პატიცემათ მექცით შხვეფს

1. მუშენ მოხიოლუნა, მუჟამსით პატის ფცენა? (იგავ. 22:1).

ᲐᲚᲑᲐᲗ მანგარო გოსიამოვნუნა, მუჟამსით შხვეფ პატიცემათ გოქცუნა. ირკოჩის ოხიოლ, აფასენან, მუშენდა არძა ადამიანს უღჷ მოთხოვნილება, შხვეფშე პატიცემას გინაფლენდას. ათეშენ, ვა რე გასაკვირ, მუშენ იჩიებ ბიბლია, ნამდა „უჯგუშ რე, პატის რცენდან, ვინემ ოქრო-ვარჩხილ გიღუდას“ (წეკითხით იგავეფიშ 22:1).

2, 3. მუშენ რე მინშა ძნელ, პატიცემათ მივექცუათ შხვეფს დო მუს გუვარჩიენთ თე სტატიას?

² მინშა შილებე ვა მაფუდან ადვილ, პატიცემათ მივექცუათ შხვეფს. მაგალთო, ართ თიშენ, ნამდა ხშირას ვორწყეთ შხვეფიშ არასრულყოფილებას დო შეცდომეფს. თეწკუმა ართო, თიცალ დროს მიხვადუნა ცხოვრება, ნამდა ჩვეულებრივ მუდგარენო რე გინორთელ ართმაჟიაშა უპატიცემულოთ მოქციება. მარა ჩქი შხვეფს ოკო ვა ვაგურათ, მუშენდა იეჰოვას ოკო, პატის ფცენდათ „არძანერ ადამიანს“ (1 პეტ. 2:17).

³ თე სტატიას გუვარჩიენთ, მუს ნიშნენს, პატის ფცენდათ შხვეფს დო მუჭო შემლებუნა თეშ კეთება 1) ოჯახიშ წევრეფწკუმა, 2) თანაქრისტიანეფწკუმა დო 3) თინეფწკუმა, მით ვამსახურუნა იეჰოვას. ქობძირუნთ, მუჭო მივექცუათ შხვეფს პატიცემათ თიმწკუმა ხოლო, მუჟამსით თეშ კეთება მანგარ ძნელ რე.

ᲛᲣᲡ ᲜᲘᲨᲜᲔᲜᲡ, ᲞᲐᲢᲘᲡ ᲤᲪᲔᲜᲓᲐᲗ ᲨᲮᲕᲔᲤᲡ?

4. მუს ნიშნენს, პატის ცენდე მიდგაინს?

⁴ მუჭო ენწყუნდით, მუს ნიშნენს, პატიცემათ ოქცუდე შხვეფს? მიდგარენს პატის ქოცენქ დო ვარინ თენა, ქოთ სქან დამოკიდებულებაშე იძირე თიშ მიმართ დო ქოთ საქციელშე. თეცალ პიროვნებას მანგარო აფასენქ მუშ თვისებეფიშ, მაღალ მდგომარეობაშ ვარდა თი ირფელიშ გურშენ, მუდგაშათ მეუჭირინუაფ. პატის ფცენთინ ფერ პიროვნებას თეშ ვოქცუთ, ნამდა ქიგინას, ჩქინო დაფასებულ, ძვირფას დო მნიშვნელოვან რენ. მუშო ოკო რაგად, ნამდვილ პატიცემა გურშე მოურს (მათ. 15:8).

5. მუშენ ვოქცუთ შხვეფს პატიცემათ?

⁵ იეჰოვას ოკო, პატიცემათ ვოქცუდათ შხვეფს. მაგალთო, თინა ჩქინდე ითხინს, პატი ფცათჷ ხელისუფლებას (რომ. 13:1, 7). მარა ნამთინექ შილებე თქუას: „მა ხვალე თინეფს ფცენქჷ პატის, მით თეს დემსახურენს“. ქორენო თენა სწორ აზრ? ვარ, ჩქი ქრისტიანეფს მარჩქილენა, ნამდა მიდგაინს პატის ფცენთჷ დო ვარინ თენა, ხვალე თით ოკო ვეგნოპჭყვიდათ, დამსახურებულ აფჷ დო ვარ; მთავარ, მუდგაშ გურშენ შხვეფს პატიცემათ ვოქცუთ, თინა რე, ნამდა მიჸორა იეჰოვა დო მოკონა, გურ გაუხარათ თის (იეს. 4:14; 1 პეტ. 3:15).

