იეჰოვაშ დავალებეფიშ შესრულებას კურთხევეფ მოუღ

მა 1923 წანას, ჭიჭე ქალაქ ჰემსვორთის (იორკშირი, ინგლისი) დებაბდ. პჸუნდ ართ ჯიმა, ნამუთ ჩქიმდე უნჩაშ რდუ, თის ბობი ჯოხოდ. ჩხორო წანერ ვორდ, მუჟამსით მუაჩქიმს ხეშა ქეშუოლ წინგეფქ, ნამუთ ტყურა რელიგიეფიშ საქმეეფს აარგამენდ. თის ვამაძირედ, მუჭო აღორენდ ხალხის რელიგიეფი, თეშგურშენ ნაკითხირქ მანგარო იმოქმედ თიწკუმა. მუსხირენ წანაშ უკულ ართ ჯიმაქ, ბობ ატკინსონქ ჩქინ ჸუჩა ქუმორთ დო პატეფონით ჯიმა რუტერფორდიშ ართ-ართ მოხსენებაშა ქუმორჩქილეს. ქიმეფხვადით, ნამდა თი წიგნეფ ხოლო თე ხალხიშ გიშაშკუმალირ რდუ. მშობლეფქ თე ჯიმას ქოუწის, ნამდა ირ ონჯუას ჩქინდა ქუმურთუმუდკო, ოჭკუმშა ართო ქუდომხუნდესკო დო ჩქინ კითხვეფშა ქუპასუხებუდკო. თიქ ქუდმაპეჯეს კრებაშ შეხვალამაშა, ნამუთ მუსხირენ კილომეტრიშ მაშორას ართ ჯიმაშ ჸუდეს იტარებუდ. ხეთეშე ქიდიბჭყით გილულა დო ჰემსვორთის ჭიჭე კრებაქ გინწყუ. ბრელ დრო ვა რდუ მიკულირ დო ჩქინ ჸუდეს უკვე ზონალურ ზედამხედველეფ (ასე რაიონულ ზედამხედველეფ) ჩენდუდეს, თეწკუმა ართო გოხოლუას მსახურენდესინ თი პიონერეფს ხოლო სადილშა ვაპეჯენდით. თინეფწკუმა ურთიერთობაქ მანგარო იმოქმედ ჩქიმწკუმა.

ჩქი ბიზნეს ქიდიპჭყით, მარა მუაჩქიმქ ჩქიმ ჯიმას უწუ: „ქუგოკო პიონერო ქიმსახურენ-და, დუდ დუვანებათ თე საქმეს!“. ბობიქ ქუდაჸუნ თის დო 21 წანერ რდუნ თეშ შხვა ტერიტორიას ქიდიჭყ პიონერო მსახურება. ჟირ წანაშ უკულ, მუჟამსით 16 წანერ ვორდინ, მა ხოლო პიონერო ქიდიბჭყ მსახურება. საბატონ დო ჟეშხას შხვეფწკუმა ვმსახურენდ, მარა შხვა დღალეფს ხვალე ფქადაქენდ სამქადაქებლო ბარათეფით დო პატეფონით. იეჰოვაქ მაკურთხ დო ბიბლიაშ გურაფა ქიდიპჭყ ართ პიროვნებაწუმა, ნამუთ სულიერო მალას მიშ წოხოლე. თიშ ოჯახშე ბრელქ მიღ ჭეშმარიტება. უკულიან წანას მერი ჰენშელწკუმა ართო სპეციალურ პიონერო დაბნიშნეს დო გაუნაწილებელ ტერიტორიაშა, ჩეშირშა გომტეს.

მაჟია მსოფლიო ჩხუპიშ დროს ოსურკათაშე ხოლო ითხინდეს ხუჯ ქუდუკინებდესკო ჩხუპშა შხვა დო შხვა საქმეშ კეთებათ. სპეციალურ პიონერეფ ვორდით დო ველუდით, შხვა რელიგიაშ მსახურეფცალო, ჩქი ხოლო გუმათავისუფლენდეს თე საქმეეფშე. მარა სასამართლოქ ვარია ქოთქუ დო 31 დღათ ციხეშა გომტეს. 19 წანერ ვორდინ თეშ, სასამართლოს ჟირშა მაჸუ გიორნალქ, ჩხუპშე ვარია ფთქვი თიშ გურშენ. მარა ჟირხოლოშა გომტუეს. ქობძირ, ნამდა იეჰოვას ჩქიმ ხე უკებუდ დო წმინდა შურით მამანგარენდ (ეს. 41:10, 13).

