გამანგარით მეუღლეწკუმა მეგობრობა

1. მუშენ რენა ჯგირ მეგობრეფ იეჰოვაშ საჩუქარ?

ᲯᲒᲘᲠ მეგობრეფ იეჰოვაშ საჩუქარ რენა (იაკ. 1:17). თინეფს უჸორა ღორონთ დო უჸორთ ჩქი. თინეფს ჩქინწკუმა ართო ოხიოლუნა ჩქინ ჯგირ, გურშა ემქექუანა გლახათ ვორეთინ თიმ დროს დო, საჭირო ქორენ-და, ალალას მარზენა რჩევას. თეცალ ართგურ მეგობრეფს შემლებუნა თავისფალო ვენდათ. თეცალ მეგობრეფ პჸუნან თენა გურს მიჰამუანა (იგავ. 27:9).

2. მუშენ რე მნიშვნელოვან, ჩილ დო ქომონჯიქ გამანგარან ართიან შქას მეგობრობა? (მათ. 19:6).

² მნიშვნელოვან რე, ჩილ დო ქომონჯ ართიანშო არძაშ უხოლაშ მეგობრეფ რდანჷ. თინეფს ოკო შუდან, ნამდა თეცალ ჯგირ მეგობრობა მუშით ვა მურსჷ, თის ხანდა ოსაჭირ. მეგობრობაშ გამანგარებელო მუთუნს ვა ქიმინუნან-და, შილებე დუდ ხვალახეთ იგინან, გურქ გუტირხან ვარდა ართიანშე მოურთან გურქ. მარა, ართიანწკუმა დაახლოებერო ირფელს გაკეთენან-და, თიცალ ხოლოშიან ურთიერთობა აღვენუნა, ნამდგაშ უმოს ჟირ ადამიან შქას მეტ ეშე ვეშილებე (წეკითხით მათეშ 19:6). თე სტატიაშე ქობძირუნთ, მუჭო შეულებუნა ჩილ დო ქომონჯის, გამანგარან ართიანწკუმა მეგობრობა. მარა დიო თიშე ქიფჩუათ, მუჭო შეულებ დაუქორწინებელ ქრისტიანს, მომავალ მეუღლეთ გეგშეგორას თიცალ პიროვნება, ნამუთ მთელ ცხოვრებას მუშ არძაშ უხოლაშ მეგობარ იჸუაფ.

ᲛᲣᲭᲝ ᲒᲘᲨᲔᲒᲝᲠᲐᲗ ᲛᲔᲣᲦᲚᲔ, ᲜᲐᲛᲣᲗ ᲛᲗᲔᲚ ᲪᲮᲝᲕᲠᲔᲑᲐᲡ ᲗᲥᲕᲐᲜ ᲐᲠᲫᲐᲨ ᲣᲮᲝᲚᲐᲨ ᲛᲔᲒᲝᲑᲐᲠ ᲘᲸᲣᲐᲤ

3, 4. მუ მიგეხვარებუნა ჯგირ მეუღლეშ გორუას? (იგავ. 18:22).

³ არძა მნიშვნელოვან გადაწყვეტილებაშ მეღებაშახ ჯგირო ოკო დეფიფქრათ, თი ჯგირ დო გლახა შედეგეფშე, მუდგაქ შილებე თის მაჸუნას, მუშენდა მნიშვნელოვან გადაწყვეტილებეფქ შილებე მთელ ჩქინ ცხოვრებაშა იმოქმედას. თაშ ნამდა, თეცალ გადაწყვეტილებეფიშ მეღებაშახ ფიქრ რე საჭირო.

⁴ მუჟამსით გიშებგორუნთ მომავალ მეუღლეს, ნამუთ მთელ ცხოვრებას ჩქინ მეგობარ იჸუაფ, ბღებულენთ ართ-ართ არძაშ უმოს მნიშვნელოვან გადაწყვეტილებას. რახანს ოჯახ იეჰოვაშ გოჭყაფილ რე, ჭკვერულ იჸუაფ, თე საკითხის თიშ ხელმძღვანელობა ბგორათ. თის ოკო, ნამდა ქომოლკოჩიქ ჯგირ ოსურ დოგორას დო ოსურკოჩიქ ჯგირ ქომონჯ. თის ჯგირო უჩქჷ, მუ იჸუაფ ჩქინო არძაშ უჯგუშ (წეკითხით იგავეფიშ 18:22; ეს. 48:17, 18). ქრისტიანს ღორონთიშ სიტყვას მოჩამილ პრინციპეფ მეხვარებ, გეგშაგორას მუშ შესაფერის მეუღლე.