6. ქეშემლებუნანო პატიცემათ მივექცუათ თინეფს, მით აშო ვა ფცენა პატის? გენწყით (ქოძირით სურათ).

⁶ მიდგარენქ შილებე იფიქრას: „მუნერო შილებე აშო უპატიცემულოთ მოქცუნ ფერ კოჩის მა იშო პატი ფცე?“. მორთ მუსხირენ შემთხვევა ქიგიფშინათ. მეფე საულქ შეურაცხყოფა მიორინუ იონათანს შხვეფიშ წოხოლე (1 სამ. 20:30–34). მარა იონათან იშენით პატის ცენდჷ მუამუშის დო ღურადღაშახ ალურდჷ თის ჩხუპეფიშ დროს (გამ. 20:12; 2 სამ. 1:23). მღვდელმთავარ ელიქ ხანას ეკაწამ, ნამდა შუმილ რდჷ (1 სამ. 1:12–14). მარა ხანაქ პატიცემათ დურაგადუ თის, თიშ უმკუჯინუო, ნამდა მთელ ისრაელს უჩქუდ, ელი, მუჭოთ მღვდელმთავარ დო მუჭოთ მუმა, მუშ ადგილს ვეგერდჷ დო სქუალეფ მეშქუმალირ აფუდუნ (1 სამ. 1:15–18; 2:22–24). ათენს აკოშაყარელ ქომოლკათაქ შეურაცხყოფა მიორინუ პავლეს დო თიშ გურშენ თქვისჷ, „მუ ბორულ-ბორულეფს“ იჩიებუნია (საქ. 17:18). მარა პავლექ იშენით პატიცემათ ეჩუ თინეფს (საქ. 17:22). თე შემთხვევეფ ოძირანს, ნამდა იეჰოვაშ ჸოროფა დო თიშ წყინაფა ვა მოკონან თენა მოხვარუნა, თიმწკუმა ხოლო პატიცემათ მივექცუათ შხვეფს, მუჟამსით თეშ კეთება ვა რე ადვილ. მორთ გუვარჩუათ, მის ხვადჷ ჩქინდე პატიცემა დო მუშენ.

ᲞᲐᲢᲘᲪᲔᲛᲐᲗ ᲛᲔᲥᲪᲘᲗ ᲝᲯᲐᲮᲘᲨ ᲬᲔᲕᲠᲔᲤᲡ

7. მუშენ შილებე მიჭირდან, ოჯახიშ წევრეფს პატიცემათ მივექცუათ?

⁷ სირთულე. ჩქინ დროშ უმენტაშის ოჯახიშ წევრეფწკუმა ვორეთ დო ჯგირო მიჩქუნა თინეფიშ ქოთ ჯგირ დო ქოთ გლახა მხარეეფ. შილებე ნამთინეს თიცალ ოჯახიშ წევრ პჸუნდან, ნამდგას სერიოზულ ლახალა უღჷ, დო მიჭირდან თიშ მიკოლუაფა. ნამთინეშ ოჯახიშ წევრის ხოლო შილებე ემოციურ პრობლემეფ უღუდას. ნამთინე ხოლო შილებე მუშ სიტყვეფით ვარდა საქმეეფით გურს მიწყუნუანდან. ოჯახის ადამიან დუდის მშვიდას ოკო გინაფლენდას. მარა, მუჟამსით ოჯახიშ წევრეფ ართმაჟიას უპატიცემულოთ ოქცუნა, სიგემუანე ვა უღუნა დო ირო ჩხუპ დო ერია-მორია რე. მუჭოთ ლახალა ართრიტ ოცილ ადამიანს, სხეულიშ შხვადოშხვა ნაწილ გემუანო ამოძრავას, თეშ ართიან შქას უპატიცემულობა ოცილ ოჯახის, სიგემუანე დო ართობა უღუდას. მართალ რე, ართრიტშე სრულას სქილიდაფა ვეშემლებუნა, მარა ართმაჟიაშა უპატიცემულოთ მოქციებაშ მეტება შემლებუნა.

