ჩქინო „ჯგირ რე ღორონთწკუმა დაახლოება“

1, 2. ა) მუშ კეთება რე საჭირო მიდგაინწკუმა ხოლოშიან ურთიერთობაშ გავითარებელო? ბ) მუს გუვარჩიენთ თე სტატიას?

ᲥᲝᲠᲸᲣᲜᲐᲜᲝ ხოლოშიან მეგობარ? მუჭო გავითარით თიწკუმა თეცალ ურთიერთობა? ალბათ ხშირას რდითჷ თიწკუმა ართო, ქიგეგით, მუ აფჷ ცხოვრებას მიკნაულა, გეჩინებაფეთ თიშ ხასიათ – მუ მოწონს დო მუ ვა მოწონს, დო ქოძირით თიშ ჯგირ თვისებეფ, ნამუთ თქვა ხოლო გოკონა, გიღუდან. თე ირფელქ ქოიჸოროფუეს თქვან მეგობარ.

² მიდგაინიშ ხოლოშიან მეგობრეფო გინიბრთათინ, საჭირო რე, ხშირას ვატარენდათ დროს თიწკუმა ართო. ზუსტას თეშ კეთება რე საჭირო ჩქინ ღორონთწკუმა, იეჰოვაწკუმა, ხოლოშიან ურთიერთობაშ გავითარებელო ხოლო. თე სტატიას გუვარჩიენთ, მუჭო შემლებუნა, უმოსო დევეახლოვათ ჩქინ ღორონთის, მარა პირველ რიგის თის ქიგებგენთ, მუ ჯგირობუა მოუღ თეშ კეთებას.

3. მუშენ რე საჭირო, ხშირას იფიფქრათ, მუ ჯგირ შედეგეფ მოუღ იეჰოვაწკუმა დაახლოებას? ქიმიჸუნით მაგალით.

³ მუშო ოკო რაგად, არძას მიჩქუნა, ნამდა იეჰოვაწკუმა დაახლოება ჯგირ რე. მარა თიშე დაფიქრება, კონკრეტულო მუ ჯგირობუა მოუღ თეს, გინმოჭყვიდირაფუანა, ხოლო უმოსო დევეახლოვათ თის (ფსალმ. 63:6–8). თეს უჯგუშო ქინვანჭათინ, ქიმიპჸუნათ თეცალ მაგალით: არძას მიჩქუნა, ნამდა სწორ კვება, წყარიშ შუმა, ვარჯიშ დო დასაბაღ ლურ ჯგირ რე ჩქინ ჯანმრთელობაშო, მარა ბრელ იშენით ვართ თეს, მუდგათ მუნეფიშ ჯანმრთელობას გილმელუანა. მარა თი ხალხ, მით ხშირას ფიქრენს, მუ ჯგირ შედეგეფ მოუღ ჯანსაღ ცხოვრებაშ წესის, უმოსო მეჸუნს თეცალ ცხოვრებას. თეშნერო, არძას მიჩქუნა, ნამდა ჯგირ რე იეჰოვაწკუმა დამეგობრება, მარა მუჟამსით უმოს გურგედვალირო ქიფიფქრენთ, კონკრეტულო მუ ჯგირ შედეგეფ მოუღ თეს, უმოს სურვილ მაღვენუნა, გუვაგრძელათ თიწკუმა დაახლოება (ფსალმ. 119:27–30).

4. მუს იჩიებ ფსალმუნეფიშ 73:28-ს თე ფსალმუნიშ მაჭარალ?