ახალ მაჸალე

1946 წანას არტურ მეთიუსის ქეშეფხვად. თინა სუმ თუთათ ციხეს ქუდახუნეს ჯარშა ვედუნ თიშენ. ციხეშე გითულაშ უკულ მუშ ჯიმა, დენისწკუმა ართო სპეციალურ პიონერო მსახურენდ ჰემსთვორთის. მუამუშ თინეფს ბაღანობაშე ოგურუანდ იეჰოვაშ გურშენ, ათეშ გურშენ დიო ხოლო მარდუეფ რდეს, მუჟამსით ინათესინ. ჭიჭე ხანშა დენის ირლანდიას დანიშნეს დო არტურქ ხვალე ქუდოსკიდ. ჩქიმ მშობლეფს მანგარო მოწონდეს თე ახალგაზრდა პიონერ, ათეშენ ქოუწის, ნამდა თინეფიშ ჸუდეს გუჩერებუდკო. მუჟამსით ჸუჩა დიფრთინ არტურქ ხოლო თექ ქუდოფხვად. სადილიშ უკულ ჟირხოლო ართო ფრჩხუნდით სენეფს. საბოლათ ართიანშა წერილეფიშ მეჭარუა ქიდიპჭყით. 1948 წანას არტურ კინ სუმ თუთათ ქუდახუნეს ციხეს. ჩქი 1949 წანაშ იანარს დეფქორწინით დო გინოჭყვიდილ მაფდეს, მუთ შილებე მეტ ხანს მიმსახურებდესკო პიონერეფო. იეჰოვაშ მოხვარათ დო ჯგირ დაგეგმებაშ ჭყოლოფუათ, შვებულებაშ დროს ხილს პკორობუნდით დო თეშნერო ფშიბულენდით ფარას. თენა საშვალებას მარზენდეს პიონერულ მსახურება გამგრძელებდესკო.

სოდგარენ ართ წანაშ უკულ ქოფთხის, ნამდა ჩრდილოეთ ირლანდიაშა, დიო არმაშა დო უკულ ნიურიშა გეგნომრთუმდესკო. ჟირხოლო ქალაქის უმოსო კათოლიკეეფ ცხოვრენდეს. თექ ქადაქება ეფ ვა რდუ, ათეშენ შხვეფწკუმა რაგადიშ დროს დაკვირებას დო სიფრთხილეს გიმიფრჩქინანდით. შეხვალამეფ იტარებუდ და დო ჯიმალეფიშ ჸუდეეფს, ნამუთ ჩქინდე 16 კილომეტრიშ მაშორას რდუ. თე შეხვალამეფს გვალო 8 კოჩ ოსწრუდ. მუჟამსით და დო ჯიმალეფ გიოსერაფალო მაჩერენდესინ, პროლს გივოჯანუდით დო ოჭმარეს შურ დო გურით კეთებულ ოჭკუმალს მიკომღანდეს. დიდ ხიოლ მოუღ თიშ ძირაფას, ნამდა თი მხარეს ასე ბრელ იეჰოვაშ მოწმე რე.

