მუ ჯგირობუა მოუღ ჩქინდა თის, ნამდა იეჰოვას უჸორთ?

1. მუთ შემლებუნა გურ გაუხარათ იეჰოვას?

ᲬᲔᲠᲛᲘᲓᲒᲘᲜᲘᲗ, ნამდა მიდგაინს თიცალ საჩუქარ ქაჩუქით, მუთ ქოთ მანგარ სქვამ რე დო ქოთ გიმადირთუნ ფერ მუდგარენ რე. მუს იგინანდით, თე პიროვნებაქ თქვან საჩუქარ სოდგარენ ქიმკაჩუ დო შურო ქოუღუნ თინა ხოლო ვა შუნ-და? მუშო ოკო რაგად, მანგარო ქელგაჭუდეს გურ. თქვა ალბათ თინა გახიოლედეს, ნამდა გეგმურინუაფუდუკო საჩუქარ დო მარდულ გაფუდესკო თიშო. მუშენ მიპჸუნით თე მაგალით? იეჰოვაქ ხოლო მანგარ დიდ საჩუქარ მიკეთეს – მუშ სქუა გაწირ ჩქინო. წერმიდგინით, მუჭო გეხარებ თის გურ, მუჟამსით დუვაფასენთ თე სასწაულ საჩუქარს დო თი დიდ ჸოროფას, ნამდგაქ თის თე საჩუქარ ოკეთებაფუ ჩქინდა! (იოან. 3:16; რომ. 5:7, 8).

2. მუს გუვარჩიენთ თე სტატიას?

² დროშ ულაწკუმა ართო, გიშაჸიდირალიშ გურშენ იეჰოვაშ მიმართ მარდულობაქ მემდინეს-და, თენა თიცალ იჸუაფუდ, ნამდა თიშ საჩუქარ სოდგარენ ქიმთვოჩვეთკო დო შურო ვეგიფშინითკო. თექ ვა მოხვადასინ, ხშირას ოკო იფიფქრათ, მუშმაშხვა მუდგარენ მიკეთეს იეჰოვაქ დო იესოქ. ზუსტას თეშ კეთებას ქიმმეხვარებუნა თე სტატია. გუვარჩიენთ, მუ ჯგირობუა მოუღ გიშაჸიდირალს ჩქინდა ამდღა დო მუ კურთხევეფს მომღანა მომავალს. ქობძირუნთ თის ხოლო, მუჭო შემლებუნა მარდულობაშ გიმოხანტუა იეჰოვაშ ჸოროფაშო, განსაკუთრებულო, გოშინაშ ონჯუაშ პერიოდის.

ᲛᲣ ᲯᲒᲘᲠᲝᲑᲣᲐ ᲛᲝᲣᲦ ᲒᲘᲨᲐᲸᲘᲓᲘᲠᲐᲚᲡ ᲐᲛᲓᲦᲐ

3. მუ რე ართ-ართ ჯგირობუა, მუთ გიშაჸიდირალს მოუღ ამდღა ჩქინდა?

³ ქრისტეშ მსხვერპლის ამდღა ხოლო მოუღ ჩქინდა ჯგირობუა. მაგალთო, თიშ ჭყოლოფათ იეჰოვა ცოდეფს მაპატიენა. ღორონთ მუთუნ ვალდებულ ვა რე, თენა აკეთასინ; თეს მთელ გურით ოკონ თიშენ ორთჷ. იეჰოვაშ პატიებაშო მარდულ ფსალმუნმაბირექ თქუ: „იეჰოვა, მუშმაჯგირა დო მუნერ მპატიებელ რექჷ“ (ფსალმ. 86:5; 103:3, 10–13).

4. მიშო გინიგ იეჰოვაქ გიშაჸიდირალ? (ლუკ. 5:32; 1 ტიმ. 1:15).

⁴ ნამთინე ფიქრენს, ნამდა ვა რე იეჰოვაშე პატიებაშ მეღებაშ ღირს. ალალას ქოფთქუათინ, მართალო, ნამთინს ვა მაფუნა დამსახურებულ თენა. პავლე მოციქულს ხოლო ჯგირო არჩქილედ თენა, ათეშენ თქუ: „მოციქულ ბჯოხოდასინ თიშ ღირს ხოლო ვა ვორექ“. მარა დეკვირით, უკულ მუს იჩიებ: „ღორონთიშ ჭყოლოფათ ვორექ თინა, მუთ ვორექ“ (1 კორ. 15:9, 10). მუჟამსით მნარღენთ ჩქინ ცოდეფს, იეჰოვა მაპატიენა; თიშ გურშენ ვარ, ნამდა დამსახურებულ მაფუნა თენა, თიშენ, ნამდა მანგარო უჸორთ. თაშ ნამდა, იეჰოვაშე პატიებაშ მეღებაშ ღირს ვა რეთინ ქოფიქრენთ-და, ხშირას ქიგიშინით, ნამდა თიქ გიშაჸიდირალ დღას მუთუნ ვა დუშებუნ ფერეფშო ვარინ, ცოდამ ადამიანეფშო გინიგ, მით ნარღენა დაშებულს (წეკითხით ლუკაშ 5:32; 1 ტიმოთეშ 1:15).

