ქიდეკვირით, მუჭო ირჩქილეთ

1, 2. ა) მუჭო ზრუნენს ამდღა იეჰოვა მუშ ხალხიშ სულიერ საჭიროებეფშე? (ფსალმ. 23:1, 2, 5). ბ) მუს გუვარჩიენთ თე სტატიას?

ᲐᲛᲓᲦᲐ იეჰოვა ხვეიანო მარზენა სულიერ საზრდოს. ათეშენ ჩქი ხოლო ვოთანხმუთ ფსალმუნმაბირე დავითიშ სიტყვეფს: „იეჰოვა რე ჩქიმ ჭყიშ, მუთუნ ვემმოკორდუ“ (წეკითხით ფსალმუნეფიშ 23:1, 2, 5).

² ართ-ართ საშვალება, მუდგათ ამდღა იეჰოვა სულიერ საზრდოს მარზენა, კრებაშ შეხვალამეფ რე. თე შეხვალამეფს, ხშირას თიცალ მუდგარენს იბრჩქილეთ, მუთ უკვე მიჩქუნა. მარა თიმწკუმა ხოლო, მუჟამსით მტკიცას გივორეთ „სიმართლეშ შარას“, თე შეხსენებეფ იშენით მოსაჭირუნა (2 პეტ. 1:12). მინშა ხომ ვაიჭირა, ყურადღებათ ქურჩქილათ თის, მუთ უკვე ბრელშა გაფუნა მორჩქილაფირ? თაშ ქორენ-და, თე სტატია ქიმგეხვარებუნა. გუვარჩიენთ, მუშენ ოკო ურჩქილათ ყურადღებათ კრებას, მუჭო შეულებუნა თინეფს, მით დავალებეფით გიშულა, მეხვარან აუდიტორიას, რდანჷ ყურადღებათ დო მუშ კეთება შემლებუნა თითოეულს, ნამდა უჯგუშ მარჩქილეეფ ვორდათ. მორთ დიო თიშე ქიფჩუათ, სინამდვილეს მიშე მოურს თინა, მუდგას შეხვალამეფს ბგურაფლენთ.

ᲠᲨᲣᲓᲐᲜ, ᲨᲔᲮᲕᲐᲚᲐᲛᲔᲤᲘᲗ ᲘᲔᲰᲝᲕᲐ ᲛᲘᲠᲐᲒᲐᲓᲣᲜᲐ

3. მუჭო მეჩიებუნა იეჰოვა დო მუჭო ირინუანა თიშ მსახურეფ ბიბლიას შხვაშა გურაფაშ დროს?

³ იეჰოვა მუშ სიტყვაშ, ბიბლიაშ, საშვალებათ მეჩიებუნა (2 ტიმ. 3:16, 17). იესოს თენა ჯგირო უჩქუდ დო თიშმაჯგირას ირინუანდჷ ღორონთიშ სიტყვას, ნამდა მარჩქილეეფს უკვენდეს დო იჩიებუდეს: „სოვრეშე უჩქჷ თე კოჩის წმინდა წერილეფშე თესხი მუდგარენ, თის ხომ რელიგიურ სკოლეფს ვა უგურუაფ?“ (იოან. 7:15). ალალგურიშ ხალხის მანგარო მოწონდჷ თიშ მორჩქილაფა, მუჭო ენწყუნდჷ იესო ღორონთიშ სიტყვას. პირველ საუკუნეშ ქრისტიანეფ ხოლო, მაგალთო, მოციქულ პავლე დო აპოლოს, მეჸუნდეს იესოშ მაგალითის დო ხალხწკუმა ჩიებაშ დროს ხშირას წმინდა წერილეფშე მოჸუნდეს ციტატეფ (საქ. 17:2, 3; 18:24, 28). ჩქი, იეჰოვაშ მოწმეეფს, მიჩქუნა, ნამდა ჩქინ სტატიეფ, მაუწყებლობეფ, მოხსენებეფიშ გეგმეფ დო ვიდეოეფ ბიბლიაშა რე გერსხილ. კრებაშა მოულირ ბრელ სტუმარს მანგარო მოწონს თიშ ძირაფა, მუჭო ირინუანა იეჰოვაშ მოწმეეფ მუნეფიშ შეხვალამეფს ბიბლიას. ჩქინ შეხვალამეფს დავალებეფით გიშულან თინეფს მთავარ ყურადღება ბიბლიაშა აფუნა გინოღალირ დო თეს უბრალოთ მუხლეფიშ ეშაკითხირით ვარინ, თით ხოლო ოძირანა, ნამდა მარჩქილეეფს ოგურუანა, მუჭო გიმირინუან თინა, მუდგას ბიბლია იჩიებ (ლუკ. 24:32).