⁴ წეკითხით ფსალმუნეფიშ 73:28. 73-ა ფსალმუნიშ მაჭარალ ლევიან რდჷ დო მუსიკოსო მსახურენდჷ იეჰოვაშ ტაძარს. მუჭოთ იძირე, თინა წანეფიშ დინახალე ართგურო ომსახურუდ იეჰოვას, მარა უჩქუდ, ნამდა იშენით მნიშვნელოვან რდჷ, მუშ დუდის ხშირას ქუგაშინუკო, მუშენ რდჷ ჯგირ თიშო იეჰოვაწკუმა დაახლოება. თის ოკოდ, შხვეფქ ხოლო ქიფიქრესკო, მუნეფს მუ ჯგირობუას მოუღანდ თეშ კეთება. მორთ ქიფჩუათ, მუ ჯგირ შედეგეფ მოუღ იეჰოვაშ უჯგუშო გაჩინებაფას დო თიწკუმა ხოლოშიან ურთიერთობას.

ᲦᲝᲠᲝᲜᲗᲬᲙᲣᲛᲐ ᲓᲐᲐᲮᲚᲝᲔᲑᲐᲡ ᲑᲔᲓᲜᲔᲠᲝᲑᲐ ᲛᲝᲣᲦ

5. ა) მუშენ მოუღ იეჰოვაწკუმა უმოსო დაახლოებას ჩქინდა ბედნერობა? ბ) იგავეფიშ 2:6–16-იშ თანახმას, ქიმიჸუნით კონკრეტულ მაგალითეფ, მუჭო შეულებ ღორონთიშ სიბრძნეს, ქიმგეხვარან დო დორთხილუან.

⁵ მუთ უმოსო დევეახლოებუთ იეჰოვას, თით უმოს ბედნერეფ იპჸით (ფსალმ. 65:4). ნამ მიზეზეფიშ გურშენ მარაგადენა თენა? მაგალთო, მუჟამსით თიწკუმა დაახლოებერო პკითხულენთ თიშ სიტყვას დო თიშ გიმორნაფას იპჭყანთ, ბღებულენთ სიბრძნეს. მუჭო მოუღ თე სიბრძნეს ჩქინდა ბედნერობა? თინა მოხვარუნა, ვევაჸუნათ გლახა ხალხის დო სერიოზულო ვემეფჩირთათ (წეკითხით იგავეფიშ 2:6–16). ზუსტას ათეშენ იჩიებ ბიბლია: „ბედნერ რე კოჩ, ნამდგაქ სიბრძნეს ქიმიოგორუ დო კოჩ, ნამდგაქ ინონჭაფაშ უნარ გევითარ“ (იგავ. 3:13).

6. მუშენ ოდინუ ფსალმუნმაბირექ ხიოლ?

⁶ მუშო ოკო რაგად, მინშა იეჰოვაშ მსახურეფს ხოლო აფუნა გურ შეწუხებულ. მაგალთო, 73-ა ფსალმუნიშ მაჭარალქ ხიოლ მიოდინუ, მუჟამსით არასწორ ფიქრეფს ქიმეჩ დუდ. თის გურქ მოურთ დო ენჯარ თი ხალხიშ, მით ვამსახურუდ იეჰოვას დო ვემეჸუნდჷ თიშ ნორმეფს, მარა იშენით „გვალო გემოშა“ ცხოვრენდჷ. თინა ფიქრენდჷ, ნამდა უბადო დო დუდძირგალ ხალხის ვართ ფარა ორკუდ, ვართ ჯანმრთელობა დო მუთუნ ოწუხებელ ხოლო ვა უღუდეს (ფსალმ. 73:3–7, 12). თეცალ უსამართლობაშ ძირაფაქ ფსალმუნმაბირე თეიშახ ქიმიჸუნ, ნამდა თიშე ქიდიჭყჷ ფიქრ, შურო ქოღირუდ დო ვარ იეჰოვაშ მსახურება. გურშეჭირებულ ფსალმუნმაბირექ თქუ: „ტყურელო ნოფთხილუექ გურს დო ტყურათ იბომნჷ უდანაშაულობაშ ნიშანო ხე“ (ფსალმ. 73:13).

7. მუშ კეთება შემლებუნა, მუჟამსით გურ მაფუნა დამონკებულ? (ქოძირით სურათ).

