ირიათო ბგურაფლენთ ჩქინ „დიდებულ მასწავლებერშე“

ᲛᲨᲝᲑᲚᲔᲤᲘᲨ ᲛᲐᲒᲐᲚᲘᲗ

1950-იან წანეფიშ ბოლოს ჩქიმ მშობლეფქ იტალიაშე კინდერსლიშა გეგნორთეს, ნამუთ კანადაშ პროვინციას, სასკაჩევანს, რე. თექ ენულაშე მალას თინეფქ ჭეშმარიტება ქიგეგეს, ნამდგაქ ჩქინ ცხოვრებას პირველ ადგილ ქიდეკინ. ბაღანობას ოჯახწკუმა ართო თიზმა ხანს გილეფშჷ მსახურებას, ნამდა მინშა ფციგანენქ, ბრუო წანერ ვორდინ თეშ დიპჭყჷ-მაქ დამხმარე პიონერობა.

ჩქიმ მშობლეფს საშვალება ვა უღუდეს, მარა იეჰოვაშ გურშენ ბრელ მსხვერპლშა მიშეს დო თეშნერო ჯგირ მაგალით მუჩეს სქუალეფს. მაგალთო, 1963 წანას თინეფქ ბრელ მუდგარენ გიმოჩეს საერთაშორისო კონგრესშა ოულარო, ნამუთ კალიფორნიაშ შტატის, ქალაქ პასადინას იტარებუდ (აშშ). 1972 წანას ფცხოვრენდითინ თი ადგილშე სოდგარენ 1 000 კილომეტრიშ მაშორაშა, ქალაქ ტრეილშა გეგნობრთით (ბრიტანეთიშ კოლუმბია, კანადა). თექ იტალიურ ნინაშა მორაგადე ხალხ ცხოვრენდჷ დო მაქადაგებელეფიშ საჭიროება რდჷ. მუაჩქიმ დიდ მაღაზიას მუშენდჷ. თინა ონწყუნდჷ დო ულუანდჷ თექიანობას. თის სამუშას ბრელშა მიარზის უჯგუშ ადგილ, მარა ირო ვარია უწუ, მუშენდა ვაკოდ, სულიერ საქმეეფს ეცილუკო.

მანგარ მარდულ ვაფუქ მშობლეფს, ნამდა მა დო ჩქიმ და დო ჯიმალეფს თეცალ ჯგირ მაგალით დომტუეს. თინეფიშით დიჭყჷ ჩქიმ თეოკრატიულ მომზადებაქ. ჩქიმ მშობლეფქ ბრელ მუდგარენ დუმოგურუეს, თინეფ შქას თიცალ მუდგარენეფ, მუთ ამდღარ დღაშახ ვა გოპჭყოლად. მაგალთო თინა, ნამდა ღორონთიშ სამეფოს პირველ ადგილს ქიგვორინუანქ-და, იეჰოვა ირო ქიზრუნენს ჩქიმდე (მათ. 6:33).

ᲡᲠᲣᲚ ᲓᲠᲝᲗ ᲛᲡᲐᲮᲣᲠᲔᲑᲐᲨ ᲓᲝᲭᲧᲐᲤᲐ

1980 წანას დეფქორწინ ართ სქვამ დაშა, დებიშა, მიდგას სულიერ მიზნეფ უღუდ. ჩქი სრულ დროთ მსახურებაშ დოჭყაფა მოკოდეს. დებიქ ჩქინ დაქორწინებაშე სუმ თუთაშა ქიდიჭყჷ პიონერო მსახურება. ართ წანაშა ჭიჭე კრებაშა გეგნობრთით, სოდეთ საჭიროება რდჷ, დო მა ხოლო ქიდიპჭყჷ პიონერობა.