4. ხშირ შემთხვევას მუ მნიშვნელობათ რე ბიბლიას გიმორნაფილ სიტყვა „მორჩქილაფა“?

⁴ ბიბლიას სიტყვა „მორჩქილაფას“ ხშირ შემთხვევას მორჩილებაშ მნიშვნელობა უღჷ. ათეშენ, მუთ უმოს ყურადღებათ ურჩქილეთ შეხვალამეფს, თით უმოს უჯგუშო ქიგებგენთ, მუს ელჷ იეჰოვა ჩქინდე დო შედეგო უმოს ადვილ მაჸინა მორჩილება. შემლებუნა დარწმუნებულეფ ვორდათ, ნამდა იეჰოვას ოხიოლ, მუჟამსით ურჩქილეთ დო დოპჸუნთ თის (იგავ. 27:11).

ᲛᲣᲨᲔᲜ ᲝᲙᲝ ᲣᲠᲩᲥᲘᲚᲐᲗ ᲨᲔᲮᲕᲐᲚᲐᲛᲔᲤᲡ ᲧᲣᲠᲐᲓᲦᲔᲑᲐᲗ

5. მუშ სურვილს მირჩქინანა იეჰოვაშ მიმართ ჸოროფა? (იოან. 4:23, 24; 1 იოან. 5:3).

⁵ შეხვალამეფს ყურადღებათ თიშენ ურჩქილეთ, ნამდა მიჸორა იეჰოვა (მათ. 22:37). მუთ უმოსო იფჩინებაფუანთ იეჰოვას, თით უმოსო მეჸოროფებუნა თინა. თე ჸოროფა მირჩქინანა თიშ სურვილს, ნამდა ქურჩქილათ, დევემორჩილათ დო თაყვან ფცათჷ თის თეშ, მუჭოთ თეს მუშ სიტყვათ მოგურუანა (წეკითხით იოანეშ 4:23, 24; 1 იოანეშ 5:3).

6. მუს მოგურუანა იეჰოვა შეხვალამეფს შხვეფიშ მოხვარაშ გურშენ?

⁶ შეხვალამეფს ყურადღებათ თიშენ ურჩქილეთ, ნამდა მიჸორა ადამიანეფ (მათ. 22:39). ჩქინ შეხვალამეფს იეჰოვა მოგურუანა, მუჭო მივეხვარათ თანაქრისტიანეფს დო თინეფს, მით დიო ვეჩინენა თის. მაგალთო, ბროშურა „გიჸორდას ადამიანეფ – მამზად მოწაფეეფ“ მოხვარუნა თიცალ თვისებეფიშ გავითარებას, ნამუთ მსახურებას გიმმოდირთუნა. შქამარაშ შეხვალამას ბგურაფლენთ, მუჭო გიმიბრინუათ თე ბროშურას მოჩამილ რჩევეფ. ხომ ვაიჭირა ადამიანეფწკუმა მეგობრულ ჩიებაშ წუმოჭყაფა? თაშ ქორენ-და, განსაკუთრებულო ქიდეკვირით, მუჭო ორთუნა თეს და დო ჯიმალეფ ინსცენირებეფიშ დროს.

