მუჭო გეუჯერდათ თის, მუთ მიღუნა?

1. მუს ნიშნენს, მიღუნან თით კმაყოფილ ვორდათ დო მუს ვა ნიშნენს თენა?

ᲥᲝᲠᲔᲗᲝ კმაყოფილ თით, მუთ გიღუნა? კმაყოფილ რდენ თენა ნიშნენს, აფასენდე თი კურთხევეფს, ნამუთ იეჰოვაშე ამდღა გიღჷ. შედეგო, ხიოლს დო სიმშვიდეს გინაფლენქ. მარა კმაყოფილება ვა ნიშნენს, ნამდა გუვაჩენდათ დო გაუჯგუშებას ვევეცადათ. მაგალთო, მუთუნ გლახა ვა რე, ქრისტიან იეჰოვაშ მსახურებას უმოსიშ კეთებაშა ინჭუაფუდას (რომ. 12:1; 1 ტიმ. 3:1). მარა მუშ მდგომარეობათ კმაყოფილ რენ ფერ კოჩ ხიოლს ვადინუანს, მუჟამსით ოკოდუნ თიშმამალას ვემიანჭირინე მუშ მიზანშა.

2. მუშენ რე გლახა, მუჟამსით ვეგებჯერდუთ თის, მუთ მიღუნა?

² მიღუნან თის ვეგებჯერდუთ-და, თექ შილებე მანგარ გლახა შედეგეფ ქუმომღან. ნამთინე თექ თეიშახ ქიმიჸუნ, ნამდა დუდის გიოჸვილანს სამუშას თიცალ მუდგარენეფიშ ოჸიდეთ, მუთ სინამდვილეს ვასაჭირ. ნამთინე ქრისტიანქ გვალო თეიშახ ქიმერთჷ, ნამდა მიხირ ფარა ვარდა მუდგაინ ნივთ, მუთ მანგარო ოკოდ. თინეფ შილებე თე დროს ფიქრენდესკო: „მა თენა დამსახურებულ მაფჷ“, „მეტ ვა მაჯინნე“ ვარდა ხოლო „ასე გეპჭოფუნქ ფარას დო უკულ დუვორთინუანქ“. მარა ოკო ვაგმოჭყორდან, ნამდა ხირუა ხირუა რე! თეცალ საქციელ გურს უწყუნუანს იეჰოვას დო შეურაცხყოფას მიორინუანს თის (იგავ. 30:9). ნამთინეს ხოლო თეშ გოუტირხჷ გურქ, მუჟამსით ოკოდუნ თი პასუხიშმგებლობეფქ ვემიაღებუ, ნამდა გვალო მიოტუ იეჰოვაშ მსახურება (გალ. 6:9). შილებე თქუათ: იეჰოვაშა დუდ აფჷ მეძღვინელინ ფერ პიროვნებაქ თენა თეშ ხოლო მუჭო ოკო იფიქრას?! მარა ქრისტიანქ ჭიე-ჭიეთ კმაყოფილებაშ გრძნობა მიოდინუ-და, თექ შილებე მანგარ ადვილო ქაღოლას.

3. მუშა მარწმუნენა ფილიპელეფიშ 4:11, 12?

