ქიდიგურეთ იეჰოვა დო იესოცალო აზროვნება

1, 2. მუს ნიშნენს, მიჸორდან იეჰოვა დო მუჭო მოძირუეს იესოქ, ნამდა იეჰოვა მთელ გონებათ უჸორდჷ?

„ᲒᲘᲸᲝᲠᲓᲐᲡ იეჰოვა, სქან ღორონთ, მთელ გურით, მთელ შურით, მთელ გონებათ დო მთელ ძალათ“ (მარ. 12:30). იესოქ თქუ, ნამდა თენა რდჷ არძაშ უმოს მნიშვნელოვან მითითება მოსეშ კანონს. მუჭოთ ვორწყეთ, იეჰოვა ოკო მიჸორდან „მთელ გურით“, მუდგაშა მიშურს ჩქინ სურვილეფ, გრძნობეფ დო ემოციეფ. იეჰოვა მთელ „შურით“ დო „ძალათ“ ხოლო ოკო მიჸორდან, მუდგაშა ჩქინ ენერგია მიშურს. მარა ქიდეკვირით, ნამდა იეჰოვა „მთელ გონებათ“ ხოლო ოკო მიჸორდან, მუდგაშა მიშურს ჩქინ აზროვნება. იეჰოვაშ ჸოროფა აღბძრენა, გეგნიბღათ თიშ აზროვნება. მართალ რე, დღას ვეშმალებენა ბოლოშა ქინვანჭათ ღორონთიშ გონებას, მარა ქრისტე მუჭო აზროვნენდუნ თის ქიდვეკვირებუთ-და, თენა ქიმმეხვარებუნა, ჭიჭეთ უჯგუშო ვარა გეგშამირთან თექ, მუშენდა იესო ქრისტეს სრულყოფილო აფუდ გინოღალირ მუამუშიშ აზროვნება (1 კორ. 2:16).

² იესოს მთელ გონებათ უჸორდჷ იეჰოვა; თის უჩქუდ, მუ აფუდ მუამუშის თიშა დავალებურ, დო მზათ რდჷ, ბოლოშა ქიმიჸუნუკო თე საქმე, თიშ უმკუჯინუო, ნამდა თეშო ოტანჯებელ აჸიდ. თის პირველ ადგილშა მუმაშ ნებაშ შესრულება გეურდჷ დო მუთუნს ვარზენდჷ უფლებას, ყურადღება თე მიზანშე შხვა მუდგარენშა გეგნაღალაფუკო.

3. მუშ ძირაფაშ საშვალება უღუდ პეტრეს დო მუ ელუჩ თიქ ქრისტიანეფს? (1 პეტ. 4:1).

³ პეტრეს დო შხვა მოციქულეფს მიაჩეს პატიქ, ურთიერთობა უღუდესკო იესოწკუმა დო ქოძირესკო, მუნერ აზროვნება უღუდ თის. ათეშენ, მუშ პირველ წერილს თე მოციქულქ თანაქრისტიანეფს ელუჩ, უღუდესკო ქრისტეცალ აზროვნება (წეკითხით 1 პეტრეშ 4:1). ორიგინალ ტექსტის თე მუხლის პეტრექ გიმირინუ სამხედრო ტერმინ, ნამუთ ეჭარუნს ჯარიშკოჩის, ნამდგას იარაღ ეჭოფილ აფჷ დო მონწყილ რე ბრძოლაშო. თაშ ნამდა, მუჟამსით ქრისტიანს იესოცალ აზროვნება უღჷ, თინა მომზადებულ რე დო უღჷ „იარაღ“ ცოდამ მიდრეკილებეფწკუმა დო სატანაშ ქვეყნიერებაწკუმა ობრძოლებერო (2 კორ. 10:3–5; ეფეს. 6:12).

4. მუჭო მიმეხვარებუნა თე სტატია, მივაჸუნათ პეტრეშ რჩევას?

⁴ თე სტატიას გუვარჩიენთ, მუნერ აზროვნება უღუდ იესოს დო ქობძირუნთ, მუ მიმეხვარებუნა, ჩქი ხოლო გებვითარათ თიცალ აზროვნება. ქიგებგენთ, მუჭო შემლებუნა 1) გეგნიბღათ იეჰოვაშ აზროვნება, 2) ვორდათ თანდაბალეფ დო 3) გებვითარათ სწორ აზროვნება.

ᲒᲔᲒᲜᲘᲦᲘᲗ ᲘᲔᲰᲝᲕᲐᲨ ᲐᲖᲠᲝᲕᲜᲔᲑᲐ

5. ნამ შემთხვევას ვა უჯინ პეტრექ იეჰოვაშ თოლით ართ საკითხის?

