იეჰოვაშ ჭყოლოფათ, „ირდიხას გოფაბლით, სოდეთ დუმორგუეს“

თე ჩილ დო ქომონჯიქ 1979 წანას მიკორთჷ „სკოლა გალაად“. წანეფიშ დინახალე თინეფ, თაშ ქოფთქუათინ, ბრელშა „გინორგეს“ ართ დიხაშე მაჟიაშა – დანიშნეს ბრელ შხვადოშხვა ადგილს. მაგალთო, მსახურენდეს ირანს, ზაირის, ტანზანიას, მავრიკის დო მიანმარს. გალაადიშ ინსტრუქტორიშ, ჯეკ რედფორდიშ, მოჩამილ თე რჩევაქ ბრელშა გიმადირთჷ თინეფს დანიშნულებეფიშ თირუაშ დროს. მორთ ქობძირათ, მუჭო.

დიო თინა ქიმეჩით, მუჭო გეგით ჭეშმარიტება.

მეთ: მაჟია მსოფლიო ომიშ დროს მუაჩქიმ პოლონეთის ცხოვრენდჷ დო კათოლიკურ ეკლესიას ბრელ ტყურა ახვილუ. მარა იშენ ხშირას იჩიებუდ, სოდგაინ შხვადო აუცილებერო იჸუაფუნია ჭეშმარიტ რელიგია. საბოლათ მა ხოლო დებრწმუნ, ნამდა თინა მართალ ჸოფე. ბრელ მეორად წიგნის პჸიდულენდჷ დო ართ-ართ წიგნიშ სათაურქ მანგარო დუმაინტერეს. თენა რდჷ „მარადიულ სიცოცხლეშა მიმაჸუნაფალ ჭეშმარიტება“. თე წიგნ ართ სერიშ დინახალე წეპკითხჷ დო ოჭმარეს უკვე დარწმუნებულ ვორდჷ, ნამდა ჭეშმარიტებას ქიმვოგორე.

1972 წანაშ აპრილშე მოჸუნაფილ იეჰოვაშ მოწმეეფიშ ბრელ შხვა პუბლიკაცია ხოლო წეპკითხჷ დო ჩქიმ კითხვეფშე პასუხეფ მიბღჷ. დუდის იესოშ იგავს მოშინაფილ ვაჭარცალო ბგინაფლენდჷ, მიდგაქ ართ მარგალიტის ქიმიოგორუ დო მუთ ქაპალუდ ირფელ გეგმოჩ თიშ ოჸიდეთ. მა ხოლო „ჭეშმარიტებაშ მარგალიტიშ“ ოჸიდეთ, თაშ ქოფთქუათინ, „გეგმოფჩჷ“ ჩქიმ გეგმეფ – ვარია ქოფთქვი უნივერსიტეტის გურაფაშე დო ექიმობაშე (მათ. 13:45, 46). 1972 წანაშ 10 დეკემბერს დიმნათ.

ართ წანაშ დინახალე ჩქიმ მშობლეფ დო ჩქიმ უკლაშ ჯიმალეფქ ხოლო ქიდიჭყეს ბიბლიაშ გურაფა დო დინათეს. 1973 წანაშ კვირკვეს სრულ დროთ მსახურება ქიდიპჭყჷ. ჩქინ კრებას ბრელ მონდომებულ პიონერ რდჷ, თინეფ შქას რდჷ ართ სქვამ დო სულიერო მოწიფულ და, ენ-კეტრინ. ჩქი ქიმეჸოროფეს ართიანქ დო 1975 წანას დეფქორწინით. ოთხ წანას ფცხოვრენდით შვედეთიშ ართ სქვამ ქალაქ შტრემსუნდის, სოდეთ ჯგირო ირჩქილუაფუდეს სამეფოშ ცნობას.

ენ-კეტრინ: მუაჩქიმქ ჭეშმარიტება სტოკჰოლმს უნივერსიტეტის გურაფას ათენდუნ თეშ გეგჷ. მა თე დროს სუმ თუთერ ვორდჷ, მარა თის იშენით გილაპჸუნდჷ კრებეფშა დო მსახურებაშა. დიაჩქიმს თენა ქიანაშის ვა მოწონდჷ დო ოცადუდ დამტკიცუკო, ნამდა იეჰოვაშ მოწმეეფ ჩირთუდეს. მარა თექ ვეგშურთჷ, ათეშენ ჭიჭე ხანშა მუქ ხოლო დინათ. მა 13 წანერ ვორდჷ, მუჟამსით იმნათ, დო 16 წანერ ვორდინ თეშ პიონერობა ქიდიპჭყჷ. თიშ უკულ მუთ უმეოს ბმსახურენდჷ, სოდეთ მაქადაგებელეფიშ საჭიროება რდჷ, სპეციალურ პიონერო დებნიშნჷ.

