მიოტებელ ხომ ვა მაფჷ რულიშ გეხუნა?

თეცალ სიტუაციას ქორეთ-და, მუ მიგეხვარებუნა თიშ გინოჭყვიდუას, მიოტუათ დო ვარ რულიშ გეხუნა?

ნამთინე ქიანას მუდგარენ ასაკის გეგნოჩირთუქინ უკულ, ექიმიშ ცნობა გოსაჭირ, ნამდა რულიშ გეხუნაშ უფლება გაიგრძელან. თეცალ ქიანეფს ქრისტიანეფქ ოკო დემორჩილან მთავრობაშ კანონს (რომ. 13:1). მარა, სოდგა ვა ცხოვრენდათინ, იშენ ჯგირ იჸი, გეგნაჯინათ, უსაფრთხოთ შეილებუნა დო ვარ მანქანაშ გილაჸუნაფა.

ᲥᲘᲓᲔᲙᲕᲘᲠᲘᲗ, ᲛᲣᲭᲝ ᲒᲘᲚᲐᲠᲸᲣᲜᲐ

ართ ორგანიზაცია ხანშამიშულირ შოფერეფს ელუჩანს, თეცალ კითხვეფშე დეფიქრან:

• ხომ ვამჭირს საგზაო ნიშნეფიშ ჩინება ვარდა სერით გლახათ ხომ ვა ვორწყექ?

• ხომ ვამჭირს დუდიშ მიკორთინაფა, ნამდა სარკეეფს ქიგვოჯინე დო თიცალ წერტილეფ ქობძირე, ნამუთ ართუცფას ვეძირე?

• ქომღუნო კინ ჯვეშობურო ჩქარ რეაქცია, მაგალთო, ქეშემლებუნო გაზიშ პედალშე ტორმუზშა უცფას კუჩხიშ გინოღალა?

• გვალო თიშმაწყნარას ხომ ვეგლაპჸუნს, ნამდა „პროპკას“ ვორჩქინანქ?

• ბოლო დროს ხშირას ხომ ვა მოხვალამე თეშ, ნამდა აკაბცხას დოფსქიდ ავარიას ვარდა ხოლო გოჩვარტილ დო გოხაზილ ხომ ვა რე ჩქიმ მანქანა თიშ გურშენ, ნამდა მუდგარენეფს ელუსვანქ?

• პატრულ ხომ ვა მაჩერენს ხშირას?

• თიცალ შემთხვევა ხომ ვა რდჷ, ნამდა რულწკუმა თოლს გითომღანდჷ?

• თიცალ წამალეფ ხომ ვა მაფჷ ოშუმალ, ნამუთ მანქანაშ გილაჸუნაფას მეცილებ?

• ჩქიმ ოჯახიშ წევრეფს დო მეგობრეფს ხომ ვა უთქუალუნა, ნამდა ნერვიანენა მანქანა გილაპჸუნსინ თეშ გურშენ?

თე კითხვეფშე ართ ვარდა ჟირ კითხვაშ პასუხ „ქო“ ქორენ-და, შილებე მუდგარენ-მუდგარენეფიშ თირუაშე დეფიქრათ. მაგალთო, შილებე გეგნოჭყვიდათ, ნაკლებო გედოხოდათ რულს, განსაკუთრებულო სერით. ირიათო ქიდეკვირით, მუჭო გილარჸუნა. შილებე თე საკითხიშ გურშენ აზრ ქოკითხათ თქვან მეგობარს ვარდა ოჯახიშ წევრის. თეწკუმა ართო, თქვან ქიანას თეცალ მუდგარენ ქორენ-და, შეილებუნა მანქანაშ უსაფრთხოთ ჸუნაფაშ კურსეფ მიკილათ. მარა, ჟიშე გიმოკოროცხილ კითხვეფშე ბრელიშ პასუხ დადებით ქორენ-და, შილებე უჯგუშ რდასჷ, მიოტუათ რულიშ გეხუნა.a

ᲥᲘᲛᲘᲮᲕᲐᲠᲔᲗ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲤ

შილებე შურო ვა გინაფლენდათ, ნამდა ჯვეშობურო ვეგლგაჸუნინენა მანქანა დო მანგარ ძნელ გაფუდან მანქანას ვეგგახუნინენან თე აზრიშ მერჩქვანა. თაშ ნამდა, მორთ გუვარჩუათ ჟირ ბიბლიურ პრინციპ, ნამუთ მიგეხვარებუნა, ალალას შეაფასათ სიტუაცია დო ჭკვერულ გადაწყვეტილება მიღათ.

რდათჷ თანდაბალ (იგავ. 11:2). ხანშა მიშულაწკუმა ართო, კოჩის თოლს დო ჸუჯის ოკორდუ დო კუნთეფ დო რეფლექსეფ ისლაბებ. მაგალთო, მუდგარენ ასაკიშ უკულ ბრელ მიოტალენს ნამთინე სპორტის, მუშენდა ორწყე, ნამდა ხანშა მიშულაშ უკულ უმოს მარტივო შილებე დეზიანას. თე პრინციპ შემლებუნა მეურინუათ მანქანაშ გილაჸუნაფას ხოლო. მიდგარენქ შილებე თანდაბლურო გეგნოჭყვიდას, მეტო ვეგედოხოდას რულს (იგავ. 22:3). თანდაბალ კოჩის ვართ შხვეფიშ აზრიშ მორჩქილაფა დო გიმორნაფა გუჭირდუ, მუჟამსით თინეფ ნერვიანენა თიშ გურშენ (ქეშუდარით 2 სამუელიშ 21:15–17).

კოჩიშ ზისხირქ ვეგგადვან (კან. 22:8). მანქანა მუზმათ ჯგირ რენ, თიზმათ უბედრობაშ მუმაღალარქ შილებე იჸუას, უსაფრთხოთ ვეგლეჸუნ-და. თიცალ ადამიან, მიდგას უკვე ვეშულებ მანქანაშ ჯგირო გილაჸუნაფა, მარა იშენით აგრძელენს რულიშ გეხუნას, რისკიშ თუდო გიორინუანს ქოთ მუშ დო ქოთ შხვეფიშ სიცოცხლეს. თეცალ შოფერქ შილებე თიცალ ავარიას ქუმოხვადას, ნამდა კოჩიშ სიცოცხლექ ქიგიადვას.

ვეფიქრათ, ნამდა რულს გეხუნა მიოტეთ-და, შხვეფიშ თოლს პატი გეიოლუნა. იეჰოვას მანგარო უჸორთ დო ორწყე თქვან თიცალ ჯგირ თვისებეფს, მუნერით რე მოკრძალება, თანდაბლობა დო შხვეფიშ ჯგირობუაშე ფიქრ. თინა პირობას გარზენა, ნამდა გუგამანგარენა დო გურშა ქელაიკინანა (ეს. 46:4). იეჰოვა დღას ვემგოტენა. ათეშენ, ქოთხით თის სიბრძნე დო ინონჭაფაშ უნარ თიშ გინოჭყვიდუაშ დროს, გაგრძელათ დო ვარ რულიშ გეხუნა.