„იეჰოვაშ რე თე ბრძოლა“

თე ირფელქ 1999 წანას დიჭყჷ, მუჟამსით საფრანგეთიშ მთავრობაქ ფილიალს მოთხუ, 1993–1996 წანეფს მეღებულ შესაწირეფშო ოგაფურ გეგნიგუკო. საფრანგეთის ნამთინ სასამართლოს ვემმანჭირინუეს სამართალშა. მუჟამსით თექ სააპელაციო სასამართლოს საქმე წუვაგით, მთავრობაქ ფილიალიშ ანგარიშშე ოთხ დო გვერდ მილიონ ევრო გეგლაჭკირ (6 300 000 დოლარ). ჩქინ ბოლო იმენდ ადამიანიშ უფლებეფიშ ევროპულ სასამართლო რდჷ. მარა, ონდო სასამართლო დავა დიჭყაფუდ, ევროპულ სასამართლოქ მოფთხის, საფრანგეთიშ მთავრობაშ იურისტეფწკუმა ართო ქეშეფხვადითკო მუნეფიშ ართ-ართ წარმომადგენელს, ნამდა ქიმიბრაგადეთკო დო ეგება საქმექ სასამართლო დავაშა ვემერთუკო.

მიჩქუდეს, ნამდა სასამართლოშ წარმომადგენელ ეცადებუდ, ქუდომჸუნუესკო, ნამდა მთავრობაშ მოთხილ თანხაშ მუდგარენ ნაწილ ვარდა გეგნიბგითკო დო თეთ გეთებუდ საქმე. მარა ჩქი მარჩქილედეს, ნამდა გოკონდა ართ ევროშ გაფა თე ფარაშე ბიბლიურ პრინციპეფიშ გინორთა იჸუაფუდ, მუშენდა თინა და დო ჯიმალეფს სამეფოშ ინტერესეფიშ ხუჯიშ დაკინებელო აფუდეს შეწირულ, თაშ ნამდა, თე ფარა მთავრობას ვაკუთვნუდ (მათ. 22:21). მარა ჩქი პატი ფცითჷ სასამართლოშ წესეფს დო იშენით ქიდვესწრით თე შეხვალამას.

გაკიფშაყარით სასამართლოშ ართ სქვამ საკონფერენციო ოთახის. დუდშე ჩიებაქ გლახაქ მიდართჷ. დაჭყაფუს ევროპულ სასამართლოშ წარმომადგენელქ თქუ, ნამდა იეჰოვაშ მოწმეეფს აუცილებერო აჸიდეს მოთხილ თანხაშ მუდგაინ ნაწილ ოგაფალ. თე მომენტის მიკვართით დო პკითხით: „თქვა ქოიჩქუნანო, ნამდა მთავრობაქ უკვე მიდამღეს ოთხ დო გვერდ მილიონ საბანკო ანგარიშშე?“. თენა ღორონთიშ წმინდა შურქ მორაგადაფუეს.

თე ოსურს ქიგიოდოხოდ, ნამდა ვა უჩქუდ თე ამბე დო შურო ვემეწონ თეშ გაგებაქ. უკულ მთავრობაშ წარმომადგენელეფს მიკართჷ დო კითხჷ, მართალო თაშ რენიაო. თინეფქ უპასუხეს, ქოვა. თე მომენტის თიქ დუდშე ბოლოშა დითირ დო ჩქი ქიგნმოდირთეს. მთავრობაშ წარმომადგენელეფს ქათაკიჟინ დო თიმწუთის გათუ თე შეხვალამა. ქიმეფხვად, ნამდა თენა იეჰოვაშ ხე რდჷ. თიქ შურო ვეველუდითინ თეშ მიკართინუ თე საქმე ჩქინ სამოგებოთ. შეხვალამაშე გახარებულეფქ გიმიბლით; მუთუნით ვეფიფქრენდით, თაშ ქუმოხვადუდუნ.

