ᲝᲒᲣᲠᲐᲤᲐᲚ ᲡᲢᲐᲢᲘᲐ 41
ᲝᲑᲘᲠᲔᲨ 108 ღორონთ – ართგურ დო მოჸოროფე
ღორონთიშ ჸოროფა დღას ვეთებ
„მადლობა უძღვინით იეჰოვას, მუშენდა ჯგირ რე თინა; ულიებ დო ართგურ რე თიშ ჸოროფა“ (ᲤᲡᲐᲚᲛ. 136:1).
ᲛᲘᲖᲐᲜ
თე სტატია ქუგმოშინანა, ნამდა ღორონთის უჸორთინ თენა ართ-ართ მთავარ ბიბლიურ გურაფა რე დო ქუმოძირანა, მუჭო მიმეხვარებუნა თეშ რჩქინა განსაცდელეფიშ დროს.
1, 2. მუჭო შილებე იბგინათ დუდ სირთულეეფიშ დროს?
ᲬᲔᲠᲛᲘᲓᲒᲘᲜᲘᲗ ნავ, ნამუთ სასწაულ ქარბორიაშ დროს შქა ზღვას რე. ზღვა პოპორს ორთჷ დო ნავს ეშე-გიმე ოლაჸაფინუანს. ონდო ღუზას ვა გუტენან, წყარ თის თაშ ოლაჸაფინუანდას იჸი. ღუზა ქიგიოჭოფანს ნავს დო წყარს თინა ეკი-დიკი ვეგლაღინე.
2 მუჟამსით შტორმცალ განსაცდელეფს ხვადუთ, შილებე თქვა ხოლო თე ნავცალო რდათჷ. მუჭოთ წყარს გილუღ თინა ეკი-დიკი, თეშ შილებე ითირუდას თქვან ემოციეფ ხოლო. შილებე ართ დღას რჯერდან, ნამდა იეჰოვას უჸორთ დო ელაირენა, მარა მაჟია დღას გირჩქინდუნან ეჭვ, შურო ქარწყენო იეჰოვა, მუ დღას რეთჷ (ფსალმ. 10:1; 13:1). შილებე ნამდგაინ მეგობარქ გურიშემაკინალ სიტყვეფ ქოიწუან დო ჭეხანს ჯგირო რდათჷ (იგავ. 17:17; 25:11). მარა უკულ კინ გართუნა ეჭვეფ. შილებე ბოლოს გვალო თეიშახ ქიმერთათ, ნამდა იფიქრათ, იეჰოვას შურო ვა უჸორთ. მუჭო შეილებუნა თეცალ დროს „ღუზა გოუტუათ“, შხვანერო ქოფთქუათინ, ირიათო გერდათ თი აზრის, ნამდა იეჰოვას უჸორთ დო ელაირენა?
3. ა) მუს ნიშნენს „ართგურ ჸოროფა“? (ფსალმ. 31:7; 136:1). ბ) მუშენ შემლებუნა ფთქუათ, ნამდა ართგურ ჸოროფაშ არძაშ უჯგუშ მაგალითის იეჰოვა ირზენს? (ქოძირით სურათ).
3 ქარბორიაცალ განსაცდელეფიშ დროს თქვანო ღუზაცალ იჸუაფ თიშ გოშინა, ნამდა იეჰოვას „ართგურ ჸოროფათ“ უჸორთ (წეკითხით ფსალმუნეფიშ 31:7; 136:1). სიტყვეფ „ართგურ ჸოროფა“ ეჭარუნს მანგარ ძალიერ გრძნობას, ნამუთ დღას ვესუსტებ დო მუდროსით ართ პიროვნებას მაჟიაშ უმშო ვეშულებ. თეცალ ჸოროფაშ არძაშ უჯგუშ მაგალით იეჰოვა რე. ბიბლიას ჭარჷ, ნამდა თინა გურხვე რე ართგურ ჸოროფას (გამ. 34:6, 7). ბიბლიას თინა ხოლო ჭარჷ, ნამდა იეჰოვა ართგურ ჸოროფას ვარკენს თინეფს, მით თიშ სახელს შინანს (ფსალმ. 86:5). დეფიქრით, მუ აზრ ინოძ თე მუხლეფს: იეჰოვა დღას ვემიოტენს მუშ ართგურ მსახურეფს. თის თეშმანწარას უჸორთინ თეშ გოშინა თქვანო ღუზაცალ იჸუაფ ქარბორიაცალ პრობლემეფიშ დროს (ფსალმ. 23:4).