⁷ ფსალმუნმაბირექ წუხებას ვემეჩ უფლება, გვალო ქუდარაგუკო თინა. თიქ „ღორონთიშ დიდებულ წმინდა ადგილშა“ ქიმერთჷ, სოდეთ იეჰოვაქ აზროვნება შეუსწორ (ფსალმ. 73:17–19). იეჰოვას, ჩქინ ხოლოშიან მეგობარს, უჩქჷ, მუჟამ ვორეთ მოწყინაფილ. მუჟამსით გურშეჭირებულ ვორეთ, შემლებუნა იბლოცათ დო იეჰოვას ქოფთხუათ ხელმძღვანელობა. თინა მუშ სიტყვაშ დო და დო ჯიმალეფიშ საშვალებათ გურშა ქელამკინანა დო ქომუჩანა ძალას, ოწუხებელიშ უმკუჯინუო, გუვაგრძელათ თიშ მსახურება. თიმწკუმა ხოლო, მუჟამსით თიზმა პრობლემა მიღუნა, ნამდა ვა მიჩქუნა, მუ ვაკეთათ, ჩქინ ღორონთ გურშა ემქექუანა დო სიმშვიდეს მარზენა (ფსალმ. 94:19).a

ᲦᲝᲠᲝᲜᲗᲬᲙᲣᲛᲐ ᲓᲐᲐᲮᲚᲝᲔᲑᲐ ᲡᲘᲪᲝᲪᲮᲚᲔᲨ ᲐᲖᲠᲘᲡ ᲓᲝ ᲘᲛᲔᲜᲓᲘᲡ ᲛᲐᲠᲖᲔᲜᲐ

8. ხოლო ნამ მიზეზეფიშ გურშენ რე ჯგირ, იეჰოვაწკუმა დაახლოება?

⁸ იეჰოვაწკუმა უმოსო დაახლოება ხოლო ჟირ მიზეზიშ გურშენ რე ჯგირ. პირველ, ჩქინ სიცოცხლეს აზრის არზენს დო მაჟია, მარზენა დიდებულ მომავალიშ იმენდის, ნამუთ მუთუნით ვეგემტყუნებ (იერ. 29:11). მორთ უმოს ქიფჩუათ თე ჟირ მხარეშე.

9. მუჭო არზენს ჩქინ ცხოვრებას აზრის იეჰოვაწკუმა დაახლოება?

⁹ იეჰოვაწკუმა დაახლოება ჩქინ სიცოცხლეს აზრის არზენს. ამდღა ბრელს ვა ჯერსჷ ღორონთ ქოარსებენსინ, ათეშენ ვენანჭუნა, მუ რე სიცოცხლეშ აზრ დო ფიქრენა, ნამდა ართ დღასით ადამიანეფ ვეარსებენა. მარა ჩქი ბიბლიაშე გებგით დო ბჯერა, ნამდა ღორონთ არსებენს დო თიშო მუდგა ვა ვაკეთათინ, ვამდინუანა, მუშენდა „ჯგირობუათ გინუგანს თინეფს, მით შურ დო გურით გორუნს თის“ (ებრ. 11:6). თეწკუმა ართო, ჩქინ ცხოვრება აზრიან თიშენ ხოლო რე, ნამდა ვასრულენთ თი ფუნქციას, მუდგაშოთ გოჭყაფილ ვორეთ – ვომსახურუთ ჩქინ ზეციერ მუმას, იეჰოვას (კან. 10:12, 13).

10. მუს ოპირ იეჰოვა თინეფს, მით თიშა რენა დაიმენდებულ (ფსალმ. 37:29).

