პატი ცითჷ ართიანიშ გადაწყვეტილებეფს

1, 2. მუშენ ბღებულენთ თანაქრისტიანეფ მინშა ართ საკითხშე შხვადოშხვა გადაწყვეტილებას?

ᲓᲦᲐᲡ მითინს გუკრიტიკებუთო თქვან მეღებულ გადაწყვეტილებაშ გურშენ? ვარდა თქვა გაიკრიტიკებუნანო დღას თანაქრისტიან მუშ მეღებულ გადაწყვეტილებაშენ? ალბათ უმენტაშ ჟირხოლო კითხვაშენ ქოვა თქუანდ.

² ოკო ვა გამკვირდან, ნამდა მინშა თანაქრისტიანეფ მუდგარენ საკითხის შხვადოშხვანერო გინოპჭყვიდუნთ, მუშენდა არძა განსხვავებულ ვორეთ დო არძას ჩქი-ჩქინ აზრ მიღუნა. ჩქინ აზროვნებაშა მოქმედენს ჩქინ კულტურა, ოჯახ, სოდეთ იბრდით დო გამოცდილება. მარა ართიანშე განსხვავებულ აზრ მიღუნან თენა ოკო ვა უცილუათ კრებაშ ართობას დო მშვიდობას (ეფეს. 4:3).

3. მუშენ შილებე მოკოდან, თანაქრისტიანს აზრ დუვოთირაფუათ?

³ მუჟამსით თანაქრისტიან ღებულენს თიცალ გადაწყვეტილებას, ნამდგას ჩქი ვა ვოთანხმუთ, შილებე იფიფქრათ, ნამდა მუდგათიჸინ აზრ ოკო დუვოთირაფუათ ვარდა შხვეფწკუმა პწუხენდათ თეშენ. თეს შილებე ალალ გურით ვორთუდათ, მუშენდა მიჸორა და დო ჯიმალეფ დო მოკონა, ბედნერეფ რდანჷ (იგავ. 17:17). თაშ ნამდა, ვა მოკონა თინეფქ თიცალ გადაწყვეტილება მიღან, მუდგას უკულ ინარღენა ვარდა მუდგაშ გურშენ იეჰოვაწკუმა გილელუანა ურთიერთობას.

4, 5. მუჭო ოკო მიფქცუათ, მუჟამსით ქრისტიან თიცალ მუდგარენიშ კეთებას გინოჭყვიდუნს, მუდგას ჩქი ვა ვაკეთენდით?

⁴ ოკო დურაგადუათო თანამორწმუნეს თიშ გურშენ, ნამდა ვა ვოთანხმუთ თიშ გადაწყვეტილებას? თენა ბრელ მუდგარენშა რე დამოკიდებულ. მაგალთო, ბიბლიურ მითითებაშ გინორთა ქულამუნ-და, ჸოროფაქ ოკო გეგნმოჭყვიდირაფუან, ქიმვეხვარათ თის აზროვნებაშ გიშასწორებას (იგავ. 27:5, 6). მარა მუჭო ოკო მიფქცუათ თიმწკუმა, მუჟამსით თინა მუშ გადაწყვეტილებათ ღორონთიშ კანონს ვეგნურთანს, უბრალოთ ჩქი ვა ვაკეთენდითინ თიცალ მუდგარენს გაკეთენს? თეშ პასუხის სტატიაშ მთავარ მუხლ ირზენს: „ბრალ ვეგედვათ თის, მით თქვანცალო ვა ფიქრენს“ (რომ. 14:1).

⁵ მარა იშენით შილებე გამჭირდან, პატი ფცათჷ შხვეფიშ გადაწყვეტილებას. თე სტატიას გუვარჩიენთ, მუშენ ოკო ფცათჷ პატი შხვეფიშ გადაწყვეტილებეფს დო მუჭო შემლებუნა თეშ კეთება. მარა თეიშახ ქიფჩუათ მუსხირენ სიტუაციაშე, მუჟამსით შილებე შხვეფიშ გაკრიტიკებაშ სურვილქ გომრჩქინდან.

