მიჸორდან საქმეთდო ჭეშმარიტებათ

1. ნამ რე უდიდაშ ჸოროფა დო მუშენ? (ქოძირით სურათი თე გვერდის).

ჸოროფა, ნამუთ სწორ პრინციპეფშა (აგაპე) რე გერსხილინ, იეჰოვაშ ძღვინ რე. თინა ღორონთშე მოურს დო თიშე უმოს დიდ ჸოროფა ვა არსებენს (1 იოან. 4:7). თეცალ ჸოროფა გრძნობეფშე უმოს რე. თის გიმიფრჩქინანთ, მუჟამსით თოთმაცურო ვეფქციებუთ დო ჯგირ საქმეეფს შხვეფიშ ოძირაფალო ვა ვორთუთ. ზუსტას თეცალ ჸოროფას მოუღ ჩქინო ხიოლ დო აზრიან ცხოვრება.

2, 3. მუჭო გიმირჩქინ იეჰოვაქ უთოთმაცო ჸოროფა?

² იეჰოვაქ ხალხიშ ჸოროფა დიო ხოლო ადამ დო ევაშ გოჭყაფაშახ გიმირჩქინ. თიქ თიშენრო გაჭყ დედამიწა, კათას თექ მარადიულო დო ბედნერო უცხოვრებუდკონ. ღორონთიქ თენა მუშ საჯგირობუოთ ვარინ, ჩქინ გურშენ აკეთ. დედამიწა ოცხოვრებელო მახაზირუნ თიშ უკულ, იეჰოვაქ გაჭყ ადამ დო ევა დო ქიმეჩ სამოთხეს მარადიულ ცხოვრებაშ იმენდი. თეგვარო, თიქ უთოთმაცო ჸოროფა გეგმირჩქინ.

³ იეჰოვაქ თეცალ ჸოროფა თიმ დროს ხოლო გიმირჩქინ, მუჟამსით ადამ დო ევაქ თის ოჭიშ ქურთინეს. ღორონც უჩქუდ, ნამდა თინეფიშ გამნარყშე ნამთინე დაფასენდ თიშ ჸოროფას, ათეშენ კაცობრიობაშ დარსხება გეგნოჭყვიდ (დაბ. 3:15; 1 იოან. 4:10). თიმ წუთშე მოჸუნაფილ, მუჟამსით იეჰოვაქ თეშ პირობა დოდუნ, თიშ თოლს თენა უკვე შესრულებულცალ რდუ. სოდგარენ 4 000 წანაშ უკულ იეჰოვაქ მუშ ხვალეგუნაჭყეფ სქუა ქუმაშკვ კაცობრიობაშ ორსხებელო (იოან. 3:16). ჩქი ღორონთიშ მარდულეფ ოკო ვორდათ თეცალ უთოთმაცო ჸოროფაშ გიმორჩქინაშენ.

4. სოვრეშე იძირე, ნამდა არასრულყოფილ კათას ხოლო შეულებ უთოთმაცო ჸოროფაშ გიმორჩქინა?

⁴ ჩქი ხოლო შემლებნა უთოთმაცო ჸოროფაშ გიმორჩქინა, მუშენდა ღორონთიქ მუშ ამნახანტო გუმოჭყეს. მეკვირდობათ გინოჩამილ ცოდაშ გურშენ, შილებე ეფი ვა რდას თეცალ ჸოროფაშ გიმორჩქინა, მარა თენა შეიოლებერ რე. აბელქ ღორონთიშ ჸოროფა თით გიმირჩქინ, ნამდა მუდგა უღუდუნ თევრეშე, არძაშ უჯგუშ შეწირ ღორონც (დაბ. 4:3, 4). ნოექ ხოლო უთოთმაცო ჸოროფა გიმირჩქინ დო წანეფიშ დინახალე უქადაქუდ თიცალ კათას, მით ჸუჯშა ველეშკვანდ ღორონთიშ სიტყვას (2 პეტ. 2:5). მუჟამსით ღორონთიქ აბრაამს უწუ, ნამდა ისააკი შეუწირებუდკო, აბრაამქ მუშ სქუაშ ჸოროფაშ წოხოლე ღორონთიშ ჸოროფა ქიგიორინუ (იაკ. 2:21).