8. მუშენ რე მნიშვნელოვან, ოჯახიშ წევრეფს პატიცემათ მივექცუათ? (1 ტიმ. 5:4, 8).

⁸ მუშენ ოკო მივექცუათ პატიცემათ (წეკითხით 1 ტიმოთეშ 5:4, 8). ტიმოთეშა მეჭარილ პირველ წერილს პავლექ ენწყჷ, მუჭო ოკო იზრუნან ოჯახიშ წევრეფქ ართმაჟიაშ საჭიროებეფშე. თიქ თქუ, ნამდა მთავარ მიზეზ, მუდგაშ გურშენ ოჯახიშ წევრეფს პატი ოკო ფცათჷ, მოვალეობა ვარინ, „ღორონთიშ ართგურობა“ ოკო რდასჷ. თენა ნიშნენს, ნამდა თეს იეჰოვაშ ჸოროფაშ გურშენ ვორთუთ დო მარჩქილენა, ნამდა თენა ხოლო ღორონთიშ მსახურებაშ ნაწილ რე. ოჯახ იეჰოვაქ დარსხუ, ათეშენ, მუჟამსით ოჯახიშ წევრეფს ვოქცუთ პატიცემათ, თეთ ოჯახიშ გუმაჭყაფალს, იეჰოვას ფცენთჷ პატის (ეფეს. 3:14, 15). თეშ უმოს დიდ მიზეზ მუ ოკო მიღუდან, ნამდა ოჯახიშ წევრეფს პატი ფცათჷ?!

9. მუჭო შეულებ ჩილ დო ქომონჯის, ოძირუას, ნამდა პატის ცენა ართმაჟიას? (ქოძირით სურათეფ).

⁹ მუჭო ვოძირუათ, ნამდა პატის ფცენთჷ. ოსურს პატის ცენსინ ფერ ქომონჯ ქოთ ხვალე რენან თიმწკუმა დო ქოთ შხვეფწკუმა ოძირანს, ნამდა მეუღლე ძვირფას რე თიშო (იგავ. 31:28; 1 პეტ. 3:7). თინა დღას ხეს ვემიოგანს, ვამცირენს დო დუდის უღირსო ვაგინაფუანს მუშ ოსურს. არიელ,a ნამუთ არგენტინას ცხოვრენს, იჩიებ: „ჩქიმ ოსურს მუშ ლახალა მინშა თიცალ მუდგარენეფს ორაგადაფუანს, მუთ მანგარო ალმოჭუანს გურს. თეცალ დროს გუვოშინანქ ჩქიმ დუდის, ნამდა სინამდვილეს გურს თაშ ვა უღჷ. ქიმკოპჭირდუქინ თიმწკუმა, 1 კორინთელეფიშ 13:5-ის იფშინანქ, ნამუთ მოხვარ, გურ ვეგნუჸუნუე თის დო ჸინჩას ვარინ, გემუანო ვეჩუე“ (იგავ. 19:11). ქომონჯის პატის ცენსინ ფერ ოსურ შხვეფწკუმა ჯგირს იჩიებ თიშ გურშენ (ეფეს. 5:33). თინა ვაკრიტიკენს, ვეგიაძიცენს დო დუმამცირებელ სახელეფს ვა უძახ მუშ ქომონჯის, მუშენდა არჩქილე, ნამდა თეცალ საქციელ ჩილ დო ქომონჯ შქას ურთიერთობას გილალუანს (იგავ. 14:1). იტალიას მახორუ ართ და, ნამდგაშ ქომონჯის ემოციურ პრობლემეფ უღჷ, იჩიებ: „მინშა ჩქიმ ქომონჯ ირფელშე ნაბეტანს ნერვიანენს. თეიშახ ჩქიმ სიტყვეფშე იძირედ დო სახეს ხოლო გიმოდოხოდუდ, ნამდა პატის ვა ფცენდჷ თის. მარა ასე ვოკვირუქ, ნამდა მუთ უმოს ხშირ ურთიერთობა მიღჷ თიცალ ადამიანეფწკუმა, მით შხვეფიშ გურშენ პატიცემათ იჩიებუნა, თით უმოს პატიცემათ ვოქცუქ ჩქიმ ქომონჯის ხოლო“.