5. მუშენ რე მნიშვნელოვან, მომავალ მეუღლე ნათილ ქრისტიანეფ შქას გორე?

⁵ ნათუათ იეჰოვაშ მეგობრეფო გინიბრთით (ფსალმ. 25:14). დაქორწინება ქუგოკონ-და, მომავალ მეუღლე ხოლო იეჰოვაშ მოწმეეფ შქას ოკო გორე (1 კორ. 7:39). თეშნერო ქაძირანქ, ნამდა აფასენქ იეჰოვაშ ნორმეფს დო სქან მეუღლეს უჯინედენ იჸი, მუჭოთ ძვირფას საჩუქარს იეჰოვაშე (იგავ. 19:14). თეს გეძინელ, ეიჩილითუანქ თი პრობლემეფს, ნამუთ მოჸუნს ურწმუნოეფწკუმა „ართმანგ ვა რენ ფერ უღუს“ დუდიშ სქუაფას (2 კორ. 6:14). მუთუნით ვეჸუაფ ჭკვერულ, იეჰოვაშ მოწმე ვა რენ ფერს ქოხვადუქ-და, მაგალთო თი მიზეზით, ნამდა ქრისტიანეფ შქას ვა გაგორ შესაფერის მეუღლექ. ვართ თინა იჸუაფ ჭკვერულ, ნამდა იეჰოვაშ მოწმე ვა რენ ფერწკუმა შეხვალამა თით გამართლე, ნამდა შილებე აკა დღას თიქ ხოლო გინირთას იეჰოვაშ მოწმეთ.

6, 7. მუ კითხვეფშე ოკო დეფიქრათ ჸოროფილობაშ პერიოდის?

⁶ მუშო ოკო რაგად, პიროვნება ნათილ რენ თენა იშენდოიშენ თის ვა ნიშნენს, ნამდა თინა სქანო შესაფერის მეუღლე იჸუაფ. ნამდგაინ ქრისტიან ქუმორწონს-და, ალალას შეაფას თინა. მაგალთო, ქოკითხ სქან დუდის: მუჭო ოქცუ ოჯახიშ წევრეფს? ქორენო მზრუნველ დო ქიგმირჩქინანსო შხვეფიშ მიმართ პატიცემას? მიწკუმა მეგობრენს? მუჭო იქციებ, მუჟამსით შხვას მუშე განსხვავებულ აზრ უღჷ? მუშიშ გოჸუნას ოცად დოვარ, ბიბლიურ პრინციპეფ ვერღვიებუნ-და, მზათ რე, დათმობაშა მიდართას? მუნერ დამოკიდებულება უღჷ ფარაშ მიმართ?

⁷ თეს გეძინელ, შეილებ თეშე ხოლო დეფიქრე: ქიგმირჩქინანსო იეჰოვაშ ძალიერ ჸოროფას? ქაცადუნო, დითირას „ახალ პიროვნებათ“? ქიმმეხვარებუნო იეჰოვაშ უჯგუშ მსახურო გინორთას? ქომღუნანო ართ დო იგივე სულიერ მიზნეფ? ჩქინ დუდ უბრალოთ ჯგირ მეგობრეფო მაფუნო წარმოდგენილ დოვარ არძაშ უხოლაშ მეგობრეფო? (კოლ. 3:9, 10). და ქორეთ-და, დეფიქრით, ჯიმა, ნამდგას ხვადუთ, ქიჸუაფუნო ჯგირ ოჯახიშ დუდ დო ჯგირ მეგობარ? (1 კორ. 11:3). ჯიმა ქორეთ-და, დეფიქრით, და, ნამდგას ხვადუთ, ქიჸუაფუნო მზათ, შეცდომეფიშ უმკუჯინუო, ქუდგაჸუნან, მუჭოთ ოჯახიშ დუდის დო პატი ქოცას თქვან გადაწყვეტილებეფს? თე კითხვეფშე პასუხიშ მეღებას დრო ოსაჭირ. ათეშენ, ჸოროფილობაშ პერიოდ თიშო გეგმირინეთ, ნამდა ჯგირო გეჩინებაფუათ თინა, მიდგას ხვადუთ.

8, 9. მუ მიგეხვარებუნა ჸოროფილობაშ პერიოდის ჭკვერულ გადაწყვეტილებაშ მეღებას? (ქოძირით სურათ).