მუს ნიშნენს ნამდვილ ჸოროფა?

5. მუჭო შემლებნა ნამდვილ ჸოროფაშ გიმორჩქინა?

⁵ ბიბლია იჩიებ, ნამდა ნამდვილ ჸოროფა „სიტყვათ დო ნინათ ვარინ, საქმეთ დო ჭეშმარიტებათ“ ოკო იძირედას (1 იოან. 3:18). ხომ ვა ნიშნენს თენა, ნამდა ვეშემლებნა ჸოროფაშ სიტყვეფით გიმოხანტუა? მუშო ოკო რაგად, ვარ! (1 თეს. 4:18). თენა თის ნიშნენს, ნამდა ჸოროფა ხვალე სიტყვეფით ვარინ, საქმეეფით ოკო ვოძირათ, არძაშ უმოსო თიმწკუმა, მუჟამსით სიტუაცია ითხინს თეს. მაგალთო, თანაქრისტიანს აუცილებერ მუდგარენ, ოჭკომალ ვარდა მუკაქუნალ ქასაჭირუნ-და, ხვალე სიტყვეფით ვამმახვარებენა (იაკ. 2:15, 16). თეს გეძინელ, ღორონთიშ დო ხალხიშ ჸოროფა გეგმიფრჩქინათინ, აქტიურო ოკო ბღებულენდათ მონაწილებაშ ქადაქებაშ საქმეს. თე დროს ხვალე თიშე ლოცვა, ნამდა მეტ მაქადაქებელქ ქიჸუასინ, ვა რე დასაბაღი (მათ. 9:38).

6, 7. ა) მუნერ რე „უთოთმაცო ჸოროფა“? ბ) ქიმიჸონით თოთმაცურ ჸოროფაშ მაგალითეფი.

⁶ მოციქულ იოანექ ჭარ, ნამდა ოკო მიჸორდან „საქმეთ დო ჭეშმარიტებათ“. შხვანერო ქოფთქუათინ, ჩქინ ჸოროფა „უთოთმაცო“ ოკო რდას (რომ. 12:9; 2 კორ. 6:6). ნამდვილ ჸოროფა ვეძირე, მუჟამსით ართის იფჩიებუთ დო მაჟიას ფიფქრენთ. შილებე კითხვაქ გოირჩქინდან: „არსებენსო თოთმაცურ ჸოროფა?“. მუშო ოკო რაგად, ვარ. შხვეფიშ ოძირაფალო ჸოროფაშ გიმორჩქინას ჸოროფა ვა ჯოხო.

⁷ მორთ, გუვარჩუათ თოთმაცურ ჸოროფაშ მუსხირენ მაგალითი. სატანაქ ედემიშ ბაღის თეშ მიქცუ, ითამ ევაშო ჯგირ ოკოდკონ, მარა გეგმიარგამ, ნამდა თოთმაცურო იქციებუდ დო ხვალე მუშ დუდშო ფიქრენდ (დაბ. 3:4, 5). ახითოფელქ მუშ საქციელით ქაძირუ, ნამდა ვა რდუ დავითიშ ნამდვილ მეგობარი. მუჟამსით თიქ ქოძირ, ნამდა შეულებუდ მუშ დუდშო მუდგაინ ჯგირობუა მეუღებუდკო, ოჭიშ ქურთინუ დავითის (2 სამ. 15:31). ამდღა ხოლო, განდგომილეფ დო შხვეფ, მით კრებაშა ერია-მორიაშ მიშაღალას ოცადნან, თოთმაცურ სიტყვეფით დუც თეშ მუმოძირუანა, ითამ ვუჸორთ, მარა ხვალე მუნეფიშ დუდშო ფიქრენა (რომ. 16:17, 18).

