იესოცალო მონდომათ იქადაგით

1. მუთ გიშეგორუნა იეჰოვაშ მსახურეფ შხვეფშე?

ᲘᲔᲰᲝᲕᲐᲨ მსახურეფ მონდომას ვარკენა სახიოლო ამბეშ შხვეფშა ქადაგებას დო შურ დო გურით ორთუნა თე საქმეს, მუდგათ გიშეგორუნა თინეფშე, მიდგას დუდ ქრისტიანეფო მოუღუნა (ტიტ. 2:14). მარა კანკალეშა შილებე ჩქინ დუდის ქავოხვილუათ, ნამდა იშენდოიშენ გურ ვემმალენა მსახურებაშა დო შილებე ართ უხუცესცალო ბგინაფლენდათ დუდის, ნამუთ იჩიებ: „მინშა ვა მოკო ოქადაგებშა ულა“.

2. მუშენ რე მინშა ძნელ, მსახურებას მონდომაქ ვამდინან?

² შილებე ქადაგებაშ უმოსო იეჰოვაშ მსახურებაშ შხვა ფორმეფს მონაწილებაშ მეღება მოხიოლუდან. მუშენ შილებე თექ მოხვადას? მუშენდა თიცალ საქმეეფს მონაწილებაშ დროს, მუნერით რე, თეოკრატიულ შენობეფიშ შენება დო მიკოლუაფა, სტიქიურ უბედრობეფით დაზარალებურეფიშ მოხვარა დო და დო ჯიმალეფშა გურიშ ელაკინა, უმოს მალას ვორწყეთ ჩქინ ნახანდიშ შედეგის დო გურ ხოლო კმაყოფილ მაფუნა. თეცალ სიტუაციეფს მოსიამოვნუნა თი მშვიდ გარემო ხოლო, ნამუთ თანაქრისტიანეფ შქას რე, დო ჸოროფა, ნამდგას თინეფშე ბგინაფლენთ. თეს თინა ხოლო გიაძინუ, ნამდა, მიჩქუნა, ჩქინ და დო ჯიმალეფ მარდულეფ რენა თი ირფელშო, მუდგას თინეფშო ვორთუთ. მარა ქადაგებაშ დროს ჭიჭე შხვანერო რე საქმე. შილებე წანეფ რე, ფქადაგენთ ართ დო იგივე ტერიტორიას, მარა ექი-აქო მირჩქილენა. ნამთინე, რჩქილა ვარ, გვალო ჸინჩ პასუხით მიკომსურენა. თეწკუმა ართო, თე კუნთხუთ მუთუნ გეუჯგუშებუნ თიშ ქიანაშ იმენდ ხოლო ვა მიღუნა, მუშენდა მუთ უმოს ხოლოს მეურთ თე ქიანაშ მოსპუალაშა, მიჩქუნა, ნამდა თით უმოს ნაკლებო მოწონდას იჸი ხალხის თი ცნობა, ნამდგას ვაცხადენთ (მათ. 10:22). მუ მიმეხვარებუნა, თე ირფელიშ უმკუჯინუო, მონდომა ვა ვოდინუათ დო თეშ მანგიორო, ხოლო უმოს ხიოლით გუვაგრძელათ მსახურება?

3. მუს ბგურაფლენთ იესოშ გურშენ ლუკაშ 13:6–9-ს მოჸუნაფილ იგავშე?

³ იესოშ მაგალითშე დაფიქრება ქიმმეხვარებუნა, უმოს მონდომათ იფქადაგათ. დედამიწას მსახურებაშ დროს თის ართ წუთით ხოლო ვა დინაფ მონდომა ქადაგებას. თეშ მანგიორო, მუთ დრო მიშუნ, უმოსო დო უმოსო უძინანდჷ მსახურებას (წეკითხით ლუკაშ 13:6–9). მუჭოთ იესოშ იგავს მოჸუნაფილ მებინეხე სუმ წანას უჯინედ, მუჟამ მიკიღანდ ლუღიშ ჯა, თეშ იესო ხოლო, სუმ წანას უქადაგუდ იუდეველეფს, მიდგაშ უმენტაშიქ ვემირჩქილუ სახიოლო ამბე. მარა, მუჭოთ მებინეხექ ვემიოდინუ თიშ იმენდ, ნამდა ლუღიშ ჯა გემკიღანდ, დო ვეგიოკვათ თინა, თეშ იესოს ხოლო ვემუტებ თინეფწკუმა ქადაგება; მეტება ვარ, ხოლო უმოსო ოცადუდ, იუდეველეფიშ გურშა მუდგათიჸინ ქიმიღუკო სახიოლო ამბე.