³ ნამ მიღუნან თიშ გეჯერება ქომჭირან-და, პავლეშ შემთხვევა მოძირანა, ნამდა თეშ დოგურაფა შილებე. თიქ ჭარჷ: „ქიდიბგურე, ნამდა მუდგა სიტუაციას ვა ვორდენ, გეუჯერდე თის, მუთ მიღჷ“ (წეკითხით ფილიპელეფიშ 4:11, 12). საინტერესო რე, ნამდა თიქ თე სიტყვეფ ციხეს ხედუნ თეშ ჭარჷ. თეცალ მდგომარეობაშ უმკუჯინუო, თის ხიოლ ვა უდინუაფ. პავლექ ქიდიგურუ თინა, მუთ ბრელს ვა უჩქჷ – მუჭო გეუჯერდე თის, მუთ გიღჷ. პავლეშ სიტყვეფ დო მაგალით მარწმუნენა, ნამდა მუდგა მდგომარეობა ვა მიღუდანინ, იშენით შემლებუნა კმაყოფილეფ ვორდათ. მარა ოკო ვეფიფქრათ, ნამდა თე გრძნობა მუშით გომრჩქინდუნა. კმაყოფილეფ ქუვორდათინ თეს დოგურაფა ოკო. თე სტატიას ქიფჩიებუთ ოთხ მხარეშე, მუთ თეს ქიმმეხვარებუნა.

ᲒᲔᲕᲘᲗᲐᲠᲘᲗ ᲛᲐᲠᲓᲣᲚᲝᲑᲐ

4. მუჭო მიმეხვარებუნა მარდულობა, გეუჯერდათ თის, მუთ მიღუნა? (1 თეს. 5:18).

⁴ მარდულ ადამიანს უმოსო შეულებ გეუჯერდას თის, მუთ უღჷ (წეკითხით 1 თესალონიკელეფიშ 5:18). მაგალთო, აუცილებერ ვა მორკუნან თიშენ მარდულ ქიპჸით-და, ნაბეტანს ვეპწუხენთ თიშე, მუთ ვა მიღუნა. ღორონთიშ მსახურებას ამდღა მუდგა დავალება მიღუნან თიშო მარდულ ქუვორეთ-და, თენა მიმეხვარებუნა, შურ დო გურით შევასრულათ თინა დო ირიათო თი დავალებაშე ვეფიფქრათ, ნამდგაშ მეღება მოკონა. იეჰოვას უჩქჷ, მუნერ მნიშვნელოვან რე მარდულობა, ათეშენ მუშ სიტყვას მირაგადუნა, ნამდა ლოცვას ხშირას ქუწუათ თის მადლობა. მარდულეფ ქიპჸით-და, თიცალ მშვიდობას ქიბგინანთ, „მუნერით კოჩის აზრო ხოლო ვა მალე“ (ფილ. 4:6, 7).

5. მუ დო მუშ გურშენ ოკო რდესკო ისრაელეფ მარდულეფ? (ქოძირით სურათ).

⁵ დეფიფქრათ ისრაელეფიშ მაგალითშე. ბიბლიას ბრელშა რე მოშინაფილ, მუჭო იჭირებუდეს ისრაელეფ დო ეკანარღუდეს თი ოჭკუმალს, ნამუთ ეგვიპტეს უღუდეს (რიცხ. 11:4–6). მუ მეხვარებუდ თინეფს, გეუჯერდესკო თის, მუთ უღუდეს? ისრაელეფქ ოკო ქიგიშინესკო, მუ აფუდ იეჰოვას თინეფშო ნაკეთებ. თინეფს ოკო ვა გოჭყოლადუდესკო, ნამდა იეჰოვაქ ვით სასჯელიშ ჭყოლოფათ ირსხჷ ეგვიპტელეფიშ ხეშე, მიდგას მონეფო ჸუნდეს თინეფ დო უდუნდებელო ოქცუდეს. იეჰოვაქ თიშე ხოლო ქიზრუნ, ნამდა გათავისფალებაშ უკულ ისრაელეფქ ეგვიპტელეფშე ანაყუ ოქრო, ვარჩხილ დო მიკაქუნალ მოლეღესკო (გამ. 12:35, 36). თეს გეძინელ, მუჟამსით ისრაელეფქ ფარაონიშ ჯარ დო ჭითა ზღვაშ შქას ქაშეხვილეს, იეჰოვაქ სასწაულ გაკეთ დო გორთჷ ზღვა, ნამდა თინეფს ნტებაქ ქეშიალებუესკო. იეჰოვა უდაბნოს ხოლო ზრუნენდჷ თინეფშე დო ირდღას არზენდჷ მანანას ოჭკუმალო. იმწკუმა, მუშენ რდესჷ ისრაელეფ იშენით უკმაყოფილო? თიშენ ვარ, ნამდა დასაბაღ ოჭკუმალ ვა უღუდეს. თიშენ, ნამდა ვა რდესჷ მარდულ თი ირფელშო, მუთ იეჰოვას თინეფშო აფუდ კეთებულ.

