უპასუხენსო იეჰოვა ჩქიმ ლოცვეფს?

1, 2. მუშენ შილებე იფიფქრათ, ნამდა იეჰოვა ვა პასუხენს ჩქინ ლოცვეფს?

„ᲘᲔᲰᲝᲕᲐᲬᲙᲣᲛᲐ ქიმიოგორე ხიოლს დო თინა შეისრულენს თის, მუთ მთელ გურით გოკო“ (ფსალმ. 37:4). მუ დიდებულ დუნაპირებ რე! მარა ოკო ველდათო, ნამდა იეჰოვა ხეთეშე შემისრულენა ირფელს, მუდგას ფთხინთ? მუშენ რე მნიშვნელოვან თე კითხვაშე დაფიქრება? დეფიფქრათ თეცალ სიტუაციეფშე: ახალგაზრდა დას მიზანო უღჷ მახარობელეფიშ სკოლაშ მიკულა დო იეჰოვას ლოცვას თხინს, ქიმიაჩას თეშ შესაძლებლობაქ, მარა წანეფ მიკურს დო სკოლაშა მოწვიებას ვა ღებულენს. ახალგაზრდა ჯიმას სერიოზულ ლახალა ოჭირ დო იეჰოვას ლოცვას თხინს, დასქილიდუას თიშე, ნამდა შეიალებუას უმოს გაკეთას კრებაშო, მარა დრო მიკურს დო თიშ მდგომარეობა ვეუჯგუშებ. ქრისტიან მშობლეფ იეჰოვას ლოცვას თხინა, მუნეფიშ სქუაქ ჭეშმარიტებაშ შარას ვეგნურთას, მარა მუდგარენ დროშ უკულ, თინა ვარიას იჩიებ იეჰოვაშ მსახურებაშე.

² შილებე თქვა ხოლო ბრელ ხან რე, მუთ იეჰოვას ლოცვას მუდგარენს თხინთ, მარა პასუხ დიო ხოლო ვემეიღებნა დო ათეშენ ფიქრენთ, ნამდა იეჰოვა შხვეფიშ ლოცვეფს პასუხენს დო თქვანს ვარ. ვარდა შილებე თი დასკვნაშა ხოლო მერთათ, ნამდა მუდგარენ დაშეთ დო იეჰოვაშ მოწონა მიოდინეთ. ზუსტას თეცალ ფიქრეფ უღუდ ართ დას, სახელო ჯენისის.b თის დო მუშ ქომონჯის მანგარო ოკოდეს ბეთელს მსახურება დო თეშე ირიათო ლოცულენდეს. ჯენის იჩიებ: „ალალას ქოიწუათინ, დარწმუნებულ ვორდჷ, ნამდა ჩქინ ლოცვაშ პასუხის მიბღენდით დო მალას ქიმემწვიენდეს ბეთელშა“. წანეფ მიკიშ დო ბეთელშე მოწვიება ვემიშ. ჯენის იჩიებ: „გურელაჭვილ ვორდჷ დო ვა ფხვადუდ, მუშენ ვა ბღებულენდჷ ლოცვაშ პასუხის. ფიფქრენდჷ, მუთუნ ხომ ვა დუვაშე დო გურ ხომ ვა უწყუნე-მაქ იეჰოვას. ქიანაშის ქობლოცულენდჷ ბეთელს მსახურებაშე დო მუშენ ვა პასუხენდჷ იეჰოვა ჩქიმ ლოცვეფს?!“.

3. მუს გუვარჩიენთ თე სტატიას?

³ ჩქი ხოლო შილებე ფიფქრენდათ, ნამდა იეჰოვა ვერჩქილე ჩქინ ლოცვეფს. ულირს თეცალ ფიქრეფ ღორონთიშ ართგურ მსახურეფს ხოლო ურჩქინდუდეს (იობ. 30:20; ფსალმ. 22:2; აბაკ. 1:2). მუ მარწმუნენა, ნამდა იეჰოვა პასუხენს ჩქინ ლოცვეფს? (ფსალმ. 65:2). თე კითხვაშე პასუხიშ მიოღებელო დიო თე სუმ კითხვას ქუპასუხენთ: 1) მუს ოკო ველდათ იეჰოვაშე? 2) მუს ელჷ იეჰოვა ჩქინდე? დო 3) მუშენ შილებე მინშა საჭიროქ იჸუას, დოფთირუათ ოთხუალ?