ღუზა ოხვარ ნავს, შტორმიშ დროს ტალღეფქ იშო-აშო ვეგლეღას. თეშნერო, იეჰოვაშ ჸოროფაშა დარწმუნებულ ქიპჸით-და, თენა მიმეხვარებუნა სირთულეეფიშ დროს სიმშვიდე ვა ვოდინუათ (ქოძირით აბზაც 3)
ᲠᲨᲣᲓᲐᲜ, ᲘᲔᲰᲝᲕᲐᲡ ᲣᲸᲝᲠᲗᲘᲜ ᲗᲔᲜᲐ ᲑᲘᲑᲚᲘᲐᲨ ᲐᲠᲗ-ᲐᲠᲗ ᲛᲗᲐᲕᲐᲠ ᲒᲣᲠᲐᲤᲐ ᲠᲔ
4. ქიმიშინეთ, ნამთინე მთავარ ბიბლიურ გურაფა დო გენწყით, მუშენ ვათირენა შხვეფს ჩქინდა ადვილო აზრ.
4 ხოლო ართ საშვალება, მუთ სირთულეეფიშ დროს ჩქინო ღუზაცალ იჸუაფ, თიშე დაფიქრება რე, ნამდა იეჰოვას უჸორთინ თენა ბიბლიაშ ართ-ართ მთავარ გურაფა რე. მუ გუგაშინენა, მუჟამსით გარჩქილენა სიტყვეფ „ბიბლიაშ მთავარ გურაფეფ“? შილებე გუგაშინან თი საკითხეფქ, ნამუთ ღორონთიშ სიტყვაშე დიგურეთ. მაგალთო, დიგურეთ, ნამდა ღორონთიშ სახელ იეჰოვა რე, იესო თიშ ხვალეგუნაჭყეფ სქუა რე, ღურელეფ მუთუნს ვა გინაფლენა დო გეგით თინა ხოლო, ნამდა დედამიწას ადამიანეფ სამოთხეს იცხოვრენა (ფსალმ. 83:18; ეკლ. 9:5; იოან. 3:16; გიმოცხ. 21:3, 4). თიშ უკულ, მუთ დერწმუნით, ნამდა თე გურაფეფ სიმართლე რე, შხვეფიშ ნარაგადის ადვილო ვათირედ თქვან აზრ. მუშენ? მუშენდა ქიმეხვადით, ნამდა თე გურაფეფ მტკიცებულებეფშა რდჷ გერსხილ. მორთ ასე ქობძირათ, მუჭო მიმეხვარებუნა თიშ რჩქინა, ნამდა იეჰოვას უჸორთინ თენა ბიბლიაშ ართ-ართ მთავარ გურაფა რე, ჩეფთხინუათ თი აზრ, ნამდა იეჰოვას ვა ვოინტერესუთ ვარდა არძაართ აფჷ, მუ მდგომარეობას ვორეთ.
5. გეჭარით, მუჭო ურთინუანს პიროვნება ოჭიშის ტყურა გურაფეფს.
5 მუქ მიგეხვარეს ტყურა გურაფეფიშ ჩათხინაფას, მუჟამსით ბიბლიაშ გურაფა დიჭყით? შილებე ართიანს უდარენდით თის, მუთ თქვან რელიგიაშე გიჩქუდეს დო მუდგას ბიბლიაშე გურაფლენდით. ქიმიპჸუნათ თეცალ მაგალით: შილებე დუდშე რწანდეს, ნამდა იესო ირფელიშშემალებე ღორონთ რე. მარა ბიბლიაშ გურაფაქ დუგაფიქრეს, ქორდჷ დო ვარ თენა მართალო თაშ. თიშ უკულ, მუთ ღორონთიშ სიტყვაშე უმოს ქიგეგით თე საკითხიშ გურშენ, ქიმეხვადით, ნამდა თენა სწორ გურაფა ვა ჸოფე დო ქირწმუნით, ნამდა იესოქ „არძა გუნაჭყეფშახ . . . იჸუ გოჭყაფილქ“ დო თინა „ღორონთიშ ხვალეგუნაჭყეფ სქუა“ რე (კოლ. 1:15; იოან. 3:18). მუშო ოკო რაგად, შილებე ტყურა გურაფეფიშ ჩათხინაფაქ „კოშკცალ მანგარ მუდგარენეფიშ“ აკორღვაფაცალ ძნელქ გაჸუეს (2 კორ. 10:4, 5). მარა თიშ უკულ, მუთ სიმართლე ქიგეგით, მეტო ვა დოირთინუნა ტყურა გურაფეფშა (ფილ. 3:13).
