გაკვეთილ 6
მუ იმენდი არსებენს ღურელეფშო?
1. მუ სახიოლო ამბე ელუ ღურელეფს?
იერუსალიმიშ გოხოლუას, ქალაქ ბეთანიაშა მეულირ იესოს მუში მეგობარი ლაზარექ ოთხი დღაშ ნაღურაქ დოხვადუ. იესოქ ონთხორუეშა ღურელიშ დალეფი, მართა დო მარიამწკუმა ართო მერთუ. მალას ხალხიქ ხოლო აკიშაყარ. წერმიდგინით მართა დო მარიამიშ ხიოლი, მუჟამს იესოქ ლაზარე გაცოცხლუ. წეკითხით იოანეშ 11:21—24, 38—44.
მართას თეიშახ ხოლო უჩქუდ, მუ იმენდი არსებენდუ ღურელეფშო დო ჯერდ, ნამდა იეჰოვა აღადგინენდუ ღურელეფს დედამიწას ოცხოვრებელო. წეკითხით 1 მეფეეფიშ 17:17—24.
2. მუ მდგომარეობას რენა ღურელეფი?
ღორონთიქ ადამს უწუ: „ტვერი რექ დო ტვერს დართუქუ“ (დაბადება 3:19).
ადამიანეფი დიხაშ ტვერშე რენა გორჩქინელი (დაბადება 2:7; 3:19). ჩქი ფიზიკური ქმნილებეფი ვორეთ დო ვამღუნა შური, ნამუთ ღურაშ უკული აგრძელენს ცხოვრებას. მუჟამს კოჩი ღურუ, თიშ ტვინი ხოლო ღურუ დო ფიქრეფი დინუ. ათეშგურშენი, ლაზარეს ვაუთქუალუ, ნამდა ღურაშ უკული მუთუნი იგინუ, მუშენდა თინა უგინაფ მდგომარეობას რდუ. წეკითხით ფსალმუნიშ 146:4; ეკლესიასტეშ 9:5, 6, 10.
ტანჯენსო ღორონთი ადამიანეფს ღურაშ უკული დაჩხირით ჯოჯოხეთის? ბიბლიას ჭარუ, ნამდა ღურელეფი უგინაფ მდგომარეობას რენა, ათეშენი ჯოჯოხეთიშ შესახებ გურაფა ღორონთის შეურაცყვენს. ადამიანიშ დაჩხირით წამება ღორონთის აზრო ხოლო ვამალე. წეკითხით იერემიაშ 7:31.
ქუჯინით ვიდეოს „არსებენსო იმენდ ღურელეფშო?“
3. შეულებუნანო ღურელეფს რაგადი?
ღურელეფს ვართ რაგადი შეულებუნა დო ვართ მუთუნი არჩქილენა (ფსალმუნი 115:17). მარა არსებენა ბოროტი ანგელოზეფი; თინეფს შეულებუნა ცოცხალეფს ღურელეფიშ ხმათ დურაგადუან (2 პეტრე 2:4). იეჰოვა კრძალენს ღურელეფიშ გიმოძახებას. წეკითხით კანონიშ 18:10, 11.
4. მი ედირთუ ღურელეფშე?
იეჰოვა მილიონობით ღურელს გეიოდგინანს დედამიწას ოცხოვრებელო. ღორონთი თინეფს ხოლო ეიოდგინანს, მიდგას ვაუჩქუდ თიში კანონეფი დო ვექციებუდუ სწორას. წეკითხით ლუკაშ 23:43; საქმეეფიშ 24:15.
თინეფს, მიდგას ღორონთი სიცოცხლეს დურთინუანს, მიაჩამუნა საშუალება, ქიგეგან ღორონთიშ შესახებ ჭეშმარიტება, ქირწმუნან იესო დო დემორჩილან თის (გამოცხადება 20:11—13). მით დემორჩილებუ ღორონთიშ კანონეფს, მარადიულო იცხოვრენს დედამიწას. წეკითხით იოანეშ 5:28, 29.
5. მუ რჩქუ ღურელეფიშ ედგინაშე?
ღორონთიქ დედამიწაშა მაშკუ მუში სქუა, თიქ სიცოცხლე დათმუ ჩქინგურშენი. ათეთ იჰოვაქ ღურელეფიშ ედგინაშ იმენდი მუჩეს. თავრეშე რჩქუ იეჰოვაშ დიდ ჸოროფა დო ჭყოლოფა. ღურელეფიშ ედგინაშ დროს არძაშ უმოსო მიშ ძირაფა გახიოლენა? წეკითხით იოანეშ 3:16; რომაელეფიშ 6:23.