ᲛᲣ ᲡᲘᲢᲣᲐᲪᲘᲔᲤᲥ ᲨᲘᲚᲔᲑᲔ ᲨᲮᲕᲔᲤᲘᲨ ᲒᲐᲙᲠᲘᲢᲘᲙᲔᲑᲐᲨ ᲡᲣᲠᲕᲘᲚ ᲒᲝᲛᲠᲩᲥᲘᲜᲐᲜ?

6, 7. მუ სიტუაციეფს შილებე გომრჩქინდან შხვეფიშ გადაწყვეტილებეფიშ გაკრიტიკებაშ სურვილქ?

⁶ მუჭოთ ჟიშე მიფშინეთ, ჩქინ ულირ ცხოვრებაშ ვარდა გამოცდილებაშ გურშენ შილებე კონკრეტულ საკითხეფს ხვალე ართ კუნთხუთ უჯინედათ დო მიმორჩქუდან, ნამდა შხვეფ ხოლო ჩქინცალო ფიქრენა. მარა შილებე არძა შემთხვევას თაშ ვა რდასჷ. გუვარჩუათ მუსხირენ სიტუაცია. სიტუაცია 1: ჯიმა, ნამუთ ჭეშმარიტებაშ გაგებაშახ შუმილია მუმაშ ხეს ირდუდ, ართ-ართ მეგობრულ შეხვალამაშ დროს ორწყე, ნამდა ქრისტიანეფ ოშუმალს შუნა. თის თენა ვა მოწონს დო თინეფს ურაგად, არასწორო იქციებუთია. სიტუაცია 2: და, ნამდგაქ სერიოზულ ლახალაშე დოსქიდ, გებულენს, ნამდა შხვა დას იგივე დიაგნოზ გეუშქვეს, მუთ მუს უღუდ. ათეშენ უჩემენს თიცალ მკურნალობას მიაჸუნას ვარდა თიცალ წამალეფ შვასჷ დო დიეტა დეცვას, ნამდგაქ მუს მეხვარ. სიტუაცია 3: ჯიმას, ნამუთ ულირს ტყურარელიგიაშ მიმაჸუნალ რდჷ, ჯოგჷ ირფელ, მუთ ტყურარელიგიაწკუმა რე დაკავშირებულ. თის გურ მალე, მუშენდა გებულენს, ნამდა თანაქრისტიანს ონგარშა ეკლესიაშა მინურთუმ.a

⁷ სიტუაცია 4: ჯიმა თიცალ პერიოდის რე ნარდ, მუჟამსით მიუღებელ რდჷ ბარადაშ გოტება ვარდა ოსურკოჩეფშო შარვალიშ მოდვალა ოფიციალურ შეხვალამეფს. თე ჯიმას ჯგირო უჩქჷ, მუჭო ითირ ორგანიზაციაშ დამოკიდებულებაქ თე საკითხეფიშ მიმართ, მარა იშენით იჩემენს, ჯიმაქ ბარადათ ოკო ვა მორთასია კრებაშა დო დაქ შარვალით. სიტუაცია 5: უხუცეს იჩინენს ართ ჯიმას, ნამდგაქ გინოჭყვიდ, დამატებით განათლება მიღუკო დო უკულ მიოტუ იეჰოვაშ მსახურება. ასე თიშ კრებას რე ართ ახალგაზრდა ჯიმა, ნამდგას დამატებით განათლებაშ მეღება ულამ. უხუცეს ნერვიანენს თიშე დო ოცად, დათირაფუას თე ახალგაზრდას დო თიშ მშობლეფს მუნეფიშ გადაწყვეტილება.

8. ა) მუშ გურშენ შილებე მშობლეფქ შხვა მშობლეფ გაკრიტიკან? ბ) მუჭო შილებე და დო ჯიმალეფიშ მიმართ ჩქინ კრიტიკულ დამოკიდებულებაქ კრებაშა იმოქმედას?