ᲛᲣᲡ ᲝᲙᲝ ᲕᲔᲚᲓᲐᲗ ᲘᲔᲰᲝᲕᲐᲨᲔ?

4. მუჭოთ იერემიაშ 29:12-შე იძირე, მუს მოპირნა იეჰოვა?

⁴ იეჰოვა მოპირნა, ნამდა ქიმირჩქილუანს ჩქინ ლოცვეფს (წეკითხით იერემიაშ 29:12). ღორონთის უჸორს მუშ ართგურ მსახურეფ, ათეშენ უყურადღებოთ დღას ვეტენს თინეფიშ ლოცვეფს (ფსალმ. 10:17; 37:28). მარა თენა თის ვა ნიშნენს, ნამდა იეჰოვა ირფელს შემსრულენა, მუდგას ფთხინთ. ნამთინე ჩქინ ოთხუალს იეჰოვა ხვალე ახალ ქვეყნიერებას შემსრულენა, ათეშენ, შილებე თი დროშახ მაჸუან ოჯინექ.

5. მუს ოკვირ იეჰოვა, მუჟამსით ირჩქილე ჩქინ ოთხუალს? გენწყით.

⁵ იეჰოვა ოკვირ, მუჭო ოკავშირ ჩქინ ოთხუალ მუშ განზრახვას (ეს. 55:8, 9). იეჰოვაშ განზრახვაშა მიშურს, ნამდა დედამიწაქ ეიფშას თიცალ ადამიანეფით, მით ხუჯის უკინენა ღორონთიშ მართველობას დო განადიდენა თის. მარა სატანა ამტკიცენს, ნამდა ადამიანეფ უმოს ბედნერეფ დო წარმატებულეფ იჸუაფუნა, მუჟამსით თეშ იცხოვრენა, მუჭოთ მუნეფს ოკონა დო ვართ ხოლო ღორონთის (დაბ. 3:​1—5). თიშ დამტკიცებელო, ნამდა სატანა მეტყურე რე, იეჰოვაქ უფლება ქიმეჩ ადამიანეფს, ქიმართველესკო. მარა ამდღა ჯგირო ვორწყეთ, მუ გლახა შედეგეფქ მაჸუნ თინეფიშ მართველობას (ეკლ. 8:9). ჩქი ჯგირო მარჩქილენა, ნამდა იეჰოვა ამდღა ვა მუღენს ბოლოს თი არძა პრობლემას, მუთ ადამიანურ მართველობაშ შედეგ რე. თაშ გაკეთ-და, ნამთინექ შილებე იფიქრას, ნამდა ადამიანურ მართველობეფს მართალო შეულებ დერსხას ხალხ პრობლემეფშე.

6. მუშენ ოკო ბჯერდან, ნამდა იეჰოვა ირიათო გიმირჩქინანს ჸოროფას დო სამართლიანობას?