8. მუ ოკო პკითხათ ჩქინ დუც?

⁸ თოთმაცურ ჸოროფა მანგარ გლახა რე, მუშენდა თის შხვეფიშ ოღორებელო გიმირინუანა. თეშნერ საქციელით შილებე კოჩ დუვაღორათ, მარა იეჰოვა ვა მაღორებენა. იესოქ თქუ, ნამდა თეცალ კათას ღორონთ ართ დო სამუდამოდ დასაჯენს (მათ. 24:51). მუშო ოკო რაგად, იეჰოვაშ მსახურეფს ვაკონა გიმირჩქინან თოთმაცურ ჸოროფა. ათეშენ, ჯგირ იჸუაფ ჩქინ დუც ქოპკითხათ: „ირიათო ქიგმიფრჩქინანქო ნამდვილ ჸოროფას? ხვალე ჩქიმ დუდშე ხომ ვა ფიფქრენქ დო თოთმაცურო ხომ ვეფქციებუქ?“. მორთ, გუვარჩუათ ჩხორო საშვალება, ნამუთ მიმეხვარებნა ნამდვილ ჸოროფაშ გიმორჩქინას.

მუჭო მიჸორდან „საქმეთ დო ჭეშმარიტებათ“

9. მუს გუვაკეთენთ ნამვდილ ჸოროფა ქომღუნან-და?

⁹ ხიოლით იმსახურით თიმწკუმა ხოლო, მუჟამსით თქვან ნაკეთებ საქმეს მითინ ვარწყე. ჯგირ საქმეეფ თიმწკუმა ხოლო ოკო ვაკეთათ, მუჟამსით მიჩქუნა, ნამდა თეშ გურშენ შხვეფ დღას ვეგეგენა (წეკითხით მათე 6:1—4).a ანანია დო საფირას თაშ ვა მუქციებნა. თინეფს ოკოდეს არძაქ ქიგეგკო შესაწირს ორთუდეს დო ტყურა ქოთქვის, ითამ მუთ ფარა ქუღდესინ, ირფელ შეწირეს. თეცალ თოთმაცობაშ გურშენ თინეფქ დესაჯეს (საქ. 5:1—10). ჯიმალეფ ნამდვილო ქომიჸორან-და, ჩქინო ხიოლ მოუღდას იჸი თინეფშო ჯგირიშ კეთებას დო თეს შხვეფს ხოლო ვაგვოგებაფუანთ. მაგალთო, ჯიმალეფ ნამუთ ხემძღვანელ საბჭოს სულიერ საზრდოშ მომზადებას ოხვარნან, ვაცადნა დუდიშ გიმორჩქინას დო ვართ თის, ნამდა შხვეფს ქუგაგებაფუან მუ საკითხშე იმუშეს.

10. მუჭო შემლებნა შხვეფიშ პატიცემას გიმორჩქინა?

¹⁰ პატი ქოცით შხვეფს (წეკითხით რომაელები 12:10).b იესოქ შხვეფიშ პატიცემაშ მაგალით მუჩეს, მუჟამსით მუშ მოწაფეეფს კუჩხეფ უბონ (იოან. 13:3—5, 12—15). შილებე ჩქინ დუდშე ომუშებელ მაჸუან, ნამდა გუვავითარათ თანდაბლობა დო შხვეფიშ პატიცემა გეგმიფრჩქინათ. ონდო წმინდა შური ვემიღესინ, მოწაფეეფს ბოლოშა ვა რჩქილედეს მუდგას იესო ორთუდუნ (იოან. 13:7). ჩქინ დუდშე დიდ წარმოდგენა ოკო ვა მაშუან რჩქინაშ, ქონებაშ დო იეჰოვაშ ორგანიზაციას მეღებულ პასუხიშმგებლობეფიშ გურშენ. თეგვარო შხვეფიშ პატიცემას გიმიფრჩქინანთ (რომ. 12:3). ჩქი ვა მონჯარდან ოკო, მუჟამსით შხვეფს ოცქვანა, თეშ მანგიორო მოხიოლდან ოკო თინეფიშ წიმი ულა, თიმწკუმა ხოლო, მუჟამსით ფიფქრენთ, ნამდა კეთებულ საქმეშ გურშენ ჩქი ხოლო მოკუთნუდეს ცქვაფა.