6. მუ მიმეხვარებუნა მარდულობაშ გავითარებას?

⁶ მუ მიგეხვარებუნა მარდულობაშ გავითარებას? პირველ, ირდღას დრო გეგმურთით თი მუდგარენეფშე ფიქრის, მუდგას თქვანდა ხიოლ მოუღ. შილებე გვალო გეგმოჭარათ ჟირ ვარდა სუმ თიცალ მუდგარენ, მუდგაშეთ მარდულ რეთჷ (გოდ. 3:22, 23). მაჟია, გეგმოხანტით მარდულობა. ქუწით მადლობა შხვეფს თიშო, მუდგას თქვანო ორთუნა. მუთ ირფელიშ უმოს მნიშვნელოვან რე, ირიათო ქუწით მადლობა იეჰოვას (ფსალმ. 75:1). მასმა, თიცალ ადამიანეფ გეგშეგორით მეგობრეფო, მიდგას უღუნა თე თვისება. მუჭოთ მარდულობან თეშ, უმარდულობა შხვას ხოლო გინადვალუ (კან. 1:26–28; 2 ტიმ. 3:1, 2, 5). მარდულობაშ გიმოხანტუას ირნერო ქუვოცადუთ-და, უმოსო შემალებენა ქიგებჯერდათ თის, მუთ მიღუნა.

7. მუქ მეხვარ ინდონეზიას მახორუ დას მარდულობაშ გავითარებას დო მუქ მაჸუნ თეს შედეგო?

⁷ გუვარჩუათ ინდონეზიას მახორუ ართ დაშ შემთხვევა. თინა ალალას მირაგადუნა: „კოვიდ-19 პანდემიაშ დროს ჩქიმ მდგომარეობას შხვა ქრისტიანეფიშ მდგომარეობას ვადარენდჷ. შედეგო, კმაყოფილებაშ გრძნობაქ მემდინ“ (გალ. 6:4). მუქ მეხვარ თის აზროვნებაშ თირუას? თე და აგრძელენს: „ქიდიპჭყჷ თი კურთხევეფშე ფიქრ, ნამდგას ირდღას ბღებულენდჷ, დო, თეწკუმა ართო, თი მხარეეფშე ხოლო ფიფქრენდჷ, ნამუთ იეჰოვაშ ორგანიზაციას რინაქ მომიღ. უკულ იეჰოვას მადლობას ურაგადუდ თე ირფელშო. შედეგო, კინ დუმართჷ კმაყოფილებაშ გრძნობაქ“. უარყოფით ფიქრეფ თქვა ხოლო ქოისოფუანან-და, თე დაშ მაგალითიშ მეჸუნა მიგეხვარებუნა მარდულობაშ დორთინაფას.

ᲠᲓᲐᲗᲷ ᲗᲐᲜᲓᲐᲑᲐᲚ

8. მუქ აღოლ ბარუქის?

