სირჩინუექ ვემდაიღან ხიოლ

1, 2. მუჭო უჯინე იეჰოვა მუშ ართგურ ხანშამიშულირ მსახურეფს? (ფსალმ. 92:12–14; ქოძირით სურათ).

ᲐᲓᲐᲛᲘᲐᲜᲔᲤᲡ შხვადოშხვანერ რეაქცია უღუნა ხანშა მიშულაშე. ნამთინე ფიქრენს, ნამდა ასაკიშ მოძინაწკუმა ართო, უმოს პატი გიადვალუ. მარა ნამთინე ირფელს ორთჷ, ნამდა ხანქ ვეგიოდოხოდას. მაგალთო, მუჭო ჩე თუმას ქიმშახვილუანს დუდის დო, გიშასოფუნს თის, ნამდა მითინქ ვა ძირას. მარა მუდგანერო ვეცადანინ, სირჩინუე ვა გაჩერებენა.

² საინტერესო რე, ზეციერ მუმა მუჭო უჯინე მუშ ხანშამიშულირ მსახურეფს? (იგავ. 16:31). თინა თეცალეფს გოფალირ ჯალეფს ადარენს (წეკითხით ფსალმუნეფიშ 92:12–14). მუშენ რე თენა მანგარ ჯგირ შედარება? ხშირას ხანიერ ჯალეფ ართო გოპირელ დო ფურცელეფიშ გოფშა რე, მუთ მანგარო ასქვამენს თინეფს. მაგალთო, ართ-ართ თეცალ თოლშამალაფარ ჯა რე საკურა, ნამუთ იაპონიას უჩქჷ. ნამთინე ანთას წანერშე უმოს რე დო თიშმასქვამა ქორე, მეტ ეშე ვეჸი. თეშნერო, იეჰოვაშო მანგარ ძვირფასეფ რენა მუშ ხანშამიშულირ მსახურეფ. ღორონთ თინეფიშ ჩე თუმას ვარინ, ჯგირ თვისებეფს ორწყე დო ვეჭყოლიდუანს, მუნერ ართგურო დო მოთვინებათ ომსახურუნა თის წანეფიშ დინახალე.

3. ქიმიჸუნით მაგალით, მუჭო ირინუანდჷ იეჰოვა ხანშამიშულირეფს მუშ განზრახვაშ შეიოსრულებერო.

³ იეჰოვაშ თოლს სირჩინუე ადამიანს ფასის ვა უდინუანს.a თინა ხშირას ხანშამიშულირეფს ირინუანს მუშ განზრახვეფიშ შეიოსრულებერო. მაგალთო, სარა ხანშამიშულირ რდჷ, მუჟამსით იეჰოვაქ უწუ, ნამდა ბოშის გეიორჩქინანდ, ნამდგაშე გიშელენდ დიდ ერ დო მესია (დაბ. 17:15–19). მოსეს ხოლო ძალამ ხან უღუდ, მუჟამსით იეჰოვაქ დავალ ისრაელეფიშ ეგვიპტეშე გიშაჸუნაფა (გიშ. 7:6, 7). დო იეჰოვაქ მოხუცებულ მოციქულ იოანეს ბიბლიაშ ხუთ წიგნ ოჭარაფუ.

4. მუჭოთ იგავეფიშ 15:15-შე იძირე, მუქ შილებე მეხვარას ხანშამიშულირეფს სირთულეეფშა გარზებას? (ქოძირით სურათ).