დაქორწინებაშ უკულ მა დო მეთიქ მუსხირენ ადამიანს მივეხვარით ჭეშმარიტებაშ გაგებას, მუდგაქ დიდ ხიოლ მომიღეს. თინეფ შქას რდჷ ართ ახალგაზრდა ძღაბ, მაივორ, მიდგაქ ვარია თქუ სპორტულ კარიერაშე დო ჩქიმ უკლაშ დაწკუმა ართო პიონერო მსახურენდჷ. თინეფქ 1984 წანას „გალაად“ გემკორთეს დო ასე ეკვადორს მისიონერეფო მსახურენა.

მისიონერულ მსახურებას მეღებულ შხვადოშხვა დანიშნულებეფიშ დროს, მუჭო მეჸუნდით რჩევას: „გოფალ თექ, სოდეთ დუგორგუანა“?

მეთ: ჩქი, თაშ ქოფთქუათინ, ხშირას „გინმორგუანდეს“ შხვადოშხვა ადგილშა – ხშირას მათირუდეს დანიშნულებეფ. მარა ვოცადუდით, ირნერო მივაჸუნითკო იესოშ მაგალითის, განსაკუთრებულო თიშ თანდაბლობას (კოლ. 2:6, 7). მაგალთო, ვეველუდით, ნამდა ადგილობრივ თანაქრისტიანეფ აშო დომხუჯუანდეს. თეშ გინაწონს, ვოცადუდით, ქიგებგითკო თინეფიშ აზროვნება, კულტურა დო ქინვანჭითკო, მუს მუშენ ორთუდეს. მუთ უმოსო მეპჸუნდით იესოშ მაგალითის, თით უმოსო ბგინაფლენდით, ნამდა „წყარპიჯის დორგუაფილ ჯაცალო“ ვორდით დო „ფაბლუნდით“ ირდიხას, სოდეთ დუმანიშნენდეს (ფსალმ. 1:2, 3).

ენ-კეტრინ: გინორგუალაშ უკულ ჯას ჩხანაშ სიტიბა ხოლო ოსაჭირ. იეჰოვაქ ბრელშა მოძირეს, ნამდა თინა ჩხანაცალ რდჷ ჩქინო (ფსალმ. 84:11). თიქ მუჩეს მოჸოროფე და დო ჯიმალეფ. მაგალთო, თეირანს (ირან) ჩქინ ჭიჭე კრებაშ და დო ჯიმალეფ ზუსტას თიცალ სტუმარიშ მოჸოროფეეფ რდესჷ, მუნერით ბიბლიურ დროს უჩქუდეს. მანგარო მოხიოლუდეს თექ დოსქილადა, მარა 1980 წანაშ კვირკვეს თექ იეჰოვაშ მოწმეეფიშ საქმიანობა აკრძალეს დო მიწუეს, ნამდა 48 საათშა ოკო დიპტეთკო თე ქიანა. თეშ უკულ დუმანიშნეს აფრიკას, ზაირის (ნამდგას ასე ჯოხო კონგოშ რესპუბლიკა).

მუჟამსით დუდშე გებგჷ, ნამდა აფრიკას დუმანიშნეს, ნგარაქ გემიოლ. აფრიკაშე ხვალე თინა მიჩქუდ, ნამდა თექ ბრელ შხვადოშხვა ლახალა რდჷ დო გვერეფ ხედეს, ათეშენ მაშქურინ. მარა ჩქინ ჟირ ხოლოშიან მეგობარქ, მით ბრელ ხანს მსახურენდეს თექ, მიწუეს: „ვა გაშქურინას. თექ დიო ვა ჸოფექინ თიშენ ფიქრენქ თაშ, ვარა მანგარო ქიგეჸოროფებ თექიანობა“. ქოთ თაშ ქიჸუ. თექ მანგარ მოჸოროფე დო გემუან და დო ჯიმალეფ ცხოვრენდეს. ამშვ წანაშ უკულ, მუჟამსით აკრძალვეფიშ გურშენ თექიანობაქ ხოლო მაჸუეს დატებელქ, გურს მაძიცინედ, მუშენდა აიშახ ვა მოკოდ თექ ულა დო ასე იეჰოვას თის ფთხინდჷ, ნამდა თექ დოსქილადაშ საშვალება ქომუჩესკო.