4. ნამ ოთხ მხარეს გუვარჩიენთ, სოდეთ იესოქ ჯგირ მაგალით მუჩეს?

⁴ თე სტატიას გუვარჩიენთ, მუჭო გიმირჩქინანდჷ იესო მსახურებას მონდომას, განსაკუთრებულო, ბოლო ამშვ თუთას. იესოშე ქიდიბგურუანთ დო თიშ მაგალითის ქიმვაჸუნუთ-და, ჩქი ხოლო შემალებენა ხიოლით გუვაგრძელათ მსახურება. მორთ ასე გუვარჩუათ ოთხ მხარე, მუდგას იესოქ ჯგირ მაგალით მუჩეს: 1) თის მთელ ყურადღება იეჰოვაშ ნებაშ შესრულებაშა აფუდ გინოღალირ, 2) ოკვირუდ, მუჭო ისრულებუდ ბიბლიურ წინასწარმეტყველებეფ, 3) უღუდ იეჰოვაშ მოხვარაშ იმენდ დო 4) ვადინუანდჷ იმენდის, ნამდა ხალხ ქიმირჩქილუანდ თიშ ქადაგებას.

ᲘᲔᲡᲝᲡ ᲧᲣᲠᲐᲓᲦᲔᲑᲐ ᲘᲔᲰᲝᲕᲐᲨ ᲜᲔᲑᲐᲨ ᲨᲔᲡᲠᲣᲚᲔᲑᲐᲨᲐ ᲐᲤᲣᲓ ᲒᲘᲜᲝᲦᲐᲚᲘᲠ

5. მუჭო ოძირუ იესოქ, ნამდა მთელ ყურადღება ღორონთიშ ნებაშ შესრულებაშა აფუდ გინოღალირ?

⁵ იესო მთელ მონდომათ ქადაგენდჷ სახიოლო ამბეს ღორონთიშ სამეფოშ გურშენ, მუშენდა უჩქუდ, ნამდა ღორონთის ზუსტას თეშო აფუდ მოშქუმალირ (ლუკ. 4:43). თის სახიოლო ამბეშ ქადაგება მუშ ცხოვრებას პირველ ადგილშა გეურდჷ. იესო მუშ მსახურებაშ ბოლო თუთეფს ხოლო გილეშ „სოფელეფს დო ქალაქეფს . . . დო ხალხის ოგურუანდჷ“ (ლუკ. 13:22). თინა ოცადუდ, უმოს მოწაფეს ქუდაგურუკო ქადაგება, ნამდა თინეფქ ხოლო მიღესკო მონაწილება თე საქმეს (ლუკ. 10:1).

6. მუჭო რე დაკავშირებულ შხვადოშხვა თეოკრატიულ საქმე სახიოლო ამბეშ ქადაგებაწკუმა? (ქოძირით სურათ).

