კითხვა დო პასუხ

იგავეფიშ 30:18, 19-ს მაჭარალ იჩიებ, ნამდა აკვირენს „ქომოლკოჩიშ შარა ძღაბჸურე“. მუს ნიშნენს თენა სინამდვილეს?

ბრელს, თინეფ შქას ნამთინე მარკვიებელს ხოლო, უჭირს ენწყუმა, მუს შილებე ნიშნენდას თე სიტყვეფ. „ახალ ქიანაშ თარგმანს“ თე მონაკვეთ თეშნერო რე გინოჩამილ: „სუმ მუდგარენ მაკვირენს დო ოთხ მუდგარენქ ვაგმაგინ: არწივიშ შარა ცას, გვერიშ შარა კირდეს, გემიშ შარა შქაგურ ზღვას დო ქომოლკოჩიშ შარა ძღაბჸურე“ (იგავ. 30:18, 19).

აიშახ ფიფქრენდით, ნამდა სიტყვეფ „ქომოლკოჩიშ შარა ძღაბჸურე“ მუდგარენ გლახას ნიშნენდჷ. მუშენ ფიფქრენდით თაშ? მუშენდა ჟინ მუხლეფს მოშინაფილ რე გლახა მუდგარენეფ, მუთ დღას ვეჩიებ: „დასაბაღ რე“ (იგავ. 30:15, 16). დო მა-20 მუხლის მოშინაფილ რე უზნეო ოსურ, ნამუთ იჩიებ, მუთუნ ვა დამშებუნია. ათეშენ ფიფქრენდით, ნამდა მეფურინუნსინ ფერ არწივცალო, კირდეს მეხოხუნსინ ფერ გვერცალო დო ზღვას მენჩურუნსინ ფერ გემცალო თე ქომოლკოჩ ხოლო კვალს ვეტენდუნ თეშ მოქმედენდჷ. ათეშენ ფიფქრენდით, ნამდა სიტყვეფ „ქომოლკოჩიშ შარა ძღაბჸურე“ მუდგარენ გლახას ნიშნენდჷ დო ეჭარუნდჷ გითოღალირ ბოშის, ნამუთ თეშ ოჩილითუანდჷ ალალ ძღაბის, ნამდა თის აზრშა ვა მართედ.

მარა რე მიზეზ, მუდგაშ გურშენ შემლებუნა ფთქუათ, ნამდა თე მუხლეფ მუდგარენ გლახას ვარინ, ჯგირს ეჭარუნს. სინამდვილეს, თე სიტყვეფიშ მაჭარალ უბრალოთ გიმოხანტუნს გაკვირებას თი ირფელიშ გურშენ, მუდგას უკულ გიმოკოროცხუნს.

ებრაულ ხეშნაჭარეფ ხოლო ხუჯის უკინენს თი აზრის, ნამდა თე მუხლის მუთუნ გლახაშე ვემურს ჩიება. „ჯვეშ აღთქმაშ თეოლოგიურ ლექსიკონს“ ჭარჷ, ნამდა იგავეფიშ 30:18-ს მოშინაფილ სიტყვა „მაკვირენს“ ეჭარუნს „მუდგარენ განსაკუთრებულს, სასწაულ ჯგირს“.

ამერიკაშ ჰარვარდიშ უნივერსიტეტიშ პროფესორ თოი კროუფორდიშ აზრით ხოლო ბიბლიაშ თე მონაკვეთის მუთუნ გლახაშე ვემურს ჩიება. თინა იჩიებ: „თაქ მაჭარალ უბრალოთ ოცად, ქუმოძირუან, მუსხით გასაკვირ დო სარკო რე თი მუდგარენეფ, მუთ გიმოკოროცხჷ“.

ათეშენ, ლოგიკურ რე იფიფქრათ, ნამდა იგავეფიშ 30:18, 19 ეჭარუნს სასწაულ დო გასაკვირ მუდგარენეფს. თე სიტყვეფიშ მაჭარალცალო, ჩქი ხოლო მაკვირენა, მუჭო გილაფურინუნს არწივ თეშმამაღალას, კუჩხეფ ვა უღუნ ფერ გვერ მუჭო მეხოხუნს კირდეს თეშმაჩქარას, მუჭო მენჩურუნს ქვერსემ გემ ზღვას დო მუჭო ეჸოროფებ ძღაბ დო ბოშის ართმაჟია დო მუნერ ბედნერეფ რენა ართო.