5. მუშენ ვა მარაგადენა ნამთინს, ნამდა იეჰოვაშე ცოდეფიშ პატიება დამსახურებულ მაფუნა?

⁵ იეჰოვას ვითობით წანა რე ვომსახურუთინ ფერეფქ ხოლო ოკო ვეფიფქრათ, ნამდა თიშ ჭყოლოფა დო ცოდეფიშ პატიება დამსახურებულ მაფუნა. მუშო ოკო რაგად, იეჰოვა აფასენს დო დღას ვა გომჭყოლიდუანა ჩქინ ართგურ მსახურებას, მარა თიქ მუშ სქუაშ სიცოცხლე ჩქინ მსახურებაშ მანგიორშა ვარინ, საჩუქარო მუჩეს (ებრ. 6:10). თაშ ნამდა, იეჰოვაშ მსახურებას ბრელ მაფუნა კეთებულინ თეთ თიშე პატიება დამსახურებულ მაფუნან ქოფიფქრენთ-და, თენა თიშ რაგად იჸი, ნამდა იესოშ გიშაჸიდირალ მუთუნშო ვა მოსაჭირუდეს დო თიქ ტყურელო ღურჷ (ქეშუდარით გალატელეფიშ 2:21).

6. მუშენ ხანდენდჷ პავლე მანგარო იეჰოვაშ მსახურებას?

⁶ პავლეს უჩქუდ, ნამდა იეჰოვაშ მსახურებას მუდგაზმა ვაკეთუკონ, დამსახურებულო დღას ვემიაღებედ თიშე პატიება. იმწკუმა მუშენ ხანდენდჷ თეზმას ღორონთიშ მსახურებას? იეჰოვაშ ჭყოლოფა დემსახურუკონ თიშენ ვარინ, თიშ ოძირაფალო, მუნერ მარდულ აფუდ თის გიმორჩქინელ ჭყოლოფაშენ (ეფეს. 3:7). ჩქი ხოლო დუდგინოდვალირო თიშენ ვა ვომსახურუთ იეჰოვას, ნამდა თიშ ჭყოლოფა დებმსახურათ; თეს სიმარდულიშ გურშენ ვორთუთ.

7. ხოლო მუ ჯგირობუა მოუღ გიშაჸიდირალს ამდღა? (რომ. 5:1; იაკ. 2:23).

⁷ ხოლო ართ ჯგირობუა, მუთ გიშაჸიდირალს ამდღარშე მოუღ ჩქინდა, თინა რე, ნამდა შემლებუნა ხოლოშიან ურთიერთობა მიღუდან იეჰოვაწკუმა.a მუჭოთ წოხოლენ სტატიას ჭარუდ, ნამთინ ვა დაბაბდებეთ თეშ, ნამდა იეჰოვაწკუმა ჯგირ ურთიერთობა მიღუდესკო. გიშაჸიდირალიშ ჭყოლოფა რე, ნამდა შემლებუნა ღორონთწკუმა მშვიდობა მიღუდან დო ხოლოს ვორდათ თიწკუმა (წეკითხით რომაელეფიშ 5:1; იაკობიშ 2:23).

8. მუშენ ოკო ვაფუდათ იეჰოვას მარდულ, ნამდა ლოცვათ შემლებუნა დურაგადუათ თის?

⁸ მორთ ხვალე ართ მხარე გეპჭოფათ, მუდგაშ პატი იეჰოვაწკუმა ხოლოშიან ურთიერთობაშ ჭყოლოფათ მიღუნა. თენა რე ლოცვა. იეჰოვა ხვალე თიმწკუმა ვამრჩქილენა, მუჟამსით თიშ ხალხ ართო აკიფშაყარუთ. თინა თითოეულიშ პირად ლოცვეფს ხოლო ირჩქილუანს. ლოცვას შეულებ დუმამშვიდან. მარა ხვალე თენა ვარინ, შეულებ იეჰოვაწკუმა ხოლო უმოსო დუმაახლოვან (ფსალმ. 65:2; იაკ. 4:8; 1 იოან. 5:14). იესო ხოლო ხშირას ლოცულენდჷ დედამიწას რდუნ თიმწკუმა, მუშენდა უჩქუდ, ნამდა მუამუშ ირო ურჩქილედ, დო ლოცვა მეხვარებუდ, ვადინუკო თიწკუმა ხოლოშიან ურთიერთობა (ლუკ. 5:16). მართალო, მუნერ მარდულეფ ოკო ვორდათ, ნამდა იესოშ მსხვერპლიშ ჭყოლოფათ, შემლებუნა იეჰოვაშ მეგობრეფ ვორდათ დო ლოცვაშ საშვალებათ ქუდურაგადუათ თის!

