ᲝᲒᲣᲠᲐᲤᲐᲚ ᲡᲢᲐᲢᲘᲐ 42
ᲝᲑᲘᲠᲔᲨ 44 გურშეწუხებულიშ ლოცვა
მუჭო შეილებუნა ლოცვეფიშ გაუჯგუშება
„მთელ გურით გიძახუქ დო ქომპასუხ, იეჰოვა“ (ᲤᲡᲐᲚᲛ. 119:145).
ᲛᲘᲖᲐᲜ
თე სტატია ქუმოძირანა, მუჭო მიმეხვარებუნა ბიბლიას ინოჭარილ ლოცვეფშე ფიქრ ჩქინ ლოცვეფიშ გაუჯგუშებას.
1, 2. ა) მუქ შილებე მეცილან იეჰოვაშა გურიშ გინოფაჩუას? ბ) სოვრეშე მიჩქუნა, ნამდა იეჰოვა მთელ გურით ურჩქილე ჩქინ ლოცვეფს?
ᲗᲔᲨ ხომ ვატყუაფუთ, ნამდა ლოცვაშ დროს ირიათო ართ დო იგივეს იჩიებუთ დო გურს ვეგნუფაჩუნთ იეჰოვას? თაშ ქორენ-და, ვეფიქრათ, ნამდა ხვალე თქვა გოჭირუნა თენა. თიცალ ცხოვრებაქ ქუმორთჷ, ნამდა ირო მუდგარენ მაფუნა ოჭიშაფალ, ათეშენ შილებე გინორულერ ლოცვას ქიმვარჩქვანათ. ვარდა ხოლო შილებე იეჰოვაშა გურიშ გინოფაჩუა თიშენ მიჭირდან, ნამდა დუდ ვემმორჩქუნა თიწკუმა ჩიებაშ ღირსო.
2 ბიბლიაშე ბგებულენთ, ნამდა იეჰოვა თის ვა უჯინე, მუნერ სქვამას რე დონწყილ სიტყვეფ ჩქინ ლოცვას. თიშო მთავარ რე, ალალას დო თანდაბლურო ვეჩიებუდათ. თინა „თვინიერეფიშ ოთხუალს“ ირჩქილე (ფსალმ. 10:17). იეჰოვა შურ დო გურით ურჩქილე ჩქინ ირ სიტყვას, მუშენდა ქიანაშა უსხუნუთ (ფსალმ. 139:1–3).
3. მუ კითხვეფს გუვარჩიენთ თე სტატიას?
3 თე სტატიას გუვარჩიენთ თეცალ კითხვეფს: მუშენ შემლებუნა იეჰოვას თავისფალო ვეჩუათ ლოცვას? მუშ კეთება შემლებუნა, ნამდა ჩქინ ლოცვეფ უმოს აზრიან რდასჷ? მუჭო მიმეხვარებუნა ბიბლიას ინოჭარილ ღორონთიშ მსახურეფიშ შურ დო გურით რაგადებულ ლოცვეფ ჩქინ ლოცვეფიშ გაუჯგუშებას? მუშ კეთება შემლებუნა, მუჟამსით გურ თეშ მაფუნა დამონკებულ, ნამდა მიჭირა იეჰოვაშა გურიშ გინოფაჩუა?
ᲗᲐᲕᲘᲡᲤᲐᲚᲝ ᲔᲩᲘᲗ ᲘᲔᲰᲝᲕᲐᲡ ᲚᲝᲪᲕᲐᲡ
4. მუ მიმეხვარებუნა, თავისფალო ვეჩუათ იეჰოვას ლოცვაშ დროს? (ფსალმ. 119:145).
4 იეჰოვა ჩქინ ართგურ მეგობარ რე, ნამდგას ირო ჯგირ ოკო ჩქინო. თენა ქუმარჩქილენან-და, შემალებენა უმოს თავისფალო ვეჩუათ თის ლოცვაშ დროს. 119-ა ფსალმუნიშ მაჭარალ ხოლო ოცადუდ, თეცალ ხოლოშიან ურთიერთობა უღუდუკო იეჰოვაწკუმა. თის ადვილ ცხოვრება ვა უღუდ, ბრელ პრობლემას ხვადუდ. მაგალთო, უბადო კათა ტყურეფს ეკაწამენდჷ (ფსალმ. 119:23, 69, 78). თეწკუმა ართო, მინშა თის მუშ შეცდომეფიშ გურშენ ხოლო უტირხუდ გურ (ფსალმ. 119:67). მარა, ირფელიშ უმკუჯინუო, თინა იშენით თავისფალო ეჩიებუდ იეჰოვას (წეკითხით ფსალმუნეფიშ 119:145).
