გიჸორდან ართიან

1. მუ განსაკუთრებულ მითითება მეჩჷ იესოქ მუშ მოციქულეფს? (ქოძირით სურათ გალენ გვერდის)

იესოქ ღურაშ წოხლენ სერს, მუშ მოციქულეფს განსაკუთრებულ მითითება მეჩჷ. თიქ თქუ: „მუჭოთ მა გიჸოროფეთ, თქვა ხოლო თეშ გიჸორდან ართიან!“. უკულ გეუძინ: „ჩქიმ მოწაფეეფ რეთინ, თით გეგენა, ნამდა ართიანიშ ჸოროფა გაღვენუნა“ (იოან. 13:34, 35).

2. მუშენ რე მნიშვნელოვან გეგმიფრჩქინათ ართიანიშ ჸოროფა?

² იესოქ თქუ, ნამდა მუშ მოწაფეეფ ადვილ გიშაჩინებელ თიმწკუმა იჸუაფდეს, მუჟამსით მუქ გიმირჩქინუნ თიცალ ჸოროფას გეგმირჩქინანდეს. თენა თაშ რდუ პირველ საუკუნეს დო ამდღა ხოლო თაშ რე. ზუსტას თე მიზეზიშ გურშენ რე მნიშვნელოვან, გეგმიფრჩქინათ ართიანიშ ჸოროფა თიმწკუმა ხოლო, მუჟამსით თენა რთულ რე.

3. მუს გუვარჩიენთ თე სტატიას?

³ არასრულყოფილება მოცილნა გეგმიფრჩქინათ ართიანიშ ჸოროფა. მარა, ჩქი ოკო ვეცადათ, მივაჸუნათ იესოშ მაგალითის. თე სტატიას გუვარჩიენთ, მუჭო მოხვარნა ჸოროფა, ნამდა ხე შევუნწყუათ მშვიდობას, ვა ვორდათ გიშაკერძაფილ დო ვორდათ სტუმარიშ მოჸოროფე. თე სტატიაშ მომზადებაშ დროს, ქოკითხით თქვან დუდის: „მუშ გურაფა შემლებ თი და დო ჯიმალეფშე, მით სირთულეეფიშ უმკუჯინუო, ჸოროფას გიმირჩქინანა ართიანიშ მიმართ?“.

ხე ქეშუნწყით მშვიდობას

4. მუჭოთ მათეშ 5:23 დო 24-ის ჭარჷ, მუშენ ოკო ვეცადათ ხე შევუნწყუათ მშვიდობას თი თანაქრისტიანწკუმა, ნამდგას მუდგარენ უღჷ ჩქინ წინააღმდეგ?

⁴ იესოქ დუმოგურეს, მუსხით მნიშვნელოვან რე, ხე შევუნწყუათ მშვიდობას თი თანაქრისტიანწკუმა, ნამდგას მუდგარენ უღჷ ჩქინ წინააღმდეგ (წეკითხით მათე 5:23, 24). იესოქ ხაზ გუსვჷ თის, ნამდა ქუმოკონა ღორონთის ვასიამოვნათ-და, ჯგირ ურთიერთობა ოკო მიღუდან შხვეფწკუმა. იეჰოვა ბედნერ რე, მუჟამსით მუთ შემლებნა ირფელს ვორთუთ, ნამდა და დო ჯიმალეფწკუმა მიღდან მშვიდობა. მიდგაინშე ნაწყენ ქუვორეთ დო მშვიდობაშ აღდგენას ვა ვოცადუთ-და, ღორონთშო მიუღებელ იჸუაფ ჩქინ მსახურება (1 იოან. 4:20).

5. მუშენ რდუ მარკშო რთულ, ხე შეუნწყუკო მშვიდობას?

