ვეგნოდვა ნათუა!

1. მუ ჯგირ შედეგეფს მოიღანს ნათუა?

ᲐᲚᲑᲐᲗ მანგარო გიჸორს იეჰოვა ღორონთ, ნამდგაშეთ გიღჷ ირფელ ჯგირ, თინეფ შქას სიცოცხლე. ქუგოკონო, ქაძირუე თის სქან ჸოროფა? თაშ ქორენ-და, ირფელიშ უჯგუშ, მუდგაშ კეთება თეშო შეილებ, იეჰოვაშა დუდიშ მეძღვინუა დო ნათუა რე. თე ნაბიჯეფიშ გინოდგუმათ, სი იეჰოვაშ ოჯახიშ ნაწილო გინირთუქ. შედეგო, თინა სქან მუმა დო მეგობარ იჸუაფ. ათეშენ ღორონთ ირო ქოიხელმძღვანელენს დო ქიზრუნენს სქანდე, მუშენდა თის ოკუთვნუდენ იჸი (ფსალმ. 73:24; ეს. 43:1, 2). თეს გეძინელ, იეჰოვაშა დუდიშ მეძღვინუათ დო ნათუათ მიღენქ საშვალებას, მომავალს მარადიულო ქიცხოვრე (1 პეტ. 3:21).

2. მუს გუვარჩიენთ თე სტატიას?

² ხომ ვა რე მუთუნ თიცალ, მუთ რჭოფუნს დო გინმოდვანქ ნათუას? თაშ ქორენ-და, გიჩქუდას, ნამდა პირველ ვა რექჷ. მილიონობით ადამიანს აჸუ ოთირალქ მუშ აზროვნებაქ დო საქციელქ, ნამდა მზათ ქიჸუკო ნათუაშო. მარა თინეფს გეგშურთეს თექ დო ამდღა ხიოლით დო მთელ გურით ომსახურუნა იეჰოვას. მორთ გუვარჩუათ თინეფიშ შემთხვევეფ, მიდგაქ პირველ საუკუნეს ინათეს. ქიფჩუათ, მუ სირთულეეფს შეხვადეს თე ადამიანეფქ დო მუჭო შეულებ თინეფიშ მაგალითეფს სქან მოხვარა.

ᲡᲐᲛᲐᲠᲘᲔᲚᲔᲤᲘᲨ ᲜᲐᲗᲣᲐ

3. მუ სირთულეეფს შეხვადუდეს სამარიელეფ ნათუაშახ?

³ იესოშ დროს სამარიელეფ რდესჷ რელიგიურ სექტაშ წევრეფ. თინეფიშ უმენტაშ ჩრდილოეთ იუდეას ცხოვრენდჷ, თიმ დროშიან შექემიშ დო სამარიაშ გოხოლუას. მუ აჸიდ ოთირალ თე ხალხის ნათუაშახ? ართ-ართ, მუთ თინეფქ ოკო დოთირუესკო, თინა რდჷ, ნამდა ოკო ქირწმუნესკო მთელ წმინდა წერილ, მუშენდა სამარიელეფს ხვალე ბიბლიაშ პირველ ხუთ წიგნ მიორჩქუდეს ღორონთშე შთაგონებულო, „დაბადებაშე“ „კანონშახ“, დო შილებე წიგნ „იესო ნავეს ძე“ ხოლო. თეწკუმა ართო, მართალ რე, თინეფს მესიაშ მოულაშ წანდეს, მუშენდა კანონიშ 18:18, 19-ს ღორონთ თე დაპირებას არზენდჷ მუშ ხალხის, მარა დინათესკონ, თინეფქ ოკო ირწმუნესკო, ნამდა თე დუნაპირებ მესია იესო ქრისტე რდჷ (იოან. 4:25). მუჭოთ ბიბლიაშე ბგებულენთ, „ბრელ სამარიელქ ქირწმუნ“ თენა (იოან. 4:39). თეს გეძინელ, თიმ დროს სამარიელეფ დო იუდეველეფ შქას მანგარ გლახა ურთიერთობა რდჷ, ათეშენ სამარიელეფს იუდეველეფიშ მიმართ დამოკიდებულება ხოლო აჸიდეს ოთირალ, მუშენდა ბრელ ქრისტიან იუდეველ რდჷ დო თინეფშე აჸიდეს დაგურაფალ (ლუკ. 9:52–54).

