გაუჯგუშით თქვან ლოცვეფ

1. მუშ კეთებას ელამჩანა იეჰოვა? (ქოძირით სურათ).

ᲛᲘᲬᲙᲣᲛᲐ შემლებნა ბგორათ გურიშექექაფა დო ხემძღვანელობა, მუჟამსით მოსაჭირნა? თე კითხვაშ პასუხ არგამა რე. ჩქი შემლებნა ლოცვას ნებისმიერ საკითხშე დურაგადუათ ღორონთის. იეჰოვას მთელ გურით ოკო, თენა ვაკეთათ დო ელამჩანა, ირიათო იბლოცათ (1 თეს. 5:17). შემლებნა ღორონთის ლოცვას თავისფალო დურაგადუათ ირფელშე დო ფთხუათ ხემძღვანელობა ნებისმიერ საკითხის (იგავ. 3:5, 6). იეჰოვა გურხვე ღორონთ რე, ათეშენ, შემლებნა თისხიშა დო თიზმახანს ვეჩუათ, მუსხით მოკონა.

2. მუს გუვარჩიენთ თე სტატიას?

² გურ სიმარდულით მაფნა ეფშა, ნამდა იეჰოვაქ ლოცვაშ ძღვინ მუჩეს დო თეშნერო მიღნა შესაძლებლობა, დურაგადუათ თის. მარა მინშა შილებე რთულ რდას თეშო დროშ გიშართუალა დო თის ხოლო ბგინაფლენდათ, ნამდა ჩქინ ლოცვეფს გაუჯგუშება ოსაჭირ. საბედნეროთ, თე საკითხწკუმა დაკავშირებით წმინდა წერილეფს შემლებნა ბგორათ ხემძღვანელობა დო ბრელ ჯგირ რჩევა. თე სტატიას გუვარჩიენთ, იესოშ მაგალითიშ მეჸუნათ, მუჭო გიმურთათ დრო ლოცვას. თეს გეძინელ, გუვარჩიენთ, ნამ ხუთ საშვალება მიმეხვარებნა ლოცვაშ გაუჯგუშებას.

ᲘᲔᲡᲝ ᲓᲠᲝᲡ ᲒᲘᲛᲣᲠᲗᲣᲜᲓᲷ ᲚᲝᲪᲕᲐᲡ

3. მუ არჩქილედ იესოს?

³ იესოს ჯგირო არჩქილედ, ნამდა იეჰოვაშო ჩქინ ლოცვეფ მანგარ მნიშვნელოვან რე. ონდო დედამიწაშა მიშკონ, თინა მუშ თოლით ორწყედ, მუჭო პასუხენდჷ ზეციერ მუმა ალალას რაგადებულ ართგურ მსახურეფიშ ლოცვეფს. მაგალთო, მუნერეფით რდეს ხანა, დავით, ელია დო შხვეფ (1 სამ. 1:10, 11, 20; 1 მეფ. 19:4—6; ფსალმ. 32:5). ათეშენ, ვა რე გასაკვირ, მუშენ დაგურუ იესოქ მუშ მოწაფეეფს, ხშირას ილოცესკო დო დარწმუნებულ რდესკო, ნამდა იეჰოვა ურჩქილედ (მათ. 7:7—11).

4. მუს ბგურაფლენთ ლოცვაწკუმა დაკავშირებით იესოშ მაგალითშე?

⁴ იესოქ პირად მაგალითით, ლოცვაწკუმა დაკავშირებით ბრელ მუდგარენ დაგურუ მუშ მოწაფეეფს. დედამიწას მსახურებაშ დროს თინა მანგარ დაკავებულ რდჷ დო მინშა ქიანაშ ხალხ გოურდჷ, ათეშენ, საჭირო რდჷ, ლოცვას დრო გეგმურთუკო დო ქოთ იქციებუდ თაშ. თინა ირიათო ლოცულენდჷ (მარ. 6:31, 45, 46). მაგალთო, ოჭმარეს იალონშა ედირთუდ, ნამდა ხვალე ჸოფედკო დო ილოცკო (მარ. 1:35). ართშა, მუჟამსით მნიშვნელოვან გადაწყვეტილება აფუდ მიოღებელ, მთელ სერ ლოცვას გათანუ (ლუკ. 6:12, 13). თეს გეძინელ, ღურაშ წოხოლენ სერს იესო თი მნიშვნელოვან დავალებაშ შესრულებაშე ფიქრენდჷ, მუდგაშ გურშენ ზეცაშე დედამიწაშა რდჷ მულირ. ათეშენ, მუსხირენშა დურაგადუ მუშ ზეციერ მუმას ლოცვათ (მათ. 26:39, 42, 44).

