მუ მნიშვნელობა უღჷ გამოცხადებაშ წიგნის ღორონთიშ ნტერეფშო?

1. მუს იჩიებ გამოცხადებაშ წიგნ ღორონთიშ ხალხიშ გურშენ?

გამოცხადებაშ წიგნშე ვორწყეთ, ნამდა ღორონთიშ სამეფოქ მართველობა ქიდიჭყჷ ზეცას დო სატანაქ გითოჸოთამილქ იჸუ თევრეშე (გამოცხ. 12:1—9). თენა ზეცას მშვიდობას ქუმუღანდჷ, მარა დედამიწას — არეულობას, მუშენდა, სატანა გარისხებულ რე დო მთელ მუშ რისხუა გინოღალირ აფჷ ღორონთიშ ართგურ მიწიერ მსახურეფშა (გამოცხ. 12:12, 15, 17).

2. მუ მიმეხვარებნა, ქუდოფსქიდათ ართგურეფქ?

² მუჭო შემლებნა ართგურო ქუდოფსქიდათ სატანაშ წინააღმდეგობეფიშ უმკუჯინუო? (გამოცხ. 13:10). ართ-ართ, მუთ მიმეხვარებნა, თიშ რჩქინა რე, მუ მელნა მომავალს. მაგალთო, გამოცხადებაშ წიგნის მოციქულ იოანე ენწყუნს, მუ კურთხევეფს მიბღენთ მალას. თეშა მიშურს ღორონთიშ ნტერეფიშ მოსპუალა. მორთ ქობძირათ, მუჭო ეჭარუნს გამოცხადება თინეფს დო მუ აღოლენა მალას.

სიმბოლურ ნინათ ეჭარილ ღორონთიშ ნტერეფ

3. მუ სიმბოლოეფს ირინუანს გამოცხადებაშ წიგნ?

³ გამოცხადებაშ პირველ მუხლ მეჩიებნა, ნამდა ინფორმაცია, მუდგას თე წიგნის ბკითხულენთ, გინოჩამილ რე „ნიშნეფით“, შხვა სიტყვეფით ქოფთქუათინ, სიმბოლურ ნინათ (გამოცხ. 1:1). თექ ჩიება მეურს მუსხირენ მხეციშ გურშენ, ნამუთ ღორონთიშ ნტერეფს განასახიერენს. მაგალთო, თექ რე მოშინაფილ „ზღვაშე ეშმეშუნ ფერ ვითქალამ დო შქვითდუდამ მხეც“ (გამოცხ. 13:1). თის ეკოჸუნდჷ „შხვა მხეც ხოლო, ნამუთ დიხაშე ეშმეშ“. თინა დრაკონცალო იჩიებ დო „დაჩხირ ხოლო გიმუღ ცაშე“ (გამოცხ. 13:11—13). უკულ მიკორჩქინდუ ხოლო ართ „შქვითდუდამ დო ვითქალამ ალიშფერ მხეც“, ნამდგას მეძავ გეხე. თე სუმ მხეც ღორონთიშ ნტერ რე. თინეფ ბრელ ხან რე, მუთ ღორონთის დო თიშ სამეფოს ონტერნა (გამოცხ. 17:1, 3).

4, 5. მუჭო მოხვარნა დანიელიშ 7:15—17 გამოცხადებას მოშინაფილ სიმბოლოეფიშ გაგებას?

⁴ სოიშახ გებგენდათ, მი რენა თე ნტერეფ, საჭირო რე, ქინვანჭათ, მუს ნიშნენს თე სიმბოლურ ნინა. თეშ ენწყუმას კინ ბიბლია მოხვარნა. გამოცხადებაშ წიგნის მოჩამილ ბრელ სიმბოლო უკვე ენწყუმილ რდჷ ბიბლიაშ შხვა წიგნეფს, მაგალთო, წინასწარმეტყველ დანიელქ სიზმარო ძირჷ, ნამდა „ზღვაშე ოთხ ქვერსემ შხვადოშხვანერ მხეციქ გეშართჷ“ (დან. 7:1—3). დანიელ ენწყუნს, მი რენა თე მხეცეფ. თე ოთხ ქვერსემ მხეც ნიშნენს ოთხ „მეფეს“, შხვა სიტყვეფით ქოფთქუათინ, მართველობას (წეკითხით დანიელიშ 7:15—17). თენა არგამათ მოძირანა, ნამდა გამოცხადებაშ წიგნის მოშინაფილ მხეცეფ ხოლო პოლიტიკურ მართველობეფ რენა.