4. მუჭოთ საქმეეფიშ 8:5, 6, 14-შე ბგებულენთ, მუ აკეთ ბრელ სამარიელქ, მუჟამსით ფილიპეშ ქადაგება ქიმირჩქილუ?

⁴ მუქ მეხვარ სამარიელეფს ნათუას? მუჟამსით ფილიპექ თინეფს ქუქადაგ ქრისტეშ გურშენ, ნამთინე სამარიელქ „ღორონთიშ სიტყვა მიღჷ“ (წეკითხით საქმეეფიშ 8:5, 6, 14). მართალ რე, ფილიპე იუდეველ რდჷ, მარა თინეფქ იშენით ქუმურჩქილუეს თის. შილებე თე სამარიელეფს მუნეფს წანდესინ თი ხუთ წიგნის ინოჭარილ მუხლეფქ ქუგაშინესკო, ნამუთ ღორონთიშ გურშენ იჩიებ, ნამდა ვეგმირჩქინანს გიშაკერძაფას (კან. 10:17–19). მუჭოდგა ვა რდუკონ, ფაქტ რე, ნამდა თე „ხალხ მთელ გურით ირჩქილუაფუდ თის“, მუდგას ფილიპე ქრისტეშ გურშენ იჩიებუდ, დო ბრელ ნიშანიშ ძირაფაშ უკულ, მუნერით რდჷ, ლეხეფიშ სქილიდაფა დო დემონეფიშ გიშარაჸუა, თინეფქ ქიმეხვადეს, ნამდა ფილიპეს დასურო ღორონთ მუკურდჷ (საქ. 8:7).

5. მუშ გურაფა შეილებ სამარიელეფშე?

⁵ თე სამარიელეფს შეულებუდეს ვა მურჩქილუესკო ფილიპეს თიშ გურშენ, ნამდა თინა იუდეველ რდჷ, ვარდა ხოლო თიშენ, ნამდა, მუდგას თინა ოგურუანდჷ, დღას ვა აფუდეს გუნაგონ. მარა თე ხალხიქ თაშ ვემიქცუ. მუჟამსით სამარიელეფქ დერწმუნეს, ნამდა, მუდგას ფილიპე ოგურუანდჷ, ჭეშმარიტება რდჷ, დრო ვა უღალუნან თეშ დინათეს. ბიბლიას პკითხულენთ: „მუჟამსით ქირწმუნეს სახიოლო ამბე, ნამდგას ფილიპე ღორონთიშ სამეფოშ დო იესო ქრისტეშ სახელიშ გურშენ აცხადენდჷ, ქოთ ქომოლკათაქ დინათ დო ქოთ ოსურკათაქ“ (საქ. 8:12). სი ხოლო ქორწანსო, ნამდა, მუდგას იეჰოვაშ მოწმეეფ ოგურუანა, ჭეშმარიტება რე დო ზუსტას თინეფ შქას რე ნამდვილ ჸოროფა, ნამუთ ჭეშმარიტ ქრისტიანეფიშ გიშაჩინებელ ნიშან რე? (იოან. 13:35). იმწკუმა დრო ვეღა, დინათ დო რჯერდას, ნამდა იეჰოვა გაკურთხენს!

6. მუს ბგურაფლენთ რუბენიშ შემთხვევაშე?