5. მუჭო შემლებნა მივაჸუნათ იესოშ მაგალითის?

⁵ იესოშ მაგალითშე ბგურაფლენთ, ნამდა ვა უღჷ მნიშვნელობა მუსხით დაკავებულ ვორეთ, აუცილებერ რე, ლოცვაშო დრო გეშეპჸოთათ. მაგალთო, თეშო შილებე საჭირო რდას, ოჭმარეს ადრე გებდირთათ ვარდა სერით უმოს გვიანს იბლოცათ. თაშ მოქციებათ ვოძირანთ, ნამდა ვაფასენთ ლოცვაშ ძღვინს. ართ და სახელო ლინ იშინანს, მუნერ მარდულ რდჷ, მუჟამსით პირველო გეგჷ, ნამდა შეულებუდ ღორონთის ლოცვათ დურაგადუკო. თინა იჩიებ: „მუჟამსით გებგჷ, ნამდა ნებისმიერ დროს შემლებუდ იეჰოვას დურაგადეკო თექ მიმეხვარ, თინა ჩქიმ ხოლოშიან მეგობარო მიფრჩქინკო დო გუვაუჯგუშკო ლოცვეფ“. მუშო ოკო რაგად, თე დაცალო ბრელ ფიფქრენთ, ათეშენ ჩქინ ლოცვეფ გუვაუჯგუშათინ, მორთ გუვარჩუათ ხუთ მნიშვნელოვან მხარე, მუდგაშ გურშენ შემლებნა იბლოცათ.

ᲮᲣᲗ ᲛᲜᲘᲨᲕᲜᲔᲚᲝᲕᲐᲜ ᲛᲮᲐᲠᲔ, ᲜᲐᲛᲣᲗ ᲚᲝᲪᲕᲐᲨ ᲓᲠᲝᲡ ᲝᲙᲝ ᲒᲔᲤᲗᲕᲐᲚᲘᲡᲬᲘᲜᲐᲗ

6. მუჭოთ გამოცხადებაშ 4:10, 11-შე იძირე, მუ ოკუთვნჷ იეჰოვას?

⁶ განადიდით იეჰოვა. ღორონთიშ შთაგონებათ მოციქულ იოანექ ხილუას ძირჷ 24 უხუცეს, მით ზეცას განადიდენდეს იეჰოვას დო იჩიებდეს: „სი გოკუთვნჷ დიდება, პატი დო ძალიერება“ (წეკითხით გამოცხადებაშ 4:10, 11). ართგურ ანგელოზეფს ხოლო ანაყუ მიზეზ უღნა, ნამდა განადიდან იეჰოვა, მუშენდა იეჰოვაწკუმა ართო რენა ზეცას დო ჯგირო იჩინენა თის. თეს გეძინელ, ოკვირნა ღორონთიშ კეთებულ საქმეეფს დო ორწყენა თიშ თვისებეფს, ნამუთ თე საქმეეფშე იძირე. ათეშენ, ძალიერ სურვილ უღნა, ნამდა განადიდან ღორონთ (იობ. 38:4—7).

7. მუშ გურშენ შემლებნა განვადიდათ იეჰოვა?

⁷ ჩქი ხოლო მოკონა, განვადიდათ იეჰოვა ჩქინ ლოცვეფს. მაგალთო, შემლებნა ლოცვეფს ალალას გეგმოფხანტათ, მუ მობწონა თიშ პიროვნებას დო მუს ვაფასენთ არძაშ უმოსო. ბიბლიაშ კითხირიშ დო გიმორკვიებაშ დროს ქეცადით, ქოძირათ თი თვისებეფ, ნამუთ განსაკუთრებულო მორწონა იეჰოვაშ პიროვნებას (იობ. 37:23; რომ. 11:33). უკულ ქუწით იეჰოვას, მუშენ აფასენთ თე თვისებეფს. ღორონთიშ განდიდება თიშ გურშენ ხოლო შემლებნა, ნამდა მოხვარნა, მუჭოთ ჩქი, თეშ მთელ საჯიმალოს. ხვალე თენა ვარინ, ირიათო ზრუნენს ჩქინდე დო ფთხილანა (1 სამ. 1:27; 2:1, 2).