11. მუშენ ოკო ვოცქუათ მთელ გურით?

¹¹ მთელ გურით ქაცქვეთ და დო ჯიმალეფს. მუჟამსით შხვეფიშ ოცქვაფალო ირნერ საშვალებას გიმიბრინუანთინ, თენა ჯგირო მოქმედენს თინეფწკუმა (ეფეს. 4:29). შხვეფს მთელ გურით ვა ვოცქვეთ-და, პიც ფერაფა გიშმალენა დო ვართ თინა შემალებენა, ნამდა საჭირო დროს რჩევეფ ქიმეფჩათ თინეფს (იგავ. 29:5). თოთმაცობა რე, მუჟამსით კოც პიც ვოცქვანთ დო უკახალე გლახას ეკვორაგადანთ. მოციქულ პავლექ ნამდვილ ჸოროფაშ გიმორჩქინაშ ჯგირ მაგალით დომტუეს. მაგალთო, თიქ მთელ გურით ქაცქუ კორინთიშ ქრისტიანეფს თი საქმეეფშე, მუდგასით ჯგირო ორთუდეს (1 კორ. 11:2). მარა, მუჟამსით თინეფიშ საქციელ ოცქვაფალ ვა რდუნ, პავლექ არგამათ დო ტაქტიანო გეუნწყ მუ აფდეს გაუჯუშებელი (1 კორ. 11:20—22).

12. მუჭო შემლებნა ნამდვილ ჸოროფაშ გიმორჩქინა სტუმარეფიშ პატიცემაშ დროს?

¹² გეგმირჩქინით სტუმარიშ პატიცემა. იეჰოვა ითხინს, ნამდა ჩქინ და დო ჯიმალეფწკუმა ხეგოფაჩილეფ ვორდათ (წეკითხით 1 იოანე 3:17).c თეწკუმა ართო, აუცილებერ რე სწორ მოტივეფ მიღდან. ათეშენ ჩქინ დუც ოკო პკითხათ: „სტუმარიშ პატიცემას ხვალე თინეფშა ხომ ვეგმიფრჩქინა, მიდგაშე სარგებელს ველუქ, ხოლოშიან მეგობარ მაფ ვარდა მუდგარენ პასუხიშმგებლობა უღუ? ქუვოცადუქო თი და დო ჯიმალეფიშ პატიცემას ხოლო მიდგას ჯგირო ვეფჩინენქ ვარდა ვეშულებ პატიცემაშ აშო გინოგაფა?“ (ლუკ. 14:12—14). მაგალთო წერმიდგინით, თანაქრისტიანქ სწორაშე ვეგნოჭყვიდ საკითხი, ათეშენ პრობლემას ქეშეხვად დო მოხვარა ოსაჭირ; ვარდა ქრისტიანს ირო აპეჯენთ თქვანდა, მარა თის მადლობა დღას ვა უთქუალ. თეცალ დროს ოკო გეგმიბრინუათ ბიბლიას მოჩამილ რჩევა: „გეგმირჩქინით სტუმარიშ ჸოროფა ვეჭირათინ თეშ“ (1 პეტ. 4:9). თე რჩევას ქიმიაჸუნუთ დო სწორ მოტივეფით სტუმარეფიშ პატიცემას გეგმირჩქინანთ-და, ბედნერეფ იჸუაფუთ (საქ. 20:35).

13. ა) მუჟამ შილებე არძაშ უმოსო გამჭირდან სულიერო მოსუსტებულეფიშ მოხვარაქ? ბ) მუჭო შემლებნა ელუდირთათ სულიერო მოსუსტებულეფს?

