მუს იჩიებ ბიბლია წყარიშ მსოფლიო კრიზისშე?
არსებობაშო არძას ოსაჭირ სუფთა წყარ. მარა წყარშე გლობალურ მოთხოვნა იძინანს, ათეშენ „გაეროშ“ გენერალურ მდივანქ, ანტონიო გუტერეშიქ, თეცალ განცხადება აკეთ: „წყარიშ დიდ კრიზისიშ წოხოლე გივორეთ“. მთელ მსოფლიოს უკვე მილიარდობით კოჩის ვა უღჷ ოშუმალო ირგუნ ფერ წყარ.
Strdel/AFP via Getty Images
დღას ქიჸინო არძაშო დასაბაღ წყარ? დოვარ ირიათო წყარიშ კრიზის მაღვენუნა? მუს იჩიებ ბიბლია?
მუ დაპირებას ირზენს ბიბლია თეწკუმა დაკავშირებით
ბიბლია იჩიებ, ნამდა დოდირთუ თიცალ დრო, მუჟამსით წყარიშ კრიზისის სადღამუშოთ მეღებუ ბოლო. თე დუნაპირებუშ თანახმათ, ხვეიანო იჸუაფ ოშუმალო ირგუნ ფერ სუფთა წყარ.
„წყარ გეშასოფუნს უდაბნოს დო მალწყარეფ — უწყარე ადგილს. სინჩხეშე გინოჭვილ გოხიკინაფილ ადგილეფ ტობათ გინირთუ, ხუმაფილ დიხა — წყურგილეთ“ (ესაია 35:6, 7).
მუშენ ოკო ბჯერდან თე დუნაპირებუშ? ქობძირათ, მუს იჩიებ ბიბლია ჩქინ პლანეტაშ ართ-ართ თავისებურებაშე.
მუს იჩიებ ბიბლია დედამიწაშე დო წყარიშ წრებრუნვაშე
„[ღორონთის] ტყურათ ვა გურჩქინუ დედამიწა, დახორინალო გარჩქინ“ (ესაია 45:18).
რახანს ღორონთიქ დედამიწა ოცხოვრებელო გაჭყჷ, თიქ თიცალ ბუნებრივ ციკლეფ გიონწყუ, ნამდა სუფთა წყარქ ვემმოკორდან.
„[ღორონთის] ჟი ეშმუღ წყარიშ წვეთეფ დო ნირსი ჭვემათ გინირთუ. უკულ მუნაფაშე მოურს ჭვემა დო კაცობრიობას გიოწენს“ (იობი 36:27, 28).
მარტივო ქოფთქუათინ, თე ბიბლიურ მუხლის ეჭარილ რე მუნერ საიმედოთ აფჷ ღორონთის გენყილ წყარიშ წრებრუნვაშ ციკლ. წყარ დიო დიხაშე დო ზღვეფშე იორთქლებ, უკულ კონდენსაციას ორთჷ დო აორთქლებურ წყარ ჭვემაშ ჭვეთებო ართუ დიხას. თეშ ჭყოლოფათ, ადამიანეფს დო ცხოველეფს სუფთა წყარ ვა მორკუნა (ეკლესიასტე 1:7; ამოსი 5:8).
„მუშ დროს მერჩანთ ჭვემას, დიხა მერჩანა მოსავალს დო ჯა — მიკნაღელს“ (ლევიანები 26:4).
ღორონთიქ პირობა მეჩჷ ჯვეშ ისრაელეფს, ნამუთ ფერმერეფ რდეს, ნამდა წყარს ვემიარკენდჷ დო შედეგო ხვეიან მოსავალ აღვენუდეს. თის არჩქილე, ნამდა ხვეიან ოჭკუმალიშ მეღება თიშა რე დამოკიდებულ, მუშ დროს ქიჸუაფ დო ვარ ჭვემა.
მალას ღორონთ მთელ დედამიწას თის გაკეთენს, მუდგა ჯვეშ ისრაელს აკეთ (ესაია 30:23). მარა ისხანს მსოფლიოშ ბრელ ქიანას წყარიშ კრიზის ხოლო უმოსო იძინანს დო თე პრობლემაშ მიზეზ ხვალე ჭვემაშ სინაკლებე ვა რე. ხოლო მუს იჩიებ ბიბლია წყარიშ პრობლემაშ მოგვარებაშ გურშენ?
მუჭო მიგვარებ წყარიშ კრიზის
ბიბლიაშე იძირე, ნამდა ღორონთ მუშ სამეფოშ საშვალებათ მაგვარენს ჩქინ პლანეტას რენ თი პრობლემეფს დო თენეფ შქას წყარიშ კრიზისის ხოლო (მათე 6:9, 10). ღორონთიშ სამეფო რე ზეციურ მთავრობა, ნამუთ იმმართველენს მთელ დედამიწას (დანიელი 2:44; გამოცხადება 11:15). თეს გეძინელ, ღორონთიშ სამეფო გაკეთენს თის, მუდგაქ ადამიანურ მთავრობეფს ვეშიალებეს, საბოლათ თე სამეფო მაგვარენს წყარიშ პრობლემეფს.