8. მუშ გურშენ შემლებნა მადლობა ვუწუათ იეჰოვას? (1 თეს. 5:18).

⁸ გეგმოხანტით მარდულობა. მარდულობაშ ქიანაშ მიზეზ მიღნა, მუთ შემლებნა, ლოცვას მიფშინუათ (წეკითხით 1 თესალონიკელეფიშ 5:18). შემლებნა იეჰოვას მადლობა ვუწუათ თი ირფელ ჯგირშო, მუთ მიღნა, მუშენდა თე ირფელს ზუსტას თინა მარზენა (იაკ. 1:17). მაგალთო, ჩქინ ღორონთის შემლებნა მადლობა ვუწუათ სქვამ დედამიწაშე დო სარკო გუნაჭყეფუეფშე. თეს გეძინელ, შემლებნა ვუმარდუდათ სიცოცხლეშო, ნამდგათ ფხარენთ, ჩქინ ოჯახშო, მეგობრეფშო დო იმენდშო, ნამუთ ღორონთიქ მუჩეს. დო მუთ არძაშ უმოს მნიშვნელოვან რე, მოკონა მადლობა ვუწუათ თიშ გურშენ, ნამდა მიღნა თიწკუმა მეგობრობაშ პატი.

9. მუშენ ოკო გუვავითარათ დო გეგმოფხანტათ მარდულობა იეჰოვაშ მიმართ?

⁹ ჩქი თიცალ ქვეყნიერებას მიხვადუნა ცხოვრება, სოდეთ ხალხ ვეგმირჩქინანს მარდულობას. ათეშენ, შილებე მონდომაქ დემესაჭირან, ნამდა დეფიფქრათ თიშე, მუს ორთჷ იეჰოვა პირადო ჩქინო დო უკულ მარდულობა გეგმოფხანტათ. ამდღა ბრელ ადამიან მუშ სურვილეფიშ დაკმაყოფილებაშე ფიქრენს დო ვართ ხოლო თიშე, მუჭო შეულებნა მარდულობა გეგმოხანტან თი ირფელშე, მუთ უღნა. თინეფიშ აზროვნება ჩქინდა ხოლო ქიმოქმედენს-და, ჩქინ ლოცვეფ ქაგურუ სიას, სოდეთ ხვალე მოთხოვნეფ იჸი გიმოჭარილ. თექ ვა მოხვადასინ, აუცილებერ რე, გუვავითარათ მარდულობა დო ირიათო გეგმოფხანტათ თი ირფელშო, მუდგას იეჰოვა ჩქინო ორთჷ (ლუკ. 6:45).

10. მუჭო მეხვარ კიუნგ-სუკის მარდულობაშ გრძნბაქ, გაურზუკო სირთულეს? (ქოძირით სურათ).

¹⁰ მარდულობაშ გრძნობას შეულებ სირთულეეფიშ გარზებას მიმეხვარან. გუვარჩუათ ჩქინ დაშ, კიუნგ-სუკიშ შემთხვევა, ნამდგას ფილტვიშ ავთვისებიან კიბოშ დიაგნოზ გეუშქვეს.b თინა იჩიებ: „თეშ გაგებაქ გუმანადგურ. ფიფქრენდჷ, ჩქიმო ირფელქ გეთუ დო მანგარ შქურნაფილ ვორდჷ“. მუქ მეხვარ თის გარზებას? თინა ირ სერს დორულაფაშახ ჸუდეშ ორთვალშა ეშმეშ დო ლოცვას ხუთ მიზეზის მიშინუანდჷ, მუდგაშ გურშენ თიმ დღას იეჰოვაშ მარდულ რდჷ. შედეგო, დუდის უმოს მშვიდას გინაფლენდჷ დო უმოს სურვილ უღუდ, იეჰოვაშ მიმართ ჸოროფა გეგმოხანტკო. თიქ მუშ დუდშა გეგმოცად, მუჭო ოხვარ იეჰოვა მუშ ართგურ მსახურეფს, მუჟამსით სერიოზულ პრობლემეფ უღნა დო ქიმეხვად, ნამდა იეჰოვაშ ჭყოლოფათ, ჩქინ ცხოვრებას კურთხევეფ ბრელით უმოს მიღნა, ვინემ სირთულეეფ. კიუნგ-სუკცალო, ჩქი ხოლო, შემლებნა მარდულობაშ ქიანაშ მიზეზ დობგორათ თიმწკუმა ხოლო, მუჟამსით განსაცდელეფ მიღნა. ლოცვას იეჰოვაშ მიმართ მარდულობაშ გიმოხანტუა მიმეხვარებნა, გავურზათ სირთულეეფს დო ვა ვოდინუათ შინაგან სიმშვიდე.