⁶ რუბენს, ნამუთ გერმანიას ცხოვრენს დო იეჰოვაშ მოწმეეფიშ ოჯახის ირდჷ, მოზარდობას ეჭვეფქ გოურჩქინდჷ, მართალო ქოარსებენდ დო ვარ ღორონთ. მუქ მეხვარ თის ეჭვეფიშ ჩათხინაფას? თიქ ქიმეხვად, ნამდა თე საკითხშენ დასაბაღ რჩქინა ვა უღუდ, ათეშენ გეგნოჭყვიდ, უმოს გეგმირკვუკო. რუბენ იჩიებ: „პირად გურაფაშ დროს ქიდიპჭყჷ თე საკითხიშ გიმორკვიება, ნამდა პასუხიქ ქიმიაჩუკო ჩქიმ კითხვეფს. მუსხირენშა მაჸუ გიმარკვიებელქ ევოლუციაშ საკითხიქ“. რუბენქ წეკითხჷ წიგნ „არსებენსო მზრუნველ გუმაჭყაფალ?“ [ქორთ.]. თე პუბლიკაციაქ მანგარო იმოქმედ თიშა დო დერწმუნ, ნამდა იეჰოვა მართალო არსებენს. მთავარ სამმართველოშ ძირაფაქ ხოლო მანგარო იმოქმედ თიშა, მუშენდა ქოძირ, მუშმადიდა ჸოროფა დო ართობა რე ჩქინ მსოფლიო საჯიმალოს. გერმანიაშა დირთუნ, 17 წანერ რდუნ თეშ დინათ. სი ხოლო ღორონთიშ, ბიბლიაშ ვარდა შხვა ნამდგაინ საკითხიშ გურშენ ეჭვეფ ქოიღუნ-და, უმოსო გეგმირკვი ჩქინ პუბლიკაციეფ. „ზუსტ რჩქინაშ“ მეღება მიგეხვარებ, ჩეთხინუე ეჭვეფ (ეფეს. 4:13, 14). თეს გეძინელ, მუჟამსით ქიმირჩქილუანქ შემთხვევეფს, მუნერ ჸოროფა დო ართობა უღჷ ღორონთიშ ხალხის მთელ მსოფლიოს დო თეს სქან კრებას ხოლო ქოძირუნქ, უმოსო ქიგეჸოროფებ ჩქინ მსოფლიო საჯიმალო.

ᲢᲐᲠᲡᲝᲡᲔᲚ ᲡᲐᲕᲚᲔᲨ ᲜᲐᲗᲣᲐ

7. მუ აჸიდ ოთირალ სავლეს?

⁷ მორთ ასე გუვარჩუათ ტარსოსელ სავლეშ მაგალით. თის ჯგირო არჩქილედ იუდაურ კანონეფ დო იუდეველეფ ხოლო მანგარ პატის ცენდეს (გალ. 1:13, 14; ფილ. 3:5). ბრელ იუდეველიშ აზრით ქრისტიანეფ განდგომილეფ რდესჷ. ათეშენ სავლე უდუნდებელო თხოზუდ თინეფს დო ფიქრენდჷ, ნამდა თეთ ღორონთიშ ნებას ასრულენდჷ (საქ. 8:3; 9:1, 2; 26:9–11). იესო ქრისტეს ქირწმუნენდ დო ქრისტიანო გეგნირთუდ-და, სავლე მზათ ოკო რდუკო, ნამდა მუს ხოლო გამათხოზუდეს.

8. ა) მუქ მეხვარ სავლეს, დინათუკო? ბ) საქმეეფიშ 22:12–16-იშ თანახმას, მუჭო მეხვარ ანანიაქ სავლეს? (ქოძირით სურათ).

⁸ მუქ მეხვარ სავლეს ნათუას? მუჟამსით თის იესოქ გეგმეცხად, თოლსინთექ მეუდინ (საქ. 9:3–9). სავლეს სუმ დღას ვართ უჭკუმ დო ვართ უშუმ. მუშო ოკო რაგად, თინა ფიქრენდუკონ იჸიდ თი ირფელშე, მუდგაქ მოხვად. თიქ ქიმეხვად, ნამდა იესო რდჷ მესია დო თიშ მიმაჸუნალეფ ჭეშმარიტ რელიგიას მეჸუნდეს. ალბათ სავლე ღურას ათენდუკონ იჸიდ, მუჟამსით გაშინედ, ნამდა სტეფანეშ ჸვილუას მონაწილენდჷ (საქ. 22:20). სუმ დღაშა თიშა იესოშ მოწაფექ, ანანიაქ, ქიმერთჷ, თოლსინთე დურთინუ დო უწუ, ვეგნოდვუკო ნათუა (წეკითხით საქმეეფიშ 22:12–16). სავლექ თანდაბლობა გეგმირჩქინ, ქალერჩქილუ ანანიაშ ნარაგად დო დინათ (საქ. 9:17, 18).