⁶ იეჰოვაქ შილებე ართ დო იგივე ოთხუალს განსხვავებულო უპასუხას. მაგალთო, მუჟამსით მეფე ხიზკიაქ მანგარო დელახ, ღორონთის თხუ, დასქილიდუკო თინა. იეჰოვაქ უპასუხ თიშ ლოცვას დო შეუსრულ ოთხუალ (2 მეფ. 20:​1—6). მარა თაშ ვა მოხვალამე პავლე მოციქულიშ შემთხვევას, მიდგაქ იეჰოვას თხუ, ჩუთხინუკო „ძიგირ სხეულშე“, მუთ, საეგებიოთ, ჯამრთელობაშ პრობლემა რდჷ. (2 კორ. 12:7—9). ქიგიფშინათ მოციქულეფიშ, იაკობიშ დო პეტრეშ შემთხვევეფ ხოლო. მეფე ჰეროდეს თინეფიშ ჸვილუა ულამუდ. კრება შურ დო გურით ლოცულენდჷ, მუჭოთ პეტრეშო, თეშ, საეგებიოთ, იაკობშო ხოლო. მარა მუქ მოხვად უკულ? იაკობ დოჸვილეს დო პეტრე ანგელოზიქ სასწაულებრივო დერსხჷ ღურაშე (საქ. 12:1—11). შილებე თეცალ კითხვაქ გომრჩქინდან: მუშენ ვეგნასქილიდუ იეჰოვაქ პეტრეწკუმა ართო იაკობ? ბიბლია თეშ გურშენ მუთუნს ვეჩიებ.c მარა შემლებნა დარწმუნებულ ვორდათ, ნამდა იეჰოვაშ არძა შარა სამართლიან რე „დო უსამართლოთ დღას ვექციებ“ (კან. 32:4). ჩქი თინა ხოლო მიჩქნა, ნამდა ქოთ პეტრე დო ქოთ იაკობ ძვირფასეფ რდეს იეჰოვაშ თოლს დო ჟირხოლოს იწონუანდჷ (გამოცხ. 21:14). ნამთინეშა შილებე იეჰოვაქ ჩქინ ოთხუალს თეშ ვა უპასუხას, მუჭოთ ველუდით, მარა დარწმუნებულეფ ვორეთ, ნამდა იეჰოვა ირიათო ჸოროფას დო სამართლიანობას გიმირჩქინანს. ათეშენ, თიქ ჩქინ ლოცვას მუჭოდგა ვა უპასუხასინ, ჩიულიშ მიზეზ ვა მიღნა (იობ. 33:13).

7. მუს ოკო ევუჩილითუათ დუდ დო მუშენ?

⁷ არძაშ სიტუაცია განსხვავებულ რე, ათეშენ ოკო ვეცადათ, ჩქინ მდგომარეობა შხვაშის ვეშუდარათ. მაგალთო, შილებე იეჰოვას მუდგარენ საკითხშე კონკრეტულ მოხვარას ფთხინდით, მარა თიქ ვეშემსრულეს ოთხუალ დო უმოს გვიანო ქიგებგით, ნამდა შხვაშა შეუსრულებ ზუსტას თეცალ ოთხუალ. ქიმიპჸუნათ ართ დაშ, ანაშ, შემთხვევა, მიდგაქ თენა მუშ დუდშა გიმოცად. თიშ ქომონჯის, მეთიუს, კიბო უღუდ, მუდგაშ გურშენ ანა მთელ გურით ლოცულენდჷ დო იეჰოვას თხინდჷ, დასქილიდუკო თინა. თეწკუმა ართო, ანა კიბოთ დალახებურ ჟირ ხანშამიშულირ დაშე ხოლო ლოცულენდჷ. საბოლათ, თე ხანშამიშულირ დალეფქ დოსქიდეს ლახალაშე, მარა ანაშ საჸოროფო ქომონჯიქ დოღურ. დუდშე ანას ვარჩქილედ თე დალეფქ თიშენ დოსქიდეს დო ვარ ლახალაშე, ნამდა თინა იეჰოვას თხინდჷ თინეფიშ სქილიდაფას. თაშ ქორდჷ-და, მუშენ ვა დასქილიდუ იეჰოვაქ მუშ ქომონჯ ხოლო? მუშო ოკო რაგად, ჩქი ვა მიჩქნა, მუ რდჷ თიშ მიზეზ, ნამდა თე დალეფქ ლახალაშე დოსქიდეს. მარა ზუსტას მიჩქნა, ნამდა იეჰოვას გინოჭყვიდილ აფჷ, სადღამუშოთ მუღას ბოლო ჩქინ არძა ოწუხებელს დო გათელას მუშ საჸოროფო მეგობრეფ ხოლო, მით ღურელეფ რენა (იობ. 14:15).