2011 წანაშ 30 ივანობას ადამიანიშ უფლებეფიშ ევროპულ სასამართლოქ ჩქინ სამოგებოთ მიღჷ გადაწყვეტილება. სასამართლოქ გინოჭყვიდ, ნამდა ორგანიზაციას მთავრობაშა მუთუნ ვაჸიდ ოგაფალ. თეშ გინაწონს, მთავრობაქ მიდაღალირ ფარა აშო ოკო დართინუკო დო პროცენტ ხოლო ქიგუძინუკო. თე ისტორიულ გადაწყვეტილება ამდღარ დღაშახ თხილანს ჭეშმარიტ თაყვანიშმცემლობას საფრანგეთის. თი ართ კითხვაქ, ნამდგაშ დოსუმალა შურო ვამლამუდეს, თი ქუაცალქ იჸუ, ნამუთ დავითიქ გოლიათის დუდის მიშახაშ დო დუდშე ბოლოშა დოთირუ სასამართლო პროცეს. მუშენ მიბგით თე ბრძოლა? თიშენ, ნამდა დავითიქ გოლიათის უწუნ თეშ, „იეჰოვაშ რე თე ბრძოლა“ (1 სამ. 17:45–47).

თენა ვა რდჷ ხვალე ართ საქმე, ნამუთ მიბგით. ამდღარ დღაშახ 70 ქიანაშ უზენაეს სასამართლოეფს დო მუსხირენ საერთაშორისო სასამართლოს 1 225 საქმე მაფუნა მოგებულ, თიშ უმკუჯინუო, ნამდა ხშირ შემთხვევას მანგარ დიდ პოლიტიკურ დო რელიგიურ ძალეფ გერდეს ჩქინ წინააღმდეგ. თეცალ საქმეეფიშ მოგება საშვალებას ირზენს, დაცულ რდასჷ ჩქინ მთავარ უფლებეფ. მაგალთო, საშვალება მიღუდან, ოფიციალურო დებრეგისტრირათ, მუჭოთ რელიგიაქ, თავისფალო შემლებუდან ქადაგება, მიღუდან საშვალება, ვარია ფთქუათ პატრიოტულ ცერემონიეფს მონაწილებაშენ დო ზისხირიშ გინობუნაშენ.

ასე ქიგეჩიებუთ, მუჭო მოფხვად იეჰოვაშ მოწმეეფიშ მსოფლიო მთავარ სამმართველოშე ევროპას თე იურიდიულ საქმეეფს მონაწილებაშო.

ᲛᲝᲜᲓᲝᲛᲔᲑᲣᲚ ᲛᲘᲡᲘᲝᲜᲔᲠ ᲛᲨᲝᲑᲚᲔᲤᲥ ᲛᲝᲑᲠᲓᲔᲡ

ჩქიმ მშობლეფქ, ჯორჯ დო ლუსილქ, გალაადიშ მა-12 კლას მიკორთეს დო 1956 წანას, მუჟამსით მა დებაბდჷ, ეთიოპიას მსახურენდეს. თინეფქ პირველ საუკუნეს მახორუ მაქადაგებელ ფილიპეშ სახელ ქიგმოდვეს (საქ. 21:8). მაჟია წანას მთავრობაქ ჩქინ საქმიანობა აკრძალ. მართალ რე, გვალო აკაბცხა ვორდჷ, მარა ჯგირო ფშჷ, მუჭო მსახურენდჷ დო ოსწრუდ შეხვალამეფს ტყობაშე ჩქინ ოჯახ. მა ხოლო ბაღანა ვორდჷ დო მოხიოლუდ თე ირფელ. 1960 წანას ჩქი ქიანა ქუდმოტებაფუეს.

