მუ მნიშვნელობა უღჷ გამოცხადებაშ წიგნის თქვან მომავალშო?

1. მუ მნიშვნელოვან გადაწყვეტილება აფჷ ირკოჩის მიოღებელ?

ამდღა ხალხის მნიშვნელოვან გადაწყვეტილება აფჷ მიოღებელ — იეჰოვაშ კანონიერ მართველობას დუკინენა ხუჯის დო ვარ თიშ უბადო ნტერიშ, სატანაშ, მხარეს გედირთუნა? ნეიტრალურო დოსქილადა ვეგშურს, ვარდა ართიშ მხარეს ოკო იჸუან, ვარდა — მაჟიაშ. თე გადაწყვეტილებაშა რე დამოკიდებულ თინეფიშ მარადიულ სიცოცხლე (მათ. 25:31—33, 46). დიდ გასაჭირიშ დროს თინეფს რსხებაშ ვარდა განადგურებაშ ნიშან გეძდან იჸი (გამოცხ. 7:14; 14:9—11; ეზეკ. 9:4, 6).

2. ა) მუშ კეთებას ელამჩანა ებრაელეფიშ 10:35—39? ბ) მუს მოხვარნა გამოცხადებაშ წიგნ?

² წეკითხით ებრაელეფიშ 10:35—39. იეჰოვაშ მართველობაშ მხარე გიშაგორილ ქუგაფნან-და, ჭკვერულ გადაწყვეტილება მეიღებნა. ასე თქვა გოკონა, შხვეფს ხოლო ქიმეხვარათ სწორ გადაწყვეტილებაშ მეღებას, მუდგაშოთ გამოცხადებაშ წიგნის ენოჭარილ ინფორმაცია გიმგოდირთუნა. თე წიგნშე იძირე, მუ ელნა თინეფს, მით იეჰოვას ოწინააღმდეგნა დო მუ კურთხევეფს მიღენა თიშ ართგურეფ. ჯგირ იჸუაფ, გეგმიბრკვიათ თე ჭეშმარიტება. თენა გამანგარენს ჩქინ გადაწყვეტილებას, ნამდა ვემსახურათ იეჰოვას. თეს გეძინელ, შემლებნა ნაგურეფ შხვეფიშ მახვარებელო გეგმიბრინუათ, ნამდა თინეფქ ხოლო სწორ გადაწყვეტილება მიღან დო თე გადაწყვეტილებაშ მიხედვით იცხოვრან.

3. მუს გუვარჩიენთ თე სტატიას?

³ თე სტატიას გუვარჩიენთ კითხვეფს: მუ ელნა თინეფს, მით ღორონთიშ მართველობას უკინენა ხუჯის? დო მუ ელნა თინეფს, მით ისხუნუანს გამოცხადებაშ წიგნის მოშინაფილ ალიშფერ მხეციშ მხარე დეკინას?

მუ ელნა ართგურეფს?

4. ნამ ჯგუფის ორწყე მოციქულ იოანე ზეცას იესოწკუმა ართო?

⁴ მოციქულ იოანე მუშ ხილუას ორწყე ჟირ ჯგუფის, ნამუთ იეჰოვაშ მართველობას უკინენს ხუჯის დო ღებულენს მარადიულ სიცოცხლეს. პირველ ჯგუფშა მიშურს 144 000 პიროვნება (გამოცხ. 7:4). თინეფქ დედამიწაშე იჸუეს ჸუნაფილქ, ნამდა იესოწკუმა ართო იმართველან, ზეციერ სამეფოს (გამოცხ. 5:9, 10; 14:3, 4). იოანე თინეფს იესოწკუმა ართო გერენან თეშ ორწყე სიონიშ ზეციერ გვალას (გამოცხ. 14:1).

5. მუ ელჷ მალას 144 000-იშ დოსქილადირ ნაწილს?

