ქეშულებუნო მთავარ ბიბლიურ გურაფეფს ამდღა ხოლო მუდგაინ ქუდგოგურუან?

1. მუჭო იმოქმედ თქვანდა ბიბლიურ გურაფეფიშ გაგებაქ?

ᲛᲗᲐᲕᲐᲠ ბიბლიურ გურაფეფქ დუდშე ბოლოშა დოთირუ ჩქინ ცხოვრება. მაგალთო, მუჟამსით ქიგებგით, ნამდა ღორონთიშ სახელ იეჰოვა რე, პირველ ნაბიჯ გეგნობდგით თიწკუმა მეგობრობაშ დაჭყაფალო (ეს. 42:8). მუჟამსით თინა ქიგებგით, მუ მდგომარეობას რენა ღურელეფ, მემდინეს თიშ შიშიქ, ნამდა შილებედ ჩქინ საჸოროფო ღურელ ადამიანეფ იტანჯებუდესკო (ეკლ. 9:10). დო მუჟამსით ქიგებგით ღორონთიშ დუნაპირებ სამოთხეშ გურშენ, ჭუმანერ დღაშ შიშიქ ხოლო მემდინეს დო დებრწმუნით, ნამდა, ამდღა რენ თეშ ჭიჭე ხანს, 70 დო 80 წანას ვარინ, შემლებუნა მარადიულო იფცხოვრათ (ფსალმ. 37:29; 90:10).

2. მუშენ უწუ პეტრექ ბრელ ხანიშ ქრისტიანეფს, გაგრძელესკო ფიქრ თი მთავარ ბიბლიურ გურაფეფშე, ნამუთ თეშით ჯგირო უჩქუდეს? (2 პეტ. 1:12, 13).

² ჭეშმარიტება მუზმა ხანიშ გაგებულ ვა მაფუდანინ, დღას ოკო ვა უდინას ჩქინ თოლს ფასიქ მთავარ ბიბლიურ გურაფეფს. ყურადღება ქიმიაქცით, ნამდა თი ქრისტიანეფ, მიდგას პეტრექ მუშ მაჟია წერილ მეჭარ, ჭეშმარიტებაშა ახალმულირეფ ვა რდესინ, „მტკიცას გერდეს სიმართლეშ შარას“ (წეკითხით 2 პეტრეშ 1:12, 13). მარა თინეფ სერიოზულ სულიერ საფრთხეშ წოხოლე რდესჷ, მუშენდა ქრისტიანულ კრებას გემკორჩქინდჷ თიცალ უბადო ხალხიქ, მით ოცადუდ, ქრისტიანეფ სიმართლეშ შარას გეიოჩილითუკო (2 პეტ. 2:1–3). პეტრეს ოკოდ, რწმენა გაუმანგარუკო და დო ჯიმალეფს, ნამდა ქეშიალებუესკო თე ირფელშე დუდიშ თხილუაქ. ათეშენ, თიქ ნამთინე თიცალ გურაფა ქუგაშინ თინეფს, ნამუთ თეშით ჯგირო არჩქვენუდეს, მარა თე გურაფეფ ქიმეხვარებუდ თე ქრისტიანეფს, ბოლოშა ართგურეფქ ქუდოსქიდესკო.

3. ქიმიჸუნით მაგალით, მუშენ ოკო ვემიოტუას ნამთინ ქრისტიანქ მთავარ ბიბლიურ გურაფეფშე ფიქრ.

³ ჭეშმარიტება ბრელ ხანიშ გაგებულ მაფუდანინ ხოლო, იშენით ბრელ მუდგარენიშ გურაფა შემლებუნა მთავარ ბიბლიურ გურაფეფშე. დეფიფქრათ თეცალ მაგალითშე: ქოთ გამოცდილ დო ქოთ ახალ მზარეულ ოჭკუმალიშ ოკეთებელო ართ დო იგივე პრიპასეფს ირინუანს. მარა ჯვეშ მზარეულს გამოცდილებაწკუმა ართო დოგურაფილ აფჷ, მუჭო მამზადას იგივე პრიპასეფით ოჭკუმალ უმოს შხვანერო დო საინტერესოთ. თეშნერო, ბრელ ხანიშ ქრისტიან დო ახალ მაგურაფალ შილებე ართ დო იგივე მუხლეფშე შხვადოშხვა მუდგარენს გურაფლენდან. ნათუაშ უკულ ჩქინ მდგომარეობა დო პასუხიშმგებლობეფ ალბათ დითირუდ. ბრელ ხანიშ წოხოლე გაგებულ ბიბლიურ გურაფეფს ასე მოფხვადითინ თი სიტუაციას გეგმიბრინუანთ-და, შილებე თევრეშე გვალო ახალ დო მანგარ პრაქტიკულ მუდგარენეფ ქიდიბგურუათ. გუვარჩუათ მთავარ ბიბლიურ გურაფეფშე სუმ დო ქობძირათ, მუშ გურაფა შეულებუნა მოწიფულ ქრისტიანეფს თევრეშე.