⁵ თე სტატიას გუვარჩიენთ გამოცხადებას მოშინაფილ ნამთინე სიმბოლოს. ქობძირუნთ, მუჭო მოხვარნა ბიბლია თიშ გაგებას, მუს ნიშნენს თინეფ. დუდშე ქიდიბჭყანთ მხეცეფით. დიო ქობძირუნთ, მი რენა დო მუ აღოლენა თინეფს დო ბოლოს გუვარჩიენთ, მუს ნიშნენს თენა ჩქინო.

გაგებულქ იჸუ, მი რენა ღორონთიშ ნტერეფ

6. მის ასიმბოლოენს გამოცხადებაშ 13:1—4-ის მოშინაფილ შქვითდუდამ მხეც?

⁶ მის ასიმბოლოენს შქვითდუდამ მხეც? (წეკითხით გამოცხადებაშ 13:1—4). თე მხეც ლეოპარდის მოგენს, მარა კუჩხეფ თუნთიშ უღჷ, პიჯ — ლომიშ დო ვით ქა გედგჷ. დანიელქ ხოლო თე ოთხ მხეც ძირჷ. გამოცხადებას თე ოთხ ცხოველ ართ მხეცო რე მოშინაფილ, მარა დანიელიშ წიგნის — ცალ-ცალკე. თე მხეც ხვალე ართ მთავრობას ვარდა მსოფლიო მპყრობელს ვა ნიშნენს. თიშ გურშენ იოანე იჩიებ, ნამდა ძალაუფლებაქ ქიმიაჩ არძა ტომშა დო ხალხშა, ნინაშა დო ერშა. თაშ ნამდა, თინა ბრელით უმოს მეტ რე, ვინემ ართ ნამდგაინ მთავრობა (გამოცხ. 13:7). თე მხეც განასახიერენს არძა პოლიტიკურ მართველობას, ნამდგას დიდ ძალაუფლება უღუდ მთელ მსოფლიოსb (ეკლ. 8:9).

7. მუს ასიმბოლოენს მხეციშ შქვით დუდშე თითოულ?

⁷ მუს ასიმბოლოენს შქვით დუდშე თითოულ? პასუხიშ გაგებას გამოცხადებაშ მა-17 დუდ მიმეხვარებნა. თექ ჩიება მეურს მა-13 დუდის მოშინაფილ მხეციშ გურშენ. გამოცხადებაშ 17:9, 10-ის ბკითხულენთ: „შქვით დუდ შქვით გვალას ნიშნენს . . . დო შქვით მეფეს. ხუთიქ ქუდანთხჷ, ართ რე, ბოლოს დიო ვა მურთუმ, მარა, მუჟამსით ქუმურს, ჭიჭე ხანით ქუდოსქიდუ“. თი პოლიტიკურ ძალეფშე, ნამდგას სატანა ირინუანდჷ, შქვითის, მუჭოთ დუდეფს, არძაშ უმოს ძალაუფლება უღუდ. თე შქვით მსოფლიო მპყრობელ განსაკუთრებულო აჩაგრენდჷ ღორონთიშ ხალხის. მოციქულ იოანეშ დროს თე შქვითშე ხუთიშ მართველობა უკვე თებულ რდჷ. თენეფ რდეს ეგვიპტე, ასურეთ, ბაბილონ, მიდია-სპარსეთ დო საბერძნეთ. მამშვა მართველიშ, რომიშ, დროს ძირჷ იოანექ გამოცხადება. ნამ იჸუაფუდ მაშქვითა დო ბოლო მსოფლიო მპყრობელ?

8. მის ასიმბოლოენს მხეციშ მაშქვითა დუდ?

⁸ მუჭოთ ასე ბძირუნთ, დანიელიშ წინასწარმეტყველება მოხვარნა, ქიგებგათ, მი რე მხეციშ მაშქვითა დო ბოლო დუდ. მი იჸუაფუდ მსოფლიო მართველ აღსასრულიშ პერიოდის, „უფალიშ დღას“? (გამოცხ. 1:10). თენა რე ინგლისიშ დო ამერიკაშ შეერთებულ შტატეფიშ კავშირ, შხვა სიტყვეფით ქოფთქუათინ, ინგლის-ამერიკაშ მსოფლიო მართველობა. ათეშენ შემლებნა ფთქუათ, ნამდა თენა რე გამოცხადებაშ 13:1—4-ის მოშინაფილ მხეციშ მაშქვითა დუდ.