⁸ ბარუქის, ნამუთ წინასწარმეტყველ იერემიაშ მდივან რდჷ, ართ მომენტის გაუჭირდჷ გეუჯერდუკო თის, მუთ უღუდ. თიშ დავალება ვა რდჷ ადვილ – ოკო მეხვარუკო იერემიას უდუჯერებელ ისრაელეფშა მკაცრ განაჩენიშ გინოჩამას. თიშ მანგიორო, ნამდა ბარუქის მთელ ყურადღება თიშა გინუღალუდუკო, მუ ოკოდ იეჰოვას თიქ აკეთუკონ, მუშ დუდშე დო თიშე ქიდიჭყჷ ფიქრ, მუს მუშ კეთება ოკოდ. ათეშენ იერემიაშ პიჯით იეჰოვაქ თის უწუ: „დიდ მუდგარენშა ინჭუაფუქ; ნუმ ინჭუაფუქ!“ (იერ. 45:3–5). შხვანერო ქოფთქუათინ, იეჰოვა თის ურაგადუდ, მუთ გიღუნ თის ქიგეჯერდია. ბარუქიქ ქალერჩქილუ თიშ სიტყვეფ დო ვეგლელუ ღორონთწკუმა ურთიერთობა.

9. მუს ბგურაფლენთ 1 კორინთელეფიშ 4:6, 7-შე? (ქოძირით სურათეფ).

⁹ მინშა შილებე ქრისტიანქ იფიქრას, ნამდა ნამდგაინ კონკრეტულ პასუხიშმგებლობა თის ოკო უღუდას. თინა შილებე ბრელს ხანდენდას დო უნარიან დო ბრელ წანაშ ქრისტიან რდასჷ, მარა იშენით შილებე მუს ოკონ თი პასუხიშმგებლობა შხვაქ მიღას. მუ მეხვარებ თის, თეცალ დროს გურქ ვა მურთას? ოკო დეფიქრას პავლეშ სიტყვეფშე, ნამუთ მოჩამილ რე 1 კორინთელეფიშ 4:6, 7-ის (წეკითხით). ირნერ უნარ ვარდა დავალება, ნამდგას ბღებულენთ, იეჰოვაშე რე. თე ირფელ ჩქი შხვეფშე უჯგუშეფ ვორეთ ვარდა დამსახურებულ მაფუნან თიშენ ვარინ, იეჰოვაშ ჭყოლოფაშ გურშენ მიღუნა (რომ. 12:3, 6; ეფეს. 2:8, 9).

10. მუ მიმეხვარებუნა თანდაბლობაშ გავითარებას?

¹⁰ თანდაბლობაშ გავითარებას იესოშ მაგალითშე დაფიქრება მიმეხვარებუნა. ქიგიფშინათ თი შემთხვევა, მუჟამსით იესოქ მუშ მოწაფეეფს კუჩხეფ უბონ. მოციქულ იოანე თეშ გურშენ ჭარუნს: „იესოს უჩქუდ, ნამდა [1] მუმაქ ირფელ მუს გინოჩ, [2] ღორონთშე რდჷ მოშქუმალირ დო [3] ღორონთშა მიშჷ“. მარა უკულ იოანე აგრძელენს: „თიქ ქიდიჭყჷ მოწაფეეფშა კუჩხიშ ბონუა“ (იოან. 13:3–5). იესოს შეულებუდ იფიქრუკო, ნამდა მოწაფეეფქ აშო ოკო უბონესკო კუჩხეფ. თის დღას ვა უფიქრებ, ნამდა რახანს ღორონთიშ სქუა რდჷ, მდიდრულ დო კომფორტულ ცხოვრებას იმსახურენდჷ (ლუკ. 9:58). თინა თანდაბალ რდჷ დო გეუჯერდუდ თის, მუთ უღუდ. თეშნერო, იესოქ სრულყოფილ მაგალით დომტუეს (იოან. 13:15).

11. მუ ოხვარ დენისის, დირთინუას კმაყოფილებაშ გრძნობა?