5. მუშენ ოკო ვემეფჩათ გლახა გრძნობეფს საშვალება, მეცილან იეჰოვაწკუმა დორაგადაფას? ქიმიჸუნით მაგალით.
5 იეჰოვას ოკო, თინეფქ ხოლო ილოცან დო ეჩუან თის ლოცვათ, მიდგას სერიოზულო აფუნა დაშებულ (ეს. 55:6, 7). ათეშენ გლახა გრძნობეფს ოკო ვემეფჩათ საშვალება, მეცილან იეჰოვაწკუმა დორაგადაფას. მაგალთო, არძა პილოტის უჩქჷ, ნამდა მუთუნქ გაუჭირდ-და, შეულებ ნავიგაციაშ დისპეტჩერს დეკავშირას. ქიჸუაფუდუო ჭკვერულ, პილოტიქ ვა თხუკო მოხვარა სადისპეტჩეროს, მუშენდა ონჯღორე უჩქჷ თიშ რაგადშა, ნამდა შარას ეჩირთჷ ვარდა მუდგარენ შეცდომა უღჷ? მუშო ოკო რაგად, ვარ! თეშნერო, მუჟამსით დაშებულ მაფუნა ვარდა გინაჭყვიდირალ მაფუნა მუდგარენ დო ვა მიჩქუნა, მუ ვაკეთათ, შემლებუნა თავისფალო ქივეჩუათ იეჰოვას თეშ გურშენ (ფსალმ. 119:25, 176).
ᲛᲣ ᲛᲘᲒᲔᲮᲕᲐᲠᲔᲑᲣᲜᲐ, ᲗᲥᲕᲐᲜ ᲚᲝᲪᲕᲔᲤ ᲣᲛᲝᲡ ᲐᲖᲠᲘᲐᲜ ᲠᲓᲐᲡᲷ
6, 7. მუჭო მოხვარუნა იეჰოვაშ თვისებეფშე დაფიქრება თის, ნამდა ჩქინ ლოცვეფ უმოს აზრიან რდასჷ? ქიმიჸუნით მაგალით (ქოძირით სქოლიო).
6 მუჟამსით ალალას ვეჩიებუთ იეჰოვას ჩქინ გრძნობეფიშ დო ფიქრეფიშ გურშენ, ჩქინ ლოცვეფ უმოს აზრიანო გინმირთუ. მუშ კეთება შემლებუნა თეშ მიოჭირინაფალო?
7 ქიფიქრით იეჰოვაშ თვისებეფშე.a მუთ უმოსის იფიფქრენთ იეჰოვაშ თვისებეფშე, თით უმოს თავისფალო შემალებენა თიწკუმა ჩქინ გრძნობეფშენ ჩიება (ფსალმ. 145:8, 9, 18). დეფიფქრათ ართ დაშ, კრისტინიშ შემთხვევაშე, ნამდგას მოძალადე მუმა ჸუნდჷ. თინა იჩიებ: „მიჭირდჷ იეჰოვას, მუჭოთ მოჸოროფე მუმასინ თეშ ვეჩიკო. ფიფქრენდჷ, ნამდა ჩქიმ შეცდომეფიშ გურშენ თინა მიმოტენდ“. იეჰოვაშ ნამ თვისებაშე დაფიქრებაქ მეხვარ კრისტინს? თინა აგრძელენს: „ბრელს ფიფქრენდჷ იეჰოვაშ ართგურ ჸოროფაშე დო თექ დუმარწმუნ, ნამდა თის მართალო უჸორქ. თინა დღას ვა გომტენს ხეს დო დუვანთხენ ხოლო, ჸოროფათ გენწმოდგინუანს. თე ირფელ მოხვარ, იეჰოვას ალალას ქივეჩუე ქოთ ჩქიმ ხიოლიშ დო ქოთ ოწუხებელიშ გურშენ“.
