ახალგაზრდეფიშ შეკითხვეფ
მიუღებელ რენო ჰომოსექსუალიზმი?
„მოზარდობაშ ასაკის, ჩქიმ სქესიშ ადამიანეფ მობწონდჷ. თე გრძნობაშ მორიება ვა რდჷ ადვილ. ფიფქრენდჷ, ნამდა თეცალ გრძნობეფ ასაკიშ ბრალ რდჷ დო მიბრდუდინ, თაშ ვეპჸუაფუდ, მარა თე გრძნობეფ ამდღარშახ მაწუხენს“ (დეივიდ, 23 წანერ).
დეივიდ ქრისტიან რე დო ოკო ღორონთიშ მოსაწონო იცხოვრას. ქეშიალებენო თის მუშ სქესიშ ადამიანეფ მოწონდას დო თე დროს ღორონთიშ მოსაწონო ხოლო იცხოვრას? მუ დამოკიდებულება უღჷ ღორონთის ჰომოსექსუალიზმშე?
მუს იჩიებ ბიბლია?
ადამიანეფს ჰომოსექსუალიზმშე შხვადოშხვანერ შეხედულება უღნა. თეწკუმა ძირითადო ჟირ ფაქტორ მოქმედენს, მუნერით რე, კულტურა დო დროშ მიკულა. მარა ქრისტიანეფ ვეჸუნა გავრცელებურ აზრის დო ვართ „გურაფაშ არძანერ ბორიას გილაჸუნს იშო-აშო“ (ეფესოელები 4:14). თეშ გინაწონს, ქრისტიანეფ ჰომოსექსუალიზმიშ საკითხის (ვარდა შხვა ნებისმიერ საკითხის), ბიბლიურ ნორმეფით ხემძღვანელენა.
ბიბლიაშე არგამათ იძირე, მუს იჩიებ ღორონთ ჰომოსექსუალიზმიშ გურშენ:
„ვედინჯირა კოჩწკუმა თეშ, მუჭოთ ოსურწკუმა ინჯირუნა“ (ლევიანები 18:22).
„ათეშენ ღორონთიქ თინეფ საონჯღორო ვნებეფიშ მონათ გინაშქვჷ . . . მუშენდა თინეფიშ ოსურკათაქ ბუნებრივ სქესობრივ ურთიერთობა არაბუნებრივით დოთირუეს“ (რომაელები 1:24, 26).
„დუდ ვედეღორათ: ვართ მეძავეფ, ვართ კერპთაყვანიშმცემელეფ, ვართ მრუშეფ, ვართ მამათმავალეფ, ვართ მახინჯეფ, ვართ ჰარამეფ, ვართ შუმილიეფ, ვართ მალანძღარეფ დო ვართ მიდმაღალარეფ ვედემკვიდრენა ღორონთიშ სამეფოს!“ (1 კორინთელები 6:9, 10).
ღორონთიშ ნორმეფ არძაშო ართ რე მუჭოთ ჰომოსექსუალეფშო, თეშ ჰეტეროსექსუალეფშო. არძაქ ოკო გიმირჩქინას დუდშეკება, ნამდა ღორონთიშ მოსაწონქ ქიჸუას (კოლოსელები 3:5).
ნიშნენსო თენა, ნამდა?..
ნიშნენსო თენა, ნამდა ბიბლია ოგურუანს, ბჯოგდან ჰომოსექსუალეფ?
ვარ. ბიბლია მითინიშ გოჯოგაფას ვა მოგურუანა. ბიბლია ელამჩანა: „ირნერო ქეცადით, არძაწკუმა მშვიდობიან ურთიერთობა გიღდან“ (ებრაელები 12:14). ათეშენ სწორ ვეჸუაფ, გიბჯოგუათ ჰომოსექსუალეფ დო ფიზიკურ, სიტყვიერ ვარდა შხვა მუთუნნერ შეურაცხყოფა მივორინუათ თინეფს.
ნიშნენსო თენა, ნამდა ქრისტიანეფქ ართსქესიანეფიშ ქორწინებაშ წინააღმდეგ ოკო გიშართან?
