1925 – ოშ წანაშ წოხოლე

ᲥᲘᲫᲘᲠ, ᲜᲐᲛᲓᲐ ᲦᲝᲠᲝᲜᲗᲘᲨ ᲮᲐᲚᲮᲘᲡ ᲓᲘᲝ ᲝᲯᲘᲜᲔ ᲐᲤᲣᲓ

ბრელ ბიბლიაშ მარკვიებელ ელუდ, ნამდა 1925 წანას დედამიწა სამოთხეთ გეგნირთუდ. მუშენ ჯერდეს თაშ? ჯიმა ალბერტ შრედერ, მით უკულ ხელმძღვანელ საბჭოს მსახურენდჷ, იჩიებუდ: „ბჯერდეს, ნამდა 1925 წანას ცხებულეფ ზეცაშა მიდეშეს დო შხვა ართგურ მსახურეფ, მუნერეფით რდესჷ აბრაამ დო დავით, გეთელებუდეს დო უხელმძღვანელენდეს დედამიწას“. ათეშენ, მუჟამსით თექ ვა მოხვად, ნამთინე და დო ჯიმას გურქ გოუტირხჷ (იგავ. 13:12).

თიშ უმკუჯინუო, ნამდა თინეფიშ იმენდეფქ გემტყუნ, ბიბლიაშ მარკვიებელეფ იშენით შურ დო გურით ქადაგენდეს დო უმოსო დო უმოსო ხვადუდეს, ნამდა იეჰოვაშ გურშენ ქადაგება არძაშ უმოს მნიშვნელოვან საქმე ოკო რდუკო. ქიგიფშინათ, მაგალთო, მუჭო ირინუანდეს თინეფ რადიოს, ნამდა უმოს ადამიანშა ქიმიღესკო ჭეშმარიტება.

ᲐᲮᲐᲚ ᲠᲐᲓᲘᲝᲡᲐᲓᲒᲣᲠᲔᲤ

1924 წანას რადიოსადგურ WBBR-იშ შენებაშ უკულ, ბიბლიაშ მარკვიებელეფქ ხოლო ართ რადიოსადგურ აშენეს, თე შემთხვევას უკვე ილინოისიᲨ შტატის, ჩიკაგოშ ხოლოს. თე ახალ რადიოსადგურს ჯოხოდ WORD (სიტყვა). რალფ ლეფლერ, მით თიშ მშენებლობას მუშენდჷ, იჩიებუდ, ნამდა თე რადიომაუწყებლობას ზოთონჯიშ ჩხურ სერეფს ხალხ მანგარ შორ ადგილეფშე ხოლო ურჩქილედ. მაგალთო, ართ ოჯახიქ, 5 000 კილომეტრიშ მაშორას, ალასკას მურჩქილუ ართ-ართ პირველ რადიომაუწყებლობას. მორჩქილაფაშ უკულ, თინეფქ მადლობაშ წერილ უჭარეს თი ადამიანეფს, მიდგაქ მამზადეს თე გურიშემაკინალ სულიერ პროგრამა.

1925 წანაშ 1 დეკემბერიშ „გინაჯინალ კოშკის“ ენწყუმილ რდჷ, მუშენ შეულებუდ ხალხის თე რადიომაუწყებლობაᲡ მანგარ შორ ადგილეფს ხოლო ქურჩქილუკო. თექ ჭარუდ: „WORD-იშ რადიოსადგურ ართ-ართ ძალიერ რადიოსადგურ რე შეერთებულ შტატეფს“. თე რადიოს ჯგირ მიღება უღუდ ამერიკაშ ქოთ აღმოსავლეთ დო ქოთ დასავლეთ ნაწილეფს, დო ქოთ კუბას დო ქოთ ალასკაშ ჩრდილოეთ ნაწილს. ბრელქ, მიდგას თეიშახ დღას ვა აფუდ ჭეშმარიტება მორჩქილაფირ, თე რადიომაუწყებლობაშ მორჩქილაფაშ უკულ დეინტერეს.

