გაკვეთილ 7
მუ რე ღორონთიშ სამეფო?
1. მუ რე ღორონთიშ სამეფო?
მუშენ რე იესო არძაშ უჯგუშ მეფე? (მარკოზი 1:40—42).
ღორონთიშ სამეფო რე ზეციური ხელისუფლება, ნამუთ დოთირანს არძა შხვა მთავრობას დო დამყარენს ღორონთიშ ნებას ცა დო დედამიწას. თენა მართალო სახიოლო ამბე რე. მალას თე სამეფო კმაყოფილება დო ბედნიერებას მუღანს არძა ადამიანს დო ირკოჩის გაერთიანენს. წეკითხით დანიელიშ 2:44; მათეშ 6:9, 10; 24:14.
სამეფოს მეფე ოკო ჸუნდას. იეჰოვაქ მუში სქუა, იესო ქრისტე, დანიშნუ მუში სამეფოშ მეფეთ. წეკითხით გამოცხადებაშ 11:15.
ქუჯინით ვიდეოს „მუ რე ღორონთიშ სამეფო?“
2. მუშენი რე იესო არძაშ უჯგუში მეფე?
ღორონთიშ სქუა არძაშ უჯგუში მართველი რე. იესო კეთილი რე დო თის ირო სამართალიშ მხარე უკინებუ (იოანე 1:14). თეწკუმა ართო, თინა დიდ ძალაშ მენდული რე დო შეულებუ ადამიანეფს ცაშე დეხმარას დო უხელმძღვანელას. ღორონთიქ აღადგინ თიშ უკული, იესოქ ცაშა ემაღლუ დო მუმაშ მორძგვიშე დოზოჯუ (ებრაელები 10:12, 13). ბოლოს, ღორონთიქ ქიმეჩუ თის ძალაუფლება მართველობაშ დაჭყაფალო. წეკითხით დანიელიშ 7:13, 14.
3. მი იმართველენს იესოწკუმა ართო?
იესოწკუმა ართო ცას იმართველენა ღორონთიშე გიშაგორილი წმინდეფი (დანიელი 7:27). პირველი წმინდეფი იესოშ ერთგული მოციქულეფი რდეს. იეჰოვა ამდღარ დღაშა გიშმაგორუნს წმინდეფს — ერთგული ქომოლკოჩეფს დო ოსურეფს. ედგინაშ უკული იესოცალო, თინეფს სულიერი სხეული აღვენუნა. წეკითხით იოანეშ 14:1—3; 1 კორინთელეფიშ 15:42—44.
მუსხი კოჩი ურს ცაშა? იესოქ თინეფს „ჭიჭე ოჭყიშალი“ გიოდუ (ლუკა 12:32). თინეფიშ რაოდენობა საბოლოოდ 144000 იჸუაფუ. თინეფი იესოწკუმა ართო იმეფენა მთელი დედამიწას. წეკითხით გამოცხადებაშ 14:1.
4. მუქ მაჸუნუ იესოშ გამეფებას?
ღორონთიშ სამეფოქ მართველობა 1914 წანას დიჭყ.a პირველი რიგის, იესოქ სატანა დო მუში დემონეფი დედამიწაშა გეგთარღუ. სატანა გაჸალებური რე დო ირნერო ოცადუ, დედამიწა დო ადამიანეფი დაზარალას (გამოცხადება 12:7—10, 12). თავრეშე მოჸუნაფილი, მუთ დრო მუკურს, უბედურებეფი იძინანს დო იძინანს. ჩხუპეფი, შქირენა, ეპიდემიეფი დო დიხანწალუა თიშ ნიშანი რე, ნამდა ღორონთიშ სამეფო მალას დიჭყანს მართველობას დედამიწას. წეკითხით ლუკაშ 21:7, 10, 11, 31.
5. მუს აკეთენს ღორონთიშ სამეფო?
ამდღა ღორონთიშ სამეფო მთელი დედამიწას ქადაგებაშ მეშვეობით აერთიანენს მილიონობით ადამიანს არძა ეროვნებაშე. თე თვინიერი ხალხი იესოშ მართველობას დექვემდებარებუ. ღორონთიშ სამეფო დეცვენს თინეფს ბოროტი ქიანაშ განადგურებაშ დროს. მიდგას ღორონთიშე კურთხევეფიშ მიღებაშ სურვილი უღუ, იესოს ოკო დემორჩილას. წეკითხით გამოცხადებაშ 7:9, 14, 16, 17.
ანთასწანიანი მართველობაშ დროს ღორონთიშ სამეფო დედამიწას მუში პირველი სახეს დურთინუანს. მთელი დედამიწა სამოთხეთ გინირთუ. ათეშ უკული, იესო სამეფოს მუში მუმას გეგნოჩანს (1 კორინთელები 15:24—26). ხომ ვაგაღვენუნა სურვილი, ღორონთიშ სამეფოშ შესახებ შხვას ხოლო ქეჩუათი? წეკითხით ფსალმუნიშ 37:10, 11, 29.
a ქუგოკონა, დეტალურო ქიგეგათ, მუჭო მიუთითენს ბიბლიური წინასწარმეტყველებეფი 1914 წანაშადა, ქოძირით წიგნი „რას გვასწავლის ბიბლია სინამდვილეში?“, გვერდეფი 215—218.