მუ კურთხევეფ მიღით იეჰოვაშ მსახურებას თეზმა წანაშ დინახალე?

მეთ: ვეშემლებ, ვეგიფშინე, მუ სასიამოვნო ურთიერთობეფ მიღუდეს შხვა მისიონერეფწკუმა ხოლო, მით შხვადოშხვა ქიანაშე რდესჷ მოულირ. მინშა თითოს 20 ბიბლიაშ გურაფა მიღუდეს, მუდგას მანგარ ხიოლ მოუღუდ ჩქინდა. დღას ვაგმოჭყორდუ თინა ხოლო, მუნერ ჸოროფათ ღებულენდეს აფრიკელ და დო ჯიმალეფ სტუმარეფს. მუჟამსით ზაირის კრებეფს იბძირუანდით, და დო ჯიმალეფ შეულებუდესინ თიშე უმოსის ხოლო ორთუდეს ჩქინო. ჩქინ ფურგუნს, სოდეთ ფცხოვრენდით, ალურინუანდით თინეფიშ ჸუდეეფს დო თინეფ ირფელს ორთუდეს, ნამდა მუთ მოსაჭირუდესინ მუთუნქ ვემმოკორდესკო (2 კორ. 8:3). ჩქინო განსაკუთრებულ მომენტ რდჷ, მუჟამსით მა დო ენ-კეტრინ დღაშ ბოლოს ართო ქუდობზოჯუნდით, ართიანს ვეჩიებუდით მთელ დღაშ ამბეეფს დო მადლობას ურაგადუდით იეჰოვას, ნამდა ჩქინწკუმა რდჷ.

ენ-კეტრინ: ჩქიმო მანგარ დიდ ხიოლ მოუღუდ შხვადოშხვა ეროვნებაშ და დო ჯიმალეფწკუმა ცხოვრებას ხოლო. გეფჩინებაფეთ შხვადოშხვა კულტურა დო დიბგურეთ თიცალ ნინეფ, მუნერით რე სპარსულ, ფრანგულ, ლუგანდა დო სუაჰილი. ბრელს მივეხვარით იესოშ მოწაფეთ გინორთას დო ქუმაშუეს მეგობრეფქ, მიდგაწკუმა ართო გაერთიანებულო ვომსახურუდით იეჰოვას (სოფ. 3:9).

თეწკუმა ართო, ქობძირით, მუნერ სასწაულ რე იეჰოვაშ გუნაჭყეფუეფ. არძა შემთხვევას, მუჟამსით ახალ დანიშნულებაშა მიფშით, დუდის თეშ ბგინაფლენდით, ითამ იეჰოვას ახალ მოგზაურობაშა მეპჸუნდით დო თინა ჩქინ გიდ რდჷ. იეჰოვაქ თიცალ მუდგარენეფ ქუდმოგურუეს დო ქუმოძირუეს, მუთ ჩქინით დღას ვეშმალებედეს.

მუ სირთულეეფს შეხვადით დო მუჭო გინიღით თინეფ?

მეთ: წანეფიშ დინახალე შხვადოშხვა ტროპიკულ ლახალაქ ქუმაღოლეს, თინეფ შქას მალარიაქ, დო ენ-კეტრინს მუსხირენშა სასწრაფოთ დესაჭირ ოპერაციაშ კეთებაქ. თეწკუმა ართო, პწუხენდით ჩქინ ხანშამიშულირ მშობლეფშე ხოლო. მანგარ მარდულ ვორექ ჩქიმ ჯიმაშ დო ენ-კეტრინიშ და დო ჯიმალეფიშ ხოლო, მიდგაქ მუნეფიშ დუდშა გეჭოფეს თინეფიშ მიკოლუაფა დო თეს მოთვინებათ, ჸოროფათ დო ხიოლით ორთუდეს (1 ტიმ. 5:4). მართალ რე, შორშე მუთ შემლებუდესინ ირფელს ვორთუდით, მარა იშენით მოწუხუდეს, ნამდა მოკოდესინ თიზმა ვა მაკეთებედეს.

ენ-კეტრინ: 1983 წანას ზაირის ქოლერაქ ქუმაღოლ. ექიმქ მეთის უწუ: „ოჯინეთ ვა რე საქმე, სასწრაფოთ მიდეჸუნ თე ქიანაშე!“. ქოთ მაჟია დღას სატვირთო თვითმფრინავს მითვოხედით, მუშენდა თიშ მეტ მუთუნ ვემიშ შვედეთშა.