ჭიჭე ხანშა ქიმეფხვადით, ნამდა ხიოლქ მემდინეს დო გეგნოპჭყვიდით, შხვადო გეგნობრთითკო. მარა დიო რაიონულ ზედამხედველს ქუდურაგადეთ თეშ გურშენ. თიქ გემუანო, მარა ალალას მიწუეს: „პრობლემა თქვან დამოკიდებულება რე, მუშენდა მთელ ყურადღება გლახაშა გაფუნა გინოღალირ. ჯგირ მხარეეფიშ ძირაფას ქეცადებუთ-და, აუცილებერო ქოძირუნთ“. თე რჩევა მართალო მოსაჭირუდეს (ფსალმ. 141:5). ხეთეშე ქიმვაჸუნით რაიონულიშ რჩევას დო მალას ქიმეფხვადით, ნამდა მართალო ბრელ ჯგირ მხარეშ ძირაფა შემლებუდეს. მაგალთო, ჯგირ რდჷ თინა, ნამდა კრებას ბრელს ოკოდ, უმოს გაკეთუკო იეჰოვაშო, თინეფ შქას ბაღანეფს დო დალეფს, მიდგაშ ქომონჯეფ ვა რდესჷ იეჰოვაშ მოწმეეფ. თენა მნიშვნელოვან გაკვეთილ რდჷ ჩქინო. ქიდიბგურეთ, ნამდა ირიათო ჯგირ მხარეეფიშ ძირაფას ვეცადითკო დო მიღუდესკო იეჰოვაშ იმენდ, ნამდა თინა გეგშასწორენდჷ რთულ სიტუაციეფს (მიქ. 7:7). შედეგო ხიოლ ხოლო დიბრთინეთ დო სიტუაციაქ ხოლო გეგშენწყუ.

პირველ პიონერულ სკოლას თიცალ მასწავლებერეფ პჸუნდეს, მით შხვადოშხვა ქიანას რდესჷ ნამსახურებ. თინეფ მოძირანდეს თექ გინოღალირ სურათეფს დო მეჩიებუდეს, მუ სირთულეეფ დო კურთხევეფ უღუდეს თე ქიანეფს მსახურებაშ დროს, მუდგაქ ჩქი ხოლო მომკორინუეს მისიონერო მსახურება. ათეშენ, გეგნოპჭყვიდით, თენა მიზანო მიღუდესკო.

თე მიზანს ქიმვოჭირინეთკონ თიშენ, 1984 წანას გეგნობრთით კვებეკშა, სოდეთ ფრანგულო იჩიებუდეს. თე პროვინცია ჩქინდე 4 000 კილომეტრიშ მაშორას რდჷ. თენა ნიშნენდჷ, ნამდა გვალო ახალ კულტურაშა მაჸიდეს მიორჩქვანალ დო ახალ ნინა მაჸიდეს დაგურაფალ. ხოლო ართ პრობლემა თინა რდჷ, ნამდა ეკონომიკურო მიჭირდეს. ართშა ართ ფერმერს ფთხითჷ, ნამდა მუშ დიხას მოსავალიშ ეჭოფუაშ უკულ დოსქილადირ კარტოფილს გეფშაყარანდით. ჭეხანს თეთ მემღუდეს დუდ. დები ოცადუდ, კარტოფილ შხვადოშხვანერო გაკეთუკო. სირთულეეფიშ უმკუჯინუო, ვოცადუდით, ხიოლით გუვაგრძელითკო მსახურება. თეწკუმა ართო, ვორწყედით, მუჭო ზრუნენდჷ იეჰოვა ჩქინდე (ფსალმ. 64:10).

ართ დღას, შურო ვეველუდითინ თეშ, კანადაშ ბეთელშე დომრეკეს დო თექ მემწვის. ჩქი გალაადიშ ბლანკ მაფუდეს შევსებულ, ათეშენ თექ ქოთ მახიოლეს დო ქოთ გურ პჭყორდუდეს, მარა იშენით დევეთანხმით თე მოწვევას. მუჟამსით ბეთელშა ქიმებრთით, ფილიალიშ კომიტეტიშ ართ-ართ წევრის, ჯიმა კენეთ ლიტლის პკითხით: „მუ ფქიმინათ, გალაადშა ქიმემწვიეს-და?“. თიქ მიწუეს: „დიო ქუმორთას მოწვევაქ დო თეშე უკულ ქიფიფქრათ“.

გვალო ართ მარაშა მა დო დების ქოთ ქუმომირთეს გალაადიშ მოწვევაქ, ათეშენ გადაწყვეტილებაშ წოხოლე ქიგებდირთით. ჯიმა კენეთიქ მიწუეს: „ნამდგა ვეგშეგორათინ, ართ დღას იშენით იფიქრენთ, ნოტე მაჟია გეგშამგორუდკოვა. ნამთინ ვა რე ართიანშე ნაკლებ, იეჰოვა ჟირხოლო გადაწყვეტილებას აკურთხენს“. მა დო დებიქ მიდაბრთით გალაადშა დო წანეფიშ დინახალე ვორწყედით, მუნერ სიმართლე მიწუეს ჯიმა კენეთიქ. ხშირას ურაგადუდით თიშ სიტყვეფს თინეფს, მით ჩქინცალო გადაწყვეტილებაშ წოხოლე გერდეს.