¹⁰ ამდღა ბრელს ვა უღჷ მომავალიშ ნამდვილ იმენდ, ათეშენ მთელ ყურადღება სამუშაშა, სქუალეფიშ რდუალაშა დო ორჩინელობაშო ფარაშ ელაშაყარუაშა აფუნა გინოღალირ. თინეფს ვა უჩქუნა, მუნერ მომავალს მოპირუნა ღორონთ. თე ხალხიშ გინაწონს, ჩქი იეჰოვაშა ვორეთ დაიმენდებულ (ფსალმ. 25:3–5; 1 ტიმ. 6:17). ჩქი ვონდუთ ღორონთის, ნამდგას დევეახლოვით, დო ბჯერა, ნამდა შეასრულენს ირფელს, მუდგას დემეპირეს. შხვა ირფელწკუმა ართო, თიშ იმენდ ხოლო მიღუნა, ნამდა სამოთხეს მარადიულო ფცენდათ იჸი თაყვანს იეჰოვას (წეკითხით ფსალმუნეფიშ 37:29).

11. ხოლო მუ ჯგირობუა მოუღ იეჰოვაწკუმა დაახლოებას დო მუს გინაფლენს თე დროს თინა?

¹¹ იეჰოვაწკუმა დაახლოებას შხვა ბრელ ჯგირობუა ხოლო მოუღ. მაგალთო, თინა ცოდეფს პატიენს მუშ ხოლოშიან მეგობრეფს, მით მთელ გურით ნარღენა დაშებულს (ეს. 1:18). თეშ ჭყოლოფათ, ვა მაფუნა ონერვიანებელ ულირს დაშებულიშ გურშენ დო შემლებუნა სუფთა სინდის მიღუდან (ფსალმ. 32:1–5). თეს გეძინელ, მუჟამსით იეჰოვას ვეახლოებუთ, გურს უხარენთ თის (იგავ. 23:15). მუშო ოკო რაგად, თე სტატიას გარჩიებულ მხარეეფიშ გარდა, იეჰოვაწკუმა დაახლოებას ხოლო შხვა ბრელ ჯგირ შედეგ მოუღ. მორთ ასე თიშე ქიფჩუათ, მუჭო შემლებუნა ხოლო უმოსო დევეახლოვათ ღორონთის.

ᲛᲣᲭᲝ ᲒᲣᲕᲐᲒᲠᲫᲔᲚᲐᲗ ᲘᲔᲰᲝᲕᲐᲬᲙᲣᲛᲐ ᲓᲐᲐᲮᲚᲝᲔᲑᲐ

12. მუ ვაკეთით, იეჰოვას დევეახლოვითკონ დო მუშ კეთება რე საჭირო, უმოსო დევეახლოვათინ?

¹² ონდო დიმნათუდით, ბრელ მუდგარენ ვაკეთით, ნამდა დევეახლოვითკო იეჰოვას. ქიგებგით სიმართლე იეჰოვაშ დო იესოშ გურშენ, იმნარღით ულირს კეთებულ ცოდეფ, გუვავითარით ძალიერ რწმენა დო ქიდიპჭყით ღორონთიშ ნებაშ თანახმას ცხოვრება. მარა იეჰოვას ხოლო უმოსო დევეახლოვათინ თიშო, საჭირო რე, ვემვოტუათ თე ირფელიშ კეთება (კოლ. 2:6).

13. ნამ სუმ ნაბიჯ მიმეხვარებუნა, ვემვოტუათ იეჰოვაწკუმა დაახლოება?

¹³ მუ მიმეხვარებუნა, ვემვოტუათ იეჰოვაწკუმა დაახლოება? 1) ოკო იპკითხათ დო გეგმიბრკვიათ ბიბლია. კითხირიშ დროს ჩქინ მიზან ხვალე ღორონთიშ გურშენ ინფორმაციაშ მეღება ოკო ვა რდასჷ. თეშ გინაწონს, ირნერო ოკო ვეცადათ, ქინვანჭათ იეჰოვაშ აზროვნებას, ქიგებგათ მუშ კეთებას ითხინს ჩქინდე დო გეგმიბრინუათ ბიბლიურ პრინციპეფ (ეფეს. 5:15–17). 2) ოკო იფიფქრათ თი ირფელშე, სოვრეშეთ იეჰოვაშ ჸოროფა იძირე დო თეშნერო გემამნგარათ რწმენა. 3) ოკო ბჯოგუდან თი ირფელ, მუთ იეჰოვას გურს უწყუნუანს დო ვა მიღუდან ხოლოშიან ურთიერთობა თინეფწკუმა, მით თიცალ საქმეეფს ორთჷ, მუთ იეჰოვას ჯოგჷ (ფსალმ. 1:1; 101:3).