6. მუშენ რე 136-ა ფსალმუნს თესხიშა მოშინაფილ სიტყვეფ „ულიებ დო ართგურ რე იეჰოვაშ ჸოროფა“?
6 ზუსტას თაშ ოკო მეუდირთათ თის ხოლო, მუდგას ბიბლია იეჰოვაშ ჸოროფაშ გურშენ მოგურუანა. პრობლემეფქ იეჰოვას უჸორთინ თეშა ეჭვ გემშგოღალაფუეს-და, ქოკითხით თქვან დუდის: „მართალო სწორ რენო მუდგას ფიფქრენქ?“. უკულ თქვან ეჭვ ქეშუდარით თის, მუდგას ბიბლია იჩიებ იეჰოვაშ ჸოროფაშ გურშენ 136-ა ფსალმუნიშ 1-ელ მუხლის, ნამუთ თე სტატიაშ მთავარ მუხლ რე. მუშენ იჩიებ იეჰოვა მუშ ჸოროფაშ გურშენ, ნამდა „ართგურ“ რე? მუშენ ჭარჷ სიტყვეფ „ულიებ დო ართგურ რე იეჰოვაშ ჸოროფა“ თე ფსალმუნს 26-შა? მუჭოთ ჟიშე მიფშინეთ, იეჰოვას მუშ ხალხ ართგურ ჸოროფათ უჸორსინ თენა ართ-ართ მთავარ გურაფა რე თი გურაფეფ შქას, ნამუთ ღორონთიშ სიტყვაშე გეგით დო ირწმუნით. თეშ გინაწონს, იეჰოვას ვა უჸორთ დო მუთუნო ვემვორჩქუთინ თე აზრ, ართ-ართ ტყურა გურაფა რე. ათეშენ, მუჭოთ შხვა ტყურა გურაფეფ ჩეთხინეთ, თეშ ჩეთხინეთ თე აზრ ხოლო!
7. ქიმიჸუნით ნამთინე ბიბლიურ მუხლ, ნამუთ მარწმუნენა, ნამდა იეჰოვას უჸორთ.
7 ბიბლიას შხვა ბრელ მტკიცებულება ხოლო რე თიშ, ნამდა იეჰოვას უჸორთ. მაგალთო, იესოქ მუშ მარჩქილეეფს უწუ: „ბრელ ბაღირშე უმოს ძვირფასეფ რეთჷ“ (მათ. 10:31). ართშა იეჰოვაქ ხოლო მუშ ხალხის უწუ: „გუგამანგარენქ, მა მიგეხვარებუქ, ჩქიმ სიმართლეშ მარძგვან ხეს ქუმორთხუნქ!“ (ეს. 41:10). ქიდეკვირით, მუნერ გინოჭკირილო რე ჟირხოლო აზრ ნარაგად. იესოს ვა უთქუალ „შილებე უმოს ძვირფასეფ რდათჷ“ დო ვართ იეჰოვას უთქუალ „ეგება ქიმგეხვარე“. თინეფ იჩიებუნა: „ძვირფასეფ რეთჷ“, „მიგეხვარებუქ“. პრობლემეფქ იეჰოვაშ ჸოროფაშა ეჭვ გემშგოღალაფუეს-და, თეცალ მუხლეფიშ გოშინა დუდის ხვალე უჯგუშო ვა გოგინაფუანან, თიშა ხოლო დუგარწმუნენა, ნამდა იეჰოვას მართალო უჸორთ. თე მუხლეფს ფაქტეფ მუკუძ. ქილოცენთ დო თექ ინოჭარილ აზრეფშე დეფიქრებუთ-და, თქვა ხოლო გარაგადენა თი სიტყვეფ, ნამუთ 1 იოანეშ 4:16-ის ჭარჷ: „ჩქი ქიბგინით, ნამდა ღორონთის უჸორთ დო პწანა თენა“.a
8. მუშ კეთება შეილებუნა, ღორონთის უჸორთინ თენა იშენით ქუგოეჭვუნან-და?
