გურიშ ემაკინალ სტატია თი ოსურკათაშო, მით ძალადობაშ მსხვერპლ რენა

თაშ იჭყაფ ვებსაიტის jw.org მოჩამილ სტატია „ოსურკათაშ უსაფრთხოება – ბიბლიაშ თვალსაზრის“. თე სტატიაშ ბოლოს მოჩამილ რე ლინკ, ნამდგაშ საშვალებათ შილებე თე სტატიაშ PDF ვერსიაშ გინოჭარუა, ნამუთ შილებე გეშაბეშტუათ დო ოთხგვერდიან ბუკლეტო გეგნოკიჩათ. ამერიკას მახორუ ართ და, სტეისი, იჩიებ: „გეშაბებშტე თე ბუკლეტეფ დო უკულ ართ დაწკუმა ართო ქიმიბღჷ ოსურკათაშ თავშესაფარშა, ნამუთ ჩქინ კრებაშ ტერიტორიას რდჷ“.

თექიან თანამშრომელქ სტეისის კითხჷ, ხოლო ხომ ვა უღუდ თე ბუკლეტეფ, ნამდა თავშესაფარს შხვეფს ხოლო ქიმეჩუკო. თე დალეფქ ხოლო 40 ბუკლეტ დო ვებსაიტიშ 30 საკონტაქტო ბარათ ქიმუღეს. უკულიან მეულაშ დროს, თავშესაფარიშ ადმინისტრატორქ თინეფს უწუ, თექ ცხოვრენდესინ თი ოსურეფს ქაძირუესკო, მუჭო იტარებუდ ბიბლიაშ გურაფა.

სტეისის შხვა ჟირ დაწკუმა ხოლო უღუდ თეცალ ჯგირ შემთხვევა მაჟია თავშესაფარს, სოდეთ 5 ბუკლეტ ეჭოფეს დო ხოლო მითხუეს. ართ-ართ თანამშრომელქ თქუ: „თე ბუკლეტ მანგარო მეხვარებ თე ოსურეფს. . . ზუსტას თენა მოსაჭირუნა“. უკულიან მეულაშო თექ მუსხირენ ოსურქ გაკიშაყარ, ნამდა ქოძირესკო, მუჭო იტარებუდ ბიბლიაშ გურაფა, დო ჟირქ თქუ, ნამდა ოკოდეს, უკულიან მარას დარბაზის შეხვალამას დესწრესკო.

სტეისი იჩიებ: „მანგარო მოხიოლუნა, ნამდა ხალხის თეცალო დეინტერეს თე ბუკლეტიქ. თინა მართალო ჯგირ საშვალება რე, ნამდა სამეფოშ ცნობა ქუგვოგებაფუათ თი ოსურკათას, მით ძალადობაშ მსხვერპლ რენა. გურს მიტიბუანა თიშ ძირაფა, მუშმადიდა ხიოლ მოუღ შხვეფშა თექ ინოჭარილ ინფორმაციაშ მეღებას დო შურ მოლუნა თიშ ძირაფაშა, მუჭო მიმეხვარებუნა იეჰოვა, უმოს ოსურკათას ქუგვოგებაფუათ სახიოლო ამბე“.