„გეგშეგორით, მის ემსახურებუთ“

1. მუ ოკო ვაკეთათ, დასურო ბედნერეფ ქუვორდათინ დო მუშენ? (ეს. 48:17, 18).

ᲩᲥᲘᲜ ზეციერ მუმას ქიანაშა უსხუნუთ დო ოკო, ხიოლით ეფშა ცხოვრება მიღუდან ქოთ ასე დო ქოთ მომავალს (ეკლ. 3:12, 13). თიქ თეშ გუმოჭყეს, ნამდა ბრელ სასწაულ მუდგარენიშ კეთებაშ უნარ მიღუნა. მარა თის თიშ უნარ ვა მუჩამ, ნამდა უხელმძღვანელათ ჩქინ დუდის ვარდა ჩქინით გინოპჭყვიდათ, მუ რე ჯგირ დო მუ – გლახა (ეკლ. 8:9; იერ. 10:23). იეჰოვას უჩქჷ, ნამდა დასურო ბედნერეფ ქუვორდათინ, ოკო ვემსახურათ თის დო იფცხოვრათ თიშ ნორმეფით (წეკითხით ესაიაშ 48:17, 18).

2. მუ ოკო სატანას, დუმოჯერუან დო მუ აკეთ იეჰოვაქ თიშ ოძირაფალო, ნამდა თინა მეტყურე რე?

² სატანას ოკო, დუმოჯერუან, ნამდა იეჰოვაშ უმშო ბედნერეფ იპჸით დო თიშ უმშო ხოლო შეულებუნა ადამიანეფს, მუნეფიშ დუდის უხელმძღვანელან (დაბ. 3:4, 5). თენა ტყურა რენ თიშ დამტკიცებელო, იეჰოვაქ უფლება ქიმეჩ ადამიანეფს, მუდგარენ პერიოდის მუნეფიშ ხეს რდასჷ, მუჭო იცხოვრენა. ჯგირო ვორწყეთ, ნამდა თეს უბედრობაშ მეტ ჯგირ მუთუნ ვა მოუღ ადამიანეფშა. თეშ გინაწონს, ბიბლია ეფშა რე თიცალ ადამიანეფიშ შემთხვევეფით, მიდგაქ ისხუნუეს, იეჰოვას ემსახურესკო დო, შედეგო, ბედნერ ცხოვრება უღუდეს. თეშ არძაშ უჯგუშ მაგალით იესო ქრისტე რე. ათეშენ, მორთ დიო გუვარჩუათ, მუშენ აფუდ თის გინოჭყვიდილ იეჰოვაშ მსახურება დო უკულ ქიგებგათ, მუშენ იმსახურენს ჩქინ ზეციერ მუმა ჩქინდე თაყვანიშცემას. ბოლოს თიშე ხოლო ქიფჩუათ, ჩქი მუშენ გიშებგორუნთ თიშ მსახურებას.

ᲛᲣᲨᲔᲜ ᲒᲘᲜᲝᲭᲧᲕᲘᲓ ᲘᲔᲡᲝᲥ ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐ

3. მუ მიარზუ სატანაქ იესოს დო მუჭო მიქცუ თიქ?

³ დედამიწას ცხოვრებაშ დროს იესო ირიათო ოძირანდჷ, ნამდა იეჰოვაშ მხარეს გერდჷ დო თიშ მსახურება აფუდ გინოჭყვიდილ. ნათუაშ უკულ მალას, სატანაქ ქიმერთჷ თიშა დო უწუ, ნამდა მსოფლიოშ არძა სამეფოს ქიმეჩანდ, ხვალე ართშა ქოცენდ თაყვანს-და. მარა იესოქ უპასუხ: «ჩემეთხი, სატანა! მუშენდა ჭარილ რე: „იეჰოვას, სქან ღორონთის, ცი თაყვან დო ხვალე თის შეუსრულ წმინდა მსახურება“» (მათ. 4:8–10). მუშენ მიქცუ იესოქ თაშ? მორთით თეშ მუსხირენ მიზეზშე ქიფჩუათ.

4, 5. მუ დო მუ მიზეზეფიშ გურშენ ისხუნუ იესოქ იეჰოვაშ მხარეს გერინა?