ᲘᲔᲰᲝᲕᲐ ᲠᲔ ᲘᲠᲤᲔᲚᲘᲨ ᲒᲣᲛᲐᲭᲧᲐᲤᲐᲚ

4. მუჭო თირუ ჩქინ ცხოვრება თიშ გაგებაქ, ნამდა იეჰოვა რე გუმაჭყაფალ?

⁴ მიჩქუნა, ნამდა დედამიწა დო თი ირფელ, მუთ თე პლანეტას რე, ბრძენ დო ირფელიშშემალებე ღორონთიშ გოჭყაფილ რე. მუჭოთ ბიბლიას ჭარჷ, „ირფელიშ მაშენებელ ღორონთ რე“ (ებრ. 3:4). რახანს ღორონთიშ გოჭყაფილ ვორეთ, თის ირფელ უჩქჷ ჩქინ გურშენ. თეწკუმა ართო, ზრუნენს ჩქინდე დო უჩქჷ, მუ რე უჯგუშ ჩქინო. თე ართ მეჯინათ მარტივ ჭეშმარიტებაქ, ნამდა იეჰოვა რე ირფელიშ გუმაჭყაფალ, დოთირუ ჩქინ ცხოვრება დო ჩქინ სიცოცხლეს აზრიქ ქიმიაჩ.

5. მუშ რჩქინას შეულებ თანდაბლობა ქუდმოგურუან? (ეს. 45:9–12).

⁵ ირფელიშ გუმაჭყაფალ იეჰოვა რენ თეშ რჩქინას შეულებ თანდაბლობა ქუდმოგურუან. მაგალთო, მუჭოთ ფშუნა, მუდგარენ მომენტის იობიქ იეჰოვაშ გურშენ არასწორ მუდგარენეფ თქუ დო მუშ დუდშა დო მუშ სიმართლეშ დამტკიცებაშა გეგნიღ ნაბეტან ყურადღება. თე დროს იეჰოვაქ თის ქუგაშინ, ნამდა თინა ირფელიშშემალებე ღორონთ დო ცა დო დიხაშ გუმაჭყაფალ რე (იობ. 38:1–4). თეშ გოშინაქ ქიმეხვარ იობის თიშ ძირაფას, ნამდა მუდგას ღორონთ ორთჷ, ირო სწორ რე. ბრელ ხანიშ უკულ ნაჭარა ესაიაშ წიგნშე ხოლო იძირე, ნამდა ადამიანეფქ დღას ოკო ვეფიფქრათ ღორონთშე ჭკვერ ვორეთინ. თიქ ჭარჷ: „დიხაჭუბერ მუშ მაკეთებელს ოკო ურაგადუდასო, მუს ორთუქია?!“ (წეკითხით ესაიაშ 45:9–12).

6. განსაკუთრებულო მუ დროს რე მნიშვნელოვან თიშე დაფიქრება, ნამდა იეჰოვა რე ირფელიშ გუმაჭყაფალ? (ქოძირით სურათეფ).

⁶ ქრისტიან მუთ უმოს გამოცდილებას ღებულენსინ თეშ, შილებე იეჰოვაშ დო თიშ სიტყვაშ მანგიორო, მუშ აზროვნებაშა მენდება ქიდიჭყას (იობ. 37:23, 24). მუჭო მეხვარებ თის თეცალ დროს თიშე დაფიქრება, ნამდა იეჰოვა ირფელიშ გუმაჭყაფალ, ბრძენ დო ირფელიშშემალებე ღორონთ რე? (ეს. 40:22; 55:8, 9). თე ართ-ართ მთავარ გურაფაშე ფიქრ ქიმეხვარებ თის, ვადინუას თანდაბლობა დო გააზრებულ აფუდას, ნამდა იეჰოვაშ აზრეფ ირო სწორ რე.

7. მუ აკეთ რაჰელაქ, ნამდა ქიმიარჩქვანუკო ახალ მითითებას?