9. მუს ასიმბოლოენს მხეც, ნამდგას „კირიბიშ ქალეფცალ ჟირ ქა“ უღუდ?

⁹ გამოცხადებაშ მა-13 დუდ მეჩიებნა, ნამდა მაშქვითა დუდ — ინგლის-ამერიკაშ მსოფლიო მართველობა — მოქმედენს, მუჭოთ მხეც, ნამდგას „კირიბიშ ქალეფცალ ჟირ ქა უღჷ, მარა დრაკონცალო [იჩიებ]“. თე მხეცის „დაჩხირ ხოლო გიმუღ ცაშე დედამიწაშა ადამიანეფიშ თოლიშ წოხოლე“ (გამოცხ. 13:11—15). გამოცხადებაშ მა-16 დო მა-19 დუდეფს თინა მოშინაფილ რე, მუჭოთ „ტყურაწინასწარმეტყველ“ (გამოცხ. 16:13; 19:20). დანიელ ხოლო იჩიებ, ნამდა ინგლის-ამერიკაშ მსოფლიო მართველობა კოჩიშ თოლს ვა უძირუნ ფერ უბედრობას ქიმიღანს (დან. 8:19, 23, 24). ზუსტას თექ მოხვად მაჟია მსოფლიო ომიშ დროს. ბრიტანელ დო ამერიკელ მეცნიერეფიშ გიმოგონებულ ჟირ ატომურ ბომბიშ გიმორნაფაქ დაჩქარ თე ომიშ თება. თე ბომბეფიშ გიმოგონებათ ინგლის-ამერიკაშ მსოფლიო მართველობაქ „დაჩხირ გეგმეღ ცაშე დედამიწაშა“.

10. მუს ასიმბოლოენს მხეციშ ქანდაკება? (გამოცხ. 13:14, 15; 17:8, 11)

¹⁰ უკულ მიკორჩქინდუ ხოლო ართ მხეც. თინა მანგარო მოგენს თეიშახ მოშინაფილ შქვითდუდამ მხეცის, მარა თინეფ შქას განსხვავება ხოლო რე. თე მხეც ალიშფერ რე. თინა მოშინაფილ რე, მუჭოთ „მხეციშ ქანდაკება“ დო „მაბრუო მეფე“c (წეკითხით გამოცხადებაშ 13:14, 15; 17:8, 11). მოციქულ იოანე იჩიებ, ნამდა თე „მეფექ“ გამკორჩქინდჷ, მედინ დო უკულ კინ გამკორჩქინდჷ. იოანეშ ნარაგად ზუსტას მეურე გაერთიანებულ ერეფიშ ორგანიზაციას, ნამუთ ხეს უნწყუნს მსოფლიო პოლიტიკურ სისტემაშ ინტერესეფს. პირველო თიქ მიკორჩქინდჷ, მუჭოთ ერთა ლიგა; მაჟია მსოფლიო ომიშ დროს მედინ დო ბოლოს კინ გემკორჩქინდჷ, მუჭოთ გაერთიანებულ ერეფიშ ორგანიზაცია.

11. მუს ორთნა მხეცეფ ამდღა დო მუშენ ოკო ვა მოშქურდან თინეფშა?

¹¹ მხეცეფ ადამიანეფს იეჰოვაშ დო თიშ ხალხიშ წინააღმდეგ ეიახნარენა. სიმბოლურ გაგებათ, თინეფ შაყარანა „მთელ მსოფლიოშ მეფეეფს“ არმაგედონშო, ნამუთ იჸუაფ „ირფელიშშემალებე ღორონთიშ დიდ დღას“ (გამოცხ. 16:13, 14, 16). ჩქინ დიდებულ ღორონთ იეჰოვა ხეთეშე იმოქმედენს თინეფიშ ორსხებელო, მით მუშ მართველობაშ მხარეს გერენა (ეზეკ. 38:21—23).

12. მუ ელჷ არძა მხეცის?

¹² მუ ელჷ არძა მხეცის? პასუხ მოჩამილ რე გამოცხადებაშ 19:20-ის: „ოჭოფეს მხეც დო თიწკუმა ართო ტყურაწინასწარმეტყველ, ნამუთ სასწაულეფს ორთუდ თიშ წოხოლე დო თეთ შეცდომაშა მიშაჸუნდჷ თინეფ, მით ღებულენა მხეციშ ნიშანს დო თიშ ქანდაკებას ცენა თაყვანს. ჟირხოლო ცოცხალო ქინაჸათეს დაჩხირიშ დო გოგირდიშ ტბას.“ თაშ ნამდა, ღორონთიშ თე ნტერეფ მუნეფიშ მართველობაშ დროს სამუდამოთ მისპუნა.

