ქუმაღინენო საერთაშორისო ორგანიზაციეფს ნამდვილ მშვიდობა?

ამდღა მთელ მსოფლიოს ხვადუ ომეფ დო შეიარაღებულ დაპირისპირებეფ. ათეშენ, გაერო დო შხვა ორგანიზაციეფ ონწყუნა სამშვიდობო ოპერაციეფსa დო ინულა კონფლიქტიშ ზონეფშა. თინეფს იმენდ უღუნა, ნამდა გეგშანწყუნა თეცალ სიტუაციეფს. გაეროშ გენერალურ მდივანქ, ანტონიო გუტერეშიქ, თქუ: „საერთაშორისო ორგანიზაციეფიშ სამშვიდობო ოპერაციეფ მნიშვნელოვან ნაწილ რე ჩქინ მიზანიშ მიოჭირნაფალო, ნამდა მთელ მსოფლიოს მშვიდობა რდასჷ“.

წანეფიშ დინახალე, თაშიო-თეშიო, სამშვიდობო ოპერაციეფს ჯგირ შედეგეფქ მაჸუნ. მაგალთო, მოქალაქეეფიშ თხილუა, ლტოლვილეფიშ მუნეფიშ ქიანაშა დორთა, ჰუმანიტარულ მოხვარა დო განადგურებულ ინფრასტრუქტურაშ აღდგენა. მარა თე სამშვიდობო ორგანიზაციეფ სერიოზულ სირთულეეფს ხვადუნა, მუთ ოცილ თინეფს, ბოლოშა ქიმიოჭირინუან მუნეფიშ მთავარ მიზანს. ქიჸუაფუნო დღას ულიებ მშვიდობა მსოფლიოს? მუს იჩიებ ბიბლია?

სირთულეეფ, ნამდგას სამშვიდობო ორგანიზაციეფ ხვადუნა დო გამოსავალ, ნამდგას ბიბლია მარზენა.

სირთულე: თანამშრომლობაშ ნაკლებობა. სამშვიდობო ოპერაციეფიშ შესრულებაშ დროს, ირო ვა რე ადვილ შხვადოშხვა ქიანაშ სამხედრო დო სამოქალაქო ორგანიზაციეფ შქას თანამშრომლობა. მინშა თე ორგანიზაციეფს ართიანშა ვა გაგინენა ვარდა საწინააღმდეგო აზრეფ უღუნან თიშენ ვაკეთებენა საქმე ეფექტურო.

გამოსავალ: „ზეციერ ღორონთ დამყარენს სამეფოს . . . დო ბოლოს მუღენს არძა თე სამეფოს [ადამიანურ მთავრობეფს], დო მუ მარადიულო იჸუაფ“ (დანიელი 2:44).

მალას ღორონთ ბოლოს მუღენს ომეფს დო ირდიხას მშვიდობას დამყარენს (ფსალმუნები 46:8, 9). თინა მთელ დედამიწას არძა მთავრობას ართ მთავრობათ, ღორონთიშ სამეფოთ, დოთირანს. იჸუაფ ართ სრულყოფილ მთავრობა, ნამუთ ზეცაშე მართუნდას იჸი დედამიწას, სოდეთ ვართ კონფლიქტეფ იჸუაფ დო ვართ სამშვიდობო ორგანიზაციეფიშ საჭიროება.

სირთულე: რესურსეფიშ დო შესაძლებლობეფიშ ნაკლებობა. სამშვიდობო ორგანიზაციეფს ირო ვა ჸუნა დასაბაღ ხალხ, ვა უღუნა დასაბაღ ფინანსეფ ვარდა შხვა რესურსეფ, მუთ თინეფიშ საქმეს წიმი ულაშ საშვალებას ვარზენს. თეწკუმა ართო, თეცალ ორგანიზაციეფიშ წევრეფს ომუშებელ აფუნა თიცალ ადგილეფს ხოლო, სოდეთ მანგარ დაძაბულ სიტუაცია დო ოშქურანჯ გარემო რე.

გამოსავალ: „ჩქინ უფალ იესო ქრისტეშ ღორონთიქ, . . . ზეცას [იესო] მუშ მარძგვანშე ქალეხუნუ დო არძა მთავრობაშე, ხელისუფლებაშე, ძალაუფლებაშე . . . მაღალას ქიგიორინუ“ (ეფესოელეფ 1:17, 20, 21).