⁴ მთავარ მიზეზ, მუდგაშ გურშენ იესოქ იეჰოვაშ მხარეს გერინა ისხუნუ, ჸოროფა რე; თის ქიანაშა უსხუნ მუამუშ (იოან. 14:31). თეს გეძინელ, იესოს არჩქილედ, ნამდა იეჰოვა თაყვანიშცემაშ ღირს რდჷ (იოან. 8:28, 29; გამოცხ. 4:11). მუშენდა თიშე მოურს სიცოცხლე, საიმენდო ღორონთ რე დო მუთუნ ვანარღ ჩქინო (ფსალმ. 33:4; 36:9; იაკ. 1:17). ზეციერ მუმას იესო დღას ვა უღორებ დო მუთ ქოუღუდუნ, ირფელ თიშე უღუდ (იოან. 1:14). თეშ გინაწონს, მუნერ რე სატანა? თიქ ადამიანეფს ცოდა დო ღურა მოუღ, მეტყურე დო ჰარამ რე დო მუშ დუდიშ მეტ მითინ ვაინტერეს (იოან. 8:44). იესო ქოთ იეჰოვას იჩინენდჷ ჯგირო დო ქოთ სატანას, ათეშენ ფიქრო ხოლო ვა უფიქრებ, სატანაშ შარას გიაჸუნუკო დო იეჰოვაშ წინააღმდეგ მიდართუკო (ფილ. 2:5–8).

⁵ ხოლო ართ მიზეზ, მუდგაშ გურშენ იესოქ იეჰოვაშ მხარეს გერინა ისხუნუ, თინა რე, ნამდა უჩქუდ, მუ შედეგ მაჸუნუდ მუშ ართგურობას (ებრ. 12:2). თის არჩქილედ, ნამდა მუშ ართგურობათ ხეს შეუნწყუნდ მუამუშიშ სახელიშ განწმენდას დო საშვალებას ქიმეჩანდ ადამიანეფს, გეთავისფალესკო ცოდა დო ღურაშე.

ᲛᲣᲨᲔᲜ ᲘᲛᲡᲐᲮᲣᲠᲔᲜᲡ ᲘᲔᲰᲝᲕᲐ ᲩᲥᲘᲜᲓᲔ ᲗᲐᲧᲕᲐᲜᲘᲨᲪᲔᲛᲐᲡ

6, 7. ა) მუშენ ვამსახურ ამდღა ბრელ იეჰოვას? ბ) მუშენ იმსახურენს თინა ჩქინდე თაყვანიშცემას?

⁶ ბრელ თიშენ ვამსახურ იეჰოვას, ნამდა ვეჩინენა თის, ვა უჩქუნა, მუნერ სასწაულ თვისებეფ უღჷ დო მუ აფჷ ნაკეთებ თინეფშო. ზუსტას თაშ რდესჷ ათენიშ მახორუეფ ხოლო, მიდგას პავლექ უქადაგ (საქ. 17:19, 20, 30, 34).

⁷ პავლექ თექიანეფს ეუნწყჷ, ნამდა ჭეშმარიტ ღორონთ „არზენს არძას სიცოცხლეს, სუნთქვას დო ირფელს“. უკულ გეუძინ: „ჩქი თიშით ვორეთ, თიშით გილურთ დო თიშით მიდგუნა შურ“. ღორონთ რე ირფელიშ გუმაჭყაფალ, ნამდგაქ „ართ ადამიანშე გეგშეჸუნ არძა ხალხ“, ათეშენ ხვალე თინა იმსახურენს თაყვანიშცემას (საქ. 17:25, 26, 28).

8. მუს ვა ქიმინუნს იეჰოვა დღას დო მუჭო მოძირანა მუშ ჸოროფას?

⁸ იეჰოვას, მუჭოთ გუმაჭყაფალს დო სამყაროშ უზენაეს მმართველს, შეულებ ადამიანეფს დანძალას მუშ მსახურება, მარა თინა თეს დღას ვაკეთენს. თეშ მანგიორო, მარზენა მტკიცებულებეფს, ნამდა არსებენს, დო მოგინაფუანა, ნამდა თითოულ მანგარო უჸორთ. იეჰოვას ოკო, მუთ შილებენ ბრელ ადამიანქ გინირთას თიშ მეგობარო დო მარადიულო იცხოვრას (1 ტიმ. 2:3, 4). ზუსტას ათეშენ მოგურუანა თინა, ხალხის ქუგვოგებაფუათ, მუშმაჯგირა მომავალს უმზადენს კაცობრიობას (მათ. 10:11–13; 28:19, 20). თეწკუმა ართო, იეჰოვაქ, ჩქი, მიდგაქ თიშ მსახურება გინოპჭყვიდით, ქრისტიანულ კრებას აკოფშაყარუეს, ნამდა თაყვან ქოფცათ თის, დო ქიგემრინუეს მოჸოროფე ჭყიშეფ ხოლო, მით ზრუნენა ჩქინდე (საქ. 20:28).