9. მუშ გურაფა შეილებ სავლეშე?

⁹ სავლეშე ბრელ მუდგარენს ბგურაფლენთ. მაგალთო, თიქ სიამაყეს დო კოჩიშ შიშის ვემეჩ უფლება, ეცილუკო ნათუას. ჭეშმარიტება ქიგეგუნ, თიქ თანდაბლობა გეგმირჩქინ, დოთირუ ცხოვრება დო ქრისტეშ მიმაჸუნალო გინირთჷ (საქ. 26:14, 19). სავლექ თე ნაბიჯ გეგნოდგჷ თიშ უმკუჯინუო, ნამდა უჩქუდ, გამათხოზუდეს (საქ. 9:15, 16; 20:22, 23). თინა ნათუაშ უკულ ხოლო ირიათო იეჰოვაშა რდჷ მენდებულ, მუდგაქ ქიანაშ სირთულეშ გარზებას მეხვარ (2 კორ. 4:7–10). სი ხოლო, მუჟამსით დინათუქ დო იეჰოვაშ მოწმეთ გინირთუქ, შილებე რწმენაშ გამოცდეფს დო სირთულეეფს ქეშეხვადე. მარა ვაგგოჭყორდას, ნამდა ხვალე ვა რექჷ; დარწმუნებულ რდა, იეჰოვა დო იესო ქელაიდირთუნა დო ქიმგეხვარებუნა, ართგურქ ქუდოსქიდე (ფილ. 4:13).

10. მუშ გურაფა შეილებ ანაშ შემთხვევაშე?

¹⁰ გუვარჩუათ ართ ქურთ დაშ, ანაშ, მაგალით, ნამდგაქ აღმოსავლეთ ევროპას მირდჷ. დიამუშიშ ნათუაშ უკულ მუს ხოლო ოკოდ ბიბლიაშ გურაფაშ დოჭყაფა, მუდგაშ უფლება მუამუშიქ ქიმეჩ დო 9 წანერ რდუნ თეშ ქიდიჭყჷ ბიბლიაშ გურაფა. მუჟამსით თენა თიშ ნათესეეფქ დო ოჯახიშ შხვა წევრეფქ ქიგეგეს, ანაშ წინააღმდეგ მიდართეს, მუშენდა ფიქრენდეს, ნამდა მუნეფიშ ჯვეშეფიშ რელიგიაშე ოჭიშიშ რთინაფათ ოჯახის ონჯღორეს ოძირანდჷ. ანაქ 12 წანერო გინირთუნ, მუამუშის ქოთხუ, ნათუაშ უფლება ქიმეჩუკო. მუმას ოინტერესუდ, თენა მართალო ანაშ გადაწყვეტილება რდჷ დოვარ მიდგაინიშ გავლენაშ თუდო რდჷ. ანაქ უწუ, ნამდა ნათუა იეჰოვაშ ჸოროფაქ გინაჭყვიდირაფუ, მუდგაშ უკულ მუამუშიქ უფლება ქიმეჩ, დინათუკო. ანას მუშ ნათესეეფ ნათუაშ უკულ ხოლო გაძიცანდეს დო მანგარ გლახათ ოქცუდეს. ართ ნათესექ თის თეცალ სიტყვეფ უწუ: „ოღონც თენა ვაიქიმინუდუკო დო უზნეო ცხოვრება დოიჭყაფუდუკო დო სიგარეტ გიშუმუდუკო“. მუქ მეხვარ ანას? თინა იჩიებ: „ირიათო ბგინაფლენდჷ, ნამდა იეჰოვა მამანგარენდჷ დო ჩქიმ მშობლეფ ხოლო მანგარო ალამირდეს“. ანა ენიჭარანს თი კონკრეტულ შემთხვევეფს, მუჟამსით იეჰოვაშ ხეს ორწყე მუშ ცხოვრებას. უკულ კანკალეშა გინაჯინე თინეფს, ნამდა ვა გაჭყორდას, მუჭო მეხვარ იეჰოვაქ. წინააღმდეგობას ქეშეხვადუქინ თეშა სი ხოლო ქუგოშქურუნ-და, რშუდას, ნამდა იეჰოვა სი ხოლო მიგეხვარებ (ებრ. 13:6).