8, 9. მუშენ იჸუაფ ჯგირ, ლოცვაშახ დეფიფქრათ, მუს ფთქუანთ? ქიმიჸუნით მაგალით.
8 დეფიქრით, მუს თქუანთ. ონდო ილოცენდათ, ჯგირ იჸუაფ, მუსხირენ კითხვაშე დეფიქრათ. მაგალთო: კონკრეტულო მუ პრობლემეფ მიღჷ ასე? მითინშა მუთუნ ხომ ვა მაფჷ ოპატიებელ? მუდგაინ ახალ სირთულექ ხომ ვემკორჩქინდჷ ჩქიმ ცხოვრებას, მუდგაშოთ იეჰოვაშ მოხვარა მოსაჭირ? (2 მეფ. 19:15–19). თეწკუმა ართო, ოკო ვაგმოჭყორდან იესოშ დოტებულ ლოცვაშ ნიმუშიქ ხოლო დო დეფიფქრათ, მუ შემლებუნა ფთხუათ იეჰოვას მუშ სახელიშ განწმენდაშ, მუშ სამეფოშ მოულაშ დო მუშ ნებაშ შესრულებაშ გურშენ (მათ. 6:9, 10).
9 თიშ უკულ, მუთ ართ ჩქინ დაქ, ალისკაქ, ქიგეგ, ნამდა მუშ ქომონჯის ბოლო სტადიაშ ტვინიშ კიბო უღუდ, მანგარო უჭირდჷ ლოცვა. თინა იჩიებ: „თეშ მაფუდ გურ დამონკებულ, ნამდა ლოცვას მუ ფთქვიკონ თინა ხოლო ვამჩქუდ“. მუ ოხვარ თის? ალისკა იჩიებ: „ლოცვაშახ დიო ფიფქრენქ, მუს ფთქუანქ დო აზრეფს აკვონწყუნქ. თენა მოხვარ, ლოცვაშ დროს ხვალე ჩქიმ დუდშე დო ჩქიმ ქომონჯიშ ლახალაშე ვეფჩუე. მუჟამსით თაშ იფქციებუქ, დუდის უმოს მშვიდას ბგინაფლენქ დო უმოსო შემლებ იეჰოვას შხვადოშხვა მუდგარენეფშე ვეჩუე“.
10. მუშენ ოკო იბლოცათ ბრელ ხანს? (ქოძირით სურათეფ).
10 ბრელ ხანს ილოცით. მართალ რე, ჭიჭე ლოცვეფ ხოლო შილებე რდასჷ აზრიან, მარა ლოცვას ხეთეშე ვემვოტენთ დო უმოს დროს გეგშურთუნთ-და, უჯგუშო შემალებენა ქივეჩუათ იეჰოვას, მუს ბგინაფლენთ.b ალისკაშ ქომონჯ, ელია, იჩიებ: „ვოცადუქ, დღაშ დინახალე ბრელშა იბლოცე. მუთ უმოს ბრელ ხანს ბლოცულენქ, თით უმოს ხოლოს ბგინაფლენქ იეჰოვაწკუმა დუდის. იეჰოვა თეშ ვამრჩქილე, ნამდა შურ ოლუდას ჩქიმ ლოცვაშ თებაშა. ათეშენ, მა ხოლო შემლებ ვეფჩქარე“. ქეცადით, ჩვევათ გეგნირთინუათ თეცალ მუდგარენ: გეგშაგორით თიცალ დრო დო ადგილ, ნამდა მუთუნქ ვეგეცილან დო ყურადღება შხვა მუდგარენშა ვეგნგოღალაფუან დო თეწკუმა ართო, ბრელ ხანს შეგალებუან ლოცვაქ, შილებე გვალო ხონარმაღალო.
გეგშაგორ თიცალ დრო დო ადგილ, ნამდა შეგალებუას, ბრელ ხანს ქეჩუე იეჰოვას (ქოძირით აბზაც 10)
ᲓᲔᲤᲘᲥᲠᲘᲗ ᲑᲘᲑᲚᲘᲐᲡ ᲘᲜᲝᲭᲐᲠᲘᲚ ᲨᲣᲠ ᲓᲝ ᲒᲣᲠᲘᲗ ᲠᲐᲒᲐᲓᲔᲑᲣᲚ ᲚᲝᲪᲕᲔᲤᲨᲔ
11. მუჭო მიმეხვარებუნა ბიბლიას ინოჭარილ ლოცვეფშე დაფიქრება? (ქოძირით ჩარჩო „თქვა ხოლო თინეფცალო ხომ ვა გინაფლენთ დუდის?“).