ირფელიშშემალებე ღორონთიქ, იეჰოვაქb, იესოს, ღორონთიშ სამეფოშ მეფეს, მეჩჷ თიცალ რესურსეფ, ნამდგაშ მადარა მითინს ვა უღჷ (დანიელი 7:13, 14c). ღორონთიქ იესოს თიცალ დიდ ძალა, რჩქინა, სიბრძნე დო ინონჭაფაშ უნარ მეჩჷ, მუნერით ნამთინ ადამიანურ მთავრობას დო ორგანიზაციას ვა უღჷ (ესაია 11:2). იესოს ქვერსემ ძალაშ მენდულ ანგელოზეფიშ ლაშქარ ხოლო ჸუნსჷ (გამოცხადება 19:14). თიშო ვა არსებენს სიტუაცია, ნამუთ შილებე თიცალ დაძაბულ ვარდა რთულ რდასჷ, ნამდა ვეგშანწყუას.

იესო ღორონთშე მეღებულ რესურსეფს დო შესაძლებლობეფს ხვალე თიშო ვეგმირინუანს, ნამდა უბრალოთ გაჩერას ომეფ. თინა ქუმუღანს ნამდვილ სიმშვიდეს, უსაფრთხოებას დო მშვიდობას არძას, მით ღორონთიშ სამეფოშ მმართველობაშ დროს იცხოვრენს (ესაია 32:17, 18).

სირთულე: იურიდიულ შეზღუდვეფ. მინშა სამშვიდობო ორგანიზაციეფიშ თანამშრომელეფს ვაკეთებენა მუნეფიშ საქმე, მუშენდა გაუგებარ რე, მუშ უფლება უღუნა, მუ მეთხიებუნა ვარდა ხოლო იურიდიულ შეზღუდვეფ ვემიაშქვანს საქმეშა. თეცალ სიტუაციეფ თინეფს ვარზენს საშვალებას, საჭირო რენ თეშ დეცვან შხვეფ დო ბოლოშა ქიმიჸუნან მუნეფიშ მიზან.

გამოსავალ: „მთელ ძალაუფლება ზეცას დო დედამიწას ჩქიმდა [იესოშა] რე მოჩამილ“ (მათე 28:18).

ღორონთიქ იესოს გასაგებ მითითებეფ დო სრულ ძალაუფლება მეჩჷ, ნამდა დამყარას მსოფლიოს მშვიდობა (იოანე 5:22). იესო დღას ვემიქციებ უსამართლოთ დო არასწორო (ესაია 11:3–5). მართალო მეურე იესოს თინა, მუთ თიშ გურშენ ბიბლიას ჭარჷ – „მშვიდობაშ მთავარ“; თიშ სამეფოს „სამართლიანობა დო სიმართლე“ ამანგარენს (ესაია 9:6, 7).

ღორონთიშ სამეფო – ნამდვილ მშვიდობაშ მუმაღალარ

ადამიანურ სამშვიდობო ოპერაციეფს შეულებუნა გარკვეულ სტაბილურობაშ მეჭირინაფა ვარდა ნამდგაინ რეგიონს შეიარაღებულ კონფლიქტიშ გაჩერება, მარა თინეფს ვეშულებუნა მოსპან ძალადობაშ მიზეზ – გოჯოგაფა, ნამუთ ბრელ ადამიანიშ გურს ელახვილ.

„მუჭო ოკო დეფცვათ მშვიდობა, ნამუთ ვა არსებენს?!“ (დენის ჯეტ, აშშ-შ ყოფილ ელჩ).

თეშ გინაწონს, ღორონთიშ სამეფო მიღანს ნამდვილ მშვიდობას, მუშენდა თინა ოხვარ ადამიანეფს, გურშე გეშეჸოთან გოჯოგაფა. მაგალთო, იესო დედამიწას რდუნ თიმწკუმა მუშ სიტყვათ დო საქმეთ ოძირანდჷ მუშ მიმაჸუნალეფს, მუჭო შეუნწყუესკო ხე მშვიდობას დო მუჭო გიმირჩქინესკო შხვეფიშ ჸოროფა.