⁴ მუჭო ასაკ აძინუნან თეშ, ხანშამიშულირეფ ბრელ პრობლემას ხვადუნა. ართ და ციგანებულო იჩიებ: „სირჩინუე ოლაჸაფე ამბე ვაიჩქუდან“. მარა ხიოლსb ვადინუანან-და, ხანშამიშულირეფს უჯგუშო შეიალებენა ქუგურზან თი სირთულეეფს, ნამუთ ორჩინელობას მოუღ (წეკითხით იგავეფიშ 15:15). თე სტატიას გუვარჩიენთ მუსხირენ პრაქტიკულ მხარეს, მუთ მეხვარებ ხანშამიშულირეფს, ვადინუან ხიოლ. თიშე ხოლო ქიფჩიებუთ, მუჭო შეულებუნა კრებას და დო ჯიმალეფს, მეხვარან ხანშამიშულირ თანაქრისტიანეფს. დუდშე მორთ ქიფჩუათ, მუშენ შილებე ვა რდასჷ ადვილ, ასაკშა მიშულაწკუმა ართო ხიოლ ვადინუე.

ᲛᲣᲨᲔᲜ ᲨᲘᲚᲔᲑᲔ ᲮᲐᲜᲨᲐ ᲛᲘᲨᲣᲚᲐᲥ ᲮᲘᲝᲚ ᲛᲘᲓᲐᲘᲦᲐᲜ?

5. მუშ გურშენ შილებე ხანშამიშულირეფს გურ უტირხუდან?

⁵ მუქ შილებე გოიტახან გურ? გურგოტახილ შილებე თიშ გურშენ რდათჷ, ნამდა ჯვეშო ორთუდითინ თი მუდგარენეფ ამდღა ვა გაკეთებენა. შილებე მიანატრუდათ თი დროს, მუჟამსით ახალგაზრდა რდითჷ დო ჯგირ ჯანმრთელობა გიღუდეს (ეკლ. 7:10). მაგალთო, ართ და, რუბი, იჩიებ: „დოქანცაფა მიჭირს დო ჭუეფ მიღუნ თიშ გურშენ, ნორმალურო ბარგ ხოლო ვემკმაქუნინე. ნასკიშ მოდვალა რენ თის ხოლო ძიუდოღურათ ვორთუქ. ხელეფს მაჭვჷ დო ართრიტიშ გურშენ კითეფ ვა მორგჷ. ათეშენ, აკაბცხა მუდგარენიშ კეთება ხოლო მანგარ ძნელ მაფჷ“. ართ ჯიმა ხოლო, ჰაროლდ, ნამუთ ბეთელს მსახურენდჷ, იჩიებ: „ჩქიმ დუდის ვა ფჩინებულენქ დო მინშა მანგარო მუმალე გურ, ჯვეშო ვორთუდინ თიცალეფ ამდღა ვა მაკეთებენ. ახალგაზრდობას მანგარ ენერგიულ ვორდჷ. მანგარო მიჸორდჷ ბეისბოლიშ ლაჸაფ. თიშმაჯგირას გიშმალედ ლაჸაფ, ნამდა ჩქიმდე ირო იჩიებუდეს, ბურთ ჰაროლდის ქიმეჩით დო მოგება ხეს მიკებუნანია. მარა ასე ლაჸაფ ვარინ, შურო ბურთ ქუმაჸოთინენო თინა ხოლო ვა მიჩქჷ“.

6. ა) ხოლო მუქ შილებე გურ გუტახას მოხუცებულეფს? ბ) მუ მეხვარებ ხანშამიშულირეფს თიშ გინოჭყვიდუას, მიოტუან დო ვარ რულიშ გეხუნა? (ქოძირით თე ჟურნალს მოჩამილ სტატია „მიოტებელ ხომ ვა მაფჷ რულიშ გეხუნა?“).