11. მუშენ ოსაჭირდეს მოციქულეფს გაბედულება თიშ უკულ, მუთ იესოქ ზეცაშა დირთჷ?

¹¹ ქოთხით იეჰოვას, ქიმერჩან გაბედულება მსახურებაშ დროს. ონდო ზეცაშა დირთუდ, იესოქ მუშ მოწაფეეფს გაშინ, ნამდა თინეფქ ოკო დამოწმესკო ქრისტეშ გურშენ „იერუსალიმს, მთელ იუდეას, სამარიას დო დედამიწაშ არძა კუნთხუს“ (საქ. 1:8; ლუკ. 24:46—48). თეშ უკულ, ბრელ ხანს ვემკურთუმ, მუჟამსით იუდეველ წინამძღოლეფქ პეტრე დო იოანე ოჭოფეს დო სინედრიონიშ წოხოლე ქიგიორინეს. თინეფქ თე ართგურ მოციქულეფს ქადაგება უვარიეს დო დარცქინეს (საქ. 4:18, 21). მუ აკეთეს პეტრე დო იოანექ?

12. მუჭოთ საქმეეფიშ 4:29, 31-შე იძირე, მუ აკეთეს მოციქულეფქ?

¹² იუდეველ წინამძღოლეფიშ საქციელიშ პასუხო, მოციქულეფქ თინეფს თეცალ მუდგარენ უწის: „თქვანით ქიფიქრით, მუზმათ სწორ რე ღორონთიშ თოლს, თქვა მოირჩქილუათ დო ვართ ხოლო ღორონთის. ჩქი ვემმატებენა თიშე რაგად, მუთ ბძირით დო მიფრჩქილეთ“ (საქ. 4:19, 20). მუჟამსით პეტრე დო იოანე გათავისფალეს, თინეფქ შხვა მოციქულეფწკუმა ართო ხონარმაღალო ქილოცეს დო იეჰოვას მუშ ნებაშ შეიოსრულებერო თეცალ მუდგარენ ქოთხის: „ძალა ქიმეჩ სქან მონეფს, სქან სიტყვა მთელ გაბედულებათ იჩუან“. იეჰოვაქ ხეთეშე უპასუხ თინეფიშ ალალას რაგადებულ ლოცვას (წეკითხით საქმეეფიშ 4:29, 31).

13. მუშ გურაფა შემლებნა ჯიმა ჯინ-ჰიუკიშ შემთხვევაშე?

¹³ ჩქი შემლებნა მივაჸუნათ მოციქულეფიშ მაგალითის დო ვემვოტუათ ქადაგება თიმწკუმა ხოლო, მუჟამსით ხელისუფლებაშ წარმომადგენელეფ თეს მივარიენა. გუვარჩუათ ჩქინ ჯიმაშ, ჯინ-ჰიუკიშ შემთხვევა, ნამუთ ქრისტიანულ ნეიტრალიტეტიშ გურშენ ოჭოფეს. ციხეს თის დავალეს, კარცერს მითოხედუნ თი ნამთინე პატიმარშა ოჭკუმალ დო საჭირო ნივთეფ გილუღალუდკო. თის ვარიებულ აფუდ, დურაგადუკო თე პატიმარეფს შხვა ნებისმიერ საკითხშე, მუთ საქმეს ვახუდ, თინეფ შქას, ბიბლიაშ გურშენ ხოლო. თინა ღორონთის ლოცვას გაბედულებას დო ტაქტიანობას თხინდჷ, ნამდა ხეშე ვა გოუტუკო ნამთინ შესაძლებლობა, თე პატიმარეფს ჭეშმარიტებაშ გურშენ ქუდურაგადუკო (საქ. 5:29). ჯინ-ჰიუკ იჩიებ: „იეჰოვაქ უპასუხ ჩქიმ ლოცვეფს. თიქ გაბედულება დო სიბრძნე ქომუჩ, მუდგაშ ჭყოლოფათ ბრელ ბიბლიაშ გურაფა ქიდიბჭყჷ, ნამდგას გვალო მუსხირენ წუთის ვატარენდჷ საკანიშ კარწკუმა. ირ ონჯუას თე პატიმარეფშო წერილეფს ბჭარუნდჷ დო მაჟია დღას ვარზენდჷ“. ჩქი ხოლო შემლებნა დარწმუნებულ ვორდათ, ნამდა თინა ქიმმეხვარებნა ჩქინ დავალებაშ შესრულებას. ჯინ-ჰიუკცალო შემლებნა ლოცვას ღორონთის გაბედულება დო სიბრძნე ქოფთხუათ.