მეთ: ჩხე ჩილამურით იმნგარდით, მუშენდა ფიფქრენდით, ნამდა ანწ ვა მამსახურებედეს მისიონერეფო. მართალ რე, ექიმ უჯგუშობაშ იმენდის ვა მარზენდეს, მარა ენ-კეტრინქ გეგშართჷ. ართ წანაშა შემალებუეს კინ დიბრთითკო ზაირიშა, ლუბუმბაშიშ სუაჰილი ნინაშა მორაგადე ჭიჭე კრებაშა.

ენ-კეტრინ: ლუბუმბაშის ვორდითინ თეშ, ქიგებგჷ, ნამდა ორსულო ვორდჷ, მარა ბაღანაქ მემდინეს. მართალ რე, თეიშახ ვამლამუდეს სქუალეფიშ ერჩქინა, მარა ჩქინ ჭიჭეშ ღურაქ მანგარ გინაღალარქ მაჸუეს. თე რთულ დროს იეჰოვაქ მანგარო მაკურთხეს; დღას ვა ნობღვენან თიზმა ბიბლიაშ გურაფა დიპჭყით. წანმოწანაშე უმოს ნაკლებ დროშ დინახალე კრებაშ მაუწყებელეფიშ რიცხვიქ 35-შე 70-შახ მიძინ დო შეხვალამეფშა დამსწრეეფიშ რიცხვიქ – 40-შე 220-შახ. მთელ ყურადღება მსახურებაშა მაფუდეს გინოღალირ. იეჰოვაქ აკურთხჷ ჩქინ მონდომა, მუდგაქ მანგარო ელამკინეს გურშა. მარა იშენით ხშირას ფიფქრენთ დო იფჩიებუთ ჩქინ ჭიჭეშე. შურ მოლუნა თი დროშა, მუჟამსით იეჰოვა საბოლათ ჩამთხინუანა თე გურჭუას.

მეთ: ართ მომენტის ენ-კეტრინქ მანგარო გეგნოშურდჷ დო ძალეფქ ქეშელუ. მა ხოლო ნაწლავიშ მანთხა სტადიაშ კიბოშ დიაგნოზ ქიგემშქვეს დო სერიოზულ ოპერაცია მოსაჭირუდ. მარა ამდღა ჯგირო ვორექ დო ენ-კეტრინ ხოლო ნამ შეულებუნ ირფელს ორთჷ იეჰოვაშო.

ქიმეფხვადით, ნამდა სირთულეეფს ხვალე ჩქი ვა ვობრძოლუდით. 1994 წანას რუანდას მოხვალამირ გენოციდიშ უკულ ლტოლვილეფიშ ბანაკეფს ქიბძირეთ ჩქინ მეგობრეფ. თინეფიშ რწმენაშ, მოთვინებაშ დო თიშ ძირაფაქ, თეცალ რთულ მდგომარეობაშ უმკუჯინუო, იშენით მუნერ ჸოროფათ ღებულენდეს სტუმარეფს, ქუდმოგურუეს, ნამდა იეჰოვას უღჷ ძალა, ნებისმიერ სირთულე გინმოღალაფუან (ფსალმ. 55:22).

ენ-კეტრინ: ხოლო ართ გლახა ამბექ მოფხვადეს 2007 წანას, უგანდას. თექ ფილიალიშ მეძღვინუას ვოსწრუდით დო პროგრამაშ თებაშ უკულ მისიონერეფ დო ბეთელელეფ, 25 კოჩ, ნაირობიშა, კენიაშა იბრთუდით. კენიაშ საზღვარშა მეულაშახ, დიდ მანქანაქ ჩქინ ზოლშა გეგნორთჷ დო ქუმარაგვეს. შოფერ დო 5 კოჩიქ ადგილს დოღურ დო ართ დაქ – საავადმყოფოს. შურ მოლუნა თი დროშა, მუჟამსით კინ ქეშეფხვადუთ თინეფს (იობ. 14:13–15).

