მუჟამ რე ჯგირ დრო რაგადშო?

1. მუს მოგურუანა ეკლესიასტეშ 3:1 დო 7 მუხლეფ?

ჩქინდე ნამთინეს ბრელ რაგად მიჸორა. შხვეფს ნაკლებ რაგად უსხუნნა. მუჭოთ თე სტატიაშ მთავარ მუხლ იჩიებ, რე „რაგადიშ დრო დო რაგადშე დუდიშ შეკებაშ დრო“ (წეკითხით ეკლესიასტე 3:1, 7). შილებე მოკონა, ნამდა ჩქინ თანაქრისტიანეფშე ნამთინექ უმოს მეტ რაგადუას დო ნამთინექ უმოს ნაკლებ.

2. მის უღჷ უფლება, დადგინას მუჟამ დო მუჭო ოკო ბრაგადუათ?

² რაგადიშ უნარ ძღვინ რე იეჰოვაშე (გამ. 4:10, 11; გამოცხ. 4:11). მუშ სიტყვაშ საშვალებათ, თინა მოხვარნა, ქიგებგათ მუჭო გიმიბრინუათ თე ძღვინ სწორაშო. თე სტატიას გუვარჩიენთ ბიბლიურ მაგალითეფს, ნამუთ მიმეხვარებნა, მიჩქუდან მუჟამ ოკო ბრაგადუათ დო მუჟამ ოკო გაბჩენდათ. თეს გეძინელ, ქიგებგენთ მუს ფიქრენს იეჰოვა თი ირფელშე, მუდგას შხვეფს ვურაგადუთ. დიო მორთ ქიგებგათ, მუჟამ ოკო ბრაგადუათ.

მუჟამ ოკო ბრაგადუათ?

3. მუჭოთ რომაელეფიშ 10:14-ის ინოჭარ, მუჟამ ოკო ვორდათ მზათ, ნამდა ბრაგადუათ იეჰოვა დო თიშ სამეფოშ გურშენ?

³ ჩქი ირიათო მზათ ოკო ვორდათ, ნამდა ბრაგადუათ იეჰოვა დო თიშ სამეფოშ გურშენ (მათ. 24:14; წეკითხით რომაელები 10:14). თეშნერ მოქციებათ იესოშ მაგალითის მეპჸუთ. იესოშ დედამიწაშა მოულაშ ართ-ართ მთავარ მიზეზ თინა რდუ, ნამდა მუშ მუმაშ გურშენ ჭეშმარიტება ქეჩუკო შხვეფს (იოან. 18:37). მარა ოკო ფშუდან, ნამდა თინა ხოლო მნიშვნელოვან რე მუჭო ბრაგადანთ. თეშნერო, მუჟამსით იეჰოვაშ გურშენ ვურაგადუთ შხვეფს, თენა „რბილას დო დიდ პატიცემათ“ ოკო ვაკეთათ დო ოკო გეფთვალისწინათ შხვეფიშ გრძნობეფ დო რწმენა (1 პეტ. 3:15). შედეგო, თენა უბრალოთ რაგად ვეჸუაფ; ჩქი დუვოგურუანთ თინეფს დო შილებე, მიდგას ვურაგადუთინ თი პიროვნებაშ გურს ქეშვეხათ.

4. მუჭოთ იგავეფიშ 9:9-ს ჭარჷ, მუჭო შეულებ უხუცესეფიშ ნარაგადის, ქიმეხვარას შხვეფს?