⁸ ასე ქიფჩუათ თიცალ სიტუაციაშე, ნამუთ მშობლეფს ოხუ. სიტუაცია 6: მუჭოთ მშობელ, ირფელს ორთუთ, ნამდა სქუალეფ იეჰოვაშ მოსაწონო მორდათ დო ქიგიოწურუათ თინეფ (ეფეს. 6:4). ათეშენ თქვან სქუალეფშა ბრელ მუდგარენშე გაფუნა წესეფ დოდგინელ. მარა ორწყეთ, ნამდა შხვა ქრისტიან მშობლეფ უმოს თავისუფლებას არზენა მუნეფიშ სქუალეფს, ვინემ თქვა. მაგალთო, ვა უვარიენა ჸუდეშა ჭიჭე გვიანო მოულას, ძალადობა ვაკათუნ ფერ ვიდეოლაჸაფეფიშ ლაჸაფის, ჭიჭე ასაკშე უჸიდენა ტელეფონს. ათეშენ თქვან ბაღანა შილებე ფიქრენდას, ნამდა ნაბეტან მკაცრას ოქცუთ თის დო გირაგადუდან: „ჩქიმ მეგობარს მუშ მშობლეფ თავისუფლებას არზენა. სი მუშენ ვართუქ თაშ?“. თე სიტუაციაშ გურშენ შილებე შხვა მშობლეფიშ გაკრიტიკება ქიდიჭყე. არგამა რე, ქრისტიანეფიშ განსხვავებულ გადაწყვეტილებეფს შილებე ართიანიშ კრიტიკაქ ქუმაჸუნას. მაგალთო, ქრისტიან შილებე თიშენ გუვაკრიტიკათ, მუჭო ახარჯენს ფარას, მუზმათ ხშირას მეურს დასასვენებშა დო მუნერ გართობას გიშეგორუნს. მარა ჩქინ პირად შეხედულებეფიშ გურშენ ოკო ვაგვაკრიტიკათ და დო ჯიმალეფ დო ოკო ვევეცილათ კრებაშ ართობას.

9. მუშენ ოკო ვა გაკრიტიკათ შხვეფ მუნეფიშ მეღებულ გადაწყვეტილებეფიშ გურშენ? (ქოძირით სურათ).

⁹ ქრისტიანეფ ართიანშე განსხვავებულ გადაწყვეტილებეფს ღებულენან თენა იშენდოიშენ თის ვა ნიშნენს, ნამდა ართ რე სწორ დო მაჟია ვა რე სწორ (რომ. 14:5). რახანს ბიბლია მირაგადუნა, ნამდა იეჰოვაშ დოდგინელ ნორმეფიშ გურშენ „ართ აზრ“ მიღუდან, თენა თის ვა ნიშნენს, ნამდა ჩქინ პირად შეხედულებეფ არძა საკითხშე ართიანს გუდას (2 კორ. 13:11). ჩქინ გადაწყვეტილებეფ შილებე შევადარათ შხვადოშხვა შარას, ნამუთ ართ დანიშნულებაშ ადგილშა მეურს. შილებე გეგშებგორათ თიცალ შარა, ნამუთ უმოსო მოპწონა დო უმოს მოხუჯურ მაფუნა. თეშნერო, შილებე ქრისტიანეფქ პირად საკითხწკუმა დაკავშირებით შხვადოშხვა გადაწყვეტილებეფ მიღან. მარა ჩქინ დანიშნულებაშ ადგილ ართ რე – იეჰოვაშ განდიდება. ათეშენ ოკო ვაგვაკრიტიკათ თანაქრისტიან, მუნეფიშ მეღებულ გადაწყვეტილებეფიშ გურშენ (მათ. 7:1; 1 თეს. 4:11).

ᲛᲣᲨᲔᲜ ᲝᲙᲝ ᲤᲪᲐᲗᲷ ᲞᲐᲢᲘ ᲨᲮᲕᲔᲤᲘᲨ ᲒᲐᲓᲐᲬᲧᲕᲔᲢᲘᲚᲔᲑᲔᲤᲡ?