¹¹ დენის, ნამუთ ნიდერლანდეფს ცხოვრენს, ოცად, მიაჸუნას იესოშ თანდაბლობაშ მაგალითის, მარა თენა ირო ვა აფჷ ადვილ. თინა იჩიებ: „მინშა მოწყინ, მუჟამსით მა მოკოდუნ თი დავალებას შხვა ღებულენს, დო ფიფქრენქ, ნამდა ჩქიმდა ოკო მუჩამუდესკო თე საქმე. თენა ქუმაღოლენ თიმწკუმა, თანდაბლობაშ საკითხიშ გიმორკვიებას იპჭყანქ. JW ბიბლიოთეკას ტეგეფიშ ფუნქციათ ჩუალირ მაფჷ კონკრეტულ მუხლეფ თანდაბლობაშ გურშენ, ნამდა საჭირო დროს ხეთეშე დობგორე დო კინ წეპკითხე თინეფ. თეწკუმა ართო, ტელეფონს გინოჭარილ მაფჷ მოხსენებეფ თანდაბლობაშ გურშენ დო ხშირას ურჩქილექ თინეფს.a ქიდიბგურე, ნამდა ირფელ იეჰოვაშ განდიდებელო ოკო ვაკეთათ დო ვართ ხოლო ჩქინ დუდიშ. მთავარ საქმეს ჩქი ვარინ, იეჰოვა ორთჷ. უბრალოთ თინა მარზენა საშვალებას, ჩქინ ჭიჭე წილ გემშებღათ თიშ საქმეშა“. გოკოდუნ თი დავალება ვემიღინ თიშენ უკმაყოფილო ქორექ-და, ირნერო ქეცად თანდაბლობაშ გავითარებას. თენა მიგეხვარებ, უმოსო დეახლოვე იეჰოვას დო დირთინუე კმაყოფილებაშ გრძნობა (იაკ. 4:6, 8).

ᲓᲔᲤᲘᲥᲠᲘᲗ ᲛᲝᲛᲐᲕᲐᲚᲘᲨ ᲘᲛᲔᲜᲓᲨᲔ

12. მუშ იმენდ მოხვარუნა, გეუჯერდათ თის, მუთ მიღუნა? (ეს. 65:21–25).

¹² მომავალიშ იმენდშე ფიქრ ხოლო მოხვარუნა, გეუჯერდათ თის, მუთ მიღუნა. ესაიაშ წიგნის იეჰოვა მირაგადუნა, ნამდა თის არჩქილე, ამდღა მუ პრობლემეფ მაწუხენა, დო მოპირუნა, ნამდა თე არძა პრობლემას ბოლოს მუღენს (წეკითხით ესაიაშ 65:21–25). იფცხოვრენთ უსაფრთხოთ, მაღვენუნა სქვამ ჸუდეეფ დო სასიამოვნო სამუშა, ოპჭკუმუნთ ჯანსაღ დო გემუან ოჭკუმალეფს დო დღას ვა მაჸინა ონერვიანებელ თიშე, ნამდა ჩქი ვარდა ჩქინ სქუალეფს მუდგაინ გლახა ქუმაღოლენა (ეს. 32:17, 18; ეზეკ. 34:25). ღორონთიშ თე დიდებულ დუნაპირებუეფ აუცილებერო შისრულებ.

13. განსაკუთრებულო ნამ სიტუაციეფს ოკო დეფიფქრათ მომავალიშ იმენდშე?