⁵ რდჷ შემთხვევა, მუჟამსით პეტრექ იეჰოვაშ თოლით ვა უჯინ ართ საკითხის. იესოქ მუშ მოციქულეფს უწუ, ნამდა იერუსალიმშა ოკო მიდართუკო, სოდეთ ოჭოფუნდეს, აწამენდეს დო დოჸვილუნდეს (მათ. 16:21). პეტრეს ვადაჯერებუ, მუნერო იჸიდ იეჰოვაშ ნება, ნამდა იესო, ისრაელ ერიშ იმენდ დო დუნაპირებ მესია, დოჸვილესკო (მათ. 16:16). ათეშენ თიქ გემკიჭანუ იესო დო უწუ: „ქეშიცოდილე დუდ, უფალ! ვა უკეთა თენა სქან დუდის!“ (მათ. 16:22). პეტრე იეჰოვაშ თოლით ვა უჯინედ თე საკითხის, ათეშენ თის დო იესოს შხვადოშხვა აზრ უღუდეს.

6. მუჭო ოძირუ იესოქ, ნამდა მუამუშცალ აზროვნება უღუდ?

⁶ იესო ჯგირო იჩინენდჷ მუამუშიშ აზროვნებას დო მუ ხოლო ზუსტას თიცალო ფიქრენდჷ. ათეშენ თიქ პეტრეს უწუ: „ჩემეთხი, სატანა! მოცილუქ, ჩქიმ ოკეთებელ გუვაკეთე დო ღორონთიშ ნება შევასრულე, მუშენდა ღორონთცალო ვარინ, ადამიანცალო ფიქრენქ!“ (მათ. 16:23). პეტრეს იესოშო ჯგირ ოკოდუნ თიშენ უწუ, დუდ ქეშიცოდილევა. მარა იესოქ ველერჩქილუ თიშ რჩევა, მუშენდა უჩქუდ, ნამდა იეჰოვაშ ნება რდჷ, იტანჯუკო დო დოღურუკო. თე შემთხვევაქ მოციქულს ქუდაგურუ, ნამდა ირნერ საკითხის იეჰოვაშ თოლით ოკო უჯინუკო, დო თენა მნიშვნელოვან გაკვეთილ რე ჩქინო ხოლო.

7. სოვრეშე იძირ, ნამდა პეტრეს ოკოდ, მუშ აზროვნება იეჰოვაშის მეურდუკო? (ქოძირით სურათ).

⁷ ჭიე-ჭიეთ გამკორჩქინდჷ, ნამდა პეტრეს ოკოდ, გეგნუღალუდუკო იეჰოვაშ აზროვნება. თექ თიმწკუმა ქიძირ, მუჟამსით, იეჰოვაშ ნებათ, ქუმორთ დროქ, წინადაუცვეთელ უცხოტომელეფქ ხოლო ქაკათესკო ღორონთიშ ხალხის. პეტრექ მიღჷ დავალება, უცხოტომელ კორნელიუსშა ქუქადაგებუდუკო. კორნელიუს ართ-ართ პირველ რდჷ თი უცხოტომელეფ შქას, მიდგაქ ქრისტიანეფო გინირთეს. საერთოთ, იუდეველეფ უცხოტომელეფს დუდის ურიდანდეს. ათეშენ, პეტრეს აზროვნება აჸიდ ოთირალ, ნამდა ქეშიალებუკო უცხოტომელეფწკუმა ქადაგებაქ. მარა, მუჟამსით ქინანჭჷ, მუ რდჷ ღორონთიშ ნება, დითირუ დამოკიდებულება თეცალ ხალხიშ მიმართ. ათეშენ, მუჟამსით დავალება მიღჷ, კორნელიუსშა მიდურთუმუდუკო, ხეთეშე მიდართჷ (საქ. 10:28, 29). თიქ ქუქადაგ კორნელიუსის დო თიშ ოჯახის. შედეგო, თე ხალხიქ დინათ (საქ. 10:21–23, 34, 35, 44–48).

8. მუჭო შემლებუნა ვოძირუათ, ნამდა ჩქინ აზროვნება იეჰოვაშის მეურე? (1 პეტ. 3:8).