⁴ მუჟამსით უხუცესეფ ორწყენა, ნამდა დას ვარდა ჯიმას რჩევაშ მეჩამა ოსაჭირ, თინეფქ დუდ ოკო ვაურიდან თეშ კეთებას. მუშო ოკო რაგად, თინეფ დაგარადაფალო შესაფერის დროს გეგშაგორნა, ნამდა თე პიროვნება უხერხულს ვენაჸათან. შილებე თინეფს უსხუნდან, ქიჯინან სოიშახ შხვეფ თექიანობას ვედიტენა. უხუცესეფ ირიათო ოცადნა, თეშ რაგადუან, ნამდა მარჩქილეს პირად ღირსებაშ გრძნობა ვა უდინუან. მარა თეშ გურშენ დუდის ვარიდანა პიროვნებაშა თი ბიბლიურ პრინციპეფიშ ძირაფას, ნამუთ მეხვარებ თინეფს გონივრულო მიქცუან (წეკითხით იგავები 9:9). მუშენ რე მნიშვნელოვან გაბედულო ბრაგადუათ, მუჟამსით თენა საჭირო რე? გუვარჩუათ ჟირ შხვადოშხვანერ მაგალით; ართ მაგალითის კოჩიქ რჩევა ოკო მეჩას მუშ ქომოლსქუალეფს; მაჟია მაგალითის ოსურკოჩიქ მომავალ მეფეს ოკო უწუას, ნამდა თიქ არასწორ გადაწყვეტილება მიღჷ.

5. მუჟამ ვა თქუ მღვდელმთავარ ელიქ ორაგადე?

⁵ მღვდელმთავარ ელის ჟირ ქომოლსქუა ჸუნდჷ, ნამუთ მანგარო უჸორდჷ. მარა თინეფქ პატიცემა ვეგმირჩქინეს იეჰოვაშ მიმართ. ელიშ ქომოლსქუალეფ კარავს მღვდელეფო მსახურენდეს, მუთ მნიშვნელოვან პასუხიშმგებლობა რდუ. მარა თინეფქ თე პასუხიშმგებლობა არასწორო გეგმირინუეს, უპატიცემლობა გეგმირჩქინეს იეჰოვაშა მეღალირ მსხვერპლიშ მიმართ დო სექსუალურ უზნეობას არგამათ ორთუდეს (1 სამ. 2:12—17, 22). მუჭოთ მოსეშ კანონს ჭარუდ, ელიშ ქომოლსქუალეფ ღურას იმსახურენდეს, მარა ელიქ უბრალოთ ქექას უსაყვედურ თინეფს დო კარავს მსახურებაშ გაგრძელებაშ უფლება ქიმეჩ (კან. 21:18—21). მუჭო უჯინედ იეჰოვა ელიშ თეცალ საქციელს? თიქ ელის უწუ: „მუშენ ცენქჷ სქან ქომოლსქუალეფს უმოს მეტ პატის ვინემ მა?“. ათეშენ იეჰოვაქ გეგნოჭყვიდ, ნამდა თე ჟირ უბადო კოჩ ღურათ დასაჯკო (1 სამ. 2:29, 34).

6. მუს ბგურაფლენთ ელიშ მაგალითშე?

⁶ ელიშ მაგალითშე მნიშვნელოვან გაკვეთილს ბგურაფლენთ. ჩქინ მეგობარქ ვარდა ნათესექ იეჰოვაშ კანონს ვედემორჩილ დო თენა ჩქი ქიგებგით-და, ოკო ქუდურაგადუათ თის დო ქუგვოშინათ იეჰოვაშ მოთხოვნეფ. თეშ უკულ ოკო დებრწმუნათ, ნამდა თინა მოხვარას მიღენს თინეფშე, მით იეჰოვაქ დანიშნჷ (იაკ. 5:14). ჩქი ვა მოკონა ვაგურათ ელის დო მეგობარს ვარდა ნათესეს, იეჰოვაშე უმოს მეტ პატი ფცათ. მართალ რე, გაბედულება მოსაჭირნა, ნამდა ქუდურაგადუათ თის, მიდგას გიშასწორება ოსაჭირ, მარა თეს ჯგირ შედეგეფ მოჸუნს. ქიდეკვირით, მუ განსხვავება რე ელიშ დო ისრაელ ოსურკოჩიშ, აბიგაილიშ მაგალით შქას.

7. მუშენ დურაგადუ აბიგაილქ დავითის?