⁵ მოციქულეფიშ დროშე მოჸუნაფილ ამდღარშახ ანთასობით პიროვნებაქ იჸუ გიშაგორილქ, ნამდა ჸოფედესკო 144 000-იშ ნაწილ (ლუკ. 12:32; რომ. 8:17). მარა მოციქულ იოანექ თქუ, ნამდა ბოლო დღალეფიშ პერიოდის თინეფშე ხვალე ჭიჭე რაოდენობა იჸუაფუდ დედამიწას დოსქილადირ. თე „დოსქილადირეფ“, საბოლა „ბეჭედის“ დიდ გასაჭირიშ დოჭყაფაშახ მიღენა, მუთ თიშ ნიშან იჸუაფ, ნამდა იეჰოვაშე აჸინა მოწონა მეღებულ (გამოცხ. 7:2, 3; 12:17). უკულ, დიდ გასაჭირიშ პერიოდის, თე დოსქილადირ ნაწილ ზეცაშა იჸუაფ ჸუნაფილ, ნამდა ქაკათას თინეფს, მიდგაქ, ღურაშახ ართგურო რდესინ თიშ გურშენ, უკვე მიღეს ზეციურ ჯილდო. თინეფ იესოშ თანამართველეფ იჸუაფნა ზეციერ სამეფოს (მათ. 24:31; გამოცხ. 5:9, 10).

6, 7. ა) ხოლო ნამ ჯგუფის ორწყე იოანე დო მუს ბგურაფლენთ თიშ გურშენ? ბ) მუშენ რე მნიშვნელოვან გამოცხადებაშ მა-7 დუდ ჟირხოლო ჯგუფშო?

⁶ ზეციერ ჯგუფიშ ძირაფაშ უკულ იოანე ორწყე „ანაყუ ხალხის“. 144 000-იშ გინაწონს, თე ჯგუფის მუზმა კოჩიქ იჸუასინ განსაზღვრულ ვა რე (გამოცხ. 7:9, 10). მუს ბგებულენთ თინეფიშ გურშენ? იოანეს უწუეს: „თენეფქ დიდ გასაჭირ მიკორთეს, გინძე მიკაქუნალ გინახვეს დო დარჩიალეს კირიბიშ ზისხირით“ (გამოცხ. 7:14). „ანაყუ ხალხ“ დიდ გასაჭირს გინასქიდუ, იცხოვრენს დედამიწას დო მიღენს სარკო კურთხევეფს (ფსალმ. 37:9—11, 27—29; იგავ. 2:21, 22; გამოცხ. 7:16, 17).

⁷ ზეცაშა მაულარო ვორეთ გიშაგორილ დო ვარ დედამიწაშ მაცხოვრებელო, ქუვორწყეთო ჩქინ დუდის თინეფ შქას, მით გამოცხადებაშ მა-7 დუდის რენა მოშინაფილ? მუ დიდებულ დრო იჸუაფ თენა ჟირხოლო ჯგუფშო! მანგარ დიდ ხიოლს მიბღენთ თიშ შედეგო, ნამდა იეჰოვაშ მართველობას დუკინით ხუჯ. ხოლო მუს იჩიებ გამოცხადებაშ წიგნ დიდ გასაჭირიშ გურშენ? (მათ. 24:21).

მუ ელნა ღორონთიშ მოწინააღმდეგეეფს

8. მუჭო დიჭყაფუ „დიდ გასაჭირ“ დო მუ რეაქცია აღვენუ ადამიანეფიშ უმენტაშის?

⁸ მუჭოთ წოხოლენ სტატიას რე მოშინაფილ, თე ქვეყნიერებაშ პოლიტიკურ სისტემა მალას მიკართუ დიდ ბაბილონს, ტყურარელიგიაშ მსოფლიო იმპერიას (გამოცხ. 17:16, 17). თენა იჸუაფ „დიდ გასაჭირიშ“ დოჭყაფაშ ნიშან. გინაჭყვიდირაფუანსო თენა ბრელ ადამიანს იეჰოვაშ მსახურებას? გამოცხადებაშ მა-6 დუდშე იძირე, ნამდა თე რთულ პერიოდის, თინეფ მით იეჰოვას ვამსახურნა, დუდიშგითაფორაფალიშ გორუას ქიდიჭყანა თე ქვეყნიერებაშ პოლიტიკურ დო კომერციულ სისტემეფს, ნამუთ გვალეფშა რე შედარებულ. თე ხალხ ვეგედირთუ ღორონთიშ სამეფოშ მხარეს, ათეშენ იეჰოვა მოწინააღმდეგეეფო მირჩქინანს თინეფს (ლუკ. 11:23; გამოცხ. 6:15—17).