⁸ წანეფიშ უკულ, პეტრექ ელუჩ თანაქრისტიანეფს, უღუდესკო ართ აზრ (წეკითხით 1 პეტრეშ 3:8). იეჰოვაშ ხალხის ართ აზრ ქომღუდანინ თეს ქიმმეხვარებუნა ღორონთიშ აზროვნებაშ გინოღალა, ნამდგაშ ძირაფა თიშ სიტყვაშე, ბიბლიაშე, შემლებუნა. მაგალთო, მუჭოთ მიჩქუნა, იესოქ ელამჩეს, ღორონთიშ სამეფო ცხოვრებას პირველ ადგილს გივორინუათ (მათ. 6:33). შილებე თქვან კრებაშე ნამდგაინ თანაქრისტიანქ ქიმიაჸუნას იესოშ თე მითითებას დო პიონერობაშ დოჭყაფა გინოჭყვიდას ვარდა სრულ დროთ მსახურებაშ შხვა ფორმეფს ოკოდას მონაწილება. თეცალ დროს ოკო ქიდვეკვირათ ჩქინ ჩიებას დო ფრთხილას ვორდათ, ნამდა თანაქრისტიანს გურ ვეუჸოთათ მუშ მიზნეფიშ მენჭირნაფაშა. თეშ მანგიორო, უჯგუშ იჸი, ქუვოცქუათ, თეცალ ჯგირ საქმეშ კეთება ოკონ თიშ გურშენ დო ქიმვეხვარათ.

ᲠᲓᲐᲗᲷ ᲗᲐᲜᲓᲐᲑᲐᲚ

9, 10. მუჭო გიმირჩქინ იესოქ თანდაბლობა?

⁹ ღურაშ წოხოლენ სერს იესოქ პეტრეს დო შხვა მოციქულეფს თანდაბლობაშ მანგარ დიდ გაკვეთილ ქაძირუ. მუჭოთ მიჩქუნა, თიქ თეიშახ პეტრე დო იოანეს ქუდავალ, ირფელ მამზადესკო ბოლო ოსერშეშო, ნამდგას იესო მუშ მოციქულეფწკუმა ართო ქიმკუზოჯუნდ. თინეფს ალბათ ტაშტ დო პიშქოსალ ხოლო აჸიდეს დადვალარ, ნამდა მოულირ სტუმარეფს კუჩხიშ ბონუაქ ქეშიალებესკო, ონდო სუფრას მიკუზოჯუნდეს. საინტერესო რე, ნამუს დაუბაღუდ თანდაბლობა დო მი გუბონუნდ კუჩხის შხვეფს?

¹⁰ იესოქ სასწაულ თანდაბლობა გეგმირჩქინ დო მოციქულეფიშ გასაკვირო, ართ ვა უთაკილებუნ თეშ, თიცალ საქმე გაკეთ, ნამდგას თიმ დროს მსახურეფ ორთუდეს. თიქ მუშ გინაქუნალ გეგნოდვჷ, გეჭოფ პიშქოსალ, წელშა ქიგიკირ, ტაშტის წყარ ქიგიობ დო ქიდიჭყჷ მოწაფეეფშა კუჩხიშ ბონუა დო თი პიშქოსალით გოსქირაფა, ნამუთ წელს გითაკირუდ (იოან. 13:4, 5). იესოქ ვითოჟირხოლო მოციქულს გუბონ კუჩხ, თინეფ შქას იუდას ხოლო, ნამუთ მალას უღალატენდ თის. თე საქმეს ჭიჭე დრო ვედესაჭირებუდ, მარა იესოქ თანდაბლურო გაკეთ თენა. უკულ თინეფს გემუანო გეუნწყჷ, მუშენ მიქცუ თაშ. თიქ უწუ: „ქიმეხვადითო, მუშენ გიბონით კუჩხეფ? თქვა მოძღვარს დო უფალს მიძახუთ, დო ქოთ მართალ რეთჷ, მუშენდა თაშ რე. ათეშენ მა, უფალქ დო მოძღვარქ, კუჩხეფ გოიბონით-და, თქვა ხოლო ოკო გუბონათ ართიანს კუჩხეფ“ (იოან. 13:12–14).

11. სოვრეშე იძირ, ნამდა პეტრექ ქიდიგურუ, მუსხით მნიშვნელოვან რე თანდაბლობა? (1 პეტ. 5:5; ქოძირით სურათ).