⁷ ჩქინ ართ დას, რაჰელას, ნამუთ სლოვენიას ცხოვრენს, იეჰოვა გუმაჭყაფალ რენ თეშე ფიქრიქ მეხვარ, ორგანიზაციას მოხვალამირ ცვლილებას ქიმიარჩქვანუკო. თინა ალალას იჩიებ: «მინშა მიჭირს, ქუდვაჸუნე თი გადაწყვეტილებეფს, ნამდგას ხელმძღვანელ ჯიმალეფ გინოჭყვიდუნა. მაგალთო, თიშ უმკუჯინუო, ნამდა ნაჯინა ვორდჷ „ხელმძღვანელ საბჭოშ 2023 წანაშ მა-8 ანგარიშშა“, პირველო პიჯის თუმა მოჩანდუნ ფერ ჯიმაქ მოხსენებათ გეგშართუნ, ვემმაღებუ. ათეშენ ქიბლოც დო იეჰოვას ფთხი, ქიმმეხვარუკო თე ცვლილებაშ მერჩქვანას». რაჰელაქ ქიმეხვად, ნამდა ცა დო დიხაშ გუმაჭყაფალ ღორონთის, იეჰოვას, ირო არძაშ უჯგუშო უჩქჷ, სოვრე იჸუნას მუშ ორგანიზაცია. ბიბლიურ გურაფაშ ახალ ენწყუმაშ ვარდა ახალ მითითებაშ მეჸუნაქ გაიჭირდეს-და, ჯგირ იჸუაფ, დეფიქრათ, მუშმადიდა სიბრძნე დო ძალა უღჷ ჩქინ გუმაჭყაფალს (რომ. 11:33–36).

ᲛᲣᲨᲔᲜ ᲣᲨᲕᲔᲜᲡ ᲦᲝᲠᲝᲜᲗ ᲢᲐᲜᲯᲔᲑᲐᲡ?

8. მუჭო იმოქმედ ჩქინდა თიშ გაგებაქ, მუშენ უშვენს ღორონთ ტანჯებას?

⁸ მუშენ უშვენს ღორონთ ტანჯებას? ნამთინე, მიდგას ვა უჩქჷ თე კითხვაშ პასუხ, გურმულირ რე ღორონთშე ვარდა გვალო ფიქრენს, ნამდა ღორონთ შურო ვა არსებენს (იგავ. 19:3). თეშ გინაწონს, ჩქი ქიდიბგურეთ, ნამდა ტანჯებაშ მიზეზ იეჰოვა ვარინ, ადამ დო ევაშე მეღებულ ცოდა დო არასრულყოფილება რე. თინა ხოლო ქიგებგით, ნამდა იეჰოვაშ მოთვინებაშ ჭყოლოფათ, მილიონობით ადამიანს ქიმიაჩ საშვალებაქ, გეჩინებაფუკო ღორონთ დო მუშ თოლით ქოძირუკო, მუჭო მოსპუნს თინა სადღამუშოთ ტანჯებას (2 პეტ. 3:9, 15). თე ირფელიშ რჩქინაქ გურშა ელამკინეს დო დუმაახლოვეს ღორონთწკუმა.

9. განსაკუთრებულო მუჟამ შილებე დემესაჭირან, დეფიფქრათ, მუშენ უშვენს იეჰოვა ტანჯებას?

⁹ მარჩქილენა, ნამდა მოთვინება დემესაჭირებუნა, ონდო უჯინეთ თი დროს, მუჟამსით იეჰოვა მოსპუნს ტანჯებას. მარა, მუჟამსით ჩქი ვარდა ჩქინ საჸოროფო ადამიანეფს მუდგარენ გლახა ქაღოლენა, უსამართლობას ქეშეხვადუნა ვარდა მიდგაინ ხოლოშიან დომღურუნა, შილებე გურქ მომირთან დო იფიფქრათ, მუს უჯინე იეჰოვა თეზმა ხანს (აბაკ. 1:2, 3). თეცალ დროს ჯგირ იჸუაფ, ქიგიფშინათ თი მიზეზეფ, მუდგაშეთ უშვენს იეჰოვა მართალიშ წვალებასa (ფსალმ. 34:19). შემლებუნა დეფიფქრათ იეჰოვაშ განზრახვეფშე ხოლო, ნამდა თინა საბოლათ მოსპუნს ტანჯებას.

10. მუ ოხვარ ენის დიდაშ ღურაშ გინოღალას?