⁶ შილებე გურს თინა ხოლო გიტახუნდან, ნამდა შხვეფიშ მოხვარაშ უმშო უკვე ვემგკალუენა თქვან დუდშა. შილებე თეშ გურშენ მომვლელქ დეგესაჭირეს ვარდა ნამდგაინ სქუაშა გაჸუეს ოცხოვრებშა გინაულარქ. შილებე თინა ხოლო გიტახუნდან გურს, ნამდა ჭყანა ვაიღუნა ვარდა ჯვეშობურო თოლ ვაიჭკირუნან თიშ გურშენ რულშა ვეგგახუნინენა ვარდა თქვანით ვეგლგართენა, სო გოკონან თექ. მარა ვეგიჭყოლიდუათ, ნამდა იეჰოვაშ თოლს ჩქინ ფასის თინა ვეგნოჭყვიდუნს, მუსხით ვორგუთ ჩქინ დუდის, ხვალე ქუმაცხოვრებენა დო ვარ ვარდა მაშნა ქიგლმაჸუნინენა დო ვარ. იეჰოვას არჩქილე ჩქინ. თის უჩქჷ, მუჭო მიჸორა თინა დო ჩქინ და დო ჯიმალეფ. თენა რე თიშო არძაშ უმოს მნიშვნელოვან დო ვართ ხოლო თინა, მუშ კეთება შემლებუნა (1 სამ. 16:7).

7. მუშე ფიქრ მეხვარებ თინეფს, მიდგას თი აზრ უტახუნს გურს, ნამდა შილებე თე ქიანაშ ბოლოს ვა მაჭიშუან?

⁷ შილებე თი აზრ გაწუხენდან, ნამდა ეგება თე ქიანაშ მოსპუალას ვა მაჭიშუათ. მუ მიგეხვარებუნა, თეშე ქოფიქრენთ-და? ვაგგოჭყორდან, მუშენ უჯინე იეჰოვა მოთვინებათ თე ქიანაშ მოსპუალაშო დანიშნულ დროშ მოულას (ეს. 30:18). თიშ მოთვინება მილიონობით ადამიანს არზენს საშვალებას, გეჩინებაფუან იეჰოვა დო ქიდიჭყან თიშ მსახურება (2 პეტ. 3:9). თაშ ნამდა, ეგება არმაგედონ თქვან თოლით ვა ძირათინ თე აზრ გურს ქოიტახუნან-და, თიშე ქიფიქრით, მუსხი ადამიანქ შილებე გეჩინებაფუას იეჰოვა დო გინოსქიდას აღსასრულშახ. მის უჩქჷ, თინეფს შქას ეგება თქვან ოჯახიშ წევრეფქ ხოლო ქიჸუან.

8. მუ შილებე ოკეთებაფუას სირჩინუექ ვარდა ლახალაქ ხანშამიშულირეფს?

⁸ ვა უღჷ მნიშვნელობა, ახალგაზრდა ვორეთ დოვარ ხანშამიშულირ, მუჟამსით დუდის ჯგირო ვა ბგინაფლენთ ვარდა მუდგაინს მაჭვუნა, უმოსო შილებე თიცალ მუდგარენ ფთქუათ ვარდა ვაკეთათ, მუდგას უკულ იმნარღენთ (ეკლ. 7:7; იაკ. 3:2). მაგალთო, მუჟამსით ღორონთიშ ართგურ მსახურ, იობ, იტანჯებუდ, თიქ უდუფიქრებუო ქიდიჭყჷ ჩიება (იობ. 6:1–3). თეწკუმა ართო, ხანშამიშულირეფს შილებე თიცალ ლახალა უღუდან ვარდა თიცალ წამალეფს ღებულენდან, ნამდა არაგადინუაფუნა ვარდა აქიმინუაფუნა თიცალ მუდგარენ, მუდგას შხვა დროს ვაკეთენდეს. მარა, მუშო ოკო რაგად, სირჩინუე ვარდა ლახალა ვა მარზენა ჩქინ არასწორ საქციელიშ გამართლებაშ უფლებას. მუჟამსით გურს ქუგუჩანთ, ნამდა მუდგარენქ გლახათ მაჸუეს რაგადებულქ, ხელათ ოკო ქოფთქუათ ბოდიშ (მათ. 5:23, 24).

