე, იძირე სამხედრო ვერტალიოტეფ, ატომურ ჭურვეფ, დო აფეთქებეფ. 2) თიშ წოხოლე იძირე გასუფთებულ დო მშვიდობიან დედამიწა, სოდეთ გვალეფ, მწვანე დოლოეფ, მალწყარეფ დო ჩიტეფ რენა. — ბიბლია მარზენა უჯგუშ მომავალიშ მტკიცე იმენდის.

ღორონთიშ დუნაპირებუეფიშ გურშენ გაგებას შეულებ მერჩან იმენდ, ხიოლ დო შინაგან სიმშვიდე.

წინასწარმეტყველენსო ბიბლია ბირთვულ არმაგედონს?

ნამთინე ფიქრენს, ნამდა არმაგედონ გლობალურ ბირთვულ ომ რე. დო, მუშო ოკო რაგად, თინეფ თე მოვლენაშ გუმანადგურებელ შედეგეფს ხოლო წერმიდგინენდან იჸი.

მარა ბიბლია სიტყვა „არმაგედონს“ გულისხმენს ომს „დედამიწაშ მეფეეფ“, შხვანერო ქოფთქუათინ, ადამიანურ მმართველეფ დო ღორონთ შქასa (გამოცხადება 16:14, 16). არმაგედონ ირფელიშ დო ირკოჩიშ განადგურებას ვა ნიშნენს, მუჭოთ თენა ბირთვულ ომიშ დროს მოხვადუდ. თეშ გინაწონს, არმაგედონს ღორონთ ხვალე უბადო ადამიანეფს განადგურენს, მუთ ნამდვილ მშვიდობას დო უსაფრთხოებას მიღანს (ფსალმუნები 37:9, 10; ესაია 32:17, 18; მათე 6:10).

მუს ბგებულენთ ბიბლიაშე ომეფიშ თებაშ გურშენ?

„თინა სპუნსჷ ომეფს მთელ დედამიწას, მშვილდის ჩინჩოლუნს დო ჭვირთის ტახუნს, დაჩხირს თქუთქუნს ეტლეფს“ (ფსალმუნები 46:9).

იეჰოვაb გემკარჩქინანს მუშ ძალას დო მოსპუნს ერეფ შქას ჩხუპეფს დო თინეფიშ საბრძოლო იარაღეფს. თეს მუშ სამეფოშ, ზეციურ მთავრობაშ, საშვალებათ გაკეთენს, ნამუთ მთელ დედამიწაშ მმართველ იჸუაფ (დანიელი 2:44).

ღორონთიშ სამეფო ქუდაგურუანს ხალხის, მუჭო უღუდან ართიან შქას მშვიდობა დო სიგემუანე. მთავრობეფ შქას კონფლიქტეფ ხოლო მედინუ, მუშენდა დედამიწას ხვალე ართ მთავრობა აჸვენუ, საერთაშორისო კონფლიქტეფ მედინუ; ხალხ ჩხუპის ხოლო ვედიგურუანს! (მიქა 4:1–3). მუ იჸუაფ თე ირფელიშ შედეგ? „თითოულ მუშ ბინეხიშ დო ლუღიშ თუდო გითოხედას იჸი დო მითინ ვა დაშქურინუანს თინეფს“ (მიქა 4:4).

a ქოძირით სტატია „მუ რე არმაგედონ“?

b იეჰოვა ღორონთიშ სახელ რე (ფსალმუნები 83:18). ქოძირით სტატია „მი რე იეჰოვა?“

ბირთვულ ომიშ გურშენ მეურსო ჩიება ბიბლიაშ წიგნ „გამოცხადებას“?

ნამთინე ფიქრენს, ნამდა გამოცხადებას ჩიება მეურს სრულ განადგურებაშენ, მუთ ბირთვულ ომს მაჸუნუ (გამოცხადება 6:14; 8:7–12; 16:1–21). მაგალთო, გამოცხადება მიშინუანს დაჩხირს, ნამუთ ზეცაშე დედამიწაშა გიმურს (გამოცხადება 13:11–13). იეჰოვაშ მოწმეეფს უჩქუნა, ნამდა თაქ ჩიება ბირთვულ ომით გამოწვეულ სრულ განადგურებაშენ ვარინ, მაჟია მსოფლიო ომიშ დროს გიმორნაფილ ატომურ ბომბეფშენ მეურს.

მართალ რე, წიგნ „გამოცხადებას“ ჩიება მეურს თეცალ მოვლენეფშე, მარა თინეფ კილ-კილშა ვა რე ეჭარილ. წიგნ „გამოცხადებაშ“ კითხირიშ დროს რშუდან:

თე წიგნის მოშინაფილ ბრელ ნიშან დო სიმბოლო პირდაპირ გაგებათ ოკო ვემიბღათ (გამოცხადება 1:1).
თე წიგნიშ მიზან ვა რე, მაკითხირალეფ დაშქურინუას. თეშ გინაწონს, თექ მოჩამილ ამბეს ხიოლ მოუღ თინეფშა, მით ენანჭუ დო ირინუანს თის (გამოცხადება 1:3).

მეტ ინფორმაციაშ მიოღებელო, წეკითხით სტატია «„მუს ბგებულენთ წიგნ „გამოცხადებაშე?“» [ქორთ.].