14. მუ მიმეხვარებნა სირთულეეფიშ დროს? (ფსალმ. 37:3, 5).

¹⁴ ქოთხით იეჰოვას მოხვარა, ნამდა გაურზათ სირთულეეფს. სირთულეეფს არძა ფხვადუთ. ნამთინეს ფიზიკურ ვარდა ემოციურ პრობლემეფ მიღნა. შილებე საჸოროფო პიროვნებაქ მიღურეს, ოჯახის რთულ სიტუაცია მიღნა, რწმენაშ გურშენ ფთხოზნა ვარდა შხვა პრობლემეფს ფხვადუთ. პანდემიეფიშ დო ომეფიშ შედეგო, ხოლო უმოს რთულ რე, ქუგურზე თე სირთულეეფს. ათეშენ, მუჭოთ ხოლოშიან მეგობარს დურაგადუანდით, თეშ გეგნუფაჩით იეჰოვას გურ დო ქოუწით, ირფელ მუდგას გინაფლენთ. თაშ ქიმიქციებუთ დო იეჰოვას ქიმიენდებუთ-და, რჯერდან, „თინა ქიმოქმედენს“ (წეკითხით ფსალმუნეფიშ 37:3, 5).

15. მუჭო შეულებ ლოცვას მიმეხვარან, გავურზათ სირთულეეფს? ქიმიჸონით მაგალით.

¹⁵ ჩქინ ოწუხებელშე, თაშ ქოფთქუათინ, დაჩემებულო ქიბლოცენთ-და, თენა მიმეხვარებნა, ქუგურზათ სირთულეეფს (რომ. 12:12). იეჰოვას ჯგირო უჩქჷ დო ორწყე, მუშა აფნა გარზებელ მუშ მსახურეფს. თინა ირჩქილე ჩქინ ხვეწინს, მუჟამსით რსხებას ფთხინთ (ფსალმ. 145:18, 19). გუვარჩუათ ართ 29 წანერ პიონერ დაშ, ქრისტინაშ შემთხვევა, მიდგაქ თე სიტყვეფიშ ჭეშმარიტება მუშ დუდშა გეგმოცად. ქრისტინას, შურო ველუდუნ თეშ ჯანმრთელობაშ სერიოზულ პრობლემეფქ ქაშუ, მუდგაშ გურშენ დეპრესიას ქინოლ. ხვალე თენა ვარინ, უმოს გვიანო, დიამუშის ხოლო თიცალ ლახალაშ დიაგნოზ გეუშქვეს, მუდგაშა მუთუნ ვემიხვარებედ. ქრისტინა იჩიებ: „ლოცვა ვემემტებ, იეჰოვას ირდღას ფთხინდჷ ძალას, ნამუთ მანგარო მოსაჭირუდ. თეს გეძინელ, ვოცადუდ, მიღუდკო ჯგირ სულიერ განრიგ, ვა გუვოჩილითეკო შეხვალამეფ დო მიღუდკო ბიბლიაშ პირად გურაფა. ზუსტას ლოცვაქ მიმეხვარ, გავურზიკო ჩქიმ ცხოვრებას არძაშ უმოს რთულ მომენტეფს. მიჩქუდ, ნამდა იეჰოვა ირიათო ჩქიმწკუმა რდჷ. თენა მოხვარუდ, მშვიდას ვორდიკო დო დუდ ბრელით უჯგუშო იბგინკო. მართალ რე, ჩქიმ ლახალაშე ხეთეშე ვა დოფსქილადექ, მარა ბგინაფლენდჷ, ნამდა იეჰოვა ირიათო პასუხენდჷ ჩქიმ ლოცვეფს დო მარზენდჷ შინაგან სიმშვიდეს“. დღას ვაგმოჭყორდან, ნამდა იეჰოვას ჯგირო უჩქჷ „მუჭო დერსხას განსაცდელშე ართგურეფ“ (2 პეტ. 2:9).