თიმ პერიოდის, ბიბლიაშ მარკვიებელეფ ოცადუდეს, კანადას ხოლო გეგმირინუესკო რადიო სახიოლო ამბეშ გაცხადებელო. 1924 წანას თინეფქ აშენეს რადიოსადგურ CHUC სასკატუნს, სასკაჩევანიშ პროვინციას. თენა რდჷ ართ-ართ პირველ რადიოსადგურ კანადას, ნამუთ რელიგიურ მიზნეფშო გიმირინუაფუდ. 1925 წანას საჭიროქ იჸუ, რადიოსადგურ უმოს დიდ ადგილშა გეგნიღესკო. ათეშენ, ორგანიზაციაქ რადიოშ სამაუწყებლო სტუდიეფ დროებით გეგნიღ სასკატუნიშ ჯვეშ თეატრშა, ნამუთ თინეფქ იჸიდეს დო გეგნაკეთეს.

თე რადიოსადგურიშ ჭყოლოფათ სასკაჩევანიშ პროვინციაშ ჭიჭე ქალაქეფს დო მიკოლაფირ ადგილეფს მახორუ ხალხშა ხოლო ქიმერთჷ სახიოლო ამბექ. მაგალთო, ართ მიკოლაფირ ქალაქის მახორუ ოსურქ რადიომაუწყებლობაშ რჩქილაშ უკულ ბიბლიურ ლიტერატურა მითხუ. ჯიმა ჯორჯ ნეიშ იშინანდჷ, ნამდა თე ოსურ თეშ ნოხვეწებუე მოხვარას, თიშა პუბლიკაციაშ „წმინდა წერილიშ გიმორკვიება“ არძა ტომ ქიმუჯღონუნა. ჭიჭე ხანშა თე ოსურქ სამეფოშ ცნობაშ ქადაგება შხვა ადგილეფს ხოლო ქიდიჭყჷ.

ᲣᲛᲝᲡᲘᲨ ᲒᲐᲒᲔᲑᲐ

1925 წანაშ 1 მარტიშ „გინაჯინალ კოშკის“ მოჩამილ რდჷ მანგარ მნიშვნელოვან ინფორმაცია სათაურით „ერიშ დაბადება“. მუშენ რდჷ თე სტატია თეცალ განსაკუთრებულ? მუდგარენ პერიოდის ბიბლიაშ მარკვიებელეფს წანდეს, ნამდა სატანას უღუდ ორგანიზაცია, ნამდგაშა მიშეშეს უბადო სულიერ ქმნილებეფ ზეცას დო დედამიწას – რელიგიეფ, კომერციულ სამყარო დო პოლიტიკურ ძალეფ. მარა, თე სტატიაშ საშვალებათ, „ართგურ დო გონიერ მონაქ“ ქუგაგებაფუ საჯიმალოს, ნამდა იეჰოვას ხოლო უღჷ ორგანიზაცია, ნამუთ გიშართილ რე სატანაშ ორგანიზაციაშე დო თიშ წინააღმდეგ მეურს (მათ. 24:45). თეწკუმა ართო, გონიერ მონაქ თინა ხოლო ენწყჷ, ნამდა ზეცას ეტახილ ჩხუპიშ შედეგო, ნამდგაქ 1914 წანას მოხვად, სატანა დო თიშ დემონეფქ დედამიწაშა იჸუეს გითოჸოთამილქ (გიმოცხ. 12:7–9).

ნამთინეს გაუჭირდჷ თე ახალ გაგებაშ მეღებაქ. ათეშენ, თე სტატიას თეცალ მუდგარენ ჭარუდ: «თინეფ, მით „გინაჯინალ კოშკის“ კითხულენა, თაქ მუთ ჭარუდუნ თის ვათანხმუნან-და, ელუჩანთ, ქიმითვინან, მიენდან იეჰოვას დო ართგურო გაგრძელან თიშ მსახურება».

მარა, ართ ბრიტანელ ჯიმა, ტომ ეირი, ნამუთ წიგნეფიშ გილმაღალარო მსახურენდჷ (ასე ჯოხონა პიონერეფ), იშინანდჷ, მუ რეაქცია უღუდ ბიბლიაშ მარკვიებელეფიშ უმენტაშის თე ცვლილებაშე: „და დო ჯიმალეფს მანგარო ახიოლეს გიმოცხადებაშ მა-12 დუდიშ ენწყუმაშ გაგებაქ. თიშ უკულ, მუთ ქიგებგით, ნამდა ღორონთიშ სამეფო ზეცას უკვე დამყარებულ რდჷ, შურ მოლუდეს შხვეფს ხოლო ქუგვოგებაფეთკო თე ამბე. ათეშენ, თექ გინმოჭყვიდირაფუეს, უმოს იფქადაგითკო, დო უჯგუშო ქუმოძირუეს, მუ დიდებულ მუდგარენეფს გაკეთენდ იეჰოვა მომავალს“.