ჩქინ ოჯახიქ კანზასიშ შტატშა, უიჩიტოშა გინორთჷ ოცხოვრებშა (აშშ). ჩქიმ მშობლეფს ვა უდინუაფუნა თი მონდომა, ნამუთ მისიონერულ მსახურებას უღუდეს. თინეფს ცხოვრებას პირველ ადგილშა სულიერ საქმეეფ გეურდეს დო ქოთ მა დო ქოთ ჩქიმ უნჩაშ დას, ჯუდის, დო ქოთ უკლაშ ჯიმას, ლესლის, თენა დუმოგურუეს. თინეფქ ხოლო ჩქიმცალო ეთიოპიას დებადეს. 13 წანერ ვორდინ თეშ დიმნათ. სუმ წანაშა მთელ ოჯახიქ გეგნოფრთით არეკიპაშა (პერუ), სოდეთ მანგარ დიდ საჭიროება რდჷ.

1974 წანას, 18 წანერ ვორდინ თეშ, პერუშ ფილიალქ ოთხ ჯიმაწკუმა ართო სპეციალურ პიონერო დუმანიშნჷ. ჩქი ოკო იფქადაგითკო ანდეფიშ გვალეფს, სოდეთ დღას მითინს ვა აფუდ ნაქადაგებ. სახიოლო ამბე ოკო გეგნოფჩითკო თექიანეფს, მით აიმარა დო კეჩუა ნინეფშა იჩიებუდეს. გილეფშით დიდ მანქანათ, ნამუთ ოცხოვრებელო რდჷ მონწყილ. თის იაშიკიშ ფორმა უღუდ, ათეშენ „კიდობანს“ უძახუდით. მანგარ ჯგირო გუმაშინე თი დრო, მუჟამსით თექიან ხალხის ბიბლიაშე ვოძირანდით, ნამდა მალას იეჰოვა მოსპუნდჷ გაჭირებას, ლახალას დო ღურას (გამოცხ. 21:3, 4). თექ ბრელქ მიღჷ სახიოლო ამბე.

ᲛᲗᲐᲕᲐᲠ ᲡᲐᲛᲛᲐᲠᲗᲕᲔᲚᲝᲡ ᲛᲡᲐᲮᲣᲠᲔᲑᲐ

1977 წანას პერუშა ხელმძღვანელ საბჭოშ წევრ, ალბერტ შრედერ, რდჷ მოულირ, მიდგაქ ელამიჩ, ბეთელიშ ბლანკ შევავსიკო. მა ხოლო შევავსჷ დო მალას, 1977 წანაშ 17 ივანობას, ქიდიპჭყჷ ბრუკლინიშ ბეთელს მსახურება. უკულიან ოთხ წანას მსახურენდჷ დასუფთებაშ დო ტექნიკურ მომსახურებაშ განყოფილებეფს.

1978 წანაშ ივანობას ახალ ორლეანს (ლუიზიანა) ჩატარებულ საერთაშორისო კონგრესის, ქეშეფხვად ელიზაბეთ ევილონს. ჩქიმ მშობლეფცალო, ელიზაბეთიშ მშობლეფ ხოლო მთელ გურით ომსახურუდეს იეჰოვას. თინა ოთხ წანა რდჷ, მუთ პიონერო მსახურენდჷ დო ოკოდ, მთელ ცხოვრება იეჰოვაშ მსახურებას მეუძღვინუკო. თეშ უკულ ჩქი კონტაქტ ვამდინუაფუნა, უჯგუშო გეფჩინებაფეთ ართმაჟია დო ართიანქ მანგარო ქიმეჸოროფეს. 1979 წანაშ 20 ოქტომბერს დეფქორწინით დო ართო ქიდიპჭყით ბეთელს მსახურება.