„ჩქი გუვაკეთენთ თეს!“

ჩქიმ ჯიმა დო მუშ ოსურ, ლოტი უკვე მსახურენდეს სპეციალურ პიონერეფო ჩრდილოეთ ირლანდიას. 1952 წანას ოთხოლოქ ქიდვესწრით რეგიონულ კონგრესის, ნამუთიქ ბელფასტის ჩეტარ. ართ ჯიმაქ მუშ ჸუდეშა მემღეს, სოდეთ ბრიტანეთიშ ფილიალიშ მსახურ, ჯიმა პრაის ჰიუზი ხოლო რდუ. ართ ონჯუას ახალ ბუკლეტიშ გურშენ იფჩიებუდით, ნამუთ უმენტაშო ირლანდიელ ხალხშო რდუ გიშაშკუმალირი. თიშ სათაურ რდუ „ღორონთიშ შარა ჸოროფა რე“. ჯიმა ჰიუზი იჩიებუდ, ნამდა ეფ ვარდ ირლანდიას კათოლიკეფწკუმა ქადაქება. მღვდელეფიშ ახნარებულ ხალხ დუც გიანთხუდ ჩქინ და დო ჯიმალეფს დო ჸუდეეფშე გიმორაჸუნდეს. ჯიმა პრაისიქ მიწუეს: „თიშნერ წყვილ მოკონა, მისით მანქანა ჸუნს დო შეიალებე ბუკლეტეფიშ მთელ ქიანას გავრცელება“.a ჩქი, მუჭოთ დაჭყაფუს მიფშინეთინ თეშ ვუპასუხით: „ჩქი გუვაკეთენთ თეს!“.

დუბლინს ცხოვრენდ ართ და, მო რუტლანდი, ნამუთ დიდ ხანს ართგურო ომსახურუდ ღორონც. თიშ ჸუდეშ კარ ირო გონჯამილ რდუ პიონერეფშო. ჭიჭე ხანს თე დაწკუმა გაფჩერდით. უკულ მუსხირენ ნივთი გეგმოფჩით დო ოთხოლოქ ბობიშ პრიცეპამ მოტოციკლეტით მანქანაშ ოჸიდირშა მიდაფრთით. ქობძირით ართ მანქანა, ნამუთ მართალ რე, ახალ ვა რდუ, მარა თიშ გიმორნაფა შეიოლებერ რდუ. მინჯეს ქოფთხით, თინა ჩქინდა ქუმუჸონაფუდკო, მუშენდა ნამთინს ვამჩქუდეს მანქანაშ ჸონაფა. მთელ ონჯუას არტურ ნორჩალს ეშახედ დო ვარჯიშენდ სიჩქარეეფიშ ენოჸოთამას. მაჟია ოჭმარეს, მუჟამსით თინა მანქანაშ ერთინაფას დო გარაჟშე გითოჸონაფას ოცადუდუნ, ართ მისიონერ დაქ, მილდრედ ჰენშელქ (ნამუთიქ უმოს გვიანო ჯონ ბარის აჸუნ ოსურო) ქუმორთ. თის მანქანა ჯგირო უჩქუდ დო ქუმოძირეს, მუჭო მიჸონაფდესკო თინა. თეშ უკულ შარას ქიგვაჸუნით.

ასე უკვე გასაჩერებელ ადგილ მაფდეს ოგორალი. ჯიმალეფქ მიწუეს, ნამდა ოცხოვრებელ ვაგონს ვა გამჩერებდესკო, მუშენდა მოწინაღმდეგეფს შილებე თიშა დაჩხირ ქუმუნტებდესკო. ათეშენ ჸუდეს ბგორუნდით, მარა მუთუნქ ვამაშის. თიმ სერ ოთხოლოქ მანქანას გუვოთანეთ. მაჟია ოჭმარეს დობგორით ხეშ ნაკეთებ ჭიჭე ოცხოვრებელ ვაგონი, ნამუსით ჟირ დანჯირუ უღუდ დო თექ გინიბლით ოცხოვრებშა. ვაგონს ვაჩერენდით თიცალ ადგილს, ნამუთ თექიან ფერმერეფს ოკუთნუდ; გასაკვირ რე, მარა თინეფშე პრობლემა დღას ვაფშიბნა. ჩქინ ვაგონშე 16—24 კილომეტრიშ მაშორას გილეფშით ოქადაქებშა. ახალ ტერიტორიაშა გინულაშ უკულ, უკახლე იფრთუდით, ნამდა თი ფერმერეფს ქუქადაქითკო, სოდეთ აიშახ ვაგონ მაფდეს გაჩერებული.