⁷ აბიგაილ მდიდარ კოჩიშ, ნაბალიშ ოსურ რდუ. მუჟამსით დავით დო თიშ მსახურეფ მეფე საულშე მინტებდესინ, მუსხირენ ხანს ნაბალიშ ჭყიშეფწკუმა ართო რდეს დო მახირალეფშე იცვენდეს ნაბალიშ შხურეფს. ქორდუო ნაბალ მარდულ თე ირფელშენ? ვარ. მუჟამსით დავითიქ მსახურეფიშ პიჯით თხუ, ნამდა მუშა დო მუშ მსახურეფშა ჭიჭე ოჭკუმალ დო წყარ ქიმუჩამუდკო, ნაბალქ გერისხჷ დო გეუღვარუ თინეფს (1 სამ. 25:5—8, 10—12, 14). შედეგო, დავითიქ გეგნოჭყვიდ თიშ ჸუდეს არძა ქომოლკოჩ დოჸვილკო (1 სამ. 25:13, 22). შეიოლებერ ქორდუო თეცალ უბედრობაშა დუდიშ ეჩილითაფა? აბიგაილქ ქიმეხვად, ნამდა რაგადიშ დრო რდუ, ათეშენ თიქ გაბედულება გეგმირჩქინ დო მიდართჷ, ნამდა ქეშეხვადკო 400 შქირენულ, გარისხებულ დო შეიარაღებულ კოჩეფს დო ქუდურაგადუ დავითის.

8. მუს ბგურაფლენთ აბიგაილიშ მაგალითშე?

⁸ მუჟამსით აბიგაილქ დავითის შეხვად, თიქ გაბედულო, პატიცემათ დო დამაჯერებელო დურაგადუ. მართალ რე, აბიგაილს თე სიტუაციას მუთუნ ბრალ ვა უღუდ, მარა თიქ პატიება თხუ დავითის. თიქ დავითის ქაცქუ ჯგირ თვისებეფშენ დო იეჰოვაშ მოხვარაშ იმენდ უღუდ (1 სამ. 25:24, 26, 28, 33, 34). აბიგაილცალო, ჩქი ხოლო გაბედულო ოკო ბრაგადუათ, მუჟამსით ვორწყეთ, ნამდა პიროვნება თიცალ მუდგარენს ორთჷ, მუთ სერიოზულ ცოდვაშა მიჸუნანს (ფსალმ. 141:5). ჩქი გაბედულო, მარა პატიცემათ ოკო ბრაგადუათ. მუჟამსით პიროვნებას ჸოროფაშე გამომდინარე საჭირო რჩევას ვარზენთ, თეთ ვამტკიცენთ, ნამდა ნამდვილ მეგობარ ვორეთ (იგავ. 27:17).

9, 10. მუ ოკო შუდან უხუცესეფს შხვეფშა რჩევაშ მეჩამაშ დროს?

⁹ განსაკუთრებით მნიშვნელოვან რე, ნამდა უხუცესეფქ გაბედულო დურაგადუან თი თანაკრებელს, ნამუთ არასწორ ნაბიჯის გინოდგუნს (გალ. 6:1). უხუცესეფ თანდაბლურო აღიარენა, ნამდა თინეფ ხოლო არასრულყოფილეფ რენა დო შილებე ართ დღას მუნეფს ხოლო დესაჭირან რჩევაქ. მარა თენა ვაცილ უხუცესეფს, ქიმეხვარან თის, მიდგას გიშასწორება ოსაჭირ (2 ტიმ. 4:2; ტიტ. 1:9). მუჟამსით შხვას რჩევას არზენა, ოცადნა ღორონთშე მეჩამილ რაგადიშ ძღვინ თეშ გეგმირინუან, ნამდა ტაქტიანო დო მოთვინებათ ოგურუან. უხუცესეფს უჸორა და დო ჯიმალეფ, მუთ აღძრენს თინეფს, ქიმეხვარან თანაქრისტიანეფს (იგავ. 13:24). მარა თინეფიშ მთავარ მიზან რე, განადიდან იეჰოვა თით, ნამდა ხუჯ ქუდუკინან თიშ მაღალზნეობრივ ნორმეფს დო დეცვან კრება (საქ. 20:28).

¹⁰ თაშ ნამდა, ჩქი გუვარჩით მუჟამ ოკო ბრაგადუათ. მარა მინშა უჯგუშ რე, შურო მუთუნ ვა ფთქუათ. მუ სირთულეეფს შილებე შეფხვადათ თე დროს?