7. მუშენ რე მნიშვნელოვან, გუვაგრძელათ იეჰოვაშ რჩქილა?

⁷ შეხვალამეფს ყურადღებათ თიშენ ურჩქილეთ, ნამდა მიჸორა სიცოცხლე. ღორონთიშ სიტყვაშ მორჩილება ჩქინო „სიცოცხლეს ნიშნენს“, მუჭოთ თენა იეჰოვაქ ჯვეშ დროს მახორუ მუშ თაყვანიშმცემელეფს უწუ (კან. 32:44–47). შეხვალამეფს ყურადღებათ მორჩქილაფა ძალეფს მარზენა, მუთ თიშო მოსაჭირუნა, ნამდა მოთვინებათ გუვაგრძელათ ჯინა, ონდო ახალ ქიანა დოდირთუდას (რომ. 8:25). იეჰოვაშ მორჩქილაფა ამდღა განსაკუთრებულო რე მნიშვნელოვან, მუშენდა ბოლო დღალეფს ფცხოვრენთ დო სულიერო კურცხას ოკო ვორდათ (მათ. 24:42–44; გიმოცხ. 1:3).

ᲛᲣᲭᲝ ᲛᲘᲕᲔᲮᲕᲐᲠᲐᲗ ᲨᲮᲕᲔᲤᲡ, ᲨᲔᲮᲕᲐᲚᲐᲛᲔᲤᲡ ᲧᲣᲠᲐᲓᲦᲔᲑᲐᲗ ᲣᲠᲩᲥᲘᲚᲐᲜ

8. მუშენ ოკო ეცადან სცენაშე ოგურუანან თი ჯიმალეფქ, გაუჯგუშან მუნეფიშ ორატორულ უნარეფ?

⁸ ჯიმალეფქ, მით სცენაშე ოგურუანა, განსაკუთრებულო თინეფქ, მით მოხსენებეფით გიშულა, ირიათო ოკო ეცადან, გაუჯგუშან მუნეფიშ ორატორულ უნარეფ. მუშენ რე თენა მნიშვნელოვან? ჯგირო მომზადებულ თემეფს შეულებ მანგარო იმოქმედას დაინტერესებულეფშა დო ბიბლიაშე უმოსიშ გურაფაშ სურვილ გურჩქინას. თეწკუმა ართო, ჯგირო მომზადებულ თემეფ თანამორწმუნეეფს ხოლო ოხვარ, უჯგუშო ქენანჭან ბიბლიას დო გაგრძელან ნაგურეფუშ გიმორნაფა. ათეშენ, მუდგა დავალება ვაიღუდანინ, დღას ვემიეფუათ თე საქმე დო რშუდან, ნამდა თქვან კეთებულ დავალებაქ შილებე ფიქრენთინ თიშე უმოსო მეხვარას შხვეფს. თაშ ნამდა, დავალებათ გიშულაშ პატი ქოიღუნან-და, დეფიქრით, მუჭო შეილებუნა გიმირინუათ თუდონ აბზაცეფს მოჩამილ რჩევეფ. მართალ რე, თე რჩევეფ უმოსო საჯარო მოხსენებაშ კეთებას ოხუ, მარა თინეფს ენოდვალირ პრინციპეფ არძა დავალებაშ კეთებაშ დროს გიმგოდირთუნა (2 ტიმ. 4:2; ტიტ. 1:9).

9. მუშ კეთება შეილებ, ნამდა სქან მოხსენება ადვილო გასაგებ რდასჷ?