8. ა) მუჭოთ ესაიაშ 43:2-შე იძირე, მუჭო ელამრენა იეჰოვა? ბ) მუჭო შეულებ ლოცვას ჩქინ მოხვარა, მუჟამსით განსაცდელეფს ფხვადუთ? (ქოძირით ვიდეო „ლოცვა მოხვარნა, მივერუათ რთულ სიტუაციეფს“).

⁸ იეჰოვა ირიათო ელამდირთუნა. ჩქინ მოჸოროფე მუმას გურს უჭუანს თიშ ძირაფა, მუჭო იტანჯებნა მუშ მსახურეფ (ეს. 63:9). თეშ უმკუჯინუო, იეჰოვა ვა ფთხილანა თიცალ სირთულეეფშე, ნამუთ მალწყარ დო დაჩხირცალ რე (წეკითხით ესაიაშ 43:2). მარა თინა მოპირნა, ნამდა, მუდგაქ ვა მოხვადასინ, ირიათო ჩქინწკუმა იჸუაფ დო ვა დუშვენს, ნამდა განსაცდელეფქ ვეგშისწორებენ ფერ ზიან ქუმმორინუან. ხვალე თენა ვარინ, იეჰოვა მუშ ძალიერ წმინდა შურით მოხვარნა, ქუგურზათ განსაცდელეფს (ლუკ. 11:13; ფილ. 4:13). ათეშენ შემლებნა დარწმუნებულეფ ვორდათ, ნამდა ჩქინ ღორონთ საჭირო დროს ქომჩანა ირფელს, მუთ მიმეხვარებნა, ქუგურზათ განსაცდელეფს დო ვა ვოდინუათ თიშ მიმართ ართგურობა.d

ᲛᲣᲡ ᲔᲚᲷ ᲘᲔᲰᲝᲕᲐ ᲩᲥᲘᲜᲓᲔ?

9. მუჭოთ იაკობიშ 1:6, 7-შე იძირე, მუშენ ოკო ბჯერდან, ნამდა იეჰოვა მიმეხვარებნა?

⁹ იეჰოვა ჩქინდე ელჷ, ნამდა მივენდებუთ თის (ებრ. 11:6). მინშა შილებე სირთულეეფიშ დროს იფიფქრათ, ნამდა მეტიშ გარზება ვეშემლებნა დო შილებე თიშ ეჭვიქ ხოლო გომრჩქინდან, ქიმმეხვარებნა დო ვარ იეჰოვა. მარა ბიბლია მარწმუნენა, ნამდა ღორონთიშ ძალაშ ჭყოლოფათ შემალებენა გივორჯგინათ ირნერ სირთულეს (ფსალმ. 18:29). ათეშენ, თიშ მანგიორო, ნამდა იეჰოვაშ მოხვარაშა ეჭვ გემშებღათ, მთელ გურით ოკო იბლოცათ დო ბჯერდან, ნამდა თინა ქუპასუხენს ჩქინ ოთხუალს (წეკითხით იაკობიშ 1:6, 7).

10. გენწყით, მუჭო შემლებნა ლოცვაშ თანახმას მოქმედება.

¹⁰ იეჰოვა ჩქინდე ელჷ, ნამდა ლოცვაშ თანახმას მიფქციებუთ. წერმიბდგინათ თეცალ სიტუაცია: ართ ჯიმა იეჰოვას თხინს მოხვარას, ნამდა რეგიონულ კონგრესშა დასწრებელო სამუშაშე მუსხირენ დღათ გათავისფალან. მუჭო შილებე იეჰოვაქ უპასუხას თე ოთხუალს? თიქ შილებე ჯიმას უნჩაშწკუმა დარაგადაფალო გაბედულება ქიმეჩას. მარა საჭირო რე, თეშ ოკეთებელო ჯიმაქ ხოლო გეგნოდგას ნაბიჯეფ. მაგალთო, შილებე მუსხირენშა აჸუას დარაგადაფალქ უნჩაშშა მუშ ოთხუალიშ გურშენ. თეს გეძინელ, შილებე თინა ხოლო ქეშეთავაზას, ნამდა შხვა დღას ქიმუშენს ვარდა შხვა თანამშრომელს ქოთხინს მუშ მანგიორო მუშობას. ხვალე თენა ვარინ, სიტუაცია მითხინს-და, შილებე უნჩაშის უხელფასო შვებულება ქოთხუას.