¹⁰ თიშ რჩქინა, მუშენ უშვენს ღორონთ ტანჯებას, მოხვარუნა სირთულეეფიშ გინოღალას. ენი, ნამუთ ინდოეთიშ ოკეანეშ კუნძულს, მაიოტას, ცხოვრენს, იშინანს: „მუსხირენ წანაშ წოხოლე დიაჩქიმიშ ღურაქ გუმანადგურ. მარა ვოცადუქ, ირიათო ქუგვოშინე ჩქიმ დუდის, ნამდა თე ირფელ იეჰოვაშ ბრალ ვა რე. პირიქით, თის ოკო, მოსპას ტანჯება დო გათელას ჩქინ საჸოროფო ადამიანეფ. თეშე დაფიქრება მა ხოლო მიკვენსინ თეშ მამშვიდენს“.

11. იეჰოვა ტანჯებას მუშენ უშვენსინ თეშ რჩქინა მუჭო მოხვარუნა ქადაგება გუვაგრძელათ?

¹¹ ღორონთ ტანჯებას მუშენ უშვენსინ თიშ რჩქინა თის ხოლო მოხვარუნა, ვემვოტუათ ქადაგება. თიშ უკულ, მუთ პეტრექ თქუ, ნამდა იეჰოვაშ მოთვინებაშ ჭყოლოფათ, თინეფ, მით მიკირთუნა, გინოსქიდუნა, თიქ ჭარჷ: „დეფიქრით, მუნერეფ ოკო რდათჷ! წმინდა საქციელ ოკო გუგორდან დო თქვან საქმეეფშე ღორონთიშ ართგურობა ოკო იძირედას“ (2 პეტ. 3:11). თაქ მოშინაფილ „ღორონთიშ ართგურობაშა“ მიშურს ქადაგება ხოლო. ჩქინ ზეციერ მუმაცალო ჩქი ხოლო მთელ გურით მიჸორა ადამიანეფ დო მოკონა, ღორონთიშ სამართლიან ახალ ქიანას იცხოვრან. იეჰოვაშ მოთვინებაშ ჭყოლოფათ, არძას, თინეფ შქას ჩქინ უბანეფს მახორუ ხალხის, ერზიებ საშვალება, ქიდიჭყან თიშ მსახურება. მუშმადიდა პატი მიღუნა, ნამდა შემლებუნა ღორონთიშ თანამშრომელეფ ვორდათ დო თე ქიანაშ ბოლოშახ მუთ შილებენ მეტ ადამიანს გუვოჩინებაფუათ თიშ დუდ (1 კორ. 3:9).

ᲩᲥᲘ ᲤᲪᲮᲝᲕᲠᲔᲜᲗ „ᲑᲝᲚᲝ ᲓᲦᲐᲚᲔᲤᲡ“

12. მუჭო მოქმედენს ჩქინდა თიშ რჩქინა, ნამდა „ბოლო დღალეფს“ ფცხოვრენთ?

¹² ბიბლია კილ-კილშა ეჭარუნს, მუნერეფ იჸუაფუდეს ადამიანეფ „ბოლო დღალეფს“ (2 ტიმ. 3:1–5). ამდღა არგამათ იძირე, მუჭო ისრულებ თე წინასწარმეტყველება. ჩქინ თოლო ვორწყეთ, მუჭო გილმელებუნა ადამიანეფ, მუთ უმოსო მარწმუნენა, ნამდა ღორონთიშ სიტყვა სანდო რე (2 ტიმ. 3:13–15).

13. ლუკაშ 12:15–21-ის ინოჭარილ იესოშ იგავიშ თანახმას, ნამ კითხვეფშე შილებე დეფიფქრათ?