⁵ შილებე ჩქინო რთულ რდას, ხე შევუნწყუათ მშვიდობას. მუშენ იფჩიებუთ თეს? გუვარჩუათ მარკიშ შემთხვევა.b თის გურქ ქელაჭვჷ, მუჟამსით ართ ჯიმაქ თინა გაკრიტიკ დო კრებელეფს თიშ გურშენ გლახა მუდგარენეფ უწუ. მუ რეაქცია უღუდ მარკის? თინა იჩიებ: „დუდიშ კონტროლ მივოდინე დო გებრისხჷ“. მართალ რე, მარკიქ დენარღჷ მუშ გლახა საქციელ დო ეცად პატიება ქოთხუკო თე ჯიმას დო მშვიდობა აღადგინკო თიწკუმა, მარა თიქ ვა მინდომ მარკწკუმა შერიგება. დუდშე მარკ ფიქრენდჷ: „მა მუშენ ოკო ვეცადე მშვიდობაშ აღდგენას, მუჟამსით თის თენა ვაკო?“. მარა, რაიონულ ზედამხედველქ ელუჩ მარკის, ირნერო ეცადკო პრობლემაშ მოგვარებას. მუჭო მიქცუ თიქ?

6. ა) მუჭო ოცადუდ მარკ მშვიდობაშ აღდგენას? ბ) მუჭო გიმირინუ მარკიქ კოლოსელეფიშ 3:13 დო 14?

⁶ მუჟამსით მარკიქ მუშ დამოკიდებულებაშე დეფიქრჷ, ქოძირ, ნამდა თანდაბლობა ორკუდ დო მინშა მუშ დუდის უმოს მართალო მირჩქინანდჷ. თიქ ქიმეხვად, ნამდა აზროვნება აფუდ ოთირალ (კოლ. 3:8, 9, 12). მარკიქ თანდაბლობა გეგმირჩქინ, კინ ქიმერთჷ თი ჯიმაშა დო პატიება ქოთხუ. თეს გეძინელ, წერილ დოუჭარ თე ჯიმას, სოდეთ იჩიებუდ, ნამდა მანგარო წუხენდჷ დო ოკოდ კინ მეგობრეფ ჸოფედესკო. ხვალე თენა ვარინ, მარკიქ თე ჯიმას ჭიჭე საჩუქარ ხოლო ქიმეჩ, ნამუთ უჩქუდ, ნამდა მეწონებუდ. სანარღოთ, თე ჯიმაქ ვაპატუ მარკის დო გურმულირო ქუდოსქიდ. თეშ უმკუჯინუო, მარკ მეჸუნდჷ იესოშ მითითებას, ნამდა უჸორდკო დო აპატუკო მუშ ჯიმას (წეკითხით ოლოსელები 3:13, 14). თიმწკუმა ხოლო, მუჟამსით შხვეფ ვაცადნა ჩქინცალო ხე შეუნწყუან მშვიდობას, ქრისტიანულ ჸოროფა მიმეხვარებნა ქუვაპატუათ თინეფს დო იბლოცათ თიშე, ნამდა კინ აღვადგინათ მშვიდობა (მათ. 18:21, 22; გალ. 6:9).

7. ა) მუშ კეთებაშა მომწოდეს იესოქ? ბ) მუ რთულ სიტუაციას შეხვად ართ დაქ?

⁷ იესოქ მომწოდეს თეშ მივექცუათ შხვეფს, მუჭოთ ჩქი მოკონა მიმექცუან. თიქ თქუ, ნამდა ხვალე თინეფ ოკო ვა მიჸორდან, მიდგას ჩქი ვუჸორთ (ლუკ. 6:31—33). შილებე უცნაურ რდას, მარა მუჭო მიქციებუთ, თქვან კრებელ დუდის გარიდანა დო გამარჯობას ვაირაგადნან-და? ზუსტას თაშ მოხვად ართ დაშ, ლარაშ შემთხვევას. თინა იჩიებ: „ართ და ყურადღებას ვა მაქციენდჷ დო ვა მიჩქუდ მუშენ. თექ მანგარო მიწყუნუ გურ დო ვართ შეხვალამეფშა ულა მოხიოლუდ“. დუდშე ლარა ფიქრენდჷ: „მუთუნ ბრალ ვა მიღჷ. თეს გეძინელ, კრებელეფ ხოლო ორწყენა, ნამდა თე და უცნაურო იქციებ“.