10. მუჭო შეულებუნა სქუალეფს, ოძირუან, ნამდა პატის ცენა მშობლეფს?

¹⁰ ბაღანეფ, დემორჩილით დიდა დო მუმას (ეფეს. 6:1–3). პატიცემათ ეჩით თქვან მშობლეფს (გამ. 21:17). სქუალეფ, მუჭო ხანშა მიშულან თეშ, შილებე დიდა დო მუმას უმოს ყურადღებაქ დესაჭირას თქვანდე, ათეშენ, ირფელ გაკეთით თინეფიშ მიკალუაფარო. დეფიფქრათ ართ დაშ, მარიაშ, მაგალითშე, ნამდგაშ მუმა ვა რე იეჰოვაშ მოწმე. მუჟამსით თიქ დელახ, მარიას თიცალ გლახათ ოქცუდ, ნამდა უჭირდჷ თიშ მიკოლუაფა. მარია იშინანს: „ბლოცულენდჷ დო იეჰოვას ფთხინდჷ, ნამდა მუაჩქიმიშ პატიცემა ხვალე გურს ვამღუდუკონ, თეშ გიმოხანტუაქ ხოლო შემალებუკო. რახანს იეჰოვა ჩქიმდე თხულენს, პატი ფცე მშობლეფს, ესეიგ გიშურს, ნამდა თეშო საჭირო ძალას ხოლო ქომუჩანს. ჭიე-ჭიეთ ქიმეფხვად, ნამდა მუაჩქიმქ მუჭოდგა ვემმექცუკონ, მა იშენით პატი ოკო ფციკო თის“. ოჯახიშ წევრეფს პატის ადვილ ვა მაფუნან თიმწკუმა ხოლო ქოფცენთ-და, ვოძირანთ, ნამდა პატის ფცენთჷ იეჰოვას, ოჯახიშ გუმაჭყაფალს.

ᲞᲐᲢᲘᲪᲔᲛᲐᲗ ᲛᲔᲥᲪᲘᲗ ᲗᲐᲜᲐᲥᲠᲘᲡᲢᲘᲐᲜᲔᲤᲡ

11. მუშენ შილებე გამჭირდან თანაქრისტიანშა პატიცემათ მოქციებაქ?

¹¹ სირთულე. მართალ რე, ჩქინ და დო ჯიმალეფ ირნერო ოცადუნა, თეშ იცხოვრან, მუჭოთ ბიბლია მოგურუანა, მარა მინშა იშენით შილებე გურ ქომწყუნუან, მუდგაინ ვა გამგან დო არასწორო ქიფიქრან ჩქინ გურშენ ვარდა ხოლო გუმაღიზიანან. თანაქრისტიანქ „ჩიულიშ სამანჯელ“ ქომუჩეს-და, შილებე გამჭირდან, პატიცემათ მივექცუათ თის (კოლ. 3:13). მუ მიმეხვარებუნა თეცალ დროს?

12. მუშენ რე მნიშვნელოვან, პატი ფცათჷ თანაქრისტიანეფს? (2 პეტ. 2:9–12).