¹³ ქელუდირთით სულიერო მოსუსტებულეფს. ნამდვილ ჸოროფაქ შილებე გეგმიცადას თე ბიბლიურ მითითიებათ „ქელუდირთით მოსუსტებულეფს დო მუთვინით არძას“ (1 თეს. 5:14). ბრელქ მით ადრე მოსუსტებულ რდუნ, გემანგარ რწმენა. მარა თიშნერეფ ხოლო რენა, მიდგას უმოს დრო ოსაჭირნა, ათეშენ თინეფს ქელუდირთათინ მოთვინება რე საჭირო. თეშა მიშურს გურიშემაკინალ სულიერ აზრეფიშ რაგადი, ართო მსახურება დო დროშ გიშართუალა თინეფიშ მარჩქილაფარო. ვეფიფქრათ ოკო, ნამდა ნამთინე თანაქრისტიან სულიერო „მანგარ“ ვარდა „მოსუსტებულ“ რე. თეშ მანგიორო, ოკო მარჩქილედან, ნამდა არძას მიღნა, მუჭოთ ძალიერინ თეშ სუსტ მხარეეფი. პავლე მოციქულ ხოლო იჩიებუდ მუშ სუსტ მხარეეფიშ გურშენ (2 კორ. 12:9, 10). თაშ ნამდა, არძას მოსაჭირნა ართიანიშ მოხვარა დო ელარნა.

14. მუ ოკო ვაკეთათ, ნამდა ართიანწკუმა მშვიდობა მიღუდან?

¹⁴ ხე შეუნწყით მშვიდობას. ირფელ ოკო გაკეთათ, თანაქრისტიანეფწკუმა მშვიდობიანო ქორდათ თი დროს ხოლო, მუჟამსით ფიქრენთ, ნამდა ვა გაიგეს ვარდა უსამართლოთ მიგექცის (წეკითხით რომაელები 12:17, 18).d ვოწყინებაფეთინ თინეფს ბოდიშიშ რაგადით შილებე გურს მუჰამუათ. მარა თენა შურ დო გურით ოკო გუვაკეთათ. მაგალთო, თიშ მანგიორო, ნამდა ვუწუათ „ბოდიშ გეწყინუნ“, შემლებნა, ქიმიფშინუათ ჩქი მუთ ვოწყინებაფეთ დო ვუწუათ: „ბოდიშ ჩქიმ სიტყვეფით გოწყინებაფენ“. მშვიდობაშ შენარჩუნება განსაკუთრებულო მნიშვნელოვან რე ჩილ დო ქომონჯ შქას. სწორ ვა რე, მუჟამსით თინეფ შხვეფიშ ოძირაფალო ართიანს ჯგირო ოქცუნა, მარა მუჟამს ხვალე სქიდუნან ართიანს ვა ურაგადნა, გლახა სიტყვეფით გურს ელაჭუანა ვარდა ფიზიკურ შეურაცხყოფას მიორინუანა.

15. მუჭო ვოძირათ, ნამდა დასურო ქუვაპატით შხვეფს?

¹⁵ ქაპატით. ჩქი დასურო ვაპატიენთ შხვეფს, მუჟამსით გურშა ჟღამს ველებდვანთ. შემლებნა თინეფს ხოლო ვაპატუათ, მით ვა რე გოხვალამირ, ნამდა მოწყინებაფეს. თეცალ საქციელით მეპჸუნთ ბიბლიას მოჩამილ რჩევას: „ჸოროფათ უთვინენდათ ართიანს დო გურგედვალირო იცვენდათ შურიშ ართობას მშვიდობაშ გუამაართიანებელ კავშირით“ (ეფეს. 4:2, 3). ნამდვილ პატიებაშო, საჭირო რე ფიქრეფიშ გაკონტროლება დო წყენაშ გოჭყოლიდაფა (1 კორ. 13:4, 5). გურშა ჟღამს ქელეპტენთ-და, შილებე ურთიერთობაქ გილმელან, ხვალე ჩქინ და დო ჯიმალეფწკუმა ვარინ, იეჰოვაწკუმა ხოლო (მათ. 6:14, 15). თეს გეძინელ, შემლებნა იბლოცათ მიდგაქ მოწყინებაფესინ თინეფშე დო თეთ ქუვოძირათ, ნამდა დასურო ქუვაპატით (ლუკ. 6:27, 28).