მუჟამ რე რაგადშე დუდიშ შეკებაშ დრო?

11. მუ მაგალით გიმირინუ იაკობიქ დო მუჭო მეურე თინა რაგადის?

¹¹ შილებე რთულ რდას ნინაშ გაკონტროლება. ბიბლიაშ ართ-ართ მაჭარალ, იაკობიქ, თენა მაგალითიშ საშვალებათ ეჭარ. თიქ თქუ: „მით სიტყვათ ვა ჩირთუ, სრულყოფილ რე დო მთელ სხეულიშ მართუა შეულებ. მუჟამსით ცხენს ოხენდალო ლაგამს ქევუდვანთ, თიშ მთელ სხეულს მაფრთუნთ“ (იაკ. 3:2, 3). ცხენს ლაგამს დუდის დო პიჯის ეუდვანა. ლაგამიშ ეწოზინდაფათ პიროვნებას შეულებ ცხენიშ მართუა დო გაჩერება. ცხენს გეხენ თინა ლაგამს ვა გაკონტროლენს-და, ცხენ სოვრე ოკონ თევრე ირულე დო შილებე, მუჭოთ მუშ დუდინ თეშ, თე პიროვნება ხოლო დაზიანას. თეშნერო, რაგად ვა გუვაკონტროლით-და, თეს შეულებ ბრელ პრობლემა მომღან. მორთ გუვარჩუათ მუსხირენ სიტუაცია, მუჟამსით საჭირო რე ნინაშ გაკონტროლება დო რაგადშე დუდიშ შეკება.

12. მუჟამ ოკო გუვაკონტროლათ ნინა დო ვებკითხათ მუთუნ?

¹² მუჭო იქციებუთ, მუჟამსით დას ვარდა ჯიმას კონფიდენციალურ ინფორმაცია უჩქჷ? მაგალთო, შილებე შეხვადათ თანაქრისტიანს, მით თიცალ ქიანას ცხოვრენს, სოდეთ ჩქინ საქმე ვარიებულ რე. ხომ ვეგედირთუთ ცდუნებაშ წოხოლე, ნამდა ქოკითხათ დეტალეფ თიშ გურშენ, მუჭო მეურს ჩქინ საქმიანობა თი ქიანას? მუშო ოკო რაგად, ჯგირ მოტივეფ მიღნა. ჩქი მიჸორა და დო ჯიმალეფ დო ფიფქრენთ, თინეფიშ მდგომარეობაშე. თეს გეძინელ, მოკონა კონკრეტულო იბლოცათ თინეფიშ გურშენ. მარა თენა რე დრო, მუჟამსით ჩქი ნინა ოკო გუვაკონტროლათ დო მუთუნ ვა ბკითხათ. მიდგას კონფიდენციალურ ინფორმაცია უჩქჷ თი პიროვნებას რაგადის ქუვანძალენთ-და, თეთ ვართ თე პიროვნებაწკუმა გიმიფრჩქინანთ ჸოროფას დო ვართ თი და დო ჯიმალეფწკუმა, მით თე პიროვნებას ონდჷ დო იმენდ უღჷ, ნამდა მუთუნს ვა თქუანს. მუშო ოკო რაგად, ჩქი ვა მოკონა პრობლემეფ გევუძინათ თი და დო ჯიმალეფს, მით თიცალ ქიანას ცხოვრენა, სოდეთ ჩქინ საქმიანობა ვარიებულ რე. თეს გეძინელ, თეცალ ქიანას ჩქი ქოფცხოვრენდათინ, ვეფსხუნუანდით, ნამდა გუვაცხადითკო დეტალეფ მსახურებაშ, ქრისტიანულ შეხვალამეფიშ ვარდა იეჰოვაშ თაყვანიშცემაშ შხვა მხარეეფიშ გურშენ.

13. მუჭოთ იგავეფიშ 11:13-ს ჭარჷ, მუ ოკო აკეთან უხუცესეფქ დო მუშენ?