11 ლოცვეფიშ გაუჯგუშებას შილებე ქიმგეხვარან ბიბლიას ინოჭარილ შურ დო გურით რაგადებულ ლოცვეფქ ვარდა ღორონთიშ ოდიდებელ ობირეშეფქ, ფსალმუნეფქ. ქიდეკვირით, მუჭო გინუფაჩუნდეს ღორონთის გურს თიშ ართგურ მსახურეფ, მუთ მიგეხვარებუნა, თქვა ხოლო თეცალ შურ დო გურით ქილოცათ. თინეფიშ ლოცვეფშე დაფიქრებაქ შილებე მიგეხვარან, უჯგუშო დოგორათ სიტყვეფ ლოცვაშ დროს თქვან აზრეფიშ გინაჩამალო. თეწკუმა ართო, შილებე გვალო თიცალ მსახურიშ ლოცვას ქეშეხვადათ, ნამდგას თქვანცალ სიტუაცია უღუდ.
12. მუშე ოკო დეფიფქრათ ბიბლიას ინოჭარილ ლოცვეფიშ კითხირიშ დროს?
12 ბიბლიას ინოჭარილ ლოცვეფიშ კითხირიშ დროს დეფიქრით: მი იჩიებ თე სიტყვეფს დო მუ მდგომარეობას რე თინა? მუთ მოგენს თიშ დო ჩქიმ სიტუაციეფ ართიანს? მუშ გურაფა შემლებ თიშ ლოცვაშე? თე კითხვეფს ქუპასუხათინ, შილებე გიმორკვიებაქ ქუგაჸუან საჭიროქ, მარა თენა ღირჷ მონდომაშა. მორთით ასე გუვარჩუათ ბიბლიას ინოჭარილ ოთხ ლოცვა.
13. მუს ბგურაფლენთ ხანაშ ლოცვაშე? (1 სამ. 1:10, 11; ქოძირით სურათ).
13 წეკითხით 1 სამუელიშ 1:10, 11. მუჟამსით ხანაქ თე ლოცვა თქუ, თის ჟირ სერიოზულ პრობლემა უღუდ – ართ თინა რდჷ, ნამდა სქუა ვეურჩქინდუდ დო თეს თინა ხოლო გიაძინუდ, ნამდა მუშ ქომონჯიშ მაჟია ოსურ რინას უჯოგუანდჷ (1 სამ. 1:4–7). ვაჩგათხინუესინ ფერ პრობლემა თქვა ხოლო ქოიღუნან-და, მუშ გურაფა შეილებუნა ხანაშ ლოცვაშე? თის მანგარო მეხვარ იეჰოვაწკუმა ბრელ ხანს დორაგადაფაქ დო გურიშ ეკოფართხუაქ (1 სამ. 1:12, 18). ჩქი ხოლო გურ ემექექებუნა, მუჟამსით ჩქინ „ოღალს იეჰოვას გეგნოფჩანთ“, შხვანერო ქოფთქუათინ, ქივეჩიებუთ, მუ მაწუხენა დო მუჭო ბგინაფლენთ დუდის (ფსალმ. 55:22).
ხანაქ, ნამდგას სქუა ვეურჩქინდუდ დო მუშ ქომონჯიშ მაჟია ოსურ რინას უჯოგუანდჷ, იეჰოვაწკუმა გეკიფართხჷ გურ (ქოძირით აბზაც 13)
14. ა) ხოლო მუს ბგურაფლენთ ხანაშე? ბ) მუჭო მიმეხვარებუნა ლოცვეფიშ გაუჯგუშებას ღორონთიშ სიტყვაშე ფიქრ? (ქოძირით სქოლიო).