⁶ ამდღა ხოლო, სახიოლო ამბეშ ქადაგება რე მთავარ საქმე, მუთ იეჰოვას დო იესოს ჩქინდა აფუნა დავალებურ (მათ. 24:14; 28:19, 20). არძა თეოკრატიულ დანიშნულება პირდაპირ რე დაკავშირებულ სახიოლო ამბეშ ქადაგებაწკუმა. მაგალთო, თეოკრატიულ შენობეფს ქუვაშენენთ ვარდა ბეთელს ქობმსახურენთ-და, თეშნერო ხუჯის უკინენთ სახიოლო ამბეშ გავრცელებას. დაზარალებურ და დო ჯიმალეფს ვოხვარუთინ თიმწკუმა ხოლო, თინეფშა ხვალე აუცილებერ მუდგარენეფ ვემემიღნან, ვოხვარუთ, ვა მაჩირთან სულიერ განრიგის, მუდგაშა ქადაგება ხოლო მიშურს. მუჟამსით მარჩქილენა, მუსხით მნიშვნელოვან რე სახიოლო ამბეშ ქადაგება დო ფშუნა, ნამდა თენა რე მთავარ საქმე, ნამუთ იეჰოვას აფჷ ჩქინდა დავალებურ, უმოსო ვოცადუთ, ირიათო მიბღათ მონაწილება მსახურებას. უნგრეთის მახორუ ართ უხუცეს, იანოშ, იჩიებ: „ჩქიმ დუდის ირიათო გუვოშინანქ, ნამდა შხვა ნამთინ თეოკრატიულ საქმეს ვათირე სახიოლო ამბეშ ქადაგება დო ჩქინ მთავარ დანიშნულება თენა რე“.

7. მუშენ ოკო იეჰოვას, გუვაგრძელათ ქადაგება? (1 ტიმ. 2:3, 4).

⁷ ადამიანეფს იეჰოვაშ თოლით ქუჯინეთ-და, თენა მსახურებას უმოს მონდომას ქომუჩანა; თის ოკო, მუთ შილებე მეტიქ გეგას ჭეშმარიტება დო მიღას თინა (წეკითხით 1 ტიმოთეშ 2:3, 4). ათეშენ რე, ნამდა იეჰოვა მოხვარუნა, უჯგუშო გეგნოფჩათ ხალხის თი ცნობა, ნამდგას თინეფიშ რსხება შეულებ. მაგალთო, ბროშურა „გიჸორდას ადამიანეფ – მამზად მოწაფეეფ“ მარზენა პრაქტიკულ რჩევეფს, მუჭო წიმიპჭყათ ჩიება ადამიანეფწკუმა დო დიპჭყათ ბიბლიაშ გურაფა, ნამდა თინეფქ ხოლო გინირთან ქრისტეშ მოწაფეეფო. თინეფქ იეჰოვაშ მსახურება ამდღა ვედიჭყანინ ხოლო, შილებე თეშ საშვალებაქ „დიდ გაჭირებაშ“ დროს ქიმიაჩან. შილებე ხალხის ამდღა მუდგას ურაგადუთინ თიქ, ზუსტას თიმწკუმა ქუგაშინან. მარა მუქ ოკო გაშინან თინეფს, ამდღა ვა უქადაგით-და?!

ᲘᲔᲡᲝ ᲝᲙᲕᲘᲠᲣᲓ ᲬᲘᲜᲐᲡᲬᲐᲠᲛᲔᲢᲧᲕᲔᲚᲔᲑᲔᲤᲘᲨ ᲨᲔᲡᲠᲣᲚᲔᲑᲐᲡ

8. მუჭო ოხვარუდ იესოს წინასწარმეტყველებეფიშ რჩქინა, ჭკვერულო გეგმირინუკო დრო?

⁸ იესოს უჩქუდ, მუჭო შისრულებუდ თიწკუმა დაკავშირებულ წინასწარმეტყველებეფ, მაგალთო, უჩქუდ, ნამდა მუშ მსახურება სუმ წანა დო გვერდის გეგრძელებუდ (დან. 9:26, 27). თინა ხოლო უჩქუდ, მუჟამ დო მუნერ ღურათ ღურუდ (ლუკ. 18:31–34). რახანს თე ირფელ უჩქუდ, ირფელს ორთუდ, ნამდა ჭკვერულო გეგმირინუკო დრო – გურგედვალირო მსახურენდჷ, ნამდა ქაჭიშუკო თი დავალებაშ შესრულებაქ, მუდგაშ გურშენ მოშქუმალირ რდჷ.

9. მუჭო მოხვარუნა ბიბლიურ წინასწარმეტყველებეფიშ რჩქინა, იფქადაგათ მონდომათ?