¹³ ბოლო დღალეფს ფცხოვრენთინ თიშ რჩქინა თის ხოლო მოხვარუნა, ნამდა დრო ჭკვერულო გეგმიბრინუათ. მორთ ქობძირათ, მუს ბგურაფლენთ თეშ გურშენ იესოშ იგავშე, ნამუთ ლუკაშ 12:15–21-ის ინოჭარ (წეკითხით). მუშენ რდჷ ქონებიერ კოჩ უჭკუე? თიშ გურშენ ვარ, ნამდა ფარამ რდჷ; თიშენ, ნამდა არასწორ მუდგარენ გეურდჷ ცხოვრებას პირველ ადგილშა. თინა „მუშ დუდშო შაყარანდჷ ქონებას“, მარა „ღორონთიშ თოლს ვა რდჷ ქონებიერ“. მუშენ რდჷ თეცალ მნიშვნელოვან, თე კოჩიქ დრო ჭკვერულო გეგმირინუკო? მუშენდა, მუჭოთ იგავშე იძირე, თის ბრელ ხან ვა აფუდ დოსქილადირ დო მალას დოღურუდ. ამდღა ხოლო ბრელ დრო ვა რე დოსქილადირ თე ქიანაშ ბოლოშახ. ათეშენ, ჩქინ დუდის ოკო ქოპკითხათ: ქიძირენო ჩქიმ მიზნეფშე, ნამდა დროს ჭკვერულო იბრინუანქ? მუ მიზნეფიშ მენჭირნაფას ელუჩანქ ჩქიმ სქუალეფს? დროს, ენერგიას დო ფინანსეფს უმოსო თიშო იბრინუანქო, ნამდა „ჩქიმ დუდშო ფშაყარუე ქონება“ დოვარ ვოცადუქ, „ღორონთიშ თოლს ვორდე ქონებიერ“?

14. მუჭოთ მიკიშ შემთხვევაშე იძირე, მუშენ რე მნიშვნელოვან ფშუდან, ნამდა ბოლო დღალეფს ფცხოვრენთ?

¹⁴ მუჟამსით ბრელს ფიფქრენთ თიშე, ნამდა მართალო ბოლო დღალეფს ფცხოვრენთ, თენა მოხვარუნა უმოს ჭკვერულო გეგნოპჭყვიდათ, მუ შარას გივოდირთათ ცხოვრებას. ზუსტას თაშ მოხვად ართ დაშ, მიკიშ, შემთხვევას ხოლო. თინა იშინანს: „სკოლა გუვათენ, ზოოლოგიაშ გურაფა დო თე განხრათ კარიერაშ ენწყუალა მოკოდ. თეწკუმა ართო, მიზანო მიღუდ პიონერო მსახურება დო თიცალ ადგილშა გინულა, სოდეთ საჭიროება იჸიდ. სულიერო მოწიფულ მეგობრეფქ ელამჩეს, ჯგირო დეფიფქრიკო, მუსხით გეგშმალედ ქოთ გურაფაშ თხოზინ დო ქოთ სულიერ მიზნეფიშ მენჭირნაფა. თინეფქ გუმოშინეს, ნამდა ბოლო დღალეფს ფცხოვრენთ დო თე ქვეყნიერება მალას ვეჸუაფ. ახალ ქვეყნიერებას შემალებე მუზმა მახიოლენ თიზმა დევეკვირე ცხოველეფს დო იბგურუე. ათეშენ, გინოᲞჭყვიდ, ჭიჭე კურსეფ გემკობრთიკო დო პროფესია ქიდიბგურეკო, მუდგაქ მიმეხვარ, თიცალ სამუშა ქიდიპჭყიკო, ნამუთ პიონერობას ვემეცილებუდ. უკულ გინიბლჷ ეკვადორშა, სოდეთ მანგარ საჭიროება რე“. მიკი დო მუშ ქომონჯ ამდღა რაიონულ მსახურებას რენა თე ქიანას.

15. მუჭო მოძირანა იაკობიშ შემთხვევა, ნამდა გურ ოკო ვეიპჸოთათ თინეფშა ქადაგებაშა, მით ამდღა ვამრჩქილენა? (ქოძირით სურათეფ).

¹⁵ გურქ ოკო ვა გომტირხან თიშ გურშენ, ნამდა ხალხ ხეთეშე ვა ღებულენს სახიოლო ამბეს. ვაგმოჭყორდან, ნამდა ადამიანეფ ითირუნა. ქიგიფშინათ იესოშ ჸონერ ჯიმა, იაკობ. თინა იესოწკუმა ართო ირდუდ, ორწყედ, მუჭო ისრულებუდ იესოშა მესიაწკუმა დაკავშირებულ წინასწარმეტყველებეფ, ორწყედ თიშ კეთებულ სასწაულეფს დო ირჩქილუაფუდ თიშ დიდებულ გურაფას. მარა წანეფიშ დინახალე თინა ვეგნორთე იესოშ მიმაჸუნალო. იაკობიქ ჭეშმარიტებაშ შარას იესოშ გათელებაშ უკულ გიოდირთჷ დო თიშ დუდგინოდვალირ მოწაფეთ გინირთჷb (იოან. 7:5; გალ. 2:9). ათეშენ, მუთუნით ვეფიქრათ, ნამდა აზრ ვა უღჷ თი ნათესეეფშა ქადაგებას, მით ამდღა ვერჩქილუანა სახიოლო ამბეს. ვართ თინეფშა ქადაგებაშა ეიოლან გურქ, მიდგაქ თეიშახ ვა მოირჩქილუეს. რშუდან, ნამდა „ბოლო დღალეფს“ ფცხოვრენთ, ათეშენ ქადაგება გინადვალარ ვა რე. ჩქი ვა მიჩქუნა, მუჟამ გაშინე თე ხალხის ჩქინ ნარაგად დო მუჭო იმოქმედენს თინეფიშ გურშა. შილებე თექ „დიდ გაჭირებაშ“ დოჭყაფაშ უკულ ხოლო ქუმოხვადას.c

