ადამიანიშ გურს რენო ღორონთიშ სამეფო?

მუ პასუხის მარზენა ბიბლია:

სასუფეველ, შხვა სიტყვეფით ქოფთქუათინ, ღორონთიშ სამეფო, ქრისტიანეფიშ გურს ვა რე.a ბიბლია სასუფეველს მიშინუანს, მუჭოთ „ზეციურ სამეფოს“, მუთ თიშ ადგილმდებარეობაშა მეუთითენს (მათე 4:17). მორთ გუვარჩუათ, მუს იჩიებ ბიბლია თე მართველობაშ გურშენ.

• ღორონთიშ სამეფოს ჸუნს მართველეფ, ქვეშევრდომეფ, უღჷ კანონეფ დო თიშ მიზან რე, ზეცას დო დედამიწას ღორონთიშ ნება შეასრულას (მათე 6:10; გამოცხადება 5:10).

• ღორონთიშ მართველობა, შხვა სიტყვეფით ქოფთქუათინ, ღორონთიშ სამეფო იმართველენს დედამიწაშ „არძა ხალხშა, ერშა დო ნინაშა“ (დანიელი 7:13, 14). თე სამეფოს ღორონთ დამყარენს დო ვართ ხოლო თიშ ქვეშევრდომეფ (ფსალმუნი 2:4—6; ესაია 9:7).

• იესოქ მუშ ართგურ მოწაფეეფს უწუ, ნამდა თინეფ მუწკუმა ართო „ქუდოზოჯუნდეს ტახტეფს“ ზეციერ სამეფოს (ლუკა 22:28, 30).

• ზეციერ სამეფოს ჸუნს მოწინააღმდეგეეფ, ნამუთ მალას გენადგურებნა (ფსალმუნი 2:1, 2, 8, 9; 110:1, 2; 1 კორინთელები 15:25, 26).

ბიბლია ვაგურუანს, ნამდა ზეციერ სამეფო ადამიანიშ გურს რე დო თიშ გურშე მართველენს. მარა ბიბლიას რაგადებულ რე, ნამდა „ცნობას სამეფოშ გურშენ“, შხვა სიტყვეფით ქოფთქუათინ, „სახიოლო ამბეს სამეფოშ გურშენ“ შეულებ დო ოკო იმოქმედას ჩქინ გურშა (მათე 13:19; 24:14).

მუს ნიშნენს „ღორონთიშ სასუფეველ თქვან დინახალე რე“?

ბიბლიაშ შხვადოშხვა თარგმანეფ ლუკაშ 17:21-ის ინოჭარილ სიტყვეფს შხვადოშხვანერო გინოჩანს, მუდგაშ გურშენ ადამიანეფშო გაუგებარ რე, სო რე ღორონთიშ სამეფო. მაგალთო „საქორთუოშ საპატრიარქოშ გიშაშქუმალას“ თე ბიბლიურ მუხლ თეშნერო რე თარგმნილ: „ღორონთიშ სასუფეველ თქვან დინახალე რე“. თე მუხლიშ უჯგუშო გაგებელო, აუცილებერ რე კონტექსტიშ გათვალისწინება.

იესოქ თე სიტყვეფ უწუ ფარისეველეფს, რელიგიურ წინამძღოლეფს, ნამუთ ოწინააღმდეგდეს თის დო თიშ ჸვილუაშ გეგმას ორსხუანდეს (მათე 12:14; ლუკა 17:20). მუსხით გონივრულ რე იფიფქრათ, ნამდა ღორონთიშ სამეფო თე უბადო კათაშ გურს რდჷ? იესოქ თინეფს უწუ: „გურ … თვალთმაქცობათ დო უკანონობათ გაფნა ეფშა“ (მათე 23:27, 28).

„ბიბლიაშ ახალ ქვეყნიერებაშ თარგმან“ ლუკაშ 17:21-ის ინოჭარილ იესოშ სიტყვეფს თეშნერო გინმოჩანს: „ღორონთიშ სამეფო თქვან შქას რე“ (კურსივ ჩქინ რე) ზეციერ სამეფო „თინეფიშ დინახალე“, შხვა სიტყვეფით ქოფთქუათინ, „თინეფ შქას“ თი გაგებათ რდჷ, ნამდა იესო, ღორონთიშ დანიშნულ მეფე, თინეფიშ წოხოლე გერდჷ (ლუკა 1:32, 33).