⁹ თი წინასწარმეტყველებეფშე ფიქრ, მუთ ჩქინ დროს ისრულებ დო მუთ მალას შისრულებ, მიმეხვარებუნა, უმოს მონდომათ უქადაგათ ხალხის სახიოლო ამბე. ჩქი ჯგირო მიჩქუნა, ნამდა თე ქვეყნიერებაშ მოსპუალაშახ გვალო აკაბცხა რე დოსქილადირ, მუშენდა ირფელ ზუსტას თეშ მეურს, მუჭოთ ბიბლიას რე ნაწინასწარმეტყველებ ბოლო დღალეფიშ გურშენ. ჩქინ თოლო ვორწყეთ, მუჭო ისრულებ თი მოვლენეფ, ნამუთ ბიბლიას ჭარჷ, დო ადამიანეფ ხოლო ზუსტას თიცალეფ რენა, მუნერეფით თექ რენა ეჭარილ. ვორწყეთ, მუჭო ობრძოლ ართიანს ჟირ ძალა – ინგლის-ამერიკაშ მსოფლიო იმპერია დო რუსეთ დო თიშ მოკავშირეეფ. თეთ ისრულებ ბოლო დღალეფწკუმა დაკავშირებულ დანიელიშ წიგნის ინოჭარილ წინასწარმეტყველება სამხრეთიშ დო ჩრდილოეთიშ მეფეეფშენ (დან. 11:40). თინა ხოლო მიჩქუნა, ნამდა ინგლის-ამერიკაშ მსოფლიო იმპერია რე დანიელიშ 2:43–45-ის ეჭარილ ქანდაკებაშ ნარჩაკუჩხეფ. თე წინასწარმეტყველებაშ გიმორკვიება მარწმუნენა, ნამდა მალას, გვალო მალას, იეჰოვაშ სამეფო მოსპუნს არძა ადამიანურ მმართველობას. ბიბლიას ინოჭარილ თე წინასწარმეტყველებეფ ოძირანს, ნამდა მუთუნ ვემეძ თე ქვეყნიერებაშ განადგურებაშახ დო ქადაგებაშ საქმე მუთუნით ვა რე გინადვალარ!

10. ხოლო მუჭო შილებე ბიბლიურ წინასწარმეტყველებეფქ მიმეხვარან, მონდომათ გუვაგრძელათ მსახურება?

¹⁰ ბიბლიურ წინასწარმეტყველებეფ თიცალ ჯგირ ამბეეფს ხოლო მოგებაფუანა, ნამდგაშ შხვეფშა გინოჩამაშა შურ მოლუნა. ართ და, კერი, ნამუთ დომინიკელეფიშ რესპუბლიკას ცხოვრენს, იჩიებ: „იეჰოვა თიცალ ჯგირ მომავალს მოპირუნა, ნამდა ვეშემლებ შხვეფს ხოლო ვევეჩუე თეშ გურშენ. მუჟამსით ვორწყექ, მუ დღას რე ხალხ, ფხვადუქ, მუჭო ოსაჭირ თინეფს მომავალიშ იმენდ, ნამუთ მა მიღჷ“. ბიბლიურ წინასწარმეტყველებეფშე თის ხოლო ვორწყეთ, ნამდა იეჰოვა მოხვარუნა ქადაგებაშ საქმეს დო თეშ რჩქინა ხოლო აღბძრენა, მონდომათ გუვაგრძელათ ქადაგება. უნგრეთის მახორუ ართ და, ლეილა, იჩიებ: „ესაიაშ 11:6–9-ს ინოჭარილ სიტყვეფ მოხვარ, თინეფს ხოლო ქუქადაგე სახიოლო ამბე, მიდგაშეთ ართ მეჯინათ ვეფიქრენქ, ნამდა შილებე ქიმირჩქილუას. ბჯერსჷ, იეჰოვაშ მოხვარათ, ირნერ კოჩის შეულებ დითირას“. ჯიმა კრისტოფერ, ნამუთ ზამბიაშე რე, იჩიებ: „მუჭოთ მარკოზიშ 13:10-ის ჭარჷ, სახიოლო ამბექ არძას ოკო ექადაგას. ჩქიმო დიდ პატი რე, ნამდა თე წინასწარმეტყველებაშ შესრულებას მა ხოლო ბღებულენქ მონაწილებას“. თქვა ნამ წინასწარმეტყველება გოხვარუნა, მონდომათ გაგრძელათ მსახურება?