11. მუშენ ოკო ვემვოტუათ ლოცვა ჩქინ ოწუხებელიშ გურშენ?

¹¹ იეჰოვა ჩქინდე ელჷ, ნამდა ვემვოტენთ ოწუხებელიშ გურშენ ლოცვას (1 თეს. 5:17). იესოშ სიტყვეფშე ბგებულენთ, ნამდა ნამთინე ჩქინ ოთხუალს იეჰოვაქ შილებე ხეთეშე ვა უპასუხას (ლუკ. 11:9). თაშ ნამდა, იმენდ ვადინუათ! ილოცით მთელ გურით დო დაჩემებულო (ლუკ. 18:1—7). მუჟამსით კონკრეტულ საკითხშე ირიათო ბლოცულენთ, თეთ იეჰოვას ვოძირანთ, ნამდა მუდგარენ უბრალოთ აჩემებულ ვა მაფნან, მართალო მთელ გურით მოკონა, ღორონთიქ შემსრულან თინა. თეს გეძინელ, ვოძირანთ, ნამდა ბჯერა, იეჰოვას შეულებ ჩქინ მოხვარა.

ᲛᲣᲨᲔᲜ ᲨᲘᲚᲔᲑᲔ ᲛᲘᲜᲨᲐ ᲡᲐᲭᲘᲠᲝᲥ ᲘᲸᲣᲐᲡ, ᲓᲝᲤᲗᲘᲠᲣᲐᲗ ᲝᲗᲮᲣᲐᲚ?

12. ა) ნამ კითხვაშე ოკო დეფიფქრათ დო მუშენ? ბ) მუჭო შემლებნა ჩქინ ოთხუალით ვოძირუათ იეჰოვას, ნამდა პატის ფცენთჷ თის? (ქოძირით ჩარჩო „ქიძირენო ჩქიმ ოთხუალშე იეჰოვაშ მიმართ პატიცემა?“).

¹² მუჟამსით ვა ბღებულენთ თიშ პასუხის, მუთ იეჰოვას ლოცვას ფთხით, შემლებნა დეფიფქრათ სუმ კითხვაშე. პირველ, ქორენო ჩქიმ ოთხუალ სწორ? ხშირას ფიფქრენთ, ნამდა მიჩქნა, მუ რე არძაშ უჯგუშ ჩქინო, მარა შილებე თენა შურო ვა რდას თაშ. მუჟამსით მუდგარენ საკითხშენ ბლოცულენთ, შილებე პრობლემაშ მოგვარებაშ თიშე უჯგუშ შარა არსებენდას, ვინემ ჩქი ფიფქრენთ დო ფთხინთ იეჰოვას. თეს გეძინელ, თინა ხოლო ოკო ფშუდან, ნამდა ნამთინე ჩქინ ოთხუალ შილებე იეჰოვაშ ნებაწკუმა ვა რდას შეთანხმებულ (1 იოან. 5:14). ქიგიფშინათ ჟიშე მოშინაფილ მშობლეფიშ შემთხვევა, მით იეჰოვას თხინა, მუნეფიშ სქუაქ ჭეშმარიტებაშ შარას ვეგნურთას. თე ოთხუალს ართ მეჯინათ გლახა მუთუნ ვა რე. მარა, მუჭოთ მიჩქნა, იეჰოვა მითინს ვანძალენს მუშ მსახურებას. თის ოკო, ნამდა თიშ მსახურება არძაშ, თინეფ შქას ბაღანეფიშ ხოლო, პირად გადაწყვეტილება რდას (კან. 10:​12, 13; 30:​19, 20). ათეშენ, უჯგუშ იჸუაფ, მშობლეფქ იეჰოვას თინა თხუან, ნამდა ქიმეხვარას თინეფს, ქინანჭან მუნეფიშ სქუაშ გურს. შედეგო, შილებე ბაღანაქ ქიჸოროფუას იეჰოვა დო გინირთას თიშ მეგობარო (იგავ. 22:6; ეფეს. 6:4).

