მუს ნიშნენს, რდე ქრისტიან? – მუს იჩიებ ბიბლია?

ამდღა მსოფლიოს ბრელ ადამიან ამაყას იჩიებ, ნამდა ქრისტიან რე, მარა შხვეფს მანგარ გლახათ ოქცუ. თინეფშე ნამთინე ეგოისტ, უპატიოსნო დო უბადო რე. შხვეფ შილებე მეუღლეშ ართგურეფ ვა რდანჷ. თეცალ კათაშ საქციელიშ მიმაჯინუ, ნამთინე შილებე ფიქრენდას: „სინამდვილეს მუს ნიშნენს, რდე ქრისტიან?“

სინამდვილეს მუს ნიშნენს, რდე ქრისტიან?

ქრისტიან ვორექია, ორაგადეთ ეფ რე, მარა ხვალე თენა ვა რე დასაბაღ. ბიბლიაშ თანახმას ქრისტიან რე თინა, მით იესო ქრისტეშ მოწაფე რე (საქმეეფ 11:26). იესოქ თქუ: „ჩქიმ სიტყვას ირიათო ქიმეჸუნთ-და, მართალო ჩქიმ მოწაფეეფ რეთჷ“ (იოანე 8:31). მუშო ოკო რაგად, იესოშ სიტყვეფ სრულყოფილო მითინს ვა დაცვინე. მარა ქრისტიან ოცად, მიაჸუნას იესოშ გურაფეფს დო ირდღას მუშ საქმეეფით ქაძირუას თენა. გუვარჩუათ თეშ ნამთინე მაგალით.

ქრისტიანეფ დუდგინოდვალირ ჸოროფას გიმირჩქინანა

მუ თქუ იესოქ: „ახალ კანონს გარზენთ: გიჸორდან ართიან! მუჭოთ მა გიჸოროფეთ, თქვა ხოლო თეშ გიჸორდან ართიან! ართიან შქას ჸოროფა ქუგაღვენუნან-და, თეთ ქიგეგენა, ნამდა ჩქიმ მოწაფეეფ რეთჷ“ (იოანე 13:34, 35).

მუ აკეთ იესოქ: თინა დუდგინოდვალირ ჸოროფას გიმირჩქინანდჷ არძაწკუმა, თინეფიშ სოციალურ მდგომარეობაშ დო ულირ ცხოვრებაშ უმკუჯინუო. თინა ოსქილიდუანდჷ დალახებურეფს, ოჭკუმალს არზენდჷ შქირენულეფს დო მუშ სიცოცხლე ხოლო დათმჷ შხვეფშო (მათე 14:14–21; 20:28).

მუჭო იქციებუნა ქრისტიანეფ: ქრისტიანეფ დუდგინოდვალირ ჸოროფას ოძირანა თით, ნამდა გურხვეეფ რენა, ვეგმირჩქინანა გიშაკერძაფას დო მზათ რენა პატიებაშო. თინეფ ოხვარუნა თი კათას, მიდგას თენა ოსაჭირ, დო მზათ რენა, შხვეფიშ გურშენ მსხვერპლშა იდან (1 იოანე 3:16).

ქრისტიანეფ პატიოსანეფ რენა

მუ თქუ იესოქ: „მა ვორექ... სიმართლე“ (იოანე 14:6).

მუ აკეთ იესოქ: იესო პატიოსან რდჷ ქოთ სიტყვათ დო ქოთ საქმეთ. თინა დღას ვაცადუდ, შხვეფ მუშ ჭკუაშა გილეჸუნუკო დო ვართ შეცდომაშა მიშაჸუნდჷ მითინ. თის არძა, თინეფ შქას მუშ მოწინააღმდეგეეფ ხოლო, პატიოსან კოჩიშ სახელით იჩინენდჷ (მათე 22:16; 26:63–67).

მუჭო იქციებუნა ქრისტიანეფ: თინეფ ვეჩიებუნა ტყურას, გაფულენა ოგაფურეფს, ვა ხირულენა დო პატიოსნურო ირინუანა სამუშა დროს (რომაელეფ 13:5–7; ეფესოელეფ 4:28). მითინს მუთუნს ვეგწოტყურუნა, გამოცდეფიშ ჩაბარებაშ დროს უპატიოსნოთ ვექციებუნა დო ვართ ტყურა ინფორმაციას ინაჭარანა რეზიუმეეფს ვარდა შხვა თეცალ დოკუმენტეფს (ებრაელეფ 13:18).

ქრისტიანეფ სიკეთეს ორთუნა

მუ თქუ იესოქ: „ქუმორთით ჩქიმდა, თქვა, მით გინოშულადირეფ რეთჷ დო მიდგას მონკა ოღალ მეიღუნა, დო მა ჭყანაშა ქუმოიჸუნანთ. ქიგიდგით ჩქიმ უღუ დო ქიდიგურეთ ჩქიმდე, მუშენდა ლიბ ხასიათიშ დო თანდაბალ ვორექ, დო ჭყანა ქუმგაკათუნა. ჩქიმ უღუ ეფ ოღალარ რე, დო ჩქიმ ოღალ – ქექე!“ (მათე 11:28–30).

მუ აკეთ იესოქ: იესო მანგარ კეთილ რდჷ დო თიშა ხალხ თავისფალო მიშჷ. თინა ხიოლით ღებულენდჷ ბაღანეფს, გურშა ელუკინანდჷ გურაკოჭირებულეფს დო არძას პატიცემათ ოქცუდ (მარკოზ 10:13–15; ლუკა 9:11).

მუჭო იქციებუნა ქრისტიანეფ: ქრისტიანეფ შხვეფს პატიცემათ დო გემუანო ურაგადუნა დო ვართ ხოლო ჸინჩას ვარდა დამამცირებელო (ეფესოელეფ 4:29, 31, 32). თინეფ შხვეფიშ მიმართ ინტერესის გიმირჩქინანა დო ირიათო მზათ რენა მახვარებელო (გალატელეფ 6:10).

ქრისტიანეფ მეუღლეშ ართგურეფ რენა

მუ თქუ იესოქ: „კოჩიქ ვა ჩუთხინუას ართიანს თინეფ, მით ღორონთიქ ართ ხორცო გინაშქვჷ“ (მარკოზ 10:9).

მუ აკეთ იესოქ: მართალ რე, იესო დღას ვა ჸოფე დაოჯახებულ, მარა დაოჯახებულეფს ელუჩანდჷ, ართიანიშ ართგურეფ ჸოფედესკო (მათე 19:9). თინა აფრთხილენდჷ წყვილეფს, დუდ ეუჩილითუესკო თიცალ საქციელეფს, მუდგაქ შილებედ ეკარღვუკო თინეფიშ ოჯახ (მათე 5:28).

მუჭო იქციებუნა ქრისტიანეფ: თინეფ დუდის ურიდანა თიცალ საქციელს, ნამუთ მეუღლეშ უპატიცემლობა იჸუაფუდ (ებრაელეფ 13:4). დაქორწინებულეფ ართიანს ჸოროფათ დო პატიცემათ ოქცუნა (ეფესოელეფ 5:28, 33).