8 მარა მუ ოკო აკეთათ, იეჰოვაშ ჸოროფაშა იშენით ეჭვ ქიმშაიღუნან-და? მუდგას გინაფლენთინ თინა ქეშუდარით თის, მუთ იეჰოვაშ გურშენ გიჩქუნა. ჩქინ ემოციეფ დო გრძნობეფ ხშირას ითირუ, მარა ფაქტეფ დღას ვეთირუ. მუჭოთ ბიბლიაშე ბგებულენთ, ღორონთის უჸორთინ თენა ფაქტ რე. თაშ ნამდა, იეჰოვაშ ჸოროფაშა ეჭვის გემშებღანთ-და, თენა თიშ რაგად იჸიდ, ნამდა ბიბლიას ტყურა ჭარჷ დო ვა რე მართალ, ნამდა „ღორონთ ჸოროფა რე“ (1 იოან. 4:8).
ᲥᲘᲤᲘᲥᲠᲘᲗ ᲗᲘᲨᲔ, ᲜᲐᲛᲓᲐ ᲘᲔᲰᲝᲕᲐᲡ ᲣᲸᲝᲠᲗ
9, 10. მუ კონტექსტის თქუ იესოქ სიტყვეფ „მუმას უჸორთ“? (იოან. 16:26, 27; ქოძირით სურათ).
9 იეჰოვაშ ჸოროფაშე ხოლო უმოსის ქიგებგენთ, მუჟამსით დეფიფქრებუთ იესოშ სიტყვეფშე, ნამუთ თიქ მუშ მიმაჸუნალეფს უწუ: „მუმას უჸორთ“ (წეკითხით იოანეშ 16:26, 27). იესოს თე სიტყვეფ მუშ მოწაფეეფშა უბრალოთ გურიშ ელაკინალო ვა უთქუალ. კონტექსტშე იძირე, ნამდა თე მომენტის იესოშ ჩიებაშ მთავარ თემა მოწაფეეფიშ გრძნობეფ ვარინ, ლოცვაშ საკითხ რდჷ.
10 თე სიტყვეფიშ რაგადშახ, იესოქ მუშ მოწაფეეფს უწუ, ნამდა ლოცვათ მუს ვა დურაგადუესკონ, მუშ სახელით დურაგადუესკო მუმას (იოან. 16:23, 24). თეშ რჩქინა მოწაფეეფშო მანგარ მნიშვნელოვან რდჷ, მუშენდა იესოშ გათელებაშ უკულ თინეფქ შილებე მინდომესკო, ლოცვათ იესოს დურაგადუესკო. მოწაფეეფ იესოწკუმა ხოლოს რდესჷ დო შილებე იფიქრესკო, ნამდა რახანს იესოს თინეფ მანგარო უჸორდჷ, ქიმირჩქილუანდ თინეფიშ ოთხუალს დო უკულ მუმას ქოთხინდ, ქიმეხვარუკო თინეფს. მარა იესოქ თინეფს ეუნწყჷ, მუშენ ოკო ვეფიქრესკო თაშ. თიქ უწუ: „მუმას უჸორთ“. თე სიტყვეფით იესოქ დაგურუ თინეფს, ნამდა იეჰოვას ოკოდ, ქიმირჩქილუკო თინეფიშ ლოცვეფ. თენა რე ართ-ართ მთავარ ბიბლიურ გურაფა ლოცვეფიშ გურშენ. დეფიქრით, მუს ნიშნენს თე სიტყვეფ თქვანო. ბიბლიაშ გურაფაშ საშვალებათ თქვა გეჩინებაფეთ დო ქიჸოროფეთ იესო (იოან. 14:21). მარა, პირველ საუკუნეშ ქრისტიანეფცალო, თქვა ხოლო ღორონთის ოკო დურაგადუათ ლოცვათ დო რჯერდან, ნამდა თის უჸორთ. არძა შემთხვევას, მუჟამსით იეჰოვას ლოცვათ დურაგადუანთ, დამტკიცენთ, ნამდა რწანა იესოშ სიტყვეფიშ (1 იოან. 5:14).
შეილებუნა თამამას ქეჩუათ იეჰოვას ლოცვათ დო რჯერდან, ნამდა თის უჸორთ (ქოძირით აბზაცეფ 9, 10)b
ᲒᲣᲠ ᲥᲣᲒᲣᲩᲘᲗ, ᲛᲣ ᲒᲘᲠᲩᲥᲘᲜᲐᲜᲐ ᲔᲭᲕᲔᲤᲡ
11. მუშენ ახიოლე სატანას, იეჰოვაშ ჸოროფაშა ეჭვის გემშებღანთ-და?
