მუ მნიშვნელობა უღჷ თქვანო გამოცხადებაშ წიგნის ამდღა?

1, 2. მუ რე ართ-ართ მიზეზ, მუდგაშ გურშენ ოკო მოინტერესდან გამოცხადებაშ წიგნ?

დღას ქუგოიჯინნანო ნაჩინებუშ სურათეფიშ ალბომშა? შილებე უჩინებუეფ გერენან თი სურათეფს ჩქარას გინოფურცელანდათ, მარა ართ სურათიქ თქვან ყურადღება მიქცუას, მუშენდა თე სურათის თქვა გერეთ. თიშ დაკვირებაშ დროს იშინანთ, მუჟამ დო სო გინოიღეს თინა დო მი რენა თქვანწკუმა ართო გერენან თინეფ.

² გამოცხადებაშ წიგნ თე სურათეფიშ ალბომს მოგენს. არძაშ ნაკლებ, ჟირ მიზეზიშ გურშენ: პირველ, ბიბლიაშ თე წიგნიქ ჩქინო იჭარ. თიშ პირველ მუხლის ბკითხულენთ: „იესო ქრისტეშ გამოცხადება ნამუთ თიქ ღორონთშე მიღჷ, მუშენდა მუშ მონეფს გუცხადკო თინა, მუდგაქ მალას ოკო მოხვადას“ (გამოცხ. 1:1). თაშ ნამდა, მუთ თე წიგნის ჭარჷ, არძა ადამიანშო ვარინ, ჩქინო რე — ღორონთიშ მეძღვინელ მსახურეფშო. ჩქი, მუჭოთ ღორონთიშ ხალხის, ოკო ვა გამკვირდან თიშ ძირაფაქ, ნამდა თე სარკო წიგნის მოჩამილ წინასწარმეტყველებეფიშ შესრულებას ბღებულენთ მონაწილებას. შხვა სიტყვეფით ქოფთქუათინ, თენა სურათეფიშ ალბომს ჩქინ დუდიშ ძირაფაცალ იჸუაფ.

3, 4. მუჭოთ გამოცხადებაშ წიგნშე იძირე, მუჟამ შესრულებუდ თექ მოჩამილ წინასწარმეტყველებეფ დო მუჭო ოკო იმოქმედას თექ ჩქინდა?

³ მაჟია მიზეზშა მიშურს დრო, მუჟამსით თე წინასწარმეტყველებეფ შესრულებუდ. მოციქულ იოანეშ სიტყვეფშე იძირე, მუჟამ იჸუაფუდ თე დრო. თიქ თქუ: „ღორონთიშ წმინდა შურიშ ძალათ ხილუას ქობძირ უფალიშ დღა“ (გამოცხ. 1:10). მუჟამსით, სოდგარენ ახ. წ. 96 წანას იოანექ თე სიტყვეფ ჭარჷ, „უფალიშ დღაშა“ დიო ხოლო ბრელ მეძუდ (მათ. 25:14, 19; ლუკ. 19:12). ბიბლიურ წინასწარმეტყველებეფს ქიდვეკვირებუთ-და, თე დროქ დიჭყჷ 1914 წანას, მუჟამსით იესოქ გემეფ ზეცას. თე წანაშე მოჸუნაფილ ისრულებ გამოცხადებაშ წიგნის ენოჭარილ წინასწარმეტყველებეფ, ნამუთ ღორონთიშ ხალხის ოხუ. ამდღა ჩქი ფცხოვრენთ „უფალიშ დღას“!

⁴ თეცალ მნიშვნელოვან დროს ფცხოვრენთინ თიშენ, საჭირო რე, განსაკუთრებულ ყურადღება ქიმვაქცუათ გამოცხადებაშ 1:3-ს მოჩამილ რჩევას: „ბედნერ რე თინა, მით ხონარმაღალო კითხულენს თე წინასწარმეტყველურ სიტყვეფს დო თინეფ ხოლო, მით ირჩქილენა დო მეჸუნა თე სიტყვეფს, მუშენდა მერჩქინელ დრო მონჭაფილ რე“. თაშ ნამდა, საჭირო რე, „ხონარმაღალო წებკითხათ“ წინასწარმეტყველურ სიტყვეფ, „ქუმურჩქილუათ“ დო „ქიმვაჸუნათ“ თინეფს.