9. მუჭო იჸუაფ ღორონთიშ ხალხ შხვეფშე გიშართილ დიდ გასაჭირიშ პერიოდის დო მუ მაჸუნუ თეს შედეგო?

⁹ სინამდვილეს, იეჰოვაშ ართგურეფ შხვეფშე გიშართილ იჸუაფნა თე რთულ პერიოდის. დედამიწას ხვალე თინეფ იჸუაფნა, მით ემსახურებნა იეჰოვა ღორონთის დო ვარიას ქოთქუანა მხეციშ მხარეს გერნაშენ (გამოცხ. 13:14—17). თინეფიშ ართგურობა იეჰოვაშ მოწინააღმდეგეეფს გაღიზიანენს. შედეგო ერეფიშ კოალიცია მთელ დედამიწას ღორონთიშ არძა მსახურიშ წინააღმდეგ გიშელენს. ბიბლია თეს „გოგ მაგოგელიშ“ დუდიშ გენთხაფას უძახ (ეზეკ. 38:14—16).

10. მუჭოთ გამოცხადებაშ 19:19—21-ის რე ეჭარილ, მუ რეაქცია აღვენუ იეჰოვას, მუჟამსით მუშ ხალხის დუდის ქიგიანთხუნა?

¹⁰ მუ რეაქცია აღვენუ იეჰოვას, მუჟამსით მუშ ხალხის დუდის ქიგიანთხუნა? თინა იჩიებ: „გებრისხებუქ“ (ეზეკ. 38:18, 21—23). გამოცხადებაშ მა-19 დუდ ეჭარუნს, მუ მოხვადუ უკულ — იეჰოვა მუშ სქუას გოუტენს, ნამდა დოთხილუას ღორონთიშ ხალხ დო გიორჯგინას ნტერეფს. იესო იშო ქიგიანთხუ თინეფს დუდის „ზეციერ ლაშქარწკუმა“, ართგურ ანგელოზეფ დო 144 000-წკუმა, ართო (გამოცხ. 17:14; 19:11—15). მუ მაჸუნუ თეს? ღორონთიშ მოწინააღმდეგე არძა ადამიან დო ორგანიზაცია მისპუ (წეკითხით გამოცხადებაშ 19:19—21).

ქორწილ ომიშ უკულ

11. ნამ რე გამოცხადებაშ წიგნის მოშინაფილ არძაშ უმოს მნიშვნელოვან მოვლენა?

¹¹ წერმიდგინით, მუჭო იგინანა დუდის ართგურეფ, მუჟამსით დედამიწას ღორონთიშ ნტერეფიშ განადგურებას გინასქიდნა. თენა მართალო მანგარ სახიოლო დრო იჸუაფ! (გამოცხ. 19:1—3). ხიოლიშ ხონარ იჸუაფ ზეცას, მუჟამსით დიდ ბაბილონ გენადგურებ. მარა უმოს დიდ ხიოლ „კირიბიშ ქორწილს“ მაჸუნუ (გამოცხ. 19:6—9).

12. მუჭოთ გამოცხადებაშ 21:1, 2-შე იძირე, მუჟამ იჸუაფ „კირიბიშ ქორწილ“?

¹² მუჟამ იჸუაფ ქორწილ? 144 000 ცხებულ ზეცას არმაგედონიშ წოხოლე გეკიშაყარუ (წეკითხით გამოცხადებაშ 21:1, 2). თაშ ნამდა, თიმწკუმა ვეჸუაფ „კირიბიშ ქორწილიშ“ დრო. „კირიბიშ ქორწილ“ არმაგედონიშ ომიშ უკულ იჸუაფ, მუჟამსით ღორონთიშ ნტერეფ მისპუნა (ფსალმ. 45:3, 4, 13—17).

13. მუ მაჸუნუ „კირიბიშ ქორწილს“?

¹³ მუ მაჸუნუ „კირიბიშ ქორწილს“? მუჭოთ ქორწილ აკავშირენს ქომოლკოჩ დო ოსურკოჩის ართიანწკუმა, თეშ თე სიმბოლურ ქორწილ დაკავშირენს მეფეს, იესო ქრისტეს, 144 000-წკუმა, „მოჭყუდწკუმა“. თე მნიშვნელოვან მოვლენაშ შედეგო გაკინწყუაფ ახალ მთავრობა, ნამუთ 1 000 წანას მართუნდას იჸი დედამიწას (გამოცხ. 20:6).