¹¹ პეტრექ ქიდიგურუ იესოშე თანდაბლობა. ართშა, იესოშ ზეცაშა ულაშ უკულ, მოციქულქ სასწაულო დასქილიდუ დაბადებაშე ქულა კოჩ (საქ. 1:8, 9; 3:2, 6–8). მუ გასაკვირ რე, ნამდა თეშ მაძირაფ ხალხიქ პეტრეს ქუგაშაყარ (საქ. 3:11). მუჭო მიქციებუდ თინა? დისქვამუანდუო თე განდიდებას, ნამდგას ხალხშე მიღენდ? ვაგმოჭყორდან, ნამდა პეტრე თიცალ კულტურას რდჷ ნარდ, სოდეთ სახელს დო მდგომარეობას მანგარ მნიშვნელობა უღუდ. მარა თიქ თანდაბლურო მიქცუ დო განადიდ თინეფ, მით სინამდვილეს იმსახურენდეს თეს – იეჰოვა დო იესო. თიქ თქუ: „თე კოჩიქ, ნამდგას თქვა ორწყეთ დო იჩინენთ, იესოშ სახელით დო თე სახელიშ რწმენა მიღუნან თიშენ გემანგარ“ (საქ. 3:12–16). შხვა დროს, მუჟამსით პეტრექ წერილ მეჭარ თანაქრისტიანეფს, ელუჩ თინეფს, თანდაბალეფ ჸოფედესკო. თიქ ორიგინალ ტექსტის გიმირინუ სიტყვეფ, ნამუთ თიცალ აზრის იტენს, ნამდა თანდაბლობა ოკო „მიკიქუნე“, ითამ თინა ბარგ რდასჷ. თენა გუმოშინანა, მუჭო გითიკირ იესოქ პიშქოსალ დო მუჭო უბონ კუჩხეფ მუშ მოციქულეფს (წეკითხით 1 პეტრეშ 5:5).

12. მუჭო შემლებუნა პეტრეცალო ირიათო გუვაგრძელათ თანდაბლობაშ გურაფა?

¹² ჯგირ იჸუაფ, მივაჸუნათ პეტრეშ მაგალითის დო თანდაბლობა გებვითარათ. თანდაბლობა ვა რე ხვალე თიცალ სიტყვეფიშ რაგად, ნამდგას თანდაბალ ადამიანეფ იჩიებუნა. გამოთქმა, ნამუთ პეტრექ გიმირინუ დო თარგმნილ რე, მუჭოთ „თანდაბლობა“, ოძირანს, ნამდა პიროვნება სინამდვილეს თანდაბალ ქორენ დო ვარინ, თევრეშე იძირე, მუს ფიქრენს მუშ დუდშე დო შხვეფშე. ჩქი შხვეფს ჯგირს თიშენ ურთუთ, ნამდა მიჸორა იეჰოვა დო ადამიანეფ დო ვართ ხოლო თიშენ, ნამდა ქუმოცქუან. ჩქინ კეთებულ საქმეს მითინ ვა ძირუნსინ თიმწკუმა ხოლო, იეჰოვას დო და დო ჯიმალეფს ხიოლით ქუვომსახურუთ-და, ვოძირანთ, ნამდა მართალო თანდაბალეფ ვორეთ (მათ. 6:1–4).

ᲡᲬᲝᲠᲐᲡ ᲘᲐᲖᲠᲝᲕᲜᲘᲗ

13. გენწყით, მუს ნიშნენს, სწორ აზროვნება მიღუდან.

¹³ მუს ნიშნენს, სწორ აზროვნება მიღუდან? (1 პეტ. 4:7). ქრისტიან, ნამდგას სწორ აზროვნება უღჷ, ოცად, თიცალ გადაწყვეტილებეფ მიღას, ნამუთ იეჰოვაშ აზროვნებას მეურე. თის არჩქილე, ნამდა ცხოვრებას ირფელიშ უმოს მნიშვნელოვან იეჰოვაწკუმა ჯგირ ურთიერთობა რე. თეცალ პიროვნებას დიდ წარმოდგენა ვა უღჷ მუშ დუდშე დო ვა ფიქრენს, ნამდა ირფელ უჩქჷ. თინა ბოლოშა ონდჷ იეჰოვას, მუდგას თით ოძირანს, ნამდა ხშირას თხინსჷ თის ლოცვათ ხელმძღვანელობას.a

14. მუჭო იძირ ართ შემთხვევაშე, ნამდა პეტრექ ბოლოშა ვემიენდჷ იეჰოვას?

¹⁴ ღურაშ წოხოლენ სერს იესოქ მუშ მოწაფეეფს უწუ: „ამსერ არძა მიმოტენთ“. მარა პეტრეს მანგარ იმენდ უღუდ მუშ დუდშა, ათეშენ იესოს უწუ: „არძაქ მიგოტუასინ ხოლო, მა დღას ვემგოტენქ!“. იესოქ თიმ სერს მუშ ნამთინე მოციქულს ელუჩ: „კურცხას რდათჷ დო ირიათო ილოცით“ (მათ. 26:31, 33, 41). პეტრეს იესოშ თე რჩევა მუშ დროს ქალურჩქილუაფუდუკონ, უკულ დაუბაღუდ გაბედულება თიშ ორაგადეთ, ნამდა იესოშ მოწაფე რდჷ. მარა პეტრექ თქუ, ნამდა ვეჩინენდჷ იესოს, მუდგაქ უკულ მანგარ ონარღებელქ აჸუ (მათ. 26:69–75).