ბიბლიაშე ბგებულენთ, ნამდა ღორონთიშ დოდგინელ ნორმათ ქორწინება რე ქომოლკოჩიშ დო ოსურკოჩიშ კავშირ (მათე 19:4—6). ართსქესიანეფიშ ქორწინებაშ კანონ ხვალე პოლიტიკურ მიზნეფს ომსახურ დო მუთუნნერ საერთო ვა უღჷ ზნეობრივ ნორმეფწკუმა. ბიბლია ქრისტიანეფს ოგურუანს, ნამდა პოლიტიკურო ნეიტრალურეფ რდან (იოანე 18:36). ათეშენ თინეფ ვართ ხუჯის უკინენა დო ვართ ოწინააღმდეგნა სახელმწიფო კანონეფს ართსქესიანეფიშ ქორწინებაშ გურშენ.
მუშ რაგად შილებე?..
მუშ რაგად შილებე ჰომოსექსუალ ადამიანშე? ქიშილებენო, თიქ დითირუას ცხოვრებაშ წეს?
მუშო ოკო რაგად, ქო. ბიბლიაშე ბგებულენთ, ნამდა პირველ საუკუნეს ხოლო ნამთინე ქრისტიან ულირს ჰომოსექსუალ რდჷ, მარა თინეფქ დოთირეს მუნეფიშ ცხოვრება! თიშ უკულ, მუთ მოციქულ პავლექ ჭარჷ, ნამდა ჰომოსექსუალეფ ვედემკვიდრენა ღორონთიშ სამეფოს, თიქ თქუ: „თეცალ რდჷ თქვანდე ნამთინე“ (1 კორინთელები 6:11).
მარა ნიშნენსო თენა, ნამდა მიდგაქ მიოტუ თეცალ ცხოვრება, დღას ვა გურჩქინდუ სურვილ, დართას ჯვეშ ცხოვრებაშ წესის? ვარ. ბიბლიას ბკითხულენთ: „დითირით ახალ პიროვნებათ, ნამუთ საფუძვლიან რჩქინაშ საშვალებათ იახალებ“ (კოლოსელები 3:10). ახალ პიროვნებათ თირუა დღას ოკო ვემვოტუათ.
მუშ რაგად შილებე თიცალ პიროვნებაშე, მიდგას ოკო, ღორონთიშ ნორმეფით იცხოვრას, მარა, ჰომოსექსუალურ სურვილეფ ხოლო უღჷ?
ადამიანს შეულებ გეიაჸუნას ვარდა აკონტროლას მუშ სურვილეფ. მუჭო რე თენა შეიოლებერ? ბიბლიას ჭარჷ: „გილართით ღორონთიშ შურით დო მეტო ვეიაჸუნუთ ხორციშ სურვილეფს“ (გალატელები 5:16).
თე მუხლ ვეჩიებ, ნამდა ადამიანს ვაღვენუ ხორციელ სურვილეფ. მარა ბიბლიაშ რეგულარულ გურაფა დო ლოცვა ქომჩანა ძალას ქივეწინააღმდეგათ თე სურვილეფს.
თე სტატიაშ დაჭყაფუს მოშინაფილ დეივიდიქ პირადო დერწმუნ თე სიტყვეფიშ ჭეშმარიტებას. თის განსაკუთრებულო მეხვარ ქრისტიან მშობლეფწკუმა დორაგადაფაქ. თინა იჩიებ: „დუდის თეშ ბგინაფლენდჷ, ითამ ხუჯშე მანგარ მონკა ოღალ გილმონწყეს. თინეფშა უმოს ადრე ქუდომრაგადუაფუდკონ, უმოს ბედნერ იპჸუაფუდ მოზარდობაშ წანეფს“.
იეჰოვაშ ნორმეფით ცხოვრებას ბედნერობა მოუღ. დარწმუნებულეფ ვორეთ, იეჰოვაშ დოდგინელ ნორმეფ „სამართლიან რე, გურს ახარენს“ დო „დიდ რე ჯილდო თინეფიშ დაცვებაშენ“ (ფსალმუნი 19:8, 11).