დუდშე ვორდით კრებას ბრუკლინ ესპანურ. თექიან და დო ჯიმალეფქ დიდ ჸოროფათ მემღეს. უკულ, წანეფიშ დინახალე, ხოლო სუმ კრება გიმიფთირეთ. თექიან და დო ჯიმალეფშე ხოლო იბგინით დიდ ჸოროფა დო თინეფ ხოლო ირნერო მოხვარუდეს, ბეთელს მსახურება გუვაგრძელითკო. მანგარო ვაფასენთ, მუჭოთ თე და დო ჯიმალეფიშ, თეშ თი მეგობრეფიშ დო ოჯახიშ წევრეფიშ ელარნას, მით ჩქინ ხანშამიშულირ მშობლეფშე ზრუნენდეს.

„ᲘᲣᲠᲘᲓᲘᲣᲚ ᲑᲠᲫᲝᲚᲔᲤ“

მანგარო გამკვირდჷ, ნამდა 1982 წანაშ იანარს იურიდიულ განყოფილებაშა გეგნომიჸუნეს. სუმ წანაშ უკულ მიწუეს, ნამდა იურიდიულს ოკო იბგურეკო, მუშენდა ლიცენზირებულ იურისტ ქუვორდიკო. გურაფაშ დროს ქიგებგჷ, ნამდა ამერიკას დო შხვა ქიანეფს ხალხის ბრელ საკითხის თავისუფლება იეჰოვაშ მოწმეეფიშ მოგებულ სასამართლოეფიშ ჭყოლოფათ უღჷ. გურაფაშ დროს თე მოგებულ სასამართლო პროცესეფშე კილ-კილშა მიშჷ ჩიება.

1986 წანას, 30 წანერ ვორდინ თეშ, იურიდიულ განყოფილებაშ ზედამხედველო დუმანიშნეს. მანგარო მოხიოლუდ, ნამდა თეცალ ასაკის თეშმადიდა პასუხიშმგებლობა მუმანდეს, მარა თეწკუმა ართო მნერვიანენდჷ, მუშენდა ბრელ მუთუნ ვამჩქუდ დო მარჩქილედ, ნამდა თენა ადვილ დავალება ვეჸუაფუდ.

1988 წანას გურაფა გუვათე, მარა შურო აზრის ვა ვორდჷ თეშ, თე ირფელქ გლახათ იეჰოვაწკუმა ჩქიმ ურთიერთობაშა. უმაღლეს განათლებაქ შილებე კოჩის ამბიციეფ გურჩქინას დო ოფიქრებაფუას, ნამდა თინეფშე უმოს მანგარ რე, მიდგას ვა უღჷ თეცალ განათლება. ელიზაბეთიქ ქელამდირთჷ დო მიმეხვარ, კინ დუვართიკო თი სულიერ განრიგის, ნამუთ გურაფაშ დოჭყაფაშახ მიღუდ. მუსხირენ ხანიშ უკულ სულიერო კუჩხის ქიგებდირთჷ. ასე უკვე მართალო მარაგადე, ნამდა ცხოვრებას არძაშ უმოს მნიშვნელოვან იეჰოვაწკუმა ხოლოშიან ურთიერთობა დო ღორონთიშ დო თიშ ხალხიშ ჸოროფა რე დო ვართ ხოლო განათლება.