ᲙᲝᲠᲜᲔᲚᲘᲣᲡᲘᲨ ᲜᲐᲗᲣᲐ

11. მუქ შილებე ეცილუკო კორნელიუსის ნათუას?

¹¹ ბრელ მუდგარენიშ გურაფა შემლებუნა კორნელიუსიშ მაგალითშე ხოლო. თინა „ცენტურიონ“ რდჷ, მუთ ნიშნენს, ნამდა რომიშ არმიას 100 ჯარიშკოჩ ობარუდ (საქ. 10:1; სქოლიო). თეშ გურშენ, თის ქოთ უბრალო ხალხ შქას დო ქოთ ჯარს მანგარ პატის ცენდესკონ იჸიდ. ბიბლიას კორნელიუსიშ გურშენ ჭარჷ, ნამდა თინა „გაჭირებულეფს ოხვარუდ“ (საქ. 10:2). იეჰოვაქ თიშა მოციქულ პეტრე გოუტუ, ნამდა სახიოლო ამბე გეგნოჩუკო. მუს ქიმინუნდ კორნელიუს, ხომ ვეცილებუდ თის მუშ თანამდებობა, ნამდა გეგნოდგუკო ნაბიჯ დო დინათუკო?

12. მუქ მეხვარ კორნელიუსის ნათუას?

¹² მუქ მეხვარ კორნელიუსის ნათუას? ბიბლიას პკითხულენთ, ნამდა „თიშ ჸუდეშარეფ მორწმუნეეფ დო ღორონთიშ მოშიშეფ რდესჷ“. თის ხოლო ბგებულენთ, ნამდა კორნელიუს „ირიათო ლოცულენდჷ“ (საქ. 10:2). მუჟამსით პეტრექ თის სახიოლო ამბე გეგნოჩ, თიქ დო თიშ ჸუდეშარეფქ ირწმუნეს იესო დო ხეთეშე დინათეს (საქ. 10:47, 48). კორნელიუს მზათ რდჷ, მუთ საჭირო რდჷ ირფელ გაკეთუკო დო მუშ ცხოვრება თეშ დოთირუკო, ნამდა შეიალებუკო მუშ ოჯახწკუმა ართო თაყვანიშცემაქ (იეს. 24:15; საქ. 10:24, 33).

13. მუშ გურაფა შეილებ კორნელიუსიშ მაგალითშე?

¹³ სავლეცალო, კორნელიუსიქ ხოლო ვეცილუ მუშ თანამდებობა ქრისტიანო გინორთას. დინათენ თიშენ სი ხოლო ხომ ვა გაფჷ სერიოზულ ცვლილებეფ ოკეთებელ სქან ცხოვრებას? თაშ ქორენ-და, იეჰოვა აუცილებერო ქიმგეხვარებ. იეჰოვაშ მსახურებას დო ბიბლიურ პრინციპეფით ცხოვრებას გეგნოჭყვიდუნქ-და, რჯერდას, ნამდა ღორონთ აუცილებერო აკურთხენს სქან თე გადაწყვეტილებას!

14. მუშ გურაფა შეილებ ციოშიშ მაგალითშე?