პრობლემა: კლიმატიშ თირუაშ გურშენ წყარიშ წრებრუნვა ხოლო ითირუ, მუდგას მოჸუნს გოლოფა, წყარალა, მანგარ ჭვემეფქ დო ზღვაშ დონეშ ეკინა ხოლო.
გამოსავალ: ღორონთიშ სამეფო მალას მთელ დედამიწას გეგშანყუნს ეკოსისტემას, მუშენდა პლანეტას მდგომარეობაქ ჭიე-ჭიეთ გეუჯგუშას. ღორონთ მოპირუნა: „ქიდეკვირ, ვოჭყანქ ირფელს ახალს“ (გამოცხადება 21:5). თეცალო, ღორონთ ოშუმალო ირგუნ ფერ წყარით გეიოფშანს გიშასქირაფილ ადგილეფს დო ამდღა ოცხოვრებელო ვერგუნ ფერ ადგილეფს ხოლო ხალხის დახორინედას იჸი (ესაია 41:17—20). ღორონთიშ სამეფო, ნამდგაშ მეფე იესო ქრისტე რე, გაკონტროლენს ბუნებაშ ძალეფს.
მუჟამსით იესო დედამიწას რდჷ თიქ სასწაულებრივო დამშვიდ ქარბორია დო თეშნერო ოძირუ თი დიდ ძალა, ნამუთ ღორონთიქ მეჩჷ (მარკოზი 4:39, 41). იესოშ მმართველობაშ დროს ვა მოხვადუ ბუნებრივ კატასტროფეფ დო ხალხ მშვიდობიან დო უსაფრთხო გარემოს იცხოვრენს.
პრობლემა: ნამთინე ადამიან დო კომპანია, მით შუროთ ვა ფიქრენს მუშ მოქმედებეფიშ შედეგეფშა, აწინდარენა მალწყარეფს, ტობეფს დო დიხაშ თუდო რენ ფერ წყარიშ მარაგეფს, მუთ წყარიშ კრიზისიშ ართ-ართ მიზეზ რე.
გამოსავალ: ღორონთ მალას გასუფთენს დედამიწას, დაწინდარებულ მალწყარეფს, ტობეფს, ზღვეფს დო ნიადაგის. მთელ დედამიწა სამოთხეთ გინირთუ. ბიბლია თე ირფელს მხატრულო ეჭარუნს: „გოფალუნს უდაბნო დო ხიროკილ დიხა, ხიოლ აღვენუ მითინ ვახორანსინ ფერ ადგილს დო ყვინთელ პირცალო გოპეულანს“ (ესაია 35:1).
მუ ელუნა თინეფს, მიდგა ვა ზრუნენს დო პატის ვა ცენსჷ გარემოს? ღორონთ მოპირუნა, ნამდა მოსპუნს დედამიწაშ მუმასპალეფს (გამოცხადება 11:18; იგავები 2:21, 22).
პრობლემა: წყარიშ უგამაგეთ გიმორნაფაშ შედეგო, თიშ მარაგ თიცალ მალას ითებუ, ნამდა დედამიწას ვაჭიშე მარაგიშ ეფშაფა სუფთა წყარით.
გამოსავალ: ღორონთიშ სამეფოშ ჭყოლოფათ დედამიწას ეგოისტ ადამიანეფიშ ვარინ, ღორონთიშ ნება შისრულებ (მათე 6:9, 10). ღორონთიშ სამეფო მუშ ხალხის არძაშ უჯგუშ განათლებას მეჩანს. ესაიაშ 11:9a ჭარჷ: „მუშენდა დედამიწა იეჰოვაშ რჩქინათ გეიფშაფუ“. თეშნერ განათლება დო თეს გეძინელ, ღორონთიშ დო თიშ გუნაჭყეფუშ მიმართ დიდ ჸოროფა გინაჭყვიდირაფუანს ადამიანეფს, ჯგირო მიკულუან ჩქინ პლანეტას დო სწორას გეგმირინუან ბუნებრივ რესურსეფ.
თიშ გაგებელო, მუს გაკეთენს ღორონთიშ სამეფო შეილებუნა ქოძირათ სტატია „მუს გაკეთენს ღორონთიშ სამეფო?“ [ქორთ.]
წეკითხით ესაიაშ 35-ა დუდ დო წერმიდგინით, მუჭო გინირთუ დედამიწა სამოთხეთ.
ქუჯინით ვიდეოს, „მუშენ გაჭყჷ ღორონთიქ დედამიწა?“ დო ქიგეგით, მუშ კეთება ულამ ღორონთის დედამიწა დო მთელ კაცობრიობაშო.
a ღორონთიშ სახელ რე იეჰოვა (ფსალმ. 83:18). ქოძირით სტატია „მი რე იეჰოვა?“.