ᲦᲝᲠᲝᲜᲗᲘᲨ ᲮᲐᲚᲮ ᲒᲔᲑᲣᲚᲔᲜᲡ, ᲜᲐᲛᲓᲐ ᲝᲙᲝ ᲘᲸᲣᲐᲜ ᲘᲔᲰᲝᲕᲐᲨ ᲛᲝᲬᲛᲔᲔᲤᲥ

ამდღა იეჰოვაშ მოწმეეფშო ესაიაშ 43:10 ჯგირო ნაჩინებ მუხლ რე. თექ ჭარჷ: „თქვა რეთჷ ჩქიმ მოწმეეფ, – იჩიებ იეჰოვა, – ჩქიმ მსახურ, ნამუთ გიშებგორ“. საინტერესო რე, ნამდა 1925 წანაშახ თე მუხლ ჩქინ პუბლიკაციეფს ნაკლებო რდჷ გიმორნაფილ. მარა 1925 წანაშ „გინაჯინალ კოშკიშ“ 11 ჟურნალს მიშჷ ესაიაშ 43:10 დო 12-იშ გარჩიება.

1925 წანაშ არგუსოშ ბოლოს ინდიანაპოლისის (ინდიანაშ შტატ) ბიბლიაშ მარკვიებელეფქ გეკიშაყარეს რეგიონულ კონგრესის. კონგრესიშ პროგრამეფს ჭარუდ ჯიმა ჯოზეფ რუტერფორდიშ სიტყვა: „თე კონგრესის თიშენ იფშაყარუთ, ნამდა . . . ჩქინ უფალშე მეღებულ ძალაშ ჭყოლოფათ უმოს მონდომათ დუვართათ ქადაგებაშ საქმეს“. 8 დღაშ დინახალე კონგრესიშ დამსწრეეფს ირო ელუჩანდეს, ნამდა არძა საშვალება გეგმირინუესკო იეჰოვაშ სახელიშ დამოწმებელო.

29 არგუსოს, საბატონს, ჯიმა რუტერფორდიქ გიშართჷ მოხსენებათ, სოდეთ მარჩქილეეფს ელუჩ, გაცხადესკო იეჰოვაშ სახელ, დო ქაძირუ, მუსხით მნიშვნელოვან რდჷ იეჰოვაშ სახელიშ გურშენ დამოწმება. თიქ თქუ: «იეჰოვა მუშ ხალხის ურაგად: „თქვა რეთჷ ჩქიმ მოწმეეფ . . . დო მა ღორონთ ვორექ“. თეშ უკულ იეჰოვა თინეფს არგამა მითითებას არზენს: „ნიშან ქიგურინეთ ხალხეფს!“. დედამიწას ღორონთიშ ხალხიშ მეტ მითინს ვეშულებ, „ნიშან ქიგურინუას ხალხეფს“. ხვალე თინეფს უღუნა ღორონთიშ წმინდა შურ დო თინეფ რენა თიშ მოწმეეფ» (ეს. 43:12; 62:10).

მოხსენებაშ უკულ ჯიმა რუტერფორდიქ აუდიტორიას წაუკითხჷ რეზოლუცია „იმენდიშ ცნობა“, ნამდგას მთელ აუდიტორიაქ დეთანხმჷ. თე რეზოლუციას რაგადებულ რდჷ, ნამდა ხვალე ღორონთიშ სამეფო მოუღანდ ადამიანეფს „ნამდვილ მშვიდობას, ჯანმრთელობას, ჯგირ ცხოვრებას, თავისუფლებას დო ულიებ ბედნერობას“. თე რეზოლუციაქ უკულ მუსხირენ ნინაშა ითარგმნჷ დო იბეშტუდ, მუჭოთ ბუკლეტ, ნამდა მსახურებას გეგმირინუესკო. თე ბუკლეტიშ სოდგარენ 40 მილიონ ეგზემპლარქ გევრცელ.