15. მუჭო ოძირუ იესოქ დედამიწას ცხოვრებაშ ბოლო სერს, ნამდა სწორ აზროვნება უღუდ?

¹⁵ იესო ბოლოშა ონდუდ იეჰოვას. მართალ რე, თინა სრულყოფილ რდჷ, მარა ღურაშ წოხოლენ სერს ვემუტებ ლოცვა, მუდგაქ ქიმეჩ გაბედულება, იეჰოვაშ ნება შეასრულუკო (მათ. 26:39, 42, 44; იოან. 18:4, 5). ალბათ პეტრეს ირო გაშინედუკონ იჸიდ, მუზმაშა ილოც იესოქ დედამიწას ცხოვრებაშ უკანასკნელ სერს.

16. მუჭო ოძირუ პეტრექ, ნამდა გევითარ სწორ აზროვნებაშ უნარ? (1 პეტ. 4:7).

¹⁶ დროშ ულაწკუმა ართო, პეტრექ უმოსო ქიდიგურუ იეჰოვაშა მენდება დო ხშირას ლოცულენდჷ. გათელებურ იესოქ პეტრე დო შხვა მოციქულეფ დარწმუნ, ნამდა მიღენდეს წმინდა შურს, მუთ მეხვარებუდ თინეფს მუნეფიშ დავალებაშ შესრულებას, მუდგაშა მიშეშ ხალხშა სახიოლო ამბეშ ქადაგება. მარა იესოქ თინა ხოლო უწუ, ნამდა, ონდო თენა მოხვადუდ, იერუსალიმს ქიჯინესკო (ლუკ. 24:49; საქ. 1:4, 5). მუს ორთუდ პეტრე, ონდო იესოშ ნარაგადიშ შესრულებას ელუდ? მუჭოთ ბიბლიას პკითხულენთ, თინა დო თიშ თანაქრისტიანეფ „ირიათო ლოცულენდეს“ (საქ. 1:13, 14). მუჟამსით პეტრექ მუშ პირველ წერილ ჭარჷ, და დო ჯიმალეფს ელუჩ, სწორას იაზროვნესკო დო ირიათო ილოცესკო (წეკითხით 1 პეტრეშ 4:7). თე ართგურ მოციქულქ ქიდიგურუ იეჰოვაშა მენდება დო „ბიჯცალო“ გინირთჷ კრებაშო (გალ. 2:9).

17. მუდგა უნარიან ვა ვორდათინ, მუ ოკო ვაკეთათ არძაქ? (ქოძირით სურათ).

¹⁷ სწორას აზროვნებაშ უნარ ქომღუდანინ, ირიათო ოკო იბლოცათ დო ფთხუათ იეჰოვას, ქომხელმძღვანელან. მუდგა უნარიანეფ ვა ვორდათინ, ოკო მარჩქილედან, ნამდა არძას მოსაჭირუნა იეჰოვაშა მოხვარაშ თხუალა. ათეშენ, ირიათო ქოფთხუათ ლოცვას, ქიგმოწურუან, განსაკუთრებულო თიმწკუმა, მუჟამსით სერიოზულ გადაწყვეტილებეფ მაფუნა მიოღებელ, მუშენდა ბჯერა, არძაშ უჯგუშო თის უჩქჷ, მუ უჯგჷ ჩქინო.

18. მუ მიმეხვარებუნა, ჩქინ აზროვნება უმოსო ქუგურუათ იეჰოვაშის?

¹⁸ მთელ გურით უმარდუთ იეჰოვას თიშო, ნამდა შემლებუნა მიღუდან თიცალ თვისებეფ, მუნერით მუს უღჷ (დაბ. 1:26). მუშო ოკო რაგად, დღას ვეშმალებენა, გვალო იეჰოვაცალ ვორდათ (ეს. 55:9). მარა, მორთით პეტრეცალო, ჩქი ხოლო ირიათო უმოსო დო უმოსო ვეცადათ, ქუგურუათ ჩქინ აზროვნება იეჰოვაშის, ვორდათ თანდაბალეფ დო მიღუდან სწორ აზროვნება.