ᲛᲣ ᲝᲙᲝ ᲐᲙᲔᲗᲐᲗ, ᲜᲐᲛᲓᲐ ᲕᲐᲓᲘᲜᲣᲐᲗ ᲮᲘᲝᲚ?

9. მუშენ ოკო მიღათ შხვეფშე მოხვარა? (ქოძირით სურათეფ).

⁹ ქიმეჩით შხვეფს საშვალება, ქიმგეხვარან (გალ. 6:2). დუდშე შილებე თენა ადვილ ვა გაფუდან. ართ და, გრეტელ, იჩიებ: „მინშა მანგარო მიჭირს, შხვეფს მოხვარა ქოფთხუე, მუშენდა ფიფქრენქ, ნამდა თინეფს ოღალო გივანჯირუქ. დროქ დემესაჭირ, ნამდა აზროვნება დიფთირეკო დო გუტირხკო დუდის, ნამდა მოსაჭირუდ შხვეფიშ მოხვარა“. ვაგგოჭყორდან, მუჟამსით შხვეფს ქიმიხვარუანთ, ქიმეჩანთ საშვალებას, მიღან თი ხიოლ, ნამუთ შხვეფშა ჯგირიშ კეთებას მოუღ (საქ. 20:35). თეწკუმა ართო, თქვა ხოლო გურს ხიოლით გეიფშანა თიშ ძირაფა, მუჭო უჸორთ შხვეფს დო მუჭო გუგალუაფუნა დუდის.

10. მუშენ ოკო ვაგგოჭყორდან მარდულობაშ გიმოხანტუაქ? (ქოძირით სურათ).

¹⁰ გეგმოხანტით მარდულობა (კოლ. 3:15; 1 თეს. 5:18). მუჟამსით შხვეფ მუდგარენ ჯგირს მირთუნა, შილებე გურს მანგარო ვაფასენდათ, მარა მოჭყორდუდან მადლობაშ რაგად. ართ გოძიცა დო მადლობაშ რაგადით ხოლო შილებე ვოძირუათ ჩქინ მეგობრეფს, ნამდა მარდულ ვაფუთ დო ვაფასენთ თი ირფელს, მუდგას ჩქინო ორთუნა. ჩქინ და, ლეა, მით ბეთელს ხანშამიშულირეფს ულუანს, იჩიებ: „ართ და, მიდგას ულუანქ, ირიათო ჭიჭე ქარღადშა გემჭარანს მარდულობაშ სიტყვეფს. მართალ რე, თინა გვალო მუსხირენ სიტყვას გიოჭარანს, მარა ჩქიმო მანგარ ძვირფას რე დო მანგარო მიჸორს თე წერილეფიშ კითხირ. გურს ხიოლით ემიფშანს თიშ რჩქინა, ნამდა თინა აფასენს ჩქიმ მოხვარას“.

11. მუჭო შეილებუნა შხვეფიშ მოხვარა? (ქოძირით სურათ).

¹¹ ქეცადით, შხვეფს ქიმეხვარათ. თქვან დრო დო ენერგიაშ შხვეფიშ მახვარებელო გიმორნაფას ქეცადებუთ-და, ნაკლებო გაფიქრუაფუდან იჸი თქვან პრობლემეფშე. ართ აფრიკულ იგავ ხანშამიშულირეფს სიბრძნეთ ეფშა წიგნეფით გოჭკადილ ბიბლიოთეკას ადარენს. მარა თე წიგნეფ თეშ ქიძვენუ დო ხალხის თიშ კითხირიშ საშვალება ვაღვენუნ-და, თევრეშე მითინს მუთუნ ვა დაგურე. ხანშამიშულირეფ, თქვა „ცოცხალ ბიბლიოთეკა“ რეთჷ, მარა ახალგაზრდეფს ვეჩით დო თქვან რჩქინა ვეგნოჩით-და, თინეფს თქვანდე მუთუნ ვა დაგურენა. თაშ ნამდა, თქვა გეგნოდგით პირველ ნაბიჯ, ქუდუსვით კითხვეფ დო ქუმურჩქილეთ. თქვან გამოცდილებაშე ქეჩით თინეფს, მუშენ რე იეჰოვაშ ნორმეფით ცხოვრება არძაშ უჯგუშ გადაწყვეტილება დო მუშენ მოუღანს თენა თინეფს ბედნერობას. ახალგაზრდეფშა გურიშ ელაკინა დო თინეფიშ გამანგარება თქვა ხოლო ეგოფშანა ხიოლით (ფსალმ. 71:18).