¹³ მომავალიშ იმენდშე ფიქრ ამდღა მოსაჭირუნან თეშ, დღას ვა დაბსაჭირებუნა, მუშენდა „ბოლო დღალეფს“ ფცხოვრენთ დო თიცალ პრობლემეფ მიღუნა, ნამუთ „ძნელ გინაღალარ“ რე (2 ტიმ. 3:1). მარა იეჰოვა ირიათო აწოპჸუნა, ალამრენა დო მარზენა საჭირო ძალეფს (ფსალმ. 145:14). თეწკუმა ართო, მომავალიშ იმენდ ხოლო მოხვარუნა სირთულეეფიშ გარზებას. შილებე ამდღა ბრელს წვალენდათ თქვან ოჯახიშ ეიოჯუმალარო. ირიათო თაშ გაჸინანო ოწვალებერ? მუთუნით ვარ! იეჰოვა მოპირუნა, ნამდა სამოთხეს უბრალოთ მუთ მოსაჭირუნან თის ვარინ, ბრელით უმოსის ხოლო ქომუჩანა (ფსალმ. 9:18; 72:12–14). შილებე ქრონიკულ ლახალას ობრძოლუდათ, დეპრესიას რდათჷ ვარდა ჯანმრთელობაშ შხვა პრობლემა გიღუდან. მარა თენა ვა ნიშნენს, ნამდა ირიათო თაშ გაჸინა ოტანჯებელ დო დღას ვა დოსქიდუთ. ახალ ქვეყნიერებას ვეჸუაფ ვართ მუთუნნერ ლახალა დო ვართ ღურა (გამოცხ. 21:3, 4). თე იმენდ მოხვარუნა, ვეგებჟღამათ ჩქინ ამდღანერ მდგომარეობაშ გურშენ დო ვა ვოდინუათ კმაყოფილებაშ გრძნობა. საჸოროფო ადამიანქ დომღურეს, ჯანმრთელობაშ პრობლემას ქუვობრძოლუთ, უსამართლობას ქოფხვადუთ ვარდა მუდგაინ შხვა სირთულე ქომღუნან-და, იშენით შემლებუნა ვა ვოდინუათ კმაყოფილებაშ გრძნობა, მუშენდა ამდღა მუდგა რთულ მდგომარეობას ვა ვორდათინ, მიჩქუნა, ნამდა თე გაჭირება ბრელ ხანს ვეჸუაფ დო მალას, ახალ ქვეყნიერებას, სადღამუშოთ მუმადგუმუნა შურ (2 კორ. 4:17, 18).

14. მუ მიმეხვარებუნა, უმოსო ბჯერდან იეჰოვაშ დუნაპირებუეფიშ?

¹⁴ მუჭოთ უკვე ფთქვით, მომავალიშ იმენდ მოხვარუნა, ამდღა ნამ მიღუნან თის გეუჯერდათ. იმწკუმა მუ მიმეხვარებუნა, უმოსო გემამნგარათ თე იმენდ? მუჭოთ კოჩის შილებე აჩქეფ ოსაჭირუდას, ნამდა შორს ჯგირო ორწყედას, თეშ ჩქი ხოლო მუდგარენ ნაბიჯეფიშ გინოდგუმა მოსაჭირუნა, ნამდა თი ცხოვრება, ნამუთ მომავალს სამოთხეს იჸუაფ, უმოს სუფთას ქობძირათ. მაგალთო, ფინანსურ პრობლემეფ ქომღუნა დო თეშ გურშენ ქოპწუხენთ-და, შემლებუნა წერმიბდგინათ, მუნერ იჸუაფ ცხოვრება ახალ ქვეყნიერებას, სოდეთ ვეჸუაფ ფარა, ვალეფ დო უღონობა. მოკოდესინ თი დავალებაქ დიო ხოლო ვემმაღებუეს დო თეშ გურშენ ქომნერვიანენთ-და, შემლებუნა დეფიფქრათ, მუნერ უმნიშვნელოთ მაძირედან იჸი თე ნერვიანობა ახალ ქვეყნიერებას, მუჟამსით სრულყოფილეფ იპჸით დო უკვე ანთასობით წანას მაჸინა ნამსახურებ იეჰოვაშა (1 ტიმ. 6:19). ამდღა თისხი ოწუხებელ მიღუნა, შილებე გამჭირდან მომავალიშ იმენდშე ფიქრიქ, მარა მუთ უმოსის ქიფიფქრენთ თიშე, თით უმოსო შემალებენა მთელ ყურადღება ჩქინ პრობლემეფშა ვარინ, ღორონთიშ დუნაპირებუეფშა გეგნიბღათ.

