მუჭო შეულებ ბიბლიას ჩქიმ მოხვარა? – ნაწილ 3: მუთ შილებე მეტ სარგებელ მიღ ბიბლიაშ კითხირშე

ბიბლიას გეგნოფაჩუნქინ თექ ქიანაშ ნაჭარას ძირუნქ, მარა თექ გურ ვეიოთას თიშ კითხირშა! თეშ გინაწონს, ბიბლიას უჯინ, მუჭოთ გოფაჩილ სუფრას, ნამუთ ეფშა რე შხვადოშხვანერ ოჭკუმალით. მართალ რე, ვეშეილებ ირფელ ჭკუმე, მუდგას ორწყექ, მარა შეილებ თიზმა ოჭკუმალ ეჭოფე, მუსხით დასაბაღ იჸუაფ სქანო.

ბიბლიაშე სრულ სარგებელიშ მიოღებელო, ოკო იფიქრე თიშე, მუდგას კითხულენქ. თე სტატია მიგეხვარებ თეშ კეთებას.

თე სტატიას გუვარჩიენთ:

• მუშენ ოკო იფიქრე თიშე, მუდგას ბიბლიას კითხულენქ?

• მუჭო შეილებ სრულ სარგებელ მიღე ბიბლიაშ კითხირშე?

• მუს იჩიებნა სქან მახანეფ

მუშენ ოკო იფიქრე თიშე, მუდგას ბიბლიას კითხულენქ?

მუთ უმოს მონდომას გიმირჩქინანქ ბიბლიაშ კითხირიშ დროს, თით უმოს სარგებელს მიღენქ. დეფიქრ თე მაგალითშე: შეილებ ჩხე წყარს ჭიჭე ხანით ქინოდვე ჩაიშ ფერ დო თის ჭიჭეთ ქიმიაჩამუ გემო, მარა უმოს მეტ ხანს გაჩერენქ-და, ბრელით უჯგუშ გემო აში.

თაშ რე ბიბლიაშ კითხირიშ დროს ხოლო. ჩქარას გინოკითხირიშ მანგიორო, გეგმორთ დრო ნაკითხირშე ფიქრშო. თაშ ორთუდ 119 ფსალმუნიშ მაჭარალ. ღორონთიშ კანონეფშე თიქ თეცალ მუდგარენ თქუ: „თიშე ფიფქრენქ მთელ დღას“ (ფსალმუნი 119:97).

მუშო ოკო რაგად, თენა თის ვა ნიშნენს, ნამდა პირდაპირ გაგებათ მთელ დღას ოკო იკითხე დო იფიქრე. თაქ თინა იგულისხმებ, ნამდა ფსალმუნმაბირე დროს გიმორთუნდჷ ღორონთიშ სიტყვაშე ფიქრშო. თენა ოხვარუდ სწორ გადაწყვეტილებეფიშ მეღებას (ფსალმუნი 119:98—100).

„ართშა დიაჩქიმქ მიწუ: „მარას შქვით დღა გიღჷ დო თე დღალეფს ბრელ მუდგარენს ორთუქ სქან დუდშო. მუშენ ოკო ვეგმურთე დრო იეჰოვას? თაშ გაკეთენქ-და, სწორ იჸუაფ“ (მელანი, 20 წანერ)

ბიბლიურ პრინციპეფშე ქოფიქრენქ–და, უმოსო შეგალებე სწორ გადაწყვეტილებეფიშ მეღება. მაგალთო, მუჟამსით მეგობრეფს გიშეგორუნქ ვარდა ცდუნებაშ წოხოლე გერექ.

მუჭო შეილებ სრულ სარგებელ მიღე ბიბლიაშ კითხირშე?

• გიღდას გეგმა. „გიღდას ბიბლიაშ კითხირიშ გეგმა. წინასწარ გიჩქუდას მუს, მუჟამ დო სო იკითხენქ“ – იჩიებ 15 წანერ ჯულია.