ᲛᲘᲡᲘᲝᲜᲔᲠᲣᲚ ᲛᲡᲐᲮᲣᲠᲔᲑᲐ

მანგარო მოხიოლუდეს, ნამდა გალაადიშ 83-ა კლასიშ 24 სტუდენტ შქას ვორდით. გურაფა 1987 წანაშ აპრილს დიპჭყით ნიუ-იორკის, ბრუკლინს. ძირითადო მოგურუანდეს ჯიმა იულისიზ გლას დო ჯეკ რედფორდ. ხუთ თუთაქ ხელათ გამკოფურინ დო გურაფა გუვათეთ 1987 წანაშ 6 სექტემბერს. ჯონ დო მერი გუდეფწკუმა ართო დუმანიშნეს ჰაიტის.

ჰაიტის მისიონერეფ 1962 წანაშ უკულ ვა მსახურენდეს, თიშ უკულ, მუთ თე წანას თინეფს ქიანა ქუდატებაფუეს. გალაადიშ თებაშე სუმ მარაშა გენობრთით ჰაიტიშა, სოდეთ დებნიშნით ჭიჭე კრებას, ნამუთ გვალამ ადგილს რდჷ. თექ 35 მაუწყებელ მსახურენდჷ. თე დროს ახალგაზრდეფ ვორდით დო ქიანაშ გამოცდილება ვა მიღუდეს. მისიონერეფიშ ჸუდეს ხვალე მა დო დები ფცხოვრენდით. თექიან მახორუეფს მანგარო უჭირდეს დო უმენტაშის კითხირ ხოლო ვა უჩქუდ. თექ მისიონერულ მსახურებაშ დაჭყაფუს თიცალ მუდგარენეფ მიბძირეთ, მუნერით რე სამოქალაქო არეულობა, სახელმწიფო გადატრიალება, დაჩხირმონტებულ ბარიკადეფ დო ციკლონეფ.

ქიანაშ დიბგურეთ თი და დო ჯიმალეფშე, მით ხიოლით ურზუდეს თე ირფელს. ბრელს მანგარ გაჭირებულ ცხოვრება უღუდ, მარა თინეფ იშენით ვადინუანდეს იეჰოვაშ ჸოროფას დო აგრძელენდეს მსახურებას. ართ ხანშამიშულირ დას კითხირ ვა უჩქუდ, მარა 150 მუხლ აფუდ დაზეპირებულ. თექიან მდგომარეობაშ გინმაჯინუ ხოლო უმოსო მოკოდეს, სახიოლო ამბე ქუქადაგითკო ხალხის დო ქუგვოგებაფეთკო, ნამდა ხვალე ღორონთიშ სამეფო მაგვარენს ადამიანეფიშ პრობლემეფს. მანგარო მოხიოლუნა, ნამდა ნამთინექ, მიდგას ახალ ინულირეფ ვორდითინ თეშ დუჭყით ბიბლიაშ გურაფა, პიონერო, სპეციალურ პიონერო დო უხუცესო დენიშნჷ.

ჰაიტის ქეშეფხვად ართ მორმონ მისიონერს, ტრევორს, დო ჩქი მუსხირენშა მუმაჩეს საშვალებაქ, ბიბლიაშ გურშენ ქიფჩითკო. წანეფიშ უკულ, შურო ვეველუდინ თეშ, თიშე წერილ მიბღჷ, სოდეთ პჭარუნდჷ: „ანწიან რაიონულ კონგრესის იმნათუქ. მოკო, ჰაიტიშა დიბრთე დო სპეციალურ პიონერო იბმსახურე თი ტერიტორიას, სოდეთ აიშახ მორმონ მისიონერ ვორდჷ“. თიქ ქოთ თაშ გაკეთ დო თექ მუშ ოსურწკუმა ართო ბრელ წანას მსახურენდჷ.

