ᲐᲮᲐᲚᲒᲐᲖᲠᲓᲔᲤᲘᲨ ᲙᲘᲗᲮᲕᲔᲤ
მუჭო ევუჩილითუა დუდ ჟირნერ ცხოვრებას?
მინშა ღორონთიშ ნამთინე მსახურ ფიქრენს, ქოღირ დო ვარ მონდომაშა ბიბლიურ ნორმეფით ცხოვრება (ფსალმუნი 73:2, 3). თინეფქ შილებე თიცალ მუდგარენეფიშ კეთება ქიდიჭყან, მუთ ოწინააღმდეგ ღორონთიშ კანონეფს დო უკულ თანამორწმუნეეფ შეცდომაშა გემშეჸუნან თით, ნამდა დუფულან მუნეფიშ არასწორ საქციელ.
თე სტატია რე თინეფშო, მით შილებე თეცალ ცხოვრებათ ცხოვრენს, მარა ოკო, კინ სწორას მიქცუას.
თე სტატიას გუვარჩიენთ:
მუს ნიშნენს ჟირნერ ცხოვრება?
ჟირნერ ცხოვრება ნიშნენს, მუჟამსით სქან მახანეფწკუმა რექ, მით ვამსახურ იეჰოვას დო ორთუქ თიცალ მუდგარენეფს, მუთ გიჩქჷ, ნამდა არასწორ რე; მარა, მუჟამსით კრებას თანამორწმუნეეფწკუმა რექ, თეშ იქციებუქ, ითამ გოკო, იეჰოვას ემსახურე. თენა თიცალ რე, ითამ ჟირ ცხოვრება გიღდას დო ჟირხოლოს მუდგარენს ფულუნდე.
„მუჟამსით ჟირნერ ცხოვრებათ ცხოვრენქ, ჟირხოლო მხარეს მუდგარენს უფულუნქ დო მითინს ვა უჩქჷ, სინამდვილეს მუნერ რექ. მართალ ქოფთქუათინ, ჟირნერ ცხოვრებათ, ჟირხოლო მხარეს აღორენქ“ (ერინ, 19 წანერ).
ქოიჩქუდესო? ჟირნერ ცხოვრებაშა მიშურს მითინ ვა გორწყენ თეშ თიცალ მუდგარენიშ კეთება, მუთ გიჩქჷ, ნამდა იეჰოვას ვა მოწონს.
„14 წანერ ვორდინ, ინტერნეტის უზნეო სურათეფიშ გოჯინა ქიდიბჭყჷ. შხვეფწკუმა ვორდინ, დუდ თეშ მომღუდ, ითამ პორნოგრაფია მანგარო ბჯოგუდკო, მარა მიჩქუდ, ნამდა სინამდვილეს თენა თაშ ვა რდჷ“ (ნოლან, 17 წანერ).
ბიბლიურ პრინციპ: „მითინს ვეშულებ რდას ჟირ ბატონიშ მონა, მუშენდა, ვარდა ართის გიჯოგუანს დო მაჟიას ქიჸოროფუანს, ვარდა ართის გვალო გეგნაჸუნუ დო მაჟიას მუთუნო ვემირჩქინანს“ (მათე 6:24).
გლახა პიროვნება ვორექო ჟირნერ ცხოვრებათ ქოფცხოვრენქ-და?
ვარ. მართალ რე, ნამთინეს ვაკო ბიბლიურ ნორმეფით ცხოვრება, მარა სქან შემთხვევას ხოლო თაშ რენო? დოვარ მუდგარენ შხვა მიზეზეფიშ გურშენ გიღჷ ჟირნერ ცხოვრება? მაგალთო:
დუდის უხერხულო გინაფლენქ, მუჟამსით სქან მახანეფშე განსხვავებულო გიშარჩქუქ.
ფიქრენქ, ნამდა კლასელეფწკუმა უმოს საერთო გიღჷ, ვინემ თანამორწმუნეეფწკუმა.
ფიქრენქ, რთულ გაჸი ღორონთიშ მცნებეფიშ დაცვება.