8. მუ აკეთ ლარაქ, ნამდა ხე შეუნწყუკო მშვიდობას დო მუშ გურაფა შემლებნა თიშ მაგალითშე?

⁸ ლარაქ ნაბიჯეფ გეგნოდგჷ, ნამდა ხე შეუნწყუკო მშვიდობას. თიქ ილოც დო გეგნოჭყვიდ, ქუდურაგადუკო თე დას. თინეფქ ქიჩუეს პრობლემაშ გურშენ, ქახუტოლეს ართიანს დო მშვიდობა აღადგინეს. დუდშე ირფელ ჯგირო მიშჷ. ლარა იშინანს: „მარა ჭიჭე ხანშა თე და კინ თეშ მოქცუდ, მუჭოთ ადრე. გურგოტახილ ვორდჷ“. დუდშე ლარა ფიქრენდჷ, ნამდა ხვალე თი დროს იჸუაფუდ ბედნერ, მუჟამსით თე და ჯგირო მექციებუდ. მარა უკულ, ლარაქ ქიმეხვად, არძაშ უჯგუშ მუდგარენ, მუდგაშ კეთება შეულებუდ თინა რდუ, ნამდა კინ ჸოროფათ მექცუკო თე დას დო „მთელ გურით“ ქაპატუკო თის (ეფეს. 4:32—5:2). ლარაქ მუშ დუდის ქუგაშინ, ნამდა ნამდვილ ქრისტიანულ ჸოროფა „გურიშ მოულას ვა კოროცხუნს, ირფელ გინმუღ, ირფელ წანს, ირფელიშ იმენდ უღჷ დო ირფელს ურზუ“ (1 კორ. 13:5, 7). ლარა მეტო ვა ნერვიანენდჷ თე პრობლემაშენ. დრო-ხანიშ უკულ თე და უმოს მეგობრულო ოქცუდ ლარას. მუჟამსით ხეს უნწყუნთ და დო ჯიმალეფწკუმა მშვიდობაშ აღდგენას დო გიჸორა თინეფ, შეილებნა დარწმუნებულ რდათ, ნამდა „მშვიდობაშ ღორონთ თქვანწკუმა იჸუაფ“ (2 კორ. 13:11).

ვა რდათ გიშაკერძაფილ

9. მუჭოთ საქმეეფიშ 10:34 დო 35-ის ჭარჷ, მუშენ ოკო ვა ვორდათ გიშაკერძაფილ?

⁹ იეჰოვა ვა რე გიშაკერძაფილ (წეკითხით საქმეები 10:34, 35). მუჟამსით გიშაკერძაფილ ვა ვორეთ, თეთ ვამტკიცენთ, ნამდა ღორონთიშ სქუალეფ ვორეთ. ჩქი ვომორჩილუთ კანონს, მოყვას ჩქინ დუდცალო მიჸორდან დო ირფელს ვორთუთ, ნამდა და დო ჯიმალეფწკუმა მშვიდობა მიღდან (რომ. 12:9, 10; იაკ. 2:8, 9).

10, 11. მუჭო მიშორ ართ დაქ უარყოფით გრძნობეფ?

¹⁰ ნამთინეშო ადვილ ვა რე, დუდ არიდას გიშაკერძაფას. მაგალთო, გუვარჩუათ ართ დაშ, რუთიშ შემთხვევა. ახალგაზრდობას, ართ პიროვნებაქ, ნამუთ შხვა ქიანაშე რდუ, გლახა მუდგარენ უკეთ რუთიშ ოჯახის. მუჭო იმოქმედ თექ რუთშა? თინა იჩიებ: „ირფელ ბჯოგუდ თი ქიანაშ გურშენ. ფიფქრენდჷ, ნამდა არძა, თინეფ შქას ჩქინ და დო ჯიმალეფ ხოლო, თიცალეფ რდეს“. მუჭო გიორჯგინ რუთიქ უარყოფით გრძნობეფს?