14 მუშ სქუაშ, სამუელიშ დაბადებაშე მუსხირენ წანაშ უკულ, ხანაქ თინა მღვდელმთავარ ელის ქიმუჸუნ (1 სამ. 1:24–28). თიქ კინ შურ დო გურით ქილოც დო მადლობა გინუგ იეჰოვას თიშ გურშენ, ნამდა თინა ზრუნენს მუშ ართგურ მსახურეფშე დო თხილანს თინეფსc (1 სამ. 2:1, 8, 9). მართალ რე, ხანაშ პრობლემეფ, ნამუთ ოჯახის უღუდ, კინ პრობლემეფო სქიდუდ, მარა თის მთელ ყურადღება თიშა აფუდ გინოღალირ, მუჭო აკურთხჷ იეჰოვაქ. მუს ბგურაფლენთ თავრეშე? უმოს უჯგუშო შემალებენა გივორჯგინათ სირთულეეფს, მუჟამსით მთელ ყურადღება თიშა მაჸინა გინოღალირ, მუჭო ალურდჷ იეჰოვა მუშ ართგურ მსახურეფს ულირს დო მუჭო მოხვარუნა ჩქი ამდღარშახ.
15. მუჭო მიმეხვარებუნა იერემიაშ ლოცვა, მუჟამსით უსამართლობას ფხვადუთ? (იერ. 12:1).
15 წეკითხით იერემიაშ 12:1. ართ მომენტის წინასწარმეტყველ იერემიას გურ გოუტახ თიშ ძირაფაქ, ნამდა უბადო ხალხიშ ცხოვრება გვალო ჯგირო მიშჷ. თეს თინა ხოლო გიაძინუდ, ნამდა შხვა ისრაელეფ გაციგანუდეს თის (იერ. 20:7, 8). ჩქი ხოლო მარჩქილენა, მუს გინაფლენდუკონ იჸიდ იერემია, მუშენდა ჩქინდა ხოლო გეუძიცაფუნა დო ჩქი ხოლო მიძირუნა, უბადო კათა ართ მეჯინათ მუნერ ბედნერეფ იძირენა. მართალ რე, იერემიაქ იეჰოვას უწუ, ნამდა გურმულირ რდჷ თე ირფელიშ მიმაჯინუ, მარა თის იეჰოვაშ სამართლიანობაშა ეჭვ დღას ვემშუღალ. მუჟამსით იერემიაქ ქოძირ, მუჭო დასაჯ იეჰოვაქ უდუჯერებელ ისრაელეფ, ალბათ უმოსო დერწმუნებუდ, ნამდა ღორონთ სამართლიან რე (იერ. 32:19). ჩქი ხოლო თავისფალო შემლებუნა ქივეჩუათ იეჰოვას, მუჭო მუმალენა გურ თი უსამართლობაშენ, ნამდგას ვორწყეთ, მარა, თეწკუმა ართო, თინა ხოლო ქუვოძირუათ, ნამდა ბჯერა, იეჰოვა მუშ დროს ირნერ უსამართლობას მოსპუნს.
16. ჩქინ მდგომარეობაშ გურშენ მოკონან თისხი ვა მაკეთებენან-და, მუჭო მიმეხვარებუნა გინოხორაფილ ლევიანიშ მაგალითშე დაფიქრება? (ფსალმ. 42:1–4; ქოძირით სურათეფ).
16 წეკითხით ფსალმუნეფიშ 42:1–4. თე ობირეშ გინოხორაფილ ლევიანქ ჭარჷ, ნამდგას ვეშულებუდ, შხვეფწკუმა ართო ტაძარს თაყვან ქოცუკო იეჰოვას. თე ფსალმუნშე ჯგირო იძირე, მუს გინაფლენდჷ თინა. შილებე თქვა ხოლო თაშ გინაფლენდათ დუდის, მაგალთო, ლახალაშ გურშენ ჸუდეს ქიმლეკილით ვარდა რწმენაშ გურშენ ციხეს ქოხეთ-და. შილებე თქვან ემოციეფ ითირუდას – ართ დღას გვალო ჯგირო გინაფლენდათ დუდის დო მაჟია დღას – გურშა ქათგაკათან. მარა იშენით ჯგირ იჸუაფ, ქეჩუათ იეჰოვას თქვან გრძნობეფიშ გურშენ. თექ შილებე მიგეხვარან, უჯგუშო ქინანჭათ თქვან გრძნობეფს დო სიტუაციას გვალო შხვანერ თოლით ქუდუჭყათ ჯინა. მაგალთო, ლევიანქ ქიმეხვად, ნამდა თის იეჰოვაშ ოდიდებელო შხვა საშვალებეფ აღვენუდ (ფსალმ. 42:5). თეს გეძინელ, თინა თიშე ხოლო ფიქრენდჷ, მუჭო ზრუნენდჷ იეჰოვა თიშე (ფსალმ. 42:8). შურ დო გურით რაგადებულ ლოცვეფ ქიმმეხვარებუნა, ქინვანჭათ, მუშენ ბგინაფლენთ თაშ დუდის, დომრთინუანა სიმშვიდეს დო ქომუჩანა ძალას გარზებელო.