⁸ ჸოროფილობაშ პერიოდის, მუთ უმოსო გეჩინებაფუანთ თქვან ჸოროფილს, თით უმოსო შეგალებენა ჭკვერულ გადაწყვეტილებაშ მეღება. ქიგეგით, მუს ფიქრენა შხვეფ თიშე, ქიგიკითხეთ, მუნერ რეპუტაცია დო თვისებეფ უღჷ თის. მაგალთო, ქორენო თანდაბალ, კეთილ დო გონიერ? საფრანგეთიშ გვიანას მახორუ ართ და, სარა, ნამდგაშ ქომონჯის დანიელ ჯოხო, იჩიებ: „დანიელიშ გურშენ აზრ პკითხჷ ჯიმას, ნამუთ თიწკუმა ართო ცხოვრენდჷ დო მსახურენდჷ, თიშ კრებაშ უხუცესის, საერთო მეგობრეფს დო თიშ კრებელ დალეფს“. შეილებუნა მუს ხოლო ქოკითხათ, ულირს ხომ ვა რდჷ, ვარდა ასე ხომ ვა რე თიცალ მუდგარენ, მუთ ოკო გიჩქუდან. მაგალთო, ჩვევეფ ვარდა მუდგაინ თიცალ, მუდგას შილებე ქორწინებაშ უკულ სერიოზულ პრობლემეფქ მაჸუნას.

⁹ შილებე ეჭვეფ ვა გოსვანჯუანდან დო გაფიქრუაფუდან, ქიჸუაფუნ დო ვარ თინა თქვანო ჯგირ მეუღლე. ვარდა შილებე სულიერო მოწიფულ თანაქრისტიან ალალას გირაგადუდან თე პიროვნებაშ გურშენ გურიშგაჩამალ მუდგარენს. თაშ ქორენ-და, სერიოზულო დეფიქრით თე ირფელშე. თენა მიგეხვარებუნა, გეგნოჭყვიდათ, ქიჸუაფუნ დო ვარ ჭკვერულ თე პიროვნებაწკუმა რომანტიკულ ურთიერთობაშ გაგრძელება.a მორთ ასე დაქორწინებულ წყვილეფშა გეგნობრთათ დო თიშე ქიფჩუათ, მუჭო შეულებუნა თინეფს ართიან შქას მეგობრობაშ გამანგარება.

ᲓᲠᲝ ᲒᲔᲒᲛᲣᲠᲗᲘᲗ ᲐᲠᲗᲘᲐᲜ ᲨᲥᲐᲡ ᲛᲔᲒᲝᲑᲠᲝᲑᲐᲨ ᲒᲐᲛᲐᲜᲒᲐᲠᲔᲑᲐᲡ

10. მუშენ რე მნიშვნელოვან, ჩილ დო ქომონჯიქ დრო გეგმურთან ართიანს?

¹⁰ მუდგა გადატვირთულ გრაფიკ ვა უღუდანინ, ჩილ დო ქომონჯ ართიანს დროს გეგმურთუნან-და, თინეფიშ ქორწინება დო მეგობრობა ხოლო უმოსო გემანგარებ. ართიანშა დროშ გიმორთუალა თინეფს საშვალებას ქიმეჩანს, ქიჩუან, მუ ხვადუდ დღაშ დინახალე, ალალას ქუდურაგადუან ართიანს მუნეფიშ გრძნობეფიშ დო ფიქრეფიშ გურშენ, გეგმოხანტან ჸოროფა ართიანიშ მიმართ დო სასიამოვნოთ გატარან დრო.

11. მუქ შილებე ეცილას ჩილ დო ქომონჯ შქას მეგობრობას?

¹¹ ჩილ დო ქომონჯის, მით ართიანიშ ხოლოშიან მეგობრეფ რენა, ირო ართო რინა უსხუნუნა. მინშა შილებე სიტუაციაქ მითხუას, ნამდა ართიანშე ცალკე იჸუან, მარა თექ ბრელ ხანს გეგრძელ-და, შილებე გილულუას თინეფს ურთიერთობა. მაგალთო, ნამთინექ შილებე ომუშებშა შხვა ქიანაშა მიდართას დო ოჯახიქ თუთობით აჸუას დატებელქ. ომუშებშა შხვა ქიანაშა ულათ შილებე ფარა ქიშუათ, მარა, ოჯახშე შორს ბრელ ხანს ქიჸით-და, შილებე თექ სერიოზულ პრობლემეფ გოირჩქინან ქორწინებას.