12. მუჭოთ ესაიაშ 46:4-შე იძირე, მუ სიტყვას არზენს იეჰოვა ხანშამიშულირეფს? (ქოძირით სურათ).

¹² ქილოცით, ნამდა იეჰოვაქ ძალა ქიმერჩან. მინშა შილებე დუდის ფიზიკურო ვარდა ემოციურო მანგარ სუსტას გინაფლენდათ. თეცალ დროს ვაგგოჭყორდან, ნამდა იეჰოვა „დღას ვა შურდუ დო ძალა ველიებ“ (ეს. 40:28). ართ-ართ, მუდგაშოთ თინა მუშ ულიებ ძალას ირინუანს, ხანშამიშულირეფიშ გამანგარება რე (ეს. 40:29–31). ღორონთ პირობას არზენს თინეფს, ნამდა ქიმეხვარებ (წეკითხით ესაიაშ 46:4). თინა ირო ასრულენს მუშ სიტყვას (იეს. 23:14; ეს. 55:10, 11). მუჟამსით ქილოცენთ დო ქოძირუნთ, მუჭო მიგეხვარებუნა იეჰოვა, უმოსო ქიგინანთ თიშ ჸოროფას დო თენა ხიოლს მოიღანა.

13. მუჭოთ 2 კორინთელეფიშ 4:16–18-ს ჭარჷ, მუ ოკო ფშუდან? (ქოძირით სურათ).

¹³ ირო ქუგაშინით დუდის, ნამდა კინ ახალგაზრდეფ დო ჯანმრთელეფ იჸით. მუჟამსით ვა მოჭყორდუნა, ნამდა ჩქინ მდგომარეობა დროებით რე, უმოს ადვილ მაფუნა სირთულეეფიშ გინოღალა. მუჭოთ ბიბლია მირაგადუნა, მომავალს მითინ ვერჩინუდას იჸი დო მითინ ვედელახებ (იობ. 33:25; ეს. 33:24). თაშ ნამდა, არძაშ უჯგუშ პერიოდ დიო ხოლო წოხოლე გელუნან თეშე ფიქრის შეულებ ხიოლ მოიღან (წეკითხით 2 კორინთელეფიშ 4:16–18). მორთ ასე თიშე ქიფჩუათ, მუშ კეთება შეულებუნა შხვეფს ხანშამიშულირეფიშ მახვარებელო.

ᲛᲣᲨ ᲙᲔᲗᲔᲑᲐ ᲨᲔᲣᲚᲔᲑᲣᲜᲐ ᲨᲮᲕᲔᲤᲡ?

14. მუშენ რე მნიშვნელოვან, მივაკითხუათ დო დურეკათ ხანშამიშულირეფს?