14. 1 კორინთელეფიშ 10:31-იშ თანახმას, მუჭო შემლებუნა ჩქინ ირდღაშიან ცხოვრებათ გურ გუხარათ იეჰოვას? (ქოძირით სურათეფ).

¹⁴ წეკითხით 1 კორინთელეფიშ 10:31. მანგარ მნიშვნელოვან რე, იეჰოვაშ მოსაწონო მიფქცუათ. თეშა ხვალე თინა ვემშურს, ნამდა კრებაშ შეხვალამეფშა დო მსახურებაშა გილაბრთათ. ჩქინ ირდღაშიან ცხოვრებას ირნერ საქციელ იეჰოვაშ მოსაწონ ოკო რდასჷ. მაგალთო, მუჟამსით ირფელს პატიოსნურო იფქციებუთ დო ხეგოფაჩილეფ ვორეთ, გურს უხარენთ ჩქინ ღორონთის (2 კორ. 8:21; 9:7). თეწკუმა ართო, იეჰოვას ოკო, ნამდა ვაფასენდათ თიშ ძვირფას საჩუქარს, სიცოცხლეს. ათეშენ გაწონასწორებულ დამოკიდებულება ოკო მიღუდან შუმა-ჭკუმუაშენ დო მუჭოთ შემლებუნან თეშ ოკო მუთხილუათ ჩქინ ჯანმრთელობას. მუჟამსით იეჰოვა ორწყე, ნამდა ართ მეჯინათ ჭიჭე საქმეეფს ხოლო ვოცადუთ, ირნერო ვასიამოვნათ თის, უმოსო ვეჸოროფებუთ (ლუკ. 16:10).

15. მუნერ დამოკიდებულებას ელჷ იეჰოვა ჩქინდე შხვეფიშ მიმართ?

¹⁵ იეჰოვა ჯგირო ოქცუ არძას, ქოთ მუშ მსახურეფს დო ქოთ თინეფს, მით ვამსახურუნა თის (მათ. 5:45). თინა ელჷ, ნამდა ადამიანეფს ჩქი ხოლო თაშ მეუდირთუთ. ბიბლია იჩიებ, ნამდა ქრისტიანეფქ მითინ ოკო „ვა ლანძღან, ვეჩხუპან, . . მუნეფიშ ვეჩემან . . . [დო] არძას გემუანო მეუდირთან“ (ტიტ. 3:2). ათეშენ, ჩქი ჟიშე ვა უჯინეთ თი ადამიანეფს, მით ვამსახურუნა იეჰოვას (2 ტიმ. 2:23–25). ჩქინ ღორონთის უმოსო ვეახლოებუთ, მუჟამსით არძაშ მიმართ ყურადღებას გიმიბრჩქინანთ დო ჯგირო ვოქცუთ.

ᲨᲔᲪᲓᲝᲛᲔᲤᲘᲨ ᲣᲙᲣᲚ ᲮᲝᲚᲝ ᲨᲔᲛᲚᲔᲑᲣᲜᲐ ᲦᲝᲠᲝᲜᲗᲬᲙᲣᲛᲐ ᲓᲐᲐᲮᲚᲝᲔᲑᲐ

16. მუჭო გინაფლენდჷ დუდის 73-ა ფსალმუნიშ მაჭარალ?