13. ებრაელეფიშ 4:16-იშ თანახმას, მუჟამ უპასუხენს იეჰოვა ჩქინ ოთხუალს? გენწყით.

¹³ ნამ რე მაჟია კითხვა, ნამდგაშეთ შემლებნა დეფიფქრათ? ქოფიქრენსო იეჰოვა, ნამდა ასე რე შესაფერის დრო, ქუპასუხას ჩქიმ ოთხუალს? მუჟამსით ბლოცულენთ, ჩქი შილებე ფიფქრენდათ, ნამდა სასწრაფოთ მოსაჭირნა ლოცვაშე პასუხიშ მეღება. მარა სინამდვილეს იეჰოვას უჩქჷ, მუჟამ რე თეშო არძაშ უჯგუშ დრო (წეკითხით ებრაელეფიშ 4:16). მუჟამსით პასუხის ხეთეშე ვა ბღებულენთ, შილებე იფიფქრათ, ნამდა იეჰოვაქ ვარია თქუ ჩქინ ოთხუალიშ შესრულებაშე, ვარინ უბრალოთ, შილებე ფიქრენდას, ნამდა დიო ვა რე შესაფერის დრო, ქეშემსრულან თინა, მუთ ფთხით. მაგალთო, მორთ დუვართათ ჟიშე მოშინაფილ ახალგაზრდა ჯიმაშ შემთხვევას, მით იეჰოვას ლახალაშე სქილიდაფას თხინს. მუქ შილებე მოხვადას ღორონთ თე ოთხუალს ქეშუსრულენს-და? შილებე სატანას თიშ რაგადიშ ოჭიშიქ ქიმიაჩას, ნამდა თე ჯიმა იეჰოვაქ ლახალაშე დასქილიდუნ თიშენ აგრძელენს თიშ მსახურებას (იობ. 1:​9—11; 2:4). თიქ ხოლო ოკო ირაგადუას, ნამდა იეჰოვას უკვე დოდგინელ აფჷ დრო, მუჟამ დასქილიდუას ადამიანეფ ირნერ ლახალაშე (ეს. 33:24; გამოცხ. 21:​3, 4). თე დროშ მოულაშახ ოკო ვეველდათ, ნამდა იეჰოვა სასწაულებრივო დუმოსქილიდუანა ლახალაშე. ათეშენ, უჯგუშ იჸუაფუდ, თე ჯიმას იეჰოვაშა ძალა დო შინაგან სიმშვიდე ქუთხუდკო, ნამდა ლახალაშ უმკუჯინუო, გაგრძელკო თიშ ართგურო მსახურება (ფსალმ. 29:11).

14. მუს ბგურაფლენთ ჯენისის შემთხვევაშე?