წმინდა ქალაქ დო თქვან მომავალ

14, 15. მუს ადარენს გამოცხადებაშ 21-ა დუდ 144 000-ის? (ქოძირით სურათ გალენ გვერდის)

¹⁴ თეშ უკულ გამოცხადებაშ 21-ა დუდ 144 000-ის ადარენს უზომეთ სქვამ ქალაქის, ნამდგას „ახალ იერუსალიმ“ ჯოხო (გამოცხადება 21:2, 9). თე ქალაქის ფუნდამენტო უღუდ 12 ქუა „კირიბიშ 12 მოციქულიშ 12 სახელით“. მუშენ მიაქცუ იოანექ თეს ყურადღება? ართ-ართ ქუას თიქ მუშ სახელ გეშეკითხჷ. თენა მართალო დიდებულ პატი რდჷ (გამოცხ. 21:10—14; ეფეს. 2:20).

¹⁵ თე ქალაქ შხვეფს ვა გუდჷ, თიშ მთავარ ქუჩა წმინდა ოქროშ რდჷ. თის მარგალიტიშ 12 კარმინოლ უღუდ; გალავანეფ დო ფუნდამენტეფ მონწყილ რდჷ ძვირფას ქუალეფით; ქალაქის არძა მხარეშე ზუსტას ართმანგ ზომა უღუდ (გამოცხ. 21:15—21). მარა იოანექ ქიმეხვად, ნამდა თე ქალაქის მუდგარენ ორკუდ. ყურადღება ქიმიაქცით, მუს მირაგადნა თინა: „ტაძარ ვამძირ თექ, მუშენდა თიშ ტაძარ რე ირფელიშშემალებე ღორონთ იეჰოვა დო კირიბ. ქალაქის სინთეშო ვართ ჩხანა ოსაჭირუდ დო ვართ თუთა, მუშენდა ღორონთიშ დიდებათ რდჷ გოსინთელ დო კირიბ რდჷ თიშ ოსინთაფალ“ (გამოცხ. 21:22, 23). „ახალ იერუსალიმიშ“ მახორუეფს პირდაპირ კავშირ აღვენუნა იეჰოვაწკუმა (ებრ. 7:27; გამოცხ. 22:3, 4). თაშ ნამდა, იეჰოვა დო იესო რენა თე ქალაქიშ ტაძარ.

16. მუ მოხვადუ კაცობრიობაშო ღორონთიშ სამეფოშ ანთასწანიან მართველობაშ პერიოდის?

¹⁶ თინეფს გურ ხიოლით აფშაფნა, მუჟამსით ფიქრენა თე ქალაქშე. მარა თენა თინეფს ხოლო ოკო ოინტერესდან, მიდგას დედამიწას ცხოვრებაშ იმენდ უღნა. ღორონთიშ სამეფოშ ანთასწანიან მართველობაშ პერიოდის „ახალ იერუსალიმ“ ქიანაშ კურთხევას მოუღანს დედამიწას. იოანექ ძირჷ, ნამდა თე კურთხევეფ მიშჷ, მუჭოთ „სიცოცხლეშ წყარიშ მალწყარ“. მალწყარიშ ჟირხოლო მხარეს „სიცოცხლეშ ჯალეფ“ გეჩანდჷ. თინეფ მიკიღანდეს ფურცელეფს, ნამუთ „ხალხეფიშ ოსქილიდაფარო რდჷ“ (გამოცხ. 22:1, 2). თი დროს მახორუ არძა ადამიანს აღვენუ საშვალება, სარგებელ მიღას თე ირფელშე. ჭიე-ჭიეთ არძა მორჩილ ადამიან გესრულყოფილებ. თექ მეტო ვეჸუაფ ლახალა, ჭუა დო ოწუხებელიშ ჩილამურ (გამოცხ. 21:3—5).

17. მუჭოთ გამოცხადებაშ 20:11—13-ს ჭარჷ, მი მიღენს კურთხევეფს ღორონთიშ სამეფოშ ანთასწანიან მართველობაშ პერიოდის?