¹¹ რუთიქ ქიმეხვად, ნამდა ოკო ებრძოლკო თეცალ გლახა აზროვნებას. თიქ წეკითხჷ წელიწდეულ, სოდეთ თე ქიანაშ გურშენ ჭარუდ შემთხვევეფ. თინა იჩიებ: „ირნერო ვეცად, დადებით თვალსაზრის მიღუდკო თი ქიანას მახორუ ხალხშე. ქიმეფხვად, ნამდა თექ მახორუ და დო ჯიმალეფ მთელ გურით ომსახურნა იეჰოვას დო თინეფ ხოლო ჩქინ მსოფლიო საჯიმალოშ ნაწილ რენა“. დრო-ხანიშ მიკულაწკუმა ართო, რუთიქ ქიმეხვად, ნამდა ჸოროფა ოკო გეგმირჩქინკო თინეფიშ მიმართ. თინა იჩიებ: „მუჟამსით თი და დო ჯიმალეფს შეფხვადუდ, მით თი ქიანაშე რდეს, განსაკუთრებულო ვოცადუდ თინეფწკუმა მეგობრულ ვორდიკო. მა თინეფწკუმა ბრაგადანდჷ დო უჯგუშო იფჩინებაფუანდჷ თინეფს“. მუ რდუ შედეგ? რუთ იჩიებ: „დროშ მიკულაწკუმა ართო უარყოფით გრძნობეფქ მემდინ“.

12. მუ პრობლემა უღუდ სარას?

¹² ნამთინექ შილებე გურუგუჩამუო გეგმირჩქინას გიშაკერძაფა. მაგალთო, სარა ფიქრენდჷ, ნამდა გიშაკერძაფილ ვა რდუ, მუშენდა ხალხის ეროვნებაშ, ფინანსურ მდგომარეობაშ ვარდა ორგანიზაციას პასუხიშმგებლობეფიშ მიხედვით ვეგშაგორუნდჷ. მარა თინა იჩიებ: „ქიმეფხვად, ნამდა სინამდვილეს გიშაკერძაფილ ვორდჷ“. მუჭო გიმორჩქინდჷ თექ? სარა განათლებულ ოჯახშე მიშჷ დო თინეფწკუმა ურთიერთობა უსხუნუდ, მით განათლებულ რდუ. ართშა თიქ მუშ მეგობარს უწუ: „თი და დო ჯიმალეფწკუმა მიღჷ ურთიერთობა, მით განათლებულეფ რენა დო დუდის ვურიდანქ თინეფს, მიდგას განათლება ვა უღჷ“. არგამა რე, სარას აზროვნება აფუდ ოთირალ. მუჭო შეულებუდ თეშ კეთება?

13. მუს ბგურაფლენთ თიშე, მუჭო დითირუ სარაქ დამოკიდებულება?

¹³ სარას ართ რაიონულ ზედამხედველქ მეხვარ, დეფიქრუკო მუშ დამოკიდებულებაშე. სარა იშინანს: „თიქ ქუმოცქუ თიშე, ნამდა ართგურო ვმსახურენდჷ, ჯგირ კომენტარეფს იფჩიებუდ დო მიღუდ ბიბლიურ რჩქინა. უკულ თიქ გემინწყჷ, ნამდა მუთ უმოსის ბგურაფლენთ, თით უმოსო ოკო გუვავითარათ თიცალ ქრისტიანულ თვისებეფ, მუნერით რე თანდაბლობა, მოკრძალება დო ჭყოლოფა“. სარაქ გეთვალისწინ თე რაიონულ ზედამხედველიშ ნათქუელ. თინა იჩიებ: „ქიმეფხვად, ნამდა არძაშ უმოს მნიშვნელოვან რე, ვორდათ კეთილ დო მოჸოროფე“. შედეგო, თიქ დითირუ და დო ჯიმალეფიშ მიმართ დამოკიდებულება. თინა იჩიებ: „ვოცადუდ ქინვანჭკო, ნამ თვისებეფიშ გურშენ აფასენდჷ თინეფს იეჰოვა“. მუშ რაგად შილებე ჩქინდე? ჩქი ვა მოკონა განათლებაშ გურშენ შხვეფშე უჯგუშო მიფრჩქინათ დუდ! „მთელ საჯიმალო“ ქომიჸორან-და, გიშაკერძაფილეფ ვეპჸით (1 პეტ. 2:17).