15. მუს ბგურაფლენთ კრისტაშ სიტყვეფშე?

¹⁵ მორთ გუვარჩუათ, მუჭო ოხვარ მომავალიშ იმენდ ჩქინ ართ დას, კრისტას, ნამუთ ჟიშე მოშინაფილ დენისიშ ოსურ რე. თინა იჩიებ: „კუნთეფიშ ლახალა მიღჷ დო ჩქიმ მდგომარეობა ირდღას იუფრაშებ. კალიასკაშ უმშო ვეგლმართე დო უმენტაშო დონჯირელო ვორექ. ირდღას ჭუეფ მიღჷ. ამარდე ექიმქ მიწუ, ნამდა ჩქიმ გამოკვლევეფიშ პასუხ ვა რდჷ იშენდოიშენ ჯგირ. ხეთეშე იფიფქრ, თინა გვალო შხვანერო უჯინე მომავალს-მაქ. მა ირიათო ჩქიმ იმენდშე ფიფქრენქ, მუთ სიმშვიდეს მარზენს. მართალ რე, ამდღა თე ქვეყნიერებას შილებე ბრელ მუდგარენშა მაფუდას გარზებელ, მარა მომავალს ახალ ქვეყნიერებას ცხოვრებათ გეფხარენქ“.

„ᲘᲔᲰᲝᲕᲐᲨ ᲨᲘᲨ ᲣᲦᲣᲜᲐᲜ ᲗᲘᲜᲔᲤᲡ ᲛᲣᲗᲣᲜ ᲕᲐ ᲛᲐᲙᲝᲠᲓᲣᲜᲐ“

16. მუშენ შეულებუდ დავითის თქუკო, „იეჰოვაშ შიშ უღუნან თინეფს მუთუნ ვა მაკორდუნანია“?

¹⁶ შილებე ღორონთიშ მსახურ პრობლემეფს ხვადუდას, მარა იშენით უღუდას კმაყოფილებაშ გრძნობა. მაგალთო, ბიბლია იჩიებ, ნამდა მეფე დავითიქ სუმ სქუაშ ღურა მიძირუ. თეწკუმა ართო, ტყურა ეკაწამეს, უღალატეს დო წანეფიშ დინახალე ოჸვილარო თხოზუდეს. მარა თეზმა გაჭირებაშ უმკუჯინუო, თიქ იეჰოვაშ გურშენ თქუ: „თიშ შიშ უღუნან თინეფს, მუთუნ ვა მაკორდუნა“ (ფსალმ. 34:9, 10). მუშენ შეულებუდ დავითის თეშ რაგად? მუშენდა თის უჩქუდ, ნამდა იეჰოვა არძა პრობლემას ვემოჩილითუანა, მარა მუთ მოსაჭირუნან თის დღას ვამმარკენა (ფსალმ. 145:16). დავითცალო ჩქი ხოლო შემლებუნა ბჯერდან, ნამდა იეჰოვა მიმეხვარებუნა სირთულეეფიშ დროს დო მუდგა მდგომარეობას ვა ვორდათინ, შემალებენა ვა ვოდინუათ კმაყოფილებაშ გრძნობა.

17. მუშენ გოკონა დიგურუათ, მუჭო ვადინუათ კმაყოფილებაშ გრძნობა მუთუნნერ სიტუაციას?

¹⁷ იეჰოვას ოკო, გეუჯერდუდათ თის, მუთ მიღუნა (ფსალმ. 131:1, 2). ათეშენ ირფელ გაკეთით თიშ დაგურაფალო, მუჭო მიონჭირინუათ თეს. მარდულობას გევითარენთ, თანდაბალეფ ქიჸით დო მომავალიშ იმენდშე ხშირას ქიფიქრენთ-და, თქვა ხოლო გარაგადენა: „კმაყოფილ ვორექ“ (ფსალმ. 16:5, 6).