• მინწყი ჯგირ გარემო. „დოგორ წყნარ ადგილ. თეწკუმა ართო, წინასწარ ქუწი სქან ოჯახის ბიბლიაშ კითხირიშ გეგმაშ გურშენ, ნამდა ვეგეცილან“ – იჩიებ 22 წანერ ჯეანა.

  

  ელექტრონულ მოწყობილობას ქირინუანქ-და, თეშ ქიგიორინე, ნამდა შეტყობინებეფქ ვა მოირთას. შეილებ ბიბლიაშ ბეშტელ ვარიანტ ხოლო წეკითხე, მუშენდა გამოცდილებაქ ოძირუ, ნამდა ბეშტელ პუბლიკაციეფშე ნაკითხირიშ გაგება უმოს მარტივ რე. თეშ გინაწონს, ელექტრონულ მოწყობილობას ქირინუანქ-და, შილებე ნაკითხირშა კონცენტრირება უმოს რთულქ იჸუას.

  „ქიმეფხვად, ნამდა ელექტრონულ მოწყობილობაშე კითხირიშ დროს მინშა ყურადღება შხვა მუდგარენშა გინომიღ. ჩქიმ მოწყობილობაშა შეტყობინებეფ მიშურს, მაგალთო, მუჟამსით ოტენალ რე ვარდა ინტერნეტ ითიშუ. თეშ გინაწონს, ბეშტელ პუბლიკაციაშ კითხირიშ დროს ხვალე ართ ოფიქრებელ მიღჷ, თინა, ნამდა ჯგირ განათება მიღდას“ (ელენა, 18 წანერ)

• დაჭყაფუს ქილოც. ქოთხი იეჰოვას ქიმგეხვარას, ნამდა მუდგაშ კითხირ გილამუნ თინა ჯგირო ქიგეგე, ქიდემახსოვრე დო სარგებელ გეგშეღე (იაკობი 1:5).

  

  მუდგას იკითხენქ თის ტომბას გეგმირკვიენქ-და, იეჰოვას ქაძირანქ, ნამდა მართალო გოკო თინა, მუთ ლოცვას ითხი. მუჭო შეილებ თეშ კეთება? ბიბლიას JW ბიბლიოთეკას ვარდა ონლაინ ქოკითხულენქ-და, შეილებ მუხლის ქიგუნჭირე დო დამატებით მასალა ვარდა თიწკუმა დაკავშირებულ სტატიეფ ქოძირე.

• დასვ კითხვეფ. მაგალთო: მუს ბგურაფლენქ თე მონაკვეთშე იეჰოვაშ გურშენ? ღორონთიშ ნამ თვისებას ვორწყექ, ნამუთ შემლებ მა ხოლო გინიბღე? (ეფესოელები 5:1). მუშ გურაფა შემლებ თე მონაკვეთშე, ნამდგას უკულ ცხოვრებას გიმიბრინუანქ? (ფსალმუნი 119:105). შემლებნო ნაკითხირ შხვეფიშ მახვარებელო გიმიბრინუე? (რომაელები 1:11).

  

  თეწკუმა ართო, ქოკითხ სქან დუდის: მუჭო რე დაკავშირებულ ნაკითხირ ბიბლიაშ მთავარ თემაწკუმა? თენა მანგარ მნიშვნელოვან კითხვა რე, მუშენდა, ირფელ, მუთ ბიბლიას რე ინოჭარილ – დაბადებაშე გამოცხადებაშახ – მუდგარენნერო დაკავშირებულ რე ბიბლიაშ მთავარ თემაწკუმა: მუჭო განწმინდენს იეჰოვა მუშ სახელს ზეციერ სამეფოშ საშვალებათ დო დამტკიცენს, ნამდა ხვალე თის უღჷ მართველობაშ უფლება დო თიშ მართველობა არძაშ უჯგუშ რე.