¹⁴ ირიათო ქიმიაკითხეთ დო დურეკით ხანშამიშულირ და დო ჯიმალეფს (ებრ. 13:16). ხანშამიშულირეფ ხშირას დუდის ხვალე გინაფლენა. ართ ჯიმა, კამილ, ნამდგას ჸუდეშე ვეგმართე, იჩიებ: „მთელ დღას ჸუდეს მილვოხექ, ათეშენ მინშა მანგარო მოპწყინდუქ. დუდის გალიას მითოხვილირ რჩინ ლომცალო ბგინაფლენქ, ათეშენ მინშა გურ მანგარო ეკმეჭირებ“. მუჟამსით ხანშამიშულირ და დო ჯიმალეფს მივაკითხანთ, თეშნერო ვოძირანთ, ნამდა ძვირფასეფ რენა ჩქინო დო მანგარო მიჸორა. ალბათ არძას ნობღვენა თიცალ სიტუაცია, მუჟამსით მილამუდეს ჩქინ ხანშამიშულირ თანაქრისტიანშა რეკუა ვარდა მეკითხირ, მარა ვეგშამირთეს. მარჩქილენა, ნამდა არძას ქიანაშ საქმე მისოფუანა. ათეშენ, ჯგირ იჸი, დეფიფქრათ, მუ მიმეხვარებუნა, პირველ ადგილს „უმოს მნიშვნელოვან“ საქმეეფ ქიგვორინუათ, მუდგაშათ ხანშამიშულირ და დო ჯიმალეფიშ მოკითხირ ხოლო მიშურს (ფილ. 1:10). მაგალთო, შეილებუნა კალენდარს ჩანიშვნა გაკეთათ, ნამუთ ქუგგოშინანა თქვან კრებაშ ხანშამიშულირ თანაქრისტიანშა მეჭარუას ვარდა რეკუას. თეწკუმა ართო, შეილებუნა გვალო ქიმიაკითხუათ თინეფს დო თეშო კონკრეტულ დღა ქიმირჩქინათ, ნამდა თიშ იმენდო ვა რდათჷ, სიტუაცია მუჟამ ეკინწყუაფ.

15. მუშ კეთება შეულებუნა ახალგაზრდეფს დო ხანშამიშულირეფს ართო?

¹⁵ ახალგაზრდა ქორეთ-და, შილებე თიშე ფიქრენდათ, მუ ოკო ეჩუათ ვარდა მუ ოკო აკეთათ ხანშამიშულირეფწკუმა ართო. მარა თეშე ბრელ ვეწუხათ, უბრალოთ ქიმეგობრით თინეფწკუმა (იგავ. 17:17). შეილებუნა კრებაშახ ვარდა კრებაშ უკულ ქიმერთათ დო ქუდურაგადუათ თინეფს. შილებე ქოკითხათ, ნამ ბიბლიურ მუხლ უჸორა არძაშ უმოსო ვარდა მუნეფიშ ბაღანობაშე მუ ოძიცე მომენტეფ გაშინენა. შეილებუნა ქუწუათ, ნამდა ართო ქუჯინათ JW მაუწყებლობას. შილებე ხანშამიშულირეფშა პრაქტიკულო ხოლო მუგახვარებუან. მაგალთო, ტელეფონს მუთუნ პრობლემა ქოუღუნან-და, შეილებუნა ქიმეხვარათ ვარდა ახალ პუბლიკაციეფ გეგნუჭარათ. ართ და, კეროლ, იჩიებ: „ხანშამიშულირეფწკუმა ხოლო შეილებუნა თიცალ მუდგარენეფ აკეთათ, მუდგაშ კეთება თქვა გიჸორა. ხანშამიშულირ ვორექინ იშ გურშენ, მა ხოლო მოკო, იფსიამოვნე ცხოვრებათ. მაგალთო, მანგარო მიჸორს ოჸიდირალეფშა ულა, გალე, სოდგაინ მეგობრეფწკუმა ართო ჭკუმუა დო ბუნებაშა ულა“. ართ და, მაირა ხოლო მირაგადუნა: „ჩქიმ ართ მეგობარ 90 წანერ რე. ჩქი მინშა ართო უჯინეთ კინოეფს, ართო იბძიცანთ დო თიცალ ჯგირ დროს ვატარენთ ართო, გვალო მოჭყორდუ, 57 წანა აშამძუნან. მუჟამსით მუდგაინ გამჭირდუნა, ხელათ ართიანს ელვაკითხანთ რჩევას“.