13. მუ სირთულეეფს ურჩქინანა ქრისტიანეფს პოლიტიკურ მართველეფ?

¹³ მუს ნიშნენს თენა ჩქინო? მუჭოთ ქრისტიანეფ, ჩქი ღორონთიშ დო თიშ სამეფოშ ართგურეფ ოკო ვორდათ (იოან. 18:36). თეშო საჭირო რე, ვორდათ ნეიტრალურეფ თე ქვეყნიერებაშ პოლიტიკურ საკითხეფწკუმა დაკავშირებით. თენა შილებე მანგარ ძნელ რდას, მუშენდა ქვეყნიურ მართველეფ ჩქინდე ითხინა, სრულას ქუდუკინათ ხუჯ თინეფს ქოთ სიტყვათ დო ქოთ საქმეთ. მით თინეფს დოჸუნს, ღებულენს მხეციშ ნიშანს (გამოცხ. 13:16, 17). მიდგას თე ნიშან მიაჩამუ, მიოდინუანს იეჰოვაშ მოწონას დო მარადიულ სიცოცხლეშ საშვალებას (გამოცხ. 14:9, 10; 20:4). თაშ ნამდა, მუდგანერო ვა მანძალენდან, მანგარ მნიშვნელოვან რე, ვა ვოდინუათ ნეიტრალურ პოზიცია.

დიდ მეძავიშ საონჯღორო ბოლო

14. მუ სარკო მუდგარენ ძირჷ მოციქულ იოანექ, ნამუთ გამოცხადებაშ 17:3—5-ის რე ეჭარილ?

¹⁴ წეკითხით გამოცხადებაშ 17:3—5. მოციქულ იოანე იჩიებ, ნამდა თის ართ მუდგარენიშ ძირაფაქ მანგარო გუკვირდჷ. მუ რდჷ თენა? საშინელ მხეცის ოსურკოჩ გეხედ. თინა რე „დიდ მეძავ“, ნამდგას „დიდ ბაბილონ“ ჯოხო. თინა „მეძავენდჷ“ „დედამიწაშ მეფეეფწკუმა“ (გამოცხ. 17:1, 2, 6).

15, 16. მი რე „დიდ ბაბილონ“ დო სოვრეშე მიჩქნა თენა?

¹⁵ მი რე „დიდ ბაბილონ“? თე ოსურკოჩ ვეჸუაფ პოლიტიკურ ორგანიზაცია, მუშენდა თიშ გურშენ ნარაგად რე, ნამდა „მეძავენს“ მსოფლიო პოლიტიკურ ლიდერეფწკუმა (გამოცხ. 18:9). მეძავ მხეცის გეხენ თენა, თის ნიშნენს, ნამდა ოცად, მუშ ჭკუაშა გილეჸონას. თინა ვართ კომერციულ სისტემა რე, მუშენდა გამოცხადებას ჭარჷ, ნამდა თიშ გურშენ „ქინგარა დედამიწაშ დიდვაჭარეფ“ (გამოცხ. 18:11, 15, 16).

¹⁶ წმინდა წერილეფს სიტყვეფ „მეძავ“ დო „მრუშ“ ხშირას სულიერ გაგებათ გიმირინუაფ. თე სიტყვეფ შილებე ოხუდას თინეფს, მიდგას ღორონთიშ მსახურო მეუღ დუდ, მარა კერპთაყვანიშმცემელ რე ვარდა შხვანერო მეგობრენს ქვეყნიერებაწკუმა (ეზეკ. 16:2, 35, 36; იაკ. 4:4). თეშ გინაწონს, მით ართგურო ომსახურნა ღორონთის, მოშინაფილ რენა, მუჭოთ „წმინდეფ“ დო „ქალწულეფ“. ჯვეშ ბაბილონ ტყურათაყვანიშცემაშ ცენტრ რდჷ. თაშ ნამდა, „დიდ ბაბილონ“ ოკო ასიმბოლოენდას ტყურათაყვანიშცემაშ არძა ფორმას. სინამდვილეს, თინა ტყურარელიგიაშ მსოფლიო იმპერია რე (გამოცხ. 17:5, 18; ქოძირით jw.org-ის ვებსტატია «მუ რე „დიდ ბაბილონ“?» [ქორთ.]).

17. მუ ელჷ დიდ ბაბილონს?