დერწმუნით, ნამდა თქვან თაყვანიშცემა იეჰოვაშო მოსაწონ რე

5. მუჭო იძირე გამოცხადებაშ წიგნშე, ნამდა საჭირო რე, დებრწმუნათ, ქუმოწონს დო ვარ იეჰოვას ჩქინ თაყვანიშცემა?

⁵ გამოცხადებაშ პირველ დუდშე მოჸუნაფილ ვორწყეთ, ნამდა იესოს ჯგირო უჩქჷ, მუ ხვადუ კრებეფს (გამოცხ. 1:12—16, 20; 2:1). თექ ქიძირ თი ცნობაშე, ნამუთ იესოქ მცირე აზიაშ შქვით კრებას გინოჩ. თიქ კონკრეტულ მითითებეფ მეჩჷ პირველ საუკუნეშ ქრისტიანეფს, ნამდა ქოძირესკო, ქორდჷ დო ვარ თინეფიშ თაყვანიშცემა იეჰოვაშო მოსაწონ. თე მითითებეფ ამდღა ხოლო ოხუ ღორონთიშ ხალხის. მუს ბგურაფლენთ თავრეშე? იესო ქრისტეს ჯგირო უჩქჷ ჩქინ სულიერ მდგომარეობა. თიშ თოლს მუთუნ ვამკაკორდუ. თინა ფხემძღვანელენა დო მიცვენა. იესოს უჩქჷ, მუ მაფნა ოკეთებელ იეჰოვაშე მოწონაშ მიოღებელო. მუ მითითება მუჩეს თიქ, ნამდგას ოკო დევემორჩილათ ამდღა?

6. ა) მუჭოთ გამოცხადებაშ 2:3, 4-შე იძირე, მუ პრობლემა უღუდ ეფესოშ კრებას? ბ) მუს ბგურაფლენთ თავრეშე?

⁶ წეკითხით გამოცხადებაშ 2:3, 4. ვა ვოდინუათ იეჰოვაშ მიმართ დუდშეიან ჸოროფა. ეფესოშ კრებაშა გინოჩამილ იესოშ ცნობაშე იძირე, ნამდა შხვადოშხვანერ სირთულეშ უმკუჯინუო, თე კრება გიმირჩქინანდჷ მოთვინებას დო აგრძელენდჷ იეჰოვაშ მსახურებას, მარა თიქ მიოდინუ დუდშეიან ჸოროფა. თეცალ ჸოროფას ვედირთინუანდეს-და, თინეფიშ თაყვანიშცემა ვეჸუაფუდ იეჰოვაშო მოსაწონ. თეშნერო, ამდღა ჩქი ხოლო ოკო მიფთვინათ, მარა საჭირო რე, თენა სწორ მოტივეფით ვაკეთათ. ჩქინ ღორონთის ხვალე თინა ვაინტერეს, მუს ვორთუთ, თის თინა ხოლო ოინტერეს მუშენ ვორთუთ. თიშო ჩქინ მოტივეფ მნიშვნელოვან რე, მუშენდა ელჷ, ნამდა მარდულობათ დო ჸოროფათ ეფშა გურით ვემსახურებუთ (იგავ. 16:2; მარ. 12:29, 30).

7. ა) მუჭოთ გამოცხადებაშ 3:1—3-ს ბკითხულენთ, მუ პრობლემა ძირჷ იესოქ სარდისიშ კრებას? ბ) მუ ოკო ვაკეთათ?