⁹ გეგმას აზრეფ გასაგებო ქუდანწყი. მუშო ოკო რაგად, გოკოდას იჸი, სქან გინოჩამილ აზრეფ მარჩქილეეფქ ადვილო ქიგეგან დო ართ აზრშე მაჟიაშა გინმურქინ, ვა გუჭირდან ეკოჸუნაქ. მარა სქან თემა აზრეფით ნაბეტან გინოხარგელ ქიჸუაფუნ-და, აუდიტორიას გუჭირდუ რჩქილა დო აზრიშ გიშაღალა. მუჭო შეილებ, გასაგებო ქუდანწყუე აზრეფ? მაგალთო, 1) თემაშ დაჭყაფუს ქოთქვი, მუ დო მუ იჸუაფ მთავარ აზრ. 2) მთავარ აზრეფ შქას იშო-აშო ვეგნოსხაპა; ართ მთავარ აზრშე მაჟიაშა გინულაშ დროს ჭიჭე პაუზა გაკეთ დო გასაგებო ქოთქვი, ნამ მთავარ აზრშა გინმურქ. 3) მოხსენებაშ ბოლოს მოკლეთ კინ ქიმიშინე მთავარ აზრეფ.

10. მუშენ რე მნიშვნელოვან, სი თვითონ მორწონდას თი აზრეფ, ნამდგას მოხსენებას გარჩიენქ?

¹⁰ სი თვითონ მორწონდას თი აზრეფ, ნამდგას მოხსენებას გარჩიენქ. მოხსენებას შურ დო გურით გაკეთენქ, მუჟამსით ქიმსჯელენქ თი აზრეფშე, ნამუთ სი მორწონს (იგავ. 2:4, 5; საქ. 4:20). თეცალ აზრეფიშ გორუას მიგეხვარებ, თემაწკუმა დაკავშირებულ ბიბლიურ მუხლეფიშ დო შხვა მასალაშ გურგედვალირო გიმორკვიება. შეერთებულ შტატეფს მახორუ 70 წანას გინოჩილათირ ჯიმა იშინანს მუშ მოზარდობაშ დროს მორჩქილაფირ მოხსენებას დო იჩიებ: „ამდღარშახ ფშჷ, მუჭო ელამჩეს მომხსენებელქ, ღორონთიშ სიტყვაშ კითხირიშ დროს ტომბაშე დეფიფქრითკო თექ მოჩამილ აზრეფშე. თინა დამაჯერებელო იჩიებუდ დო გასაგებო ენწყჷ, მუჭო ვაკეთითკო თენა. თე მოხსენებაქ ჩქიმ ცხოვრება დოთირუ, მუშენდა თიშ ჭყოლოფათ ქიდიბგურე, მუჭო მიბღიკო უმოს რჩქინა ბიბლიაშ კითხირიშ დროს. შედეგო უმოსო დევეახლოვ იეჰოვას“.

11. მუშ კეთება შეილებ, ნამდა სქან მოხსენებაქ ქიმეხვარას მარჩქილეეფს? (1 ტიმ. 4:13–16).

¹¹ დეფიქრ, მუ ოსაჭირუნა სქან მარჩქილეეფს დო ქაძირე, კონკრეტულო მუჭო შეულებუნა თემას მორჩქილაფირ აზრეფიშ გიმორნაფა. ვეგეჯერდა ზოგად ინფორმაციაშ გინოჩამას, თეშ მანგიორო, გეგმირინე ბიბლიურ მუხლეფ, ნამდა გურშა ელუკინე მარჩქილეეფს დო კონკრეტულო ქაძირე, მუჭო გიმირინუან ცხოვრებას თინა, მუდგას ბიბლია იჩიებ. ზუსტას თაშ მიქცუ მოციქულ პავლექ. თიქ ტიმოთეს მუსხირენ კონკრეტულ რჩევა მეჩჷ, ნამუთ თის მეხვარებუდ, ეფესოს მსახურებაშ დროს სულიერო მანგარას გერდუკო (წეკითხით 1 ტიმოთეშ 4:13–16). სი ხოლო ქიფიქრ, მუ ოსაჭირუნა სქან მარჩქილეეფს დო ქაძირე, კონკრეტულო მუჭო შეულებუნა მუნეფიშ ცხოვრებას გიმირინუან სქან მოხსენებას მორჩქილაფირ აზრეფ.