„ჩქიმ აზრით, ჟირნერ ცხოვრებათ ცხოვრენან თი ახალგაზრდეფ, დუდის კომფორტულო გინაფლენა თინეფწკუმა, მით ვაფასენა ჭეშმარიტებას. მუშენდა ოკონა, მუდგაინიშ ნაწილ ქორდან დო ვა უღჷ მნიშვნელობა, თენა მუ იჸუაფ“ (დეივიდ, 20 წანერ).
მუშო ოკო რაგად, ნამთინ თე მიზეზ ვამართლენს ჟირნერ ცხოვრებას. მარა თავრეშე იძირე, მუჭო შილებე მინშა ჯგირ ხალხიქ ხოლო მეჩირთას. სი ხოლო თეცალ სიტუაციას ქორექ-და, მუშ კეთება შეილებ?
მუჭო ევუჩილითუა დუდ ჟირნერ ცხოვრებას?
1. დეფიქრ თიშე, მუნერ ცხოვრებაშ წესით ცხოვრენქ. ქოკითხ სქან დუდის: „მართალო მოკონო თეცალ პიროვნება ვორდე? თენა ვამკონ-და, სოიშახ შილებე ჩქიმ ცხოვრებაშ წესიქ მემჸონას?“.
ბიბლიურ პრინციპ: „წიმი იჯინენ ფერ ორწყე საფრთხეს ... მარა გამოუცდელ პირდაპირ მეურს დო სასჯელს გიტახანს დუდშა“ (იგავები 27:12).
2. პატიოსნურო მიქცი. ქიდირაგადე სქან ცხოვრებაშ წესიშ გურშენ მშობლეფწკუმა ვარდა სულიერო მოწიფულ მეგობარწკუმა, მით აფასენს იეჰოვაშ კანონეფს. დიდ ალბათობათ, თინეფს ახიოლენა, ნამდა მოხვარა ქოთხი დო გურშა ელუკინანა თიშ გაგება, ნამდა გოკო სწორას მიქცუე.
„შხვეფიშ წოხოლე შეცდომეფიშ აღიარება ართ-ართ არძაშ უმოს ძნელ მუდგარენ რდჷ, მუთ დღას მიკეთებ, მარა თაშ მოქციებაშ უკულ, შურქ მუმადგჷ“ (ნოლან).
ბიბლიურ პრინციპ: „მით მუშ ცოდეფს ფულუნს, ხე გომორძგვილ ვეჸუაფ, მარა მით აღიარენს დო მეტო ვეშეცოდენს, ეპატიებ“ (იგავები 28:13).
3. მზათ რდა შედეგეფშო. რშუდას, მშობლეფს ვარდა თანაქრისტიანეფს მუდგარენს ქუფულუნქ-და, თინეფს სქან ნდობა გუჭირდუნა. შედეგო, შილებე მშობლეფქ მუდგარენიშ კეთება გივარუან ვარდა კრებაშ უხუცესეფქ ჭიჭე ხანით ნამთინე მუდგარენიშ კეთებაშ უფლება ვა მერჩან. მზათ რდა შედეგეფშო დო გინოჭყვიდილ გაფდას, ანწიანშო „ირფელს პატიოსნურო“ მიქცუე (ებრაელები 13:18).
ბიბლიურ პრინციპ: „ქიმირჩქილე რჩევა დო ქიგეგონე დარიგება, ნამდა დებრძენე“ (იგავები 19:20).
4. დღას ვედგეეჭვას, ნამდა ღორონთის უჸორქ. იეჰოვას ვუჸორთ, ათეშენ თის უჩქჷ ირფელ, მუდგას ორთუქ. თაშ ნამდა, ჟირნერ ცხოვრებათ ქოცხოვრენქ-და, თის თენა ხოლო არჩქვენუ დო გურს მანგარო დოჭუნს. რახანს „თინა ზრუნენს“ სქანდე, ოკო, ნამდა სწორ შარას დართე (1 პეტრე 5:7).
ბიბლიურ პრინციპ: „იეჰოვაშ თოლეფ ოკვირ მთელ დედამიწას, ნამდა მუშ ძალათ ქიმეხვარას თინეფს, მით მთელ გურით ომსახურ“ (2 მატიანე 16:9).