9. სოვრეშე იძირე, ნამდა იეჰოვას არძანერ ადამიან უჸორს?

⁹ იეჰოვას მუნერ სასწაულ ჸოროფა შეულებუნ თენა, თევრეშე ხოლო იძირე, მუჭო ოქცუ თიცალ ხალხის, მიდგას ვაკონა, ქიდეჯერან, თინა ქოარსებენსინ. დეფიქრით: ანთასობით წანა რე, მილიარდობით ადამიან გინმოჭყვიდუნს, მუშ ჭკუაშა იცხოვრას დო მუშით გინოჭყვიდას, მუ რე ჯგირ დო მუ – ფურ. მარა იეჰოვას თეცალეფ ხოლო უჸორს, მუთ თევრეშე იძირე, ნამდა თინეფს ხოლო უღუნა თი ირფელ, მუთ სიცოცხლეშო რე საჭირო, დო ერზიებუნა საშვალება, ისიამოვნან ცხოვრებათ (მათ. 5:44, 45; საქ. 14:16, 17). თეცალ ადამიანეფს ხოლო უღუნა საშვალება, ჸუნდან მეგობრეფ დო ოჯახ, მიდგას უჸორს თინეფ. შეულებუნა მორდან სქუალეფ დო იმუშუან დო გემო გეგშეღან მუნეფიშ ნახანდშე (ფსალმ. 127:3; ეკლ. 2:24). თე ირფელ ჯგირო ოძირანს, ნამდა ჩქინ ზეციერ მუმას მართალო არძანერ ადამიან უჸორს (გამ. 34:6). მორთით ასე ქიგიფშინათ მუსხირენ მიზეზ, მუშენ გინოპჭყვიდით ჩქი იეჰოვაშ მსახურება, დო მუ კურთხევეფს მარზენა თინა თეშო.

ᲛᲣᲨᲔᲜ ᲒᲘᲨᲔᲑᲒᲝᲠᲘᲗ ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐ

10. ა) მუ რე მთავარ მიზეზ, მუდგაშ გურშენ იეჰოვას ვომსახურუთ? (მათ. 22:37). ბ) მუ გრძნობას გირჩქინანა თიშ რჩქინა, ნამდა იეჰოვას არჩქილე თქვან დო ირო მზათ რე, გაპატუან? (ფსალმ. 103:13, 14).

¹⁰ იესოცალო, ჩქი ხოლო, იეჰოვას პირველ რიგის თიშენ ვომსახურუთ, ნამდა მთელ გურით მიჸორა თინა (წეკითხით მათეშ 22:37). მუჟამსით ვორწყეთ თიშ სარკო თვისებეფს, თიწკუმა დაახლოებაშ სურვილ მირჩქინდუნა. მაგალთო, ართ-ართ, მუთ თის მიჸოროფუანან თინა რე, ნამდა ირო მზათ რე, ქუმაპატუან. მუჟამსით ისრაელეფ ოჭიშის ურთინუანდეს თის, იეჰოვა შურ დო გურით ოხვეწუდ: „მიკირთით თქვან-თქვან უბადო შარეფშე“ (იერ. 18:11). ჩქინ მოჸოროფე ზეციერ მუმას ვაჭყორდუ, ნამდა არასრულყოფილეფ ვორეთ; თის „შჷ, ნამდა ტვერ ვორეთ“ (წეკითხით ფსალმუნეფიშ 103:13, 14). მუჟამსით ფიფქრენთ, მუნერ პატიება შეულებ იეჰოვას, დო ვორწყეთ თიშ შხვა სქვამ თვისებეფს ხოლო, მუნერო შილებე ვა გომრჩქინდან სურვილქ, მარადიულო ვემსახურათ თის?!

11. ხოლო მუ მიზეზეფიშ გურშენ მაფუნა გინოჭყვიდილ, ჩქინ ზეციერ მუმას ვემსახურათ?