10. იაკობიშ 4:12-იშ თანახმას, მუშ უფლება ვა მიღუნა დო მუშენ?

¹⁰ ბიბლიას მოჩამილ რე მიზეზეფ, მუდგაშ გურშენ პატი ოკო ფცათჷ შხვეფიშ გადაწყვეტილებეფს. გუვარჩუათ თინეფშე მუსხირენ. ჩქი ვამღუნა უფლება, კანონეფ დუდგინათ შხვეფს პირად საკითხეფწკუმა დაკავშირებით (წეკითხით იაკობიშ 4:12). ხვალე იეჰოვა რე სამართლიან მოსამართლე დო კანონიშ მუმაჩამალ. ხვალე თის უღჷ უფლება, გინომჭყვიდან, მუ ოკო ვაკეთათ დო მუ – ვა ვაკეთათ. ათეშენ და დო ჯიმალეფქ იეჰოვას ოკო ჩაბარან ანგარიშ დო ვართ ხოლო ჩქი (რომ. 14:10). თაშ ნამდა, ჩქი მუთუნნერ უფლება ვამღუნა, ჩქინ შეხედულებეფით გუვასამართლათ შხვეფ ვარდა გუვაკრიტიკათ თინეფიშ გადაწყვეტილებეფ.b

11. მუჭო შემლებუნა ხე შეუნწყუათ კრებაშ ართობას? (ქოძირით სურათ).

¹¹ იეჰოვა ჩქინდე ართობას ითხინს დო ვართ ხოლო ართნერობას. ღორონთის უჸორს მრავალფეროვნება, მუდგას თიშ გუნაჭყეფუეფშე ხოლო ვორწყეთ. მაგალთო, ვა არსებენს ჟირ ართნერ ფიფქ. ადამიანეფშე მუშ რაგად შილებე? მსოფლიოს ბრუო მილიარდშე უმოს ადამიან ცხოვრენს, მარა თინეფშე გარეგნობათ დო ხასიათით ჟირ ზუსტას ართნერ ადამიანს ვა ძირუნქ. იეჰოვაქ განსხვავებულეფ გუმოჭყეს. თის ვაკო, არძა ართიანიშ კოპიო ვორდათ, მარა ოკო, ართობა მიღუდან. განსხვავებულეფ ვორეთინ თეს ჩქინ ართობაშ ეკორღვაფაშ საშვალება მეფჩათინ თიშ მანგიორო, ირნერო მშვიდობას უნწყუნთ ხეს. ჩქინო კრებაშ ართობა უმოს მნიშვნელოვან რე, ვინემ ჩქინ აზრიშ გოჸუნაფა (რომ. 14:19).

ᲛᲣᲭᲝ ᲨᲔᲛᲚᲔᲑᲣᲜᲐ ᲞᲐᲢᲘ ᲤᲪᲐᲗ ᲨᲮᲕᲔᲤᲘᲨ ᲒᲐᲓᲐᲬᲧᲕᲔᲢᲘᲚᲔᲑᲔᲤᲡ?

12, 13. მუშე ოკო დეფიფქრათ, მუჟამსით ჩქინ აზრით მიდგარენ „სწორ ვა რენ ფერ“ ნაბიჯის გინმოდგუნს? (გალ. 6:1; ქოძირით ჩარჩო „მუჟამსით ვათანხმუქ შხვეფიშ გადაწყვეტილებას“).

