იჸუაფუნო მალას ხოლო ართ მსოფლიო ომ? — მუს იჩიებ ბიბლია?

ულირ 30 წანაშ დინახალე, ბრელ პიროვნებას მიორჩქუდ, ნამდა შხვადოშხვა ქიანეფ შქას ურთიერთობაქ გეუჯგუშ. მარა ამარდე მოხვალამირ მოვლენეფიშ უკულ თინეფ უკვე შხვანერო ფიქრენა.

•  „ბრელ პიროვნებას ოშქურ თიშა, ნამდა ღაზაშ სექტორს ხვადუნ თი ომ, გოხოლუას რენ თი ქიანეფს ხოლო ეცილებ, მუშენდა ისრაელ დო ჰეზბოლა ლიბანიშ საზღვარწკუმა ჩხუპენა“ („როიტერს“ 6 იანარ, 2024 წანა).

•  „თი დაჯგუფებეფ, ნამდგას ირან აკონტროლენს, შხვადოშხვა მხარეეფს გიანთხუნა დუდის. უცბას, ირანქ კინ ქიდიჭყჷ ბირთვულ იარაღიშ წარმოება. თეს გეძინელ, რუსეთ დო ჩინეთ ასე ირანიშ მხარეს რენა. თე ირფელ, საფრთხეშ თუდო გიორინუანს დასავლეთიშ ქიანეფს“ („ნიუ-იორკ თაიმზ“ 7 იანარ, 2024 წანა).

•  „რუსეთ აგრძელენს ომს უკრაინას, მუდგას დიდ ზიან მოჸუნს“ (UN News 11 იანარ, 2024 წანა).

•  „ჩინეთის ეკონომიკურ სიტუაცია იუჯგუშებ, თეს გეძინელ, ძალიერ ჯარ ხოლო ჸუნს. ტაივანს ნაციონალიზმ იძინანს დო თეწკუმა ართო, შეერთებულ შტატეფ დო ჩინეთ შქას, დაძაბულობა ხოლო იძინანს. თე ირფელს ადვილო შილებე კონფლიქტიქ მაჸუნას“ (The Japan Times 9 იანარ, 2024 წანა).

მუს იჩიებ ბიბლია მსოფლიოს თეცალ არასტაბილურ სიტუაციაშ გურშენ? მაჸუნუნო თეს ხოლო ართ მსოფლიო ომ?

ბიბლიას ნაწინასწარმეტყველებ რდჷ ამდღარ მოვლენეფ

ბიბლიას ვა რდჷ ნაწინასწარმეტყველებ თი კონკრეტულ ომეფიშ გურშენ, ნამდგას ამდღა ჩქინ თოლით ვორწყეთ. მარა თექ ნაწინასწარმეტყველებ რდჷ, ნამდა ჩქინ დროს მსოფლიო მაშტაბით იჸუაფუდ ომეფ დო თენა „მშვიდობას მიდეღანდჷ დედამიწაშე“ (გამოცხადება 6:4).

დანიელიშ წიგნის ნაწინასწარმეტყველებ რდჷ, ნამდა „ბოლო დროს“, მსოფლიოშ ძალიერ სახელმწიფოეფ ძალაუფლება გეჭოფესკონ თიშენ „ართიანიშ წინააღმდეგ გიშელენდეს“. თეშ შედეგო, თინეფ მუნეფიშ სამხედრო ძალას ქაძირანდეს ართიანს დო თეშო დიდ ფარას დახარჯენდეს (დანიელი 11:40, 42, 43).

ომ, ნამუთ აუცილებერო იჸუაფ

ბიბლიაშე ბგებულენთ, ნამდა ონდო მსოფლიო მდგომარეობა გეუჯგუშებუდას, თეიშახ მანგარო გეუფრაშებ. იესოქ იწინასწარმეტყველ, ნამდა „თიმწკუმა თიცალ დიდ გაჭირება იჸუაფ, მუნერით ვა ჸოფე ქვეყნიერებაშ დაჭყაფშე ამდღარშახ“ (მათე 24:21). „დიდ გაჭირებას“ მაჸუნუ ომ, ნამდგას „არმაგედონ“ ჯოხო დო თენა იჸუაფ ომ, ნამუთ მოხვადუ „ირფელიშშემალებე ღორონთიშ დიდ დღას“ (გამოცხადება 16:14, 16).

მარა „არმაგედონ“ განადგურებაშ მანგიორო, დერსხენს კაცობრიობას. თე ომს, ღორონთ ბოლოს მუღენს ადამიანურ მართველობას, მუდგას ბრელ გამანადგურებელ ომეფქ მაჸუნ შედეგო. თიშ ოძირაფალო, მუჭო მაჸუნუ „არმაგედონს“ მშვიდობა, წეკითხით თე სტატიეფ:

•  „მუ რე არმაგედონ?“

•  „არმაგედონს ჯგირობუა მაჸუნუ“