ᲛᲣ ᲯᲒᲘᲠᲝᲑᲣᲐᲡ ᲛᲝᲛᲦᲐᲜᲐ ᲒᲘᲨᲐᲸᲘᲓᲘᲠᲐᲚ ᲛᲝᲛᲐᲕᲐᲚᲡ

9. მუ ჯგირობუას მოუღანს გიშაჸიდირალ იეჰოვაშ ართგურ მსახურეფს მომავალს?

⁹ მუ ჯგირობუას მოუღანს გიშაჸიდირალ იეჰოვაშ ართგურ მსახურეფს მომავალს? თინეფ ულიებ სიცოცხლეს მიღენა. ბრელ ადამიანს ვა ჯერსჷ თეშ, მუშენდა დღამუშის ადამიანეფ ირო ღურუნა. მარა სინამდვილეს, იეჰოვაქ ადამიან თი მიზანით გაჭყჷ, ნამდა დღას ვა ღურუკო. ადამს ვა დუშებუდუკონ, ულიებ სიცოცხლე მითინშო ვეჸიდ გასაკვირ, მუშენდა მითინ ვა ღურუდუკონ იჸიდ. მართალ რე, ულიებ ცხოვრება იჸუაფუნ თენა ამდღა ჭიჭე ძნელ დაჯერებელ ქორე, მარა თიქ ქუმმაჩანინ თიშო იეჰოვას თიშმადიდა ფას აფჷ გინოგაფილ, ნამდა თენა აუცილებერო ქუმოხვადუ (რომ. 8:32).

10. მუშ იმენდ უღუნა ცხებულეფს დო შხვა შხურს?

¹⁰ მართალ რე, ულიებ სიცოცხლეს მომავალს მიბღენთ, მარა იეჰოვას ოკო, ასეშე ფიფქრენდათ თე დროშე. მაგალთო, ცხებულეფ ზეცას მიღენა ულიებ სიცოცხლეს დო ქრისტეწკუმა ართო იმმართველენა მთელ დედამიწაშა (გამოცხ. 20:6). შხვა შხურ სამოთხეთ გინორთელ დედამიწას იცხოვრენს, სოდეთ ვართ ჭუა იჸუაფ დო ვართ ნგარა (გამოცხ. 21:3, 4). შხვა შხურს ქაკათუთ-და, დღას ვეფიქრათ, ნამდა დედამიწას ულიებ ცხოვრება ზეცას ცხოვრებაშე ნაკლებ კურთხევა რე. იეჰოვაქ ადამიანეფ ზუსტას დედამიწას ცხოვრებაშო გუმოჭყეს. თაშ ნამდა, ბედნერ იჸუაფუთ დედამიწას ულიებ ცხოვრებათ.

11, 12. ნამ კურთხევეფშე შემლებუნა იფიფქრათ? (ქოძირით სურათეფ).

¹¹ წერმიდგინით, მუნერ იჸუაფ ცხოვრება სამოთხეთ გინორთელ დედამიწას. ვა გაშქურნენა ლახალაშა დო ღურაშა (ეს. 25:8; 33:24). იეჰოვა დაკმაყოფილენს არძა ადამიანიშ სწორ სურვილეფს. მუშ დოგურაფა გოკონა ახალ ქვეყნიერებას? შილებე გოკონა, უმოს ქიგეგათ ცხოველეფიშ დო ფრინველეფიშ გურშენ; ნამდგაინ მუსიკალურ ინსტრუმენტიშ მეგამაშ დოგურაფა შილებე გოკოდან; ვარდა ხოლო ხანტუაშ დოგურაფა. სამოთხეს საჭირო იჸუაფ შენობეფიშ დაპროექტება შეულებუნ ფერ ხალხ, მოხელეეფ, ოჭკუმალიშ კეთება შეულებუნან ფერეფ დო დიხაშ დამუშება დო ეზოშ საქვარ ახერხანან ფერეფ (ეს. 35:1; 65:21). რახანს მარადიულო იფცხოვრენთ, მუზმა გოკონან თიზმა დრო გაღვენუნა ახალ მუდგარენეფიშ დაგურაფალო.