ᲔᲕᲠᲝᲞᲐ ᲓᲝ ᲣᲙᲣᲚ ᲐᲤᲠᲘᲙᲐ

ევროპას თიცალ ადგილს დუმანიშნეს, სოდეთ ჭიე-ჭიეთ აკრძალვეფ ირკენდჷ. 1992 წანას გენობრთით სლოვენიაშ ქალაქ ლუბლიანაშა, თი ადგილიშ ხოლოს, სოდეთ ჩქიმ მშობლეფქ ირდეს, ონდო იტალიაშა გინიშესკო. ჯვეშ იუგოსლავიაშ ტერიტორიას დიო ხოლო ჩხუპ რდჷ. თე ტერიტორიას სამქადაგებლო საქმეს ზედამხედველენდჷ ავსტრიაშ ფილიალ, ნამუთ ვენას რდჷ, ნამდგაწკუმა თანამშრომლენდჷ ჟირ ოფის: ართ რდჷ ხორვატიაშ ქალაქ ზაგრებს დო მაჟია – სერბეთიშ ქალაქ ბელგრადის. თიმ დროშე მოჸუნაფილ თი ქიანეფს, ნამუთ იუგოსლავიაშა მიშეშ, ანწ მუშ ფილიალ აღვენუდ.

სლოვენიაშა გინულა ნიშნენდჷ, ნამდა კინ ახალ ნინა ოკო დიბგურეთკო დო ახალ კულტურას მივარჩქვანითკო. თექიანეფ ხშირას იჩიებუდეს, სლოვენიურ ძნელ დაგურაფალ რენია დო თენა ქოთ თაშ რდჷ. მანგარო მოხიოლუდეს თი ართგურ და დო ჯიმალეფიშ ძირაფა, მით ხეთეშე მეჸუნდეს ორგანიზაციაშე მეღებულ ცვლილებეფს დო თიშ ძირაფა ხოლო, მუჭო ღებულენდეს თინეფ კურთხევეფს იეჰოვაშე. ხოლო ართშა ქობძირით, ნამდა იეჰოვა ირიათო მუშ დროს გიშანწყუნს სიტუაციას დო თეს ჸოროფათ ორთჷ. აიშახ ნაგურეფუქ მიმეხვარეს, ქუგურზითკო თი სირთულეეფს, ნამდგას შეფხვადით თე ქიანას დო თექ ხოლო ბრელ მუდგარენ ქიდიბგურეთ.

მარა წოხოლე უმოს ცვლილებეფ მელუდეს. 2000 წანას გეგნომიჸუნეს დასავლეთ აფრიკაშა, კოტ-დ’ იუვარშა. უკულ 2002 წანაშ ნოემბერს, სამოქალაქო არეულობაშ გურშენ ჩქინ ევაკუაციაქ მოხვად დო გეგნომიჸუნეს სიერა-ლეონეშა. თექ ხოლო 11 წანიან სამოქალაქო ომ ახალ ნათებ რდჷ. მანგარ ძნელქ მაჸუეს კოტ-დ’ იუვარიშ თეშმამალას დოტებაქ, მარა მეღებულ გამოცდილებაქ მიმეხვარეს, თექ ვემდამიღესკო ხიოლ.

თექ ხალხ მანგარ ჯგირო ირჩქილუაფუდ ჭეშმარიტებას, ათეშენ ჩქი მთელ ყურადღება ქადაგებაშ საქმეშა დო თი მოჸოროფე და დო ჯიმალეფშა გეგნიბღით, მიდგაქ თეზმაწანიან ჩხუპის ართგურო გურზეს. მართალ რე, თინეფს საშვალება ვა უღუდეს, მარა ოკოდეს, მუთ უღუდესინ თინა შხვეფს ხოლო გურთესკო. მაგალთო, ფშჷ, ნამდა ართ დას ოკოდ, დების ბარგ აჩუქუკო, მარა დების მორდებაქ აშუ გიწოღალაშა. თე დაქ მუთუნით ვა ქიმინ დო თის უწუ: „ჩხუპიშ დროს ჩქი მოხვარუდეს და დო ჯიმალეფ შხვადოშხვა ქიანაშე. ასე ჩქინ ოჩერედ რე“. მიზანო ქიდეპკინით, ნამდა ქიდიბგურეთკო თინეფშე თეცალ ჯგირ თვისებეფ.