12. მუშენ რე ჯგირ მოხსენებაშ დროს ბუნებრივო ჩიება?

¹² მოხსენებაშ კეთებას ხონარმაღალო ქივარჯიშ, ნამდა ბუნებრივო გეგშაირთას თიქ. მუჟამსით თემა სიტყვასიტყვათ ვა გაფჷ ჭარილ, ნაჭარას ვა კითხულენქ დო ბუნებრივო იჩიებუქ, მოხსენება უმოს ადვილ მარჩქილაფარ დო გაგებელ რე. ბროშურას „გაუჯგუშ კითხირიშ დო გურაფაშ უნარი“ ჭარჷ: „იჩი ბუნებრივო დო შურდოგურით … დეფიქრ, მუშენ ოსაჭირ ხალხის თე ამბეშ მორჩქილაფა“. შურ დო გურით ქიჩიებუქ-და, მოხსენება ცოცხალო კეთებულ დო საინტერესო მარჩქილაფარ იჸუაფ დო აუდიტორიას მაკორინე მორჩქილაფირ აზრეფიშ გიმორნაფა.

13. მუშენ ოკო ელაკითხუას რჩევა გამოცდილ მომხსენებელს თი ჯიმაქ, ნამუთ მოხსენებას ამზადენს? (ქოძირით სურათ).

¹³ ქელაკითხე რჩევა გამოცდილ მომხსენებელს. მაგალთო, შეილებ თის წინასწარ ქაძირუე სქან ჩანაწერეფ დო უკულ თიშ რჩევეფ მოხსენებას გეგმირინუე. თეს გეძინელ, ქოთხი თის, წინასწარ ქუმოირჩქილუას დო ქიდეკვირას, მუჭოთ მასწავლებერს, მუ გაფჷ გაუჯგუშებელ (იგავ. 1:5). ჩქი ირო ვა ვორწყეთ, მუს მოსაჭირუნა გაუჯგუშება, ათეშენ გამოცდილ ჯიმა ქოიწინს, მუ გაფჷ ოთირალ, ნამდა სქან მოხსენება უმოს ადვილ გაგებელ რდასჷ დო აუდიტორიას მორჩქილაფირიშ გიმორნაფაქ მაკორინას. მოკონა, უჯგუშ მომხსენებელეფ დო მასწავლებერეფ ვორდათ, ნამდა შემალებუან ჩქინ მარჩქილეეფს მივეხვარათ, ჯგირობუა მიღან ღორონთიშ სიტყვას მოჩამილ განძშე.a

ᲛᲣᲭᲝ ᲒᲘᲜᲘᲑᲠᲗᲐᲗ ᲣᲯᲒᲣᲨ ᲛᲐᲠᲩᲥᲘᲚᲔᲔᲤᲝ

14. მუშენ იჸუაფ ჯგირ, მიღუდან თიცალ დამოკიდებულება, მუნერით 119-ა ფსალმუნიშ მაჭარალს უღუდ? (ფსალმ. 119:24, 111, 167).

¹⁴ მუთ უმოს მარდულ იპჸუაფუთ იეჰოვაშ შეხსენებეფიშ, თით უჯგუშ მარჩქილეეფო გინიბრთუთ. მინშა შილებე ფიფქრენდათ, ნამდა შეხვალამეფს ბრელშა იბრჩქილუაფუთ ართ დო იგივეს. თეცალ დროს ჯგირ იჸუაფ, დეფიფქრათ, მუ დამოკიდებულება უღუდ ღორონთიშ შეხსენებეფიშ მიმართ 119-ა ფსალმუნიშ მაჭარალს (წეკითხით ფსალმუნეფიშ 119:24, 111, 167). მუშენ იჸუაფ თენა ჯგირ? მუშენდა ღორონთიშ შეხსენებეფ მოსაჭირუნა, ნამდა ქუგურზათ თი სირთულეეფს, ნამდგას ამდღარ „მანგარ გლახა დო ძნელ გინაღალარ დროს“ ფხვადუთ (2 ტიმ. 3:1).