¹⁴ ქიგიფშინათ ჯენისიშ შემთხვევა, მით ჟიშე მიფშინეთ. თის მანგარო ოკოდ ბეთელს მსახურება დო თეშ გურშენ ირიათო ლოცულენდჷ. მუჭოთ მიჩქნა, წანეფ მიკიშ, მარა ლოცვაშ პასუხის ვა ღებულენდჷ. ხუთ წანაშ უკულ, თიქ ქიმეხვად, ნამდა იეჰოვას სინამდვილეს ქუპასუხებ თიშ ლოცვაშა. ჯენის იჩიებ: „თე წანეფიშ დინახალე იეჰოვაქ ბრელ მუდგარენ დუმოგურუ დო მიმეხვარ, უჯგუშ ქრისტიანო გინიფრთიკო. მაგალთო, ქობძირ, ნამდა მოსაჭირუდ, უმოსო მივენდიკო იეჰოვას, გუვაუჯგუშიკო პირად გურაფა დო მიღუდკო შინაგან ხიოლ, ნამუთ დამოკიდებულ ვეჸიდ თიშა, მსახურებაშ ნამ სფეროს მიბღენდჷ მონაწილებას“. უმოს გვიანო, ჯენისის დო თიშ ქომონჯის ქიმიაჩეს შესაძლებლობაქ, რაიონულ მსახურებას ქეშუდირთესკო. მუჟამსით ულირს იშინანს, ჯენის იჩიებ: „იეჰოვაქ უპასუხ ჩქიმ ლოცვეფს, ოღონც თეშ ვარ, მუჭოთ მა ველუდ. დროქ დემესაჭირ ქიმეფხვადკო, მუშმადიდა საჩუქარ მიკეთ თიქ. მანგარ მარდულ ვორექ იეჰოვაშ, ნამდა ჩქიმ დუდშა გეგმოფცად თიშ ჸოროფა დო სიკეთე“.

15. მუშენ შილებე იჸუას საჭიროქ, დოფთირუათ ოთხუალ? (ქოძირით სურათეფ).

¹⁵ მასმა კითხვა, ნამდგაშეთ შემლებნა დეფიფქრათ: ოთირალ ხომ ვა მაფჷ ოთხუალ? მუშო ოკო რაგად, გლახა მუთუნ ვა რე, ნამდა მუდგარენ საკითხიშ გურშენ კონკრეტულო ბლოცულენდათ, მარა მინშა შილებე საჭიროქ იჸუას, დოფთირუათ ჩქინ ოთხუალ, ნამდა ქობძირათ, მუ რე იეჰოვაშ ნება ჩქინწკუმა დაკავშირებით. ქიგიფშინათ ჟიშე მოშინაფილ დაუქორწინებელ დაშ შემთხვევა, მით მახარობელეფიშ სკოლაშ მიკულაშე ლოცულენს. თის თე სკოლაშ მიკულა თიშენ ოკო, ნამდა შეიალებუას ქიმსახურას თექ, სოდეთ მაქადაგებელეფიშ საჭიროება რე. მუშო ოკო რაგად, თიქ ოკო გაგრძელას თე საკითხშე ლოცვა, მარა თეწკუმა ართო, შეულებ იეჰოვას თინა ხოლო ქოთხუას, ნამდა ქაძირუას, მუჭო შეულებ მსახურებაშ გაფართოება (საქ. 16:​9, 10). ლოცვაშ უკულ, შეულებ ქოკითხას რაიონულ ზედამხედველს, გოხოლუას ნამდგაინ კრებას ხომ ვა რე პიონერეფიშ საჭიროება. ვარდა ფილიალს ქიმეჭარას დო ქოკითხას, ნამ ტერიტორიას რე მაუწყებელეფიშ საჭიროება.e

16. მუშა შემლებნა ვორდათ დარწმუნებულ?

¹⁶ მუჭოთ თე სტატიაშე გებგით, შემლებნა დარწმუნებულ ვორდათ, ნამდა იეჰოვა აუცილებერო ქუპასუხენს ჩქინ ლოცვეფს, მუშენდა თინა მოჸოროფე დო სამართლიან ღორონთ რე (ფსალმ. 4:3; ეს. 30:18). მართალ რე, შილებე ირიათო თეშ ვამპასუხან, მუჭოთ ჩქი ველუდით, მარა არგამა რე, უყურადღებოთ დღას ვეტენს ჩქინ ლოცვეფს. თის მანგარო ვუჸორთ დო დღას ვემმოტენა (ფსალმ. 9:10). თაშ ნამდა, მორთ ირიათო გურ გოვუნწყათ იეჰოვას ლოცვას დო თიშ იმენდ მიღდან (ფსალმ. 62:8).