¹² თოლშა ქეწირინეთ, მუნერ იჸუაფ გათელებურეფიშ დოხვალამა (საქ. 24:15). ვარდა მუ მანგარ იჸი გუნაჭყეფუეფიშ გურშენ უმოსიშ გაგება, მუთ იეჰოვას უჯგუშო გუმოჩინებაფუანა (ფსალმ. 104:24; ეს. 11:9). მუთ ირფელიშ უჯგუშ რე, ვა ვაშენდათ იჸი მუთუნს, ათეშენ სინდის ვეშმაწუხენან თეშ ვემსახურებუთ იეჰოვას დო ვა მაჸინა ოთხუალ პატიება! მუნერო ოკო ფთირუათ თეცალ კურთხევეფ „ჭიჭე ხანით . . . ცოდამ ცხოვრებაშე“ გემოშ ძირაფაშა?! (ებრ. 11:25). თეცალ კურთხევეფ ირნერ მსხვერპლშა ღირჷ, ნამდგაშა შილებე ამდღა მაჸუან ოულარქ. ირო ოფიქრებელ დო ონატრებელ ვა მაჸინა სამოთხეს ცხოვრება, თე დრო მალას ქუდოდირთუ. მუთ ჟი იფჩითინ, მუთუნიშ იმენდ ვა მაღვენუდეს, იეჰოვას თიშმანწარას ვა უჸორდითკონ, ნამდა მუშ სქუა შემოპწირესკო!

ᲥᲐᲫᲘᲠᲘᲗ ᲘᲔᲰᲝᲕᲐᲡ, ᲜᲐᲛᲓᲐ ᲛᲐᲠᲓᲣᲚ ᲐᲤᲣᲗ

13. მუჭო შემლებუნა ვოძირუათ იეჰოვას, ნამდა მარდულ ვაფუთ გიმორჩქინელ ჸოროფაშენ? (2 კორ. 6:1).

¹³ მუჭო შემლებუნა ვოძირუათ იეჰოვას, ნამდა მარდულ ვაფუთ გიშაჸიდირალშო? თიშ მსახურებაშ ცხოვრებას პირველ ადგილს გერნაფათ (მათ. 6:33). იესოქ თიშენ ღურჷ, ნამდა „ცოცხალეფქ მუნეფიშ დუდშო ვეცოცხლანინ, თიშო იცოცხლან, მიდგაქ მუნეფშო ღურჷ დო გეთელ“ (2 კორ. 5:15). სინამდვილეს ვა მოკონა, თეშ ბღებულენდათ ღორონთიშ ჭყოლოფას, ნამდა ვენვანჭუდათ თიშ მიზანს (წეკითხით 2 კორინთელეფიშ 6:1).

14. მუჭო შემლებუნა ვოძირათ, ნამდა ვონდუთ იეჰოვაშ ხელმძღვანელობას?

¹⁴ იეჰოვაშ ჸოროფაშო მარდულობაშ გიმოხანტუა თით ხოლო შემლებუნა, ნამდა ვენდათ თიშ ხელმძღვანელობას. მუს ნიშნენს თენა? შხვადოშხვა გადაწყვეტილებაშ მეღებაშ დროს, მაგალთო, მუსხით ვათხოზათ განათლებაშ მეღებას ვარდა დიპჭყათ დო ვარ ნამდგაინ სამუშა, ოკო დეფიფქრათ, მუ ოკო იეჰოვას ვაკეთათინ (1 კორ. 10:31; 2 კორ. 5:7). მუჟამსით თეცალ სიტუაციეფს ვონდუთ იეჰოვას, ხოლო უმოსო მემანგარებუნა რწმენა დო ვეახლოებუთ თის. შედეგო, მომავალიშ იმენდ ხოლო უმოსო მემანგარებუნა (რომ. 5:3–5; იაკ. 2:21, 22).

15. მუჭო შემლებუნა მარდულობაშ გიმოხანტუა გოშინაშ ონჯუაშ პერიოდის?