¹¹ იეჰოვას თიშენ ხოლო ფცენთჷ თაყვანს, ნამდა თინა თეშ ღირს რე (მათ. 4:10). თეწკუმა ართო, მიჩქუნა, მუ ჯგირ შედეგეფ მაჸუნუ ჩქინ ართგურობას – ხეს შეუნწყუნთ იეჰოვაშ სახელიშ განწმენდას, დუვამტკიცენთ, ნამდა სატანა მეტყურე რე დო გურს გაუხარენთ ზეციერ მუმას. თეს გეძინელ, იეჰოვაშ მსახურებას გეგნოპჭყვიდუნთ-და, მერზიებუნა საშვალება, მარადიულო ვემსახურათ თის! (იოან. 17:3).

12, 13. მუშ გურაფა შემლებუნა ჯეინიშ დო პამიშ შემთხვევაშე?

¹² ადამიანს ბაღანობას ხოლო შეულებ გავითარას იეჰოვაშ მიმართ თიცალ ძალიერ ჸოროფა, ნამუთ გამწირდუნ უკულ ხოლო ვა უდინუ. თენა ჯგირო ირწყებე ჟირ ხორციელ დაშ, ჯეინიშ დო პამიშa შემთხვევაშე. თინეფ 11 დო 10 წანერეფ რდესჷ, მუჟამსით ბიბლიაშ გურაფა დიჭყეს. მართალ რე, თე ძღაბეფიშ მშობლეფს ვაკოდეს ბიბლიაშ გურაფა, მარა უფლება ქიმეჩეს თინეფს, იეჰოვაშ მოწმეეფწკუმა იგურუესკო, ოღონც ეკლესიაშა ხოლო ოკო გილართესკო ოჯახწკუმა ართო. ჯეინ იჩიებ: „იეჰოვაშ მოწმეეფშე ნაგურეფუქ მიმეხვარ, ვევაჸუნიკო ჩქიმ მახანეფს დო ვედიპჭყიკო ნარკოტიკეფიშ მეღება დო უზნეო ცხოვრება“.

¹³ მუსხირენ წანაშა ჟირხოლო დაქ დინათ. უკულ თინეფქ პიონერო მსახურება ხოლო ქიდიჭყეს დო, თეწკუმა ართო, ხანშამიშულირ მშობლეფს ხოლო ულუანდეს. დეკვირით, მუს იჩიებ ჯეინ, მუჟამსით იშინანს, მუ უკეთ იეჰოვაქ მუს დო მუშ დას: «ჩქიმ დუდშა გეგმოფცად, ნამდა იეჰოვა მუთუნით ვემიოტენს მუშ მეგობარს. მუჭოთ 2 ტიმოთეშ 2:19-ს ჭარჷ, „იეჰოვა იჩინენს მუშის“». თაშ რე, იეჰოვა ირო ზრუნენს თინეფშე, მიდგას უჸორა თინა დო გინოჭყვიდუნა, ემსახურან თის!

14. მუჭო შემლებუნა დეფცვათ იეჰოვაშ სახელ? (ქოძირით სურათეფ).

¹⁴ იეჰოვაშა ქიანაშ ტყურა რე ეკოწამებულ. ათეშენ, მოკონა, ხალხის სიმართლე ქუგვოგებაფუათ თიშ გურშენ. წერმიდგინით თეცალ სიტუაცია: რჸუნა მანგარ ხოლოშიან მეგობარ, ნამუთ ართო კეთილ რე, შხვაშო მუთუნ ვანარღ დო ირკოჩის პატიენს. ართ დღასით გებულენთ, ნამდა მიდგარენ აბრალუაფ თქვან მეგობარს, უდუნდებელ დო უპატიოსნო კოჩ რენია. მუს ქიმინუნდით? მუშო ოკო რაგად, ქიგნადირთუდით თქვან მეგობარს დო ვალანძღაფუანდით თის მიდგარენს. თეშნერო, მუჟამსით სატანა დო თიშ ხალხ ტყურეფს ოჯერუანს ადამიანეფს იეჰოვაშ გურშენ დო სახელს უტახუნს თის, ჩქი პასუხის ვარზენთ თინეფს თით, ნამდა სიმართლეს ურაგადუთ ხალხის ღორონთიშ გურშენ (ფსალმ. 34:1; ეს. 43:10). თეთ ვოძირანთ, ნამდა შურ დო გურით მოკონა, ვემსახურათ თის.