ბიბლიაშ მარკვიებელეფს ხოლო მუსხირენ წანას ვეგედვალუნა სახელ „იეჰოვაშ მოწმეეფ“. მარა თინეფ უმოსო დო უმოსო ენანჭუდეს, ნამდა თინეფიშ პასუხიშმგებლობა იეჰოვაშ გურშენ დამოწმება რდჷ.

ᲙᲘᲜ ᲛᲔᲙᲘᲗᲮᲘᲠᲔᲤᲘᲨ ᲓᲝᲭᲧᲐᲤᲐ

რახანს მთელ მსოფლიოს ბიბლიაშ მარკვიებელეფიშ რიცხვ იძინანდჷ, ჯიმალეფქ თინეფს ელუჩეს, კინ ქიმიაკითხუესკო თი ხალხის, მიდგაქ აიშახ სახიოლო ამბეშ მიმართ ინტერეს გიმირჩქინ. თიშ უკულ, მუთ გეთუ ბუკლეტიშ „იმენდიშ ცნობა“ გავრცელებაშ კამპანიაქ, „ბიულეტენს“a თეცალ მითითება ჭარუდ: «კინ ქიმიაკითხეთ თი ხალხის, მიდგას დუტეთ ბუკლეტ „იმენდიშ ცნობა“».

1925 წანაშ იანარიშ „ბიულეტენს“ ტეხასიშ შტატის მახორუ ართ ბიბლიაშ მარკვიებელიშ სიტყვეფ ჭარუდ: „მანგარო მიკვენა, ნამდა მუსხირენშა დამუშებულ რენ თი ადგილეფს უჯგუშ შედეგეფ მიღუნა, ვინემ თექ, სოდეთ პირველო მეურთ. მაგალთო, ჩქინ ტერიტორიას ართ ჭიჭე ქალაქ ბოლო ვით წანაშ დინახალე ხუთშა რდჷ დამუშებულ . . . მარა ამარდე თე ტერიტორია დიაჩქიმ დო ართ დაქ ხოლო ართშა დამუშუეს დო დღას ვა გუვრცელებუნან თისხი წიგნ გავრცელეს“.

ართ წიგნეფიშ გილმაღალარ პანამაშე ჭარუნდჷ: „ბრელქ, მიდგაქ პირველ მეულას ვა მომრჩქილუ, მაჟია დო მასმა მეულაშ დროს გვალო შხვანერო ქუდოფხვად. თე წანას მსახურებაშ დროს უმენტაშო თინეფშა მიფშჷ, მიდგაწკუმა თეიშახ ხოლო ვორდჷ, დო ნამთინე შემთხვევას თეს მანგარ ჯგირ შედეგიქ მაჸუნ“.

ᲛᲣ ᲔᲚᲣᲓᲔᲡ ᲑᲘᲑᲚᲘᲐᲨ ᲛᲐᲠᲙᲕᲘᲔᲑᲔᲚᲔᲤᲡ ᲣᲙᲣᲚᲘᲐᲜ ᲬᲐᲜᲐᲡ

1925 წანაშ ბოლოს ჯიმა რუტერფორდიქ პიონერეფს მეჭარ წერილ, სოდეთ ენწყჷ, მუქ იკეთინ ქადაგებაშ საქმეშო თიმ წანას დო მუ იჸიდ ოკეთებელ უკულიან წანას. თიქ თქუ: „ულირ წანას თქვა გიღუდეს პატი, გურშა ელუკინითკო ბრელს, მით გურდამონკებულ რდჷ. თექ თქვა ხოლო დიდ ხიოლ მოიღეს . . . 1926 წანას გაღვენუნა ბრელ საშვალება, დამოწმათ ღორონთიშ დო თიშ სამეფოშ გურშენ დო ქაძირუათ ხალხის, მი ომსახურ სინამდვილეს ღორონთის . . . მორთ ართო გუვაგრძელათ ჩქინ ღორონთიშ დო მეფეშ განდიდება“.

1925 წანაშ ბოლოს ჯიმალეფქ გეგნოჭყვიდეს, გოუძინესკო ბრუკლინიშ ბეთელიშ შენობეფს. 1926 წანას ქიდიჭყაფუდ არძაშ უმოს დიდ სამშენებლო პროექტ, მუნერით ორგანიზაციას თეიშახ დღას ვა უკეთებ.