ᲓᲐᲤᲐᲡᲘᲗ ᲛᲗᲐᲕᲐᲠ ᲑᲘᲑᲚᲘᲣᲠ ᲒᲣᲠᲐᲤᲔᲤ

16. მუშენ რე ჩქინო ჯგირ მთავარ ბიბლიურ გურაფეფიშ გოშინა? (ქოძირით ჩარჩო „გეგმირინეთ შხვეფიშ მახვარებელო“).

¹⁶ ბრელ მუთუნ თი სულიერ საზრდოშე, ნამდგას ბღებულენთ, თიცალ ხალხშო რე მომზადებულ, მიდგას ვა უჩქჷ ჭეშმარიტება. მაგალთო, საჯარო მოხსენებეფ, ნამდგას ირ მარას იბრჩქილუაფუთ, ნამთინე სტატია დო ვიდეო, ნამუთ გეძჷ ვებსაიტის jw.org, დო ოვრცელებერ ჟურნალეფ უმენტაშო თინეფშო რე, მით ვა რენა იეჰოვაშ მოწმეეფ. მარა თექ გარჩიებულ მთავარ ბიბლიურ გურაფეფიშ გოშინა ჩქინო ხოლო მანგარ ჯგირ რე, მუშენდა თენა მიმანგარენა რწმენას ღორონთიშ სიტყვაშ მიმართ, უმოსო მიჸოროფუანა იეჰოვას დო მოხვარუნა, უჯგუშო ქუდვოგურუათ მთავარ ბიბლიურ გურაფეფ შხვეფს (ფსალმ. 19:7).

17. ნამ სიტუაციეფს შეილებუნა დეფიქრათ მთავარ ბიბლიურ გურაფეფშე?

¹⁷ იეჰოვაშ ბრელ ხანიშ მსახურეფს მანგარო მოხიოლუნა, მუჟამსით ბიბლიურ ჭეშმარიტებას უჯგუშო ინვანჭუთ დო მუდგარენ საკითხიშ ახალ გაგებას ბღებულენთ. მარა, თეწკუმა ართო, მანგარო ვაფასენთ თი მთავარ ბიბლიურ გურაფეფს ხოლო, ნამდგაქ გვალო დუდშე ჭეშმარიტება გუმოგებაფუეს. თაშ ნამდა, დღას ღორონთიშ ორგანიზაციაშე მეღებულ მითითებეფიშ მეჸუნაქ გამჭირდეს დო ჩქინ აზრ უმოს უჯგუშ რენ თენა ქიფიფქრით-და, მორთ თანდაბლობა გეგმიბრჩქინათ დო ქუგვოშინათ ჩქინ დუდის, მი ხელმძღვანელენს თე ორგანიზაციას – ირფელიშშემალებე, არძაშ უმოს ბრძენ დო ცა დო დიხაშ გუმაჭყაფალ ღორონთ, იეჰოვა. მუჟამსით ჩქი ვარდა ჩქინ საჸოროფო ადამიანეფ სირთულეეფს ქეშეხვადუნა, მოთვინება გეგმიბრჩქინათ დო დეფიფქრათ, მუშენ უშვენს იეჰოვა ტანჯებას. დო ბოლოს, მუჟამსით გინოპჭყვიდუნთ, მუს დაუთმათ ჩქინ დრო, ენერგია დო ფინანსეფ, მოკონა ფშუდან, ნამდა ბოლო დღალეფს ფცხოვრენთ დო ბრელ დრო ვა რე დოსქილადირ თე ქიანაშ განადგურებაშახ. იეჰოვაშ შეხსენებეფ გუმამანგარენა, უმოსიშ კეთებაშ სურვილს გომრჩქინანა დო ქიმმეხვარებუნა, ჭკვერულ გადაწყვეტილებეფ მიბღათ.