¹⁴ იაპონიას მახორუ ჩქინ ჯიმას, ციოშის ხოლო, მუდგარენეფქ აჸუ ოთირალქ სამუშას, ნამდა მზათ ქიჸუკო ნათუაშო. თინა დირექტორიშ მოადგილე რდჷ ართ ცნობილ სკოლას, სოდეთ ყვავილეფიშ გონწყუალას ოგურუანა. თიშ უნჩაშ დაკრძალვაშ ცერემონიალეფს ყვავილეფიშ გაფორმებას ხელმძღვანელენდჷ. მარა, მუჟამსით მუს ვალინედ, ციოში მიშჷ თიშ მანგიორო, მუდროსით შხვადოშხვა ბუდისტურ რიტუალს მონაწილებაშ მეღება უხვადუდ. მუჟამსით ციოშიქ ბიბლიაშე ქიგეგ, მუ მდგომარეობას რენა ღურელეფ, ქიმეხვად, ნამდა თე რიტუალეფს მონაწილებაშ მეღებას გაგრძელენდ-და, ვეშიალებედ ნათუა. ათეშენ გეგნოჭყვიდ, ვარია ქოთქუკო ბუდისტურ რიტუალეფს მონაწილებაშენ (2 კორ. 6:15, 16). ციოშიქ მუშ უნჩაშის ქუდურაგადუ თე საკითხიშ გურშენ. მუ რდჷ შედეგ? თის ვართ სამუშა უდინუაფ დო ვართ თე რიტუალეფს აჸიდ მონაწილება მიოღებელ. ბიბლიაშ გურაფაშ დოჭყაფაშე სოდგარენ ართ წანაშა ციოშიქ დინათ.a ღორონთის გურ გუხარენ თიშენ სამუშაწკუმა დაკავშირებით სი ხოლო ქუგაჸუ მუდგარენეფქ ოთირალქ-და, დარწმუნებულ რდა, ნამდა იეჰოვა ვართ სი დო ვართ სქან ოჯახის ვემგარკენა აუცილებერს (ფსალმ. 127:2; მათ. 6:33).

ᲙᲝᲠᲘᲜᲗᲔᲚᲔᲤᲘᲨ ᲜᲐᲗᲣᲐ

15. მუქ შილებედ ეცილუკო კორინთელეფს ნათუას?

¹⁵ კორინთის ფარაშ მეტ მუთუნ ვაინტერესუდუნ ფერ დო ზნეობრივო დონთხაფილ ხალხ ცხოვრენდჷ. თინეფ თიცალ ცხოვრებაშ წესის მეჸუნდეს, ნამდგას ღორონთ ვეწონუანდჷ. ათეშენ, თეცალ ხალხ შქას მახორუ კოჩშო ვეჸუაფუდ ადვილ სახიოლო ამბეშ მეღება. მარა მუჟამსით მოციქულ პავლექ ქიმერთჷ თე ქალაქშა დო სახიოლო ამბე ქუქადაგ თექიანეფს, „ბრელ კორინთელქ . . . ირწმუნ დო დინათ“ (საქ. 18:7–11). პავლექ ხილუა ქოძირ, სოდეთ იესო ქრისტექ უწუ: „თე ქალაქის ბრელ მირწმუნენს“. ათეშენ პავლექ ხოლო წანმოწანა დო გვერდის გაგრძელ თექ ქადაგება.

16. მუქ მეხვარ კორინთელეფს, ჩეთხინუესკო ირფელ, მუთ ეცილებუდეს ნათუას? (2 კორ. 10:4, 5).

¹⁶ მუქ მეხვარ კორინთელეფს ნათუას? (წეკითხით 2 კორინთელეფიშ 10:4, 5). ღორონთიშ სიტყვაქ დო იეჰოვაშ ძალიერ წმინდა შურქ ქიმეხვარ კორინთელეფს, დუდშე ბოლოშა დოთირუესკო მუნეფიშ ცხოვრება (ებრ. 4:12). სახიოლო ამბეშ მეღებაშ უკულ თე ადამიანეფქ ჩეთხინუეს თიცალ ჩვევეფ, მუნერით რე შუმილიობა, ხირუა დო ჰომოსექსუალიზმ (1 კორ. 6:9–11).b

17. მუშ გურაფა შეილებ კორინთელეფიშ შემთხვევაშე?

¹⁷ მართალ რე, კორინთელეფს ბრელ მუდგარენ აფუდეს ოთირალ, მუდგაშ კეთება ვეჸუაფუდ ადვილ, მარა თინეფს ვა უფიქრებუნა, ნამდა თენა დღას ვეგშალედეს დო დღას ვეგნირთუდეს ქრისტიანეფო. თე ხალხიქ ქიმინდომ, ქიგიოდირთუკო ჭიფე შარას, ნამუთ ულიებ სიცოცხლეშა ქიმიჸონანდ (მათ. 7:13, 14). სი ხოლო ხომ ვაბრძოლუქ მუდგაინ გლახა ჩვევას, მუთ ნათუას გოცილ? მუთუნით ვემიოტუა ბრძოლა. ქოთხი იეჰოვას წმინდა შურ, ნამდა ქიმგეხვარას ცდუნებაშა გერჯგინას.