¹² მუშენ ოკო მივექცუათ პატიცემათ (წეკითხით 2 პეტრეშ 2:9–12). ღორონთიშ შთაგონებათ ჭარილ მაჟია წერილს მოციქულ პეტრე იჩიებ, ნამდა პირველ საუკუნეშ ქრისტიანულ კრებას ნამთინე უპატიცემულოთ მიშინუანდჷ უხუცესეფს, თინეფს, „მიდგას ღორონთშე [აფუდეს] დიდება მეღებულ“. მუ რეაქცია უღუდეს ღორონთიშ ართგურ ანგელოზეფს, მით თე ირფელს ორწყედეს? თინეფს, იეჰოვაშ პატიცემათ, ართ გლახა სიტყვა ხოლო ვალაფუნა თე ამაყ ხალხიშ გურშენ. წერმიდგინით, სრულყოფილ ანგელოზეფს, მიდგას ადამიანეფშე ბრელით უმოს მაღალ მდგომარეობა უკინებუნა, ვა უჩიებინუნა თინეფიშ გურშენ შეურაცხმყოფელო. თეშ მანგიორო, იეჰოვას ქიმიანდეს თინეფიშ გასამართლება დო პასუხიშ მოთხუალა (რომ. 14:10–12; ქეშუდარით იუდაშ 9). თე კუნთხუთ ანგელოზეფ ჯგირ მაგალითის მარზენა. თინეფქ მოწინააღმდეგეეფს ხოლო ვემექცუეს უპატიცემულოთ. მოწინააღმდეგეეფწკუმა თენა ქორე ოქიმნალ-და, მუსხით უმოს მნიშვნელოვან რე, პატიცემათ ვოქცუდათ ჩქინ და დო ჯიმალეფს?! ჩქი ბიბლია მოგურუანა, ნამდა ართიანს ოკო უჭიშუათ პატიცემა (რომ. 12:10). თეთ ვოძირანთ, ნამდა პატის ფცენთჷ იეჰოვას.

13, 14. მუჭო შემლებუნა პატი ფცათჷ თანაქრისტიანეფს? ქიმიჸუნით მაგალითეფ (ქოძირით სურათეფ).

¹³ მუჭო ვოძირუათ, ნამდა პატის ფცენთჷ. უხუცესეფ, ირნერო ქეცადით, ჸოროფათ ოგურუათ და დო ჯიმალეფს (ფლმ. 8, 9). მიდგაინშა რჩევა ქუგაფუნა მიოჩამალ-და, თენა გემუანო გაკეთით დო თიმ დროს ვა დურაგადუათ, მუჟამსით გურმულირ რეთჷ. დალეფ, თქვა მანგარო შეილებუნა ხე შეუნწყუათ თის, ნამდა კრებას და დო ჯიმალეფ ართიანს პატის ცენდან, მაგალთო თით, ნამდა ვეჭორავათ დო ტყურა მითინს ვეკაწამათ (ტიტ. 2:3–5). არძას შემლებუნა ქუვოგინაფუათ უხუცესეფს, ნამდა პატის ფცენთჷ თინეფს, მუჟამსით ფთანამშრომლენთ თე ჯიმალეფწკუმა დო გიმოფხანტუნთ სიმარდულს თიშო, ნამდა ბრელს ხანდენა – ატარენა კრებაშ შეხვალამეფს, ხელმძღვანელენა ქადაგებაშ საქმეს დო ოხვარუნა თინეფს, მით „სწორ ვა რენ ფერ ნაბიჯის“ გინოდგუნს (გალ. 6:1; 1 ტიმ. 5:17).