„ბედნერეფ რენა თინეფ, მით მშვიდობას უნწყუნა ხეს“ (მათე 5:9).

„სქან დუდცალო გიჸორდას სქანიან“ (მარკოზ 12:29–31).

„დართინე ყამა მუშ ადგილშა, მუშენდა ყამაშ ემაჭოფალ ყამათ დოღურუ!“ (მათე 26:52).

„[იესოს] ლანძღუნდესინ, ლანძღუათ ვა პასუხენდჷ დო იტანჯებუდუნ, ვერცქინაფუდ“ (1 პეტრეშ 2:23).

იესოქ თინა ხოლო თქუ, ნამდა თინეფ, მიდგაშათ ღორონთიშ სამეფო იმმართველენს, შხვეფიშ ჸოროფათ გიშეჩინებედესკონ იჸიდ. ბიბლიაშე იძირე, ნამდა ღორონთიშ სამეფოშ მმართველობაშ დროს ვეჸუაფუნა თი ადამიანეფ, მიდგას ჯოგუნა შხვეფ.

„ართიან შქას ჸოროფა ქუგაღვენუნან-და, თეთ ქიგეგენა, ნამდა ჩქიმ მოწაფეეფ რეთჷ“ (იოანე 13:34, 35).

„მიდგას მუშ ჯიმა ჯოგჷ, კოჩიშ მაჸვილარ რე“ (1 იოანე 3:15).

„მიდგას ღორონთ უჸორს, თის მუშ ჯიმა ხოლო ოკო უჸორდას“ (1 იოანე 4:20, 21).

იეჰოვა ღორონთის, მუჭოთ გუმაჭყაფალს, არძაშ უჯგუშო უჩქჷ, მუ რე თი ართ საშვალება, მუთ ნამდვილ მშვიდობას მიღანს. თიშ სამეფო წარმატებულო მიოჭირინუანს თი მიზანს, მუდგაშათ ადამიანეფს დო თინეფიშ ორგანიზაციეფს ვემიაჭირინუეს.

a გაერო დო შხვა ორგანიზაციეფ თიცალ ტერმინეფს ხოლო ირინუანა, მუნერით რე „სამშვიდობო მისია“ „სამშვიდობო პროცესეფ“ დო „მშვიდობაშ ხუჯიშ დაკინება“.

b იეჰოვა ღორონთიშ სახელ რე (ფსალმუნები 83:18). ქოძირით სტატია „მი რე იეჰოვა?“.

c დანიელიშ 7:13, 14-ის ფრაზას „კოჩიშ სქუა“ იგულისხმებ იესო ქრისტე (მათე 25:31; 26:63, 64).

ღორონთიშ სამეფოს ამდღა ხოლო მოუღ ადამიანეფშა მშვიდობა დო ართობა

მომავალს, მუჟამსით ღორონთიშ სამეფო მთელ დედამიწაშა იმმართველენს, არძა ადამიან შქას ართობა დო მშვიდობა იჸუაფ, მუშენდა ქუდაჸუნუნა ღორონთიშ გურაფეფს (ესაია 2:4; 11:9). თე სამეფო ამდღა უკვე მმართველენს ზეცას დო თიშ ჭყოლოფათ ამდღა ხოლო მილიონობით ადამიან შქას, მით დოჸუნს თიშ გურაფეფს, მშვიდობა დო ართობა რე.

ქუჯინით ვიდეოს „მუ დროს ორჯგინანს ჸოროფა გოჯოგაფას?“ დო ქოძირით, მუჭო მეხვარ ბიბლიაქ ჟირ ადამიანს, ჩეთხინუესკო წინასწარ შექმნილ აზრ, თიშ უმკუჯინუო, ნამდა ებრაელეფს დო არაბეფს ბრელ ხან რე, მუთ ართიან ჯოგუნა.

ქუჯინით ვიდეოს „ართიანიშ ნტერეფქ მეგობრეფო გინირთეს“ დო ქოძირით, მუჭო მეხვარ ბიბლიურ გურაფეფქ მოძალადე კრიმინალურ დაჯგუფებაშ უნჩაშის დო პოლიციაშ ოფიცერს, გიორჯგინესკო გოჯოგაფას დო ართიანიშ მეგობრეფო გინირთესკო.