15. მუ მიმეხვარებუნა, ირო მარდულეფ ვორდათ თი ირფელშო, მუდგას შეხვალამეფს იბრჩქილეთ?

¹⁵ მნიშვნელოვან რე, ნამდა თი ირფელ, მუდგას შეხვალამეფს ბგურაფლენთ, იეჰოვაშე ძღვინო მიბრჩქინათ. მუშენ რე თენა მნიშვნელოვან? დეფიფქრათ ისრაელეფიშ მაგალითშე. თინეფქ პატი ოკო ვეუჸოთესკო მანანას, მუდგათ იეჰოვა თინეფს უდაბნოს ოდიარუანდჷ (გიშ. 16:15, 31). მუშო ოკო რაგად, დუდშე ისრაელეფ მანგარ მარდულეფ რდესჷ თე ოჭკუმალშო, მუშენდა თინა იეჰოვაშე მიშჷ, გემუან ხოლო რდჷ დო თიშ ჭყოლოფათ შქირენით ვა ღურუდეს. მარა დროშ მიკულაშ უკულ, ნამთინეს მეუდინ მარდულობაშ გრძნობაქ დო კისერშა გეკურთჷ ირდღას მანანაშ ჭკუმუაქ (რიცხ. 21:5). მუს ბგურაფლენთ ისრაელეფიშ მაგალითშე? ამდღა, შეხვალამეფს თიცალ მუდგარენეფს იბრჩქილეთ, მუთ აიშახ ხოლო ბრელშა მომრჩქილუაფუნა, მარა თე შეხსენებეფქ ჩქინ თოლს ჩვეულებრივ მუდგარენო ოკო ვეგნირთას დო დღას ოკო ვეფიფქრათ, ნამდა თეზმაშა გოშინა ვა მოსაჭირუნა. თეშ გინაწონს, ირიათო ფშუდან, ნამდა თი შეხსენებეფ დო გურაფა, ნამდგას შეხვალამეფს ბღებულენთ, იეჰოვაშე მოურს. თეს გეძინელ, ოკო ვაგმოჭყორდან, ნამდა ართგურ დო გონიერ მონა გურგოჩამილო გიშაგორუნს შეხვალამეფს გარჩიებელ საკითხეფს. თინა ხოლო ოკო ფშუდან, ნამდა თე ირფელ სინამდვილეს სიბრძნეს მარზენა, მუთ მიმეხვარებუნა ჭკვერულ გადაწყვეტილებეფიშ დო ულიებ სიცოცხლეშ მეღებას (იგავ. 3:13, 16–18; იოან. 17:3).

16. მუ ოხვარ ნამთინე ბრელ ხანიშ მსახურს, ყურადღებათ ურჩქილას კრებას? (ქოძირით ჩარჩო „მუ მიგეხვარებუნა ყურადღებათ მორჩქილაფას?“).

¹⁶ პრაქტიკულ მხარეეფიშ გათვალისწინება მიმეხვარებუნა, უჯგუშ მარჩქილეეფ ვორდათ. ქიდეკვირით, მუ ოხვარ იეჰოვაშ ნამთინე ბრელ ხანიშ მსახურს, ყურადღებათ ურჩქილას კრებაშ შეხვალამეფს. ეშლი, ნამუთ 30 წანაშ უმოს რე, მუთ იეჰოვას ომსახურ, მირაგადუნა: „მომზადება რე მთავარ, მუთ მოხვარ ყურადღებათ მორჩქილაფას. მომზადებულ ვა ვორექ-და, მიჭირს კომენტარიშ კეთება დო აზრით შხვადო ვორექ“. ჯოზეფ, მით 52 წანა რე, მუთ იეჰოვას ომსახურ, იჩიებ: „მოსიამოვნ თიცალ საკითხეფიშ მორჩქილა, ნამუთ ბრელშა ჸოფე გარჩიებულ, მუშენდა თე დროს თე საკითხის გვალო შხვა კუნთხუთ მოძირანა. მოხსენება ჯგირ ორატორ ვა რენ ფერ ჯიმას ქოუღუნ-და, ყურადღება თი ინფორმაციაშა გინომიღ, ნამდგას ღორონთიშ სიტყვაშე გინოფჩანა დო ვართ ხოლო ჩიებაშ სტილშა“.