⁷ წეკითხით გამოცხადებაშ 3:1—3. კურცხას ვორდათ. სარდისიშ კრებას შხვა პრობლემა უღუდ. მართალ რე, თე კრებაშ წევრეფ ულირს აქტიურო ომსახურუდეს იეჰოვას, მარა ასე მეტებულ აფდეს თეშ კეთება, ათეშენ იესოქ მთლიან კრებას უწუ: „გეგშაკურცხ“. მუ გაფრთხილებას ბღებულენთ თავრეშე? მუშო ოკო რაგად, იეჰოვა ვეგიჭყოლიდუანს ჩქინ ხანდას (ებრ. 6:10). აუცილებერ რე, ვეგებჯერდათ თის, მუთ ულირს მიკეთებნა. ასე იზმა ვეშემლებდანინ ხოლო, საჭირო რე, ნამ შემლებნან ირფელ გუვაკეთათ იეჰოვაშ მსახურებას დო ბოლოშახ კურცხას ვორდათ (1 კორ. 15:58; მათ. 24:13; მარ. 13:33).

8. მუს ბგურაფლენთ ლაოდიკეაშ კრებაშა რაგადებულ იესოშ სიტყვეფშე, ნამუთ გამოცხადებაშ 3:15—17-ის ენოჭარ?

⁸ წეკითხით გამოცხადებაშ 3:15—17. მონდომა დო შურ დო გურ ვადვარკათ იეჰოვაშ თაყვანიშცემას. ლაოდიკეაშ კრებაშა გინოჩამილ ცნობას იესოქ ხოლო ართ პრობლემა მიშინუ. თინეფ მსახურებას, „ღიჟეეფ“ რდეს. მსახურებას მთელ გურით ვა რდესინ თიშენ ლაოდიკეაშ კრებას იესოქ უწუ, ნამდა „გაჭირებულ“ დო „საცოდალ“ რდჷ. თიქ დიდ მონდომა ოკო გეგმირჩქინკო იეჰოვაშ თაყვანიშცემას (გამოცხ. 3:19). მონდომაშ გიმორჩქინა ქომჭირან-და, საჭირო რე, უმოს მარდულობა გუვავითარათ იეჰოვაშ დო თიშ ორგანიზაციაშ მიმართ ირფელშო, მუდგას ჩქინო ორთნა (გამოცხ. 3:18). დღას ვემეფჩათ კომფორტულ ცხოვრებაშ მონწყუალას თიშ უფლება, იეჰოვაშ მსახურება მაჟია ადგილშა გეგნმოღალაფუან.

9. მუჭოთ პერგამონიშ დო თიატირაშ კრებაშა რაგადებულ იესოშ სიტყვეფშე იძირე, მუ საშიშროებას ოკო ეუჩილითუათ დუდ?

⁹ ვემკვანჭათ განდგომილეფიშ გურაფეფს. იესოქ პერგამონიშ კრებაშე ნამთინეს გუდღან თიშ გურშენ, ნამდა ართობას აკარღვანდეს (გამოცხ. 2:14—16). თეშ გინაწონს, თიატირაშ კრებაშე ოცქუ თინეფს, მით დუდის ურიდანდეს სატანაშ ტყურა გურაფეფს დო ელუჩ, მანგარო ქიმეკიდესკო ხე ჭეშმარიტებას (გამოცხ. 2:24—26). თი მოსუსტებულ ქრისტიანეფს, მიდგაქ მიაჸუნეს ტყურა გურაფეფს, მონანიება ოსაჭირდეს. მუ მდგომარეობა რე ამდღა? ჩქი დუდ ოკო ეუჩილითუათ არძა გურაფას, ნამუთ ოწინააღმდეგ იეჰოვაშ სიტყვას. განდგომილეფს „ღორონთიშ მოშიშეფო მეუღნა დუდ“, მარა თინეფიშ საქმეეფშე თენა ვეძირე (2 ტიმ. 3:5). ღორონთიშ სიტყვას ჯგირო ქიბრკვიენთ-და, ვა გამჭირდუნა ტყურა გურაფეფიშ გიშაჩინება დო თინეფშა დუდიშ ეჩილითაფა (2 ტიმ. 3:14—17; იუდ. 3, 4).