ბოლოს კინ დიბრთით კოტ-დ’ იუვარშა, მარა პოლიტიკურ დაძაბულობაშ გურშენ თექ კინ ქიდიჭყჷ არეულობაქ. ათეშენ, 2004 წანაშ ნოემბერს კინ ქუმოხვად ჩქინ ევაკუაციაქ დო ვერტალიოტით მონტინუეს. ხვალე თითო რუგზაკ მემღუდეს. თიმ დღას საფრანგეთიშ სამხედრო ბაზას გიფსერეთ. მთელ სერს პროლს გივოჯანუდით დო მაჟია დღას შვეიცარიაშა გეგნმოფურინუეს. შქა სერ იჸუაფუდ, მუჟამსით თექიან ფილიალშა ინობრთით. ფილიალიშ კომიტეტიშ წევრეფქ დო დახელოვნებაშ სკოლაშ ინსტრუქტორეფქ, მუნეფიშ მეუღლეეფამო გემუანო შეფხვადეს, ფხუტოლეს, ჩხე ოჭკუმალ ქოფჩეს დო შვეიცარიულ შოკოლადეფ მაჩუქეს. თექ მანგარო იმოქმედ ჩქინდა.

დროებით განას დუმანიშნეს დო უკულ, მუჟამსით სიტუაციაქ ჭიჭეთ დემშვიდ, კინ კოტ-დ’ იუვარშა დუმორთინუეს. და დო ჯიმალეფიშ ელარნაქ გინმოღალაფუეს თეზმა ევაკუაცია დო გადანიშვნეფ. მა დო დების მარჩქილედეს, ნამდა, მართალ რე, თეცალ და დო ჯიმალურ ჸოროფა იეჰოვაშ ორგანიზაციას გასაკვირ ვა რე, მარა თექ დღას ოკო ვეგნირთუკო ჩქინო ჩვეულებრივ მუდგარენო. ჭიჭე ხანშა ქიმეფხვადით, ნამდა თეცალ რთულ პერიოდეფს ხოლო ბრელს ბგურაფლენდით.

ᲨᲣᲐ ᲐᲦᲛᲝᲡᲐᲕᲚᲔᲗ

2006 წანას მთავარ სამმართველოშე მიბღით წერილ, ნამდა დუმანიშნეს შუა აღმოსავლეთის. თენა ნიშნენდჷ, ნამდა კინ ახალ ნინეფ მაჸიდეს დაგურაფალ, ახალ კულტურაშა მაჸიდეს მიორჩქვანალ, ახალ სირთულეეფშა მაჸიდეს გარზებელ დო ბრელ გამოცდილებას ხოლო მიბღენდით. ბრელ მუდგარენ მაჸიდეს დაგურაფალ რელიგიურო დო პოლიტიკურო თეცალ დაძაბულ ქიანეფს. მოხიოლუდეს, ნამდა კრებეფს შხვადოშხვა წარმომავლობაშ დო შხვადოშხვა ნინაშა მორაგადე და დო ჯიმალეფ რდესჷ, მარა იეჰოვაშ ხელმძღვანელობაშ მეჸუნაშ ჭყოლოფათ ართობა მიღუდეს. მანგარო ქიმეჸოროფეს თექიან და დო ჯიმალეფქ, მუშენდა უმენტაშ გაბედულო ურზუდ ოჯახიშ წევრეფშე, თანაკლასელეფშე, თანამშრომელეფშე დო მეზობელეფშე წინააღმდეგობას.

2012 წანას დევესწრით ისრაელს, თელ-ავივს, ჩატარებულ სპეციალურ კონგრესის. თექ ღორონთიშ ხალხიშ თეცალ დიდ აკოშაყარუა ახ. წ. 33 წანაშ ჟარნეჩდომავითა დღაშ დღახუშ უკულ პირველ შემთხვევა რდჷ. თენა მართალო სასწაულ მოვლენა რდჷ!

თიმ პერიოდის თიცალ ქიანაშა ხოლო ენობრთით, სოდეთ ჩქინ საქმიანობა შეზღუდულ რე. თექ ჩქინ ლიტერატურა ხოლო გენიბღით, მსახურებას ხოლო მიბღით მონაწილება დო ჭიჭე რაიონულ კონგრესეფს ხოლო დევესწრით. ირდიხას შეიარაღებულ ჯარიშკოჩეფ გილარდეს დო სამხედრო პუნქტეფ რდჷ მონწყილ, მარა ჩქი ფრთხილას გილეფშით მუსხირენ მაუწყებელწკუმა ართო, ათეშენ ვა მოშქურუდეს.