¹² მუჟამსით თანაქრისტიან ღებულენს პირად გადაწყვეტილებას. ქოკითხ სქან დუდის: «„სწორ ვა რენ ფერ“ ნაბიჯის გინმოდგუნსო თინა დოვარ განსხვავებულ ნაბიჯის?». არასწორ ნაბიჯის ქინმოდგუნს დო თეშნერო ბიბლიურ კანონს ქარღვიენს-და, ქოკითხ სქან დუდის: „ქუვორექო სულიერო თიცალ მოწიფულ, ნამდა მა შემალებუას თიშ გიშასწორებაქ დოვარ უჯგჷ, შხვაქ მერთას თიშ მახვარებშა?“. მოხვარა შეილებუნ თეს ქოფიქრენქ-და, თენა მუთ შილებე გემუანო ოკო აკეთე (წეკითხით გალატელეფიშ 6:1). მარა უმენტაშ შემთხვევას თინა შილებე უბრალოთ განსხვავებულ ნაბიჯის გინმოდგუნდას, თიცალს, ნამდგას სი დღას ვეგნოდგუნდჷ. თაშ ქორენ-და, ეჭვ ვემშეღა თიშ მოტივეფშა დო სულიერობაშა დო მითინწკუმა ვაგაკრიტიკა თიშ გადაწყვეტილება. პატი ქოცჷ თიშ უფლებას, პირად საკითხეფ მუშით გინოჭყვიდას დო ბრალ ვეგედვა თეშ გურშენ (რომ. 14:2–4).

¹³ წერმიბდგინათ თეცალ სიტუაცია: სი დო სქან მეგობარ მინურთ რესტორანშა. აუჩემენქო თის, ნამდა იშენდოიშენ თი ოჭკუმალ გეჭოფას, ნამდგას სი ეჭოფუნქ? მუშო ოკო რაგად, ვარ. სი პატის ქოცენქ თიშ უფლებას, მუშით გინოჭყვიდას, მუ ჭკუმას დო სი ვაიჸორსინ ფერ ოჭკუმალ გეჭოფასინ ხოლო, მუთუნს ვა თქუანქ, მუშენდა სი ვა გაფჷ თინა ოჭკუმალ. მორთ ასე როლეფ დოფთირუათ, სი ქუგახიოლედუო, სქან მეგობარს დუნძალებუდუკო სქანდა თიცალ ოჭკუმალიშ ჭკუმუა, ნამუთ ვაიჸორს? თეშნერო, ჩქი ხოლო პატის ფცენთჷ შხვეფს, მუჟამსით საშვალებას ვარზენთ, პირად გადაწყვეტილებეფ მუნეფიშით მიღან დო ვა ვანძალთ, თიცალ მუდგარენ გაკეთან, მუდგას ჩქი ვორთუთ.

14. მუჭო შემლებუნა ხე შეუნწყუათ ართობას პირად საკითხეფიშ გინოჭყვიდუაშ დროს? (1 კორ. 8:12, 13).

¹⁴ მუჟამსით პირად საკითხეფშე ბღებულენთ გადაწყვეტილებას. შხვეფ ვა გაღიზიანათინ თის ირნერო ქეცადებუთ-და, თეშნერო შეგალებენა ართობას შეუნწყუათ ხე (წეკითხით 1 კორინთელეფიშ 8:12, 13). შილებე სქან გადაწყვეტილებათ ღორონთიშ კანონს ვეგნურთანდე, მარა თენა თანაქრისტიანს გაღიზიანენს-და, ქიჸუაფუდუო თენა თიშო ჯგირობუაშ მუმაღალარ?c (1 კორ. 10:23, 24). თეცალ სიტუაციეფს თიშ მანგიორო, ნამდა სქან უფლებეფს მიანჯირენ, უჯგუშ იჸუაფ, შხვეფიშ გრძნობეფშე დეფიქრე (რომ. 15:1). ქო მარა, ასე ვა ფთქვითო, ნამდა ჩქი პატი ოკო ფცათჷ შხვეფიშ გადაწყვეტილებეფს დო თინეფქ ხოლო პატი ოკო ცანჷ ჩქინ გადაწყვეტილებეფს? თაშ რე, მარა თეწკუმა ართო ოკო ფშუდან რომაელეფიშ 12:18-ს მოჩამილ რჩევა, სოდეთ პკითხულენთ: „თქვან მხარეშე მუზმათ შეიოლებერ რენ, მშვიდობიანო რდათჷ არძაწკუმა“. ათეშენ ირფელ ოკო გუვაკეთათ, ნამდა ვა ვოდინუათ ართიან შქას მშვიდობა დო დუდ ეუჩილითუათ თიცალ მუდგარენიშ კეთებას, მუთ შხვეფს გაღიზიანენდ.