12, 13. ა) მუს ორთჷ ნამთინე ჩილ დო ქომონჯ თიშო, ნამდა დრო გეგმურთან ართიანს? (ქოძირით სურათ). ბ) მუ ადგილ ოკო უკინებუდას მეუღლეს თქვან ცხოვრებას? (ქოძირით ჩარჩო „მუ ადგილ ოკო უკინებუდას მეუღლეს ჩქიმ ცხოვრებას?“).

¹² ქიდეკვირით, მუჭო ოცად ნამთინე ჩილ დო ქომონჯ, დრო გეგმურთან ართიანს. ართ და, ლეა, ნამუთ გუამშე რე, იჩიებ: „მა დო ჩქიმ ქომონჯ ართო ვორთუთ შხვადოშხვა საქმეს. ჩქი ნაკლებო გილურთ თიცალ შაყარუეფშა, სოდეთ ართო ვეპჸით“. როქსანა ხოლო, ნამუთ შეერთებულ შტატეფშე რე, იჩიებ: „რახანს მა დო ჩქიმ ქომონჯის, ჟირხოლოს, გადატვირთულ გრაფიკ მიღუნა, შხვა მნიშვნელოვან საქმეეფწკუმა ართო წინასწარ თის ხოლო ვაგეგმენთ, მუჟამ ვორდათ ართო ხვალე ჩქი ჟირ“ (ქეშუდარით ამოსიშ 3:3). ართ ჯიმა, საფრანგეთშე, დამიენ, იჩიებ: „ჩქი ქიდიბგურეთ, მუსხით მნიშვნელოვან რე, დეინტერესე მეუღლეშ საჸოროფო საქმეეფით დო ხვალე თენა ვარინ, სი ხოლო ქიჸოროფუე თინეფ“ (მათ. 7:12). შეერთებულ შტატეფს მახორუ ქეით იჩიებ: „მინშა ტელეფონეფს ცალკე ბდვანთჷ, ნამდა მთელ ყურადღება ართიანშა მაფუდან გინოღალირ“.

¹³ ირფელშე უმოს მნიშვნელოვან რე, ჩილ დო ქომონჯიქ ართო მიღან მონაწილება სულიერ საქმეეფს. საფრანგეთის მახორუ მირიამ მირაგადუნა: „ირ ოჭმარეს ჟირხოლო ცალ-ცალკე პკითხულენთ ბიბლიას დო უკულ ართიანს ვეჩიებუთ, მუქ მიმეწონეს დო მუს გიმიბრინუანდით ცხოვრებას. თენა მანგარო მოსიამოვნ. თეს გეძინელ, მოპწონს, მუჟამსით ართო ბლოცულენთ დო მეუღლეშ ლოცვაშე ვორწყექ, მუჭო უჸორს იეჰოვა“. ჟიშე მოშინაფილ ქეით იჩიებ: „ჟირხოლოს მანგარო მიჸორა ართო მსახურება დო მოსიამოვნუნა თიშ ძირაფა, მუჭო ვეჩიებუთ შხვეფს იეჰოვაშ გურშენ. თე დროს ართიანშე ბრელ მუდგარენს ბგურაფლენთ, მუთ ხოლო უმოსო მაახლოვენა ართიანწკუმა“ (იგავ. 27:17).

ᲞᲠᲝᲑᲚᲔᲛᲔᲤᲘᲨ ᲓᲠᲝᲡ ᲣᲛᲝᲡᲝ ᲓᲔᲐᲮᲚᲝᲕᲘᲗ ᲐᲠᲗᲘᲐᲜᲡ

14, 15. მუშენ ოკო ვა დარკას წყვილქ მონდომა თი პრობლემეფიშ მოგვარებას, ნამდგას ქორწინებას ხვადუნა? ქიმიჸუნით მაგალით.

¹⁴ რახანს ჩილ დო ქომონჯ ჟირხოლო არასრულყოფილეფ რენა, თინეფს ქორწინებას პრობლემეფ აღვენუნა. ბიბლია იჩიებ, ნამდა დაქორწინებულეფს „მეტ ოწუხებელ აღვენუნა“ (1 კორ. 7:28). თე ფრაზას იგულისხმებ თიცალ პრობლემეფ, მუთ, მუჭოთ წესინ, დაქორწინებულეფს უღუნა. თეცალ პრობლემეფიშ დროს ჩილ დო ქომონჯიქ ირფელ ოკო გაკეთას, ნამდა ართო გიორჯგინან თინეფს დო უმოსო დეახლოვან ართიანს. მუშენ რე თენა მნიშვნელოვან?