18. მუშ გურაფა შეილებ მონიკაშ მაგალითშე?

¹⁸ საქორთუოს მახორუ ართ და, მონიკა, ოცადუდ, მიოტუკო უზრდელურ ჩიება დო ღორონთის ვა მოწონდუნ ფერ გართობა, ნამდა მზათ ქიჸუკო ნათუაშო. თინა იჩიებ: „ლოცვა მარზენდჷ ძალას, დოფთირეკო თინა, მუთ ოთირალ მაფუდ. იეჰოვას უჩქუდ, ნამდა შურ დო გურით მოკოდ სწორიშ კეთება, ათეშენ ირიათო მოხვარუდ დო ალამირდჷ“. მონიკაქ 16 წანერ რდუნ თეშ დინათ. სი ხოლო ხომ ვაიღ თიცალ ჩვევა, ნამუთ ჩათხინაფალ გაფჷ, ნამდა შეგალებუას იეჰოვას მუშ მოსაწონო ცე თაყვან? თაშ ქორენ-და, ვემიოტუა ლოცვა დო ქოთხი ღორონთის, ქიმერჩას ძალა თირუაშო. რჯერდას, თინა არძას „ხეგოფაჩილო არზენს წმინდა შურს“ (იოან. 3:34).

ᲠᲬᲛᲔᲜᲐᲗ ᲒᲕᲐᲚᲔᲤᲡ ᲒᲔᲒᲜᲝᲓᲒᲣᲜᲥ

19. მუ მიგეხვარებ გვალაცალ სირთულეეფშა გერჯგინას? (ქოძირით სურათ).

¹⁹ მნიშვნელობა ვა უღჷ, მუ სირთულეწკუმა გიხვადუ ბრძოლა დო მუ გოცილ ნათუას. დარწმუნებულ რდა, იეჰოვას მანგარო უჸორქ დო ოკო, თიშ დიდ ოჯახიშ წევრ რდე. ართშა იესოქ მუშ მოწაფეეფს თეცალ სიტყვეფ უწუ: „დონგიშ თასიშმაჭიჭა რწმენა ვარა ქოიღუდან დო თე გვალას უწუათ, თავრეშე თევრე გინილია, გინილენს, დო ვა გაკეთებენან ფერ მუთუნ ვეჸუაფ“ (მათ. 17:20). იესოქ თე სიტყვეფ უწუნ თინეფ გვალო მუსხირენ წანა რდჷ, თიშ მიმაჸუნალეფ რდესინ, ათეშენ რწმენაშ გამანგარება ოსაჭირუდეს. მარა იესოქ დარწმუნ თინეფ, ნამდა ძალიერ რწმენას გავითარენდეს-და, იეჰოვა აუცილებერო ქიმეხვარებუდ გვალაცალ სირთულეეფიშ გინოღალას. რჯერდას, იეჰოვა სი ხოლო ქიმგეხვარებ თეშ კეთებას.

20. მუშ სურვილ გოირჩქინ თე სტატიას მოშინაფილ პირველ საუკუნეშ დო თანამედროვე დროს მახორუ ქრისტიანეფიშ მაგალითეფქ?

²⁰ ნათუას მუდგარენ გოცილუნ ქარწყექ-და, დრო ვეღენ თეშ ხეთეშე ჩეთხინე თინა. გუგამანგარენს დო გურშა ქელაიკინანს მუჭოთ პირველ საუკუნეშ, თეშ თანამედროვე დროს მახორუ ქრისტიანეფიშ მაგალითეფ. იმენდ მიღუნა, თინეფიშ შემთხვევეფშე დაფიქრება მიგეხვარებ, დუდ მეუძღვინე იეჰოვას დო დინათე. თენა რე არძაშ უჯგუშ გადაწყვეტილება ცხოვრებას!