15. მუ ჯგირ შედეგეფ მოუღ პავლეს მუშ მიზნეფიშ თირუაქ? (ფილ. 3:7, 8).

¹⁵ ჩქი მზათ ვორეთ, დოფთირუათ ჩქინ მიზნეფ, ნამდა შემალებუან იეჰოვას თიშ მოსაწონო ვემსახურათ ვარდა ხოლო უმოსიშ კეთებაქ შემალებუან თიშ მსახურებას. მაგალთო, მოციქულ პავლექ ისხუნუ, დათმუკო ჯგირ სახელ, ნამდა ქრისტეშ მიმაჸუნალქ ქიჸუკო დო იეჰოვას ემსახურუკო (გალ. 1:14). მუ მიღჷ თიქ შედეგო? კურთხევეფით ეფშა ცხოვრება დო ზეცას ქრისტეწკუმა ართო მეფობაშ შესაძლებლობა. თის დღას ვა უნარღებ, ნამდა იეჰოვაშ მსახურება გინოჭყვიდ, დო თენა ვართ ჩქი მაჸინა ონარღებელ (წეკითხით ფილიპელეფიშ 3:7, 8).

16. მუს ბგურაფლენთ ჯულიაშ შემთხვევაშე? (ქოძირით სურათეფ).

¹⁶ იეჰოვაშ მსახურებას პირველ ადგილს ქიგვორინუანთ-და, კურთხევეფით ეფშა ცხოვრება მაღვენუნა ქოთ ასე დო ქოთ მომავალს. დეფიფქრათ ართ დაშ, ჯულიაშ, შემთხვევაშე. თინა ბაღანობაშე იბირდჷ ეკლესიაშ გუნდის. ართ ოპერაშ მაბირექ ქოძირ თიშ ნიჭ დო გეჭოფ მამზადებელო. ჯულია თიშმაჯგირას იბირდჷ, ნამდა ხალხიქ მალას გეჩინებაფუ დო მაღალ დონეშ საკონცერტო დარბაზეფს გიშმეშ. თინა მანგარ ცნობილ მუსიკალურ სკოლას გურაფლენდჷ, მუდროსით კურსელქ თიწკუმა ღორონთიშ გურშენ ქიდიჭყჷ ჩიება დო უწუ, ნამდა თის იეჰოვა ჯოხოდ. ჭიჭე ხანშა ჯულიაქ ბიბლიაშ გურაფა ქიდიჭყჷ, მარაშე ჟირშა. ბოლოს თიქ გინოჭყვიდ, მთელ ყურადღება მუსიკალურ კარიერაშა ვარინ, იეჰოვაშ მსახურებაშა გეგნიღუკო. თენა ვა რდჷ ეფ გინაჭყვიდირალ. ჯულია იჩიებ: „ბრელ მირაგადუდ, ნამდა ბორულო ვოდინუანდ ჩქიმ ნიჭის. მარა მა მოკოდ, მთელ ჩქიმ ცხოვრება იეჰოვაშ მსახურებას დაუთმიკო“. თე გადაწყვეტილება თიქ 30 წანაშე უმოსიშ წოხოლე მიღჷ. ამდღა მუს ფიქრენს თინა? ჯულია იჩიებ: „ბედნერ ვორექ, იეჰოვაშ მსახურება იფსხუნენ, დო ბჯერსჷ, ნამდა მუშ დროს თინა ჩქიმ არძა სურვილს დაკმაყოფილენს“ (ფსალმ. 145:16).

ᲒᲐᲒᲠᲫᲔᲚᲘᲗ ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐ

17. ა) მუ ოკო აკეთან თინეფქ, მით დიო ვამსახურუნა იეჰოვას დო მუშენ? ბ) მუ მარჩქილენა თინეფს, მიდგაქ იეჰოვაშ მსახურება გინოპჭყვიდით?