ᲐᲤᲠᲘᲙᲐᲨᲐ ᲓᲝᲠᲗᲐ

2013 წანას ხოლო ართ ახალ დანიშნულება მიბღით. დუმანიშნეს კონგოშ ფილიალს, ნამუთ დედაქალაქ კინშასას რე. თენა რე ქვერსემ ქიანა, სასწაულ სქვამ ბუნებათ, მარა თექიანეფს გაჭირება დო ჩხუპეფშე ვეგთართეს. დუდშე იფიფქრით: „აფრიკა გვალო ჯგირ რე, თექიანობა მიჩქუნა დო ვა გამჭირდუნა!“. მარა, მუჟამსით ქობძირით, ნამდა თექ ქოთ ტრანსპორტიშ დო ქოთ შარაშ პრობლემა რდჷ, ქიმეფხვადით, ნამდა დიო ხოლო ბრელ მუდგარენ მაფუდეს დაგურაფალ. მარა ბრელ ჯგირ მუდგარენ ხოლო ხვადუდ, მუდგაშათ შემლებუდეს ყურადღებაშ გინოღალა. მაგალთო, ვორწყედით, მუნერ ხიოლით ურზუდეს და დო ჯიმალეფ გაჭირებას, მუჭო უჸორდეს მსახურება დო მუჭო ოცადუდეს, დესწრესკო კრებაშ შეხვალამეფს დო კონგრესეფს. თის ხოლო ვორწყედით, ნამდა იეჰოვაშ მოხვარათ დო კურთხევათ ქადაგებაშ საქმე წიმი მიშჷ. კონგოს მუსხირენ წანიან მსახურებაქ ბრელ მნიშვნელოვან მუდგარენ დუმოგურუეს დო მუჩეს თიცალ მეგობრეფ, მით ოჯახიშ წევრეფცალო მაფუნა.

2017 წანაშ ბოლოს კინ ახალ დანიშნულება მიბღით – ოკო გინობრთითკო სამხრეთ აფრიკაშ ფილიალშა. თენა რდჷ არძაშ უმოს დიდ ფილიალ, სოდეთ დღას მიმსახურებუნა, დო თი საქმე ხოლო, ნამუთ თექ მაფუდეს ოკეთებელ, ჩქინო ახალ რდჷ. ბრელ მაფუდეს დაგურაფალ, მარა ულირ გამოცდილებაქ ხოლო მანგარო ეწმოდირთეს. მანგარო ქიმეჸოროფეს თექიან და დო ჯიმალეფქ. ნამთინე უკვე 20, 30, 40 ვარდა უმოს წანა რე, იეჰოვას ართგურო ომსახურუნ. სასწაულ რე თიშ ძირაფა ხოლო, მუნერ ართობა უღუნა ბეთელიშ ოჯახიშ წევრეფს, თიშ უმკუჯინუო, ნამდა თექ შხვადოშხვა ეროვნებაშ დო კულტურაშ ხალხ რე. არგამა რე, ნამდა თი მშვიდობა, ნამუთ ღორონთიშ ხალხ შქას რე, იეჰოვაშ კურთხევა რე, მუშენდა თინეფ ოცადუნა ახალ პიროვნებაშ მიკოქუნას დო ბიბლიურ პრინციპეფიშ მეჸუნას.

წანეფიშ დინახალე მა დო დებიქ, ბრელ სასიამოვნო დანიშნულება მიბღით. მიორჩქვანალქ მაჸუეს შხვადოშხვა კულტურაშა დო ქიდიბგურეთ ახალ ნინეფ. თენა ირო ვა ჸოფე ადვილ, მარა იეჰოვაშ ორგანიზაციაშ დო საჯიმალოშ ჭყოლოფათ, ირიათო ბგინაფლენდით იეჰოვაშ ართგურ ჸოროფას (ფსალმ. 144:2). ირფელქ, მუთ სრულ დროშ მსახურებაშ დროს დიბგურეთ, იეჰოვაშ უჯგუშ მსახურეფო გინმოშქვეს.

მანგარ მარდულ ვაფუქ ჩქიმ მშობლეფს, მიდგაქ ბრელ მუდგარენ დუმოგურუეს, ჩქიმ მეუღლეს, მით ირიათო ალამირდჷ დო და დო ჯიმალეფს, მით ჯგირ მაგალითის მარზენდეს. მა დო დების გინოჭყვიდილ მაფუნა, ანწ ხოლო გუვაგრძელათ გურაფა ჩქინ დიდებულ მასწავლებერშე.