ᲘᲔᲡᲝᲡ ᲘᲔᲰᲝᲕᲐᲨ ᲛᲝᲮᲕᲐᲠᲐᲨ ᲘᲛᲔᲜᲓ ᲣᲦᲣᲓ

11. მუშენ ოსაჭირუდ იესოს იეჰოვაშა მენდება, ნამდა გურგედვალირო ქადაგებაქ შეიალებუკო? (ლუკ. 12:49, 53).

¹¹ იესო ონდუდ იეჰოვას, მუთ ოხვარუდ, გაგრძელუკო გურგედვალირო ქადაგება. მართალ რე, თინა ტაქტიანო გინოჩანდჷ სახიოლო ამბეს ადამიანეფს, მარა უჩქუდ, ნამდა ნამთინეს გაღიზიანენდ თე ცნობაშ მორჩქილაფა დო მოწინააღმდეგეეფ ხოლო გემკორჩქინდუდ (წეკითხით ლუკაშ 12:49, 53). ქოთ თაშ რდჷ; მაგალთო, რელიგიურ წინამძღოლეფ ირიათო ოცადუდეს, დოჸვილესკო იესო თი ცნობაშ გურშენ, ნამდგას თინა ქადაგენდჷ (იოან. 8:59; 10:31, 39). მარა, იესოს ვემუტებ ქადაგება, მუშენდა უჩქუდ, ნამდა იეჰოვა ელურდჷ. თიქ თქუ: „ხვალე ვა ვორექ, მუშენდა ჩქიმწკუმა რე მუმა, ნამდგაქ მუმაშქვჷ . . . ხვალე ვა დუტებუქ, მუშენდა ირო თის ვორთუქ, მუთ თიშ გურს ოჰამ“ (იოან. 8:16, 29).

12. მუჭო მამზად იესოქ მოწაფეეფ, ნამდა წინააღმდეგობეფიშ დროს ხოლო ვემიოტუესკო ქადაგება?

¹² იესო გაშინანდჷ მოწაფეეფს, ნამდა შეულებუდეს იეჰოვაშ მოხვარაშ იმენდ უღუდესკო. თინა ირიათო ურაგადუდ თინეფს, ნამდა იეჰოვა ქელუდირთუდ თხოზინიშ დროს (მათ. 10:18–20; ლუკ. 12:11, 12). მარა თინა ხოლო დაგურუ, ნამდა ფრთხილას ჸოფედესკო (მათ. 10:16; ლუკ. 10:3). იესოქ მოწაფეეფს უწუ, ვაკოდუნ თის ვა დანძალესკო სახიოლო ამბეშ მორჩქილაფა დო სოდგაინ გამათხოზუდეს-და, შხვადო მიდურთუმუდესკო (ლუკ. 10:10, 11; მათ. 10:23). მართალ რე, იესო მთელ მონდომათ ქადაგენდჷ დო იეჰოვას ბოლოშა ონდუდ, მარა საჭირო ვა რდუნ თექ, საფრთხეშა ვენიჸოთანდჷ დუდის (იოან. 11:53, 54).

13. მუშენ შეილებუნა რჯერდან, ნამდა იეჰოვა ქიმგეხვარებუნა?

¹³ ჩქი ხოლო ამდღა იეჰოვაშ მოხვარა მოსაჭირუნა, ნამდა წინააღმდეგობეფიშ დროს ხოლო გურგედვალირო გუვაგრძელათ ქადაგება (გამოცხ. 12:17). მუშენ შემლებუნა ბჯერდან, ნამდა იეჰოვა ჩქინწკუმა იჸუაფ? დეფიქრით იესოშ ლოცვაშე, ნამუთ იოანეშ მა-17 დუდის ინოჭარ. თიქ მუშ მოციქულეფ იეჰოვას ჩაბარ დო თხუ, დოუთხილუდუკო თინეფ. იეჰოვაქ ქუპასუხ იესოშ ოთხუალს, მუშენდა ბიბლიაშ წიგნ „საქმეეფშე“ ირწყებე, ნამდა თიქ ქიმეხვარ მოციქულეფს, თხოზინიშ უმკუჯინუო, მთელ მონდომათ იქადაგესკო სახიოლო ამბე. იესოქ იეჰოვას თინეფიშ თხილუა ხოლო თხუ, მით ქიმირჩქილუანდ მოციქულეფიშ ქადაგებას. თე მარჩქილეეფშა თქვა ხოლო მიშურთ. იეჰოვა ამდღარშახ პასუხენს იესოშ ლოცვას, ათეშენ თინა ქიმგეხვარებუნა, ზუსტას თეშ, მუჭოთ მოციქულეფს მეხვარ მუშ დროს (იოან. 17:11, 15, 20).