16. მუშენ მოსაჭირნა იეჰოვაშ მოხვარა, ნამდა ვევაჸუნათ ცდუნებას?

¹⁶ ქოთხით იეჰოვას მოხვარა, ნამდა ვეიაჸუნათ ცდუნებას. ჩქი არასრულყოფილეფ ვორეთ, ათეშენ ხშირას გივორეთ ცდუნებაშ წოხოლე, ნამდა ვაკეთათ თინა, მუთ გლახა რე. თეს გეძინელ, სატანა ირნერო ოცად, გემიჸუნუან დო გამჭირდან, ქივეწინააღმდეგათ ცდუნებას. ართ-ართ საშვალება, მუდგათ სატანა ოცად ჩქინ აზროვნებაშ გილალუაფას, რე უზნეო გართობა. თეცალ გართობას შეულებ ჩქინ აზროვნება უზნეო ფიქრეფით გეიოფშას, გილალუას ჩქინ შინაგან პიროვნება დო სერიოზულ ცოდვაშა ხოლო ქიმემჸონან (მარ. 7:21—23; იაკ. 1:14, 15).

17. მუჭო შემლებნა იმოფქმედათ ლოცვაშ თანახმას, ნამდა ვევაჸუნათ ცდუნებას? (ქოძირით სურათ).

¹⁷ ჩქი იეჰოვაშ მოხვარა მოსაჭირნა, ნამდა გივორჯგინათ ცდუნებას დო ვა ვაკეთათ თინა, მუთ გლახა რე. თენა იესოქ ხოლო მიშინუ ლოცვაშ ნიმუშის, მუჟამსით თქუ: „ქიმმეხვარით, ვევაჸუნათ ცდუნებას დო მირსხით უბადოშე“ (მათ. 6:13). თაშ ნამდა, მართალ რე, იეჰოვას ოკო, ვევაჸუნათ ცდუნებას, მარა ჩქი ხოლო ოკო ქოფთხუათ მოხვარა დო უკულ იმოფქმედათ ლოცვაშ თანახმას. თეშო საჭირო რე, გეგნობდგათ პრაქტიკულ ნაბიჯეფ. მაგალითო, ირნერო ოკო ვეცადათ, დუდ აურიდათ თიცალ მუდგარენეფიშ კითხირს ვარდა მორჩქილაფას, მუთ სატანაშ ქვეყნიერებას პოპულარულ რე, მარა ჩქინ გონებას გლახა ფიქრეფით გეიოფშანს (ფსალმ. 97:10). თეშ გინაწონს, ბიბლიაშ კითხირით დო გიმორკვიებათ შემლებნა გონება ჯგირ ფიქრეფით გევოფშათ. კრებაშ შეხვალამეფშა დასწრება დო მსახურებას მონაწილებაშ მეღება ხოლო მიმეხვარებნა, არასწორ ფიქრეფშე დოფთხილუათ ჩქინ აზროვნება. მუჟამსით თე ირფელს გუვაკეთენთ, იეჰოვა მოპირნა, ნამდა „ვა დუშვენს თიცალ ცდუნებას, ნამდგაშა გარზება [ვეშმალებენა]“ (1 კორ. 10:12, 13).

18. მუ ოკო მაფდან გინოჭყვიდილ?

¹⁸ ამდღა, განსაკუთრებულო თე ბოლო დღალეფს, თითოულს მოსაჭირნა ლოცვა, ნამდა ვა ვოდინუათ იეჰოვაშ ართგურობა. საჭირო რე, ირდღას დრო გეგმურთათ ლოცვას დო ალალას ქუდურაგადუათ იეჰოვას. თის ოკო, ნამდა გურ გეგნუფაჩათ ლოცვას (ფსალმ. 62:8). გინოჭყვიდილ მაფდან, თე დროს განვადიდათ იეჰოვა დო მადლობა ვუწუათ თი ირფელშო, მუდგას ჩქინო ორთჷ. თეს გეძინელ, ქოფთხუათ გაბედულება მსახურებაშო დო მოხვარა, ნამდა გავურზათ სირთულეეფს დო ვევაჸუნათ ცდუნებეფს. მითინს დო მუთუნს ვემეჩათ უფლება გეცილან, რეგულარულო დურაგადუათ იეჰოვას ლოცვაშ საშვალებათ. მუჭო პასუხენს იეჰოვა ჩქინ ლოცვეფს? თე კითხვაშ პასუხის უკულიან სტატიას გუვარჩიენთ.