11 მუჭო ფიქრენთ, მუშენ შილებე გომრჩქინდან ეჭვეფქ, მართალო ქუჸორთ დო ვარ იეჰოვას? შილებე თქუათ, ნამდა თეს სატანა მოფიქრებაფუანა დო ართ-ართ მიზეზ ქოთ თინა რე. სატანა ოცად, გეგნობრყინტან დო მანგარო ოკო, იეჰოვაშ ჸოროფაშა ეჭვ გემშმოღალაფუან (1 პეტ. 5:8). ვარინ იეჰოვაქ ზუსტას ჩქინ ჸოროფაშ გურშენ გინიგ გიშაჸიდირალ, ნამდგაშეთ სატანას ოკო, მოფიქრებაფუან, ნამდა თიშ ღირს ვა ვორეთ (ებრ. 2:9). მუჭო ფიქრენთ, მის ახიოლე, იეჰოვაშ ჸოროფაშა ეჭვის გემშებღანთ-და? სატანას. სირთულეეფიშ დროს იეჰოვაშ მსახურებას მივოტენთ-და, მის გუხარენთ გურს? კინ სატანას. ოძიცე ვა რენო, სატანა ოცადუდას, მოფიქრებაფუან, ითამ იეჰოვას ვა უჸორთ?! იეჰოვაშ ჸოროფა მითინს ქაფჷ დინაფილ-და, თენა სატანა რე. მარა თინა მუშ „მაზაკვალურ გეგმეფით“ ოცად, მოფიქრებაფუან, ნამდა იეჰოვას ჩქინდა აფჷ ხაზ გინოსუმალირ დო ჩქი ვა უჸორთ (ეფეს. 6:11). მუჟამსით გურს ქუგუჩანთ, მუშ მენჭირნაფას ოცად ჩქინ ნტერ, უმოსო მაჸინა გინოჭყვიდილ, ქივეწინააღმდეგათ თის (იაკ. 4:7).
12, 13. მუშენ შილებე ცოდამეფო იბაბდებუთინ თიშ გურშენ დემეეჭვან, ქუჸორთ დო ვარ იეჰოვას?
12 იეჰოვას უჸორთინ თეშა ეჭვ შილებე შხვა მუდგარენქ ხოლო გენშმოღალაფუან. მუ რე თენა? თენა რე ადამ დო ევაშე მეღებულ არასრულყოფილება დო ცოდამ მიდრეკილებეფ (ფსალმ. 51:5; რომ. 5:12). ცოდაქ გილამლუეს ურთიერთობა ჩქინ გუმაჭყაფალწკუმა. თინა გლახათ მოქმედენს ჩქინ აზროვნებაშა, გრძნობეფშა დო ჯანმრთელობაშა ხოლო.
13 ცოდა თიცალ გლახათ მოქმედენს ჩქინ ემოციეფშა, ნამდა მირჩქინანა დანაშაულიშ, წუხებაშ, დაუცველობაშ დო ონჯღორეშ გრძნობას. თეცალ გრძნობეფ თიმწკუმა მირჩქინდუნა, მუჟამსით მუდგარენს ვაშენთ. მარა თინეფქ შილებე თიშენ ხოლო გომრჩქინდან, ნამდა ცოდამეფო იბაბდებუთ, მუნერეფოთ ღორონთის ადამიანეფ ვა გუჭყაფ (რომ. 8:20, 21). მუჭოთ პაკრიშკადოშქუმალირ მანქანას ვალინე თიშმაჯგირას, მუჭოთ ქარხანაქ გიშაშქვჷ, თეშ არასრულყოფილ ადამიანს ვეშულებ სრულას გეგმირინუას მუშ პოტენციალ, ნამუთ ღორონთიქ გოჭყაფაშ დროს ინუდვჷ. ათეშენ, გასაკვირ ვა რე, მინშა მოეჭვუდან, მართალო ქუჸორთ დო ვარ იეჰოვას. თეცალ ფიქრეფქ გომრჩქინდეს-და, ოკო გუვოშინათ ჩქინ დუდის, ნამდა იეჰოვა რე ღორონთ, მიდგას ართგურ ჸოროფათ უჸორს მუშ მოჸოროფეეფ დო თინეფ, მით იცვენს მუშ მცნებეფს (ნეემ. 1:5).