სამხრეთ აღმოსავლეთ ირლანდიას ბრელ პრობლემა ვეშეფხვალამნან თეშ, არძა ჸუდეშა ქიმეფრთით დო 20 000-შე მეტ ბუკლეტ გუვავრცელით. დაინტერესებულ კათაშ მისამართეფ ბრიტანეთიშ ოფისის გეგნოფჩით. დასურო დიდ კურთხევა რე, ნამდა ასე თექ ოშობით იეჰოვაშ მოწმე მსახურენს!

დიო ინგლისიშა, უკულ შოტლანდიაშა

ჭიჭე ხანშა სამხრეთ ლონდონს დაბნიშნეს. მუსხირენ მარაშ უკულ არტურს ბრიტანეთიშ ოფისშე დურეკეს დო ქუდავალეს, ნამდა მაჟია დღას გილმალ ზედამხედველო მსახურება ქუდუჭყაფუდკო. ართ მარიან მომზადება გემკოფრთით დო უკულ შოტლანდიას ქიდიპჭყით მსახურება. არტურს დრო შურო ვასკიდუდ, ნამდა მოხსენება მამზადკონ, მარა სირთულეეფიშ უმკუჯინუო, თინა ირიათო მზათ რდუ ირნერ დავალება შეასრულკო დო თენა რწმენას მიმანგარენდ. ჩქინო თეშნერ მსახურებას მანგარ ხიოლ მოუღუდ. მუსხირენ წანას ფქადაქენდით განაწილებურ ვა რდუნ ფერ ტერიტორიას დო დიდ კურთხევა რდუ თექიან და დო ჯიმალეფწკუმა ართო მსახურება.

1962 წანას არტურს გალაადიშ ვით თუთიან სკოლაშა ქუდუძახეს დო დიდ არჩევანიშ წოხოლე ქიგებდირთით. მართალ რე, მა ხვალე ფსკიდუდ, მარა გინოპჭყვიდით, არტურს ვარია ვა უთქუალუდკო თე დიდ პატიშენ. მსახურებას მაჸალე ვაპჸუნდ დო ათეშენ კინ ჰემსვორთშა გომტეს სპეციალურ პიონერო. არტურქ ართ წანაშა დირთ დო კინ გილმალ მსახურებო დაბნიშენს. ჩქი შოტლანდიას, ჩრდილოეთ ინგლისის დო ჩრდილოეთ ირლანდიას ვმსახურენდით.

ირლანდიას დაბნიშნეს

1964 წანას არტურქ ახალ დანიშნულება მიღ დო ირლანდიაშ ფილიალიშ მსახურო დანიშნეს. ჩქი მანგარო მიჸორდეს გილმალ მსახურება დო ათეშენ ახალ დანიშნულებაქ ჭიჭე დუმოშქურნეს. მარა ულირს იფშინანქინ, მარდულ ვორექ, ნამდა ბეთელს მსახურებაშ პატი მიღუდ. მუჟამსით თიცალ დავალებაშ კეთებაშე ხოლო ვათქუანქ ვარიას, ნამუთ იშენ დო იშენ ვაისხუნუნ, იეჰოვაშ კურთხევეფ ვამგოკორდუ. ბეთელს შხვადოშხვა საქმე მიღუდ, მუნერით რე საოფისე საქმეეფ, ლიტერატურაშ ინონწყუალა, ოჭკუმალიშ კეთება დო დონწყუალა. მინშა გილმალ მსახურება ხოლო მიხვადუდეს დო ბრელ და დო ჯიმაწკუმა მიღდეს ურთიერთობა, თეს გეძინელ ვორწყედით, მუჭო მიშეს სულიერო წოხოლე ჩქინ ბიბლიაშ მაგურაფალეფი. თე ირფელქ და დო ჯიმალეფ ართ ოჯახო ეკობშაყარეს. თენა დიდ კურთხევა რდუ!