16. მუშენ იჸუაფ ჯგირ, ხანშამიშულირეფს ექიმშა მიდვაჸუნათ?

¹⁶ მიდაჸუნით თინეფს ექიმშა. ხანშამიშულირ თანაქრისტიანიშ საავადმყოფოშა მანქანათ ჸუნაფაწკუმა ართო, შეილებუნა თის ექიმშა ხოლო გემნაჸუნათ დო ქოძირათ, მუჭო ოქცუნა დო ყურადღებას ხომ ვარკენა (ეს. 1:17). შეილებუნა ქიმეხვარათ თის ექიმიშ დანიშნულებაშ ინოჭარუას. ართ ხანშამიშულირ და, რუთ, იჩიებ: „მუჟამსით ექიმშა ხვალე მეურქ, თინა ჩქიმ ნარაგადის სერიოზულო ვა ღებულენს დო მირაგად, სი ფიქრენქ თაშ ვარა, სინამდვილეს მუთუნ ვა გოჭირუნია. მარა, მუჟამსით მიდგაინ მეპჸუნს დო ხვალე ვა ვორექ, ექიმეფ გვალო შხვანერო მოქცუნა. მანგარ მარდულ ვაფუქ თი და დო ჯიმალეფს, მით დროს გიშამრთუნა დო ექიმშა მეპჸუნა“.

17. მუშ კეთება შეილებუნა, ნამდა ხანშამიშულირეფწკუმა ართო ქიმსახურათ?

¹⁷ ქიმსახურით თინეფწკუმა ართო. ნამთინე ხანშამიშულირს შილებე ფიზიკურო ვეშულებუდას კარდოკარ მსახურებაშა ულა. მარა შეილებუნა სტენდით ქიმსახურათ თეცალ და დო ჯიმალეფწკუმა ართო. შილებე სკამ ხოლო მალეღათ თიშო, ნამდა სტენდიშ გოხოლუას დოხუნაქ ქეშიალებუას. თეს გეძინელ, შეილებუნა ბიბლიაშ გურაფაშა მიდეჸუნათ თინა ვარდა გვალო თიშ ჸუდეს ჩატარათ. შილებე უხუცესეფქ გეგნოჭყვიდან, სამქადაგებლოეფ ხანშამიშულირეფიშ ჸუდეს ჩატარან, ნამდა თინეფს უმოს ადვილქ ქაჸუან მსახურებაშა ულაქ. იეჰოვა მანგარო აფასენს თი ირფელს, მუდგას ხანშამიშულირ და დო ჯიმალეფშო ვორთუთ (იგავ. 3:27; რომ. 12:10).

18. მუს გუვარჩიენთ უკულიან სტატიას?

¹⁸ თე სტატიაქ ხოლო ართშა ქუგმოშინეს, ნამდა იეჰოვაშო მანგარ ძვირფასეფ რენა დო მანგარო უჸორს ხანშამიშულირეფ. მუშო ოკო რაგად, თინეფს ჩქი ხოლო მანგარო ვაფასენთ. ორჩინელობა ვა რე ადვილ, მარა იეჰოვაშ მოხვარათ იშენით შეილებუნა ვადინუათ ხიოლ (ფსალმ. 37:25). მანგარ გურიშ ემაკინალ რე თიშ რჩქინა, ნამდა არძაშ უჯგუშ პერიოდ მიკულირ ვა გაფუნან, წიმი გელუნა. მუშ რაგად შემლებუნა თინეფშე, მით ხანშამიშულირ ოჯახიშ წევრის, ბაღანას ვარდა დალახებურ მეგობარს ულუანა? მუ მიგეხვარებუნა, ვადინუათ ხიოლ თეცალ სიტუაციას? უკულიან სტატიას თე საკითხშე ქიფჩიებუთ.