14. მუშენ შემლებუნა ბჯერდან, ნამდა რთულ დროს ხოლო შემალებენა მონდომათ ქადაგება? (ქოძირით სურათ).

¹⁴ მუთ უმოს ხოლოს ვორეთ თე ქვეყნიერებაშ აღსასრულწკუმა, თით უმოსო შილებე გამჭირდან სახიოლო ამბეშ მონდომათ ქადაგებაქ, მარა იესოქ დუმარწმუნეს, ნამდა მოხვარაშ უმშო ვა ვორეთ (ლუკ. 21:12–15). ქრისტე დო თიშ მოწაფეეფცალო, ჩქი ხოლო ვა ვანძალენთ ხალხის სახიოლო ამბეშ მორჩქილაფას დო ვართ ვონირზუთ თინეფს. ნამთინე ქიანას ჩქინ საქმიანობა აკრძალულ რე, მარა ჩქინ და დო ჯიმალეფ იშენით აგრძელენა სახიოლო ამბეშ ქადაგებას, მუშენდა იეჰოვაშა რენა მენდებულ დო ვართ ხოლო მუნეფიშ დუდშა. მუჭოთ პირველ საუკუნეს არზენდჷ იეჰოვა მუშ მსახურეფს ძალას, თეშ ამდღა ჩქი ხოლო მარზენა საჭირო ძალას, ნამდა ბოლოშა ქიმიპჸუნათ ქადაგებაშ საქმე, ონდო მუ ვა თქუანს, ნამდა დასაბაღ რე (2 ტიმ. 4:17). რჯერდან, იეჰოვაშ მოხვარაშ იმენდ ქუგაღვენუნან-და, შეგალებენა გაგრძელათ მონდომათ ქადაგება.

ᲘᲔᲡᲝᲡ ᲕᲐ ᲣᲓᲘᲜᲣᲐᲤ ᲘᲛᲔᲜᲓ, ᲜᲐᲛᲓᲐ ᲮᲐᲚᲮ ᲥᲘᲛᲘᲠᲩᲥᲘᲚᲣᲐᲜᲓ ᲡᲐᲮᲘᲝᲚᲝ ᲐᲛᲑᲔᲡ

15. სოვრეშე იძირე, ნამდა იესოს ვა უდინუაფ დადებით განწყობა?

¹⁵ იესო დარწმუნებულ რდჷ, ნამდა აუცილებერო იჸუაფუდეს თიცალეფ, მით ქიმირჩქილუანდეს სახიოლო ამბეს, დო ზუსტას თე დადებით განწყობა ოხვარუდ, ხიოლით გაგრძელუკო ქადაგება. მაგალთო, ახ. წ. 30 წანაშ ბოლოს იესო ორწყედ, ნამდა ბრელ ირჩქილუაფუდ სახიოლო ამბეს დო თე ხალხ ეიოჭოფალო მომზადებულ ჸვანას შეადარ (იოან. 4:35). სოდგარენ ართ წანაშ უკულ თიქ მუშ მოწაფეეფს უწუ: „მოსავალ ბრელ რე“ (მათ. 9:37, 38). ჭიჭე ხანშა კინ გუმეორ თე სიტყვეფ დო თეცალ მუდგარენ უწუ: „მოსავალ ბრელ რე . . . ეხვეწით მოსავალიშ მინჯეს, უმოს ემაჭოფალ ქუმაშქვას“ (ლუკ. 10:2). იესოს დღას ვა უდინუაფ თიშ იმენდ, ნამდა ადამიანეფ მიღენდეს სახიოლო ამბეს დო მანგარო ოხიოლუდ, მუჟამსით თაშ ხვადუდ (ლუკ. 10:21).