„ᲡᲐᲮᲘᲝᲚᲝ ᲐᲛᲑᲔᲨ ᲙᲐᲜᲝᲜᲘᲗ ᲓᲐᲪᲕᲔᲑᲐ ᲓᲝ ᲒᲐᲛᲐᲜᲒᲐᲠᲔᲑᲐ“

გურაფა გუვათენ, მთელ ყურადღება იურიდიულ განყოფილებაშ საჭიროებეფშა დო სამეფოშ ინტერესეფიშ დაცვებაშა გეგნიბღჷ. ჩქიმ საქმე მანგარო მოპწონდჷ, მარა ორგანიზაცია მალას ირდუდ დო მუდგარენეფ გეწი-გეწი ითირუდ. ათეშენ, ცვლილებეფშა მეჸუნა ადვილ ვა მაფუდ. მაგალთო, ჩქი თეიშახ გავრცელებურ ლიტერატურაშ მანგიორო შესაწირეფს ეპჭოფუნდით, მარა 1990 წანას ხელმძღვანელ საბჭოქ იურიდიულ განყოფილებას თხუ მოხვარა, ნამდა თეცალ შესაწირეფიშ ეჭოფუაქ მეჭყორდუკო. თევრეშე მოჸუნაფილ იეჰოვაშ მოწმეეფ უფასოთ ავრცელენა პუბლიკაციეფს. თექ ქოთ ბეთელს დო ქოთ მსახურებაშო ბრელ მუდგარენ გამარტივ დო თეწკუმა ართო, ფთხილანა თი პრობლემეფშე, ნამდგაქ შილებე გინაგაფალეფს მაჸუნას. ნამთინე ფიქრენდჷ, ნამდა თე ცვლილებაშ უკულ ვა მაღვენუდეს საშვალება დასაბაღ ლიტერატურაშ გიშაშქუმალაშო დო უმოს ნაკლებ გეგენდჷ იეჰოვაშ გურშენ, მარა ირფელქ პირიქით ქუმოხვად. 1990 წანაშ უკულ იეჰოვაშ მსახურეფიშ რიცხვიქ მაჟია თისხით მიძინ დო ამდღა ირკოჩის უღჷ საშვალება, უფასოთ მიღას გინმასქილიდაფარ სულიერ საზრდო. დებრწმუნ, ნამდა დიდ ცვლილებეფს წარმატება ხვალე იეჰოვაშ ძალაშ დო თიშ გერნაფილ ართგურ დო გონიერ მონაშ მითითებეფიშ მეჸუნაშ ჭყოლოფათ მოჸუნს (გამ. 15:2; მათ. 24:45).

სასამართლო საქმეეფიშ მოგება ხვალე ჯგირ ადვოკატეფიშ ჭყოლოფა ვა რე. უმენტაშო მოსამართლეეფშა დო მთავრობაშ წარმომადგენელეფშა ღორონთიშ ხალხიშ ჯგირ საქციელ მოქმედენს. თეშ მაგალით ქობძირ 1998 წანას. თე წანას კუბას ისტორიულ რეგიონულ კონგრესეფ იტარებუდ, მუშენდა ხელმძღვანელ საბჭოშ სუმ წევრ რდჷ ინულირ მუნეფიშ მეუღლეეფამო. თინეფქ თიცალ გემუანო დო პატიცემათ შეხვადეს მთავრობაშ წარმომადგენელეფს, ნამდა ჩქინ ნამთინ ოფიციალურ შეხვალამას ვა უმოქმედებ თე ხალხშა თეშნერო დო ვა დურწმუნებ, ნამდა პოლიტიკურო ნეიტრალურეფ ვორეთ.

მარა ირფელ ირო თეცალ გემუანას ვემურს დო მინშა მიხვადუნა, სახიოლო ამბე კანონით დეფცვათ სასამართლოს (ფილ. 1:7). მაგალთო, წანეფიშ დინახალე ევროპაშ ნამთინე ქიანაშ დო სამხრეთ კორეაშ მთავრობეფ ვაღიარენდეს ჩქინ უფლებას, ნამდა ვარია ქოფთქვითკო სამხედრო სამსახურშენ. შედეგო, ევროპას სოდგარენ 18 000 დო სამხრეთ კორეას 19 000-შე უმოს ჯიმა ციხეს ხედჷ ჯარშა ულაშე ვარიაშ რაგადიშ გურშენ.