16. მუჭო ოკო ვუჯინათ იეჰოვაშ ორგანიზაციას მეღებულ პასუხიშმგებლობეფს?

¹⁶ პირველ ადგილს ქიგიორინეთ შხვეფი. იეჰოვაშ ორგანიზაციას მეღებულ პასუხიშმგებლობას თეშ ოკო ვუჯინათ, მუჭოთ შხვეფშა ჸოროფაშ გიმორჩქინაშ საშვალებას დო ხვალე ჩქინ დუდშე ვარინ, შხვეფიშ ჯგირობუაშე ოკო იფიფქრათ (1 კორ. 10:24). მაგალთო, ნამთინე ჩქინ ჯიმა კონგრესეფს მომწესრიგებელო მსახურენს დო შხვეფშე უმოს ადრე უხვადუ თექ მოულა. მარა თინეფ მუნეფშო დო ოჯახიშ წევრეფშო ვაცადნა არძაშ უჯგუშ ადგილეფიშ დაკინებას. მუნეფიშ დუდიშ წოხოლე თინეფ შხვეფიშ ინტერესეფს გიორნუანა დო თეშნერო ნამდვილ ჸოროფას გიმირჩქინანა. მუჭო შეილებნა თინეფიშ ჯგირ მაგალითის მიაჸუნათ?

17. მუჭო მეხვარებ ქრისტიანს ნამდვილ ჸოროფა, მუჟამსით სერიოზულო აფუ დაშებული?

¹⁷ გაცხადით დო მიოტეთ თიცალ ცოდეფიშ კეთება, ნამუსით შხვეფ ვარწყენა. ნამთინე ქრისტიან მიდგაქ სერიოზულო დაშუნ, ოცად თიშ ფულუას თიშენ, ნამდა ვაკო უხერხულ სიტუაციას ენოლას ვარდა შხვეფს გურ ქელაჭუას (იგავ. 28:13). მარა თეცალ საქციელშე ჸოროფა ვეძირე, მუშენდა თეთ ხვალე მუშ დუც ვარინ, შხვეფს ხოლო აზარალენს. თე ირფელიშ გურშენ იეჰოვაქ შილებე წმინდა შურ ვემეჩას კრებას დო თექ მშვიდობაქ ხოლო ვეჸუას (ეფეს. 4:30). ნამდვილ ჸოროფა მეხვარებ ქრისტიანს უხუცესეფწკუმა გაცხადას მუშ ცოდაშ გურშენ დო თინეფ ქელუდირთუნა თის (იაკ. 5:14, 15).

18. მუშენ რე მნიშვნელოვან ნამდვილ ჸოროფაშ გიმორჩქინა?

¹⁸ დასურო, ჸოროფა არძაშ უდიდაშ თვისება რე (1 კორ. 13:13). თიშ გიმორჩქინათ ვოძირანთ, ნამდა ვორეთ იესოშ მიმაჸუნალეფ. თეს გეძინელ, ვოძირანთ, ნამდა მეპჸუნთ იეჰოვაშ ჸოროფაშ დიდებულ მაგალითის (ეფეს. 5:1, 2). პავლექ ჭარ: „ჸოროფა ვამღუდასინ, მუთუნიშ მოღე ვეპჸუაფუქ“ (1 კორ. 13:2). მორთ ქუვოძირათ, ნამდა ხვალე ნინათ ვარინ, საქმეთ დო ჭეშმარიტებათ გიმიფრჩქინანთ ჸოროფას.