17. მუ ოკო აკეთათ, ნამდა ყურადღებათ ურჩქილათ შეხვალამეფს? (ქოძირით სურათ).

¹⁷ თუდო გიმოკოროცხილ რე მუსხირენ პრაქტიკულ მხარე, მუთ მიგეხვარებუნა ყურადღებათ მორჩქილაფას: 1) შეხვალამაშახ თისხი ვა ჭკუმათ, ნამდა უკულ თოლს გითოიღანდან. 2) ადრე ქიმერთით დო პროგრამაშ დოჭყაფაშახ დოგორით ადგილ. 3) ელექტრონულ მოწყობილობეფ გეგნიჸუნით უხმო რეჟიმშა, ნამდა ვეგეცილან. 4) ქიფიქრით, თი თემაშე, ნამუთ გარჩიებულ იჸუაფ. 5) მთელ ყურადღება გიშმაულარშა გაფუდან გინოღალირ. 6) მოკლეთ ქენიჭარით ვარდა ქენიხანტით მთავარ აზრეფ. 7) დეფიქრით თემაშ მთავარ მუხლეფშე დო თიშე, მუჭო რე თინეფ ართიანწკუმა დაკავშირებულ. 8) ქოკითხით თქვან დუდის: „მუჭო შემლებ თე აზრეფიშ გიმორნაფათ ქიმვეხვარე და დო ჯიმალეფს დო თინეფს, მიდგას მსახურებას ფხვადუქ?“. 9) კონგრესეფიშ დროს ქიგნაჯინით თიმ დღაშ თემას, მოხსენებეფიშ სათაურეფს დო თითოეულ მოხსენებაშ მთავარ ბიბლიურ მუხლეფს. 10) მამზადით გურ დო გონება მთლიან პროგრამაშ მარჩქილაფარო. პროგრამაშ დოჭყაფაშახ მუსიკა ჩერთებ დოვარ მუსიკალურ ვიდეოკლიპ, ქუდოზოჯით დო მთელ ყურადღება თიშა გეგნიღით.

ᲘᲠᲘᲐᲗᲝ ᲣᲠᲩᲥᲘᲚᲘᲗ ᲘᲔᲰᲝᲕᲐᲡ

18. მუშენ რე საჭირო, ირიათო ყურადღებათ ურჩქილათ შეხვალამეფს?

¹⁸ შეხვალამეფს ყურადღებათ ქურჩქილეთ-და, თეთ იეჰოვას საშვალებას ვარზენთ, ქეწმაჸუნან „სიმართლეშ ჭიფე შარას“ (ფსალმ. 23:3; 31:3). ჩქი აუცილებერო მოსაჭირუნა თი რჩევეფ, ნამდგას შეხვალამეფს ბღებულენთ, ნამდა ბორიას გილურაჸუნ ფერ ნავცალო ვეფჩირთათ სწორ შარას. ათეშენ ოკო ქიდვეკვირათ, მუჭო იბრჩქილეთ დო მივაჸუნათ თი ხელმძღვანელობას, ნამდგას ჩქინ შეხვალამეფს ბღებულენთ (ლუკ. 8:18). იეჰოვას ურჩქილენან თინეფ ბედნერეფ იჸუაფუნა ამდღა დო მომავალს ულიებ სიცოცხლეს მიღენა (ფსალმ. 119:2, 14).