¹³ განსაკუთრებით უხუცესეფქ ოკო გიმირინუან ბიბლიურ პრინციპ, ნამუთ ინოჭარ იგავეფიშ 11:13-ს დო ვა გაცხადან კონფიდენციალურ ინფორმაცია (წეკითხით). თენა შილებე რთულ რდას, განსაკუთრებულო დაქორწინებულ ჯიმალეფშო. დაოჯახებულ წყვილიშ ურთიერთობა უმოსო იმანგარებ, მუჟამსით ართიანს ურაგადნა მუნეფიშ ფიქრეფს, გრძნობეფს დო ოწუხებელს. მარა უხუცესის ჯგირო არჩქილე, ნამდა თიქ ოკო ვა გუცხადას მეუღლეს კონფიდენციალურ ინფორმაცია, ნამუთ თანაქრისტიანეფს ოხუ. თინა თაშ ქიმიქციებუნ-და, შხვეფიშ ნდობას ხოლო მიოდინუანს დო სახელ ხოლო გუტირხუ. თინეფ, მიდგას კრებას პასუხიშმგებლობეფ უღნა ოკო ვარდან თიცალეფ, მით შხვეფიშ ამბეს გილეჩიებნა (1 ტიმ. 3:8). თენა ნიშნენს, ნამდა უხუცესეფ თვალთმაქცეფ ოკო ვა რდან დო ვართ ჭორაობა ოკო უჸორდან. უხუცესის მუშ მეუღლე ქოუჸორს-და, ვა უწინს თიცალ ინფორმაციას, ნამუთ წესით ოკო ვა უჩქუდას.

14. მუჭო შეულებ უხუცესიშ მეუღლეს დოთხილუას ქომონჯიშ რეპუტაცია?

¹⁴ ოსურს შეულებ დოთხილუას ქომონჯიშ რეპუტაცია თით, ნამდა ვა დანძალას თი საკითხეფშე რაგად, მუთ კონფიდენციალურ რე. მუჟამსით მეუღლე გიმირინუანს თე რჩევას, ხუჯის უკინენს მუშ ქომონჯის დო თეს გეძინელ, თინეფიშ პატიცემას გიმირჩქინანს, მიდგაქ ენდჷ თიშ ქომონჯის. მუთ არძაშ უმოს მნიშვნელოვან რე, თინა იეჰოვაშ გურს ახარენს, მუშენდა კრებას მშვიდობას დო ართობას უნწყუნს ხეს (რომ. 14:19).

მუს ფიქრენს იეჰოვა თიშ გურშენ, მუდგას ბრაგადანთ?

15. მუს ფიქრენდჷ იეჰოვა იობიშ სუმ მეგობარშე დო მუშენ?

¹⁵ შემლებნა ბრელ დიბგურუათ ბიბლიაშ წიგნ, იობშე თიშ გურშენ, მუჭო დო მუჟამს ოკო იფჩუათ. თიშ უკულ, მუთ იობიქ გურიშგუმატახალ განსაცდელეფ გეგნიღ, ოთხ ქომოლკოჩიქ ქიმერთ თიშა, ნამდა გურშა ელუკინკო დო რჩევა ქიმეჩკო. თინეფს ბრელ ხანს ხონარ ვეკუღალნა. მარა სუმ კოჩიშ, ელიფაზიშ, ბილდადიშ დო ცოფარიშ ნარაგადშე იძირედ, ნამდა შუროთ ვა უფიქრებნა, მუჭო მეხვარესკო იობის. თეშ გინაწონს, თინეფ თიშე ფიქრენდეს, მუჭო დამტკიცესკო, ნამდა იობის მუდგარენ გლახა აფუდ კეთებულ. თინეფქ მუდგარენეფ სწორაშე თქუეს, მარა იობ დო იეჰოვაშ გურშენ ნარაგადიშ უმენტაშ ვარდა ტყურა რდუ დო ვარდა უბადობა (იობ. 32:1—3). თე სუმ ქომოლკოჩიქ ხეთეშე გასამართლ იობი. მუ რეაქცია უღუდ იეჰოვას? თიქ მანგარო გერისხჷ თე სუმ პიროვნებაშე. ღორონთიქ თინეფ უგუნურ კათათ მიშინუ დო უწუ, იობის ქოთხისკო, ნამდა თინეფიშ გურშენ ქილოცკო (იობ. 42:7—9).