საბოლათ, 2011 წანაშ 7 კვირკვეს ადამიანიშ უფლებეფიშ ევროპულ სასამართლოქ მიღჷ ისტორიულ გადაწყვეტილება სომხეთის მახორუ ჩქინ ჯიმაშ, ვაჰან ბაიათიანიშ, საქმეწკუმა დაკავშირებით. თე გადაწყვეტილება ევროპაშ არძა ქიანაშე ითხინდჷ, ნამდა ალტერნატიულ სამსახურიშ უფლება ქიმეჩუკო თინეფს, მით რწმენაშ გურშენ სამხედრო სამსახურშე იჩიებუდეს ვარიას. თეშ უკულ, 2018 წანაშ 28 ივანობას სამხრეთ კორეაშ საკონსტიტუციო სასამართლოქ ხოლო იგივე გადაწყვეტილება მიღჷ. ჩქინ ახალგაზრდა ჯიმალეფიშ ჭიჭე ნაწილს ვარა მიდურთუმუდუკო დათმობაშან, თე ისტორიულ სასამართლო გადაწყვეტილებეფშა ვემმანჭირინედეს.

მთავარ სამმართველოშ დო მთელ მსოფლიოშ იურიდიულ განყოფილებეფ ბრელს ხანდენა სამეფოშ საქმეშ ხუჯიშ დაკინებელო. ჩქინო დიდ პატი რე, ვორდათ თი და დო ჯიმალეფიშ წარმომადგენელეფ, მიდგას მთავრობა ოწინააღმდეგ. თიშ უმკუჯინუო, ნამდა ნამთინე სასამართლო პროცესის ვაგენთ, ჩქი იშენით ვამოწმენთ „მეფეეფიშ დო გამგებელეფიშ“ წოხოლე (მათ. 10:18). მოსამართლეეფს, მთავრობაშ წარმომადგენელეფს, მედიას დოვარ შხვეფს საშვალება უღუნა, ქიმირჩქილუან თი ბიბლიურ მუხლეფ, ნამდგას წერილობით დოკუმენტეფს მიფშინუანთ ვარდა რაგადიშ დროს გიმიბრინუანთ ჩქინ რწმენაშ დაცვებელო. თეშნერო, ალალგურიშ კათა გებულენს, მი რენა სინამდვილეს იეჰოვაშ მოწმეეფ დო მუშა რე თინეფიშ რწმენა გერსხილ. თეშ შედეგო ნამთინექ იეჰოვაშ მსახურო ხოლო გინირთჷ.

ᲘᲠᲤᲔᲚᲨᲔ ᲛᲐᲠᲓᲣᲚ ᲒᲐᲤᲣᲥ, ᲘᲔᲰᲝᲕᲐ

ბოლო 40 წანას მიღუდ პატი, იურიდიულ საკითხეფს იფთანამშრომლიკო მსოფლიოშ ფილიალეფწკუმა, გებდირთიკო უზენაეს სასამართლოეფიშ წოხოლე დო შეფხვადიკო მაღალ თანამდებობაშ კათას. მანგარო მიჸორს დო ვაფასენქ ჩქიმ თანამშრომელეფს თაქ მთავარ სამმართველოშ იურიდიულ განყოფილებაშე დო მთელ მსოფლიოშ იურიდიულ განყოფილებეფს. შემლებ ფთქუე, ნამდა ჩქიმ ცხოვრება კურთხევეფით რე ეფშა.

ელიზაბეთ ჯგირ დო ფურს ირიათო ალამირდჷ დო მთელ გურით მოხვარუდ თე 45 წანას. მანგარო ვაფასენქ, ნამდა თე ირფელს ორთუდ ჩქიმო თიშ უმკუჯინუო, ნამდა ობრძოლ თიცალ ლახალას, ნამუთ ძალეფს მიდმუღანს.

დებრწმუნით, ნამდა მუთუნ გუმაკეთებენა დო მუდგაინ წარმატებაშა ქიმმანჭირინენან-და, თე ირფელ ჩქინ უნარეფიშ ვარინ, იეჰოვაშ ჭყოლოფა რე. მუჭოთ მეფე დავითიქ თქუ, „იეჰოვა ძალა რე მუშ ხალხშო“ (ფსალმ. 28:8). ნამდვილო, „იეჰოვაშ რე თე ბრძოლა“.