¹⁴ ართ დას, როსიოს, მანგარო გუჭირდჷ, პატიცემათ მექცუკო თი უხუცესის, ნამდგაქ რჩევა მეჩჷ. თინა იჩიებ: „გურქ მომირთჷ, მუშენდა ფიფქრენდჷ, ნამდა თიქ ჸინჩას დომრაგადუ. ჸუდეშა დორთელს თიშე უარყოფითო ჩიება ქიდიპჭყჷ. მართალ რე, ვოცადუდ, ვეგიფხუნეკო, მარა გურს იშენით ფიფქრენდჷ, ნამდა თის ქიანაშის ვაინტერესუდ ჩქიმ ამბე დო ათეშენ, ვართ თიშ რჩევა ალებრჩქილე“. მუქ მეხვარ როსიოს? თინა ენწყუნს: „ბიბლიაშ კითხირიშ დროს ქამხვად 1 თესალონიკელეფიშ 5:12, 13-ქ. მუჟამსით ქიმეფხვად, ნამდა ჩქიმ საქციელით თე ჯიმაშ მიმართ უპატიცემულოთ მოქციებაქ გიშამირთჷ, სინდისიქ მანგარო შემაწუხ. უკულ ქიბლოც დო ჩქინ პუბლიკაციეფს დობგორ ინფორმაცია, მუთ მიმეხვარებუდ დამოკიდებულებაშ თირუას. ქიმეფხვად, ნამდა თი ჯიმას მუთუნ ვა დუშებ, მთავარ პრობლემა ჩქიმ სიამაყე რდჷ. ქობძირ, ნამდა თანდაბალ ვეპჸიქ-და, გამჭირდუ შხვეფიშ პატიცემა. მართალ რე, თე კუნთხუთ დიო ხოლო მოსაჭირ გაუჯგუშება, მარა ირნერო ვოცადუქ, პატიცემათ მივექცუე შხვეფს. შედეგო, იეჰოვაწკუმა უმოს ხოლოს ბგინაფლენქ დუდის“.

ᲞᲐᲢᲘᲪᲔᲛᲐᲗ ᲛᲔᲥᲪᲘᲗ ᲗᲘᲜᲔᲤᲡ, ᲛᲘᲗ ᲕᲐᲛᲡᲐᲮᲣᲠᲣᲜᲐ ᲘᲔᲰᲝᲕᲐᲡ

15. მუშენ შილებე გამჭირდან, პატიცემათ მივექცუათ თინეფს, მით ვამსახურუნა იეჰოვას?

¹⁵ სირთულე. მსახურებას ხშირას შეფხვადუთ თიცალ ადამიანეფს, მიდგას ვაინტერესუნა ბიბლიურ ჭეშმარიტება (ეფეს. 4:18). ნამთინეს ბაღანობას მუთ დაგურუესინ თიშ წანსჷ დო ათეშენ ვამრჩქილენა. სამუშას უნჩაშ ვარდა სკოლას მასწავლებერეფ შილებე დღას ვა რდანჷ კმაყოფილ თით, მუდგას ვორთუთ, ვარდა ხოლო შილებე თანაკლასელეფ ვარდა თანამშრომელეფ გლახათ მოქცუდან. ათეშენ, შილებე ჭიე-ჭიეთ მემდინან თე ადამიანეფიშ პატიცემაქ დო ვამმაქციებუან თინეფშა თეშ, მუჭოთ ჩქი მოკონა მიმექცუან.

16. მუშენ რე მნიშვნელოვან, პატიცემათ მივექცუათ თინეფს, მით დიო ვამსახურუნა იეჰოვას? (1 პეტ. 2:12; 3:15).

¹⁶ მუშენ ოკო მივექცუათ პატიცემათ. ვაგგოჭყორდან, ნამდა იეჰოვა ოკვირ, მუჭო ვოქცუთ თინეფს, მით თის ვამსახურუნა. პეტრე მოციქულქ გაშინ ქრისტიანეფს, ნამდა თინეფიშ ჯგირ საქმეეფქ შილებედ გეგნაჭყვიდირაფუკო შხვეფს ღორონთიშ განდიდება. ათეშენ თინეფს უწუ, ნამდა, მუჟამსით მუნეფიშ რწმენაშ გურშენ შხვეფშა პასუხ აჸიდეს მიოჩამალ, თენა „გემუანო დო დიდ პატიცემათ“ აკეთესკო (წეკითხით 1 პეტრეშ 2:12; 3:15). მუჟამსით ქრისტიანეფს მუნეფიშ რწმენა აჸიდეს დაცვებელ შხვეფწკუმა ჩიებაშ დროს ვარდა სასამართლოშ წოხოლე, თიცალ პატიცემათ ოკო მექცუესკო თე ხალხის, მუჭოთ იეჰოვაშ წოხოლე გერდესკონ თიმწკუმა მექციებუდეს. იეჰოვა ხომ ირფელს ორწყე დო არჩქილე, მუს დო მუჭო იფჩიებუთ. თეშ უმოს მიზეზ მუ ოკო მიღუდან თიშო, ნამდა პატიცემათ მივექცუათ თინეფს, მით ვამსახურუნა იეჰოვას?!