16. მუშ გურაფა შემლებნა ელიფაზ, ბილდად დო ცოფარიშ გლახა მაგალითეფშე?

¹⁶ ელიფაზ, ბილდად დო ცოფარიშ გლახა მაგალითეფშე ბრელ მუდგარენს ბგურაფლენთ. პირველ, ჩქი ოკო ვა გუვასამართლათ თანაქრისტიანეფ (მათ. 7:1—5). თეშ გინაწონს, სოიშახ მუდგარენს ფთქუანთ, შურდოგურით ოკო ვურჩქილათ თინეფს. ხვალე თეშ უკულ შემალებენა გავუგათ მიდგას ვურაგადუთ (1 პეტ. 3:8). მაჟია, მუჟამსით მუდგარენს ბრაგადანთ, დარწმუნებულ ოკო ვორდათ, ნამდა გემუანო იფჩიებუთ დო სწორ ინფორმაციას გინოფჩანთ (ეფეს. 4:25). დო მასმა, იეჰოვა ოკვირ, მუს ვურაგადუთ ართიანს.

17. მუშ გურაფა შემლებნა ელიჰუშ მაგალითშე?

¹⁷ მანთხა პიროვნება, მიდგაქ იობიშ ოძირაფშა მერთჷ, აბრაამიშ ნათესე ელიჰუ რდუ. თინა ბოლოშა ურჩქილედ ქოთ იობის დო ქოთ თი სუმ კოჩის. მუჭოთ იძირენ, ელიჰუ ყურადღებით ოკვირუდ თითოულიშ ნარაგადის, ათეშენ გემშართჷ იობიშ მდგომარეობაშა დო ქიმეჩ პირდაპირ რჩევა, ნამუთ აზროვნებაშ გიშასწორებას მეხვარებუდ (იობ. 33:1, 6, 17). ელიჰუშ მთავარ მიზან იეჰოვაშ განდიდება რდუ დო ვართ ხოლო მუშ დუდიშ ვარდა შხვა მითინიშ (იობ. 32:21, 22; 37:23, 24). ელიჰუშ მაგალითშე ბგურაფლენთ, ნამდა მინშა მუთუნ ოკო ვა ფთქუათ დო ყურადღებით ვურჩქილათ შხვას (იაკ. 1:19). თეს გეძინელ, ბგურაფლენთ, ნამდა რჩევაშ მეჩამაშ დროს, ჩქინ მთავარ მიზან ჩქინ დუდიშ განდიდება ვარინ, იეჰოვაშ განდიდება ოკო რდას.

18. მუჭო შემლებნა მარდულობა გიმიფრჩქინათ რაგადიშ ძღვინშე?

¹⁸ მუჟამსით მეპჸუნთ ბიბლიურ რჩევას თიშ გურშენ, მუჟამ დო მუჭო ბრაგადუათ, თეთ ვოძირანთ, ნამდა ვაფასენთ რაგადიშ ძღვინს. ბრძენ მეფე სოლომონქ ღორონთიშ შთაგონებათ ჭარჷ: „დროულო რაგადებულ სიტყვეფ მოგენს ოქროშ უშქურეფს ნაჭკადა ვარჩხილს“ (იგავ. 25:11). მუჟამსით ყურადღებით ვურჩქილეთ შხვეფს დო რაგადიშ დოჭყაფაშახ ფიფქრენთ, ჩქინ სიტყვეფ აგურუ ოქროშ უშქურეფს, ნამუთ ქოთ ძვირფას რე დო ქოთ სქვამ. შედეგო, ვა უღჷ მნიშვნელობა ბრელს იფჩიებუთ დო ვარ ჭიჭეს, ჩქინ ჩიება შხვეფს გურშა ელუკინანს დო იეჰოვა ხოლო იამაყენს ჩქინით (იგავ. 23:15; ეფეს. 4:29). თენა არძაშ უჯგუშ შარა რე, ნამდა მარდულობა გეგმიფრჩქინათ ღორონთიშ თე დიდებულ ძღვინშე!