¹⁵ ქიმიპჸუნათ თეცალ მაგალით: წერმიდგინით, ნამდა ნამდგაინ ცნობილ შენობაქ ვარდა ხელოვნებაშ ნიმუშიქ დეზიან. მუშო ოკო რაგად, მინჯეეფ ირფელს გაკეთენა, ნამდა თინეფ აღადგინან. შილებე თეს ქიანაშ ფარა, დრო დო ენერგია ქიმკახარჯან დო თიშ თებას წანეფქ დესაჭირას. მარა მინჯეს თენა თე ირფელშა უღირ, მუშენდა თინა ძვირფას რე თიშო. თეშნერო, არძა ქორწინება ძვირფას რე, მარა უთანხმოება არძაშ უმოს გემუან ჩილ დო ქომონჯ შქას ხოლო რჩქინდუ. ხშირ შემთხვევას, მუჭოთ დაზიანებულ შენობაშ ვარდა ხელოვნებაშ ნიმუშიშ აღდგენა რე შეიოლებერ, თეშ თი პრობლემეფშა ხოლო მიხვარებე, ნამუთ ქორწინებას რჩქინდუ. თეს შილებე დროქ დო ხანდაქ დესაჭირას, მარა იეჰოვას მანგარო ოხიოლ თიშ ძირაფა, მუჭო ოცადუნა ჩილ დო ქომონჯ, გამანგარან მუნეფიშ ქორწინება დო დეახლოვან ართიანს (მალ. 2:16). თეშნერო თინეფ ჸოროფას დო პატიცემას ხვალე ართიანიშ მიმართ ვარინ, იეჰოვაშ, ოჯახიშ გუმაჭყაფალიშ, მიმართ ხოლო გიმირჩქინანა.

16. 1 კორინთელეფიშ 13:4–8ა-შ თანახმას, მუ მეხვარებ წყვილს სერიოზულ პრობლემეფიშ დროს? (ქოძირით სურათ დო ჩარჩო „მუ მიგეხვარებუნა, გამანგარათ ართიან შქას მეგობრობა?“).

¹⁶ პრობლემეფიშ დროს ხეთეშე ვეგნოჭყვიდათ, ნამდა ცალ-ცალკე ოკო იცხოვრათ (1 კორ. 7:10, 11). თეშ მანგიორო, ქოკითხით თქვან დუდის: „ჩქინ მეგობრობაშ გამანგარებელო ხოლო უმოსიშ კეთება ხომ ვეშემლებ?“. გეგმირკვით, მუს იჩიებ ბიბლია ჸოროფაშ გიმორჩქინაწკუმა დაკავშირებით დო დეფიქრით, 1 კორინთელეფიშ 13:4–8ა-ს (წეკითხით) გიმოკოროცხილ თვისებეფშე ნამთინ ხომ ვა გაფუნა გაუჯგუშებელ. ართიანს მუჭო ჩეთხუათინ თიშ შარეფ ვარინ, ართიანიშ გურეფშა დართალ შარეფ გორით. დეფიქრით, პირადო თქვა მუშ კეთება შეილებუნა თე ურთიერთობაშ გამანგარებელო. ქილოცით დო ქოთხით იეჰოვას, ქოიხელმძღვანელან, ქიმიხვარეთ ჩქინ პუბლიკაციეფ დო ვიდეოეფ, ქელაკითხეთ რჩევა უხუცესეფს დო შხვა მოწიფულ ქრისტიანეფს. მიენდით იეჰოვას, ნამუთ თქვან ქორწინებაშ „სუმფა ძაფის“ მასმა დო არძაშ უმოს ძალიერ ძაფ რე. შედეგო, თე სუმფა ძაფ ადვილო ვა გოხორცქუ (ეკლ. 4:12).

17. მუჭო შეულებუნა დაქორწინება ულამუნან თინეფს დო დაქორწინებულეფს, რდანჷ ბედნერეფ?

¹⁷ იეჰოვას ოკო, მუშ არძა მსახურ, ქოთ დაქორწინებულ დო ქოთ დაუქორწინებელ, ბედნერ რდასჷ. დაქორწინება ქოილამუნან-და, გურგოჩამილო გეგშაგორით თქვან მომავალ მეუღლე; დო, დაქორწინებულ ქორეთ-და, ქეცადით ხოლო უმოსო გამანგარათ მეუღლეწკუმა მეგობრობა. ქორწინებას მუდგა სირთულეს ვეშეხვადათინ, ირიათო მიენდით იეჰოვას დო რჯერდან, თინა ქიმგეხვარებუნა. შედეგო, გეხარენთ ცხოვრებათ თქვან ძვირფას მეუღლეწკუმა ართო! (ეკლ. 9:9).