17. მუჭო შემლებუნა ვოძირუათ, ნამდა პატის ფცენთჷ თინეფს, მით ვამსახურუნა იეჰოვას?

¹⁷ მუჭო ვოძირუათ, ნამდა პატის ფცენთჷ. ვა მოკონა, მსახურებას შხვეფს დუდ თეშ ვოგინაფუათ, ნამდა, რახანს ბრელ მუთუნ ვა უჩქუნა ბიბლიაშ გურშენ, ჩქი თინეფშე მანგარეფ ვორეთ. თეშ მანგიორო, მოკონა, ჩქინ დუდშე უმოს პატი შხვეფშა გემიძუდან დო ვაგმოჭყორდან, ნამდა თინეფ იეჰოვაშო მანგარ ძვირფასეფ რენა (ანგ. 2:7; ფილ. 2:3). თქვან რწმენაშ გურშენ მიდგაინ ქორლანძღუნან-და, ირნერო ქეცადით, თქვა ხოლო იგივეთ ვა უპასუხათ. მაგალთო, ირნერო ვეცადათ, ჩქინ მოჭკირილ პასუხით დუდ დამცირებულო ვა ვოგინაფუათ (1 პეტ. 2:23). ონარღებელქ გაჸუესინ ფერ მუდგარენქ იშენით ქუგარაგადინუეს-და, ხეთეშე ქუწით ბოდიშ. სამუშას მუჭო შეილებუნა პატიცემათ მექცუათ შხვეფს? ქეცადით, ჯგირ თანამშრომელიშ სახელ გერძუდან დო ჯგირ დამოკიდებულება გიღუდან თანამშრომელეფიშ დო უნჩაშიშ მიმართ (ტიტ. 2:9, 10). სამუშას პატიოსნურო დო შურ დო გურით ქოხანდენთ-და, შილებე შხვეფიშ გურ მიგათ. მარა არძა შემთხვევას თაშ ვა მოხვადასინ ხოლო, იეჰოვაშ გურ იშენ გაჸინა გახარებულ (კოლ. 3:22, 23).

18. მუშენ რე ჯგირ, პატიცემათ ვოქცუდათ შხვეფს?

¹⁸ მუშმაჯგირა მიზეზეფ გუვარჩით თიშო, ნამდა მიღუდან შხვეფიშ პატიცემა დო საქმეეფით ხოლო ქუვოძირუათ თენა. ქიგებგით, ნამდა, მუჟამსით ოჯახიშ წევრეფიშ მიმართ გიმიბრჩქინანთ პატიცემას, თეშნერო პატის ფცენთჷ ოჯახიშ გუმაჭყაფალს, იეჰოვას. ზეციერ მუმას თიმწკუმა ხოლო განვადიდენთ, მუჟამსით სულიერ და დო ჯიმალეფს ვოქცუთ პატიცემათ. დო ბოლოს თინა ხოლო ქიგებგით, ნამდა, მუჟამსით პატიცემათ ვოქცუთ თინეფს, მით ვამსახურუნა იეჰოვას, თეთ ხეს უნწყუნთ, ნამდა თინეფქ ხოლო ქიდიჭყან ჩქინ დიდებულ ღორონთიშ განდიდება. ჩქინ თეცალ ჯგირ დამოკიდებულებაშ უმკუჯინუო, ნამთინექ იშენ უპატიცემულოთ მიმექცუანინ ხოლო, იშენით ღირჷ, ჩქი პატიცემათ მივექცუათ, მუშენდა იეჰოვა თეშ გურშენ მაკურთხენა. თინა მოპირუნა: „მით მა მიძღვინენს პატის, მა ხოლო თის გებდვანქ პატის“ (1 სამ. 2:30).