მართალ რე, ჭიე-ჭიეთ ფიზიკურ ტრავმეფშე დოფსქიდით, მარა შხვეფცალო, მა დო მეთის ხოლო, პოსტტრავმულ სტრესშე გიშულაქ გამჭირდეს. სერით პანიკურ შეტევეფ გიშმოკურცხინუანდჷ დო თიცალ გრძნობა მიღუდ, ითამ გურიშ შეტევა მუმალედ. სიტყვეფით ვეგნმაჩინე თქვანდა, მუ დღას ვორდჷ. მარა თეცალ დროს ლოცვა დო თი მუხლეფიშ კითხირ, ნამუთ არძაშ უმოსო მიჸორდეს, მამშვიდენდეს. ექიმშა ხოლო ქიმებრთით, მუდგაქ მანგარო მიმეხვარეს. ასე ბრელით უჯგუშო ვორეთ. იეჰოვას ფთხინთჷ, ქიმმეხვარან, ქეშმალებუან თინეფშა გურიშ ელაკინაქ, მიდგას თეცალ ემოციურ პრობლემეფ უღუნა.

მუჟამსით იჩიებუდით, მუჭო ურზუდით სირთულეეფს, თქვითჷ, ნამდა იეჰოვას თეშ გილაპჸუნდით, ითამ კვერცხ უკინებუდუკო ხესია. თენა მუს ნიშნენს?

მეთ: თენა სუაჰილურ გამოთქმა რე. მუჭოთ კოჩის კვერცხ მეუღ ფრთხილას, თეშ, ნამდა ვა გუტირხას, იეჰოვა ხოლო თეშნერო ფთხილანდეს დო ალამირდეს ირ დავალებაშ შესრულებაშ დროს. აუცილებერ დღას ვა მორკუდეს; აუცილებერ ვარ, აუცილებერშე უმოს ხოლო მიღუდეს. ხოლო ართ, მუთ იეჰოვაშ ჸოროფა დო ალარნას მოგინაფუანდეს, თიშ ძირაფა რდჷ, მუჭო ზრუნენდჷ ჩქინდა ხელმძღვანელ საბჭო.

ენ-კეტრინ: მოკო, გიფშინე ართ შემთხვევა, მუჟამსით იეჰოვაშ თეცალ ალარნა იბგინით. ართშა დომრეკეს დო მიწუეს, ნამდა შვედეთის მუაჩქიმ საავადმყოფოშა რდჷ გინოჸუნაფილ დო მანგარ გლახათ რდჷ. მეთ ახალგიშნაულა რდჷ მალარიაშე დო ბილეთეფიშ ოჸიდეთ ფარა ვა მიღუდეს. ათეშენ გეგნოპჭყვიდით, მანქანა გეგმოფჩითკო. მარა თე ზარს ხოლო ჟირ ზარქ ქიგიაჸუნ. პირველო დორეკ ართ ჩილ დო ქომონჯიქ, ნამდგას ჩქინ ამბე ქუგუგებ დო ოკოდეს, ართ ბილეთიშ ფარა გეგნომგესკო. უკულ ართ ხანშამიშულირ დაქ ხოლო დომრეკეს, ნამუთ ყუთის ინნოშაყარუე ფარას, ნამდა მიდგაინ ქიგიახვილუდ-და, ქიმეხვარუკო. იეჰოვაქ მუსხირენ წუთშა ქიგედგჷ ირფელს დუდ (ებრ. 13:6).

მუ დუგოგურუეს 50-წანიან სრულ დროთ მსახურებაქ?

ენ-კეტრინ: ქიდიბგურე, ნამდა ჩქინ ძალა „მშვიდას რინას დო იეჰოვაშა მენდებას“ რე. იეჰოვას ქიმვენდებუთ-და, თინა ჩქინ მანგიორო იბრძოლენს (ეს. 30:15; 2 მატ. 20:15, 17). იეჰოვაშ მსახურებაშა მთელ შურ დო გურიშ ენოდვალაქ თიცალ კურთხევეფ მომღეს, მუნერით შხვანერო დღას ვემმაღებედეს.

მეთ: არძაშ უმოს მთავარ, მუთ დიბგურე, თინა რე, ნამდა ქიმვენდე იეჰოვას ირნერ სიტუაციას დო ქუჯინე, მუჭო მიმეხვარებ (ფსალმ. 37:5). თის დღას ვა გუმტყუნებ ჩქიმდა იმენდ. ასე მიანმარიშ ბეთელს ბმსახურენთ დო ამდღარშახ ვორწყეთ, მუჭო ალამრენა თინა.

იმენდ მიღუნა, ნამდა ბრელ ახალგაზრდა, მიდგას მსახურებას უმოსიშ კეთება ოკო, მუშ დუდშა გეგმოცადუნს იეჰოვაშ თეცალ ჸოროფას. ბჯერა, თაშ იჸუაფ. ოღონც თინეფქ საშვალება ოკო ქიმეჩან თის, ქიმეხვარას, „გოფალან თექ, სოდეთ თინა დარგუანს“.