¹⁶ კანკალეშა შილებე იფიფქრათ, ნამდა ჩქინ შეცდომეფიშ გურშენ იეჰოვაწკუმა ხოლოშიან ურთიერთობა მივოდინეთ. ქიგიფშინათ, ნამდა 73-ა ფსალმუნიშ მაჭარალს ხოლო თეცალ მუდგარენქ აღოლ. თიქ თქუ: „დახე გეგნურთჷ შარაშე, დახე ემზგირტჷ კუჩხიქ“ (ფსალმ. 73:2). მუჭოთ მუქ თქუ, თინა „განწარებულ“ დო „უჭკუე“ რდჷ დო „უგუნურ ორინჯცალო“ იქციებუდ იეჰოვაშ თოლს (ფსალმ. 73:21, 22). ხომ ვეფიქრჷ ფსალმუნმაბირექ, ნამდა მუშ შეცდომეფიშ გურშენ იეჰოვაშ ჸოროფა მიოდინუ დო ღორონთ თის დღას ვაპატიენდ?

17. ა) მუ აკეთ ფსალმუნმაბირექ, მუჟამსით მანგარ გურგოტახილ რდჷ? ბ) მუშ გურაფა შეილებუნა თიშ შემთხვევაშე? (ქოძირით სურათეფ).

¹⁷ შილებე ფსალმუნმაბირე იეჰოვაშე მეტებულო გინაფლენდუკო დუდის, მარა თინა ბრელ ხანს ვა ჸოფე თაშ. თიმწკუმა ხოლო, მუჟამსით დუდის მანგარ გლახათ გინაფლენდჷ, თის არჩქილედ, ნამდა იეჰოვაწკუმა ოკო რდუკო ხოლოს. ფსალმუნმაბირე იჩიებ: „მარა ასე ირიათო სქანწკუმა ვორექ [იეჰოვა]; სი გიკინებ ჩქიმ მარძგვან ხე. სქან რჩევათ აწოპჸუნქ დო უკულ დიდებას ქუმომღანქ“ (ფსალმ. 73:23, 24). ჩქი ხოლო, ჩქინ რწმენა ისუსტებუნ თეს ქობგინაფლენთ ვარდა გურ ქომტირხუნან-და, იეჰოვას ოკო ფთხუათ ძალა (ფსალმ. 73:26; 94:18). სერიოზულ შეცდომეფქ მომირთანინ ხოლო, შემლებუნა კინ დუვართათ იეჰოვას, მუშენდა თინა ირო მზათ რე პატიებაშო (ფსალმ. 86:5). მუჟამსით გლახა მდგომარეობას ვორეთ, გვალო თიმწკუმა მოსაჭირუნა იეჰოვაწკუმა ხოლოს რინა (ფსალმ. 103:13, 14).

ᲛᲐᲠᲐᲓᲘᲣᲚᲝ ᲒᲐᲒᲠᲫᲔᲚᲘᲗ ᲦᲝᲠᲝᲜᲗᲬᲙᲣᲛᲐ ᲓᲐᲐᲮᲚᲝᲔᲑᲐ

18. მუშენ ვეთებ დღას იეჰოვაწკუმა დაახლოება?

¹⁸ იეჰოვაშ გაჩინებაფა დღას ვეთებ. ბიბლია იჩიებ, ნამდა ვეგიგორე თიშ შარეფშა, სიბრძნეშა დო რჩქინაშა (რომ. 11:33). ათეშენ, იეჰოვაწკუმა დაახლოება შემლებუნა მარადიულო გუვაგრძელათ.

19. მუშა მარწმუნენა ფსალმუნეფს ინოჭარილ სიტყვეფ?

¹⁹ ფსალმუნეფიშ 79:13-ს პკითხულენთ: „ჩქი, სქან ხალხ დო სქან ოჭყიშალიშ შხურეფ, მარადიულო მადლობას გიძღვინენთ დო გადიდენთ უკულიან თაობეფს“. თქვა ხოლო, იეჰოვაწკუმა დაახლოებას ვემიოტენთ-და, შეილებუნა რჯერდან, ნამდა მარადიულო კურთხევეფს მიღენთ თიშე დო თქვა ხოლო თამამას გარაგადენა: „ღორონთ [რე] ჩქიმ გუმამანგარებელ დო ჩქიმ წილ სადღამუშოთ“ (ფსალმ. 73:26).