¹⁷ მუ ელჷ „დიდ ბაბილონს“? გამოცხადებაშ 17:16, 17 თეცალ პასუხის ირზენს: „ვით ქა დო მხეც, ნამუთ სი ძირჷ, გიჯოგუანა მეძავს, აწიოკენა თის დო ბარგის გემკანწყუნა, თიშ ხორცის ოჭკუმნა დო მუს დაჩხირს დოჭუნა. მუშენდა ღორონთ გურშა ქენუდვანს თინეფს“. თაშ ნამდა, იეჰოვა გინაჭყვიდირაფუანს ერეფს, გეგმირინუან ალიშფერ მხეც, გაერთიანებულ ერეფიშ ორგანიზაცია, ნამდა მოსპან ტყურარელიგიაშ მსოფლიო იმპერია (გამოცხ. 18:21—24).

18. მუჭო შემლებნა დებრწმუნათ, ნამდა მუთუნ საერთო ვამღუნა დიდ ბაბილონწკუმა?

¹⁸ მუს ნიშნენს თენა ჩქინო? საჭირო რე, ვა ვოდინუათ „ჩქინ ღორონთიშ დო მუმაშ თოლს წმინდა დო სუფთა თაყვანიშცემა“ (იაკ. 1:27). დღას ვემეფჩათ უფლება დიდ ბაბილონიშ ტყურა გურაფეფს, წარმართულ დღესასწაულეფს, გილალუაფირ ზნეობრივ ნორმეფს დო სპირიტიზმის, ჩქინდა ქიმოქმედას. თეწკუმა ართო, გუვაგრძელათ ხალხიშ გაფრთხილება, გეგშართან „დიდ ბაბილონშე“, ნამდა ღორონთიქ თიწკუმა ართო ვა გასამართლას თინეფ (გამოცხ. 18:4).

განაჩენ ღორონთიშ დიდ ნტერეფშო

19. მი რე „დიდ ალიშფერ დრაკონ“?

¹⁹ გამოცხადებაშ წიგნის მოშინაფილ რე ხოლო ართ „დიდ ალიშფერ დრაკონ“ (გამოცხ. 12:3). თე დრაკონ იესოს დო თიშ ანგელოზეფს ობრძოლ (გამოცხ. 12:7—9). თინა თხოზ ღორონთიშ ხალხის დო ძალას არზენს მხეცეფს (გამოცხ. 12:17; 13:4). მი რე თე დრაკონ? თინა რე „ჯვეშ გვერ, ეშმაკ დო სატანა“ (გამოცხ. 12:9; 20:2). ღორონთიშ არძა ნტერიშ უკახალე თინა გერე.

20. მუ ელჷ დრაკონს?

²⁰ მუ ელჷ დრაკონს? გამოცხადებაშ 20:1—3 ენწყუნს, ნამდა ანგელოზ სატანას უფსკრულს ქინაჸათანს, მუთ პატიმრობაცალ იჸუაფ. უფსკრულშა ინოჸოთამაშ უკულ თის შეცდომაშა ვემშაჸუნნე ხალხეფ, „სოიშახ 1 000 წანა ვემკურს“. ბოლოს, სატანა დო დემონეფ ინოჸოთამილ იჸუაფნა „დაჩხირიშ დო გოგირდიშ ტბაშა“, მუთ ართ დო სამუდამოთ განადგურებას ნიშნენს (გამოცხ. 20:10). წერმიდგინით, მუნერ იჸუაფ ცხოვრება სატანა დო დემონეფიშ უმშო. თენა მართალო მანგარ ჯგირ დრო იჸი!

21. მუშენ მოუღ ჩქინდა ბედნერობა თის, მუდგას გამოცხადებაშ წიგნის ბკითხულენთ?

²¹ მუ გურიშემაკინალ რე თი სიმბოლოეფიშ ინონჭაფა, მუთ გამოცხადებაშ წიგნის ენოჭარ! ჩქი ქიგებგით, მი რენა ღორონთიშ ნტერეფ დო მუ ელნა თინეფს. მართალო „ბედნერ რე თინა, მით ხონარმაღალო კითხულენს თე წინასწარმეტყველურ სიტყვეფს დო თინეფ ხოლო, მით ირჩქილენა“! (გამოცხ. 1:3). მარა ღორონთიშ ნტერეფიშ განადგურებაშ უკულ მუ კურთხევეფს მიღენა ართგურ ადამიანეფ? თეს უკულიან სტატიას გუვარჩიენთ.