¹⁷ მის აში ღორონთიშ სამეფოშ თე კურთხევეფ? არძაშ პირველო არმაგედონს გინოსქილადირ ანაყუ ხალხის დო თინეფს, მით ახალ ქვეყნიერებას დებადებნა. მარა გამოცხადებაშ მა-20 დუდ თიშ პირობას ხოლო ირზენს, ნამდა ღურელეფ გეთელებნა (წეკითხით გამოცხადებაშ 20:11—13). ართგურ მართალეფ, მიდგაქ ულირს ღურეს დო თი უმართლოეფ, მიდგას ვა შიბნა დასაბაღ შესაძლებლობა, ქიდიგურუესკო იეჰოვაშ გურშენ, კინ დართუნა სიცოცხლეს დედამიწას (საქ. 24:15; იოან. 5:28, 29). ნიშნენსო თენა, ნამდა ანთას წანაშ დინახალე არძა ღურელ გეთელებუ? ვარ. მიდგას ღურაშახ უღუდ შესაძლებლობა, ემსახურკო იეჰოვას, მარა თეშენ შეგნებულო თქუ ვარია, ვეგეთელებუ. თინეფს უღდეს საშვალება, მარა ვეგმირინუეს, მუდგათ დამტკიცეს, ნამდა ვემსახურენა სიცოცხლეს სამოთხეთ გინორთელ დედამიწას (მათ. 25:46; 2 თეს. 1:9; გამოცხ. 17:8; 20:15).

საბოლა გამოცდა

18. მუ მდგომარეობა იჸუაფ დედამიწას 1 000 წანაშ ბოლოს?

¹⁸ 1 000 წანაშ ბოლოს, დედამიწას მახორუ არძა ადამიან, სრულყოფილ იჸუაფ. მეტო მითინშა ვემოქმედენს ადამშე მემკვიდრეობათ მეღებულ ცოდვა (რომ. 5:12). ჭყალა, ნამდგაქ ადამიშ ცოდვას მაჸუნ, ბოლოშახ იჸუაფ ჩათხინაფილ. გასრულყოფილებურ ადამიანეფ თე გაგებათ „გეცოცხლებნა“ (გამოცხ. 20:5).

19. მუშენ იჸუაფ საჭირო საბოლა გამოცდა?

¹⁹ ჩქი მიჩქნა, ნამდა იესოქ ვეიაჸუნ სატანას დო ვადინუ ღორონთიშ ართგურობა. თიქ ქუგურზჷ გამოცდეფს, მარა ქიმიქციებუნო თაშ არძა სრულყოფილ ადამიან, მუჟამსით სატანას საშვალება ქიმიაჩამუ, გეგმოცადას თინეფ? არძას შეიალებე თე კითხვაშა პასუხიშ მეჩამა, მუჟამსით სატანა გათავისფალებურ იჸუაფ უფსკრულშე ანთას წანაშ ბოლოს (გამოცხ. 20:7). მით თე ბოლო გამოცდაშ დროს ვადინუანს ართგურობას, მარადიულ სიცოცხლეს მიღენს დო გეხარენს ნამდვილ თავისუფლებათ (რომ. 8:21). მით ღორონთიშ წინააღმდეგ მიდურს, სამუდამოთ გენადგურებ ეშმაკ დო თიშ დემონეფწკუმა ართო (გამოცხ. 20:8—10).

20. მუს გინაფლენთ, მუჟამსით ფიქრენთ გამოცხადებაშ წიგნის მოჩამილ სარკო წინასწარმეტყველებეფშე?

²⁰ მუს გინაფლენთ გამოცხადებაშ წიგნიშ თე მოკლე გარჩიებაშ უკულ? გურს ხიოლით ვეიფშანანო თქვან დუდიშ წარმოდგენა, თე სარკო წინასწარმეტყველებეფიშ შესრულებაშ დროს? ვენგოჭყვიდირაფუანანო თენა, შხვეფს ხოლო ქელუჩათ, თქვანწკუმა ართო მიღან მონაწილება ღორონთიშ წმინდა თაყვანიშცემას? (გამოცხ. 22:17). მუჟამსით გონებას მიღნა დო გურს ალმახიოლანა თე მომავალ მოვლენეფ, ჩქი ხოლო მირჩქინდუნა სურვილ, იოანეცალო ფთქუათ: „ამინ! ქუმორთ, უფალ იესო!“ (გამოცხ. 22:20).