16. მუჭო მოხვარუნა იესოშ მოჸუნაფილ მაგალითეფ, ვა ვოდინუათ დადებით განწყობა? (ლუკ. 13:18–21; ქოძირით სურათ).

¹⁶ იესოქ მუშ მოწაფეეფს ხოლო დაგურუ, ნამდა უღუდესკო დადებით განწყობა, მუთ მეხვარებუდ თინეფს, ვადინუესკო ხიოლ მსახურებას. გუვარჩუათ ჟირ მაგალით, ნამუთ თიქ მუშ მოწაფეეფს მოუჸუნ (წეკითხით ლუკაშ 13:18–21). პირველ მაგალითის თიქ ღორონთიშ სამეფო შეადარ დონგიშ ჭიჭე თასის, ნამდგაქ ქიანაშმადიდა ჯათ გინირთჷ. თე მაგალითით თიქ მუშ მოწაფეეფს ოძირუ, ნამდა ბრელ მიღენდჷ სახიოლო ამბეს დო მუთუნს ვა გაჩერებედ თე საქმე. მაჟია მაგალით ცომიშ ეიოჸუნაფალიშ გურშენ რდჷ. თე მაგალითით იესოქ მოწაფეეფს ოძირუ, ნამდა სამეფოშ ცნობა მთელ მსოფლიოს იჸუაფუდ ქადაგებულ დო თინა ბრელ ადამიანიშ ცხოვრებას დოთირანდ, მარა თენა ართუცფას ვეძირედუკონ იჸიდ. თეშნერო, იესოქ მუშ მოწაფეეფ დარწმუნ, ნამდა ტყურელო ვა ხანდენდეს, დო ცნობა, ნამდგას ქადაგენდეს, ბრელ ადამიანს მეხვარებუდ.

17. მუ მიზეზეფიშ გურშენ ვა ვოდინუანთ დადებით განწყობას მსახურებას?

¹⁷ მუჟამსით დეფიფქრებუთ, მუჭო ოხვარ ჩქინ ქადაგება მთელ მსოფლიოს ადამიანეფს, უმოს ხიოლით დო მონდომათ იბმსახურენთ. მაგალთო, ირ წანას მილიონობით ადამიან ოსწრჷ ჩქინწკუმა ართო ქრისტეშ ღურაშ გოშინაშ ონჯუას დო გურაფლენს ბიბლიას. ოშანთასობით პიროვნება ინათუ დო ჩქინწკუმა ართო იჭყანა ღორონთიშ მსახურებას. ჩქი ვა მიჩქუნა, ხოლო მუზმა ადამიან მიღენს სახიოლო ამბეს, მარა თინა ზუსტას მიჩქუნა, ნამდა იეჰოვა შაყარანს ანაყუ ხალხის, მით გინასქიდუ დიდ გაჭირებას (გამოცხ. 7:9, 14). მოსავალიშ მინჯე, იეჰოვა, დარწმუნებულ რე, ნამდა დიო ხოლო ბრელ რე თიცალ, მით დიჭყანს თიშ მსახურებას, ათეშენ ჩქი ხოლო ვეიპჸოთანთ გურს თე საქმეშა დო ხიოლით ვაგრძელენთ მსახურებას.

18. მუ მოკონა, შხვეფქ ჩქინდე იფიქრან?

¹⁸ იესოშ მიმაჸუნალეფ ირიათო ხიოლით ქადაგენდეს სახიოლო ამბეს შხვეფწკუმა. მაგალთო, ართშა, მუჟამსით ხალხიქ ქოძირ იესოშ მოციქულეფიშ გაბედულო ქადაგება, „ქუგაშინეს, ნამდა თინეფ იესოწკუმა ართო რდესჷ“ (საქ. 4:13). მოკონა, გაბედულო დო მონდომათ იფქადაგათ, მუშენდა, ჩქინ ქადაგებაშ მიმაჯინუქ, ადამიანეფქ ჩქინდე ხოლო იფიქრან, ნამდა იესოშ მაგალითის მეპჸუნთ.