¹⁷ ჩქი თე ქიანაშ ბოლოწკუმა მანგარ ხოლოს ვორეთ. მუჭოთ მოციქულ პავლექ თქუ, „ხოლო ჭიჭე ხან“ დო „ქუმურს თინა, მით მოურს, ვედეგვიანენს“ (ებრ. 10:37). მუს ნიშნენს თენა? ართ თის, ნამდა თინეფს, მით ვამსახურუნა იეჰოვას, ბრელ დროქ ვა დასქიდეს, გეგნოჭყვიდან თიშ მსახურება, ათეშენ ოჩქარებელ აფუნა (1 კორ. 7:29). დო მაჟია, ჩქი, მიდგაქ უკვე გინოპჭყვიდით იეჰოვაშ მსახურება, თენა გუმოშინანა, ნამდა, მართალ რე, სირთულეეფ მაჸინა გინაღალარ, მარა თენა ბრელ ხანს ვეგეგრძელებ, მუშენდა „ბრელ დროქ ვა დოსქიდ“.

18. მუ ოკონა იეჰოვა დო იესოს ჩქი ვაკეთათინ?

¹⁸ იესოს ხვალე თინა ვაკოდ, მუშ მოწაფეეფქ ჭიჭე ხანით იჸუესკო თიშ მიმაჸუნალეფქ, თის ოკოდ, თაშ გაგრძელესკო (მათ. 16:24). თაშ ნამდა, წანეფ ქორე იეჰოვას ვომსახურუთინ-და, გინოჭყვიდილ ოკო მაფუდან, თაშ გუვაგრძელათ. შილებე თეშ კეთებაქ ვეჸუას ადვილქ დო მანგარ მონდომაქ დემესაჭირან, მარა თე ირფელ სინამდვილეს ღირჷ, მუშენდა უკვე ამდღარშე მიღუნა ქიანაშ კურთხევა დო ხიოლ იეჰოვაშ მსახურებას (ფსალმ. 35:27).

19. მუს ბგურაფლენთ ჯინიშ შემთხვევაშე?

¹⁹ ნამთინეშ აზრით იეჰოვაშ მსახურება მანგარ დიდ ოღალ რე. ახალგაზრდა ქორექ-და, ხომ ვა ფიქრენქ, ნამდა ღორონთის ქემსახურებუქ-და, მუდგაინს ოდინუანქ? ართ ახალგაზრდა ჯიმა, ჯინ, იჩიებ: „ფიფქრენდჷ, ნამდა იეჰოვაშ მოწმე ვორდინ თიშ გურშენ ირფელს მორკებულ ვორდჷ. თეშ იძირედ, ნამდა ჩქიმ მახანეფ უმოს ბედნერეფ რდესჷ, მუშენდა, მუდგას ოკოდესინ თის ორთუდეს, მაგალთო, წვეულებეფშა გილეშეს, ჸოროფილეფ ჸუნდეს დო ძალადობრივ ვიდეოლაჸაფეფს ლაჸაფენდეს, დო მა თე დროს კრებაშ შეხვალამეფშა დო მსახურებაშა გილეფშჷ“. მუჭო იმოქმედ თეცალ ფიქრეფქ ჯინშა? თინა იჩიებ: „ჟირნერ ცხოვრება ქიდიპჭყჷ დო ჭიჭე ხანს ქოთ მოსიამოვნუდ თენა. მარა თი ირფელს, მუდგას ვორთუდ, ნამდვილ ბედნერობა ვა მუღალ ჩქიმდა. ჭიე-ჭიეთ ქიდიპჭყჷ ბიბლიას ინოჭარილ ჭეშმარიტებაშე ფიქრ, ნამდგას თეიშახ შურო ვა ვოკვირუდ, დო გინოპჭყვიდ, იეჰოვას მთელ გურით ვემსახურიკო. თევრეშე მოჸუნაფილ, ვორწყექ, ნამდა იეჰოვა ჩქიმ არძა ლოცვას პასუხენს“.

20. მუ ოკო მაფუდან გინოჭყვიდილ?

²⁰ ფსალმუნმაბირე იეჰოვას უბირდჷ: „ბედნერ რე თინა, მიდგას სი გიშეგორუნქ დო ხოლოშა მიჸუნანქ სქან ოზეეფს დამკვიდრებელო“ (ფსალმ. 65:4). თაშ ნამდა, მორთით, გინოჭყვიდილ მაფუდან, გუვაგრძელათ იეჰოვაშ მსახურება დო იესო ნავეშ სქუაცალო ფთქუათ: „მა დო ჩქიმ ჸუდეშარეფ იეჰოვას ვემსახურებუთ!“ (იეს. 24:15).