14. მუჭო მიმეხვარებუნა გიშაჸიდირალშე ფიქრ, ჩეფთხინუათ აზრ, ნამდა იეჰოვას ვა უჸორთ? (რომ. 5:8; ქოძირით ჩარჩო „დუდ დითხილეთ ცოდაშ ძალაშე, ნამუთ მაჩილითაფარ რე“).
14 მინშა შილებე ფიფქრენდათ, ნამდა იეჰოვაშ ჸოროფაშ ღირსის ვა ვორეთ. პირდაპირ ქოფქთუათინ, მართალო ვა ვორეთ ღირს, დო თის იშენით უჸორთინ, ზუსტას ათეშენ რე თიშ ჸოროფა განსაკუთრებულ. ჩქი ჩქინით ვადმამსახურებედეს იეჰოვაშ ჸოროფა, მარა თინა გიშაჸიდირალით ფორუნს ჩქინ ცოდეფს, მუშენდა უჸორთ (1 იოან. 4:10). ვაგმოჭყორდან თიქ ხოლო, ნამდა იესოქ ცოდამეფიშ დარსხებშა მორთჷ დო ვართ ხოლო სრულყოფილ ადამიანეფიშ (წეკითხით რომაელეფიშ 5:8). ჩქი მუთუნ ვა მაკეთებენა სრულყოფილო დო იეჰოვა ვართ ელჷ თეს. თაშ ნამდა, მუჭოთ ვორწყეთ, ჩქინ ცოდამ მდგომარეობა მირჩქინანა ეჭვის, ქუჸორთ დო ვარ იეჰოვას. თეშ რჩქინა მიმეხვარებუნა, ხოლო უმოსო ვებრძოლათ თეცალ აზრეფს (რომ. 7:24, 25).
ᲒᲔᲒᲨᲔᲒᲝᲠᲘᲗ ᲘᲔᲰᲝᲕᲐᲨ ᲐᲠᲗᲒᲣᲠᲝᲑᲐ
15, 16. მუშ იმენდ შილებე მიღუდან, იეჰოვაშ ართგურეფ ქუდოფსქიდუთ-და, დო მუშენ? (2 სამ. 22:26).
15 იეჰოვას ოკო, სწორ არჩევან გუვაკეთათ დო დღას ვეჩვეთხუათ თის (კან. 30:19, 20). თაშ ქიმიფქციებუთ-და, შემლებუნა დარწმუნებულ ვორდათ, ნამდა თინა ჩქინ ართგურობას ართგურობათ ქუპასუხენს (წეკითხით 2 სამუელიშ 22:26). თიშ ართგურეფ ქუდოფსქიდუთ-და, ცხოვრებას მუდგა სირთულეს ვეშეფხვადათინ, შემლებუნა თიშ მოხვარაშ იმენდ მიღუდან.
16 მუჭოთ თე სტატიას გუვარჩით, ბრელ მუდგარენქ შილებე ჩქინო სირთულეეფიშ დროს ღუზაცალქ იჸუას. მიჩქუნა, ნამდა იეჰოვას უჸორთ დო აუცილებერო ქიმმეხვარებუნა. ზუსტას თეს მოგურუანა ბიბლია. იეჰოვას ქუჸორთ დო ვარინ თეშ ეჭვიქ გომრჩქინდეს-და, მთელ ყურადღება ჩქინ ემოციეფშა დო გრძნობეფშა ვარინ, თიშა ოკო გეგნიბღათ, მუთ მიჩქუნა ბიბლიაშე იეჰოვაშ ჸოროფაშ გურშენ. რჯერდან, მუჭოთ ბიბლია იჩიებ, იეჰოვაშ ჸოროფა ულიებ დო ართგურ რე.
ᲝᲑᲘᲠᲔᲨ 159 გადიდენქ, იეჰოვა!
a შხვა მუხლეფ ხოლო, ნამუთ იეჰოვაშ ჸოროფაშა მარწმუნენა: კანონ 31:8, ფსალმუნეფ 94:14 დო ესაია 49:15.
b ᲡᲣᲠᲐᲗᲘᲨ ᲔᲭᲐᲠᲣᲐ: ჯიმა ლოცულენს დო იეჰოვას თხულენს მოხვარას, ნამდა ქეშიალებუას დალახებურ ოსურიშ მიკოლუაფაქ, ფარაშ სწორას განაწილებაქ დო მუშ სქუაშა იეჰოვაშ ჸოროფაშ დოგურაფაქ.