42-ა ფსალმუნიშ მაჭარალქ იეჰოვას გეგნუფაჩ გურ. ჩქი ხოლო იეჰოვას ლოცვას გურს გეგნუფაჩუნთ-და, შილებე შხვანერო ქუდუჭყათ ჩქინ სიტუაციას ჯინა (ქოძირით აბზაც 16)
17. ა) მუშ გურაფა შემლებუნა წინასწარმეტყველ იონაშ ლოცვაშე? (იონ. 2:1, 2). ბ) მუჭო შილებე რთულ სიტუაციეფიშ დროს ქიმმეხვარან ფსალმუნეფშე მუხლეფიშ დაზეპირებაქ? (ქოძირით სქოლიო).
17 წეკითხით იონაშ 2:1, 2. წინასწარმეტყველ იონაქ იეჰოვას დიდ ჩხომიშ ქვარას რდუნ თეშ დურაგადუ. თიშ უმკუჯინუო, ნამდა თიქ ვედემორჩილ იეჰოვას, იონა იშენით დარწმუნებულ რდჷ, ნამდა იეჰოვა ქუმურჩქილუანდ. ლოცვას თიქ ბრელ აზრ მიშინუ „ფსალმუნეფშე“.d მუჭოთ იძირენ, იონას ფსალმუნეფ ჯგირო უჩქუდ. ფსალმუნეფიშ გოშინაქ დო თინეფშე ფიქრიქ მეხვარ თის, იეჰოვაშ მოხვარაშ იმენდ უღუდუკო. თეშნერო, ბიბლიურ მუხლეფიშ დაზეპირებას ქივეცადებუთ-და, თინეფქ შილებე თიმწკუმა ქუგმაშინან დო ელამკინან გურშა, მუჟამსით რთულ სიტუაციას ვორეთ დო იეჰოვას მოხვარას ფთხულენთ.
ᲕᲔᲛᲘᲝᲢᲣᲐᲗ ᲘᲔᲰᲝᲕᲐᲬᲙᲣᲛᲐ ᲚᲝᲪᲕᲐᲗ ᲓᲐᲐᲮᲚᲝᲔᲑᲐ
18, 19. მუშ იმენდის მარზენა რომაელეფიშ 8:26, 27, ლოცვას ჩქინ გრძნობეფიშ გინაჩამალო სიტყვეფიშ გორუა ქომჭირან-და? ქიმიჸუნით მაგალით.
18 წეკითხით რომაელეფიშ 8:26, 27. მინშა შილებე გურ თეშ მაფუდან დამონკებულ, ნამდა იეჰოვაშა გრძნობეფიშ გინაჩამალო სიტყვეფიშ გორუა მიჭირდან. მარა თინა თე დროს ხოლო მოხვარუნა. თიშ „წმინდა შურ ინანჭუ ვეკმარაგადენან ფერ ოწუხებელს დო ჩქინ მანგიორო იჩიებ ორაგადეს“. მუს ნიშნენს თენა? ღორონთიქ წმინდა შურით ბიბლიას ბრელ ლოცვა ინაჭარაფუ მუშ თიცალ მსახურეფიშ, მიდგას ჩქინცალ მდგომარეობა უღუდეს. მუჟამსით ვეშემლებუნა გეგნოფჩათ, მუს ბგინაფლენთ, იეჰოვაქ შილებე ბიბლიას ინოჭარილ მსახურეფიშ ლოცვეფ ჩქინ რაგადებულ სიტყვეფო მიღას დო ქომპასუხან.