რდათ სტუმარიშ მოჸოროფე

14. მუჭოთ ებრაელეფიშ 13:16-ის ჭარჷ, მუს გინაფლენს იეჰოვა, მუჟამსით სტუმარიშ მოჸოროფე ვორეთ?

¹⁴ იეჰოვას ოხიოლ, მუჟამსით სტუმარიშ მოჸოროფე ვორეთ (წეკითხით ებრაელები 13:16). ღორონთშო თენა ჩქინ თაყვანიშცემაშ ნაწილ რე, განსაკუთრებით თიმწკუმა, მუჟამსით თინეფს ვოხვარუთ, მიდგას თენა ოსაჭირ (იაკ. 1:27; 2:14—17). ათეშენ ბიბლია მომწოდენა: „სტუმარიშ მოჸოროფე რდათ“ (რომ. 12:13). მუჟამსით სტუმარიშ მოჸოროფე ვორეთ, თეშნერო ვოძირანთ, ნამდა თინეფშე ბზრუნენთ, მიჸორა დო მოკონა, თინეფიშ მეგობრეფ ვორდათ. იეჰოვას ოხიოლ, მუჟამსით შხვეფს ვუნაწილენთ ოჭკუმალს, ოშუმალს ვარდა თინეფწკუმა ართო ვატარენთ დროს (1 პეტ. 4:8—10). მარა, შილებე მუდგარენქ მეცილან, გეგმიფრჩქინათ სტუმარიშ ჸოროფა.

15, 16. ა) მუშენ შილებე ნამთინექ დუდ არიდას სტუმარიშ პატიცემას? ბ) მუქ მეხვარ ედიტის, ნამდა სტუმარიშ მოჸოროფე ჸოფედკო?

¹⁵ შილებე მუსხირენ მიზეზიშ გურშენ დუდ ავარიდათ სტუმარიშ პატიცემას. გუვარჩუათ ედიტიშ მაგალით, ნამდგას ქომონჯ აფჷ ღურელ. ჭეშმარიტებაშ გაგებაშახ, თის უსხუნუდ ნაკლებ ურთიერთობა უღუდკო შხვეფწკუმა. ედიტ ფიქრენდჷ, ნამდა შხვეფს უმოსო შეულებდეს, ჸოფედესკო სტუმარიშ მოჸოროფე.