10. ხოლო მუს ბგურაფლენთ პერგამონ დო თიატირაშ კრებაშა რაგადებულ იესოშ სიტყვეფშე?

¹⁰ ვამუეფუათ უზნეობაშ მუთუნნერ ფორმას. პერგამონიშ დო თიატირაშ კრებას ხოლო ართ მუდგარენ ჭირდჷ. იესოქ თე კრებეფშე ნამთინეს ბრალ გედვჷ, მუშენდა თინეფს უზნეობა პრობლემათ ვემიორჩქუდეს (გამოცხ. 2:14, 20). მუს ბგურაფლენთ? ჩქი ვეველუთ, ნამდა იეჰოვა თოლს დოწკურუნს ჩქინ უზნეო საქციელშე თიშ გურშენ, ნამდა ბრელ ხან რე, თის ვომსახურუთ ვარდა სერიოზულ პასუხიშმგებლობეფ მიღნა (1 სამ. 15:22; 1 პეტ. 2:16). ქვეყნიერებაქ მუდგანერო ვეგლელასინ, იეჰოვა ჩქინდე ელჷ, ნამდა იშენით მივაჸუნუთ თიშ მაღალზნეობრივ ნორმეფს (ეფეს. 6:11—13).

11. მუ დიბგურეთ? (ქოძირით ჩარჩო „გაკვეთილ ჩქინო“)

¹¹ მუ დიბგურეთ თავრეშე? ქობძირით, ნამდა საჭირო რე, დებრწმუნათ, ქუმოწონს დო ვარ იეჰოვას ჩქინ თაყვანიშცემა. მუჟამსით თიცალ მუდგარენს ვორთუთ, მუთ ჩქინ თაყვანიშცემას ღორონთშო მიუღებელო გინაშქვანს, ხეთეშე ოკო იმოფქმედათ, ნამდა დოფთირუათ ჩქინ საქმეეფ (გამოცხ. 2:5, 16; 3:3, 16). ხოლო მუ უწუ იესოქ კრებეფს?

მზათ რდათ თხოზინიშ გარზებელო

12. მუ უწუ იესოქ სმირნაშ დო ფილადელფიაშ კრებეფს დო მუს ბგურაფლენთ თავრეშე? (გამოცხ. 2:10)

¹² ასე გუვარჩუათ, მუ უწუ იესოქ სმირნაშ დო ფილადელფიაშ კრებეფს. თიქ უწუ, ნამდა ვაშქურნესკო თხოზინშა, მუშენდა იეჰოვა აკურთხენდჷ ართგურობაშენ (წეკითხით გამოცხადებაშ 2:10; 3:10). მუს ბგურაფლენთ თავრეშე? ჩქი ველუთ თხოზინს დო მზათ ოკო ვორდათ თიშ გარზებელო (მათ. 24:9, 13; 2 კორ. 12:10). მუშენ რე თენა ჩქინო მნიშვნელოვან?

13, 14. მუჭო მოქმედენს ღორონთიშ ხალხშა გამოცხადებაშ მა-12 დუდის ეჭარილ მოვლენეფ?

¹³ გამოცხადებაშ წიგნ მირაგადნა, ნამდა ღორონთიშ ხალხიშ თხოზინ „უფალიშ დღას“, ჩქინ დროს, იჸუაფუდ. გამოცხადებაშ მა-12 დუდის მოშინაფილ რე ჩხუპ, ნამდგაქ იესოშ გამეფებაშ უკულ ხეთეშე მოხვად ზეცას. მიქაელ, განდიდებულ იესო ქრისტე, დო თიშ ლაშქარ ობრძოლდეს სატანა დო დემონეფს (გამოცხ. 12:7, 8). ღორონთიშ ნტერეფქ თე ჩხუპ წაგეს დო დედამიწაშა იჸუეს გითორღვაფილქ, მუდგაქ კაცობრიობას ნინათ ვეიჭარენ ფერ ტანჯება მოუღ. (გამოცხ. 12:9, 12). მუჭო იმოქმედენდჷ თე ირფელ ღორონთიშ ხალხშა?