19 თე აზრიქ მანგარო მეხვარ ჩქინ ართ რუს დას, ელენას, ნამუთ ბიბლიაშ კითხირიშ დო ლოცვაშ გურშენ ჭოფეს. ელენას თეშ აფუდ გურ აკოჭირებულ, ნამდა ლოცვაშო სიტყვეფიშ გორუა ხოლო უჭირდჷ. თინა იშინანს: „ქუგმაშინ, ნამდა, მუჟამსით დუდის გლახათ ბგინაფლენქ დო ვა მიჩქჷ, მუჭო იბლოცე, იეჰოვას შეულებ ბიბლიას ინოჭარილ მუშ მსახურეფიშ ლოცვეფ ჩქიმ ლოცვეფცალო მიღას. თეშ რჩქინა მანგარო ელამკინანს გურშა თე რთულ დროს“.
20. მუჭო შემლებუნა რთულ სიტუაციეფიშ დროს მუვამზადათ ჩქინ გონება ლოცვაშო?
20 შილებე თიზმა ოწუხებელ გიღუდან, ნამდა ლოცვაშ დროს თქვან გონება შხვადო მიშას დო გიჭირდან მთელ ყურადღებაშ ლოცვაშა გინოღალა. თაშ ქორენ-და, შეილებუნა „ფსალმუნეფიშ“ აუდიოჩანაწერეფს ქუმურჩქილუათ დო თეშნერო მამზადათ გონება ლოცვაშო. ვარდა ხოლო შეილებუნა მეფე დავითცალო დოჭარათ, მუდგას გინაფლენთ (ფსალმ. 18; 34; 142; ეპიგრაფეფ). მუშო ოკო რაგად, ვა არსებენს კონკრეტულ წესეფ, მუჭო ოკო მამზადათ გონება ლოცვაშო; თქვანო მუჭოთ რე მოხუჯურინ, თეშ გაკეთით (ფსალმ. 141:2).
21. მუშენ შემლებუნა შურ დო გურით იბლოცათ?
21 გურს მიტიბუანა თიშ რჩქინა, ნამდა იეჰოვას თეიშახ არჩქილე, მუს ბგინაფლენთ, ონდო მუდგაინს უწინდათ (ფსალმ. 139:4). მარა თის მანგარო ოხიოლ, მუჟამსით გურს გინუფაჩუნთ დო ვოძირანთ, ნამდა თიშ იმენდ მიღუნა. ათეშენ, თავისფალო ეჩით ლოცვას თქვან ზეციერ მუმას. ქიმიხვარეთ ბიბლიას ინოჭარილ ლოცვეფ ხოლო. შურ დო გურით ქეჩით ქოთ თქვან გაჭირება დო ქოთ თინა, მუთ გოხიოლუნა. რჯერდან, ნამდვილ მეგობარ, იეჰოვა, ირიათო ქელაიდირთუნა!
ᲝᲑᲘᲠᲔᲨ 45 ჩქიმ გურიშ აზრეფი
a წიგნის „ბიბლია მოგურუანა ქრისტიანულ ცხოვრებას“ საკითხის „იეჰოვა“ ქოძირით ქვესათაურ „იეჰოვაშ ნამთინე განსაკუთრებულ თვისება“.
b მუჭოთ წესინ, კრებაშ წოხოლე რაგადებულ ლოცვეფ კუნტა რე.
c ლოცვაშ დროს ხანაშ რაგადებულ სიტყვეფ მანგარო გჷ თი აზრეფს, ნამუთ მოსეშ ნაჭარა წიგნეფს რე. მუჭოთ იძირენ, თინა ფიქრენდჷ წმინდა წერილეფშე (კან. 4:35; 8:18; 32:4, 39; 1 სამ. 2:2, 6, 7). საუკუნეეფიშ უკულ იესოშ დიდაქ, მარიამქ, ღორონთიშ ოდიდებელო თიცალ სიტყვეფ გიმირინუ, ნამუთ მანგარო მოგენს ხანაშ სიტყვეფს (ლუკ. 1:46–55).
d მაგალთო, იონაშ 2:3–9 ქეშუდარით ფსალმუნეფიშ 69:1; 16:10; 30:3; 142:2, 3; 143:4, 5; 18:6; 3:8-ს (მუხლეფ „ფსალმუნეფშე“ იონაქ თქუნ თი თანმიმდევრობათ რე დონწყილ).