¹⁶ ჭეშმარიტებაშ გაგებაშ უკულ ედიტიქ დითირუ აზროვნება. თიქ ნაბიჯეფ გეგნოდგჷ, ნამდა სტუმარიშ მოჸოროფე ჸოფედკო. თინა იშინანს: „მუჟამსით ჩქინ ახალ სამეფო დარბაზ იშენებუდ, ართ უხუცესიქ მიწუ, ნამდა მშენებლობას მონაწილებაშ მიოღებელო ართ დაქორწინებულ წყვილ მოურდჷ; თიქ ფთხუ, ნამდა ქეშემლებუდ-და, ჟირ მარათ ჩქიმწკუმა ქიდიბტეკო თინეფ. ქიგიფშინ, მუჭო აკურთხჷ იეჰოვაქ სარეფთელ ქომონჯღურელ ოსურ“ (1 მეფ. 17:12—16). ედიტიქ უხუცესის უწუ, ნამდა მიღენდჷ თე წყვილს. ქუმაჸუნუო თეს კურთხევეფქ? ედიტ იჩიებ: „თინეფ ჟირ მარაშ მანგიორო ჟირ თუთას რდეს ჩქიმწკუმა. თე დროშ დინახლე, ხოლოშიან მეგობრეფო გინიფრთით“. თეს გეძინელ, ედიტის კრებას ხოლო ქაშუ მეგობრეფქ. ასე თინა პიონერ რე დო მსახურებაშ უკულ, ჸუდეშა აპატიჟენს თინეფს, მიდგაწკუმა ართო მსახურენს. ედიტ იჩიებ: „შხვეფშა ჯგირიშ კეთებას ჩქიმო ხიოლ მოუღ! მართალ ქოფთქუე, შედეგო ბრელ კურთხევას ბღებულენქ“ (ებრ. 13:1, 2).

17. მუს მეხვადეს ლუკა დო მუშ ოსურქ?

¹⁷ შილებე გიმიფრჩქინანთ სტუმარიშ პატიცემას, მარა შემლებნანო უჯგუშო ვაკეთათ თენა? მაგალთო, ლუკა დო თიშ ოსურ სტუმარიშ მოჸოროფეეფ რენა. თინეფს ჩვევათ უღდეს, ნამდა ჸუდეშა ქუდაპატიჟესკო მუნეფიშ მშობლეფ, ნათესეფ, ხოლოშიან მეგობრეფ დო რაიონულ ზედამხედველ მეუღლეწკუმა ართო. მარა ლუკა იჩიებ: „ქიმეფხვადით, ნამდა ხვალე თინეფს ვაპატიჟენდით, მიდგაწკუმა ხოლოს ვორდით“. მუჭო გიმირჩქინეს უჯგუშო ლუკა დო მუშ ოსურქ სტუმარიშ პატიცემა?

18. მუჭო გიმირჩქინეს უჯგუშო ლუკა დო მუშ ოსურქ სტუმარიშ პატიცემა?

¹⁸ ლუკა დო მუშ ოსურქ თიმწკუმა ქიმეხვადეს, სინამდვილეს მუს ნიშნენს რდე სტუმარიშ მოჸოროფე, მუჟამსით დეფიქრეს იესოშ სიტყვეფშე: „თქვა უჸორთინ თინეფ ქოიჸორან-და, მანგიორს მუს ელუთ?!“ (მათ. 5:45—47). თინეფქ ქიმეხვადეს, ნამდა ოკო მიაჸუნესკო იეჰოვაშ მაგალითის, ნამუთ არძაწკუმა ხეგოფაჩილ რე. ათეშენ, გეგნოჭყვიდეს, თი და დო ჯიმალეფ ქუდაპატიჟესკო, მით აიშახ ვა დუპატიჟებნა. ლუკა იჩიებ: „ასე არძას მოხიოლნა თეცალ ურთიერთობა. თენა უმოსო მაახლოვენა ართიანწკუმა დო იეჰოვაწკუმა“.

19. მუჭო დუვამტკიცენთ, ნამდა იესოშ მოწაფეეფ ვორეთ დო მუ გაფნა გინოჭყვიდილ?

¹⁹ ჩქი გუვარჩით, მუჭო მოხვარნა ართიანიშ ჸოროფა, ხე შევუნწყუათ მშვიდობას, ვა ვორდათ გიშაკერძაფილ დო გეგმიფრჩქინათ სტუმარიშ ჸოროფა. ჩქი ოკო გივორჯგინათ ირნერ უარყოფით გრძნობეფს დო მთელ გურით მიჸორდან და დო ჯიმალეფ. თაშ ქიმიფქციებუთ-და, ბედნერეფ იპჸით დო დუვამტკიცენთ, ნამდა ნამდვილო იესოშ მოწაფეეფ ვორეთ (იოან. 13:17, 35).