¹⁴ გამოცხადება თის ხოლო მეჩიებნა, მუჭო მოქმედენს სატანა. თის მეტო ვეშულებ ქიმკანჭას ზეცას. ათეშენ მთელ მუშ რისხუა გინოღალირ აფჷ ცხებულეფიშ დოსქილადირ ნაწილშა, მით ღორონთიშ სამეფოშ მიწიერ წარმომადგენელეფ რენა დო „მიდგას იესოშ გურშენ ქადაგებაშ საქმე ოვალნა“ (გამოცხ. 12:17; 2 კორ. 5:20; ეფეს. 6:19, 20).

15. მი რე გამოცხადებაშ წიგნის მოშინაფილ „ჟირ მოწმე“ დო მუქ აღოლ თის?

¹⁵ სატანაქ ქიდიჭყჷ წინააღმდეგობა ცხებულ ჯიმალეფიშ მიმართ, მიდგას სახიოლო ამბეშ ქადაგებაშ ხემძღვანელობა ოვალდეს. თე ქომოლკათა გამოცხადებაშ წიგნის მოშინაფილ რე, მუჭოთ „ჟირ მოწმე“, მიდგას „დოჸვილუნდეს“b (გამოცხ. 11:3, 7—11). 1918 წანას 8 პასუხიშმგებელ ჯიმა ტყურა ბრალდებათ ოჭოფეს დო ბრელ ხანით პატიმრობა ქიმუსაჯეს. კოჩიშ თოლს თეშ იძირედ, ნამდა ცხებულეფიშ საქმიანობა გაჩერეს, შხვა სიტყვეფით ქოფთქუათინ, თინეფ „დოჸვილეს“.

16. მუ სარკო მუდგარენქ მოხვად 1919 წანას, მარა მუშ კეთებას აგრძელენდჷ სატანა?

¹⁶ გამოცხადებაშ მა-11 დუდიშ წინასწარმეტყველებას თინა ხოლო ჭარჷ, ნამდა „ჟირ მოწმე“ ჭიჭე ხანშა სიცოცხლეს დართუდ. თე წინასწარმეტყველებაქ სარკოთ შისრულ ჟიშე მოშინაფილ 8 ჯიმაშ დაპატიმრებაშე ართ წანაშ მიკულაშახ. 1919 წანაშ დაჭყაფუს თე ცხებულ ჯიმალეფ ციხეშე გოუტეს დო ჭიჭე ხანშა ბრალ მოუნწყეს. თინეფქ ხეთეშე დართეს ქადაგება დო გურაფაშ საქმეს. მარა სატანა თეთ ვა გაჩერებე. თი დროშე მოჸუნაფილ თინა ირიათო ოცად, ღორონთიშ ხალხ გაჩერას თხოზინით, მუთ გამოცხადებას „მალწყარო“ რე მოშინაფილ (გამოცხ. 12:15). ათეშენ არძას რწმენა დო მოთვინება მოსაჭირნა (გამოცხ. 13:10).

ნამ შეილებნან ირფელ გაკეთით იეჰოვაშ დავალებურ საქმეშო

17. მუ მოხვარა მიღჷ ღორონთიშ ხალხიქ თიშ უმკუჯინუო, ნამდა სატანა ობრძოლუდ?