¹⁵ ხოლო რე ართ საშვალება, მუდგათ შემლებუნა მარდულობა გეგმოფხანტათ იეჰოვაშ ჸოროფაშენ. გოშინაშ ონჯუაშ პერიოდის შემლებუნა ქუვოძირათ იეჰოვას, მუჭო ვაფასენთ გიშაჸიდირალს. მაგალთო, ჯგირ იჸი, გეგმეფ თეშ ქუდვონწყუათ, ნამდა აუცილებერო ქიდვესწრათ გოშინაშ ონჯუას, დო ხვალე ჩქი ვარინ, შხვეფ ხოლო ქუდვაპატიჟათ (1 ტიმ. 2:4). დაპატიჟებაშ დროს გეუწყით თინეფს, მუ ხვადუ გოშინაშ ონჯუას. თეშო შეილებუნა გეგმირინუათ ჩქინ ვებსაიტის jw.org მოჩამილ ჟირ ვიდეო „მუშენ ღურ იესოქ?“ დო „იესო ქრისტეშ ღურაშ გოშინაშ ონჯუა“. უხუცესეფქ ირნერო ოკო ეცადან არააქტიურეფიშ დაპატიჟებას. წერმიდგინით, მუშმადიდა ხიოლ იჸუაფ ქოთ ზეცას დო ქოთ დედამიწას, იეჰოვაშ დინაფილ შხურ ოჭყიშალს დართუნ-და (ლუკ. 15:4–7). მორთით, გოშინაშ ონჯუაშ დროს ყურადღებას ვორდათ, ნამდა ხვალე ართმაჟიას ვარინ, განსაკუთრებულო ახალეფს დო თინეფს ქეშეფხვადათ გემუანო, მით ბრელ ხან რე, ვა დასწრებუნა თე ღონისძიებას. ქუვოძირათ თინეფს, ნამდა მანგარო მოხიოლუნა, მორთესინ! (რომ. 12:13).

16. მუშენ იჸუაფ ჯგირ, გოშინაშ ონჯუაშ პერიოდის უმოს აქტიურ მონაწილება მიბღათ მსახურებას?

¹⁶ ჯგირ იჸუაფ, მსახურებას ხოლო უმოს აქტიურო მიბღათ მონაწილება გოშინაშ ონჯუაშ პერიოდის. თენა ჯგირ საშვალება რე, ნამდა მარდულობა გეგმოფხანტათ თი ირფელშო, მუთ იეჰოვაქ დო იესოქ აკეთეს ჩქინო. მუთ უმოს მონაწილებას ბღებულენთ იეჰოვაშ მსახურებას, თით უმოსო ბგინაფლენთ თიშ მოხვარას დო შედეგო, უმოსო მემანგარებუნა ნდობა ხოლო თიშ მიმართ (1 კორ. 3:9). თეწკუმა ართო, ჯგირ იჸუაფ, ქიმიაჸუნათ ბიბლიაშ კითხირიშ გეგმას, ნამუთ მოჩამილ რე ბროშურას „წმინდა წერილეფიშ ირდღაშიან გარჩიება“ ვარდა შქამარაშ შეხვალამაშ ომეცადინებელ ფურცელს. შეილებუნა თექ მოჩამილ ნამდგაინ ბიბლიურ მონაკვეთ უმოს ტომბაშე გეგმირკვიათ.

17. მუშ ძირაფა ოხიოლ იეჰოვას? (ქოძირით ჩარჩო „მუჭო შეილებუნა გიმირჩქინათ მარდულობა იეჰოვაშ ჸოროფაშო“).

¹⁷ შილებე სიტუაცია ხეს ვაინწყუნდან, ირფელ გაკეთათ, მუდგას თე სტატია ელამჩანა. თაშ ქორენ-და, რშუდან, იეჰოვა შხვას დღას ველაიჸუნუანა. თინა ორწყე თქვან გურს დო მანგარო ოხიოლ თიშ ძირაფა, მუჟამსით მთელ გურით გიმირჩქინანთ მარდულობას თიშ ძვირფას საჩუქარშო, გიშაჸიდირალშო (1 სამ. 16:7; მარ. 12:41–44).

18. მუშენ ვაფუთ მარდულ იეჰოვას დო იესოს?

¹⁸ გიშაჸიდირალიშ ჭყოლოფა რე თინა, ნამდა იეჰოვა მაპატიენა ცოდეფს, შემლებუნა ვორდათ თიშ მეგობრეფ დო მიღუნა ულიებ სიცოცხლეშ იმენდ. მორთ ირიათო მარდულ ვორდათ იეჰოვაშ ჸოროფაშენ. ზუსტას თე ჸოროფაქ გინაჭყვიდირაფუ თის, ქომუჩესკო თე ირფელ (1 იოან. 4:19). მარდულეფ ოკო ვაფუდათ იესოს ხოლო, ნამდგაქ თიშმანწარას ქომიჸოროფუეს, ნამდა მუშ სიცოცხლე დათმჷ ჩქინ გიშაჸიდირალო! (იოან. 15:13).