15. მუჭო შეულებუნა უხუცესეფს, ხე შეუნწყუან კრებაშ ართობას? (1 კორ. 4:6).

¹⁵ უხუცესეფქ პატი ოკო ცანჷ შხვეფიშ გადაწყვეტილებეფს. უხუცესეფ ართობას უნწყუნა ხეს, მუჟამსით კრებას პირად საკითხეფწკუმა დაკავშირებით ვადგინენა მუდგარენ კანონეფს დო მეჸუნა ბიბლიას მოჩამილ მითითებას: „ვეგნურთათ ჭარილს“ (წეკითხით 1 კორინთელეფიშ 4:6). თენა თის ხოლო ნიშნენს, ნამდა რჩევას ბიბლიურ პუბლიკაციეფშა გიორსხუანა. თეწკუმა ართო, მუჟამსით თანაქრისტიან თინეფს რჩევას ელაკითხანს, უხუცესეფ ფრთხილას რენა, ნამდა რჩევა მუნეფიშ პირად გამოცდილებაშე ვა უწუან. თეშ მანგიორო თის ირიათო ღორონთიშ სიტყვაშე ირზენა (ეს. 48:17, 18).

16. მუჭო შეულებ უხუცესის, პატი ცას უხუცესეფიშ საბჭოშ მეღებულ გადაწყვეტილებას?

¹⁶ უხუცეს პატიცემას თით ხოლო გიმირჩქინანს, ნამდა დოჸუნს უხუცესეფიშ საბჭოშ მეღებულ გადაწყვეტილებას. უხუცესეფიშ საბჭო დიო ლოცვას წმინდა შურიშ ხელმძღვანელობას თხინსჷ ღორონთის, უკულ ირკვიენს დო გიმირინუანს ბიბლიურ მითითებეფს დო ბოლოს ღებულენს გადაწყვეტილებას. თე ირფელიშ უკულ თითოეულ უხუცესიქ ხუჯ ოკო დუკინას მეღებულ გადაწყვეტილებას თიშ უმკუჯინუო, ნამდა შილებე მუს შხვა აზრ უღუდას (ეფეს. 5:17). თეს გეძინელ, უხუცეს ფრთხილას ოკო რდასჷ, ნამდა თეოკრატიულ მითითებეფიშ კითხირიშ დროს თიცალ აზრეფიშ გორუა ვედიჭყას, მუთ სინამდვილეს თექ ვეგულისხმებ, ნამდა უკულ თინა მუშ აზრიშ ხუჯიშდაკინებელო გეგმირინუას. მაგალთო, უხუცესიქ მუშ აზრიშ დამტკიცებელო პუბლიკაციაშე ხვალე ართ წინადადება ოკო ვემკიჭოფას, თეშ გინაწონს, თიქ ყურადღება ოკო ქიმიაქცუას მთლიან კონტექსტის.

17. მუ ჯგირობუა მოუღ კრებაშო ართიანიშ გადაწყვეტილებეფიშ პატიცემას?

¹⁷ მუჭოთ გებგით, ჩქი არძა განსხვავებულ ვორეთ. თითოეულს ჩქინ პირად შეხედულებეფ დო გემოვნება მიღუნა. მუშო ოკო რაგად, თენა მანგარ ჯგირ რე. თეცალ განსხვავებულეფ ვორეთინ თინა, ქრისტიანულ კრებას უმოსო ასქვამენს. თეცალ განსხვავებულობას ჩქინ გორთუალაშ უფლება მეფჩათინ თიშ მანგიორო, ჩქი ხეს უნწყუნთ მშვიდობას. ჩქი პატის ფცენთჷ ართიანიშ გადაწყვეტილებეფს დო ვოცადუთ, ვა გუვაღიზიანათ ართიან. თაშ მოქციებას ჯგირ შედეგეფ მოჸუნს დო ფხარენთ კრებაშ ართობათ (ფსალმ. 133:1; მათ. 5:9).