¹⁷ გამოცხადებაშ მა-12 დუდის თინა ხოლო რე ეჭარილ, ნამდა ღორონთიშ ხალხ შურო ველუდუნ თეშ მიღენდჷ მოხვარას. თენა იჸუაფუდ „დიხა“, ნამუთ გეყინტუნდჷ „მალწყარს“ (გამოცხ. 12:16). მინშა სატანაშ ქვეყნიერებაშ უმოს სტაბილურ სტრუქტურეფ, მუნერით რე, ნამთინე სასამართლო სისტემა, იცვენდეს ღორონთიშ ხალხის. იეჰოვაშ მსახურეფქ ბრელშა მიგეს სასამართლო პროცესეფ, მუთ საშვალებას არზენდჷ თინეფს, უმოს თავისუფლება უღდესკო. მუჭო ირინუანდეს თე თავისუფლებას? თინეფ ნამ შეულებდესინ ირფელს ორთუდეს იეჰოვაშ დავალებურ საქმეშ შეიოსრულებერო (1 კორ. 16:9). მუ მიშურს თე საქმეშა?

18. მუ რე თე ბოლო დღალეფს ჩქინ მთავარ საქმე?

¹⁸ იესოქ იწინასწარმეტყველ, ნამდა მუშ ხალხ „სახიოლო ამბეს სამეფოშ გურშენ“ იქადაგენდჷ მთელ მსოფლიოს (მათ. 24:14). თე საქმეს თინეფს ელურე ანგელოზ ვარდა ანგელოზეფიშ ჯგუფ, ნამდგაშ გურშენ გამოცხადებაშ 14:6-ის ჭარჷ: „თის მარადიულ სახიოლო ამბე უღუდ, ნამდა ხიოლით გუცხადკო დედამიწაშ მახორუეფს, არძა ერს, ტომს, ნინას დო ხალხის“.

19. ხოლო მუ ცნობა ოკო იქადაგან იეჰოვაშ მოჸოროფეეფქ?

¹⁹ ღორონთიშ ხალხის, ხვალე სამეფოშ გურშენ სახიოლო ამბეშ ქადაგება ვავალ. თინეფქ ხუჯ ოკო დუკინან ანგელოზეფიშ საქმიანობას, ნამუთ გამოცხადებაშ 8—10 დუდეფს რე ეჭარილ. თე ანგელოზეფ გლახა ამბეს უცხადენა თინეფს, მით ღორონთიშ სამეფოშ მხარეს ვეგერე. თაშ ნამდა, იეჰოვაშ მოწმეეფ გაცხადენა განაჩენიშ ცნობას, მუთ „კირცხ დო დაჩხირცალ“ იჸუაფ. თე ცნობა რე ღორონთიშ განაჩენ სატანაშ უბადო ქვეყნიერებაშ შხვადოშხვა ნაწილშო (გამოცხ. 8:7, 13). ხალხის ოკო უჩქუდას, ნამდა აღსასრულ მალას იჸუაფ, მუშენდა შეიალებუან თირუაქ დო გინოსქილადაქ იეჰოვაშ რისხუაშ დღას (სოფ. 2:2, 3). მარა თე ცნობა უმენტაშის ვა მოწონს დო თიშ გაცხადებელო გაბედულება რე საჭირო. დიდ გასაჭირიშ დროს ბოლო განაჩენიშ ცნობა ხალხის უმოსო გაღიზიანენს (გამოცხ. 16:21).

ქიმიაჸუნით წინასწარმეტყველურ სიტყვეფს

20. მუს გუვარჩიენთ ანწიან ჟირ სტატიას?

²⁰ ჩქი მოსაჭირნა, მივაჸუნათ წინასწარმეტყველურ სიტყვეფს, მუშენდა გამოცხადებაშ წიგნის მოჩამილ წინასწარმეტყველებეფიშ შესრულებაშ ნაწილ ვორეთ (გამოცხ. 1:3). მარა მუჭო შემლებნა, ქუგურზათ თხოზინს დო ვემვოტუათ თე ცნობაშ გაბედულო გაცხადება? ჩქი ძალას მარზენა ჟირ მუდგარენ. პირველ, მუდგას გამოცხადებაშ წიგნ მეჩიებნა ღორონთიშ გურშენ დო მაჟია, მომავალ კურთხევეფ, ნამდგას ართგურობაშ გურშენ მიბღენთ. თე საკითხეფს უკულიან ჟირ სტატიას გუვარჩიენთ.