მნიშვნელოვან მოვლენა ირლანდიას

ირლანდიას პირველ საერთაშორისო კონგრესიქ 1965 წანას დუბლინს ჩეტარ.b დიდ წინააღმდეგობაშ უმკუჯინუო, თე კონგრესის ჯგირ შედეგეფქ მაჸუნ; თის 3 948 კოჩიქ დესწრ დო 65 ინათ. შხვადოშხვა ქიანაშე მოულირ 3 500 დელეგატიქ თექიან მახორუეფიშ ჸუდეეფს გაჩენდ. კონგრესიშ უკულ არძა მენძელს წერილ ქუდუტეს, სოდეთ სტუმარეფ სიმარდულს გიმოხანტუნდეს. მენძელეფ ხოლო ოცქვანდეს თინეფს ჯგირ საქციელიშ გურშენ. თენა ირლანდიას დასურო მნიშვნელოვან მოვლენა რდუ.

ჩრდილოეთ დო სამხრეთ ირლანდიას ხალხ პოლიტიკურო დო რელიგიურო გორთილ რდუ. თეშ გინაწონს ღორონთიშ ხალხის ართობა უღუდ. თეს ამტკიცენს თინა, ნამდა 1966 წანას დუბლინიშ ფილიალშა, ნამუთ სამხრეთ ნაწილს ხემძღვანელენდუნ, ირლანდიაშ ჩრდილოეთ ნაწილქ ხოლო გეგნორთ. გახარებულ ვორდით თიშ ძირაფათ, ნამდა ბრელ კათოლიკე მიშ რწმენაშა დო თი ჯიმალეფწკუმა მსახურენდ, მით ართ დროს პროტესტანტეფ რდეს.

ახალ დავალება

2011 წანას ბრიტანეთიშ დო ირლანდიაშ ფილიალეფქ აკიძინეს დო ლონდონიშ ფილიალშა გეგნომჸონეს. თექ დუდშე ბოლოშა დოთირუ ჩქინ ცხოვრება. თე დროს არტურიშ ჯამრთელობაშე ბწუხენდ, თის პარკინსონიშ ლახალა უღუდ. სანარღოთ, არტურქ 2015 წანაშ 20 მესის დომღურ. ჩქი 66 წანას ვმსახურენდით ართო.

ბოლო მუსხირენ წანა რე გურიშ გოტახუას დო დეპრესიას ვობრძოლუქ. ულირს, თეცალ დროს ირიათო არტურ ელამირდ. ასე მანგარო მიჭირს თიშ უმშობა. მარა, მუჟამსით თეცალ სირთულეფს შეთმოხვადუქინ, იეჰოვაშე უმოსო გინაფლენქ ელარნას დო უმოს ხოლოს რექ თიწკუმა. გურს მიტიბუანს თიშ ძირაფა, მუჭო ნოჸოროფუენა არტურ ჩქინ მეგობრეფს. თინეფ წერილეფს ბჭარუნდეს ირლანდიაშე, ბრიტანეთშე დო ამერიკაშე ხოლო. თეს გეძინელ, მანგარო ელამირდ არტურიშ ჯიმა დენის, თიშ ოსურ მეივის დო ჩქიმ ჯიმასქუალეფ რუთი დო ჯუდი. ნინათ ვემაჭარე, მუჭო ელამკინანდ გურშა თე ირფელ.

ესაიაშ 30:18-ის ენოჭარილ სიტყვეფქ მანგარო მიმეხვარ: „იეჰოვა ელუ დროს, ნამდა ჯგირ გაიკეთან დო გემწოდირთუ, ნამდა შეიცოდილუან, მუშენდა იეჰოვა სამართლიან ღორონთ რე. ბედნერ რე არძა, მიდგა თის მიოჯინე“. გურშა მანგარო ელამკინანს თიშ რჩქინა, ნამდა იეჰოვა მოთვინებათ ელუ თი დროს, მუჟამსით ირფელს გეგშანწყუნს დო სამოთხეს ახალ დავალებეფს ქომჩანა.

მუჟამსით ულირ ცხოვრებას იფშინანქინ, ვორწყექ, მუჭო უხემძღვანელ დო აკურთხ იეჰოვაქ ქადაქებაშ საქმე ირლანდიას. ჩქიმო დიდ პატი რე, ნამდა თი ხალხ შქას ვორექ მიდგა თე საქმეს ღებულენდ მონაწილებას. არგამა რე, იეჰოვაშ დავალებეფიშ შესრულებას კურთხევეფ მოუღ.